Alcaldía

Este xoves, ás 7 da tarde, no Círculo Recreativo e Cultural, ‘Festival de Nadal da Escola Municipal de Música’

Dentro do programa de lecer destas festas, este xoves chega un dos días máis salientábeis co ‘Festival de Nadal da Escola Municipal de Música’, ás 7 da tarde no Círculo Recreativo e Cultural, no que participarán alumnas e alumnos de Música e Movemento, Coral Infantil, Coral Polifónica, Grupo Tradicional, Grupo de Guitarras, Orquestra e Banda de Música Municipal.

A Escola Municipal de Música do Porriño, unha das máis importantes do sur de Galicia, conta  con 14 profesores que semanalmente imparten clases das diferentes especialidades instrumentais a máis de 150 alumnos de idades comprendidas entre os 3 e 74 anos. Esta escola municipal está integrada por cinco agrupacións que dan cabida non só aos alumnos da escola, senón tamén a todos os vecinos e veciñas de O Porriño.

A Escola Municipal de Música de O Porriño está configurada como un primeiro paso para todos os alumnos que desexen estudar académicamente nun conservatorio, xa que os seus curso de Grao Elemental está programados seguindo as pautas de esixencia para una futura proba de acceso a grao medio. Na Escola Municipal de Música ademais, impártense clases ata segundo curso de Grao Medio.

20/12/2018 in Alcaldía, Cultura e festas

Concentración en rexeitamento do asasinato de Laura Luelmo

A alcaldesa vén de convocar ás porriñesas e porriñeses, en nome da Corporación,a unha concentración este mércores, día 19 de decembro, ás 12:00 h. diante do Concello, para amosar o apoio e a solidariedade coa familia de Laura Luelmo, rexeitar o seu asasinato, e deixar claro que as veciñas e veciños do Porriño berran ben alto Basta Xa!

18/12/2018 in Alcaldía

O Goberno local amosa o seu estupor pola decisión dos responsábeis da Interrunning, lamenta a súa deslealdade cos porriñeses e anuncia que asumirá, sen intermediarios, a organización desta proba

A alcaldesa, Eva García de la Torre, e Manuel Carrera, tenente de alcalde e concelleiro de Deportes do Concello do Porriño, veñen de amosar a súa estupefacción logo de coñecer a decisión, unilateral, dos responsábeis da Interrunning de non seguir  organizando esta proba no Porriño, logo de 12 anos.

García de la Torre e Carrera lamentan esta decisión e rexeitan as formas nas que vén de anunciarse a mesma por parte dos ata hoxe organizadores: nas redes sociais e sen contactar en momento algún, dende a finalización das carreiras deste ano, nin co concelleiro de Deportes nin coa alcaldesa para exponer as posibles diferencias ou discrepancias que puidesen ter co Concello do Porriño.

A alcaldesa e o concelleiro de Deportes subliñan que nunca, en ningún momento nin de xeito algún, os organizadores da Interrunning trasladaron queixa, desencanto ou problema pola actuación do Concello: ao contrario, especialmente este 2018 amosáronse moi satisfeitos porque foi a edición na que máis atletas participaron.

Eva García de la Torre e Manuel Carrera lembran que a colaboración do Goberno local e do Concello do Porriño foi total coa Interrunning, tanto no que se refire nas achegas para esta proba, que na última edición subiron ata os 15.000€, coma en medios materiais e humanos- para facer posible que a proba puidese disputarse, coma a actuación de voluntarios, membros de Protección Civil do Porriño e axentes da Policía Local-.

En calquera caso, o Goberno local, que deplora a deslealdade co Concello do Porriño e cos porriñeses por parte dos responsábeis desta cita, non consentirá que os milleiros de deportistas que participan cada ano se vexan defraudados e, por tanto, na vindeira edición o Concello asumirá directamente a organización da Interrunning o Porriño.

“Non imos a tolerar que mediadores, intermediarios ou xestores externos nos poñan na picota por temas externos, completamente, á Alcaldía e ao Goberno local”. 

18/12/2018 in Alcaldía, Deportes

A alcaldesa e o delegado de Zona Franca, xunto co presidente e o xerente da Granxa consideran a radicacion de novas empresas no polígoo e a apertura da demandada gardería infantil no mesmo

Analizar as posibilidades que se abren no concello do Porriño para localizar novo chan industrial para a radicación de empresas, foi o centro da xuntanza mantida este mércores pola mañá, nas oficinas de Zona Franca, entre o delegado do Consorcio, David Regades, e a alcaldesa, Eva García de la Torre.

Dada a relevancia do tema, sumáronse á reunión a directora de Promoción Económica do Consorcio, Rosa Eguizábal, o presidente da entidade urbanística do Polígono da Granxa, Indalecio Cuevas, e o xerente desta entidade, David Sobral.

Todos estiveron dacordo en que no Porriño pódense  atropar espazos acaídos para urbanizar e acoller sectores que proporcionen servizos a toda a comarca viguesa, o cal farase realidade en moi pouco tempo.

Como sinala a alcaldesa, na mesma xuntanza “estudamos a posibilidade de habilitar un espazo no inmoble do Centro de Iniciativa Empresarial (CIE) de A Granxa, propiedade de Zona Franca, para abrir no mesmo a gardería, tan demandada polos traballadores e empresas radicadas no polígono”.

Eva García de la Torre subliña que o delegado de Zona Franca amosou o “seu interese e sensibilidade” para que esta proposta poida ser unha realidade no menor tempo posible.

12/12/2018 in Alcaldía

Máis de 300 veciñas e veciños do Contrasto, que se virán afectados pola aparición de lindano, teñen dende hoxe nas súas casas a acometida á ‘traída’ municipal

Dende este martes, día 11 de decembro,  máis de 300 veciñas e veciños do barrio do Contrasto, na parroquia de Torneiros, teñen xa acometida á Rede Municipal de Abastecento do Porriño, tal e como anunciara a alcaldesa, Eva García de la Torre, logo de que se atopasen refugallos de lindano nesta zona, o cal obrigara a pechar numerosos pozos.

A ‘traída’ municipal chega xa a 83 casas do barrio logo de que o Concello, sufragase na súa totalidade, “sen ningunha axuda por parte da Xunta, que ten as competencias en medio ambiente”, os preto de 350.000€ que custou, finalmente, esta obra que permite que todas estas vivendas poidan recibir auga para o consumo diario con todas as garantías sanitarias.

As devanditas obras, sinala a alcaldesa, axustáronse exactamente ás instrucións da Dirección Xeral de Saúde Pública, dependente do Goberno de Galicia, e realizáronse cos máximos niveis de protección e seguridade, tanto para os traballadores encargados das mesmas coma para os habitantes do Contrasto.

García de la Torre, que cumpre deste xeito o compromiso persoal que asumira coas veciñas e veciños afectados pola aparición de lindano, manterá unha xuntanza con todos eles nos vindeiros días para informarlles, “polo miúdo, como fixen durante todos os meses pasados”, sobre a chegada do abastecemento municipal ata as súas casas.

Sen axuda ningunha da Xunta de Galicia

A alcaldesa, lembra, de novo, que foron os cidadáns do Porriño, por medio do seu Concello, os que asumiron “por completo en solitario, en sen axuda ningunha por parte da Xunta de Galicia”, os custos de todas e cada unha das accións que se levaron a cabo no Contrasto: o subministro de auga para o consumo diario,a colocación nas vivendas afectadas depósitos de 1.000 litros -nalgún caso ata dous-; a contratación dos servizos dunha empresa especializada en tratamento da terra na que apareceron restos de lindano, “seguindo as indicacións, criterios e normas do Servizo de Xestión de Residuos e da Administración Autonómica”, ou o dobre asfaltado da zona na que se realizaron as obras do saneamento no seu día.

Eva García de la Torre agarda que o Goberno de Galicia, asumindo as súas competencias, “afronte o problema da existencia de lindano soterrado en varios lugares da nosa vila cun plan cuantificado e orzamentado para, en primeiro lugar, identificar e sinalizar as zonas afectadas en todo o Porriño polo depósito de lindano e, de seguido, dar unha resposta efectiva que acabe coa contaminación e os riscos para a saúde”.

11/12/2018 in Alcaldía

@depo_es destinou este ano a O Porriño 1.883.863€, preto dun 80% máis que no ano 2017

A Deputación de Pontevedra vén de aprobar, mediante resolución presidencial, unha axuda ao concello de O Porriño por un valor de 18.129,02€ para financiar o mobiliario da Biblioteca Municipal, que depende directamente da Alcaldía.

Con este investimento O Porriño pecha o Plan Concellos deste ano, ao través do cal o goberno provincial destinoulle 1.883.863,81€ un 79,05% máis que en 2017.

Este ano, ao través da Liña 1 do Plan Concellos, O Porriño tamén contou co financiamento do módulo de atletismo, por importe de 200.000€; da dotación da beirarrúa A Pontenova-A guía-Atios, por 463.007,15€; e da rotonda en A Pontenova, por 252.420,34€.

Amais a Deputación adxudicou 101.713€ no que corresponde á liña 2 e tamén outros 89.345,40€ que foron destinados á financiación da contratación de 25 traballadoras e traballadores que están a desempeñar funcións no Concello, dentro da liña 3 de emprego.

07/12/2018 in Alcaldía

@carmelasilva e a alcaldesa do Porriño, Eva García de la Torre, asinan un convenio polo cal @depo_es achega máis de 400.000€ ao Concello para a mellora da mobilidade e seguridade da rúa Doantes de Sangue e a súa contorna

A presidenta da Deputación de Pontevedra, Carmela Silva, e a alcaldesa do Porriño, Eva García de la Torre, asinaron este luns pasado, no Pazo Provincial, un convenio de  de colaboración para a execución e financiación dun proxecto beneficiario do Plan de Remodelación e Mellora da Seguridade dos Viarios Municipais (DepoRemse), impulsado pola Deputación e dos que resultaron tamén beneficiados outros 9 concellos, representados polas súas alcaldesas e alcaldes.

O Porriño desenvolve, indicou a alcaldesa “a mellora da mobilidade e seguridade viaria na rúa Doantes de Sangue e a súa contorna”, que contará cun orzamento total de 499.815,87 euros, dos que a Deputación pon 424.843,87 euros, o 85 por cento do total, e o Concello do Porriño, 75.000, o 15 por cento restante.

A presidenta da Deputación, subliñou que o Plan DepoRemse “continúa no obxectivo do Goberno provincial de implementar en toda a provincia un modelo de territorio baseado na seguranza viaria, na mobilidade, na accesibilidade universal e na recuperación do espazo público”.

Pola súa banda, a alcaldesa salientou que “é moi importante no Porriño, o segundo concello que máis medra de Galicia e que está xa nos 20.000 habitantes, que as noas veciñas e veciños conten con espazos máis amplos, abertos, humanos e amábeis, nos que ‘facer vida’, nos que moverse, estar e relacionarse e facelo sen atrancos, sen barreiras e sen perigos”.

04/12/2018 in Alcaldía

Todo listo para o acendido do Alumeado de Nadal, este mércores, día 5, ás 8 e media da tarde na Praza de Antonio Palacios

O Porriño ultima os últimos arranxos para o acendido do alumeado de Nadal, este mércores, día 5 de decembro, ás 8 e media da tarde, na Praza de Antonio Palacios, un acto que estará animada pola actuación de ‘As Maimiñas’.

A alcaldesa, Eva García de la Torre, supervisou persoalmente a colocación das luces e da decoración que, subliñou, terá un custo inferior ao do ano pasado,“chegará a todas as parroquias” e, por primeira vez, tamén á zona da oficina de Correos ao redor das rúas Enrique Peinador, O Pinar e Cruceiro.

García de la Torre deu especial importancia ao “intenso” programa de actos e actividades de lecer, “especialmente para as pequenas e pequenos”, deseñado polo Concello este Nadal e que, lembrou, abranguen exposicións, festivais, música, teatro, obradoiros, os anunciados Campamentos para facilitar a conciliación da vida familiar e laboral, amais do da “xa tradicional e propia do Porriño,  Festa Pre-Fin de Ano”, a Cabalgata de Reis, a visita de Papa Noel o novo Concurso de Rondallas e, por suposto, a Cabalgata de Reis.

A estas actividades súmanse outras para todos os públicos coma o Festival de Panxoliñas (o día 15), o Festival de Nadal da Escola Municipal de Música (o día 20), o Concerto de Jazz (os día 21 e 22), a Gala Benéfica da Asociación Bastón ( o día 22 no Centro Cultural Municipal), o Flashmob e exhibición de baile Studio 57 (o domingo 23) ou o Concerto da Orquestra de Cámara Galega, o 6 de xaneiro.

04/12/2018 in Alcaldía, Cultura e festas

Este luns, día 3 de decembro, queda aberta a inscrición para o 1º Concurso de Rondallas do Porriño

O Concello abrirá este luns, día 3 de decembro, e ata o vindeiro día 14, o prazo de inscrición no 1º Concurso de Rondallas Concello do Porriño que terá lugar o vinddeiro 1 de xaneiro de 2019.

BASES DO I CONCURSO DE RONDALLAS

Primeira.- A Concellería de Festexos do Concello do Porriño organiza o I Concurso de Rondallas que terá lugar o día 1 de xaneiro de 2019, ás 18:00 h, no Pavillón Municipal de Deportes do Porriño.

Segunda.- Neste concurso poderán participar todas aquelas agrupacións que teñan un mínimo de 40 compoñentes e un máximo de 120.

O número máximo de agrupacións participantes limítase a 10 (dez). Como único criterio de selección estabelécese a orde de inscrición no Rexistro Xeral do Concello do Porriño.

Aquelas inscricións realizadas antes ou despois do prazo estipulado nestas bases non serán admitidas calquera que sexa a causa.

Terceira.– As inscricións para este concurso deberán presentarse no Rexistro Xeral do Concello, no impreso normalizado que se achega ás bases, dende o 3 ao 14 de decembro de 2018, ambos inclusive. Así mesmo, deberase acompañar á inscrición, unha certificación bancaria e fotocopia compulsada do CIF ou NIF segundo proceda.

As bases publicitaranse a través de anuncio nos medios de comunicación local nos días previos ó comezo do prazo e estarán a disposición dos/as interesados/as no citado rexistro e na páxina do Concello: https://oporrino.org/.

Cuarta.– Os premios do concurso serán os seguintes:

PRIMEIRO CLASIFICADO: 1.500 euros.

SEGUNDO CLASIFICADO: 1.000 euros.

TERCEIRO CLASIFICADO: 500 euros.

Todos os premios estarán suxeitos á normativa fiscal que proceda aplicar.

Quinta.- As agrupacións participantes realizarán, previo ó inicio do concurso e na mesma orde de actuación, un pasarrúas de trinta minutos polas seguintes rúas da vila: Praza do arquitecto Antonio Palacios, Rúa Antonio Palacios, Rúa Doantes de Sangue, manténdose neste último lugar á espera da entrada ó concurso.

No caso de suspensión dos pasarrúas por choiva, concentraranse na mesma orde e horario no Pavillón Municipal de Deportes do Porriño.

Sexta.- A orde de actuación no Pavillón Municipal de Deportes do Porriño das rondallasinscritas decidirase mediante un sorteo que se realizará na Casa do Concello do Porriño o día 17 de decembro ás 12:00 horas. Recoméndase que a este sorteo acuda un/unha representante de cada rondalla inscrita.

Sétima.– Cada agrupación disporá dun máximo de 12 minutos para realizar as interpretacións que estime oportunas.  O tempo dispoñible computarase dende o momento no que as agrupacións comecen a interpretar a primeira peza.

Oitava.- Estabelécense as seguintes penalizacións por exceso de tempo:

10 puntos.- polo primeiro minuto ou fracción

20 puntos.- polo segundo minuto ou fracción

30 puntos.- polo terceiro minuto ou fracción

Descualificarase inmediatamente a unha agrupación nos seguintes casos:

✔ cando o exceso de tempo supere os tres minutos;

✔ cando figuren na pista menos de 40 compoñentes;

✔ cando entre os seus compoñentes ou concursantes, figuren “majorettes”.

Novena.– Os himnos oficiais dos estados e das comunidades autónomas non poderán ser incluídos nos repertorios que executarán as rondallas participantes.

Décima.- A rondalla gañadora do concurso terá que actuar un día a convir por ambas partes, a organización e a agrupación, durante as festas de Nadal nas rúas do Concello do Porriño.

Décimo primeira.– O xurado do concurso cualificará entre 0 e 16 puntos cada unha das agrupacións, valorando os seguintes elementos:

  1. a) Criterios relacionados coa cultura tradicional e popular galega (valoración máxima 10 puntos):

– Instrumentación musical tradicional: máximo 4 puntos

– Repertorio musical: máximo 4 puntos

– Vestimenta de toda a rondalla: máximo 2 puntos

  1. b) Outros criterios (valoración máxima 6 puntos):

– Evolución e coreografía en pista: máximo 2 puntos

– Instrumentación musical xeral: máximo 1 punto

– Número de compoñentes: de 40 a 60 – 1 punto; de 60 a 80 – 2 puntos; de 80 a 120 – 3 puntos.

Décimo segunda.- O xurado do concurso, nomeado por resolución da Alcaldía, estará composto polos seguintes membros, en número impar:

Presidente/a: A alcaldesa-presidenta ou persoa en quen delegue

Vocais:

– dúas persoas relacionadas coa música, danza, etnografía, folclore ou cultura tradicionais galegos.

– un/unha representante das rondallas participantes.

– Un/dous representante/s do Concello.

A composición do mesmo variará para obter, en todo caso, un número impar de membros con voz e voto.

Secretario: Un funcionario do Concello do Porriño, con voz e sen voto, que certificará o cumprimento das condicións establecidas nas bases do concurso que se achegan no anexo a este convenio.

O presidente do xurado dispón tamén de voto de calidade para resolver os posíbeis empates.

Décimo terceira.- A concelleira de Festexos mailo xurado do concurso quedan facultados para resolver as posíbeis eventualidades e dúbidas que puidesen xurdir, non previstas nestas bases.

Décimo cuarta.- A participación neste concurso supón a aceptación de todas e cada unha destas bases. A decisión do xurado será inapelábel.

 

 

 

02/12/2018 in Alcaldía, Cultura e festas

En marcha o ‘Programa de Nadal do Porriño’, que durará máis dun mes, e que abrangue actividades e propostas para todas as idades

Dende o día 1 de decembro ata o sábado 6 de xaneiro de 2019, o Concello do Porriño leva adiante un completo programa de Nadal que abrangue dende ‘Animación na rúa’, concertos, actividades para cativos, Flashmob, a tradicional ‘Pre-Festa Fin de Ano’ ou a Cabalgata de Reis.

Este ano, ademais haberá novas propostas, coma a 1ª Xornada pola Integración da Discapacidade (o domingo día 2 de decembro, no Pavillón Municipal de Deportes); a celebración, o luns, día 3, do Día Internacional da Integración das Persoas con Diversidade Funcional; o 1º Concurso de Rondallas Concello do Porriño, o 1 de xaneiro, no Pavillón de Deportes, ou o Concerto da Orquestra de Cámara de Galicia, o 6 de xaneiro.

Xunto con estas novidades estarán as actividades tradicionais, coma o ‘Encendido das luces de Nadal’, o vindeiro mércores, día 5 de decembro, ás 8 e media da tarde na Praza do Arquitecto Antonio Palacios; o ‘Festival de Panxoliñas’, o venres día 14; a Visita de Papa Noel a San Benito e San Sebastián, o día 21; o Concerto dos Bolechas, o día 22 deste mes; a Festa ‘Pre Fin de Ano’, o domingo día 30 ás 11 da noite ou a Cabalgata das Súas Maxestades Melchor, Gaspar e Baltasar,o día 5 de xaneiro dende as 6 da tarde.

A estas propostas súmanse as actividades da Biblioteca Municipal, que depende directamente da Alcaldía, e que abrangue Club de Lectura para Adultos, Conta-Contos, o Teatro de Monicreques, entre os días 3 e 27 de decembro.

30/11/2018 in Alcaldía, Cultura e festas