Libros que Latexan pecha con broche de ouro na biblioteca do Porriño

A Biblioteca Municipal do Porriño acolleu a mostra ﬁnal deste obraoiro que puxo en valor a literatura

O Porriño, 08 de maio de 2026. O Concello do Porriño, a través da Biblioteca Municipal, estivo a desenvolver durante os meses de marzo e a abril o obradoiro de expresión e creación Libros que latexan, que convidou a veciñanza a transformar a lectura nunha experiencia viva a través de ferramentas de diferentes campos artísticos.

Este xoves, 7 de maio, a sala de lectura da Biblioteca, sita no primeiro andar do Centro Cultural Municipal do Porriño (Avda. Domingo Bueno, 9), acolleu a última sesión desta actividade, cunha mostra en aberto dalgúns dos procesos e materiais desenvolvidos ao longo das oito sesións do obradoiro.

O programa, impartido por Ana Abad de Larriva, coordinadora e dinamizadora do club de lectura municipal, estruturouse arredor de varios eixes temáticos (o latexo do espazo, das palabras, do corpo, da memoria e da voz, entre outros), que se interrelacionaron nun proceso lúdico e progresivo, combinando lectura sensorial, escritura creativa e expresión oral e corporal.

Ademais de fomentar a expresión e a creación nas persoas participantes e poñer en valor a vida dos libros, o obradoiro e esta mostra final aberta tamén reforzan o papel da Biblioteca Municipal como auténtica “casa dos libros” para a cidadanía: un lugar de encontro, relación, aprendizaxe permanente e intercambio creativo que contribúe ao desenvolvemento persoal e colectivo.

O alcalde do Porriño, Alejandro Lorenzo, destacara xa na presentación de Libros que latexan a importancia desta iniciativa cultural, que promove a participación e reforza o papel da biblioteca como motor social: “Queremos que a nosa Biblioteca sexa moito máis que un lugar de préstamo de libros; queremos que sexa un espazo vivo, onde a cultura se comparta, se experimente e se cree en comunidade. Libros que latexan representa perfectamente esa filosofía: ler, sentir e transformar as historias en experiencia compartida”.

08/05/2026 in Cultura e festas, Educación e tecnoloxía, Mocidade, Normalización Lingüística, Política Social

O Porriño celebra a tradicional “Festa dos Cachos” este domingo 10 de maio

O Porriño, 7 de maio de 2026. – A vila do Porriño prepárase para recibir unha das citas gastronómicas máis senlleiras do calendario primaveral: a Festa dos Cachos 2026, que é en realidad a festa do centolo que se comerá este domingo a un prezo de sete uros na tradicional “carpa dos cachos”. Organizada pola Asociación de Veciños de San Benito e San Sebastián, en colaboración co Concello do Porriño e a Deputación de Pontevedra, esta xornada promete converter a localidade no epicentro do sabor mariñeiro.

O evento terá lugar este domingo, 10 de maio, ofrecendo aos asistentes a oportunidade de degustar este prezado marisco (centola) en diferentes modalidades e prezos populares.

Programación e Degustación

A xornada estará dividida en dous espazos principais para garantir que ninguén quede sen a súa ración:

A partir das 12:00 h, na Carpa: Abrirá a “Carpa dos Cachos” con venda directa ao público. A oferta gastronómica completarase coa presenza dunha pulpeira e unha rosquilleira, todo isto amenizado por animación de rúa para crear un ambiente festivo e familiar. Haberá tamén empanada. O prezo da degustación dos cachos na carpa será de 7 €.

A partir das 13:00 h, nos Restaurantes: A festa trasládase tamén á hostalería local. Os establecementos participantes, “Pinzas” (Rúa Leandro Diz) e “O Xantar de Pepa” (Rúa Pío XII), ofrecerán o servizo de cachos cun prezo de 8 €.

Un impulso á cultura e á tradición local

A historia desta festa vén de lonxe, remóntase á resistencia porriñesa para evitar a entrada dos franceses na vila. Para conmemorar aquel momento histórico levantouse un cruceiro no Porriño e, ao redor del, foi crecendo un barrio que se converteu nun dos máis emblemáticos da vila.

Honrando ao Cristo dos Aflixidos comezou a celebración dunha festa en maio e aos elementos relixiosos fóronse sumando outras actividades de lecer, entre elas, a parte gastronómica coas centolas como protagonistas; un marisco que aquí chamamos “cachos” como se coñece desde entón ao barrio.

08/05/2026 in Cultura e festas, Parroquias, Patrimonio Municipal, Turismo

O Porriño rinde homenaxe a Antonio Palacios cun certame de talla en pedra

Escultura e pintura ao aire libre daranse a man en xuño para poñer en valor o patrimonio, a creatividade e o legado do arquitecto porriñés

O Porriño, 5 de maio de 2026. – O Porriño reforza a súa aposta pola cultura e a identidade local coa posta en marcha de dous eventos artísticos que converterán a vila nun referente creativo durante o mes de xuño de 2026. Trátase do I Certame de Talla en Pedra “Antonio Palacios escríbese en pedra” e da terceira edición do concurso de pintura rápida “Pintando a Palacios”, dúas iniciativas que renderán homenaxe ao legado do arquitecto Antonio Palacios.

O primeiro destes eventos, centrado na escultura, celebrarase os días 6 e 7 de xuño. Impulsado polo Concello en colaboración co IES Ribeira do Louro, o certame nace coa vontade de reivindicar a pedra como elemento esencial da identidade cultural e construtiva galega, así como de poñer en valor os oficios tradicionais vinculados á cantería.

Un total de 15 participantes, profesionais e afeccionados maiores de idade, serán seleccionados para crear ao vivo unha obra en pedra natural inspirada na vida e obra do recoñecido arquitecto porriñés. As pezas partirán dun bloque de granito en bruto facilitado pola organización e deberán ser transformadas ao longo de dúas xornadas intensivas.

Precisamente, este proceso converterase nun dos grandes atractivos do certame, xa que o público poderá asistir en directo a un espectáculo pouco habitual: a evolución dunha escultura desde un bloque de pedra espido ata unha obra artística rematada, observando cada fase do traballo dos canteiros e escultores.

O xurado valorará aspectos como a calidade técnica, a creatividade ou a adecuación á temática. O certame repartirá premios que ascenden ata os 1.500 euros para o primeiro clasificado, ademais doutras distincións e unha mención especial do público.

Paralelamente, o día 13 de xuño terá lugar o III Concurso de Pintura Rápida “Pintando a Palacios”, unha cita xa consolidada que converterá o casco urbano nun auténtico museo ao aire libre. Artistas de todas as idades poderán participar nunha xornada na que deberán captar a esencia arquitectónica e patrimonial da vila.

O certame de pintura contará con catro categorías —adultos, mocidade, alevín e infantil— e premios tanto económicos como en material artístico, co obxectivo de fomentar a creatividade desde idades temperás. Na categoría absoluta, os galardóns alcanzan tamén os 1.500 euros.

O alcalde, Alejandro Lorenzo, puxo en valor a relevancia destas iniciativas e a figura de Antonio Palacios, destacando que “é unha das grandes figuras que marcaron a identidade do noso concello e merece ser lembrado e recoñecido como corresponde”. Neste sentido, subliñou que “con estes dous certames imos renderlle homenaxe poñendo en valor dúas das súas grandes paixóns: a arquitectura ligada á pedra e a expresión artística, facendo que a súa pegada siga viva nas rúas do Porriño”. O facía nas instalacións de Godoy Maceira, xunto a Rubén, un dos alumnos do IES Ribeira do Louro que explicou “as marabillas que se poden facer coa pedra”.

Con estas propostas, o Concello reafirma o seu compromiso coa dinamización cultural, apostando pola arte como ferramenta para fortalecer a identidade local e impulsar o talento tanto emerxente como consolidado.

06/05/2026 in Cultura e festas, Patrimonio Municipal

I Certame Talla En Pedra: Antonio Palacios escríbese en pedra

O Concello do Porriño convoca o seu I Certame Talla en Pedra: ANTONIO PALACIOS ESCRÍBESE EN PEDRA en colaboración co IES Ribeira do Louro, a través do ciclo de grao medio de Pedra Natural, coa vontade de reivindicar a pedra como material esencial da nosa identidade construtiva e cultural, promover a creación artística en pedra natural, facer un recoñecemento aos oficios tradicionais e poñer en valor o legado arquitectónico, cultural e simbólico de Antonio Palacios, figura clave na identidade do Porriño, este certame terá lugar os días 6 e 7 de xuño de 2026 no Porriño.

Podes consultar as bases premendo na ligazón a continuación: BASES I CERTAME TALLA EN PEDRA

01/05/2026 in Cultura e festas, Patrimonio Municipal

Revisa aquí se es algún dos gañadores das cestas gourmet que se sortearon na Fashion Weekend 2026

Nesta Fashion Weekend gañou o comercio local, o público, os que viñéchedes mercar con descontos especiais, pero tamén 5 persoas que gañaron o sorteo dunha cesta regalo con diversos productos gourmet:

0359
0360
0622
1365
1374

O sorteo fíxose en directo durante o desfile do sábado.

Se eres a agraciada ou agraciado podes reclamar a túa cesta regalo no Concello de 09:00 a 14:00h.

27/04/2026 in Cultura e festas, Urbanismo, comercio e industria

O Porriño vive unha exitosa Fashion Weekend

A Shopping Night do venres e o gran desﬁle do sábado converteron a vila nun fervedoiro de xente, superando todas as expectativas de participación e vendas.

O Porriño, 25 de abril de 2026.- O Porriño pecha unha fin de semana histórica na que o comercio local demostrou a súa forza e capacidade de convocatoria. A cuarta edición da Fashion Weekend saldouse cun éxito absoluto, cumprindo o obxectivo de dinamizar a economía local e situar á vila no mapa das grandes citas da moda en Galicia.

A programación arrancou o venres coa Shopping Night, onde o comercio local viviu unha xornada de actividade frenética coas tendas abertas ata a media noite, veciños e visitantes aproveitaron os descontos e sorpresas nun ambiente festivo grazas á música dos seis DJ’s que encheron de ritmo as rúas do centro.

Tres horas de moda e a sorpresa de Maison

O prato forte chegou o sábado coa gran pasarela na Praza Antonio Palacios. Durante tres horas de desfile, conducido pola carismática Lucía Rodríguez, o público puido coñecer de primeira man as propostas do comercio local grazas aos modelos de Small Big Models .Os 27 establecementos participantes e as 10 perruquerías e salóns de beleza implicados demostraron o músculo do comercio local e o ben que lucen sobe a pasarela. Nada que envexar, como se dixo na presentación, a Milán ou Paris.

Un dos momentos máis aplaudidos da tarde foron as intervencións da escola Maison. Os seus alumnos protagonizaron pases con actuacións integradas que achegaron unha gran frescura á pasarela. Porén, o momento máis impactante foi un flash mob multitudinario que pillou ao público por sorpresa: unha decena de artistas xurdiron de lugares insospeitados, como o balcón do Concello e outros puntos estratéxicos da praza, creando un espectáculo visual e sonoro que deixou a todos os asistentes abraiados.

O alcalde, Alejandro Lorenzo, amosou a súa satisfacción polo desenvolvemento do evento: “Dixemos que non tiñamos nada que envexar a Milán ou París, e hoxe quedou demostrado. O Porriño é unha vila viva e o noso comercio é o mellor motor para a cohesión social e económica”.

Pola súa banda, a concelleira de Comercio, Rosa Isabel Alonso, destacou a gran afluencia de visitantes: “Conseguimos que a xente vivise unha experiencia única. A resposta do público e o esforzo dos comerciantes fan que a Fashion Weekend sexa xa unha cita imprescindible, como imprescindible todo o ano é o noso comercio local”.

A xornada completouse coa espectacular performance de Pablo Méndez, poñendo o broche de ouro a unha fin de semana onde a moda, a música e o talento local foron os únicos protagonistas.

27/04/2026 in Cultura e festas, Parroquias, Urbanismo, comercio e industria

O Porriño celebra no parque Alba de Torneiros a V Xuntanza Literaria: unha xornada adicada á lectura en galego

Máis de 400 persoas participarán o 24 de abril nun encontro interxeracional que reivindica a lectura en galego como ferramenta de unión e inclusión

Haberá música, engadindo unha dimensión lúdica á xornada.

22 de abril de 2026, O Porriño.– O parque Alba de Torneiros converterase o vindeiro 24 de abril nun gran espazo de encontro arredor da palabra. Alí máis de 400 persoas —entre alumnado, profesorado, persoas maiores e usuarios de entidades sociais— daranse cita na V Xuntanza Literaria, unha iniciativa que medra ano tras ano e que consolida ao Porriño como referente na promoción da lectura en galego.

Impulsada polo Concello do Porriño, a través da Concellería de Educación, Normalización Lingüística e a OMIX, en colaboración cos departamentos de Biblioteca dos centros educativos do municipio, a xornada desenvolverase de 10:30 a 13:00 horas cun programa que mestura lectura, convivencia e expresión artística.

A mañá comezará coa chegada das persoas participantes e dará paso a un tempo compartido de lecturas individuais e colectivas, recomendacións literarias e intercambio de experiencias. Un exercicio colectivo no que a lingua galega será o fío condutor, unindo xeracións distintas nun mesmo espazo e arredor dun mesmo interese: o pracer de ler.

Nesta edición volverán estar presentes centros educativos de todo o municipio: o CPR Santo Tomás, o IES Pino Manso, o CEIPP Fernández López, o CPR Hermanos Quiroga, o CEIPP Antonio Palacios, o IES Ribeira do Louro, o CEIP da Cruz-Budiño, o CEIPP de Atios e o CEIPP da Ribeira— xunto con entidades como ACEESCA, o Centro de Día de Torneiros e a Asociación AFAGA, reforzando así o carácter inclusivo desta cita.

A música, como extensión natural da palabra, terá tamén o seu espazo a partir das 12:00 horas coa actuación “Isto é Rock!”, un concerto didáctico para toda a familia a cargo de Javier Becerra e Carolina Rubirosa. Un espectáculo pensado para achegar a música dun xeito próximo e participativo, engadindo unha dimensión lúdica á xornada.

A Xuntanza Literaria celébrase coa vontade de fomentar o uso da lingua galega e o hábito lector entre a infancia e a mocidade, pero tamén de tender pontes entre xeracións, promovendo a transmisión cultural e a inclusión social a través da cultura. Un encontro no que a lectura deixa de ser un acto individual para converterse nunha experiencia compartida.

“Esta actividade busca fomentar o hábito lector entre a mocidade, así como impulsar a creatividade e a capacidade de expresión do alumnado. É importante crear espazos de encontro arredor da literatura, favorecendo a participación activa dos escolares e o seu achegamento á cultura dun xeito lúdico e enriquecedor”, sinala a concelleira de Educación e Normalización Lingüística, Carolina González Costas.

Con esta quinta edición, o Concello do Porriño reafirma o seu compromiso coa lingua galega e coa cultura como ferramentas de cohesión social, facendo da lectura un punto de encontro aberto, diverso e vivo.

24/04/2026 in Cultura e festas, Normalización Lingüística, Parroquias, Política Social

A Biblioteca do Porriño, gañadora do Premio Nacional REBIUN 2026 polo proxecto de biblioterapia infantil “Contos que curan”

A noticia non puido chegar nun momento máis simbólico. O alcalde do Porriño recibiu a conﬁrmación oﬁcial de que a Biblioteca Municipal foi a gañadora da VIII edición do Premio REBIUN mentres se atopaba nas propias instalacións do centro, rodeado de libros e nenos e nenas celebrando o Día do Libro.
O “Premio REBIUN ás boas prácticas en biblioteca”, un dos máis importantes de España no ámbito das bibliotecas, está destinado a recoñecer o mellor proxecto de boas prácticas levado a cabo por bibliotecas españolas non universitarias, así como por organismos relacionados coas bibliotecas como colexios profesionais, asociacións e institucións bibliotecarias.

O Porriño, 23 de abril de 2026. A cultura porriñesa está de parabéns. A Biblioteca Municipal do Porriño foi distinguidaco “Premio REBIUN ás boas prácticas en biblioteca”, un dos máis importantes de España no ámbito das bibliotecas, que está destinado a recoñecer o mellor proxecto de boas prácticas levado a cabo por bibliotecas españolas non universitarias, así como por organismos relacionados coas bibliotecas como colexios profesionais, asociacións e institucións bibliotecarias.

Na súa VIII convocatoria, no 2026 a Red de Bibliotecas Universitarias y Científicas Españolas (REBIUN), concedeu este galardón único á Biblioteca do Porriño polo seu proxecto de biblioterapia infantil “Contos que curan”, unha colección de boletíns temáticos que teñen como obxectivo axudar a previr, identificar e xestionar distintos problemas e trastornos mentais na infancia.

Precisamente, a comunicación do prestixioso galardón coincidiu coa celebración dunha sesión de “Contos que Curan”, unha das actividades programadas con motivo do Día do Libro. O alcalde, Alejandro Lorenzo, participaba na xornada xunto ao alumnado de 2º de Primaria do CEIP Antonio Palacios. A alegría desbordouse na sala cando Albino Alonso Rodríguez e David Pérez Rego, responsables da Biblioteca, confirmaron que a Biblioteca do Porriño fora elixida entre proxectos de toda España polas súas boas prácticas e o seu compromiso social. “Recibir este premio precisamente aquí, cos escolares do Antonio Palacios e celebrando o poder da lectura, é o mellor recoñecemento posible ao esforzo de todo o persoal bibliotecario”, destacou o alcalde tras coñecer a noticia.

O premio

Os proxectos e experiencias aptos para presentarse a este premio deben estar encamiñados á boa xestión das bibliotecas, ao favorecemento do acceso equitativo á información e a cultura, á mellora do acceso aos servizos bibliotecarios ou o uso innovador da tecnoloxía no contexto bibliotecario. Ademais, deben estar vinculados ao desenvolvemento dos Obxectivos de Desenvolvemento Sustentable (ODS) da Axenda 2030.

O xurado do premio destaca que este proxecto promove o acceso equitativo á información e á cultura, ao crear un recurso documental para informar e axudar á comunidade, cun forte compromiso social. Tamén, que consegue mellorar o acceso aos servizos bibliotecarios, porque baseándose nas funcións tradicionais das bibliotecas (busca, selección, clasificación e recomendación de lecturas), créase un novo servizo documental aberto, gratuíto e accesible en varias linguas e formatos, o que aumenta o número de usuarios potenciais en todo o mundo hispanofalante.

Contos que curan

A colección “Contos que curan” está composta por boletíns que se publican periodicamente. Cada número está centrado nun tema, sobre o que se ofrece un extenso repertorio de contos recomendados para xestionar o problema en cuestión. O persoal da biblioteca porriñesa busca, selecciona, clasifica e ofrece a información completa de cada conto, para que familias, colectivos educativos ou profesionais da saúde podan ter unha práctica guía de recursos coa que levar a cabo unha “terapia con libros”. Os destinatarios do proxecto son nenos e nenas de 3 a 12 anos, unha etapa fundamental para a prevención, detección e tratamento de problemas emocionais que poden condicionar a vida do menor.

Ata a data, téñense publicado tres números desta colección (“Morte e loito”, “Acoso escolar” e recentemente, “Timidez e fobia social”) que tratará outras cuestións como a sexualidade, o sono e o medo á escuridade, a normalización da neurodiverxencia (autismo, dislexia, TDAH, síndrome de Down, etc.) e capacidades múltiples, a baixa autoestima, os malos tratos, etc.

Os boletíns son publicados en formato físico e distribuídos gratuitamente a persoas e institucións que podan estar interesados para usar estas seleccións de lectura co obxectivo de realizar unha mediación lectora e terapéutica máis eficaz. Ademais, son publicados en formato dixital, en galego e castelán, e colgados na páxina web da biblioteca para a súa descarga libre e gratuíta.

O Premio REBIUN, dotado con 3.000 euros e diploma acreditativo, será entregado na próxima Conferencia Anual de REBIUN, que se celebrará no paraninfo da Universidade de Albacete o vindeiro 27 de maio.

23/04/2026 in Cultura e festas, Educación e tecnoloxía, Mocidade, Normalización Lingüística

O Porriño celebra no parque Alba de Torneiros a V Xuntanza Literaria: unha xornada adicada á lectura en galego

Máis de 400 persoas participarán o 24 de abril nun encontro interxeracional que reivindica a lectura en galego como ferramenta de unión e inclusión
Haberá música, engadindo unha dimensión lúdica á