O Porriño avanza na extensión da súa rede de saneamento coa vista posta na execución integral. O Consorcio de Augas do Louro vén de adxudicar as obras de extensión da rede no Outeiro, na parroquia de Pontellas, que dará servizo a máis de 20 vivendas.
En total, executarase preto de 1 km de rede, o que permitirá que máis de 60 veciños e veciñas da parroquia de Pontellas dispoñan de conexión a este servizo.
A obra licitouse cun orzamento base de 167.000 euros e xa foi adxudicada en 158.000 euros, polo que os traballos darán comezo en breve e estarán rematados aproximadamente en dous meses.
O alcalde, Alejandro Lorenzo, e o concelleiro de Vías e Obras, Ramón Porto, visitaron hoxe a zona onde se levarán a cabo as obras. O rexedor, lembrou que o compromiso do goberno local coa acometida do saneamento segue a ser firme e unha actuación prioritaria, polo que dende que se atopa ao frente da alcaldía proxectáronse todos os traballos pendentes e planificouse a folla de ruta para a ejecución integral no termo municipal, en base ao Plan Director do Consorcio de Augas do Loura, entidade que preside.
O vindeiro luns 1 de xullo comenzará o Campamento de Verán organizado pola Concellería de Igualdade do Concello do Porriño dirixido aos máis pequenos e pequenas da casa, de idades comprendidas entre os 3 de 12 anos.
O lugar de entrega e recollida dos e das participantes será na porta principal do Colexio CEIP Fernández López. A entrega será as 8:45 horas e a recollida ás 14:00 horas.
Equipamento dos rapaces e rapazas
Os rapaces e rapazas deberán levar ropa e calzado cómodos, unha mochila con calzado de reposto, unha merenda e auga, sendo obrigatorio que todos e todas as participantes vaian con crema solar e gorra. No caso de precisar algunha vestimenta ou complemento diferente, como bañador, toalla, ou calzado para piscina, serán os propios monitores e monitoras quen o comuniquen.
Persoas autorizadas para recoller os nenos e nenas
As únicas persoas autorizadas para entregar e recoller aos rapaces e rapazas do Campamento de Verán serán as que instaron a solicitude. En caso de ser outra persoa a encargada, ésta, deberá ser maior de idade e levar xunto aos monitores e monitoras a autorización correspondente asinada; achegando os D.N.I. da persoa autorizante e autorizada.
Publicada a listaxe de admitidos no campamento de verán 2024
Pódese consultar aquí a listaxe de admitidos no campamento de verán 2024 do Concello do Porriño.
O vindeiro mércores día 15, os/as alumnos/as da Escola Municipal de Música do Porriño festexarán o Día das Letras Galegas con toda a veciñanza e visitantes a partir das 19 horas na Praza do Arquitecto Antonio Palacios, ou no Círculo Recreativo Cultural en caso de chuvia.
Neste festival, organizado polo Concello e a Agrupación Musical do Porriño, presentarase a Banda Infantil, unha nova formación dirixida por David Trastoy Oseira, que conta con instrumentos de vento madeira, vento metal e percusión, tocados por unha ducia de estudantes da Escola de entre 8 e 14 anos de idade. “É un comezo para asentar las bases dunha banda de música de calidade e referente para o futuro no Porriño”, declara Trastoy.
O festival das Letras Galegas contará tamén coas actuacións dos/as pequenos/as de Música e Movemento, a Coral Infantil, a Coral Polifónica, o Grupo de Música Tradicional e a Banda de Música.
A maiores da celebración das Letras Galegas, a programación musical continúa o sábado 18 co Festival de Bandas de Música a partir das 12 horas, e o Festival de Corais ás 19:30, na praza do Arquitecto Antonio Palacios. En caso de choiva, as actuacións das bandas de música terán lugar no Círculo Recreativo Cultural; e as das corais, na Igrexa de San Rosendo de Torneiros. As agrupacións participantes serán a Banda de Música do Conservatorio de Verín, a Agrupación Musical do Porriño, a Coral Polifónica San Lorenzo de Belesar, a Coral Frol Nova do Círculo Cultural de Chapela e a Coral Polifónica do Porriño (EMMus Porriño).
A Escola imparte as súas clases desde principios de curso no edificio do Centro Cívico na avenida Domingo Bueno.
A Escola de Música dirixe seis agrupacións
Este curso a Escola está dirixida por David Trastoy Oseira, e a compoñen trece mestres/as máis que imparten as clases das diferentes disciplinas e instrumentos, ademais de dirixir seis agrupacións.
“A música axuda no aumento da memoria, da atención e da concentración”
Bienvenido Estévez, concelleiro de Cultura
“A Escola de Música é un motor na vida social, cultural e educativa no noso municipio. É ben sabido que a música axuda no aumento da memoria, da atención e da concentración tanto en nenos/as como en adultos/as, e desde o Concello apoiamos todas estas actividades tan beneficiosas para a nosa veciñanza”, salienta Bienvenido Estévez, concelleiro de Cultura.
Alejandro Lorenzo, alcalde do Porriño, conclúe que “a fusión da música e as letras é un dardo directo ao corazón, por iso que mellor que festexar o día das Letras Galegas co son da nosa Escola de Música. As emocións están aseguradas”.
Os comeciantes do Porriño adiantan as celebracións do Día da Nai cunha divertida acción para que a veciñanza participe e entre no sorteo de varias tarxetas regalo.
Dende hoxe, 25 de abril, ata o vindeiro 5 de maio haberá instalados tres photocalls en horario comercial na praza do arquitecto Antonio Palacios, e nas rúas Antonio Palacios e San Benito. As persoas que queiran participar no sorteo de tres tarxetas regalo de 50 euros para gastar nos comercios locais asociados, terán que sacarse unha foto no photocall e subila os seus perfís de Facebook ou Instagram e etiquetar a CCA Morea. O sorteo realizarase o 8 de maio.
Noelia Conde, xerente de ACIPOR, salienta que “dada a gran acollida da campaña similar para o Día do Pai, queríamos repetir e darlle agora o protagonismo as nais no seu día. Unha campaña na que poda participar todo o mundo e sexa divertido para os cativos e cativas, que son unha parte moi importante da clientela dos comercios do Porriño”. Noelia anima á participación recordando que “non hai límite de fotos por persoa, cantas máis fotos subidas, máis opcións hai de gañar!”.
Un convite ao que se sumaron o alcalde, Alejandro Lorenzo, e a concelleira de Comercio, Rosa Isabel Alonso, agradecendo ademais a Acipor as súas iniciativas de dinaminación do comercio local.
O Concello do Porriño incorporou hoxe a 17 traballadoras/es que reforzarán equipos en diferentes servizos municipais.
O Departamento de Vías e Obras conta desde hoxe con cinco incorporacións: un oficial 1ª de carpintería, un oficial 1ª de soldadura, un oficial 1ª de albanelería e dous peóns de obra pública. Pola súa banda, o Departamento de parques, xardíns e limpeza conta con seis novos peóns forestais. E para departamentos e instalacións municipais contase con tres conserxes, unha publicista e un analista de xestión e organización ou estatística.
Todas estas contratacións supuxeron unha inversión de 292.000 euros, dos cales 211.000 foron a cargo do Plan + Provincia da Deputación de Pontevedra e 81.000 euros de aportación municipal.
O alcalde, Alejandro Lorenzo, e a concelleira de Emprego e Formación, Rosario Costas, déronlle hoxe a benvida ao seu novo posto de traballo.
Ambos representantes municipais destacaron a oportunidade que estas incorporacións supoñen para activar o emprego e tamén para poder dar un mellor servizo á veciñanza. “O voso traballo é moi necesario e estamos encantados de que formedes parte do noso equipo”.
Retomamos xunto con Verdegaia os traballos realizados o ano pasado encamiñados a recuperar o estado natural do treito final do río Couso, tamén coñecido como Fonteliño, mesmo ao carón do paseo do Louro no Porriño.
Ao longo de tres xornadas, 4 de maio, 1 de xuño e 15 de xuño, recollerase o lixo acumulado, eliminaranse algunhas especies invasoras e acompañarase o crecemento das arboriñas que plantaron durante o inverno.
Esta actividade procura tamén, ademais do impacto directo sobre o medio, visibilizar as intervencións de restauración de espazos naturais, que moitas veces se realizan en zonas afastadas e non se observan por parte do público. Programandoa nunha zona que moitas persoas de toda a comarca utilizan para pasear e facer deporte demostraremos como a recuperación de espazos naturais moitas veces é posible contando simplemento co traballo voluntario e comunitario dos propios veciños.
A actividade constará de tres xornadas, todas elas en horario de 11 a 13 h, os sábados 4 de maio, 1 de xuño e 15 de xuño. Nas mesmas, despois dunha breve charla explicando os obxectivos da actividade, repartiranse luvas e ferramentas entre as persoas participantes para proceder á retirada do lixo e de especies invasoras que impiden o crecemento das especies autóctonas.
A inscrición é gratuíta e pode formalizarse a través do email omix@oporrino.org ou chamando ao 691 657 039. O punto de encontro será como sempre na rúa Leandro DIz, número 5 (ao lado do paso inferior da liña do tren).
