Aberto o prazo para presentar as solicitudes de axudas económicas con cargo ao “Plan Porriño Impulsa”

Desde esta mañá xa está aberto o prazo de presentación de solicitudes para recibir axudas económicas directas con cargo ao “Plan Porriño Impulsa” que dispón dun fondo de 140.000 € aportados polo Concello e pola Deputación. As bases e os impresos das solicitudes xa están dispoñibles na páxina web do Concello.

Paralelamente esta mañá o concelleiro de Emprego, David Alonso presentou as liñas fundamentais deste Plan que se aprobou por unanimidade da corporación no último pleno municipal celebrado.

Acudiron a presentación Juana Pérez e Noelia Conde, pola Asociación de Comerciantes de Porriño (ACIPOR) e José Manuel Fernández, pola Asociación de Hostalería do Porriño (AHOSPOR).

O concelleiro de Emprego lembrou que esta liña de axudas destinase aos establecementos de hostalería, comercio de proximidade, autónomos e microempresas do Porriño afectados polos peches total ou parciais ocorridos coa ocasión das restricións aplicadas dende xaneiro.

David Alonso ofreceu “o asesoramento gratuíto que a través da técnico da Axencia de Desenvolvemento Local (ADL) prestamos nas oficinas de ‘Porremprego’, para todos aqueles solicitantes que non dispoñan de asesoría para tramitar as solicitudes”.

O concelleiro avogou por que “non teñamos que habilitar novas liñas de axuda pero se chegado o momento hai que asumir outra liña de crédito, haberá que valoralo. Ao mellor non serían axudas económicas directas senón outras medidas de apoio e incentivo ao consumo, por exemplo”, manifestou Alonso Bargiela.

Para rematar a presentación, José Manuel Fernández, presidente de “AHOSPOR” expresou “o agradecemento dos hostaleiros do Porriño ao concelleiro e a toda a corporación municipal por esta liña de axudas e agardemos que non sexan necesarias outras ao longo do ano”.

Do importe total do Plan Impulsa Porriño, a Deputación Provincial autorizou a utilización do 20% da liña 1 do Plan Concellos para financiar achegas económicas directas por importe de 57.861,02 euros. O resto é a achega que aporta o Concello con recursos propios na cantidade de 82.138,98 euros ata acadar a cifra total de 140.000 euros o que supón un 1% do orzamento municipal total en vigor.

O límite por beneficiario das axudas establécese na cantidade de 1.500 euros para aqueles sectores que sufriron o peche total e 1200 euros para aqueles outros que estiveran limitados no horario de apertura ao público ou sufriran perdas significativas.

A Alcadesa coida necesaria unha investigación por presunta falsedade no asunto das firmas dos concelleiros do PP

Un informe emitido polo Secretario Municipal respalda a decisión da Alcaldesa Eva García de non convocar un pleno extra solicitado polo PP. O informe do Secretario aprecia que a solicitude do PP non cumpre cos requisitos establecidos por lei.

A alcaldesa denegou a petición “ao non constar acreditada a autenticidade das firmas nin a vontade dos concelleiros solicitantes”. Ese escrito presentado o 22 de marzo polo polo voceiro do PP, Alejandro Lorenzo foi denegado despois de apreciarse que “respecto da acreditación da identidade, firma e declaración do resto de concelleiros, só consta un garabato ou simulacro de firma ao final do documento”.

Para que a opinión pública e a veciñanza de O Porriño coñeza mellor o asunto, a alcaldesa Eva Garcia ordenou a difusión de dous documentos públicos. Un deles é o escrito de constitución do grupo municipal e o outro é a solicitude deste pleno extra feita o pasado 22 de marzo. As firmas son manifestamente distintas como se pode observar.

A maiores, o PP presentou un novo escrito ratificándose na súa solicitude, desta vez coas firmas electrónicas dos oito compoñentes do grupo municipal.

A alcaldesa coida que “é necesaria unha investigación máis polo miúdo sobre a posible suplantación das firmas dos concelleiros do PP a través do seu voceiro que, de feito, queda recoñecida claramente co novo escrito no que aportan as firmas de todos eles co seu certificado electrónico”.

Incluímos audio coas declaracións da alcaldesa.

Porriño renovou a súa adhesión ao Programa Galego de Control da Vespa Velutina

O Concello do Porriño renovou a súa adhesión ao Programa Galego de Vixilancia e Control fronte a vespa velutina. Este programa é produto dun convenio creado no ano 2020 entre a Xunta de Galicia e a Federación Galega de Municipios e Provincias (Fegamp) para coordinar actuacións fronte a esta plaga. 

Sergio Casal, concelleiro de Medio Ambiente informou que o Concello do Porriño adheríuse por segundo ano consecutivo. A alcaldesa Eva Garcia firmou esta semana o correspondente decreto. 

O Programa garante a retirada e destrucción dos niños de velutina coa colaboración do Concello. A veciñanza que atope niños nas suas propiedades o nas cercanías, deben comunicar co número de teléfono 012, servizo de Atención e Información á Cidadanía da Xunta de Galicia e premer na tegra número 1, para dar aviso.

Persoal da empresa pública “SEAGA” encargase da retirada sempre que estean a menos de 25 metros do chan e de facelo nun prazo de 5 días laborais.

O Concello de O Porriño recibirá e canalizará, a través do rexistro xeral, as chamadas dos veciños que alerten da existencia de niños e comunicará a información á Xunta de Galicia.  

 

 

A Alcaldesa denegou un pleno extra que solicitaba o PP, “ao non constar acreditada a autenticidade das firmas dos concelleiros”

A Alcaldía de O Porriño denegou a convocatoria de pleno extraordinario que ven de solicitar o grupo municipal do Partido Popular “ao non constar acreditada a autenticidade das firmas e a vontade dos concelleiros solicitantes”. Como consecuencia a solicitude de pleno “non ven correctamente firmada polo número necesario de concelleiros” (unha cuarta parte dos membros da corporación).

A resolución da Alcaldía basease no exame da solicitude de pleno e da acreditación dos concelleiros firmantes al cotexalos con outros documentos existentes no Concello. Do que resulta que “só o voceiro, Alejandro Lorenzo presenta solicitude e firma electrónica con certificado recoñecido”.

A resolución da Alcaldía é concluínte ao engadir que “respecto da acreditación da identidade, firma e declaración do resto de concelleiros firmantes, só consta un garabato ou simulacro de firma ao final do documento”. E precisa as seguintes irregularidades: “non se identifica a autenticidade dos firmantes co seu nome e apelidos; non se identifica a autenticidade dos firmantes co seu DNI e non se formula a solicitude mediante documento ou firma electrónica como alternativa”.

Antes de firmar o decreto de denegación, a alcaldesa reuniuse e consultou o caso co Secretario Xeral do Concello. O voceiro do PP, Alejandro Lorenzo xa ten coñecemento da denegación da que foi informado polo Secretario.

O Delegado de Zona Franca entregou as chaves do local que acollerá a futura gardería infantil dos polígonos industriais do Porriño

David Regades, delegado do consorcio Zona Franca entregou este mediodía, en presenza da alcaldesa, Eva Garcia, as chaves do local que acollerá a futura gardería infantil dos polígonos industriais da Granxa e das Gándaras.

O local atópase no centro de servizos do Consorcio Zona Franca, no polígono da Granxa.

Beatriz Cabaleiro, directora da firma de centros de educación infantil “Trastes”, recibiu as chaves co propósito de axeitar as instalacións para a súa apertura no vindeiro setembro cunha capacidade para 74 nenos e nenas.

Desde xeito atendese unha demanda histórica da Entidade de Conservación de A Granxa e da Asociación de Empresarios de As Gándaras que por fin será implementada.

O Concello amosa a súa condolencia polo falecemento de Alvaro Cunqueiro que fora xefe da Policía Local

A alcaldesa, Eva Garcia; a concelleira de Seguridade, Lourdes Moure e o Inspector Xefe da Policía Local, Daniel Rodríguez acudiron esta mañá ao Tanatorio de Redondela a dar testemuña da condolencia do Concello do Porriño pola perda de Alvaro Cunqueiro, falecido onte aos 78 anos. Tamén esta tarde, unha delegación municipal acudirá ao funeral que se celebrará na igrexa de Santa María do Viso (18 horas). 

Cunqueiro chegou a Porriño procedente de Vigo e estivo en activo 25 anos, período no que fora xefe da Policía Local do Porriño ata a súa xubilación en 2008.

Na imaxe adxunta, sen dúbida histórica, aparece xunto co anterior alcalde, Xosé Manuel Barros, o anterior presidente da Xunta, Gerardo Fernández Albor; o viceprresidente, Xosé Luis Barreiro Rivas e co gobernador civil da provincia, daquela Virginio Fuentes. 

A empresa contratada polo ADIF para facer as catas para o proxecto de supresión do paso a nivel, comezará neste mes a realizar as sondaxes

 

A alcaldesa Eva Garcia autorizou hoxe á empresa “GOC Consultoría e Ingeniería” a executar as catas e sondaxes precisas para o proxecto de supresión do paso a nivel en O Porriño. Tratase do estudo xeo técnico a incluír no proxecto construtivo que acomete o Administrador de Infraestruturas Ferroviarias (ADIF). “GOC” foi a adxudicataria en unión temporal de empresas coa firma “Proínte” para a redacción do devandito proxecto.
Segundo a documentación presentada pola adxudicataria, o obxectivo é determinar a estrutura xeolóxica dos terreos, tanto na área do paso a nivel a suprimir como ao longo dos posibles puntos onde sexa construída a nova estación do ferrocarril, xa sexa ao norte ou ao sur do Porriño. Actualmente, os redactores do proxecto están a valorar ata seis alternativas diferentes.


Os traballos xeo técnicos a desenvolver, que comezarán a longo deste mes de abril e durarán como máximo dous meses, consistirán en ensaios, catas e sondaxes tanto na vía do tren como nos terreos lindantes e tamén nas estruturas atravesadas polo trazado que poderían terse afectado polo proxecto que se decida.
A alcaldesa manifestou hoxe que “é unha nova fantástica xa que é a primeira vez que se chega tan lonxe nesta arela da veciñanza para acadar a eliminación do paso a nivel polo centro do Porriño”. O inicio das catas amosa, segundo Eva Garcia, “a normalidade coa que se traballa no Concello pois máis aló do balbordo político, estamos a xestionar con tranquilidade e as cousas avanzan razoablemente ben para transformar Porriño nunha vila moderna e alegre>”, rematou.

O pleno aprobou o plan de axudas “Porriño Impulsa 2021″e decidiu a nova concesionaria da Piscina Municipal

O goberno municipal acadou a aprobación plenaria e, polo tanto, aceptase a proposta realizada pola mesa de contratación para adxudicar á firma “Soom Management”, a explotación da Piscina Municipal.  Esta empresa, que actualmente leva as piscinas municipais de Marín, Boiro e Cangas, foi a plica máis valorada, cunha oferta anual de 508.000 € e adquire o compromiso de subrogar ao persoal actual, de 24 traballadores, da piscina municipal.

O acordo tomouse esta tarde pleno municipal ordinario de marzo, na sesión retomada no punto no que se suspendeu o pasado mércores. Votaron a favor os sete concelleiros presentes hoxe (4 do PSOE, 2 do BNG e Manuel Carrera da UDDL). Non acudiron os concelleiros e concelleiras dos restantes grupos municipais.

A alcaldesa Eva García explicou que a convocatoria respondía ao principio de “unidade de acto” recollido na lexislación municipal vixente e polo tanto a sesión retomábase e rematábase hoxe. “E o mesmo pleno coa mesma orde do día que se celebra en dúas sesión. Non hai nin nulidade nin ilegalidade nesta convocatoria”, rematou a alcaldesa que citou que “tamén ese é o criterio” do secretario xeral do Concello, Eduardo Portela.

Lembremos que na primeira parte deste pleno, tomáronse dous acordos salientables e ambos por unanimidade dos 17 concelleiros da corporación. Deste xeito acordouse que o Concello do Porriño habilite a liña de axudas económicas directas aos sectores máis afectados pola Covid, cunha asignación total de 140.000 €.  O plan, chamado “Porriño Impulsa 2021” está destinado á hostalería, comercio e autónomos, os máis afectados polas restricións derivadas da pandemia actual. Tamén aprobouse por unanimidade unha modificación do orzamento por unha cantidade de 108.000 € para afrontar as achegas municipais a varios programas de contratación de persoal subvencionado que suporán a creación de 196 postos de traballo.

Tamén na primeira deste pleno tomou posesión como nova concelleira do grupo municipal do Partido Popular, Ascensión Rosario Costas que cubre a vacante deixada por Ana María Paradela.

Este martes retomarase o pleno de marzo no punto onde fora interrumpido

Este martes 6, a partir das 17 horas, retomarase o pleno ordinario que comezou o pasado mércores 31. A sesión será retomada no punto número 10 da orde do día. Exactamente no punto onde a sesión do mércores foi interrompida ao ordenar a alcaldesa un receso debido ao nivel de tensión que alcanzou. Como se pode verificar na gravación do Pleno que xa está cargado e dispoñible na Mediateca Municipal nesta mesma páxina web do Concello.

Deixamos ligazón

http://mediateca-oporrino.seneca.tv/watch?id=ZTgwYTQ1ZTktOTNlYy00MTRkLWJmMjQtMGQ3NWM1NTM3NWEz

Polo tanto, o pleno retomarase co voto da proposta realizada pola mesa de contratación para adxudicar o novo contrato da piscina municipal. No debate previo foron anunciados 15 votos a favor (PSOE, BNG, PP e UDDL) e 2 votos contra (EU SON).

A esta sesión plenaria convócanse todos os concelleiros e concelleiras da Corporación agás a voceira de EU SON, Patricia Sío quen “foi expulsada do Pleno por verter insultos contra a alcaldesa e negarse, a pesar dos avisos, a retiralos”, dixo o a rexedora porriñesa.

 

Deixamos “pdf” coa orde do día

Pleno Ordinario marzo 2021 (2)

Presentación do certame “A Miña Avoa”, un xogo para dinamizar o comercio local

 

O Concello do Porriño , a través da Concellería de Festexos e a OMIX presentará este luns “A miña Avoa”, unha iniciativa que vai poñer en marcha contando coa colaboración da Asociación de Comerciantes (Acipor), os Hostaleiros do Porriño (Ahospor), e os establecementos non asociados, durante os meses de abril e maio.
A presentación terá lugar este luns, ás 13 horas, no salón de sesións do Concello.

Este proxecto consiste na procura dun tesouro, que da protagonismo á economía local, non só coa súa implicación, senón tamén, porque os premios reverten no consumo das propias empresas locais.
O xogo consiste en localizar páxinas dun xornal vello polas empresas da zona, que conteñen 3 enigmas distintos. A través deles, a veciñanza ten que adiviñar onde se atopa o tesouro escondido. Poida que se xogue ao engano, pero só na primeira ollada, posto que non é imposible de acertar.

Xogo “A miña avoa”