`Porremprego Cualifica´ traballa na posta en marcha dun comedor social

20 persoas desempregadas do Porriño fórmanse mentres traballan no obradoiro dual de emprego `Porremprego Cualifica´, promovido polo Concello do Porriño e subvencionado pola Consellería de Promoción do Emprego e Igualdade con 503.987 euros, que se está a desenvolver nas instalacións do multiusos de Torneiros.

O alcalde, Alejandro Lorenzo, visitou esta semana aos alumnos do obradoiro para coñecer de primeira man como se está a desenvolver a formación e os proxectos nos que traballan nas dúas especialidades que se imparten: a de Cociña e a de Atención Sociosanitaria en domicilio e institucións.

“Un municipio como o noso, cunha hostalería funcionando a pleno rendemento, necesita profesionais cualificados, e o mesmo no eido da atención a persoas dependentes, é algo que require de formación adecuada para poder prestar o mellor coidado”, apuntou o alcalde que asegurou aos alumnos e alumnas que “o día de mañá seredes profesionais en dous sectores de moita importancia e estou seguro de que o que hoxe estades a aprender servirá para axudar a moitísima xente”.

Un Porriño máis humano: comedor social

A especialidade de Cociña de `Porremprego Cualifica´ plantexa axudar a aquelas persoas e familias do Porriño que se atopan nunha situación de vulnerabilidade. A tal fin, poñerase en marcha un comedor social nas instalacións do multiusos con capacidade para 20 comensais que abrirá as súas portas dous días á semana e será xestionado a través dos servizos sociais do Concello. “Sabemos que neste momento hai moitas persoas atravesando momentos de dificultade e coa  implicación do persoal do obradoiro e dos traballadores e traballadoras do mesmo queremos axudalos”, concluíu o alcalde, “Temos que estar á altura das circunstancias e facer do Porriño unha vila máis humana e solidaria se cabe”.

O comedor social prevé iniciar a súa actividade  a mediados do mes de xaneiro, os martes e xoves.

Comida solidaria de Nadal

Dende o Concello do Porriño propóñense que ninguén quede sen celebrar este Nadal. Así, nestas datas tan entrañables, os alumnos/as traballadores/as da especialidade de cociña prepararán un xantar de Nadal para levar para a casa este 22 de decembro. Serán 6O as persoas beneficiarias, xestionadas a través dos servizos sociais. O menú constará de dous pratos e postre.

O Porriño dá os primeiros pasos para a implantación do transporte urbano municipal

O Concello do Porriño vén de presentar á Xunta de Galicia o seu proxecto para a implantación do transporte urbano municipal incluído na Rede de Transporte Público de Galicia.

A proposta, que tivo unha boa acollida por parte da administración autonómica, inclúe varias liñas de autobuses que conectarán todas as parroquias do municipio e o centro urbano e darán servizo aos dous grandes polígonos industriais.  Estas estableceríanse grazas a un convenio entre o Concello do Porriño e a Consellería de Infraestruturas e Mobilidade, que xestiona as concesións do transporte público de toda Galicia.

“Os veciños e veciñas do Porriño, tanto das parroquias como do centro urbano, teñen que ter a posibilidade de moverse por todo o termo municipal facendo uso do transporte público”, afirmou o alcalde, Alejandro Lorenzo, “A proxecto co que traballamos xa coa Xunta de Galicia inclúe varias liñas que conectarán as parroquias co centro urbano e tamén dúas lanzadeiras que darán servizo aos polígonos de As Gándaras e A Granxa con catro frecuencias, algo de vital importancia e moi reclamado polas empresas e traballadores da zona industrial”.

O rexedor agradeceu a disposición da “Consellería de Infraestruturas e Mobilidade para facilitar a posta en marcha deste bus urbano á maior brevidade posible. É un servizo do que non dispoñemos e que precisamos dende hai tempo”.  

Beneficios para os usuarios e usuarios

Os usuarios e usuarias do bus urbano do Porriño beneficiaríanse de todas as vantaxes da Tarxeta da Mobilidade de Galicia, TMG, disfrutando de de descontos, bonificacións e transbordos gratuítos en todo o territorio galego.

Ademais, os menores de 21 anos poderán viaxar totalmente gratis ao estar incluídas as liñas municipais na Tarxeta Xente Nova.

O Concello do Porriño traballa xa na aplicación dunha serie de bonificacións específicas a maiores para a súa poboación.

José Luis Baños de Cos recibe o V Premio Vidal Bolaño pola súa obra “Lume”

O IES Ribeira do Louro acolleu onte a entrega do V Premio Vidal Bolaño, que este ano recoñeceu a José Luis Baños de Cos pola súa obra “Lume”, unha obra moi acaída pola temática e pola linguaxe empregada para a súa representación ou lectura nos centros de ensino secundario.

Acompañando ao gañador estiveron o alcalde do Porriño, Alejandro Lorenzo, o concelleiro de Cultura, Bienvenido Estévez, a secretaria do premio e profesora do instituto porriñés, Raquel Castro, e Francisco Castro, director xeral da Editorial Galaxia.

Tal e como explicou Raquel Castro o xurado do Premio de Textos teatrais Roberto Vidal Bolaño, destacou da peza “que é unha obra que aborda o tema das diversas violencias sociais, como a homofobia ou a violencia de xénero, das que todas as personaxes sofren as consecuencias”. Tamén a escrita “cunha dramaturxia que mestura relato e drama, dalle relevancia ás partes grupais, onde a xeito de coro clásico agroma a conciencia social”.

Pola súa banda, Francisco Castro, quixo agradecer ao Concello do Porriño o seu compromiso xa que “son cinco anos xa apostando por este premio que xa podemos dicir que está consolidado” e ao IES Ribeira do Louro “por ser vangarda e referencia do teatro xuvenil en Galicia”.

O alcalde, Alejandro Lorenzo, quixo destacar a importancia “dos valores que trasmite a obra gañadora, Lume, xa que a concienciación social é parte da esencia deste premio, achegando a través do teatro a importancia do respecto aos mozos e mozas”. Lorenzo rematou destacando que “o Premio Vidal Bolaño é xa parte da nosa identidade cultural. Chegou para quedarse situando ao Porriño no centro da dramaturxia xuvenil e por iso dende o Concello o seguiremos respaldando”.

O gañador, José Luis Baños de Cos, explicou a dureza de escribir esta obra “que foi xurdindo pouco a pouco a través da realidade, que moitas veces supera a ficción en dureza. Creo que é necesario falar do acoso, da violencia de xénero… xa que é unha forma tamén de loitar contra elas”.

José Luis Baños de Cos , natural de Jerez de la Frontera, é Licenciado en en Antropoloxía Social e cursou estudos sobre teatro social e teatro do oprimido. Autor da obra “O faiado”, da compañía O Cubo Teatro, “A espera”, de Titereficcións, e “Suite up”, de Fanfarra Teatro. En 2028 gañou o I Premio de Teatro Breve Jenaro Marinhas del Valle coa obra “O círculo”, e en 2019, A pegada de Microteatro, convocada por ESAD Galicia, con “Cheas de Bestas”. Tamén o XIV Premio Abrente do MIT de Ribadavia con “Asfixia”. En 2020 gañou o III Premio Vidal Bolaño pola súa obra “A cámara escura”.

Bienvenida Lorenzo, a nosa veciña máis lonxeva, cumpre un século de vida

O Porriño celebra o aniversario da súa veciña máis lonxeva, Bienvenida Lorenzo, que cumpre un século de vida. Non todos os días se cumpren 100 anos e tampouco é doado alcanzar esa idade en boas condicións para disfrutar da celebración como hoxe fixo Bienvenida, que rodeada da súa familia recibiu a visita do alcalde, Alejandro Lorenzo , en tan sinalado día. E é que ademais, en casa de Bienvenida hoxe festexábase por partida dobre xa que tamén se celebra o 18 aniversario de Daniel, un dos seus bisnetos, que comparte aniversario don ela.

O rexedor felicitou a ambos e entregou á homenaxeada un simbólico un fermoso ramo de flores en nome de todo o pobo do Porriño, como símbolo do agarimo dos seus veciños e veciñas.

“Faime inmensamente feliz compartir con Bienvenida a felicidade deste momento e máis aínda comprobar o fantástico estado no que se atopa a veciña máis lonxeva do noso pobo”, explicou o alcalde, “Ela é unha testemuña da nosa historia recente e garda valiosos recordos que hoxe tivo o detalle de compartir conmigo. É un enorme luxo que contemos con ela”.

Bienvenida naceu o 13 de novembro de 1922 no municipio veciño de Mos, pero con tan só 18 aniños mudouse ao Porriño onde viviu ata o de agora ao carón do antigo campo da feira. Como destaca a súa familia foi e é unha nai e avoa excepcional, que coidou dos seus catro fillos, catro netos e oito bisnetos.

Recibe más mensajes para Concello do Porriño

Puedes añadir un botón de Messenger a la publicación para que Concello do Porriño reciba más mensajes.

Ver insights y anuncios

Promocionar publicación

127127

11 comentarios

3 veces compartida

Me gusta

Comentar

Compartir

A Aula UNED do Porriño abre a inscrición nos seus dous primeiros cursos

A primeiro deles, o  “Programa de reforzo educativo para a obtención do título de ESO para adultos” que se desenvolverá do 25 de outubro de 2022 ao 31 de maio de 2023 de maneira presencial. As clases impartiranse de martes a venres de 18 h a 21 h e os sábados de 10h a 13h e prepararanse as materias incluídas nos tres eidos  dos que consta a proba (científico-tecnolóxico, comunicación e social).  Está dirixidas a maiores de 18 anos que non dispoñan desta titulación.

A matrícula ordinaria é de 40€ e gratuíta para os alumnos e alumnas empadroados no Porriño.

A segunda, o curso de “Comunicación Empresarial en Inglés” dirixido a todas as persoas interesadas cun nivel de inglés xeral de partida preferiblemente igual ou superior a B1.  O alumno adquirirá os coñecementos necesarios para efectuar con éxito comunicacións verbais e non verbais en lingua inglesa que lles permitirán desenvolverse socioprofesionalmente no eido internacional.

O curso desenvolverase do 28 de outubro do 2022 ao 17 de febreiro de 2023 (en horario de tarde) podendo elexir a asistencia presencial ou a online en directo ou en diferido. Componse de 40 horas lectivas, 2 créditos ECTS.

A matrícula é de 80€.

Máis información:

UNED Pontevedra-Aula Universitaria do Porriño. (Multicentro de Torneiros)

986851850 / negociadodealumnos@pontevedra.uned.es

As obras de restauración da capela do Cristo comezarán antes de seis meses

As obras de reconstrución da Capela do Cristo darán comezo nos próximos meses. O Concello do Porriño concedeu onte a licencia de obra á Diócese de Tui-Vigo para o comezo dos traballos de reparación da cuberta do templo antes de seis meses.

As obras que executará e financiará a Diócese Tui-Vigo contan coa autorización da Dirección Xeral de Patrimonio Cultural e un orzamento de 71.165 euros.

“É unha gran nova para O Porriño, algo moi demandado non só polo valor patrimonial e sentimental da Capela senón tamén pola perigosidade que implica o estado no que se atopa dende hai máis de dous anos”, afirmou o alcalde Alejandro Lorenzo, “Tal e como se comprometeron dende a Diócese Tui-Vigo unha vez finalizaron as periciais pendentes no mes de xullo solicitáronse os pertinentes permisos para acometer a reforma. Tanto dende o Concello do Porriño como dende a Diócese axilizáronse os trámites para que as obras poidan iniciarse o antes posible”.

Lembramos que o edificio está danado dende o 16 de marzo de 2020, cando unha grúa pluma de grandes dimensións caíu sobre el destrozando a cuberta e parte do seu interior.  A Diócese de Tui-Vigo, propietaria do recinto relixioso, presentou unha reclamación contra as seis empresas implicadas no sinistro e as súas respectivas aseguradoras que está pendente de resolver.

Noemí Fernández, gañadora de `Tes Talento?´

A porriñesa Noemí Fernández alzouse onte co primeiro premio desta edición do concurso musical Tes Talento?: 500 euros e a grabación dun tema.

O xurado deu como gañadora a esta moza tras unha interpretación maxistral do tema de Dreamgirls, “One night only”. “Todas as voces que escoitamos eran marabillosas, pero a de Noemí preponderaba sobre as demais e emocionounos a todos nas súas dúas intervencións”, destacou o voceiro do xurado, Carlos Tresandí. 

O segundo posto foi para o mosense Iker Faure, que conquistou ao público e xurado cun tema da súa autoría “Hasta que tú quieras” e o terceiro para a porriñesa Lucía Samoelle e a súa persoal interpretación de “La despedida”.

O alcalde, Alejandro Lorenzo, foi o encargado de entregar os galardóns e aproveitou para dar a noraboa “a todos e todas as participantes que demostrastes que sen dúbida algunha aquí hai talento” e destacou “a boa acollida que teñen iniciativas como este concurso musical e todas aquelas actividades culturais que se propoñen, mostra de que O Porriño e a súa veciñanza ten unha enorme inquedanza cultural e, dende o Concello o respaldaremos”.

En total foron 12 os artistas que disputaron a final tras clasificarse nas dúas semifinais celebradas. O xurado, formado por Carlos Tresandí, Bienvenido Estévez, Carla Lourdes, Miriam Rodríguez e Felix da Silva, destacou a calidade artística de todas as propostas.

Xavi Arós, gañador do concurso infantil

Na modalidade infantil o gañador foi Xavi Arós, que se impuxo ao resto dos participantes coa súa interpretación do tema “SloMo”. En segudo lugar un grupo formado por Antón Pedreira, Fabio Ocampo, Javier Muíños e Mateo Pallares, os Generación M, que brillaron con “Miña Terra Galega”. Por último, Nora Rivas ocupou o terceiro posto tras interpretar “The one that got away”.

 

Coque Malla, París de Noia e a volta de clásicos como “Louro Valley Festival” para celebrar as Festas do Cristo

O Porriño prepárase para celebrar as súas festas patronais e o fai por todo alto, cunha programación que abrangue 30 días e máis de 80 actividades.

As agardadas Festas do Cristo 2022 foron presentadas hoxe no salón de plenos do Concello polo alcalde do Porriño, Alejandro Lorenzo, o concelleiro de festexos, Bienvenido Estévez, e os edís Abel Estévez e Antía Carrera, que estiveron acompañados por representantes do tecido asociativo do Porriño.

“Despois dos anos tan difíciles que tivemos que vivir merecemos aparcar por uns días os problemas e facelo xuntos, disfrutando destas festas con todas esas persoas que nos acompañan sempre, a nosa familia, amigos e veciños. Confío en que estas festas nos sirvan para iso aos porriñeses e porriñesas, para festexar o afortunados que somos de ternos os uns aos outros e de formar parte de alto tan noso e tan auténtico, O Porriño”, apuntou o rexedor.

Lorenzo, quixo destacar o apoio de todas as asociacións culturais e veciñais, clubes deportivos e de todos os veciños e veciñas que contribuiron desinteresadamente no programa das Festas. “Sen o voso esforzo e implicación non sería posible e non podo máis que agradecer a ilusión coa que nos axudastedes a facer realidade estas festas, que son por e para vós”, concluíu o rexedor, non sen antes agradecer o labor da concellería de Festexos, “Beni e o seu equipo, e o resto de concelleiros fixeron un esforzo titánico para poder deseñar este programa e estou seguro que falo no nome de toda a veciñanza ao agradecerllo”.

Coque Malla, Tanxugueiras , París de Noia e Gisela, entre outros

As Festas do Cristo volven cunha ampla proposta musical, gratuíta e para todos os públicos. Entre os seus atractivos estará o concerto de Coque Malla, o venres 23 no exterior do pavillón municipal, Treixadura, o xoves 22 na rúa Domingo Bueno, as Tanxugueiras, o venres 30 ou Gisela e o seu espectáculo Concert Kids, o sábado 24. Os amantes das verbenas poderán disfrutar de grandes directos con orquestras como París de Noia e América  -o domingo 25-, M3 e Atenas –sábado 24-, La Dimensión e El Combo Dominicano –luns 26-, e América e Triunfo ( sábado 1 de outubro). Ademais súmase á celebración o Montando Cristo Festival –sábado 24- con bandas como Zalomon Grass, Inmates, Zona Zero ou The Broke.

A volta dos clásicos: Tes Talento e Louro Valley

Outro dos platos fortes do programa proposto polo executivo local é a volta de eventos tan reclamados como o concurso musical “Tes Talento?” ou o festival de djs “Louro Valley Festival” que se celebrará o venres 23 de setembro e cuxo cartel será presentado oficialmente nos próximos días.

Actividades para todos e todas

A programación a completa unha ampla proposta de actividades para todos os públicos con opcións como teatro, monólogos, espectáculos infantís como o concerto de “Uxía Lambona e a Banda Molona” ou “Petiscos de lingua”, deportes da man dos clubs deportivos da vila, cine ao aire libre ou monólogos como o de Pepo Suevos ou Arantxa Treus.

XXIX Festa dos Callos

O broche de ouro o poñerá como sempre a Festa dos Callos que chega á súa XXIX edición. Celebrarase o domingo 2 de outubros e o fará por todo o alto. A festa será presentada nunhas semanas, onde se desvelarán as sorpresas coas que conta este ano.

📌 Podes descargar a programación completa na seguinte ligazón: https://ecultura.net/wp-content/uploads/2022/09/PROGRAMA-SETEMBRO-WEB.pdf

Comeza o curso nas escolas infantís do Porriño

O alcalde do Porriño, Alejandro Lorenzo, e a concelleira de Política Social, Rosario Costas, visitaron esta mañá as escolas infantís da rede Galiña Azul no Porriño, onde deron a benvida aos nenos e nenas que esta semana inician o novo curso.

Son 100 os pequenos e pequenas de 0 a 3 anos matriculados nestas escolas: 50 na Galiña Azul de Doantes de Sangue e outros tantos na de Torneiros. O Concello do Porriño levou a cabo melloras en ambos centros durante estas vacacións estivais, co fin de que os cativos e cativas tiveran a mellor volta ao cole.

En Doantes de Sangue acometéronse melloras na carpintería do centro, na instalación eléctrica e pintouse. Pola súa banda en Torneiros reparáronse os paneis plásticos de protección das paredes e pintouse a escola por completo, ademais de instalar unha lavadora nova.

O alcalde, tratou coas directoras de ambos centros outras melloras a acometer e aproveitou para felicitalas polo gran traballo que desenvolven. “O voso traballo é esencial e permite, ademais de facilitar ao máximo a conciliación das familias, que os nenos e nenas comecen a socializar e aprender dende ben pequeniños”. En definitiva, “facedes máis doado o día a día das familias”.

Publicadas as bases para a instalación de postos nas Festas do Cristo 2022

O Concello do Porriño vén de publicar as bases para a instalación de postos e atraccións nas Festas do Cristo 2022. 

A solicitude de preinscripción pode descargarse na seguinte ligazón: https://oporrino.org/documentos/solicitude-instalacion-postos-e-atraccions-festas-do-cristo-2022/

Tamén pode recollerse no Concello do Porriño ata o 15 de setembro, en horario de 9 a 14h. Toda a documentación requerida nas bases será entregada no Rexistro do Concello ou a través da sede electrónica ata o 15 de setembro. 

BASES INSTALACIÓN POSTOS E ATRACCIÓNS FESTAS DO CRISTO 2022: https://oporrino.org/documentos/bases-instalacion-postos-e-atraccions-festas-do-cristo-2022/