Sen categoría

• Un total de 27comercios e 8 salóns de beleza do Porriño amosaron as súas propostas de moda, calzado, xoiería, complementos, maquillaxe e peiteado.

O Porriño, 26 de abril de 2025.– O Porriño viviu esta fin de semana unha nova edición da súa Fashion Weekend, un evento xa consolidado no calendario local que este ano celebrou a súa terceira edición cunha programación completa e unha participación moi positiva por parte da veciñanza e do comercio local.

A actividade comezou na tarde do venres coa celebración da Shopping Night, que mantivo os comercios abertos ata as doce da noite. Durante esas horas, os establecementos da vila ofreceron descontos, promocións e agasallos, nun ambiente marcado pola música dos seis DJs distribuídos por diferentes puntos do centro. Como novidade, tivo lugar unha festa infantil previa, entre as sete e as nove da tarde, que contou cunha importante presenza de familias e pequenos. A xornada desenvolveuse cun bo ritmo de afluencia e cunha resposta positiva tanto por parte dos comerciantes como dos clientes.

A programación continuou na mañá do sábado cunha sesión vermú musical na praza Antonio Palacios, a cargo do grupo Xinetes do Trópico, que reuniu numeroso público nun ambiente relaxado e festivo. Foi unha proposta pensada para ampliar o alcance do evento a diferentes públicos e momentos do día, reforzando a conexión entre cultura e comercio.

Xa pola tarde, a partir das seis, celebrouse o desfile central da Fashion Weekend. Un total de 28 comercios e 8 salóns de beleza do Porriño amosaron as súas propostas de moda, calzado, xoiería, complementos, maquillaxe e peiteado. A pasarela estivo conducida pola xornalista Lucía Rodríguez, e contou coa participación da escola Small Big Models, que colabora co evento por terceiro ano consecutivo de xeito altruísta. O público acompañou o desfile durante toda a tarde, nun espazo que se mantivo cheo ata o remate das actuacións, entre as que destacaron Erika Lewis, Lucía Samoelle, o saxofonista Diego Caride e Pablo Méndez.

Durante o evento distribuíronse papeletas numeradas entre a clientela dos comercios participantes, coas que se realizou un sorteo de cinco cestas de produtos gourmet. Os números premiados poden consultarse nas redes sociais do Concello ou na web oporrino.org. As persoas agraciadas poderán recoller os seus premios nas oficinas do Concello a partir do luns, presentando a papeleta correspondente.

O alcalde, Alejandro Lorenzo, sinalou ao rematar a xornada que “a Fashion Weekend é unha mostra de como O Porriño sabe reinventarse e poñer en valor o que é propio: o seu comercio, o seu talento e a súa capacidade de atraer e sorprender. Este tipo de eventos son unha ferramenta para construír vila, para fortalecer a identidade local e para seguir facendo do Porriño un lugar onde vivir e mercar con orgullo”.

Pola súa parte, a concelleira de Comercio, Rosa Isabel Alonso, agradeceu “o esforzo dos comerciantes e dos profesionais participantes, que fixeron posible que a moda e a creatividade local ocupasen o lugar que merecen na nosa vila”.

A III Fashion Weekend pecha así unha edición que medra en contido e organización, e que reafirma o papel do comercio local como motor de dinamización e cohesión social.

NÚMEROS PREMIADOS

465, 498,  631, 950, 1309

• Durante dous días a vila converterase nun espazo vivo, onde a moda, a música e a creatividade local serán protagonistas, facendo da rúa un lugar de encontro, inspiración e celebración.

O Porriño, 22 de abril de 2025.– A Casa Consistorial acolleu esta mañá a presentación da terceira edición da Fashion Weekend, un evento que se celebrará esta fin de semana e que promete converter a vila no epicentro da moda galega da man do seu comercio local. Organizado polo Concello do Porriño en colaboración co tecido comercial da vila, esta cita consolídase como unha das máis esperadas do ano.

O alcalde, Alejandro Lorenzo, destacou na súa intervención a importancia deste tipo de iniciativas para a dinamización do comercio e da economía local. “A Fashion Weekend é moito máis que moda: é unha demostración de forza e creatividade do noso tecido comercial. Dende o Concello seguiremos apostando por estas iniciativas que dinamizan a nosa vila, atraen visitantes e apoian aos nosos comerciantes e profesionais”, sinalou o rexedor.

Tamén participou na presentación a concelleira de Comercio, Rosa Isabel Alonso, quen puxo en valor a implicación e o traballo conxunto de todos os actores implicados. “É emocionante ver como, edición tras edición, esta cita medra. Grazas ao esforzo dos nosos comerciantes e salóns de beleza, conseguimos que O Porriño respire moda, ilusión e comunidade durante dous días cheos de actividade”, asegurou.

A fin de semana arrancará o venres 25 de abril coa celebración da Shopping Night, unha noite na que os establecementos comerciais da vila abrirán as súas portas en horario especial, de nove da noite a doce, ofrecendo propostas dinamizadoras, descontos, sorteos, agasallos e moitas sorpresas. Este ano, como novidade, celebrarase unha festa infantil entre as sete e as nove da noite, pensada para que as familias poidan gozar da xornada ao completo. A música será protagonista tamén durante a noite, coa presenza de seis DJ’s que amenizarán as principais rúas da vila e encherán O Porriño de ambiente festivo. Durante este evento repartirase material promocional do Concello, incluíndo bolsas en cada comercio e rifas para os sorteos que terán lugar o sábado.

O sábado 26 de abril será o momento da Fashion Night, onde a praza Antonio Palacios se converterá nunha gran pasarela ao aire libre. A partir das seis da tarde, desfilarán as propostas de vinte e oito tendas e oito salóns de beleza do Porriño, que amosarán as últimas tendencias en roupa, calzado, xoiería, complementos, maquillaxe e peiteados. O desfile estará dirixido pola xornalista Lucía Rodríguez e contará coa participación da escola de modelos Small Big Models, que colabora de maneira desinteresada por terceiro ano consecutivo, demostrando o seu compromiso coa moda local.

A velada estará tamén cargada de emocións, coa actuación musical de Erika Lewis, o saxofonista Diego Caride, Lucía Samoelle e outras propostas artísticas aínda por confirmar. Durante a noite sortearanse cinco cestas de produtos gourmet entre todas as persoas participantes.

Con esta proposta, O Porriño reivindícase como un referente na promoción do comercio local a través da moda, a creatividade e a unión veciñal.

• A actividade, de un día de duración, inclúe o desprazamento en autocar, seguro de viaxe, almorzo tipo pícnic, xantar, e visitas culturais de gran interese.
• O prazo para presentar solicitudes abrirá o mércores ás 9:00 horas, e cada persoa só poderá reservar unha única praza por formulario.

O Porriño, 21 de abril de 2025.– O Concello do Porriño organiza unha excursión gratuíta a Madrid o martes 6 de maio, cun atractivo programa cultural que permitirá á veciñanza descubrir a pegada do arquitecto porriñés Antonio Palacios na capital do Estado.

A actividade, de un día de duración, inclúe o desprazamento en autocar, seguro de viaxe, almorzo tipo pícnic, xantar, e visitas culturais de gran interese: o Museo do Metro de Madrid, situado na histórica Estación de Chamberí; unha visita panorámica polo Madrid de Antonio Palacios; e a exposición Madrid Metrópoli. A saída será desde o Pavillón Municipal de Deportes.

A excursión, dirixida exclusivamente a persoas empadroadas no Porriño, conta con 50 prazas que se asignarán por orde de inscrición no rexistro municipal. O prazo para presentar solicitudes abrirá o mércores 23 de abril, ás 9:00 horas, e cada persoa só poderá reservar unha única praza por formulario.

O alcalde, Alejandro Lorenzo, subliñou que “a excursión combina cultura, coñecemento e participación cidadá. Será unha experiencia enriquecedora que permitirá descubrir fóra da nosa vila o valor e a dimensión da figura de Antonio Palacios, dun xeito accesible e compartido”.

Con esta proposta, o Concello reafirma a súa aposta por difundir o patrimonio local, fomentar o interese pola arquitectura e promover a cultura a través da participación da veciñanza.

O vindeiro luns 14 de abril ás 8:30 horas dará comezo o Campamento de Semana Santa, organizado pola Concellería de Igualdade do Concello do Porriño.

O lugar de entrega e recollida dos nenos e nenas participantes será na porta principal do CEIP Plurilingüe Xosé Fernández López.

Os e as participantes deberán acudir con:

• Roupa e calzado cómodos.
• Unha mochila con calzado de reposto.
• Merenda e auga.

No caso de precisar algunha vestimenta específica para determinadas actividades, serán os monitores e monitoras quen o comuniquen con antelación.

Lembramos que só as persoas que presentaron a solicitude están autorizadas para entregar e recoller aos rapaces e rapazas. Se por algún motivo é outra persoa a encargada, deberá ser maior de idade e entregar aos monitores/as a autorización asinada correspondente, acompañada dos DNI da persoa autorizante e da autorizada.

O listado de admitidos/as está xa dispoñible para consulta.

Agradecemos a colaboración das familias para garantir o bo funcionamento do campamento e desexamos que sexa unha experiencia inesquecible para todos e todas! 

Continúa a conmemoración do 150 aniversario do nacemento de Antonio Palacios e desta vez faino na cidade de Madrid. O alcalde do Porriño, Alejandro Lorenzo, desprazouse esta mañá á capital do país para participar na inauguración da mostra “Madrid metrópoli. El sueño de Antonio Palacios” que poderá visitarse ata o 6 de xullo no primeiro andar de CentroCentro. A exposición homenaxea ao ilustre arquitecto porriñés así como ao Madrid que ideou e construíu, a través de máis de 150 pezas, entre planos, debuxos, acuarelas, libros e fotografías, que percorren o legado de Palacios e a súa influencia na paisaxe urbana de Madrid.

A de hoxe foi unha nova proba de reforzo de lazos que comezara a tecer o propio arquitecto hai máis dun século e que tivo a súa última representación no acto de irmandade entre Galicia e Madrid celebrado na capital da Louriña. Logo deste encontro, o pasado mes de outubro, Alejandro Lorenzo volve coincidir co seu homólogo, José Luis Martínez-Almeida, para exaltar a figura deste célebre porriñés que a través da súa obra foi quen de tender pontes entre as dúas localidades, sen esquecer nunca de onde viña.

“Palacios non foi só un arquitecto brillante, foi un home con raíces profundas, que levou a alma da nosa terra a cada recuncho desta cidade. Con granito do Porriño e talento galego, axudou a construír o Madrid que hoxe admiramos. E nese granito está impreso o carácter da nosa xente: firme, humilde e loitadora”, remarcou durante a súa intervención no acto Alejandro Lorenzo, asegurando que, “O soño de Antonio Palacios é tamén o meu soño: o de ver como un porriñés universal sigue unindo a Porriño e Madrid a través do tempo”. E neste senso lembrou, de xeito anecdótico e dirixíndose a Martínez-Almeida, que “como sempre di vostede, alcalde, compartimos caseiro; pois os dous concellos, o de Madrid e o do Porriño, son obras do mesmo ilustre arquitecto e quizais por iso nos entendemos tan ben, porque ata as nosas casas consistoriais falan o mesmo idioma”. Lorenzo rematou a súa intervención animando a seguir o exemplo de Palacios “soñando ao grande, construíndo xuntos e honrando ao mellor das nosas terras”.

Os eixes arquitectónicos de Palacios en Madrid

Comisariada por Javier García-Gutiérrez Mosteiro e Julián García Muñoz, a exposición ofrece un percorrido exhaustivo polos proxectos de Antonio Palacios, quen soubo dotar a Madrid dunha monumentalidade que transcendeu o seu tempo e cuxa influencia marcou de maneira indeleble a paisaxe urbana da capital.

Despois dun espazo introdutorio no que se aborda a súa formación como arquitecto e os seus primeiros proxectos, se desprega o primeiro itinerario pola cidade: o eixe articulado polas rúas Maior-Sol-Alcalá, que Palacios monumentalizou con moitas das súas máis recoñecibles escenografías, como son o Círculo de Belas Artes, o Banco Español do Río da Prata (actual sede do Instituto Cervantes) ou o Palacio de Comunicacións, hoxe Palacio de Cibeles.

A continuación, exponse a intervención de Palacios no eixe de Gran Vía, a cuxa transformación contribuíu con obras emblemáticas como o Edificio Matesanz ou os hoteis Alfonso XIII e Florida. Acto seguido, os visitantes poderán coñecer o desenvolvemento urbano que se estendeu cara o eixe Prado-Castellana, onde Palacios deixou a súa pegada con intervencións como o Hospital de Jornaleros de San Francisco de Paula (coñecido como Hospital de Maudes).

O seguinte espazo expositivo amosa outro elemento fundamental da cidade contemporánea, o Metro. Palacios xogou un papel clave na súa imaxe, deseñando estacións, bocas de acceso e ata o icónico logotipo do suburbano.

A última unidade museográfica, definida como o eixe dos soños, ofrece un itinerario por algúns dos proxectos de Antonio Palacios que non chegaron a executarse, como a reforma da Porta do Sol, o Palacio das Artes ou a Gran Vía Aérea.

Visitas guiadas gratuítas para tódolos públicos

Para achegar a exposición ao público organízanse diferentes tipos de visitas guiadas gratuítas, individuais, en grupos, para familias e tamén adaptadas con intérprete de Lingua de Signos Española. Todas estas visitas poden comezar a reservarse a partir de mañá no portal web palacios.reservaspatrimonio.es

Con motivo da campaña para dar a coñecer a Lei de Residuos, o Concello do Porriño, organizará o próximo 1 de abril, a partir das 19.00 horas, unas xornadas de reciclaxe explicando en qué consiste o quinto contenedor: o marrón. Nesta sesión, os asistentes recibirán indicacións e os materiais necesarios para facilitar e cumplir coa súa reciclaxe.

Todos os participantes recibirán cubos de biorresiduos de 10 litros xunto coa chave necesaria para poder empregar os novos contenedores que se procederan a instalar nas rúas.

Esta campaña, impulsada polas concellerías de Medio Ambiente e Limpeza, leva en activo máis dun ano e ten como obxectivo principal conseguir que toda a cidade do Porriño recicle, conciencíese da xestión dos residuos e se convirta nunha urbe más limpa e sostible no tempo.

“É esencial que todos tomemos conciencia da importancia de separar e reciclar adecuadamente, non só para reducir a cantidade de residuos que enviamos ás entulleiras, senón tamén para contribuír á saúde do medio ambiente”, explicou a concelleira, Antía Carrera, concelleira de Medio Ambiente.

“Compostar os restos orgánicos non só axuda a diminuír a cantidade de lixo, senón que tamén produce un abono natural que pode ser utilizado en xardíns e hortas, pechando así o ciclo natural”, engadiu Carlos González, concelleiro de Limpieza.

Desde o Concello do Porriño se aposta por este tipo de xornadas en busca dunha sociedade máis concienciada co medio ambiente e facilitar que esta se familiarice coas novas opcións que existen para a construción dun mundo máis sostible.

O pasado 21 de marzo celebrouse o Día da Árbore e para e para conmemoralo, este mércores 24 de marzo, Día do Clima, a Oficina Municipal de Información Xuvenil do Concello e a Concellería de Educación, organizou unha actividade na que un total de 171 alumnos de cinco colexios diferentes puideron plantar árbores no Paseo do Louro.

Ademais, por grupos e cun camión de bombeiros, regaron as súas plantacións e deixaron por escrito os seus nomes para que cada un poida ver e recordar qué árbol plantou.

Con esta actividade, alumnos e alumnas de terceiro, cuarto e quinto de primaria entraron en contacto coa natureza local, podendo coñecer de primeira man as especies autóctonas que lles rodean e empapándose da beleza do Paseo do Louro que tan preto teñen no seu día a día.

“É fundamental que as administracións apliquen medidas e políticas que contribúan a frear os efectos do cambio climático e da explotación forestal indiscriminada. As árbores e os bosques purifican o aire e axudan a regular o clima. A súa importancia e impacto sobre o medio ambiente teñen un valor incalculable”, sinala Carolina González, Concelleira de Educación do Concello do Porriño.

Con este tipo de actividades o Concello do Porriño segue apostando por crear espazos de harmonía entre os veciños e a natureza, para que podamos vivir nun Porriño cada vez máis sostible, implicando tamén aos máis pequenos.

O Concello do Porriño vén de solicitar unha subvención de  32.000.00 euros para a sustitución das luminarias do alumeado público das zonas peonís existentes nas denominadas Fases I e IV da urbanización de Torneiros por luminarias LED co fin de acadar un aforro enerxético e unha mellora na seguridade do tráfico de vehículo e peóns.

A execución deste proxecto ascende a 48.286,24 euros. En caso de recibir a subvención por parte da Consellería de Presidencia, Xustiza e Deportes, cuxo importe sería financiado sería con cargo as subvencións da liña en concorrencia competitiva do Fondo de Compensación Ambiental para o ano 2025, o Concello asumiría os 16.286,24 euros con cargo a fondos propios.

Con esta actuación, o Concello do Porriño busca mellorar a seguridade viaria e a calidade do servizo de alumbrado público, adaptándoo ás necesidades reais da cidadanía; optimizar os niveis de iluminación, garantindo unha correcta visibilidade e contribuido a seguridade cidadá; incrementar a eficiencia energética do sistema de alumbrado, substituíndo equipos obsoletos por tecnoloxías de baixo consumo; reducir os custos operativos asociados tanto ao consumo eléctrico como ás tarefas de mantemento preventivo e correctivo; contribuír á mellora medioambiental mediante a succión da contaminación lumínica e a optimización do uso dos recursos naturais; e fomentar a sensibilización ambiental da poboación, promovendo actitudes responsables en materia de eficiencia energética e  conservación ambiental.

Con esta reforma conseguirase reducir significativamente o consumo eléctrico asociado á iluminación pública; diminuír a emisión de gases de efecto invernadoiro ao substituír o consumo de enerxía fósil por tecnoloxías eficientes; mellorar a seguridade cidadá, ao garantir unha iluminación pública eficiente e adaptada ás necesidades do entorno urbano; e contribuir á mellora da calidade de vida, proporcionando espazos públicos mellor iluminados e máis seguros.

A renovación do alumbrado público nas fases I e IV da urbanización de Torneiros representa unha intervención estratéxica que responde ás directrices do Fondo de Compensación Ambiental 2025 e ás prioridades do Concello de O Porriño en materia de eficiencia enerxética, sostibilidade e mellora da calidade de vida da cidadanía. Esta actuación permitirá modernizar unha infraestrutura esencial, mellorar o servizo prestado á veciñanza, optimizar os recursos públicos e contribuír de forma efectiva á conservación do medio ambiente e á mitigación do cambio climático, consolidando un modelo de xestión municipal sostible e responsable.

O Concello do Porriño continúa avanzando na mellora e ampliación dos espazos públicos da vila coa adquisición de dúas novas parcelas situadas fronte ao parque infantil, preto do cemiterio municipal. Esta operación permitirá a creación de novas zonas de lecer e o reforzo da accesibilidade na contorna, enmarcándose na fase final dun proxecto integral de humanización e revitalización da zona.

O alcalde do Porriño, Alejandro Lorenzo, destacou a importancia desta actuación, sinalando que “seguimos a apostar pola mellora dos espazos públicos, creando áreas accesibles, modernas e adaptadas ás necesidades da nosa veciñanza. Coa ampliación do parque infantil e a incorporación de novas infraestruturas, reforzamos o noso compromiso cun Porriño máis humano e sostible”.

Máis espazos de xogo e novas infraestruturas

A fase final do proxecto incluirá a creación de novas áreas recreativas, a instalación de elementos infantís innovadores e a habilitación dunha pista deportiva. Entre os novos xogos previstos, destaca unha gran estrutura en forma de tren con tobogáns, así como a posta en funcionamento dos chorros de auga deseñados para o xogo dos máis pequenos. Ademais, completarase a beirarrúa que conectará coa rúa Domingo Bueno e mellorarase a iluminación da contorna.

A recuperación da pista deportiva prefabricada, que anteriormente estaba situada no parque infantil e foi retirada durante as obras de renovación, tamén forma parte do proxecto. Durante anos, foi un punto de encontro para a mocidade, facilitando a práctica de actividades deportivas e de lecer. Agora, será reinstalada nunha nova localización que optimizará o espazo dispoñible, mellorando a súa integración co contorno e garantindo así unha experiencia máis satisfactoria para os usuarios.

Mellora da accesibilidade e integración urbana

Outro dos puntos clave desta actuación será a mellora da accesibilidade ao cemiterio municipal. Ao tratarse dunha zona peonil con circulación restrinxida a residentes e vehículos de carga e descarga, habilitaranse novas prazas de estacionamento para facilitar o acceso aos usuarios.

Tamén está prevista a creación dunha rúa que conectará Fernández Areal co cemiterio, reforzando a integración desta área coas recentes humanizacións da rúa Parque Infantil e do Campo da Feira. Estas actuacións súmanse ás obras en execución, como a rehabilitación do Templete da rede de San Luis e a humanización da rúa San Sebastián.

Con esta nova adquisición e as melloras previstas, o Concello do Porriño reafirma a súa aposta pola creación de espazos públicos accesibles e de calidade, favorecendo a convivencia interxeracional e o benestar da cidadanía.

O pasado 22 de marzo foi o Día da Auga e con motivo deste, o Concello do Porriño, xunto coa Concellería de Educación, Igualdade e Normalización Lingüística, celebrou este luns 24 de marzo una xornada moi especial.

Un total de 186 alumnos de terceiro e cuarto de primaria de sete colexios e 17 mestres,  xuntáronse na praza do Arquitecto Antonio Palacios para celebrar este día.

Os rapaces e rapazas aprenderon mediante xogos todo o relativo ao ciclo da auga, ademais dos procesos de depurado da mesma.

Ademais, os nenos e nenas puideron comprender a necesidade de aforrar auga ou de ser máis eficientes no seu consumo; entender a importancia da auga; entender máis sobre a problemática que supoñen as aulas residuais se non hai unha xestión e unha depuración na súa devolución ao ciclo da auga; coñecer as fases de depuración da auga para que chegue o máis limpa posible aos ríos.

Así mesmo aprenderon o poder das súas accións para facer máis eficiente o uso da auga e a devolución ao ciclo natural. Todo isto o lograron mediante xogos e diferentes dinámicas nunha xornada no centro urbano da cidade.

A actividade finalizou cun rap no que todos pudieron cantar ao unísono.

Esta actividade enmárcase dentro das que o Concello leva a cabo para seguir construíndo unha cidade máis sostible e concienciada co medioambiente na que institucións e cidadáns preocupámonos por crear un presente e futuros máis prósperos.