Mocidade arquivos - O Porriño

O Porriño vibra con 2.500 afeccionados na vitoria de España na Final do Mundial

A afección porriñesa sufriu e gozou a partes iguais antes de celebrar o triunfo por 1-0 na prorroga ante Arxentina.

O Porriño, 20 de xullo de 2026. A rúa Domingo Bueno do Porriño converteuse nunha gran festa do fútbol para seguir a gran Final do Mundial entre España e Arxentina. Preto de 2.000 afeccionados congregáronse diante da pantalla xigante para vivir un encontro cheo de emoción e tensión, no que se sufriu e se gozou a partes iguais durante os 90 minutos regulamentarios e tamén na prórroga.

O momento de máxima euforia chegou, de feito, na prorroga, cando o gol da selección española selou o 1-0 definitivo que deu o título mundial a España, desatando o xúbilo entre o público. Un xúbilo que se desataba tamén co asubio final

“Queríamos que fose unha gran festa para todos os públicos e así foi. Trasladar a pantalla á rúa Domingo Bueno foi todo un acerto para que estas 2.500 persoas pudesen gozar deste triunfo histórico con comodidade e seguridade”, explicou o alcalde Alejandro Lorenzo.

Abrazos, música e auga para combater a calor

Co apito final, a alegría apoderouse da rúa entre abrazos, cánticos e a música do DJ. A pesar de ser noite avanzada, os termómetros aínda marcaban 24 graos no centro do Porriño, polo que a celebración mantivo a súa enerxía ao máximo coa festa da escuma.

Para refrescar os ánimos e combater as altas temperaturas, os bombeiros sumáronse á cita lanzando auga coas súas mangueras para todos os afeccionados que quixeron sumarse ao remate dunha xornada histórica. Ademais os máis mozos participaron na festa da escuma, nun broche para unha noite única. O vermello inundou así a rúa Domingo Bueno ata a madrugada.

20/07/2026 in Alcaldía, Cultura e festas, Deportes, Mocidade, Parroquias

O Porriño consegue un investimento de máis de 438.000 euros para empregar e formar a 16 mozos e mozas durante un ano

O novo Obradoiro de Emprego ‘O noso encontro co emprego II’ abrirá o prazo de inscrición urxente este luns 20 de xullo a través de Porremprego para os beneficiarios de Garantía Xuvenil.

O PORRIÑO, 17 de xullo de 2026.– O Concello do Porriño, a través da súa concellaría de Emprego e o servizo municipal Porremprego, anuncia o lanzamento do novo Obradoiro de Emprego de Formación e Aprendizaxe denominado “O noso encontro co emprego II”. Este programa mixto, cofinanciado pola Unión Europea e a Xunta de Galicia a través da liña Talento Mozo, conta cun orzamento total de 438.945,36 euros e permitirá a contratación remunerada de 16 mozos e mozas do municipio durante un período continuo de 12 meses.

O obxectivo principal desta iniciativa é reactivar e impulsar o emprego xuvenil local, facilitando que os participantes teñan a oportunidade de traballar cun contrato laboral real mentres se forman e obteñen Certificados de Profesionalidade de carácter oficial. O programa dará comezo o vindeiro 15 de setembro de 2026 e prolongarase ata o 14 de setembro de 2027.

Especialidades e acceso para mozos sen estudos previos

Unha das grandes vantaxes deste obradoiro é o seu deseño formativo en dous niveis consecutivos, o que permite o acceso directo a mozos e mozas que non dispoñan de titulación académica previa (como a ESO). O proxecto divídese en dúas áreas profesionais con 8 prazas cada unha. A primeira é de cociña, con un itinerario formativo que conta con un módulo de Operacións básicas de cociña como nivel de entrada para permitir o acceso a persoas sen formación previa. A outa é a especialidade de Administración e Gravación (8 prazas): Nesta rama, o curso principal e de maior nivel é o de Operacións de gravación e tratamento de datos e documentos, mentres que o módulo de Actividades administrativas na relación co cliente funcionará como a formación de nivel máis baixo para garantir que calquera persoa poida acceder dende cero.

Os mozos e mozas interesados, que deben ter idades comprendidas entre os 16 e os 29 anos, teñen a obriga legal de estar inscritos de forma expresa como demandantes no Sistema nacional de Garantía Xuvenil.

O persoal de Porremprego resolverá calquera dúbida abrangue dende este luns 20 de xullo ata o vindero venres 24 de xullo. “Moitos dos nosos mozos e mozas teñen talento, pero moitas veces fáltalles ese título oficial ou esa primeira oportunidade laboral que lles abra as portas do mercado. Con ‘O noso encontro co emprego II’ non só lles damos formación oficial de balde e dende o nivel máis básico, senón que van ter un soldo garantido durante un ano enteiro. É unha oportunidade de ouro que non se pode deixar escapar. Por iso pedimos que acudan xa este luns a Porremprego para que non queden fóra das listas”, explica o alcalde.

20/07/2026 in Emprego e formación, Mocidade

O Porriño instala unha pantalla xigante na praza do Concello para seguir o España – Francia

O Porriño, 11 de xullo de 2026. O Porriño segue animando a La Roja. Logo do éxito de convocatoria do España-Bélxica, con varios centos de persoas seguindo e animando á selección, o Concello do Porriño vén de anunciar a instalación dunha pantalla xigante nesta ocasión na Praza do Concello para que toda a veciñanza poida seguir en directo o emocionante encontro do Mundial entre España e Francia.

A cita arrancará a partir das 21:00 do martes 14 na praza Arquitecto Antonio Palacios e o Concello convida a grandes e pequenos a seguir dende alí o encontro de Semifinais dende o asubío inicial. “Estamos seguros que de novo este partido será unha festa do deporte no Porriño”, asegura Alejandro Lorenzo, que destaca a dobre emoción dun encontro destas características cando se vive en comunidade.

13/07/2026 in Cultura e festas, Deportes, Mocidade

Están en marcha as obras de mellora e modernización do campo de fútbol do Lourambal

O proxecto conta cun orzamento de máis de 678.000 euros e un prazo de execución estimado de catro meses.
As actuacións inclúen a instalación de céspede artificial de última xeración, a renovación integral do equipamento e un novo sistema de iluminación e rego.

O Porriño, 11 xullo de 2026. O campo de fútbol do Lourambal inicia unha transformación integral co arranque das obras de mellora das súas instalacións. O proxecto, que conta cun orzamento base de licitación de 678.152,05 euros, ten como obxectivo modernizar o espazo para ofrecer unhas condicións óptimas para a práctica deportiva.

A principal actuación será a substitución do actual terreo de xogo de herba natural por céspede artificial de última xeración. O novo campo, cunhas dimensións de 105×67 metros para fútbol 11, estará deseñado de xeito polivalente, permitindo a súa división en dous campos transversais de fútbol 7. A nova superficie contará cunha subbase elástica de escuma de poliolefinas de célula pechada reticulada, unha moqueta bicolor en ton verde e os correspondentes recheos de estabilización para o seu lastrado.

Melloras estruturais e sostibilidade

Para garantir o correcto mantemento e drenaxe das instalacións, o terreo de xogo disporá de pendentes específicas e canles de recollida de augas pluviais nos laterais, delimitando o pavimento cun bordelo de formigón.

Ademais, actuarase de xeito profundo na rede de rego coa instalación de canóns emerxentes de longo alcance e un depósito enterrado de 20 m3 para asegurar o abastecemento de auga. Tamén se renovarán por completo os proxectores do campo seguindo un rigoroso estudo lumínico, aproveitando os báculos xa existentes para mellorar a eficiencia enerxética e a visibilidade do recinto.

Renovación do equipamento deportivo

O proxecto tamén inclúe un importante renovación do equipamento deportivo. Instalaranse novas porterías tanto de fútbol 11 como de fútbol 7 , redes, banderíns de córner, varandas perimétricas e novos banquiños cubertos e pechados lateralmente. Así mesmo, dotarase ao espazo dunha nova sinalización.

Cunha duración prevista de catro meses, estas obras dotarán ao Lourambal dunhas instalacións modernas, sostibles e adaptadas ás necesidades dos clubs e deportistas que fan uso do campo a diario.

O Campo do Porriño Industrial

O Lourambal é o campo do Porriño Indusitral, un clube que se fundou oficialmente o 15 de febreiro de 1933 baixo o nome de Porriño F.C., presidido na súa primeira xunta directiva por Leocadio Lourido e vestindo inicialmente de branco e azul. Un dos seus maiores fitos históricos tivo lugar na tempada 1958-59 cando, co nome do seu patrocinador Zeltia, o equipo proclamouse campión galego de afeccionados e logrou o subcampionato de España. A denominación actual de Porriño Industrial chegou en 1965, froito da fusión entre o Louriña C.F. e o propio Zeltia, sendo Pepe da Morrilleira o seu primeiro presidente nesta nova etapa.

Ao longo da súa traxectoria, o primeiro equipo alternou categorías comarcais e rexionais cun notable paso pola Tercera División. Durante o longo mandato de Santiago Gilsanz de la Aldea nos anos 70 e principios dos 80, o club logrou un importante ascenso a Tercera División. Con todo, o seu maior éxito de liga chegou na tempada 1998-99 baixo a presidencia de José Carlos Díaz Casales, cando o equipo se proclamou campión de Tercera División e disputou a fase de ascenso a Segunda División B contra clubs de renome nacional. Tras esta época dourada, o club sufriu varios ascensos e descensos baixo as directivas de José Lorenzo Pérez e Luis Neira Olive.

A partir da tempada 2010-11, baixo a presidencia de Ramón Bastos, o club iniciou unha fonda remodelación estrutural impulsada pola estrea de modernos campos de herba sintética e a profesionalización do seu corpo técnico e médico. Esta aposta deu os seus froitos na campaña 2011-12 coa chegada do presidente Esteban Cidanes Domínguez, na que as categorías inferiores asinaron unha xesta histórica con catro ascensos simultáneos de xuvenís, cadetes e infantís. Foi precisamente nesta exitosa etapa cando Claudio Giráldez —actual adestrador do Real Club Celta de Vigo en Primera División— comezou a vencellarse á estrutura técnica da base como coordinador de canteira xunto a Humberto Lede, consolidando a cantera do Porriño Industrial na elite do fútbol base galego antes de dar o salto como técnico.

11/07/2026 in Deportes, Infraestruturas, Mocidade, Patrimonio Municipal, Urbanismo, comercio e industria, Vías e obras

O Porriño instala unha pantalla xigante na praza de San Sebastián para seguir o España – Bélxica

O Porriño, 9 de xullo de 2026. O Concello do Porriño vén de anunciar a instalación dunha pantalla xigante na praza de San Sebastián para que toda a veciñanza poida seguir en directo o emocionante encontro do Mundial entre España e Bélxica.

A cita arrancará a partir das 20:00 h na propia praza, onde haberá unha previa musical amenizada por un DJ para ir quentando motores e acompañar á afección antes do asubío inicial. Esta iniciativa enmárcase dentro da programación oficial das festas de San Bieito.

O alcalde do Porriño Alejandro Lorenzo, anima a todos os porriñeses e porriñesas a achegarse. “Queremos que este partido sexa unha festa do deporte, pero sobre todo unha oportunidade para seguir o encontro en comunidade, todos xuntos facendo piña”.

09/07/2026 in Cultura e festas, Mocidade, Turismo

O Porriño acolle un contacontos ilustrado e musicado para homenaxear a Begoña Caamaño

A actividade celebrarase o 8 de xullo na praza Arquitecto Antonio Palacios con narración, música, ilustración, un coloquio e un obradoiro creativo arredor da autora das Letras Galegas 2026

O Porriño, 7 de xullo de 2026.- O Concello do Porriño acollerá o vindeiro mércores 8 de xullo, ás 10:30 horas, na praza Arquitecto Antonio Palacios, o contacontos ilustrado e musicado “As letras de Begoña Caamaño”, unha proposta cultural promovida pola Deputación de Pontevedra para achegar á cidadanía a figura da escritora e xornalista que xa foi homenaxeada este ano no Día das Letras Galegas.

O espectáculo estrutúrase en tres partes nas que se combinarán a narración da biografía da autora, a creación dunha ilustración en directo e distintas interpretacións musicais. Ademais, ao remate desenvolverase un coloquio arredor da súa traxectoria e un obradoiro no que as persoas participantes poderán elaborar a súa propia caricatura da escritora.

O alcalde do Porriño, Alejandro Lorenzo, sinaloa que “o Concello continúa apostando por unha programación cultural diversa e de calidade que achegue á veciñanza o patrimonio literario e artístico de Galicia. Estas actividades permítenos render homenaxe a Begoña Caamaño e, ao mesmo tempo, crear un espazo de encontro arredor da lectura, a música e a creatividade”.

A actividade forma parte dunha xira que percorrerá 35 concellos de menos de 50.000 habitantes da provincia de Pontevedra co obxectivo de dar a coñecer a vida e a obra de Begoña Caamaño a través dun formato aberto á participación e a partir de varias disciplinas artísticas.

Begoña Caamaño desenvolveu boa parte da súa carreira profesional na Radio Galega, onde destacou polo seu labor nos servizos informativos e culturais e pola dirección de programas como Andando a Terra ou Club Cultura. Como escritora, acadou un amplo recoñecemento con obras como Circe ou o pracer do azul e Morgana en Esmelle, converténdose nunha das voces máis relevantes da literatura galega contemporánea e, ao mesmo tempo, nun referente polo seu compromiso coa lingua galega, o feminismo e a realidade social do país.

O Concello do Porriño continúa colaborando para difundir a cultura galega e para promover aquelas actividades que achegan á veciñanza ao legado das figuras máis destacadas das nosas letras.

07/07/2026 in Cultura e festas, Mocidade, Normalización Lingüística

O Concello licita a segunda fase da ampliación do Auditorio que sumará un novo anfiteatro e unha cafetería ao aire libre

A actuación, cun prazo de execución máximo de 7 meses, está cofinanciada pola Unión Europea a través do Fondo Europeo de Desenvolvemento Rexional (FEDER).
O proxecto inclúe a creación dun anfiteatro con 25 novas butacas —que completará o aforo global ata as 350 prazas—, unha sala de exposicións e a urbanización integral da parcela.

O Porriño, 29 de xuño de 2026. O Concello do Porriño continúa a avanzar de xeito firme na modernización e expansión das súas infraestruturas culturais. Así, acabanse de licitar as obras correspondentes ao “Proxecto de ampliación do auditorio para unha nova sala de exposicións e anfiteatro”

Esta importante intervención arquitectónica, que se desenvolverá na rúa Xosé Fernández López , constitúe a segunda fase do gran complexo sociocultural do Porriño.

Máis espazo e mellores dotacións

A finalidade principal desta ampliación é enriquecer a axenda social e cultural do concello dotándoo de espazos versátiles, modernos e accesibles. O novo volume edificado conectará directamente co auditorio que actualmente se atopa en fase de construción.

Entre as principais novidades destaca a creación dun anfiteatro con capacidade para 25 novas butacas orientado cara ao escenario principal, o que permitirá elevar a capacidade total do conxunto ata as 350 prazas. Un deseño que explicou o alcalde, se fixo co asesoramento da artista porriñesa Janeth Novás. Así mesmo, dotarase ao complexo dunha sala de usos múltiples e exposicións na cota superior que servirá de acceso accesible mediante unha rampla , ademais de aseos adaptados, almacén e unha pequena zona de cociña.

Cafetería ao aire libre na cuberta

Outro dos grandes atractivos do deseño arquitectónico, asinado pola arquitecta Estefanía Grandal Leirós , é o aproveitamento da súa cuberta plana. Nela configurarase unha terraza que se converterá nunha gran cafetería ao aire libre. Un espazo único no Porriño, cunhas vistas privilexiadas do centro urbano. Un entorno que servirá para grandes eventos pero tamén como novo espazo de lecer para a cidadanía.

“Coa licitación desta segunda fase, O Porriño dá un salto cualitativo na súa oferta cultural. Non só ampliamos o espazo físico do Auditorio ata as 350 prazas, senón que creamos un punto de encontro vivo, moderno e accesible para todos os veciños e veciñas”, asegura o alcalde do Porriño, Alejandro Lorenzo.

Integración urbana e sostibilidade

O deseño persegue un estrito diálogo visual e volumétrico cos edificios lindeiros (o Centro Cultural e a Biblioteca Municipal, construídos en Rosa Porriño). Así, para o novo volume utilizarase un revestimento exterior de fachada ventilada en chapa de zinc de cor marrón, logrando unha imaxe limpa e contemporánea.

Ademais, os traballos contemplan a urbanización integral de toda a parcela exterior (duns 500 metros cadrados) para xerar un contorno peonil de calidade, totalmente accesible e que facilitará o acceso ordenado de vehículos para as tarefas de carga e descarga de material escénico , ademais de acondicionar unha nova rúa perpendicular que dará acceso ao montacargas municipal. En materia de sostibilidade, a nova infraestrutura adoptará os máximos criterios de eficiencia enerxética mediante un sistema de climatización por bomba de calor aerotérmica.

Coa apertura deste proceso de licitación pública, a o municipio prepárase para dar un salto de calidade cualitativo que situará ao Porriño na vangarda das dotacións culturais e de lecer da contorna.

Os traballos, que ascenden a 737.291,87 € , licitaranse mediante un procedemento aberto e contarán cun prazo máximo de execución de 7 meses a partir da súa adxudicación. A obra enmárcase dentro dos programas cofinanciados pola Unión Europea a través do Fondo Europeo de Desenvolvemento Rexional (FEDER).

30/06/2026 in Alcaldía, Cultura e festas, Infraestruturas, Mocidade, Patrimonio Municipal, Vías e obras

O festival Petra Rosa consolídase cun éxito rotundo na súa primeira edición nas canteiras do Porriño

Máis de catro días de música, patrimonio industrial e gastronomía converteron o emblemático espazo do granito rosa nun auditorio natural único en Galicia.
O alcalde do Porriño, Alejandro Lorenzo, asegura que é só a primeira pedra dun festival que seguirá crecendo, garantindo unha segunda edición.

O Porriño, 29 de xuño de 2026. O Porriño viviu esta fin de semana un fito cultural sen precedentes coa celebración da primeira edición do Festival Petra Rosa, que tivo lugar entre o xoves 25 e o domingo 28 de xuño. O evento, impulsado polo Concello do Porriño e a promotora Emotional Events co apoio de Concertos do Xacobeo, logrou fundir con éxito a arte sonora coa maxia da paisaxe industrial das icónicas canteiras de granito rosa, transformadas para a ocasión nun impresionante gran auditorio ao aire libre que non deixou indiferente a ninguén.

“Un privilexio”, dixo Pablo López dende o escenario, poder ter a sorte de tocar dende unha canteira, un espazo único do que ademais destacou a luz: eran as dez e media e aínda era de día. “A todos nos gusta que a las diez de la noche sea de día, pero aquí os pasáis”. Meteu ao público no peto cando incluso lles deu a oportunidade de elixir a seguinte canción, cun diálogo constante con eles, e incluso percorrendo, micro en man, o foso ata chegar ás gradas dende onde interpretou un dos seus temas.

A mesma sensación tivo Antonio Orozco: “estamos en el corazón de una montaña”, dixo emocionado ao darse conta de que ese espazo que ocupaba o escenario era gañado á terra. Orozco ademais puido protagonizar un dos momentos máis emocionantes do festival: desvelou, no medio do concerto, o sexo do bebé dunha parella: era un neno!

O broche de ouro desta histórica primeira edición púxoo onte domingo a voz rasgada de Sergio Dalma. O artista catalán logrou poñer en pé a todo o auditorio, pechando a noite ao ritmo do seu mítico tema “Galilea” e deixando un recordo inesquecible entre os asistentes. Entre eles e elas estaba Juaniña, que aos seus 101 anos puido achegarse ao artista, explicarlle o segredo da súa lonxevidade e bailar co alcalde a famosa canción “Bailar pegados”.

“O espazo é único e fai que os artistas se relacionen co público tamén dunha forma única, máis cercana”, explicou o alcalde do municipio, Alejandro Lorenzo, quen apuntou que esta foi só unha primeira experiencia dun festival que seguirá medrando, garantindo xa unha segunda edición. “O festival irá a máis e converterase nun referente”, engadiu o rexedor. Los tres artistas asinaron ademais sobre unha lámina de granito rosa, que o concello gardará como lembranza deste primeiro festival.

Unha proposta integral que impulsa o territorio

O Petra Rosa Festival tivo espazo tamén para os artistas locais coas actuacións de Iker Faure, Noemí, DJ Samu Pexe, Gaiteiros Penediños e A Forna.

Co peche desta primeira edición cargada de emoción, o Petra Rosa cumpre o seu obxectivo de dinamizar a actividade cultural e turística do municipio, postulándose dende xa como unha cita musical de referencia e con vocación de continuidade no calendario de festivais de Galicia.

Reto técnico

Cabe destacar que a singularidade do recinto supuxo tamén un importante desafío desde o punto de vista técnico. “Transformar durante uns días unha canteira en pleno funcionamento nun recinto preparado para acoller un festival destas características supuxo un importante reto técnico e loxístico. Foi necesario adaptar cada espazo co máximo rigor, integrando escenario, accesos, zonas de público e todos os servizos necesarios sen interferir na actividade da canteira. O resultado demostra que era posible converter esta contorna única nun recinto de primeiro nivel sen perder a súa esencia”, explica Jorge Rodríguez, Director de Produción de Petra Rosa Festival.

Impacto territorial, económico e proxección exterior

A primeira edición de Petra Rosa Festival situou ao Porriño no mapa dos grandes eventos culturais cunha notable proxección nacional, reunindo público procedente das catro provincias galegas, así como de comunidades como Madrid, Cataluña, Andalucía, Castela e León, Castela-A Mancha, Aragón, Asturias, Comunidade Valenciana, A Rioxa, Illas Baleares e Canarias. A eles sumáronse visitantes chegados desde Portugal, Alemaña, Estonia, Estados Unidos, Chile e México.

Esta diversidade de procedencias reforza a capacidade do festival para proxectar a imaxe do Porriño máis alá de Galicia e consolidalo como un punto de referencia cultural con atractivo internacional. Para moitos asistentes, o evento musical supuxo ademais a primeira oportunidade de descubrir o municipio, as súas canteiras de granito rosa e unha paisaxe industrial única que forma parte da súa identidade.

A chegada de visitantes tivo un reflexo directo na actividade de hoteis, aloxamentos turísticos, restaurantes, comercios, transporte e outros servizos locais, reforzando o impacto del festival máis alá do ámbito estritamente cultural.

A isto súmase a xeración de máis de 120 postos de traballo directos e indirectos durante a organización do evento, mobilizando a empresas e profesionais de sectores como a produción técnica, a montaxe, a seguridade, a loxística, o transporte e a restauración.

A combinación de proxección internacional, dinamización económica e creación de emprego confirma que Petra Rosa Festival cumpriu un dos seus principais obxectivos: converterse nun proxecto cultural con retorno tanxible para o Porriño.

Un proxecto impulsado desde O Porriño con vocación de futuro

O Concello do Porriño e a promotora Emotional Events, impulsores de Petra Rosa Festival, contaron coa colaboración de distintas administracións e empresas que acompañaron o seu desenvolvemento desde o inicio.

A Xunta de Galicia, a través da Axencia Turismo Galicia no marco de Concertos do Xacobeo 2027, e a Deputación de Pontevedra respaldaron esta primeira edición, xunto a Vepersa, Terras Gauda, Cervezas Alhambra, Schweppes e Cadena Dial Rías Baixas, cuxa participación contribuíu á posta en marcha dunha iniciativa que entende a cultura como motor de dinamización territorial e espazo de colaboración entre o sector público e o privado.

O CEO de Emotional Events, José Antonio Torrano, destaca o resultado desta primeira edición: “Este proxecto supuxo un reto moi motivador para todo o equipo. Traballamos coa convicción de que este espazo tiña un potencial extraordinario e coa responsabilidade de desenvolver un evento á altura dunha contorna única. Queremos agradecer a confianza depositada polo Concello do Porriño para desenvolver conxuntamente unha iniciativa tan significativa para o municipio e con vocación de continuidade”.

Co balance desta primeira edición xa sobre a mesa, Petra Rosa Festival comeza a mirar ao futuro coa vontade de seguir medrando e consolidarse como unha cita estable do calendario cultural galego, capaz de combinar patrimonio, música e innovación na xestión de espazos singulares e proxectando unha imaxe do municipio aberta ao exterior.

29/06/2026 in Cultura e festas, Mocidade, Sen categoría, Turismo

As Canteiras do Porriño prepáranse para o Petra Rosa Festival cun primeiro día de talento local e entrada gratuíta

O festival arranca este xoves cunha xornada de balde dedicada aos grupos locais, antes de dar paso a grandes nomes do panorama nacional como Pablo López, Antonio Orozco e Sergio Dalma.

O Porriño, 23 de xuño de 2026. A conta atrás xa comezou. Do 25 ao 28 de xuño, as Canteiras do Porriño acollerán catro xornadas consecutivas de música en directo nunha contorna única en Galicia, converténdose por primeira vez no escenario do agardado Petra Rosa Festival.

Como apertura, e para que todo o mundo poida gozar do entorno úinco que supoñen as canteiras, o concello ven de anunciar unha primeira xornada con entrada de balde e talento local. Sera o xoves, coas actuacións do músico e compositor porriñés Iker Fauré (20:30 h), que presentará os seus temas máis recentes tras o seu paso por varios estudios de televisión, seguido por Noemi (21:30 h), a recoñecida voz porriñesa que destaca pola súa proxección internacional e a súa participación en certames como La Voz Kids ou o Tour Music Fest. Para pechar a noite por todo o alto, o produtor e DJ Samu Pexe (23:00 h) fará vibrar as canteiras cos seus enérxicos sets que mesturan ritmos afro, sons tribais e o mellor tech house actual. Adeais o toque tradicional estará presente coas actuacións dos gaiteiros Penediños e A Forna.

Grandes nomes nacionais para as seguintes xornadas

Tras a inauguración local, o festival continuará os días seguintes da man dunha produtora musical, traendo ás canteiras un cartel que reunirá a algúns dos artistas máis destacados do panorama nacional, con propostas para públicos moi diversos.

O venres de xuño será a quenda de Pablo López, que ofrecerá un concerto no que interpretará algúns dos temas máis destacados da súa traxectoria. O cantante e compositor malagueño protagonizará unha das actuacións máis agardadas do festival nunha contorna especialmente concibida para gozar da música en directo.

O sábado 27 de xuño, aprogramación continuará coa actuación de Antonio Orozco. O artista catalán chegará ao Porriño cun repertorio que inclúe algúns dos grandes éxitos da súa carreira, consolidada como unha das máis recoñecidas do pop español contemporáneo.

O domingo 28 de xuño o peche do festival terá lugar con Sergio Dalma, encargado de poñer o broche final a esta primeira edición. O seu concerto completará un cartel que reúne a algunhas das figuras máis populares do panorama musical nacional.

Impulsado polo Concello do Porriño e a promotora Emotional Events, e co apoio da Xunta de Galicia a través da Axencia Turismo de Galicia no marco de Concertos do Xacobeo, Petra Rosa Festival nace co obxectivo de situar ao Porriño no mapa dos grandes ciclos musicais de Galicia e contribuír á dinamización cultural, turística e económica do territorio.

23/06/2026 in Cultura e festas, Mocidade