Sanidade

O Concello do Porriño, a través da súa concellería de Sanidade, está a levar a cabo o primeiro bloque do Programa de promoción da saúde dirixido á mocidade “Re-coñecéndonos”, que se desenvolverá ao longo dos meses de abril e maio.

A entidade local volve apostar pola prevención de condutas aditivas co alumnado de 3ª da ESO dos institutos do Porriño, xunto con Mos, que se levará a cabo coa Asociación Érguete.

“Pretendemos romper cos mitos que rodean o alcohol, o tabaco, o cigarro electrónico ou vaporizador, as bebidas enerxéticas e o cánnabis”, explicou a concelleira, Teresa Veloso, “Para previr unha adicción, e saber dicir que non, hai que recoñecer os mitos e mentiras que rodean determinadas substancias e prácticas. Para isto, ninguén mellor que a Asociación Érguete”.

Desde o Concello destacan que este programa proporcionará información veraz, obxectiva e axeitada aos mozos e mozas para axudarlles a identificar o consumo de drogas como causa de dependencia, a coñecer as características das principais drogas consumidas de forma obxectiva e realista e contrastar a información que teñen sobre o consumo destas sustancias coa evidencia científica.

Este programa está financiado pola Consellería de Sanidade da Xunta de Galicia, a través dunha subvención para o cofinanciamento de proxectos de prevención de condutas aditivas promovidos por concellos, mancuminades ou agrupacións de concellos da Comunidade Autónoma de Galicia.

O Centro de Saúde do Porriño en colaboración coa concellería de Sanidade, que dirixe Teresa Veloso, pon en marcha un programa de Andainas Saudables dirixido a persoas maiores de 65 anos.

“Este programa impúlsase cun dobre obxectivo, por unha banda promover a actividade física e un envellecemento activo, e por outra loitar contra o illamento social que tanto afecta aos nosos maiores, indicou o alcalde”, Alejandro Lorenzo.

As andainas durarán aproximadamente unha hora e os participantes irán acompañados por persoal sanitario do Centro de Saúde do Porriño e voluntarios de Protección Civil. A marcha discorrerá polo paseo do Louro.

Serán todos os mércores, ás 10:30 h e ás 19 h,  e venres, ás 10:30 h, dos meses de abril, maio e xuño. Para participar é necesario inscribirse no rexistro do Concello do Porriño indicando as quendas nas que se quere participar.

“Estas andainas son unha oportunidade perfecta para evitar o sedentarismo, movernos un pouquiño e á vez compartir momentos, establecer lazos e coñecer xente”, explicou a concelleira, Teresa Veloso, “Por iso, anímovos a todos e todas a participar e movernos xuntos!”

Preto de 400 escolares do Porriño aprenden a importancia de ter unha boca sa da man do Centro de Saúde e o Concello do Porriño.

A concellería de Sanidade, que dirixe Teresa Veloso, colabora co centro médico na organización dunha serie de obradoiros sobre hixiene oral, impartidos por facultativos, que se están a desenvolver este mes de marzo nos centros educativos do Porriño.

Participa desta iniciativa o alumnado de 1º e 2º curso de educación primaria do CEIPP Antonio Palacios, CEIP da Ribeira, CPR Santo Tomás, CPR Hnos. Quiroga, CEIP Fernández López, CEIPP de Atios, CEIP da Cruz-Budiño e Aceesca.

Os obradoiros teñen unha primeira parte teórica na que se explican conceptos básicos sobre o cepillado e a alimentación e unha segunda parte práctica na que se reforza o contido explicado previamente. Cada un ten unha duración aproximada de 30-45 minutos.

“Establecer bos hábitos de hixiene bucal dende unha idade temperá é esencial para gozar de boa saúde”, sinala a concelleira Teresa Veloso, “Por iso é importante que os nenos e nenas aprendan desde pequenos hábitos saudables para os seus dentes, que o normalicen e o apliquen diariamente para evitar complicacións nun futuro”.

No mesmo sentido se manifestou o alcalde, destacando a importancia do coidado da boca desde ben pequenos e convidounos a estar moi atentos e “sobre todo, a poñer en práctica cada día todo o que estades a aprender hoxe”. O rexedor quixo agradecer a iniciativa do persoal do Centro de Saúde do Porriño e a súa man tendida sempre para impulsar “actividades como esta tan necesarias para os nosos pequenos e pequenas”.

O IES Pino Manso acolleu onte a última das charlas sobre primeiros auxilios dirixidas ao persoal dos centros educativos do municipio. Esta formación, impulsada pola concellería de Sanidade no marco do Plan de Saúde Local coa colaboración do Sergas a petición do profesorado, tivo unha grande aceptación e desenvolveuse en todos os centros educativos de primaria, secundaria e educación especial do Porriño.

Ángeles Charle, doutora do Centro de Saúde do Porriño, e María Villar, MIR de medicina familiar e comunitaria no centro sanitario porriñés, foron as encargadas de impartir a formación. Esta centrouse na atención ante urxencias médicas, tanto previsibles como non previsibles, nos centros educativos. Se ben destacaron a importancia da cadea de supervivencia nas urxencias vitais, que comeza coa chamada ao 112, no caso de urxencias vitais, aprenderon nocións sobre como abordar os incidentes máis habituais aos que se poden enfrentar: atoramentos, síncopes, hipoglucemias, ataques epilépticos, shocks anafilácticos etc…

O alcalde, Alejandro Lorenzo, e a concelleira de Sanidade, Teresa Veloso , achegáronse onte a participar dunha das formacións e agradecer ao persoal sanitario a súa disposición a participar destes programas.

A unidade móbil da Axencia de Doazón de Órganos e Sangue volve ao Porriño esta semana. Será o venres 9 de febreiro, de 10 a 14:30 h e de 16 a 21 h,  e o sábado 10 de febreiro, de 10 a 15 h. Situarase na súa ubicación habitual na avda. Domingo Bueno, xunto ao Centro Cultural.

A demanda de abastecemento de sangue é contínua nos hospitais e, polo tanto, tamén o é a necesidade doazón do mesmo. En Galicia precísanse entre 400 e 500 doazóns diarias para cubrir as necesidades dos nosos hospitais, de aí a importancia de acudir a doar.

“É un acto de xenerosidade e empatía que non nos leva nada de tempo nin supón ningún risco pero salva moitas vidas”, apuntou a concelleira de Sanidade, Teresa Veloso. A edil fixo un chamamento á veciñanza a achegarse á unidade móvil de ADOS e agradeceu de antemán a “solidaria resposta dos porriñeses e porriñesas coa doazón”.