Infraestruturas arquivos

O Concello do Porriño licita as obras de mellora dos polígonos de A Casilla e As Gándaras

Ambas actuacións supoñen un investimento de 303.818,69 euros para a mellora das infraestruturas industriais do municipio e contan co financiamento da Consellería de Economía e Industria

O Porriño, 25 de agosto de 2026. O Concello do Porriño acaba de sacar a licitación o proxecto de mellora integral dos viais e servizos básicos do Polígono Industrial A Casilla, en Atios. Unha importante obra cun orzamento de 153.842,69 euros que non só mellorará o viario desta contorna con novo aparcadoiro e zona de circulación peonil, senón que ademais actuará na rede de saneamento, abastecemento e alumeado público.

A esta actuación súmase unha obra de asfaltado no Polígono das Gándaras, cun investimento de 149.976,00 euros, destinada á mellora do firme e das condicións de circulación nos seus viais. En total, ambas actuacións supoñen un investimento de 303.818,69 euros para a mellora das infraestruturas industriais do municipio.

Así, o ámbito de actuación da primeira obra de mellora comprende dous viais que se emprazan dentro do Polígono Industrial A Casilla, actualmente con firme en mal estado, e, no caso do vial 2, sen recollida de augas pluviais e cunha rede de abastecemento en mal estado ou inexistente. Por iso a mellora inclúe, ademais da pavimentación, a renovación da condución de abastecemento e de saneamento de pluviais con novos sumidoiros e unha nova conexión coas tubaxes de PVC.

Do mesmo xeito, na marxe de ambos os viais proxéctase unha canalización nova para a instalación do alumeado público.

“Os polígonos son o motor económico deste municipio, fonte de traballo, de innovación, de riqueza”, explica o alcalde, Alejandro Lorenzo, lembrando que a industria supón o 50,1% do PIB municipal, a porcentaxe máis alta de Galicia con máis de 2.200 empresas activas e máis de 3,5 millóns de metros cadrados de solo industrial ocupado. Por iso a industria e os polígonos son tamén unha prioridade para o seu goberno.

O rexedor engadiu: “A nosa prioridade é facilitar a actividade económica. Por iso, os novos orzamentos non inclúen subas de taxas tampouco para as empresas e manteñen as bonificacións fiscais de ata o 95% para todas aquelas que decidan apostar polo Porriño para instalar os seus proxectos”. Para promover a implantación de novas empresas e o crecemento das que xa están instaladas, existen, de feito, bonificacións fiscais de ata o 95% nos impostos, sendo os máis baixos de Galicia. Tamén para promover a creación de emprego. “Apostamos pola nosa industria para seguir xerando emprego”, conclúe destacando que O Porriño é un concello emprendedor.

Esta obra conta cunha importante subvención de 120.000 euros concedida pola Consellería de Economía e Industria ao abeiro da orde de axudas destinadas á habilitación e mellora de infraestruturas nos parques empresariais de Galicia. A contía restante, que ascende a 33.842,69 euros, será financiada con fondos propios municipais. Ten un prazo de execución de catro meses, unha vez estea adxudicada a obra que sae a licitación por vía de urxencia.

Do orzamento total do proxecto, a partida máis relevante correspóndese cos traballos de pavimentación e mellora dos firmes, aos que se destinan 59.468,77 euros. A esta cantidade súmanse 15.511,34 euros dedicados ás actuacións previas e demolicións indispensables, así como 15.058,33 euros destinados á renovación da rede de saneamento de augas pluviais.

Pola súa banda, a actuación no Polígono das Gándaras conta cun orzamento de 149.976 euros e permitirá renovar o firme dos viais, mellorando as condicións de circulación e o acceso ás empresas instaladas nesta área industrial. A obra conta cunha subvención de 119.980,80 euros por parte da Xunta de Galicia, ao abeiro do programa Mellora da Infraestrutura dos Parques Empresariais 2026. A contía restante de 29.995,20 euros será asumida mediante fondos municipais.

As obras por realizar consisten na mellora do firme, na sinalización horizontal e vertical e actuacións puntuais na drenaxe.

A lonxitude da actuación é de 2.600 m, cunha anchura media de 7,5 m. Realízase a demolición e a parcheaxe en dúas zonas puntuais, o que supón unha superficie de 37 m². Esténdese unha capa de rodaxe nunha superficie de 10.164,9 m². Elevaranse dous pasos de peóns existentes nos PK 1+857 e 1+984. Execútanse catro novos sumidoiros, para evitar a acumulación de auga nos dous novos pasos de peóns elevados e noutros dous pasos de peóns elevados existentes que carecen deles. Por último, realizarase a sinalización horizontal e vertical.

Con estas dúas actuacións o Concello do Porriño reforza o seu compromiso co tecido coa mellora e modernización dos seus polígonos industriais, reforzando unhas infraestructuras fundamentais para o tecido comercial do Porriño e para seguir consolidando o municipio como un referente industrial e económico de Galicia.

26/08/2026 in Industria, Infraestruturas, Parroquias, Tráfico, Urbanismo, comercio e industria, Vías e obras

Un investimento de máis de 460.000 euros permitirá transformar o viario entre San Campio e o Rego das Laxas no Porriño

O proxecto contempla unha actuación integral sobre preto de 1,8 quilómetros de estrada, con nova pavimentación, melloras na drenaxe, así como a renovación da sinalización e dos elementos de protección.

O Porriño, 21 de agosto de 2026. O Concello do Porriño acometerá nos próximos meses a mellora da seguridade viaria entre San Campio e o Rego das Laxas, nas parroquias de Pontellas e Atios. Esta intervención permitirá renovar e acondicionar un viario que presenta un notable deterioro e que conecta a contorna de Centeáns e San Campio co Rego das Laxas e as áreas industriais próximas.

Trátase, ademais, dunha vía pola que transita un elevado número de peregrinos, ao formar parte do itinerario do Camiño de Santiago. Dá tamén acceso á contorna do Velódromo Municipal, instalación que proximamente será transformada nun novo espazo de deporte urbano coa incorporación dun skatepark e un pump track.

O proxecto conta cun investimento superior aos 460.000 euros, dos cales preto de 310.000 euros serán financiados con fondos propios do Concello e os máis de 150.000 euros restantes con cargo ao Plan Extraordinario Vía Depo da Deputación de Pontevedra.

O alcalde do Porriño, Alejandro Lorenzo, destacou que “este investimento responde ao compromiso do goberno municipal de seguir mellorando as infraestruturas das parroquias e, especialmente, aquelas que forman parte do día a día da veciñanza”.

“Queremos actuar alí onde hai necesidades reais e seguir mellorando as comunicacións e os servizos nas parroquias. Son intervencións que poden parecer pequenas no conxunto do municipio, pero que teñen un efecto directo na calidade de vida dos veciños e veciñas”, sinalou.

Melloras ao longo de preto de 1,8 quilómetros

A actuación abrangue tres tramos de viario, cunha lonxitude total próxima aos 1,8 quilómetros, e permitirá renovar arredor de 15.800 metros cadrados de pavimento.

Os traballos contemplan o fresado e a regularización do firme existente, a colocación dunha nova capa de rodadura e a ampliación da calzada nos puntos nos que sexa posible.

O proxecto inclúe tamén diferentes actuacións para mellorar a drenaxe da vía, coa limpeza e acondicionamento de cunetas, sumidoiros e arquetas, así como a renovación da sinalización horizontal e vertical.

Na contorna da Rede Natura 2000 das Gándaras de Budiño instalaranse, ademais, preto de 650 metros de barreira de protección. Tamén se adaptarán tapas de rexistro e arquetas e plantaranse varios carballos nas zonas afectadas pola ampliación do firme.

O concelleiro de Vías e Obras, Ramón Porto, explicou que a intervención vai máis alá dunha simple renovación do pavimento. “O obxectivo é actuar de maneira integral sobre a vía, mellorando o firme, a drenaxe, a sinalización e os elementos de protección”, indicou.

Porto engadiu que “queremos deixar un viario máis seguro, cómodo e funcional, tanto para a veciñanza da zona como para todas as persoas que empregan esta conexión a diario”.

Tres meses de obras

O prazo de execución previsto é de tres meses. Durante ese tempo desenvolveranse os traballos de pavimentación, drenaxe, sinalización e acondicionamento incluídos no proxecto.

Desde o goberno municipal enmarcan esta actuación na planificación de investimentos que o Concello está a desenvolver nas parroquias e na mellora progresiva da rede viaria municipal.

“Imos seguir destinando recursos ás parroquias e aproveitando todas as vías de financiamento ao noso alcance para sacar adiante actuacións necesarias e útiles para a veciñanza”, concluíu Lorenzo.

21/08/2026 in Deportes, Infraestruturas, Mocidade, Parroquias, Seguridade, Turismo, Urbanismo, comercio e industria, Vías e obras

O Porriño suma máis de 28.000 metros cadrados de aparcamento gratuíto para dinamizar o comercio e a hostalería local

Desde hai cinco anos creáronse 8 aparcadoiros gratuitos dentro do casco urbano, cada un deles preto dalgún servizo ou equipación municipal
“A intención é que a xente poida, se quere, chegar en coche e desfrutar a pé”, asegura o alcalde que apunta que “queremos un Porriño máis peonil, pensado para as persoas”.

O Porriño, 15 de agosto de 2026. – O Concello do Porriño conta xa con máis de 28.000 metros cadrados de aparcamento gratuíto distribuídos polo municipio para dinamizar o comercio e a hostalería local, respondendo así a un dos problemas históricos da vila. Esta medida supón a creación de máis de 1.100 novas prazas de estacionamento divididas en oito parcelas estratéxicas situadas ao carón de equipamentos públicos, centros educativos, áreas deportivas e zonas de lecer.

A rede de aparcadoiros gratuítos desprégase en contornas clave para facilitar o acceso da veciñanza e visitantes aos principais puntos de interese da localidade. O máis amplo destes espazos atópase na rúa Progreso, con 10.000 metros cadrados e capacidade para uns 450 vehículos, ao que se suma moi preto unha parcela de 1.000 metros cadrados xunto ao paso a nivel, clave para a mobilidade no casco urbano. Así mesmo, na rúa Leandro Diz habilitáronse 4.200 metros cadrados ao lado da capela e do barrio de San Sebastián, área que inclúe tamén un espazo acondicionado para o estacionamento de caravanas.

A oferta completa de aparcamento distribúese tamén preto de servizos e equipamentos fundamentais da vila. É o caso da parcela de 3.000 metros cadrados na prolongación de Fernández Areal, emprazada fronte ás pistas de tenis e xunto ao centro de saúde, os xulgados e o pavillón municipal de deportes. Precisamente na contorna deportiva e escolar somáronse outros 6.100 metros cadrados —repartidos en dúas parcelas de 3.700 e 2.400 metros cadrados— ao carón dos colexios CEIP Fernández López e CEIP Quiroga, tamén moi preto do polideportivo municipal. A estes espazos engádense os 3.500 metros cadrados dispoñibles na Avenida de Galicia, en pleno casco urbano, e unha área de 500 metros cadrados nas inmediacións do cemiterio municipal.

Con este amplo despregamento, o goberno local busca mellorar a mobilidade diaria dos porriñeses e facilitar a chegada de visitantes. Máis alá de desconxestionar o tráfico no centro urbano, a iniciativa ten como obxectivo prioritario servir de impulso para o tecido socioeconómico da vila, incentivando o consumo no comercio de proximidade e na hostalería local, dous dos sectores clave na economía do Porriño.

“A falta de estacionamento era unha das principais eivas do noso municipio e un obstáculo directo para o crecemento do noso comercio e hostalería. Coa posta en marcha destes máis de 28.000 metros cadrados gratuítos, damos resposta a unha demanda histórica da veciñanza, facilitando o día a día dos porriñeses e facendo O Porriño moito máis atractivo para quen nos visita a mercar ou gozar da nosa vila”, destaca o alcalde, Alejandro Lorenzo, poñendo en valor o modelo de vila humanizada con rúas peonís pensadas para as persoas e alternativas reais de aparcamento a poucos pasos do centro. “A intención é que a xente poida, se quere, chegar en coche e desfrutar a pé”, asegura o alcalde que apunta que “queremos un Porriño máis peonil, pensado para as persoas”.

O Concello ven de deseñar un mapa co emprazamento de todos estes aparcamentos para que as persoas de fóra que queiran visitar a vila poidan atopar de xeito doado estos aparcadoiros.

17/08/2026 in Infraestruturas, Parroquias, Tráfico, Urbanismo, comercio e industria, Vías e obras

Obras en Eiras interrumpirán a subministración da presa durante todo o xoves 13 de agosto

O Consorcio de Augas do Louro pide un consumo responsable a veciños e empresas de Mos, O Porriño e Salceda porque as reservas de auga son limitadas

O Porriño, 11 de agosto . Este xoves ás 8:00 h, a presa de Eiras deixará de subministrar auga para poder realizar unha actuación nos condutos de saída da presa, unha obra previa ao cambio definitivo das válvulas do encoro. A duración estimada dos traballos é 8:00 h a 14:00 h pero a Consorcio de Augas do Louro estima que a volta á normalidade do sistema de abastecemento demorarase ata as seis da tarde, porque hai que coordinar o enchido dos depósitos segundo o seu estado no momento de apertura de válvulas.

Por este motivo, dende o Consorcio piden —especialmente á veciñanza do Porriño e de Mos, ao contar con depósitos máis pequenos— que se extremen as medidas de aforro de auga. Solicítase evitar o rego, o enchido de piscinas ou o lavado de vehículos, xa que deste aforro dependerá a duración desas reservas. Na mesma liña, dependendo das reservas de auga ás 14:00h do propio xoves, se fose necesario, estudiarase o peche dos polígonos empresariais afectados: A Granxa, As Gándaras e Veigadaña. Neste senso, permitiranse os traballos esenciais en horario de mañá, pero trasladouse xa aos grandes consumidores que minimicen o seu uso.

Aínda que non haberá un corte de subministración efectivo, o feito de que estes municipios poidan quedar sen auga dependerá do consumo que se faga durante ese intervalo, entre o peche e a reapertura de Eiras.

“Se as empresas e a veciñanza son responsables, poderemos ter auga para o esencial durante todo o día”, explica Alejandro Lorenzo, alcalde do Porriño e presidente do Consorcio de Augas do Louro, que aclara que “esta é unha obra fundamental para o abastecemento, dunha gran complexidade técnica”

A obra de reparación das válvulas, financiada pola Xunta, ascenden a 2,3 millóns de euros. A actuación consiste na substitución das catro válvulas de toma de auga -dúas delas moi danadas- que regulan o fluxo de auga que se envía á estación de tratamento de auga potable (ETAP) do Casal como paso previo ao subministro á poboación do contorno, máis de 400.000 persoas entre os concellos de Vigo, Cangas, Moaña, Redondela, Soutomaior, O Porriño, Mos, Salceda de Caselas e Vilaboa. A maiores, tamén se reporán as bases de formigón, a renovación de todo o sistema de cables e a posta en servizo de todos os equipamentos aparellados.

12/08/2026 in Infraestruturas, Medio Ambiente

O Concello do Porriño intensifica as medidas aforro de auga

O municipio limita os regos non esenciais, intensifica o control de fugas e pide a colaboración de veciños e empresas ante a prealerta

O Porriño, 6 de agosto de 2026. O Concello do Porriño ven de intensificar as medidas para protexer as reservas de auga do municipio. Ante a escaseza de precipitacións e altas temperaturas, o Concello puxo en marcha xa fai semanas diferentes medidas centradas na vixilanza e na xestión da rede de abastecemento, que se intensifican agora. Así, incrementouse o control para detectar usos inadecuados ou captacións ilegais e reduciuse as presións de subministración en diversos sectores e campañas específicas para a detección e reparación de fugas. Pero ademais, deuse orde xa de limitar os regos en parques, xardíns ou campos de fútbol xunto con outros usos considerados non esenciais.

Pediuse tamén aos grandes consumidores do municipio para que apliquen plans de redución de consumo nas súas instalacións.

Desde o Concello insístese en que a prevención e a concienciación son a clave nas vindeiras semanas se non hai precipitacións. Por iso, pídese a colaboración directa tanto das empresas como dos veciños e veciñas para adoptar hábitos de uso responsable: evitar ou limitar o rego de xardíns e zonas verdes privadas, pospoñer o lavado innecesario de vehículos, evitar o enchido de piscinas particulares ou reutilizar a auga sempre que sexa sobrible e revisar as instalacións propias para corrixir calquera pequena fuga doméstica.

As medidas adoptadas en situación de prealerta buscan anticiparse a un posible episodio de escasez máis severo, así como concienciar a empresas e cidadanía sobre a necesidade de realizar un uso eficiente e sostible da auga. Ademais, o Consorcio de Augas do Louro realizará un seguimento permanente da evolución dos recursos hídricos dispoñibles e adoptará, en coordinación coas administracións competentes, cantas medidas adicionais resulten necesarias para meirande garantía do abastecemento á poboación.

Así, trasladan consellos báiscos para a cidadanía.

Asegúrate de pechar ben as mecheiras/grifos e evitar goteos. Aforro estimado: ata 30 litros ao día.
Escolle a ducha en lugar do baño. Aforro estimado: ata 60 litros.
Recolle a auga mentres esperas a que saia quente ou fría e reutilízaa para outros usos. Aforro estimado: entre 15 e 25 litros por minuto.
Pecha a auga mentres te ensaboas ou lavas o cabelo.
Pecha a mecheira/grifo mentres te meadas os dentes. Aforro estimado: entre 5 e 10 litros por minuto.
Lava froitas e verduras nun recipiente en lugar de facelo baixo a auga corrente.
Utiliza a lavadora a plena carga. Aforro estimado: ata 200 litros por lavado.
Non utilices o inodoro como papeleira e meuda descargas innecesarias.
Minimiza a rega de xardíns e adapta o consumo ás necesidades reais das plantas.

06/08/2026 in Infraestruturas, Medio Ambiente

O Concello do Porriño recuperará e musealizará a ponte romana das Amíndoas

Esta obra enmárcase dentro dun ambicioso proxecto para evitar as inundacións e que converterá a zona nun gran parque fluvial

Este novo espazo será unha nova zona verde e unha conexión peonil entre O Porriño e Torneiros

O Porriño, 1 de agosto de 2026. O Concello do Porriño está a elaborar un ambicioso proxecto para recuperar e musealizar a Ponte romana das Amíndoas. Trátase dun importante vestixio histórico polo que discurría a vía romana e que na actualidade está escondido baixo formigón e asfalto. A intención é desfacelo desas capas de modernidade e que volva ao seu estado orixinal. É máis, o redactor do proxecto cre posible atopar e recuperar tamén parte desa vías romana que comunicaban O Porriño coas Gándaras e tamén con Pontellas no seu camiño entre Astorga e Braga. Por iso esa ponte converterase novamente nunha ponte peonil e construirase unha nova vía paralela á actual para que pasen os vehículos.

Esta importante intervención patrimonial está enmarcada no proxecto “De minoración das avenidas ordinarias e posta en valor da ponte das Amíndoas”. Un dos grandes proxectos do Concello do Porriño presentados ao Plan de Actuación Integrado (PAI) que cambiará por completo unha contorna que cada inverno sufre importantes inundacións.

“Trátase dun dos proxectos máis ilusionantes e importantes do noso concello”, explica o alcalde, Alejandro Lorenzo, que visitaba xunto a arquitecta municipal e o redactor do proxecto este espazo, engadindo que se trata de “recuperar e manter a nosa historia, cun proxecto que permitirá conectar as parroquias co casco urbano e crear máis zonas verdes que precisa o noso pobo”.

De feito, a principal actuación é aumentar a capacidade de desagüe do río, para que en época de crecida a auga non inunde esta importante zona verde do Porriño e a estrada que discorre por ela. Esta actuación farase na contorna da ponte, que se restaurará para que volva a lucir como na época romana.

Esta contorna, na actualidade cualificada como zona inundable, poderá así ser recuperada para o uso cidadán, posibilitando a creación dunha gran zona verde con acceso ao río e unha nova unión entre Torneiros e o centro urbano.

Trátase dunha aposta pola resiliencia ambiental, adaptar os espazos aos efectos do cambio climático e preparar o territorio para responder con garantías ante episodios de chuvias extremas. É precisamente por esta visión sustentable polo que o proxecto conta co apoio de fondos europeos FEDER. A Unión Europea prioriza este tipo de solucións baseadas na Natureza, que abandonan as canles de formigón para renaturalizar o río Louro, protexer a zona de Atios de futuras inundacións e recuperar o patrimonio histórico e ecolóxico do municipio.

03/08/2026 in Alcaldía, Infraestruturas, Limpeza, Medio Ambiente, Parques e xardíns, Parroquias, Patrimonio Municipal, Proxectos Europeos, Sen categoría

As obras na antiga escola unitaria de Chenlo avanzan para transformala nun espazo cunha nova vida

Convertirase nun espazo cultural de uso comunitario cunha inversión de 48.000 euros

Luns, 27 de xullo de 2026 As obras avanzan a bo ritmo na antiga Unitaria de Chenlo. Uns traballos que a converterán nun espazo cultural de uso comunitario, recuperando así un edificio que durante moito tempo foi un alicerce fundamental como escola. Deste xeito, este espazo volverá ter nenos, nenas e maiores, que poderán desenvolver aquí diversas actividades: cursos, obradoiros, exposicións e outros eventos “que axudarán a dinamizar a parroquia- explica o alcalde, Alejandro Lorenzo – ademais de recuperar un importante patrimonio de Chenlo e do Porriño, como é este edificio ao que daremos unha nova vida”.

O rexedor visitaba xunto a Ramón Porto, o Concelleiro de Vías e Obras, os traballos nos que se están a investir 48.000 euros, na súa maioría orientados a ampliar e optimizar os espazos do edificio, pero tamén a facelo máis eficiente coa impermeabilización do tellado ou a reparación das humidades existentes. Reformaranse ademais os baños, facéndoos accesibles para adaptalos ás normativas de accesibilidade e confort e cambiando as canalizacións e a instalación interior de fontanaría, así como a instalación eléctrica.

Reformarase tamén o acceso ao novo local social e o seu interior, eliminando as barreiras arquitectónicas, facilitando a mobilidade e garantindo un espazo inclusivo para que todas as persoas poidan ter cabida.

Outro punto importante do orzamento que se está a executar é a reforma do salón de actos, coa ampliación de espazos, que será o espazo onde se poderán realizar grandes eventos.

Recuperación do patrimonio local

Esta iniciativa enmárcase dentro do plan municipal de recuperación e posta en valor de edificios singulares nas distintas parroquias. Neste senso, a antiga escola unitaria de Pontellas comezará a funcionar xa este mes de setembro como escola infantil, logo de ser rehabilitada e ampliada para albergar así as cinco aulas das que dispón, ademais de vestíbulo, oficina, sala multiusos, aseos, vestiario, despensa e cociña. A antiga escola unitaria de Covelo, en Atios, será un centro de día.

27/07/2026 in Educación e tecnoloxía, Infraestruturas, Vías e obras

O Concello do Porriño transformará o Velódromo nun gran complexo de deporte urbano cun investimento de case 600.000 euros

O proxecto inclúe a construción dun skatepark inspirado no “Falcón Milenario” e un pumptrack para todos os niveis.
As obras actuarán sobre unha superficie de 2.774 m² e incluirán a reforma integral, impermeabilización e cubrición das gradas do edificio municipal.
O granito rosa Porriño será o material protagonista dunhas instalacións deseñadas para converter a vila nun referente dos deportes alternativos en Galicia.

O Porriño, 23 xullo de 2026 . O Concello do Porriño ven de sacar a licitación por 599.985,80 o gran proxecto de deporte urbano do Porriño. Trátase dun ambicioso proxecto para modernizar e remodelar o Velódromo Municipal, que transformará estas instalacións -inauguradas en 1993- nunha área de deporte urbano punteira en Galicia, que combinará un skatepark, un pumptrack de última xeración e zonas de descanso integradas paisaxisticamente.

A súa construcción é, explica o alcalde, “a resposta da demanda crecente da veciñanza, especialmente da xente moza, de espazos públicos de calidade para a práctica de disciplinas alternativas, e tamén unha aposta decidida polo turismo deportivo”

A execución deste proxecto conta cunha subvención 205.230,37 € con cargo ao III Plan Extraordinario de Infraestruturas Deportivas da Deputación de Pontevedra. O prazo de execución será de seis meses.

Un skatepark circular de granito rosa e un pumptrack con “Wallride”

O novo complexo deportivo, cunha superficie de actuación de 2.774 m², está deseñado para garantir a evolución segura dos usuarios, desde a iniciación ata o nivel experto, en modalidades como skate, bmx, scooter e roller:

Así, construirase un Skatepark “galáctico”, con inspiración na mítica nave do “Falcón Milenario”. Trátase dunha pista circular con diferentes alturas e ramplas. O circuíto integrará de forma identitaria o granito rosa Porriño en elementos como quarters, hubbas, caixóns e pirámides, simulando os obstáculos da rúa con varandas de diversas alturas.

Ademais disporá dun Pumptrack para todos os niveis, dende iniciación ata experto en dúas liñas cheas de dubbies, mesetas e peraltes pronunciados para coller altas velocidades mediante inercias. O seu elemento máis espectacular será un “Wallride” de madeira con estrutura de aceiro nunha das curvas. Estará situado na zona sur das instalacións.

“O trazado da pista de skatepark e do pumptrack buscarán a integración de todos os usuarios segundo a idade, modalidade e experiencia”, apunta Lorenzo. Incluirá elementos innovadores de tal modo que unha persoa menos experimentada poda acadar unha evolución superando diversas etapas dunha forma segura, ademais se aumentan as superficies de espazos públicos de calidade do Concello do Porriño.

Mellora integral do edificio e das gradas do Velódromo

O proxecto non só se centra nas pistas, senón que corrixirá os problemas de filtracións do edificio principal do Velódromo, explica o alcalde que acudiu a visitar as instalacións xunto ao concelleiro de Parques e Xardíns, Marcos Martínez. As actuacións inclúen a renovación da fachada cun sistema suspendido de placas de policarbonato celular en tres cores, a reparación dos paramentos interiores e a impermeabilización das gradas así como a súa cubrición cunha nova estrutura metálica e panel sándwich.

Máis espazos verdes e zonas de descanso para o acougo

O deseño tivo moi en conta a necesidade de ofrecer espazos de desconexión e convivencia. No centro das pistas situarase unha zona de descanso de 185 m2 con dúas áreas circulares, bancos corridos de formigón e fontes.

A sustentabilidade ambiental estará garantida coa creación de 185 m2 de novas zonas verdes, onde se plantarán exemplares arbóreos de gran valor estético como o arce real, carballo vermello, carballo dos pantanos, bidueiro e liquidámbar, acompañados de especies arbustivas como lavanda ou pitosporo anano. Os accesos ocuparán os 546 m2 restantes.

Con esta intervención, o Concello do Porriño non só revitaliza unha instalación histórica, senón que se ratifica con forza na ruta das áreas urbanas de referencia, ofrecendo un espazo integrador, seguro e dinamizador para todas as idades.

23/07/2026 in Deportes, Infraestruturas, Mocidade, Parques e xardíns, Parroquias, Vías e obras

Están en marcha as obras de mellora e modernización do campo de fútbol do Lourambal

O proxecto conta cun orzamento de máis de 678.000 euros e un prazo de execución estimado de catro meses.
As actuacións inclúen a instalación de céspede artificial de última xeración, a renovación integral do equipamento e un novo sistema de iluminación e rego.

O Porriño, 11 xullo de 2026. O campo de fútbol do Lourambal inicia unha transformación integral co arranque das obras de mellora das súas instalacións. O proxecto, que conta cun orzamento base de licitación de 678.152,05 euros, ten como obxectivo modernizar o espazo para ofrecer unhas condicións óptimas para a práctica deportiva.

A principal actuación será a substitución do actual terreo de xogo de herba natural por céspede artificial de última xeración. O novo campo, cunhas dimensións de 105×67 metros para fútbol 11, estará deseñado de xeito polivalente, permitindo a súa división en dous campos transversais de fútbol 7. A nova superficie contará cunha subbase elástica de escuma de poliolefinas de célula pechada reticulada, unha moqueta bicolor en ton verde e os correspondentes recheos de estabilización para o seu lastrado.

Melloras estruturais e sostibilidade

Para garantir o correcto mantemento e drenaxe das instalacións, o terreo de xogo disporá de pendentes específicas e canles de recollida de augas pluviais nos laterais, delimitando o pavimento cun bordelo de formigón.

Ademais, actuarase de xeito profundo na rede de rego coa instalación de canóns emerxentes de longo alcance e un depósito enterrado de 20 m3 para asegurar o abastecemento de auga. Tamén se renovarán por completo os proxectores do campo seguindo un rigoroso estudo lumínico, aproveitando os báculos xa existentes para mellorar a eficiencia enerxética e a visibilidade do recinto.

Renovación do equipamento deportivo

O proxecto tamén inclúe un importante renovación do equipamento deportivo. Instalaranse novas porterías tanto de fútbol 11 como de fútbol 7 , redes, banderíns de córner, varandas perimétricas e novos banquiños cubertos e pechados lateralmente. Así mesmo, dotarase ao espazo dunha nova sinalización.

Cunha duración prevista de catro meses, estas obras dotarán ao Lourambal dunhas instalacións modernas, sostibles e adaptadas ás necesidades dos clubs e deportistas que fan uso do campo a diario.

O Campo do Porriño Industrial

O Lourambal é o campo do Porriño Indusitral, un clube que se fundou oficialmente o 15 de febreiro de 1933 baixo o nome de Porriño F.C., presidido na súa primeira xunta directiva por Leocadio Lourido e vestindo inicialmente de branco e azul. Un dos seus maiores fitos históricos tivo lugar na tempada 1958-59 cando, co nome do seu patrocinador Zeltia, o equipo proclamouse campión galego de afeccionados e logrou o subcampionato de España. A denominación actual de Porriño Industrial chegou en 1965, froito da fusión entre o Louriña C.F. e o propio Zeltia, sendo Pepe da Morrilleira o seu primeiro presidente nesta nova etapa.

Ao longo da súa traxectoria, o primeiro equipo alternou categorías comarcais e rexionais cun notable paso pola Tercera División. Durante o longo mandato de Santiago Gilsanz de la Aldea nos anos 70 e principios dos 80, o club logrou un importante ascenso a Tercera División. Con todo, o seu maior éxito de liga chegou na tempada 1998-99 baixo a presidencia de José Carlos Díaz Casales, cando o equipo se proclamou campión de Tercera División e disputou a fase de ascenso a Segunda División B contra clubs de renome nacional. Tras esta época dourada, o club sufriu varios ascensos e descensos baixo as directivas de José Lorenzo Pérez e Luis Neira Olive.

A partir da tempada 2010-11, baixo a presidencia de Ramón Bastos, o club iniciou unha fonda remodelación estrutural impulsada pola estrea de modernos campos de herba sintética e a profesionalización do seu corpo técnico e médico. Esta aposta deu os seus froitos na campaña 2011-12 coa chegada do presidente Esteban Cidanes Domínguez, na que as categorías inferiores asinaron unha xesta histórica con catro ascensos simultáneos de xuvenís, cadetes e infantís. Foi precisamente nesta exitosa etapa cando Claudio Giráldez —actual adestrador do Real Club Celta de Vigo en Primera División— comezou a vencellarse á estrutura técnica da base como coordinador de canteira xunto a Humberto Lede, consolidando a cantera do Porriño Industrial na elite do fútbol base galego antes de dar o salto como técnico.

11/07/2026 in Deportes, Infraestruturas, Mocidade, Patrimonio Municipal, Urbanismo, comercio e industria, Vías e obras

O Concello licita a segunda fase da ampliación do Auditorio que sumará un novo anfiteatro e unha cafetería ao aire libre

A actuación, cun prazo de execución máximo de 7 meses, está cofinanciada pola Unión Europea a través do Fondo Europeo de Desenvolvemento Rexional (FEDER).
O proxecto inclúe a creación dun anfiteatro con 25 novas butacas —que completará o aforo global ata as 350 prazas—, unha sala de exposicións e a urbanización integral da parcela.

O Porriño, 29 de xuño de 2026. O Concello do Porriño continúa a avanzar de xeito firme na modernización e expansión das súas infraestruturas culturais. Así, acabanse de licitar as obras correspondentes ao “Proxecto de ampliación do auditorio para unha nova sala de exposicións e anfiteatro”

Esta importante intervención arquitectónica, que se desenvolverá na rúa Xosé Fernández López , constitúe a segunda fase do gran complexo sociocultural do Porriño.

Máis espazo e mellores dotacións

A finalidade principal desta ampliación é enriquecer a axenda social e cultural do concello dotándoo de espazos versátiles, modernos e accesibles. O novo volume edificado conectará directamente co auditorio que actualmente se atopa en fase de construción.

Entre as principais novidades destaca a creación dun anfiteatro con capacidade para 25 novas butacas orientado cara ao escenario principal, o que permitirá elevar a capacidade total do conxunto ata as 350 prazas. Un deseño que explicou o alcalde, se fixo co asesoramento da artista porriñesa Janeth Novás. Así mesmo, dotarase ao complexo dunha sala de usos múltiples e exposicións na cota superior que servirá de acceso accesible mediante unha rampla , ademais de aseos adaptados, almacén e unha pequena zona de cociña.

Cafetería ao aire libre na cuberta

Outro dos grandes atractivos do deseño arquitectónico, asinado pola arquitecta Estefanía Grandal Leirós , é o aproveitamento da súa cuberta plana. Nela configurarase unha terraza que se converterá nunha gran cafetería ao aire libre. Un espazo único no Porriño, cunhas vistas privilexiadas do centro urbano. Un entorno que servirá para grandes eventos pero tamén como novo espazo de lecer para a cidadanía.

“Coa licitación desta segunda fase, O Porriño dá un salto cualitativo na súa oferta cultural. Non só ampliamos o espazo físico do Auditorio ata as 350 prazas, senón que creamos un punto de encontro vivo, moderno e accesible para todos os veciños e veciñas”, asegura o alcalde do Porriño, Alejandro Lorenzo.

Integración urbana e sostibilidade

O deseño persegue un estrito diálogo visual e volumétrico cos edificios lindeiros (o Centro Cultural e a Biblioteca Municipal, construídos en Rosa Porriño). Así, para o novo volume utilizarase un revestimento exterior de fachada ventilada en chapa de zinc de cor marrón, logrando unha imaxe limpa e contemporánea.

Ademais, os traballos contemplan a urbanización integral de toda a parcela exterior (duns 500 metros cadrados) para xerar un contorno peonil de calidade, totalmente accesible e que facilitará o acceso ordenado de vehículos para as tarefas de carga e descarga de material escénico , ademais de acondicionar unha nova rúa perpendicular que dará acceso ao montacargas municipal. En materia de sostibilidade, a nova infraestrutura adoptará os máximos criterios de eficiencia enerxética mediante un sistema de climatización por bomba de calor aerotérmica.

Coa apertura deste proceso de licitación pública, a o municipio prepárase para dar un salto de calidade cualitativo que situará ao Porriño na vangarda das dotacións culturais e de lecer da contorna.

Os traballos, que ascenden a 737.291,87 € , licitaranse mediante un procedemento aberto e contarán cun prazo máximo de execución de 7 meses a partir da súa adxudicación. A obra enmárcase dentro dos programas cofinanciados pola Unión Europea a través do Fondo Europeo de Desenvolvemento Rexional (FEDER).