Os primeiros domingos de cada mes habrá mercado ambulante no Porriño

 

A concellería de Comercio do Concello do Porriño, que dirixe Antía Carrera, informou hoxe da ampliación dos días de mercado ambulante no Porriño. A petición dos vendedores, o Concello do Porriño suma unha nova data mensual de celebración do mercadiño. Será o primeiro domingo de cada mes e os postos instalaranse na mesma localización que o resto dos días, na rúa Leandro Diz.

A feira desenvolverase en horario de tarde. Nos meses de inverno instalarase de 16 a 19:30 h e no verán, cando os días son máis largos, de 16 a 21 h.

Alejandro Lorenzo coñece as capacidades tecnolóxicas de AIMEN e a súa activa participación en proxectos de I+D+i

O alcalde do Porriño, Alejandro Lorenzo, acompañado pola concelleira de Industria, Rosario Costas, visitou esta mañá o Centro Tecnolóxico AIMEN co obxectivo de coñecer as capacidades tecnolóxicas e proxectos máis destacados que está a desenvolver o centro na actualidade.

Ambos mantiveron unha reunión co presidente de AIMEN, Antonio Casal; o director xeral do Centro, Jesús Lago; e outros membros do equipo directivo, quenes explicaron o traballo que veñen desenvolvendo como centro tecnolóxico de referencia no ámbito da fabricación avanzada e fábrica intelixente.

A continuación, percorreron as instalacións da Planta de Tecnoloxías de Unión e a Planta de Tecnoloxías Láser, onde se puido coñecer o equipamento vanguardista do que dispón o Centro para favorecer a innovación e proporcionar á industria galega servizos de alto valor engadido.

O presidente de AIMEN, Antonio Casal, agradeceu a visita e puxo en valor a importancia da colaboración entre centros e administracións para seguir innovando e reforzar a transferencia de tecnoloxía e coñecemento ao tecido empresarial.

Pola súa parte, Alejandro Lorenzo, destacou a importancia de contar no municipio cun centro tecnolóxico referente en I+D+i a nivel nacional e internacional e reiterou a disposición do Concello do Porriño a colaborar no necesario para que AIMEN siga contribuíndo á mellora tecnolóxica das principais empresas galegas e tamén co desenvolvemento económico do Porriño.

The Game Tatoo & Piercing, Supersugar e O-Exo Floristería, gañadores do Concurso de Escaparates de Nadal

O primeiro Concurso de Escaparates de Nadal organizado polo Concello do Porriño xa ten gañadores.
 
`The Game Tatoo & Piercing´ (Rúa Manuel Rodríguez, 9) e a súa factoría de xoguetes fíxose co primeiro premio. O segundo foi para a casiña de doces de `SuperSugar´ (Praza de Abastos, Planta 1) e o terceiro para a montaxe de `O-Exo Floristería´ (Rúa Manuel Rodríguez, 40. Baixo).
 
A suma do voto popular e xurado otorgou tamén seis mencións especiais a `Lolyana´ (Rúa Ramiranes, 4, baixo), `Obradoiro Kreativo´ (Rúa O Pinar, 4), `Dándara´ (Rúa Ramón González, 13), `Tía Tata´ (Rúa Ramón González, 33), `Origen Café´ (Praza Antonio Palacios, 5) e `Peluquería Susy 2´ (Rúa Manuel Rodríguez, 62).
A votación popular levou o peso do concurso e o xurado, formado por representantes do tecido asociativo do municipio, outorgou a súa puntuación (sobre 100) valorando a composición e deseño, calidade, iluminación, creatividade e orixinalidade, exposición dos produtos e integración dos Obxectivos de Desenvolvemento Sostible. A suma de ambas determinou aos gañadores.
 
O primeiro premio estaba dotado de 1.200 euros, o segundo de 800 euros e o terceiro de 500 euros. Cada unha das mencións especiais premiouse con 250 euros.

A licitación as obras de humanización das rúas Buenos Aires e Progreso, que suporán un investimento de case 1M€ e comezarán a executarse na primavera

A conselleira de Infraestruturas e Mobilidade, Ethel Vázquez, acompañada polo alcalde, Alejandro Lorenzo, avanzou hoxe a licitación das obras de humanización das rúas Buenos Aires e Progreso, que suporán un investimento da Xunta de case 1 M€ e comezarán a executarse na primavera. Executaranse

Vázquez Mourelle achegouse esta mañá ata O Porriño para presentar na zona da avenida Buenos Aires a reforma integral que vai realizar a Xunta na vía autonómica PO-329 ao seu paso polo centro urbano. O obxectivo dos traballos, tal e como salientou, é “transformar unha estrada nunha rúa na que os coches ceden protagonismo en favor dos peóns”.

A conselleira explicou que a Plataforma de Contratos Públicos de Galicia recolle hoxe o inicio da contratación dos traballos para actuar nun treito de case 700 metros desta vía autonómica, na que se reforzará a seguridade a pé dos veciños, ademais de mellorar a accesibilidade e tamén o aspecto estético deste treito da vía, favorecendo a súa mellor integración urbana. As empresas interesadas teñen ata o vindeiro 23 de xaneiro para presentar as súas ofertas.

A previsión da Xunta é poder adxudicar as obras a finais de marzo para poder inicialas xa na primavera, co que se prevé ter rematadas as actuacións para o desfrute dos veciños a finais do 2023, xa que contan cun prazo de execución de 5 meses. A titular de Infraestruturas precisou que esta nova actuación na PO-329 dálle continuidade á intervención xa executada no treito inicial da vía autonómica. Trátase, en definitiva, dunha actuación “transformadora da accesibilidade, da seguridade peonil e da estética da PO-329 no Porriño”, concluíu Ethel Vázquez.

O alcalde, pola súa banda, agradeceu a Xunta “esta intervención de gran importancia para O Porriño xa que se trata dun dos principais accesos ao centro urbano” e ademais “contribuirá a dinamizar unha zona que pese a ser céntrica non era moi concurrida nin habitable polo estado no que se atopaba”. Trátase dunhas obras “moi demandadas dende hai tempo que transformarán por completo a contorna”

Actuacións

En liñas xerais, os traballos consistirán na execución de beirarrúas máis anchas, para o que se reducirá un pouco a anchura dos carrís de circulación; na reordenación das zonas de aparcadoiro en todo o treito de actuación; na renovación dos pavimentos, tanto das beirarrúas como dos aparcadoiros; e na rehabilitación da calzada.

Completarase a intervención coa dotación de mobiliario urbano: disporanse bancos, papeleiras, xardineiras e árbores; ademais de mellorar a iluminación con 22 novos puntos de luz e con 12 reforzos luminosos nos pasos peonís, para garantir unha maior seguridade.

Os traballos dividiranse en cinco treitos, en función das necesidades de actuación detectadas en cada un deles.

No primeiro tramo, entre as dúas interseccións coa rúa dos Muíños, que chega ao comezo do peche protexe as vías do tren, aumentarase o ancho da beirarrúa, reducíndose os carrís e deixando as prazas de aparcadoiro na marxe dereita.

No segundo treito, desde o comezo do peche de Adif ata o paso a nivel, reordenarase a sección actual da calzada para aumentar o ancho das beirarrúas, manténdose tamén aquí os aparcadoiros na marxe dereita.

O tramo tres vai desde o paso a nivel ata o cruce coa rúa Ponte do Valo, onde se proxecta unha plataforma compartida a nivel, de sentido único de circulación desde o mesmo paso a nivel ata a rúa Avelino Villasuso.

No cuarto treito, que descorre cruzando o río Louro e pasa baixo a autovía A-55, vaise mellorar a seguridade peonil, colocando pasos elevados e adaptándose á normativa de accesibilidade.

E no quinto treito, que acaba na glorieta da PO-331, reordenarase a calzada para gañar espazo para os peóns, reducindo o dos carrís, ademais de dispoñer sitio para os contenedores e aparcadoiros.

Unha nova liña subterránea alimentará o polígono industrial de as Gándaras

O alcalde, Alejandro Lorenzo, acompañado polo delegado de UFD en Pontevedra, Francisco Ramos, visitou hoxe a subestación de Atios na que a distribuidora eléctrica de Naturgy vén de invertir preto de 350.000 euros para a construción dunha nova liña de de saída de media tensión ata o Polígono Industrial de As Gándaras.

A actuación consiste na construción dunha liña de media tensión subterránea de 1.724 m dende a subestación de Atios ata o polígono industrial de As Gándaras co obxectivo de apoiar o subministro eléctrico na zona. Ademais, tal e como explicaron os técnicos ao rexedor, está proxectada tamén a reforma do centro de seccionamento existente para dotalo de máis celdas telecontroladas para optimizar a fiabilidade do servizo.

“Esta nova liña permitirá potenciar a calidade do subministro eléctrico e aumentar a capacidade da red de distribución nunha zona industrial en crecemento”, explicou o alcalde, Alejandro Lorenzo, “Os nosos polígonos industriais son o motor económico do Porriño e de parte da contorna, as melloras na calidade do servizo que se lles preste sempre repercutirán positivamente para todo o municipio”.

Pola súa parte, o delegado de UFD en Pontevedra, Francisco Ramos, explicou que “con estas novas actuacións, reforzase o servizo no Polígono de As Gándaras, que contará cunha nova liña de media tensión de reforzo, asegurando o subministro dunha das zonas industriais máis importantes de Galicia”.

 

 

Buscamos o mellor escaparate de Nadal do Porriño

O Concello do Porriño, a través da concellería de Comercio que dirixe Antía Carrera, convoca o seu primeiro concurso de escaparates de Nadal dirixido ao comercio e hostelería local.

“Somos conscientes do emotivas que son estas datas, e queremos poñer en valor o traballo e o esforzo dos comerciantes e hostaleiros e importancia da súa presencia no día a día da veciñanza”, explicou o alcalde, Alejandro Lorenzo, “Especialmente este ano, que está a ser moi duro para estes sectores e por iso debemos motivalos con iniciativas que dalgunha forma contribúan a compensar todo ese traballo”.

No certame poderán participar todos os establecementos comerciais e de hostalería do Porriño que deseñen os seus escaparates ou fachadas entorno á temática do Nadal.

O prazo de inscrición será do 21 de novembro ao 2 de decembro e haberá tres premios e seis mencións especiais. O primeiro premio terá unha contía de 1200 euros, o segundo de 800 euros e o terceiro de 500 euros. As seis mencións especiais que outorgará o xurado estarán dotadas con 250 euros cada unha.

A veciñanza xogará un papel esencial neste concurso, xa que ademais do xurado que valorará os deseños(formado por representantes do Concello, comerciantes, asociacións e entidades) os veciños e veciñas poderán votar tamén a través das redes sociais do Concello, onde se expoñerán todos os participantes.

“Animámosvos a todos a participar desta iniciativa, tanto aos comerciantes e hostaleiros como aos veciños que decidan quen debe gañar”, concluíu a concelleira, Antía Carrera, “Entre todos podemos potenciar a actividade comercial este Nadal no Porriño”.

BASES DO CONCURSO: https://oporrino.org/documentos/bases-i-concurso-de-escaparates-de-nadal/

O mercado ambulante mantense o 1 de novembro

O próximo 1 de novembro celebrarase no Porriño a feira ambulante. A pesar de ser festivo, mantense a celebración do mercadiño na nova ubicación.

Os postos estarán instalados na rúa Leandro Diz, dende o cruce con Manuel Rodríguez ata o cruce con Xogo da Ola, e na rúa Manuel Rodríguez, o tramo do cruce con Manuel Rodríguez a Praza de San Sebastián. 

Continúa en Xylazel a rolda de encontros coas empresas para responder ás necesidades do tecido industrial

O alcalde do Porriño, Alejandro Lorenzo, e a concelleira de Urbanismo e Medio Ambiente, Antía Carrera, visitaron hoxe a fábrica de Xylazel no Porriño dentro da rolda de encontros que están a manter coas empresas do municipio.

A empresa, fundada en 1975 por Zeltia,  foi adquirida no ano 2018  pola compañía holandesa AkzoNobel, que consolidou deste modo a súa aposta polo liderado en tratamento e pintura de madeira e metal, non só en España, senón no mercado mundial.

Con 40 persoas no cadro de persoal, parte importante deles veciños e veciñas do Porriño e a súa zona de influencia, as súas instalacións acollen na actualidade a planta de producción de dúas marcas do grupo: Xylazel, especializada no tratamento e pintura de madeira,e Oxirite, adicada á protección e pintura no metal.

“Que grandes compañías como AkzoNobel aposten por firmas do Porriño é sinal do potencial que ten a nosa industria”, afirmou o alcalde, “Xylazel garda unha estreita consolidade relación co municipio, o 90% dos seus provedores son empresas locais e  o groso da súa plantilla é do Porriño. Contan coa nosa man tendida, tanto eles como o resto de empresas dos nosos polígonos industriais, para que a industria do Porriño siga a ser un referente”. 

O Porriño acolle esta fin de semana unha nova edición de “Merca na rúa”

O Porriño acolle esta fin de semana a XXVI edición da feira de oportunidades “Merca na rúa”, que como sempre se desenvolverá na zona peonil do centro urbano da vila.

Participarán máis de vinte stands con ofertas nunha ampla de produtos e sectores. Roupa, calzado, óptica, mercería ou accesorios son algún dos artigos nos que poderedes conseguir descontos desde 60% e ata o 70%.

O evento, organizado pola Asociación de Comerciantes e Industriais do Porriño (Acipor) en colaboración co Concello do Porriño, terá lugar o sábado 10  en horario ininterrumpido de 10 a 21 h e o domingo 11 de 11 a 20 h.

Ademais, para facilitar as compras ás familias, haberá inchables para os máis pequenos e unha visita moi especial, a dos Bolechas que estarán no Merca na Rúa o sábado pola tarde a partir das 17: 30 h.

Esta edición garda unha sorpresa moi especial, a que nos ten preparada a pequena pianista Dasha, que ofrecerá un concerto o sábado a partir das 19:30 h na praza Arquitecto Antonio Palacios.  

O domingo pola tarde, a partir das 17 h recibiremos a visita das persoaxes máis famosas de Disney e pechará a programación un concerto a partir das 20h. 

O alcalde, Alejandro Lorenzo, convidou a toda a veciñanza “a encher as rúas unha vez máis e disfrutar da vila mentres se benefician dos mellores descontos, á vez que contribúen a dar pulo ao noso comercio local”.