Servizos sociais

Continúa a Caravana Municipal con parada en Pontellas este xoves

●        A vindeira semana rematará esta etapa con parada en Chenlo

O Porriño, 14 de xullo de 2026. O Concello do Porriño continúa a avanzar no seu obxectivo de achegar a administración local a todas as parroquias a través da Caravana Municipal de Atención Cidadá. Esta oficina móbil, que iniciou a súa andaina na parroquia de Cans, ten programada para este xoves, 16 de xullo, a súa penúltima parada na parroquia de Pontellas, antes de poñer o broche final a esta rolda de visitas a vindeira semana en Chenlo, o xoves 23 de xullo.

Esta iniciativa, impulsada directamente polo goberno local do Porriño, busca facilitar que a veciñanza poida realizar trámites administrativos directamente desde a súa contorna, evitando así desprazamentos innecesarios ata o centro urbano.

Unha oficina integral á porta da casa

A caravana funciona como unha extensión real do propio consistorio. Grazas a ela, os residentes de cada parroquia poden realizar diversas xestións administrativas e tramitar solicitudes oficiais; acceder de forma áxil a información municipal de interese, ou presentar demandas e suxestións sen necesidade de coller o coche, coa gran vantaxe de que o equipo de goberno pode desprazarse no mesmo momento a revisar o espazo concreto obxecto da petición.

O propio alcalde, Alejandro Lorenzo, está a participar activamente nestes encontros para recoller de primeira man as necesidades de cada veciño e veciña con diversas reunións e citas en cada parroquia. Nesta campaña, o rexedor está acompañado por un amplo equipo de goberno para dar resposta inmediata ás distintas áreas.

Os veciños e veciñas poden acudir con cita previa para ter prioridade, ou achegarse ata os centros culturais onde se aparca a caravana.

Recta final do calendario de visitas

Coa parada deste xoves en Pontellas e a da vindeira semana en Chenlo, a oficina itinerante completa un intenso percorrido en horario de mañá que xa a levou a visitardesde xuño as parroquias de Cans, Atios, Mosende, Carracido , Budiño e Torneiros.

O Concello do Porriño convida a toda a veciñanza de Pontellas a achegarse este xoves á caravana para trasladar as súas consultas, propostas e xestións de maneira directa e sen intermediarios.

14/07/2026 in Alcaldía, Parroquias, Política Social, Servizos sociais

A Caravana Municipal do Porriño volve saír á rúa: tramitacións e atención directa sen saír da parroquia 

  • Arranca en Cans un percorrido que visitará todas as parroquias ata xullo 

O Porriño, mércores 4 de xuño. O Concello do Porriño iniciou esta mañá na parroquia de Cans unha nova rolda de visitas da súa Caravana Municipal de Atención Cidadá. Esta oficina móbil, impulsada polo goberno local, ten como obxectivo prioritario achegar os servizos administrativos ao rural e facilitar que a veciñanza poida realizar trámites directamente desde a súa contorna sen necesidade de desprazarse ata o centro urbano. O alcalde, Alejandro Lorenzo, estivo presente neste primeiro encontro para recoller de primeira man as peticións de cada residente.

A caravana funciona como unha extensión do propio consistorio e ofrece unha ampla carteira de servizos públicos integrados. A través desta oficina itinerante, os veciños teñen a posibilidade de realizar diversas xestións administrativas, tramitar solicitudes oficiais e acceder de forma áxil a información municipal de interese. A cercanía as súas vivendas posibilita que poidan achegase sen coller o vehículo pero ademáis permite poder visitar no momento o espazo concreto das súas demandas. 

Así, ademais do alcalde, nesta xornada estiveron presentes na caravana Bárbara Troncoso, concelleira de atención cidadá e protocolo; Marcos Martínez, concelleiro de parroquias, comunidades de augas e montes e parques infantís; Bienvenido Estévez, concelleiro de cultura, festas e novas tecnoloxías; Carlos González, concelleiro de parques e xardíns, cemiterios, limpeza viaria e lixo; e Teresa Veloso, concelleira de emprego e formación. 

Seguintes paradas

Tras esta primeira parada en Cans, a caravana municipal continuará o seu itinerario polas demais parroquias do municipio ao longo das vindeiras semanas en horario de mañá. O calendario oficial proseguirá o vindeiro xoves 11 de xuño en Atios, mentres que a seguinte cita terá lugar o luns 15 de xuño en Mosende. Posteriormente, a oficina móbil visitará Carracido o xoves 25 de xuño e desprazarase a Budiño o xoves 2 de xullo. O percorrido polos núcleos rurais do Porriño pecharase durante o mes de xullo coas visitas programadas a Torneiros o xoves 9, a Pontellas o xoves 16 e, finalmente, á parroquia de Chenlo o xoves 23 de xullo.

04/06/2026 in Alcaldía, Parroquias, Política Social, Servizos sociais

O Concello do Porriño asina un convenio urbanístico que permitirá un novo local municipal de Servizos Sociais na Avenida de Galicia

  • O acordo desbloquea unha promoción de vivendas en alugueiro e permite ao Concello incorporar en propiedade un baixo municipal valorado en preto de 400.000 euros, destinado a Servizos Sociais, ao Centro de Información á Muller (CIM) e a novos servizos de atención ás familias

O Porriño, 17 de xaneiro de 2026.- O Concello do Porriño vén de asinar un convenio urbanístico que permitirá avanzar na construción dunha nova promoción de vivendas en réxime de alugueiro na contorna da rúa Antonio Palacios – Avenida de Galicia e, ao mesmo tempo, incorporar ao patrimonio municipal un novo local destinado a Servizos Sociais, en plena propiedade e cun elevado valor social e económico.

A actuación desenvólvese sobre unha parcela adquirida pola entidade promotora a unha entidade bancaria, na que existían varias pequenas parcelas de titularidade municipal, cunha superficie aproximada duns 400 metros cadrados, segundo os informes técnicos municipais. Tras a revisión da situación xurídica e logo do correspondente informe do secretario municipal, alcanzouse un acordo de permuta que permitiu desbloquear a actuación urbanística.

O alcalde do Porriño, Alejandro Lorenzo, explicou que “a través desta construción de vivendas en réxime de alugueiro, o Concello vén de asinar un convenio coa entidade promotora para permitir o uso duns terreos municipais que estaban integrados na parcela. Aínda que a valoración destes terreos non é moi elevada, a contraprestación que recibe o Concello é moi importante”.

Como resultado do convenio, o Concello recibirá un baixo de nova construción, completamente equipado e acondicionado para uso público, que se destinará a Servizos Sociais. “Falamos dun local amplo, moderno e en condicións óptimas, cunha valoración técnica próxima aos 400.000 euros, o que supón unha mellora moi relevante para o patrimonio municipal e para a atención á cidadanía”, sinalou o rexedor.

Alejandro Lorenzo destacou tamén que “os Servizos Sociais municipais contan hoxe con instalacións moi compartimentadas e con espazos que era necesario mellorar. Este novo local permitiranos dispoñer dunhas dependencias axeitadas, non só para Servizos Sociais, senón tamén para o Centro de Información á Muller (CIM) e para a posta en marcha de novos servizos. Para nós é unha prioridade dotar cunhas oficinas axeitadas a Servizos Sociais e, especialmente, reforzar a atención á cidadanía e ás mulleres a través do CIM. Este novo espazo nace coa vontade de converterse nun punto de encontro para aquelas familias que atravesan algunha situación de necesidade e que requiren o apoio dos servizos municipais. En definitiva, trátase dunha actuación prioritaria para mellorar a atención e o acompañamento ás persoas.”

Neste senso, o alcalde engadiu que “o obxectivo é crear un espazo no que as unidades familiares poidan ser atendidas en condicións dignas, con zonas de espera e descanso, mellorando a atención presencial e a coordinación entre os distintos servizos municipais”.

O convenio permite compatibilizar a promoción de vivenda en alugueiro —unha actuación subvencionada pola Xunta de Galicia— cunha achega municipal que se traduce nun equipamento público estratéxico, reforzando o interese xeral e a mellora dos servizos públicos no Porriño.

17/01/2026 in Benestar, Servizos sociais

O Concello do Porriño anima ás persoas maiores que viven soas a pasar unhas festas diferentes a través do “Xuntos polo Nadal”

 

  • A iniciativa, da Xunta de Galicia, vai dirixida a persoas de 60 anos ou máis e ten o prazo de inscrición aberto ata o 26 deste mes de novembro 
  • As persoas interesadas poden acudir ao Departamento de Servizos sociais do Concello onde recibirán información e axuda para formalizar a inscrición

O Porriño, 18 de novembro de 2025.- O Concello do Porriño informa de que a Xunta de Galicia abriu o prazo de inscrición no programa “Xuntos polo Nadal”, dirixido a persoas de 60 anos ou máis que viven soas e desexan pasar acompañadas as festas do Nadal. O período para presentar solicitudes permanecerá aberto ata o vindeiro 26 de novembro. 

O programa ofrece un total de 270 prazas, das que 130 corresponden á Residencia de Tempo Libre do Carballiño –para solicitantes das provincias de Pontevedra e Lugo– e 140 á Residencia de Panxón, en Nigrán -destinada ás persoas das provincias da Coruña e Ourense-. Esta iniciativa desenvolverase entre o 23 de decembro de 2025 e o 7 de xaneiro de 2026, establecéndose tres quendas entre as que só se poderá elixir unha: do 23 de decembro ao 7 de xaneiro (16 días), do 23 ao 30 de decembro (8 días) ou do 31 de decembro ao 7 de xaneiro (8 días). O programa inclúe aloxamento e manutención en réxime de pensión completa, transporte en autobús ás residencias e de regreso, así como actividades de animación sociocultural. 

Poderán participar aquelas persoas que teñan 60 anos ou máis, estean empadroadas en Galicia, vivan soas e non teñan con quen compartir estas datas, ademais de valerse por si mesmas. Terán prioridade na selección as persoas que perderan o seu cónxuxe ou persoa convivinte nos últimos dous anos, as de maior idade e aquelas que non participaran en edicións anteriores. 

As solicitudes presentaranse preferentemente por vía electrónica a través da Sede Electrónica da Xunta de Galicia, aínda que tamén se poderán entregar de maneira presencial no Concello. As persoas interesadas do Porriño que precisen apoio na tramitación poden dirixirse ao Departamento de Servizos Sociais do Concello, onde recibirán información e axuda para formalizar a inscrición.

 

18/11/2025 in Benestar, Servizos sociais

O Concello aproba os novos pregos do Servizo de Axuda no Fogar cun incremento do prezo/hora e melloras laborais obrigatorias para a empresa adxudicataria

  • O contrato sae a licitación, para iniciarse en xaneiro de 2026, por un importe de máis de 2,8 millóns de euros por un período de dous anos
  • A día de hoxe, figuran como beneficiarias do SAF 137 persoas e véñense prestando máis de 44.000 horas de servizo no que vai de ano
  • O alcalde Alejandro Lorenzo destaca que os novos pregos dan resposta ás demandas das traballadoras e introduce avances tanto cualitativos como cuantitativos no servizo. A eles proseguirá unha modificación da ordenanza, unha vez se implante o novo protocolo da Xunta

O Porriño, 20 de outubro de 2025.- O Concello do Porriño celebrou hoxe un pleno extraordinario cun único punto na orde do día: a aprobación do expediente, o gasto e os pregos para a licitación do novo contrato do Servizo de Axuda no Fogar (SAF). A proposta, presentada polo concelleiro de Contratación, Carlos Martínez, supón un importante paso adiante na mellora deste servizo esencial.

O novo contrato, que substituirá o actual ao seu remate e entrará en vigor en xaneiro de 2026, terá unha duración inicial de dous anos, cunha posible prórroga dun máis, e sae a licitación por un importe total de 2.826.777,60 euros. O número de persoas beneficiarias do SAF municipal ascende hoxe a 137, 10 na modalidade básica e 127 na de dependencia. Ata o 30 de setembro deste ano prestáronse máis de 44.000 horas de atención, 2.059 na modalidade básica e 42.319 en dependencia. Actualmente e o servizo conta con 63 traballadores, 60 auxiliares de axuda a domicilio, dous coordinadores e unha auxiliar administrativa.

“Con estes novos pregos damos resposta ás demandas das traballadoras e melloramos o servizo, tanto desde o punto de vista cualitativo como cuantitativo. Apostamos por reforzar a súa seguridade no posto de traballo e tamén recoñecemos o seu labor cun incremento do prezo/hora”, sinalou o alcalde Alejandro Lorenzo, quen tamén quixo agradecer a implicación e compromiso de todas as persoas que forman parte do SAF e do departamento de Servizos Sociais.

Na exposición do punto, o concelleiro de Contratación, Carlos Martínez destacou que os novos pregos técnicos recollen as achegas feitas pola representación sindical, integrando propostas para garantir unha mellora real das condicións laborais. Un dos cambios máis significativos é que os medios materiais, antes considerados como melloras optativas, pasan agora a ser de obrigado cumprimento para a empresa adxudicataria. Isto inclúe a dotación de roupa de traballo e axudas técnicas como camas hospitalarias, grúas, cadeiras de ducha ou andadores.

Neste apartado, tamén se mencionou o local de referencia, que será a sede da base operativa do programa e que en todo caso deberá estar situado no Concello do Porriño e unha aplicación informática para a xestión e o intercambio habitual da información do servizo co departamento municipal responsable.

Tamén neste sentido, os pregos indican que a empresa adxudicataria deberá efectuar unha avaliación completa dos riscos laborais que afectan ás persoas traballadoras no desenvolvemento das súas tarefas, a cal deberá levarse a cabo por parte dun técnico debidamente cualificado en prevención de riscos laborais.

No apartado económico, os novos pregos supoñen un incremento do 16% nos prezos unitarios por hora, fixando as tarifas en 26,17 €/h para a modalidade básica e 24,74 €/h para a modalidade de dependencia.

Tamén se modificaron os criterios de selección e valoración de ofertas presentadas, antes establecíase un máximo de 150 puntos, repartidos en 50 para criterios que dependen de xuízo de  valor e 100 puntos para criterios económicos. Agora establécese un máximo de 100 puntos, repartidos en 40 e 60, respectivamente. É a destacar, neste senso, a valoración de protocolos de actuación, con especial mención aos protocolos de riscos laborais ante temas como axentes biolóxicos, infecciosos e ante situacións de emerxencias e agresións en domicilios.

Por último, desde o Concello do Porriño sinalan que a modificación da Ordenanza municipal reguladora do SAF levarase a cabo tendo en contra o contido dos novos pregos e á espera da aprobación definitiva do protocolo de seguridade elaborado polo Instituto de Seguridade e Saúde Laboral de Galicia (ISSGA), que xa conta co visto bo da Xunta de Galicia e foi remitido á Federación Galega de Municipios e Provincias (FEGAMP).

20/10/2025 in Servizos sociais

III campaña solidaria “A Hora de Dar”

Seguindo as indicacións das necesidades que detectan os Servizos Sociais do Porriño, e en cumprimento do acordado polo Pleno Infantil celebrado polo Día Mundial dos Dereitos da Infancia, o Concello do Porriño pon en marcha a terceira edición da iniciativa solidaria “A Hora de Dar”.

A recollida impulsada pola Concellería de Educación e a OMIX, deu comezo hoxe en todos os centros educativos do municipio co obxectivo de incentivar e multiplicar as boas accións das persoas. O obxectivo deste movemento mundial, ao que se suma a cativada e mocidade do Porriño, é dedicar uns días a celebrar o feito de dar.

Este ano, a recollida centrarase nos produtos que máis se requiren no programa municipal de alimentos SOS Porriño por parte das familias con menos recursos. Estes son alimentos non perecedoiros como pasta, arroz, cacao soluble, galletas, conservas e alimentación infantil.

Como cada ano instalaranse nos centros de educación primaria e secundaria puntos de recollida específico. Desde o Concello do Porriño animan a toda a veciñanza a participar e unirse para DAR e informan de que a maiores dos centros educativos poderán doarse alimentos no punto de recollida habilitado no Pavillón Municipal do Porriño ata o 11 de decembro.

29/11/2024 in Alcaldía, Educación e tecnoloxía, Servizos sociais

Programa de vivendas baleiras para facilitar o acceso ao alugueiro

O Concello de Porriño puxo en marcha o seu Programa de Vivendas Baleiras, unha iniciativa que busca activar o maior número posible de propiedades desocupadas de titularidade privada para incorporalas ao mercado de alugueiro a prezos accesibles. Esta acción enmárcase dentro do Programa de Mobilización de Vivendas en Alugueiro, impulsado polo goberno autonómico a través do IGVS.

A través deste programa o Concello creou un rexistro de potenciais arrendatarios e outro de vivendas e, a través do departamento de Servizos Sociais, adxudicaranse atendendo ás bases reguladoras do mesmo.

Co obxectivo de incentivar aos propietarios, o programa ofrece garantías como un seguro que cobre o abono de rendas non pagas e outro para a reparación de danos durante a vixencia do contrato, ademais de asistencia xurídica. Os propietarios interesados en participar deberán presentar a súa solicitude antes do 31 de decembro de 2025.

Doutra banda, as persoas que busquen vivenda e cumpran cos requisitos establecidos poderán inscribirse no rexistro de demandantes do concello. Este programa está deseñado para axudar a quen enfronta dificultades para acceder a un alugueiro, asegurando que a renda non supere o 30% dos seus ingresos. Entre os requisitos esixibles están que deben estar empadroadas no Concello do Porriño e que se atopen nunha situación persoal ou familiar que supoña unha dificultade para acceder a unha vivenda en aluguer.

“Este programa pode ser un recurso fundamental para moitas familias do Porriño que se atopan en situación de vulnerabilidade, con dificultades para acceder á unha residencia debido á súa situación económica e á escaseza de vivendas en alguiler”, explicou o alcalde, Alejandro Lorenzo. O rexedor destacou tamén que a colaboración público-privada, coa implicación das administracións e propietarios, é esencial para poder solventar esta situación “por iso agradezco de antemán aos propietarios que se sumen a esta iniciativa”.

As bases poden consultarse na seguinte ligazón: https://oporrino.org/documentos/bases-reguladoras-do-programa-de-vivendas-baleiras-2024/

09/10/2024 in Alcaldía, Servizos sociais

Os maiores de 55 anos poderán aprender a bordar en Torneiros

O Centro de Día de Torneiros ofrece de forma gratuíta un curso de técnicas de bordado para maiores de 55 anos, dentro do Programa de Envellecemento Activo co que pretenden difundir a súa labor e facerse visibles na sociedade. O Centro Cultural Alba albergará esta actividade, que terá lugar unha hora á semana durante cinco meses.

Unha actividade para saír de casa, socializar e previr o envellecemento

Os participantes, ademais de aprender ou perfeccionar o bordado, obteñen unha serie de beneficios: unha razón para saír de casa e socializar, evitando así a soedade non desexada; e a prevención do envellecemento o facer unha actividade que estimula distintas partes do sistema nervioso e motriz.

O Centro Cultural Alba é o lugar idóneo para esta actividade, tanto polas instalacións, como polo espazo natural, ademais de poder disfrutar da cafetería que Lume ten no Centro. O curso levarase a cabo os mércores ás 16 horas, e empezará nas próximas semanas, con parada vacacional nos meses de xullo e agosto.

Sonia Leiro, Educadora Social do Centro de Día, é a persoa que impartirá o curso de bordado, que “será un lugar de encontro e creará lazos entre a veciñanza a través do bordado e a costura creativa”, explica. “Os/as participantes comprobarán que cunha puntada que todo o mundo sabe facer, pódense crear obras moi elaboradas e moi bonitas”, engade Leiro.

“Dende o Concello, animamos aos veciños/as a participar nas diversas actividades que favorecen a vida social nas parroquias e melloran a vida social e a saúde dos nosos maiores”, conclúe Teresa Veloso, concelleira de Política Social.

O prazo de inscripción está xa aberto e as persoas interesadas pódense anotar por teléfono no número 986 331 750, ou enviando un correo electrónico a oporrino.consorcio@igualdadebenestar.org.

20/05/2024 in Benestar, Servizos sociais