Os maiores de 55 anos poderán aprender a bordar en Torneiros

O Centro de Día de Torneiros ofrece de forma gratuíta un curso de técnicas de bordado para maiores de 55 anos, dentro do Programa de Envellecemento Activo co que pretenden difundir a súa labor e facerse visibles na sociedade. O Centro Cultural Alba albergará esta actividade, que terá lugar unha hora á semana durante cinco meses.

Unha actividade para saír de casa, socializar e previr o envellecemento

Os participantes, ademais de aprender ou perfeccionar o bordado, obteñen unha serie de beneficios: unha razón para saír de casa e socializar, evitando así a soedade non desexada; e a prevención do envellecemento o facer unha actividade que estimula distintas partes do sistema nervioso e motriz.

O Centro Cultural Alba é o lugar idóneo para esta actividade, tanto polas instalacións, como polo espazo natural, ademais de poder disfrutar da cafetería que Lume ten no Centro. O curso levarase a cabo os mércores ás 16 horas, e empezará nas próximas semanas, con parada vacacional nos meses de xullo e agosto.

Sonia Leiro, Educadora Social do Centro de Día, é a persoa que impartirá o curso de bordado, que “será un lugar de encontro e creará lazos entre a veciñanza a través do bordado e a costura creativa”, explica. “Os/as participantes comprobarán que cunha puntada que todo o mundo sabe facer, pódense crear obras moi elaboradas e moi bonitas”, engade Leiro.

“Dende o Concello, animamos aos veciños/as a participar nas diversas actividades que favorecen a vida social nas parroquias e melloran a vida social e a saúde dos nosos maiores”, conclúe Teresa Veloso, concelleira de Política Social.

O prazo de inscripción está xa aberto e as persoas interesadas pódense anotar por teléfono no número 986 331 750, ou enviando un correo electrónico a oporrino.consorcio@igualdadebenestar.org.

Cáritas A Louriña organiza a súa I Andaina Solidaria

O sábado 20 de abril, ás 17 h, o grupo de Cáritas do arciprestazgo da Louriña organiza a primeira edición da súa “Andaina solidaria”, co obxectivo de recaudar fondos para poder continuar desenvolvendo os prexentos que levan a cabo desde esta organización na bisbarra. A iniciativa conta coa colaboración dos concellos do Porriño, Mos e Salceda de Caselas, así como da Asociación de Hostaleiros do Porriño, Pan do Porriño e Dj Pitty.

A andaina presentouse hoxe aos pés da Igrexa de Santa María do Porriño, que será punto de partida este sábado. O alcalde do Porriño, Alejandro Lorenzo, a alcaldesa de Mos, Nidia Arévalo, e a alcaldesa de Salceda de Caselas, Loli Castiñeira, presentaron a actividade xunto cos representantes de Cáritas Parroquial, Pepi Rodriguez, Sugui e Beatriz Correa, hostaleiros e o Dj Pitty, que animará o fin da camiñata.

Esta ruta, que ten un nivel medio de dificultade comezará na igrexa de Santa María do Porriño, continuarán pola senda do Louro, Fonte do Cristo, capela das Angustias, Malladoura e Aloques, rematando na capela do Cristo, onde os/as participantes repoñerán forzas cunha chocolatada e roscas.

A inscrición ten un custo e 5 euros, para todas as persoas maiores de 14 anos – os menores desta idade participan gratis. Tamén se aceptan donativos a través do número de Bizum 08323, baixo o concepto “Andaina”. As persoas interesadas en participar poden inscribirse ou solicitar máis información n o número de teléfono 662 455 815.

Os representantes municipais animaron a toda a veciñanza a participar e sumarse a esta acción solidaria camiñando por unha boa causa.

Cáritas parroquiais do Val da Louriña

Cáritas Parroquian atende na Louriña a 70 familias. Co de centrar nas persoas a atención, recentemente cambiou o seu tradicional modelo de axuda social de doazón de alimentos e roupa por tarxetas económicas. Tal e como indican desta maneira dignifican o proceso de atención e responden mellor ás necesidades dos seus usuarios/as.

Ademais ofrecen nas súas parroquias do Porriño, Mos e Salceda de Caselas obradoiros de formación e búsqueda de emprego, atención a maiores, obradoiros de costura, e acollida e acompañamento como acción central.

O Porriño reivindica unha sociedade diversa, unida e na que non se discrimine a ninguén

O pavillón municipal do Porriño acolleu hoxe a conmemoración do Día Internacional das Persoas con Discapacidade que, como cada ano, organiza Aceesca para reclamar a implicación de toda a sociedade para a plena inclusión das persoas con diversidade.

Como sempre, contaron coa participación e respaldo do Concello do Porriño, da comunidade escolar e de outras entidades e centros de día como Afaga Alzheimer ou o Centro de Día de Torneiros.

Laura, en representación do grupo de autoxestores de Aceesca “Os dez do Porriño” , foi a encargada de ler o manifesto que abriu o acto.

Un acto co que, tal e como relatou, “queremos celebrar a nosa fortaleza e exercer os nosos dereitos” e “berrar ben alto que as persoas con discapacidade queremos formar parte da sociedade dunha forma activa, queremos que se teñan en conta as nosas opinións e ser os protagonistas das nosas vidas”.

Laura lembrou que as persoas con diversidade teñen dereito a ter un traballo, contar cos apoios que necesitan para poder desempeñalo e que sexa nas mesmas condicións que o resto das persoas. Reivindicou tamén unha accesibilidade universal tanto física como cognitiva.

“Pensamos que unha sociedade diversa é moito máis rica, pero aínda existen moitas barreiras e queremos poder derribalas. Axudádesnos?”, concluíu, “Por iso precisamos unha educación máis inclusiva, unha atención sanitaria competente, apoio das administración con servizos e recursos que respondan ás nosas necesidades, máis investigación, máis aposta polo emprego para as persoas con discapacidade, máis apoio e comprensión de toda a sociedade. Queremos unha sociedade unida e onde non se discrimine a ninguén”.

O alcalde, Alejandro Lorenzo, apuntou que ninguén mellor que eles “para trasladarnos ao resto da sociedade as súas necesidades e as súas propostas para conseguir algo que é de xustiza: un mundo que non deixe a ninguén atrás”. “Moitas veces non somos conscientes das barreiras coas que vos atopades cada día, esas que moitas veces vos impiden tamén cumprir os vosos soños”, díxolles o rexedor, “Por iso quero darvos as grazas, grazas aos Dez de Aceesca polo traballo que facedes e grazas a todas e todos os que hoxe estades aquí para facer deste un mundo mellor. Pola miña parte, como alcalde e como o voso veciño e amigo, tomo nota de todas elas e prometo, de corazón, facer o que estea na miña man para axudar a que se fagan realidade”.

Lorenzo rematou anunciando que, como o ano pasado, serán os usuarios e usuarias de Aceesca os encargados de iluminar o Nadal do Porriño, protagonizando o encendido navideño.

A xornada continuou co desfile de paraugas que deseñaron os centros participantes para visibilizar o importante que é poder vivir nunha sociedade diversa e plural na que todas e todos teñamos os mesmos dereitos e oportunidades e concluíu co gran flashmob no que participaron todos os asistentes.

O Porriño aposta pola prevención da adición dixital nos centros educativos

O Concello do Porriño, a través da Concellería de Sanidade e a OMIX, puxo en marcha un programa nas escolas para previr a adicción dixital e aos videoxogos na adolescencia.

Baixo o nome de “Xoga Limpo” preténdese acceder a toda a poboación diana: o alumnado de 1º da ESO dos concellos do Porriño e Mos. En total son 367 alumnos e alumnas os que participan, 10 aulas do Porriño e 5 aulas de Mos, con dúas sesións de traballo de dúas horas de duración cada unha.

A escola é un axente primario de socialización, e nela conflúen alumnos e alumnas, pais e nais, mestres e mestras… polo que supón un medio idóneo para a implantación dos programas preventivos e de promoción da saúde, neste caso mental e dixital.

Tal e como explicou a concelleira de Sanidade, Teresa Veloso, o programa apóiasae na investigación levada a cabo polo psicólogo británico Mark D. Griffiths, especialista no eido das adiccións conductuais. Nestas investigacións Griffiths aborda estas adiccións mergullándose na orixe ou motivación que leva á persoa a adicarlle un número elevado de horas aos videoxogos.

“É importante que sexan conscientes dos motivos que os levan a usar as novas tecnoloxías e do tempo que lles adican para poder xestionalo”, engadiu a edil, “E que teñan sempre moi presente que se ben son unha boa ferramenta, a ferramenta máis potente será sempre a súa mente, será á que lles axude a discernir o que queren e o que non”.

No mesmo sentido se manifestou o alcalde, Alejandro Lorenzo, que lles lembrou que “non se pretende penalizar a tecnoloxía, senón que aprendan a usala csen descoidar o seu desenvolvemento e que aprendan a canalizar o seu interés á vez que se lles mostran todas as posiblidades que o mundo dixital ofrece. En definitiva, o que queremos é fomentar o seu sentido crítico”.

Este programa está impulsado pola Consellería de Sanidade da Xunta de Galicia, a través dunha subvención outorgada ao Concello do Porriño para o cofinanciamento de proxectos de prevención de condutas.

Aceesca construirá unha nova residencia de atención á discapacidade no Porriño

Aceesca, asociación porriñesa centrada no apoio a persoas con diversidade intelectual, resultou beneficiaria dunha achega de 2 millóns de euros que a Xunta de Galicia lle concede para a creación dunha residencia de atención á discapacidade no Porriño. A conselleira de Política Social e Xuventude, Fabiola García, acompañada pola delegada territorial da Administración autonómica en Vigo, Marta Fernández-Tapias, e o alcalde do Porriño, Alejandro Lorenzo, visitou hoxe as instalacións da asociación en Torneiros.

Aceesca é unha das dez entidades de Galicia que se beneficiará da nova orde de axudas para a construción ou remodelación de centros para a atención a persoas maiores e con discapacidade de titularidade social, dotada de 13 millóns de euros. Con este apoio económico por parte do Goberno galego, Aceesca creará un novo centro residencial con 48 prazas .

Fabiola García destacou o traballo que realiza entidade no Porriño nos seus centros de día e ocupacional, nos que a Xunta financia no seu conxunto 73 prazas ás que destina 800.000 euros ao ano -36 prazas no centro de día e 37 no centro ocupacional-. Ademais, recoñeceu o compromiso do Concello do Porriño na atención ás persoas con discapacidade e aos maiores e sinalou que o Goberno galego seguirá a traballar da man do Concello para ampliar o financiamento do Servizo de Axuda no Fogar ou para levar ao municipio atención gratuíta en audioloxía, podoloxía e estimulación da memoria a través do programa de Coidados porta a porta.

A conselleira referiuse tamén a outras medidas dirixidas a apoiar ás entidades que actúan no ámbito da discapacidade, como a nova orde de axudas para a adquisición de vehículos adaptados, dotada de 3,6 millóns de euros e das que se beneficiarán 80 entidades, entre elas Aceesca.

Pola súa banda, o alcalde agradeceu a axuda da Xunta de Galicia para poder facer realidade este ilusionante proxecto e destacou a importancia de que todas as administracións se impliquen para facer posible que esta asociación poida levar a cabo as súas iniciativas, todas elas en beneficio das persoas con discapacidade intelectual do Porriño e tamén da contorna. O rexedor concluíu reiterando que a man do Concello estará tendida para Aceesca sempre que a necesiten.

 

Ceamsa doa 150 lotes de Nadal a SOS Porriño

A empresa Ceamsa (Compañía Española de Algas Marinas SA) vén de doar 150 lotes de produtos de Nadal ao Concello do Porriño destinados ao servizo municipal de alimentos SOS Porriño. O alcalde, Alejandro Lorenzo, e o concelleiro de Servizos Sociais, Abel Estévez, recepcionaron hoxe os alimentos que serán entregados ás familias máis necesitadas do municipio.

Os representantes municipais recibiron esta mañá a doazón de mans de Jorge Trigo, responsable de Ceamsa, a quen agradeceron este xesto solidario.

“Con accións como estas contribuímos a que estas familias que están a pasar momentos difíciles pasen un pouco mellor o Nadal”, afirmou o alcalde, “É de agradecer que as empresas colaboren con nós para poder axudar a todas as persoas que o necesitan e Ceamsa é un claro exemplo de compromiso e implicación coa sociedade porriñesa. A sensibilidade que demostra coas súas doazóns ao banco de alimentos durante todo o ano adquire se cabe máis valor nestas datas”.

Pedaleando contra a ELA

Coincidindo co Día Mundial da ELA, que se celebra cada 21 de xuño, o porriñés José Manuel Domínguez “Tonono Bike” deu hoxe a primeira pedalada do seu reto persoal e social: 6000 km pola ELA.

Foi na praza Arquitecto Antonio Palacios, de onde partiu hoxe en bicicleta co obxectivo de recaudar polo menos 6.000 euros para axudar aos enfermos de ELA e ás súas familias, tantos como kilómetros percorrerá durante seis meses visibilizando unha enfermidade que afecta a moitas persoas.

O alcalde, Alejandro Lorenzo, o concelleiro de Deportes, Abel Estévez, a concelleira de Sanidade, Carolina González, Pilar Guimeráns, representante de AGAELA , familiares e amigos, acompañaron a Jose neste importante momento.

“Coa miña bicicleta e o voso apoio percorrerei o perímetro de España para conseguir fondos que se destinarán na súa totalidade a axudar ás persoas que padecen esta enfermidade”, explicou Jose, “Sei de primeira man o necesaria que esta axuda para que estas persoas teñan unha vida digna, xa que está a afectar a un familiar e amigo, e penso que somos nós, os que gozamos de saúde, os que dalgún xeito debemos colaborar con eles”.

Por iso Jose, músico de profesión, adica a metade do ano ao seu traballo e a outra metade a loitar contra a Esclerose Lateral Amiotrófica (ELA) a golpe de pedal.

“O que vai facer Jose é digno de admiración, o seu altruismo e compromiso merece o respaldo de todos e todas, e que en cada pedaleo sinta que dende o Porriño o estamos apoiando”, afirmou Alejandro Lorenzo, “Por iso é necesario que todos e cada un de nós colaboremos na campaña de crowdfunding e difundamos o seu reto para que todo aquel que queira poida sumarse”.

A recaudación de fondos está a facerse a través da plataforma de crowdfunding Migranodearena :  https://www.migranodearena.org/reto/pedalear-6000-km-x-6000-x-ela. A totalidade do recaudado destinarase a axudar aos enfermos de ELA e ás súas familias a través da Asociación Galega de Esclerose Lateral Amiotrófica (AGAELA).

A casa consistorial ilumínase pola ELA

O Concello do Porriño sumouse hoxe á campaña #LuzporlaELA impulsada por AGAELA en colaboración coa Confederación Nacional de Entidades de ELA (ConELA) con motivo do Día Mundial da ELA.  Hoxe a casa consistorial ilumínase en verde xunto a decenas de edificios e monumentos de toda España para visibilizar esta enfermidade e apoiar ás persoas, concienciando á sociedade sobre as dificultades que conleva no día a día.

Sobre a ELA

A ELA é unha enfermidade nerodexenerativa incurable, progresivamente incapacitante e mortal nun prazo de 3 a 5 anos dende o seu diagnóstico, pero isto son só datos obxectivos da enfermidade. A realidade é que en España cada día diagnostícanse tres novos casos de Esclerose Lateral Amiotrófica e falecen outras tres persoas en silencio.

A isto hai que sumar o custe medio dos coidados das persoas con ELA, que alcanza cifras moi elevadas anualmente, o que supón un problema económico inasumible para a mayoría das familias. A dificultade de detectar os síntomas iniciais a nivel de atención primaria e a complexidade do diagnóstico diferencial demoran usualmente o diagnóstico. En España, o tempo medio desde o primeiro síntoma ata o diagnóstico definitivo supera o ano.

Por iso, é importante potenciar a innovación e a tecnoloxía, apoiar e fomentar a investigación que nos permitirá atopar a orixe, o diagnóstico rápido e a cura.

 

 

 

 

 

O Porriño proxecta a construción do seu primeiro centro residencial de maiores

O Concello do Porriño proxecta a construción dun centro residencial para maiores con capacidade para 24 usuarios/as. Un proxecto que foi presentado ao Consorcio Galego de Servizos de Igualdade e Benestar para a súa financiación a través dun convenio con cargo a fondos europeos.

“Trátase dun proxecto ambicioso que ascende a 1,2 M de euros, pero que supoñerá un salto cualitativo na atención aos nosos maiores”, explicou o rexedor, Alejandro Lorenzo, “Traballamos e seguiremos traballando para conseguir inversións que melloren a calidade de vida da veciñanza do Porriño”.  

A residencia ubicaríase na parroquia de Budiño, nunha parcela de titularidade municipal situada na marxe do Polígono Industrial SUR PPI-6 de máis de 4.000 m2.

“O centro residencial que propoñemos evoca a idea dunha gran vivenda na que os inquilinos farían vida familiar, cun porche exterior, un xardín para pasear e un bosque que os separía do polígono industrial e daría intimidade aos residentes” , apuntou Lorenzo, “Trátase de que se sintan integrados no barrio, como un veciño máis”.

As instalacións, de planta baixa, contarían con doce habitacións dobres dotadas de baño propio, salón de perruquería, multiusos, comedor… Como explicou o rexedor, a zona axardinada será parte importante.  Todo o necesario para garantir a confortabilidade dos usuarios e usuarias.

O autobús de “Coidados porta a porta” chega ao Porriño para ofrecer servizos de podoloxía, audioloxía e estimulación da memoria

O alcalde do Porriño, Alejandro Lorenzo, acompañado pola delegada territorial da Xunta en Vigo, Marta Fernández-Tapias, o director xeral de Maiores e Persoas con Discapacidade, Fernándo González Abeijón, e os concelleiros Abel Estévez, Rosario Costas e Carolina González, vistou hoxe o autobús de Coidados Porta a Porta, que está a ofrecer servizos de podoloxía, audioloxía e estimulación da memoria ás persoas maiores da localidade xeito gratuíto.

Segundo informaron, as citas están completas os catro días que a unidade móbil permanecerá no Porriño, no aparcamento da Piscina Municipal.

“É unha iniciativa pioneira que aplaudimos chegue ao Porriño e que está a ter moita demanda”, explicou o alcalde, “Desde o Concello volcámonos especialmente na atención aos nosos maiores e en poñer á súa disposición todas as ferramentas que estén ao noso alcance para mellorar a súa calidade de vida”.

Neste sentido, cabe destacar que o novo executivo puxo en marcha a tal fin a concellería de Terceira Idade, un departamento específico que traballa de maneira transversal co resto das áreas para dar resposta ás necesidades das persoas maiores e garantizar que a localidade ofreza a calidade de vida que estes merecen. 

16 persoas maiores de 55 anos participan en “Cultiva a mente” no Porriño

Como cada luns, o centro sociocomunitario do Porriño acolle os obradoiros “Cultiva a mente”, organizados polo Concello do Porriño en colaboración con AFAGA. Nos mesmos, participan 16 persoas maiores de 55 anos que hoxe recibiron a visita do  alcalde do Porriño, Alejandro Lorenzo, a concelleira de Terceira Idade, Rosario Costas, e o presidente de AFAGA, Juan Carlos Rodríguez.

 “Desexo que esta actividade vos resulte útil e que vos achegue as ferramentas necesarias para disfrutar desta etapa da vida que, de seguro, garda momentos incribles para vós”, apuntou o  rexedor.

Trátase dunhas xornadas impartidas por un psicólogo con formación específica no desenvolvemento e execución do deterioro cognitivo nas que se abordan cuestións como o envellecemento activo, a promoción das relación sociais e a prevención da soidade ou a dependencia, entre outras cuestións.