Turismo

O Porriño
Novas
Turismo

O Porriño celebra a tradicional “Festa dos Cachos” este domingo 10 de maio

O Porriño, 7 de maio de 2026. – A vila do Porriño prepárase para recibir unha das citas gastronómicas máis senlleiras do calendario primaveral: a Festa dos Cachos 2026, que é en realidad a festa do centolo que se comerá este domingo a un prezo de sete uros na tradicional “carpa dos cachos”. Organizada pola Asociación de Veciños de San Benito e San Sebastián, en colaboración co Concello do Porriño e a Deputación de Pontevedra, esta xornada promete converter a localidade no epicentro do sabor mariñeiro.

O evento terá lugar este domingo, 10 de maio, ofrecendo aos asistentes a oportunidade de degustar este prezado marisco (centola) en diferentes modalidades e prezos populares.

Programación e Degustación

A xornada estará dividida en dous espazos principais para garantir que ninguén quede sen a súa ración:

A partir das 12:00 h, na Carpa: Abrirá a “Carpa dos Cachos” con venda directa ao público. A oferta gastronómica completarase coa presenza dunha pulpeira e unha rosquilleira, todo isto amenizado por animación de rúa para crear un ambiente festivo e familiar. Haberá tamén empanada. O prezo da degustación dos cachos na carpa será de 7 €.

A partir das 13:00 h, nos Restaurantes: A festa trasládase tamén á hostalería local. Os establecementos participantes, “Pinzas” (Rúa Leandro Diz) e “O Xantar de Pepa” (Rúa Pío XII), ofrecerán o servizo de cachos cun prezo de 8 €.

Un impulso á cultura e á tradición local

A historia desta festa vén de lonxe, remóntase á resistencia porriñesa para evitar a entrada dos franceses na vila. Para conmemorar aquel momento histórico levantouse un cruceiro no Porriño e, ao redor del, foi crecendo un barrio que se converteu nun dos máis emblemáticos da vila.

Honrando ao Cristo dos Aflixidos comezou a celebración dunha festa en maio e aos elementos relixiosos fóronse sumando outras actividades de lecer, entre elas, a parte gastronómica coas centolas como protagonistas; un marisco que aquí chamamos “cachos” como se coñece desde entón ao barrio.

08/05/2026 in Cultura e festas, Parroquias, Patrimonio Municipal, Turismo

Máis de medio cento de expositores e centos de visitantes déronse cita na II Mostra da Camelia do Porriño

O Porriño, 13 de abril de 2026. Un total de 105 metros lineais de camelia tinguiron de cores a carpa habilitada no parque do Cristo, onde máis de medio cento de expositores —unha decena máis que o ano pasado— luciron os seus mellores centros. A mostra superouse nesta segunda edición e quedou “xa consolidada”, segundo asegurou o vicepresidente da Sociedade Española da Camelia, Antonio Luis Montes, durante a inauguración do sábado.

O éxito de participación non só se viu nos postos, senón tamén na resposta do público: centos de persoas acudiron ao parque do Cristo para contemplar esta nova edición, enchendo o recinto de actividade durante toda a xornada.

Unha cita con proxección internacional

Xunto a Montes, participaron no acto o concelleiro de Festas, Bienvenido Estévez; a organizadora da mostra, Matilde Campos; e o alcalde do Porriño, Alejandro Lorenzo. O rexedor agradeceu a implicación dos expositores, que chegaron de diferentes puntos da xeografía galega e incluso de Portugal.

Lorenzo convidou a todos os presentes a desfrutar do municipio e presumiu do potencial local e dunha nova cita que axuda a desestacionalizar ás visitas no municipio. “Se queres té, está aquí no Porriño; se queredes unha bola de pan, vinde ao Porriño; se queredes unha casa de pedra, facédela de Rosa Porriño e, para adornalo, mellor que as camelias do Porriño non vai haber”.

Entre aplausos, o alcalde insistiu en que “O Porriño é o mellor lugar para vivir” e lembrou que esta próxima fin de semana o municipio acollerá outra cita clave: a Feira Apícola das Rías Baixas.

Exposicións complementarias

A II Mostra da Camelia conviviu coa Exposición das Camelias dos galegos e as galegas, que permaneceu aberta aínda ata este martes, 14 de abril na praza Arquitecto Antonio Palacios, estendendo así a beleza desta flor polo centro da vila.

13/04/2026 in Cultura e festas, Turismo, Urbanismo, comercio e industria

O Porriño convértese de novo na capital do mel: ciencia, gastronomía e tradición únense nun programa único

Unhas Xornadas Internacionais de Apicultura serán a antesala no Porriño da XXXVIII Feira Apícola
A vila ofrecerá showcookings, catas comentadas, rutas de tapas e actividades infantís os días 17 e 18 de abril

O Porriño, 9 de abril de 2026. Un ano máis o sector apícola ten como sede O Porriño na que é unha das citas máis lonxevas e senlleiras nesta materia: a Feira Apícola, que chega este ano a súa trixésima oitava edición. Unha cita que se celebrará o 17 e 18 de abril cun programa que abrangue dende a investigación científica ata a música en directo.

“Se hai mel hai futuro”, aseguraba o alcalde do Porriño, Alejandro Lorenzo durante a presentación, facendo unha comparativa en como segue crecendo esta feria case ao mesmo ritmo que crece a natalidade no municipio. Destacaba ademáis a as actividades para grandes e para maiores, con citas culinarias, pero tamén “o peso importantísimo da investigación e da búsqueda de solución aos problemas que ameazan a nosa mel, durante as xornadas internacionais de apicultura”.

Xunto a él, a Presidenta da Indicación Xeográfica Protexida Mel de Galicia, Esther Ordoñez, que destacou que levan “38 anos apostando polo Porriño porque eles tamén apostan por nós”, e o Presidente da Agrupación Apícola de Galicia, José María Seijo, que engadiu que aínda que a feira naceu para vender este producto, agora véndese só, con premios internacionais alí onde se presenta”. Ademais a concelleira de Turismo, Vanessa Ucha puña en valor esta cita como unha máis do calendario que “serve para seguir desestacionalizando o turismo no Porriño, poñéndonos no mapa”.

O venres 17 hai actividades xa para a cativada pola mañá, con “Os nenos e o mel de Galicia”, onde poderán coñecer o fermoso mundo da apicultura e todos os beneficios que as abellas nos aportan. Ademais poderán participar nunha degustación comentada. Tamén o venres, e para toda a familia, comenza a ruta de tapas, con diferentes locais participantes ofrecendo distintos petiscos. Unha ruta que se extenderá o sábado.

Un sábado para os sentidos

O sábado o programa desprégase en diversas frontes para todos os públicos:

Ás 11:30 h teremos gastronomía en directo: O recoñecido chef da TVG, Xulio Mato, ofrecerá un showcooking con propostas sinxelas para incorporar o mel na cociña diaria.

Ás 12:30h, unha viaxe sensorial a través dos meles con IXP e DOP: Unha oportunidade para descubrir todos os matices do mel, a través dunha cata comentada das diferentes variedades pertencentes á IXP Mel de Galicia e á DOP Miel de la Alcarria. Con Beatriz Ríos Cebreiros, Técnica e formadora do Panel de Cata da IXP Mel de Galicia e Amelia V. González Porto, directora do Laboratorio de Produtos da Colmea, CIAPA-IRIAF.

Xa pola tarde, ás 17:00 h, haberá unha cata comentada dos queixos premiados nas Catas de Galicia 2025 : Coñeceremos e probaremos os queixos galegos distinguidos na XXVII Cata dos Queixos de Galicia da man de Salomé Beiroa Fernández , catadora do Panel de Cata da Xunta de Galicia

E non podía faltar o pan: ás 18:30, Pan do Porriño e Mel de Galicia: Degustación das diferentes variedades do Pan do Porriño con Mel de Galicia, a cargo da Asociación de Panadeiros do Porriño e a IXP Mel de Galicia.

Ademáis haberá un sorteo de lotes de productos de orixe galega con selo de calidade para que merque nos establecementos asociados.

Xornadas internacionais de apicultura

Pero ademais o sábado, entre as 10.00h e as 17:00h, celébranse as Xornadas Internacionais de Apicultura, onde diferentes expertos abordarán temas críticos como a loita contra a Vespa velutina, a resistencia da Varroa e a preocupante mortalidade invernal de 2025.

Logo da apertura, ás 10:00h, será Damián Copena Rodríguez, profesor da Universidade de Santiago de Compostela, o primeiro experto en abordar un dos temas da xornada, co foco no patrimonio industrial apícola e cereiro no noroeste da Península Ibérica, unha peza clave para entender a evolución económica e cultural desta actividade na rexión.

Ás 11:30h a veterinaria, especializada en apicultura de Asociación de Apicultores de Guadalajara, Loa Moreno Romero, falará do control da varroa, tratamentos eficaces e manexo intelixente do colmar. Así, a xornada técnica mergullarase de cheo nos desafíos sanitarios que máis preocupan aos produtores hoxe en día, coa doutora Sara Hernández Rodríguez (Universitat de València) expoñendo ás 12:30h as claves para un manexo intelixente do colmear e os últimos avances na detección de resistencias aos acaricidas, un factor crucial para evitar perdas masivas.

Logo do descanso para xantar, ás 17:00h, a investigadora Soraia Sousa Santos, da Universidade de Coimbra, analizará a eficacia dos pesticidas e as estratexias actuais para frear a expansión da vespa velutina. Xa ás 18:30h o punto álxido das xornadas terá lugar pola tarde cunha mesa redonda con representantes das principais asociacións galegas (Agrupación Apícola, AGA, APLA, Goente, Abellas Nais), xunto a organizacións portuguesas (Apimil, Apicave) e españolas (Asociación de Apicultores de Guadalajara), analizarán as causas e consecuencias da problemática da mortalidade invernal 2025.

Este espazo de debate busca compartir experiencias e buscar solucións conxuntas ante un fenómeno que está a poñer en xaque a viabilidade de moitas explotacións.

Ademais haberá música en directoo sábado na hora do vermú para amenizar o ambiente na praza do Concello a cargo de Somoza Trío.

09/04/2026 in Cultura e festas, Turismo

O Porriño convértese nun museo ao aire libre coa mostra “Rostros” de Afundación

O Concello do Porriño reforza a súa aposta pola cultura de proximidade transformando durante o mes de abril o Parque do Cristo nunha galería de arte urbana, coa colaboración con ABANCA e Afundación

O Porriño, 1 de abril de 2026. O Parque do Cristo transfórmase este mes de abril nunha galería de arte de excepción. A exposición “Rostros”, froito da colaboración estratéxica entre o Concello do Porriño, ABANCA e Afundación, achega á rúa unha selección imprescindible de obras que percorren a historia do retrato en Galicia. Desde o realismo de Sotomayor ata a modernidade de Maruja Mallo ou Laxeiro, a mostra convida á veciñanza a redescubrir os seus espazos habituais a través da mirada dos grandes mestres, convertendo un paseo cotián nunha experiencia cultural de primeiro nivel.

Esta mostra, ao abeiro do proxecto Corrente Cultural, nace para dar a coñecer a nosa arte desde o corazón das vilas, nas rúas. Unha selección de obras de diferentes autorías, atesouradas nas coleccións de arte de ABANCA e Afundación, adáptanse a formato fotográfico para exhibiren o mellor do xénero do retrato. “É un orgullo para O Porriño converterse no escenario desta ‘Corrente Cultural’. Queremos que a arte non estea pechada entre catro paredes, senón que forme parte viva do noso día a día. Traer os rostros de artistas como Seoane ou Lamazares ao Parque do Cristo é unha aposta decidida por democratizar a cultura e poñer o noso concello no mapa das grandes exposicións de Galicia” asegura o alcalde do Porriño que convida a todos os porriñeses e porriñesas a que “se deteñan, miren a estes ollos que nos falan desde o pasado e o presente, e desfruten deste privilexio no corazón da nosa vila.”

O acto de inauguración tivo lugar este mércores 1 de abril, na Praza do Cristo do Porriño e contou coa asistencia do alcalde do Concello do Porriño, Manuel Alejandro Lorenzo; a subdirectora da oficina de ABANCA no Porriño, María Cristina Rodríguez

Real; o xestor especialista da oficina de ABANCA no Porriño, Abel Gallego Rodríguez; e a coordinadora adxunta da Área de Cultura de Afundación e Responsable de Exposicións, Paloma Vela. Vera explicou que “estas imaxes abranguen 120 anos de arte, dende o romanticismo ao naturalismo, as vangardas… para que cada un descubra cal é a linguaxe que máis lle interesa”.

Artistas

O retrato na mostra

Considérase retrato a imaxe dunha persoa reproducida en pintura, escultura, debuxo ou fotografía, que describe a aparencia e o carácter do individuo representado. Ao longo da historia da arte, o retrato foi un dos xéneros de maior prestixio, cuxo interés radica en que non só se trata dunha representación do individuo, senón que tamén nos fala das diferentes épocas históricas, os seus códigos e os seus sinais de identidade. Hoxe en día, as imaxes de rostros enchen as nosas pantallas, dende as redes sociais ata as campañas publicitarias na Internet ou na televisión ou en medios escritos, e reflexan a nosa sociedade globalizada e conectada. Os selfies da era dixital democratizan a arte do autorretrato, xogando un importante papel na construción de identidades persoais e colectivas.

Esta mostra invita a explorar as diferentes e fascinantes interpretacións que as e os artistas fixeron (e fan) deste xénero, mergullarnos nas lembranzas das xentes que evocan, nas sensacións que transmiten, e nas novas fórmulas que foron introducindo desde finais do século XIX ata os nosos días, ao compás dos movementos artísticos que se van sucedendo.

01/04/2026 in Cultura e festas, Parroquias, Patrimonio Municipal, Turismo

O Concello do Porriño pon en marcha autocares gratuítos para visitar as luces do Nadal os días 23 e 29 de decembro

O Porriño, 22 de decembro de 2025. – O Concello do Porriño volverá poñer en marcha neste Nadal o servizo de autocares gratuítos para facilitar á veciñanza o acceso á iluminación e á decoración de Nadal da vila, repetindo unha iniciativa que contou cunha excelente acollida o pasado ano.

O servizo estará operativo os días 23 e 29 de decembro, permitindo que persoas de distintos puntos do municipio poidan desprazarse comodamente ata o centro do Porriño para gozar das luces de Nadal, do ambiente festivo e das actividades programadas durante estas datas.

Esta acción ten como obxectivo achegar as parroquias ao centro urbano, evitando desprazamentos en vehículo privado, mellorando a seguridade viaria e favorecendo a participación, especialmente das persoas maiores de 65 anos, cunha proposta accesible, cómoda e segura.

O servizo organizarase en dúas liñas diferenciadas.

A Liña 1, con saída desde Chenlo, realizará o percorrido Chenlo – Mosende – Pontellas – Torneiros – Carracido, con saída ás 17:00 horas e regreso ás 20:00 horas. Os puntos de recollida serán: Igrexa de San Xoán de Chenlo e Canadelo; Igrexa de San Xurxo de Mosende; Centro Cultural de Pontellas e parada de autobús de Arrotea; Igrexa de San Salvador de Torneiros, Froiz Torneiros e Campo de Fútbol Lourambal; e a A.V.C. As Mimosas de Carracido.

A Liña 2, con saída desde Budiño, percorrerá Budiño – Atios – Cans, con saída ás 18:00 horas e regreso ás 21:00 horas. En Budiño, as paradas serán Orbenlle (Café Chimay), parada de autobús de Cerquido, Capela de San Blas, Centro Recreativo Cultural Mosteiro, farmacia, Centro Cultural Cruz e parada de Vaquería; en Atios, Centro Cultural de Atios, Igrexa de Santa Eulalia, parada de Vilafría, Outeiro, Covelo e Casa Cultural de Chenlo; e en Cans, Bar Fortes.

Os autocares terán como destino o centro da vila, onde a veciñanza poderá pasear polas rúas decoradas, contemplar a iluminación de Nadal e desfrutar do ambiente propio destas datas.

O alcalde do Porriño, Alejandro Lorenzo, sinala que “con este servizo queremos que todo o mundo poida vivir o Nadal do Porriño, independentemente de onde viva. É unha iniciativa pensada para facilitar os desprazamentos, compartir momentos en familia e seguir facendo do Nadal unha celebración próxima, inclusiva e para todos”.

Desde o Concello destacan que esta iniciativa se enmarca na aposta por un Nadal inclusivo, sostible e pensado para todos, ao tempo que contribúe á dinamización social e comercial do municipio durante o período festivo.

22/12/2025 in Cultura e festas, Sen categoría, Turismo

O Concello organiza tres excursións ecoturísticas durante o mes de novembro para maiores de 55 anos

Serán os días 4, 11 e 19 e combinarán unha visita á planta de Sogama con percorrido polas cidades da Coruña e Santiago de Compostela e ao Pazo de Oca, na Estrada
Os formularios de inscrición estarán xa dispoñibles a partir de mañá martes no Concello e o prazo para anotarse abre o xoves 30 de outubro

O Porriño, 27 de outubro de 2025.- O Concello do Porriño continúa coa organización de viaxes dirixidas a persoas maiores de 55 anos. Así, para o vindeiro mes de novembro están programadas tres excursións ecoturísticas co obxectivo de fomentar a educación ambiental e o turismo sostible entre a veciñanza.

As saídas celebraranse os días 4, 11 e 19 de novembro e combinarán unha visita ao Complexo Medioambiental de Sogama, en Cerceda, cun percorrido por diferentes puntos de interese das provincias da Coruña e Pontevedra: a cidade da Coruña, a Santiago de Compostela e o Pazo de Oca, na Estrada.

Esta proposta, totalmente de balde para os participantes, busca concienciar sobre a importancia da separación correcta dos residuos, a redución do lixo e o consumo responsable, ofrecendo ao mesmo tempo unha experiencia educativa e cultural nunha das instalacións máis avanzadas de Galicia en xestión ambiental.

Durante a visita a Sogama, que se enmarca na nova campaña de residuos que vén de presentar o Concello nos últimos días, as persoas participantes poderán asistir a unha charla formativa, experimentar unha inmersión virtual polas instalacións mediante lentes de realidade aumentada, participar nun xogo interactivo sobre reciclaxe e realizar un percorrido guiado pola planta de tratamento de residuos, o laboratorio e a sala de control.

A continuación, cada xornada completarase cun xantar incluído e unha visita guiada polos principais puntos de interese turístico e patrimonial das cidades. Na Coruña, o día 4, coñecerase a contorna da Torre de Hércules, o paseo marítimo e o casco histórico. En Santiago de Compostela, o día 11, realizarase un percorrido pola Praza do Obradoiro, a Catedral e as rúas do centro histórico. E o 19, no Pazo de Oca, as persoas participantes poderán desfrutar dos seus impresionantes xardíns históricos e do seu patrimonio natural e arquitectónico, coñecido como o “Versalles galego”.

O alcalde Alejandro Lorenzo destacou que “apostamos por actividades que acheguen á cidadanía ao coidado da súa contorna dun xeito práctico e útil. Estas excursións combinan a educación ambiental coa posta en valor do noso patrimonio, ofrecendo unha experiencia completa e enriquecedora”.

As prazas son limitadas, polo que será necesaria inscrición previa. As persoas interesadas poden recoller a partir de mañá martes o formulario que deberá entregar cuberto a partir do xoves, 30 de outubro, no Rexistro do Concello.

27/10/2025 in Medio Ambiente, Turismo

O Concello mellora a accesibilidade e posta en valor da lagoa de Orbenlle no espazo Rede Natura

O alcalde Alejandro Lorenzo visitou a zona tralos traballos de acondicionamento para o seu uso público realizados ao abeiro dos fondos Next Generation
A actuación que supuxo unha inversión de 34.000 euros permitiu crear un percorrido circular, eliminar elementos degradados e instalar paneis informativos
O proxecto supón un importante impulso para o turismo sostible e de natureza no Porriño

O Porriño, 23 de outubro de 2025.- O Concello do Porriño avanza na conservación do seu patrimonio natural co remate dos traballos de mellora e posta en valor da lagoa de Orbenlle, situada dentro do espazo protexido Rede Natura 2000 “Gándaras de Budiño”. Esta mañá, o alcalde Alejandro Lorenzo e os concelleiros Antía Carrera e Carlos González visitaron a zona para comprobar o resultado das actuacións executadas. A intervención, que tivo un custe total de 34.004,24 euros, foi realizada polo Grupo de Desenvolvemento Rural GDR do Baixo Miño, financiándose ao 100% con cargo ao orzamento reprogramado asignado para o desenvolvemento da “Actuación rexeneración e adecuación do destino para mitigar o cambio climático. Outras actuacións de protección da natureza e a biodiversidade, patrimonio e recursos naturais, infraestruturas verdes e azuis”, no marco do Plan de Recuperación, Transformación e Resiliencia da Unión Europea – Next Generation EU.

“Este tipo de actuacións axudan a coidar e achegar o noso patrimonio natural á veciñanza”, sinalou o alcalde Alejandro Lorenzo. “A lagoa de Orbenlle é un espazo cada vez máis visitado e agora conta cun percorrido accesible e contidos interpretativos que axudan a comprender o seu valor ambiental”.

Pola súa banda, a concelleira Antía Carrera destacou que “foi posible recuperar unha zona degradada, eliminar unha estrutura en ruínas e dotar o espazo de mellores condicións para a súa conservación e desfrute, sen esquecer a importancia que ten para especies singulares como o sapoconcho europeo”.

As actuacións levadas a cabo centráronse na mellora da contorna da lagoa e na ordenación dos seus usos recreativos, sen perder de vista os principios ambientais e o respecto ao ecosistema. Así, os traballos incluíron a demolición dunha antiga caseta de bloques en estado ruinoso e retirada dos seus restos con xestión autorizada dos residuos; a roza manual e apertura dun percorrido circular ao redor da lagoa, abríndose ocos na vexetación da contorna da lagoa que permiten achegarse con facilidade ao borde da mesma; instalación dunha pasarela de madeira elevada, que permite superar un tramo inundable e serve tamén como punto de observación e colocación de material interpretativo, con contidos que fan resaltar a importancia medioambiental destes recursos para especies de aves, anfibios e réptiles como o sapoconcho europeo. Así, por unha parte instálase un panel, no acceso ao espazo, e unha mesa, na pasarela de madeira, interpretativos, coas características do percorrido, datos de interese, información ambiental e os elementos máis destacados do espazo Rede Natura; e por outra banda, un panel interactivo de cubos, pensado para público infantil e familiar, cun xogo educativo sobre especies da zona: aves, anfibios e réptiles

O prazo de execución da obra é de catro meses e unicamente resta a colocación deste material interpretativo que se levará a cabo nos vindeiros días.

Impulso turístico

Este proxecto supón un importante impulso para o turismo sostible e de natureza no Porriño, ao poñer en valor un dos espazos ambientais máis singulares do municipio. A lagoa de Orbenlle, situada no LIC Gándaras de Budiño e dentro da Rede Natura 2000, convértese así nun atractivo turístico e educativo, que permitirá descubrir a riqueza da nosa biodiversidade e o patrimonio natural do territorio.

A actuación contribúe tamén a reforzar o xeodestino “A Despensa de Galicia”, ofrecendo novos recursos vinculados ao ecoturismo, ás rutas interpretativas e á posta en valor dos valores naturais e paisaxísticos de O Porriño, consolidando o seu papel dentro do mapa turístico provincial e galego.

23/10/2025 in Medio Ambiente, Turismo

Máis de 150 maiores do Porriño participan na excursión ao Carballiño, Ourense e Ribeira Sacra logo de triplicarse as prazas pola alta demanda

A elevada acollida da iniciativa fixo que o Concello ampliase as prazas previstas, organizando finalmente tres autobuses para atender todas as solicitudes recibidas
O alcalde, Alejandro Lorenzo, despediu ao grupo na saída, e cinco concelleiros acompañan ás persoas participantes durante toda a xornada

O Porriño, 20 de outubro de 2025.- O Concello do Porriño organizou este luns unha exitosa excursión turística á Ribeira Sacra, O Carballiño e Ourense, que contou con máis de 150 participantes maiores de 55 anos, unha cifra que se viu triplicada respecto da inicialmente prevista ao rexistrar unha alta demanda por parte da veciñanza. A viaxe, promovida pola Concellería de Turismo, tiña previsto un único autobús, pero a excelente acollida da iniciativa levou ao Concello a reforzar os medios dispoñibles e mobilizar tres autobuses, permitindo así que todas as persoas inscritas puidesen desfrutar da xornada.

O alcalde do Porriño, Alejandro Lorenzo, achegouse ao Pavillón de Deportes esta mañá para despedir ao grupo antes da saída, momento no que destacou o valor destas iniciativas. “Estamos moi orgullosos da acollida que tivo esta excursión. Estas actividades non só permiten descubrir o noso patrimonio cultural e natural, senón que fomentan a convivencia, o envellecemento activo e a conexión entre a veciñanza. O feito de ter que triplicar as prazas é unha mostra clara do interese da cidadanía por participar e seguir implicada na vida do municipio”, sinalou o rexedor.

Durante toda a xornada, cinco concelleiros do equipo de goberno acompañaron ás persoas participantes, compartindo con elas as visitas culturais e o paseo fluvial. O itinerario incluíu a visita ao Templo da Vera Cruz no Carballiño, obra emblemática de Antonio Palacios, unha visita guiada pola cidade de Ourense e unha travesía en barco polos Canóns do Sil, un dos paraxes naturais máis espectaculares de Galicia.

Desde o Concello do Porriño reiteran o seu compromiso de continuar promovendo actividades culturais, de lecer e de dinamización social dirixidas especialmente á poboación maior, e destacan que novas propostas xa están a ser preparadas para próximas datas que se irán dando a coñecer, tanto a través dos medios de comunicación, web e redes sociais municipais, como por medio de circulares ás diferentes asociacións veciñais e a nova canle a través da cal todas as persoas que estean interesadas en recibir este tipo de información poidan ter un coñecemento inmediato e directo.

20/10/2025 in Turismo

O Concello organiza o vindeiro luns unha nova viaxe turística á Ribeira Sacra, O Carballiño e Ourense

A excursión, de balde, inclúe visitas culturais e un paseo en barco polos Canóns do Sil e está dirixida a persoas maiores de 55 anos que poden inscribirse a partir deste mércores no rexistro do Concello
O Concello reforza a súa aposta pola difusión cultural e abre unha nova canle de comunicación directa coa veciñanza para informar sobre actividades e iniciativas de lecer

O Porriño, 13 de outubro de 2025.- O Concello do Porriño, a través da Concellería de Turismo, volve poñer en marcha unha nova viaxe turística dirixida ás persoas maiores de 55 anos. Nesta ocasión, o destino será O Carballiño, Ourense cidade e un paseo en barco polos Canóns do Sil, o vindeiro luns, 20 de outubro, con saída ás 10.15 horas dende o pavillón de Deportes.

A xornada inclúe a visita ao Templo da Vera Cruz, unha das obras máis emblemáticas do arquitecto Antonio Palacios, orgullo e referente do patrimonio galego, así como unha visita guiada pola cidade de Ourense e unha travesía fluvial polo Sil, para gozar da natureza e das vistas espectaculares dos seus canóns.

O alcalde, Alejandro Lorenzo, destacou que “estas viaxes, ademais de promover o turismo de proximidade e o coñecemento da nosa terra, ofrecen ás persoas maiores unha marabillosa oportunidade para convivir, descubrir novos lugares e seguir activos”. Pola súa parte, a concelleira de Turismo, Vanessa Ucha, sinalou que “cada edición destas viaxes ten unha acollida excelente e esta promete ser unha das máis especiais pola beleza do itinerario e o vínculo con Antonio Palacios”.

As inscricións abriranse o mércores, 15 de outubro, e poderán realizarse no Rexistro Xeral do Concello, por orde de inscrición ata completar as 50 prazas dispoñibles. Cada persoa poderá presentar unha única solicitude.

Dende o Concello do Porriño séguese promovendo iniciativas de lecer e carácter cultural como esta. “A aposta por achegar a cultura á veciñanza continuará sendo unha prioridade dentro da programación municipal”, subliña o alcalde incidindo neste sentido en que “dende o Concello, ademais de divulgar todas estas iniciativas a través dos medios de comunicación, webs e redes sociais, tamén llo trasladamos ás diferentes asociacións veciñais para que teñan un coñecemento inmediato e directo e agora ademais abrimos unha nova canle a través da cal todas as persoas que estean interesadas en recibir este tipo de información no lo trasladen, rexistrando esa petición, para a partir de aí recibir persoalmente tódolos avisos respecto da posta en marcha de actividades como estas nas que pode participar”.

13/10/2025 in Turismo

Regueifa de voda con Pan do Porriño

Combinación de música, baile e gastronomía para abrir a VII Feira do Pan do Porriño, que se celebra ao longo de toda a xornada de hoxe na Praza Arquitecto Antonio Palacios
O alcalde Alejandro Lorenzo foi o encargado de inaugurar o evento no que se homenaxea máis de catro séculos de historia e tradición panadeira

O Porriño, 11 de outubro de 2025.- A VII Feira do Pan do Porriño deu comezo esta mañá cun ambiente cheo de emoción, tradición e orgullo local. A praza Arquitecto Antonio Palacios converteuse no escenario perfecto para acoller unha apertura marcada pola cultura e a memoria colectiva, coa representación da “Regueifa de voda”, unha antiga danza galega que simboliza a unión e a celebración, e na que o Pan do Porriño ocupou un lugar central.

A posta en escena estivo a cargo da Asociación Cultural Sadeo, que fixo un percorrido pola tradición galega recuperando unha das expresións máis simbólicas do noso folclore: unha parella bailando mentres a bailadora porta sobre a cabeza unha bola de Pan do Porriño, nun xesto cargado de simbolismo e identidade. Antano, e na actualidade tamén, se a bola caía ao chan era sinal de agoiro para a parella. A regueifa bailada foi recollida en San Salvador de Pedreiro, Santa Comba, polos artistas Xisco Feijoó e Leni Pérez. A danza, acompañada por dúas pandereteiras, sorprendeu ao público asistente e serviu como inicio perfecto para unha xornada na que o pan é moito máis que alimento: é historia viva.

O alcalde do Porriño, Alejandro Lorenzo, foi o encargado de inaugurar a feira poñendo en valor o significado desta feira e, especialmente, a profunda tradición panadeira do municipio que comezou no século XVII coas fábricas de pan para abastecer ao exército da antiga provincia de Tui. “O Pan do Porriño non é só un produto, é parte da nosa historia e da nosa forma de entender a vida. Temos un pan que conta con máis de catro séculos de historia, documentado desde 1604, e iso é un patrimonio que debemos protexer e dar a coñecer. Gracias aos nosos panadeiros e panadeiras por manter vivo este oficio, por seguir elaborando un produto artesán que nos representa dentro e fóra de Galicia. Eles son os verdadeiros gardiáns desta tradición que hoxe celebramos”. O rexedor destacou que eventos coma este serven para “reforzar a nosa identidade e proxectar O Porriño como un destino que sabe a tradición, hospitalidade e boa mesa” e tamén agradeceu a colaboración da Axencia Galega de Calidade Alimentaria (AGACAL), da Consellería do Medio Rural, representada no acto por Juan José Cerviño, director xeral da PAC e do Control da Cadea Alimentaria.

Acto seguido, o público puido desfrutar dun showcooking con degustacións da man da recoñecida cociñeira Coque Fariña, que elaborou receitas a base de Pan do Porriño, poñendo en valor a súa versatilidade e calidade. Dende ás 13.30 horas estase a celebrar a tradicional feira e xantar popular de polbo e porco ao espeto, amenizada polo DJ Mus e xa pola tarde, a partir das 17.00 horas, chega a quenda dos máis pequenos da casa co obradoiro “Peque Pan”, onde, ataviados para a ocasión con mandil e gorro, aprenderán de forma divertida o proceso de elaboración do pan. Ás 18.30 horas realizarase a degustación “Experiencias de Calidade”, con produtos con Denominación de Orixe de Galicia, da man de Salomé Beiroa, actividade patrocinada por AGACAL. A xornada pecharase ao serán coa música en directo do grupo La Patrulla.

Ademais, ao longo de toda a xornada permanece aberto ao público o posto de venda da Asociación de Panadeiros do Porriño, onde se poden adquirir bolas de Pan do Porriño, exemplo perfecto do saber facer artesán local.

“Queremos que esta feira siga medrando, que cada vez máis xente descubra o Pan do Porriño e todo o que representa. Esta non é só unha festa, é unha homenaxe ao noso pasado e un compromiso co futuro”, concluíu o alcalde.

11/10/2025 in Cultura e festas, Turismo