Este xoves ponse en marcha o servizo de recollida de cartón

A Concellería de Limpeza, que dirixe José Carlos González, informou hoxe de que este xoves, día 16 de xuño, comeza a funcionar o servizo específico para a recollida de papel e cartón comercial do que poderán beneficiarse os establecementos comerciais do Porriño.

Os días establecidos para a recollida serán os martes e xoves. Neses días, a partir das 20 h os usuarios/as deberán depositar o cartón e papel de maneira ordenada ás portas dos seus establecementos, onde o servizo de limpeza municipal o recollerá para trasladalo á planta de reciclaxe.

Os comerciantes que queiran facer uso desta recollida  porta a porta deberá apuntarse chamando ao teléfono 665 571 555.

Coa posta en marcha deste servizo preténdese dar facilidades aos comerciantes para reciclar correctamente e tamén evitar que se acumule na rúa ou nos outros contedores.

Os colexios do Porriño implícanse coa compostaxe

Os nenos e nenas do CEIP da Ribeira mergúllanse no mundo da compostaxe da man do Concello do Porriño. O alumnado do centro participou esta semana na “Posta en marcha do composteiro” e, da man da técnico de medio ambiente, montaron o seu propio composteiro para o cole.

As rapazas e rapaces, moi implicados e voluntariosos, aprenderon cal é a utilidade deste elemento no seu colexio, que se pode botar dentro e que non, como traballar con el e que tipo de tarefas son necesarias para que o proceso de compostaxe sexa o correcto, como tapar ben con estruturante a materia orgánica, remexer e regar de cando en vez… Posteriormente, realizarán xuntos o baleirado para que comproben o froito do seu traballo e coñezan os usos do compost.

As concellerías de Medio Ambiente e Limpeza, que dirixen Antía Carrera e Jose Carlos González, están volcadas no fomento da reciclaxe no municipio e parte importante deste empeño é a sensibilización e formación dos máis pequenos. Por iso, están programadas máis actividades educativas nos centros escolares do Porriño adaptadas ás necesidades de cada un deles.

 

 

 

O Porriño pon en marcha un novo servizo de recollida de cartón comercial

O Concello do Porriño continúa coa súa aposta pola reciclaxe e a favor do medio ambiente poñendo en marcha un servizo específico para a recollida de papel e cartón do que poderán beneficiarse os establecementos comerciais do municipio.

O concelleiro de Limpeza, José Carlos González, informou hoxe de que este novo servizo, que comezará a prestarse o vindeiro mes de maio, “busca garantizar a reciclaxe do cartón comercial e evitar que se acumule na rúa ou nos outros contedores” e precisou que “se trata de dar facilidades aos comerciantes para reciclar correctamente, pero aqueles que queiran xestionalo polos seus propios medios ou depositándoo no colector azul poden seguilo facendo”.

A vindeira semana, anunciaranse os días establecidos para a recollida e os usuarios/as só terán que depositar o cartón e papel de maneira ordenada ás portas dos establecementos onde o servizo de limpeza municipal o recollerá para trasladar á planta de reciclaxe.

“Alcanzar os obxectivos de reciclaxe que marcan as directrices europeas require da implicación de todos/as e sei que a veciñanza do Porriño contribuirá a conseguilo”, afirmou o alcalde, Alejandro Lorenzo, “Trátase de coidar o planeta e os nosos recursos, de deixar un mundo mellor para as próximas xeracións. Entre todos/as o faremos”.

Teléfono de recollida de entullos: 665 571 555

Dende a concellería de Limpeza recordan que depositar entullos na vía pública está prohibido e é obxecto de sanción.

O Concello do Porriño dispón dun servizo de recollida de voluminosos que require de cita previa.  Todos aqueles que queiran desfacerse de voluminosos deberán chamar ao 655 571 555 e o servizo de limpeza municipal indicaralles onde e cando deben depositar estes enseres.

Tamén poden acudir directamente ao Punto Limpo, sito no Polígono A Granxa (Rúa Cíes 187) de luns a venres en horario de 10 a 14 h (os luns tamén de 16 a 20h).  

Colocar carteis publicitarios sen permiso conleva multas de ata 3.000 euros

O Concello do Porriño lembra que colocar carteis publicitarios na rúa fora das zonas habilitadas e sen permiso está prohibido.

A “Ordenanza municipal reguladora de convivencia cidadá, limpeza de vías públicas e recollida de residuos”, aprobada no ano 2010, prohibe a colocación e pegado de carteis e adhesivos en inmobles, muros, pontes, paredes ou beirarrúas sen autorización expresa do Concello.

No caso de que un inmoble particular sexa obxecto de pintadas ou pegado de carteis, o propietario do mesmo o comunicará ao Servizo Municipal de Limpeza, que procederá á súa limpeza con cargo ao responsable da publicidade.

Asemade, a norma estipula que a colocación de cada cartel, pintada ou pancarta que constitúa infracción será sancionada considerándose responsables aos beneficiarios da propaganda ou publicidade. As sancións por incumprir esta norma van dende os 751 euros ata os 1.500 euros, podendo chegar aos 3.000 euros en caso de reincidir.

“O espazo público é un lugar de convivencia que disfrutamos todos”, concluíu o alcalde, Alejandro Lorenzo, “Para iso debemos manter a nosa vila limpa e respectar as normas”.

Máis info: “ORDENANZA MUNICIPAL REGULADORA DE CONVIVENCIA CIDADÁ, LIMPEZA DE VÍAS E RECOLLIDA DE RESIDUOS”

O Porriño propón a contratación de 43 persoas desempregadas para apoiar os servizos municipais

O Concello do Porriño vén de presentar un plan de apoio á prestación de servizos municipais que permitirá a contratación de 43 persoas desempregadas que desenvolverán función nos diferentes departamentos municipais.

“Os cidadáns do Porriño cumpren co seu deber e pagan os seus impostos e o Concello debe cumprir co seu e prestar en condicións os servizos públicos”, explicou o Alcalde, Alejandro Lorenzo, “Moitos destes servizos non se estaban a prestar de maneira axeitada,  a situación que nos atopamos é nefasta e o persoal co que contamos insuficiente. Por iso deseñamos este plan de reforzo do persoal que nos permitirá non só poner a funcionar o Concello e impulsar novas iniciativas, senón tamén incorporar ao mundo laborar a 43 persoas que neste momento se atopan en situación de desemprego”.

A tal fin, o Concello fará a maior aportación de fondos que se fixo ata o de agora. O custe deste programa laboral roza o medio millón de euros: 450.489 euros, dos cales 226.489 corresponden á solicitude cursada ao ente provincial e os 224.061 corren a cargo do Concello.

As persoas que se van contratar terán que estar inscritas no Servizo Público de Emprego que será o encargado de facer a preselección, por iso é importante que todos aqueles interesados se inscriban xa nas diferentes ocupacións para cando se presenten as correspondentes ofertas de emprego.

Impulso dos servizos municipais

 Os traballadores integraranse nos diferentes servizos e departamentos municipais. No departamento de Obras contrataranse a dous oficiais de primeira  carpinteiro, un oficial de primeira soldador, tres oficiais de primeira albaneis, sete peóns de obra pública, dous oficiais de primeira electricista, un oficial de primeira fontaneiro e un oficial de primeira tractorista/conductor de grúa.

Entre as funcións que desempeñarán neste departamento está o mantemento e reparación de parques infantís e instalación deportivas, construcción e reparación de beirarrúas, mantemento de instalacións municipais, transporte de material ou roza.

No caso do departamento de Parques e Xardíns incorporaranse doce peóns forestais, que desempeñarán tarefas de rozado e retirada de vexetación e maleza nos viais das parroquias e traballos de recollida de entullos e o mantemento e mellora dos xardíns.

Un auxiliar de enfermería dará respaldo á Unidade Asistencial a Drogodependentes, un auxiliar administrativo ao Departamento Servizos Sociais e dous para o Departamento de Cultura que desenvolverán función de información e atención aos usuarios da Biblioteca municipal.

Tamén se contratará un titulado na Diplomatura ou Grao de Turismo para traballar no desenvolvemento do Departamento de Turismo e un técnico en informática que se precisa no Departamento de Novas Tecnoloxías.

Posta en marcha de Porremprego

No tocante ao Departamento de Emprego e Formación proponse a contratación de dous orientadores laborais. Un dos piares básicos da xestión deste novo goberno será a posta en marcha de novo de Porremprego:  restablecer as acción formativas e as relacións co tecido empresarial da contorna e a bolsa de emprego local, como ferramenta clave para aumentar as posibilidades de empregabilidade.

Conserxes para a praza de abastos, aula de estudio e pavillóns municipais

 Incorporaranse seis conserxes aos departamentos de Deportes, Mercados, Persoal e Cultura que se encargarán da apertura, peche, vixilancia e atención ao cidadá dos pavillóns municipais, o Concello, aula de estudio e a Praza de Abastos.

 

 

 

 

 

 

 

 

O Concello do Porriño actuará con contundencia ante os verquidos ilegais

Dende a Concellería de Medio Ambiente, que dirixe Antía Carrera, advertiuse hoxe que o Concello do Porriño actuará con contundencia ante os verquidos ilegais que se están a detectar no municipio.

A concelleira amosou a súa preocupación polo aumento de depósitos de residuos en zonas non permitidas do municipio e recorda que se trata de acción ilegais que conlevan importantes sancións económicas.

En moitos casos trátase de neumáticos que están sendo tirados en vertedoiros ilegais. “Tal e como recolle a normativa sobre a xestión de neumáticos fora de uso o almacenamento dos mesmos tense que levar a cabo en condicións de seguridade e salubridade adecuadas e en instalacións que cumpran coas condicións establecidas na deVandita normativa”, explicou a edil, Antía Carrera, “Do mesmo xeito , a norma que regula os residuos e solos contaminados recolle expresamente que está prohibido o abandono, verquido ou eliminación incontrolada de neumáticos fora de uso en todo o territorio nacional ao igual que o depósito en vertedoiro de neumáticos fora de uso”.

As sancións que conleva imcumprir esta norma son considerables: desfacerse de neumáticos non usados en zonas non autorizadas supón unha multa de 901 ata 45.000 euros.

Pola súa banda, o alcalde Alejandro Lorenzo, explicou que “estes verquidos non son só unha falla de civismo, senón que supoñen un deterioro grave para o medio ambiente e por iso dende o Concello serán perseguidos”. O rexedor concluíu apelando á colaboración cidadá para “poner fin a estas prácticas que nos perxudican a todos e todas”.

Número para a recollida de entullos: 665 571 555

Por outra banda, a concellería de Limpeza, que dirixe José Carlos González lembra que deixar enseres na vía pública sen previo aviso está prohibido conleva unha sanción de 600 euros.

 

O Concello lembra que está prohibido depositar entullos na vía pública sen autorización

A concellería de Limpeza, que dirixe José Carlos González, lembra que a cidadanía do Porriño dispón dun servizo de recollida de voluminosos que require de citación previa, pois está prohibido deixar enseres na vía pública sen previo aviso.

Informan dende a concellería que para desfacerse de colchóns, mobles e obxectos de gran tamaño hai que solicitalo chamando ao 665 571 555, onde se lles informará da hora e lugar donde deben depositar os enseres para que sexan recollidos.  Depositar entullos na vía pública sen autorización conleva unha sanción de 600 euros. 

Dende o Concello tamén indican que a fin de facilitar o servizo aos cidadáns  a recollida é, polo de agora, de carácter semanal, e a demanda. Nos próximos días colocarase en todos os colectores este número de teléfono para informar a toda a veciñanza.

O novo goberno municipal potenciará a atención cidadá e a transparencia, e dedicará unha concellería á terceira idade

 

O alcalde Alejandro Lorenzo fixo público hoxe o reparto de responsabilidades e delegacións entre os seus concelleiros. Destaca a creación das áreas de Atención Cidadá e Transparencia que dependerán da concelleira Antía Carrera.

A subliñar tamén a creación da área de Terceira Idade que desenvolverá Ascensión Rosario Costas. Trátase dunha concellería específica para dar resposta ás necesidades dos nosos maiores e garantir que a nosa vila ofreza a calidade de vida que merecen, traballando conxuntamente co resto de departamentos.

DISTRIBUCIÓN DE ÁREAS E DELEGACIÓNS 

O propio alcalde, Manuel Alejandro Lorenzo levará tamén as áreas de Economía e Persoal.

Abel Estévez, que será o primeiro tenente de alcalde dirixirá Seguridade, Policía Local, Protección Civil, Voluntariado, Deportes e Benestar Social.

Carolina González, segunda tenente alcalde, desenvolverá as delegacións de Educación, Uned e Programas Europeos; Igualdade; Sanidade e Normalización Lingüística.

Ramón Porto será o concelleiro responsable de Vías, Obras e Servizos

Antía Carrera levará Urbanismo, Patrimonio Municipal do Solo, Contratación, Comercio, Mercado, Atención Cidadá e Transparencia, e Medio Ambiente.

José Carlos González terá as competencias de Parques e Xardíns; Limpeza; Lixo e Cemiterios.

Bienvenido Estévez colle as competencias de Traída de Augas Veciñais; Asociacións; Parroquias; Novas Tecnoloxías; Xuventude; Cultura e Festas.

Por último, Ascensión Rosario Costas asume a nova área de Terceira Idade e ademais as deegacións de Industria, Turismo, Formación e Emprego.

“EQUIPO POR E PARA PORRIÑO”

As competencias repártense entre os oito concelleiros do equipo. A idea é desenvolver un traballo transversal e coordinado que beneficie á cidadanía”, explicou o alcalde.

Trátase de “un equipo por e para Porriño”, afirmou Alejandro Lorenzo como síntese do esquema de traballo que propón.

“Xorden problemas e demandas cotiáns que non afectan só a un ámbito senón ao conxunto do Concello e tamén a diversos sectores da poboación e por iso son necesarias actuacións integrais para optimizar os recursos dos que dispoñemos, aproveitar as sinerxías, e dar unha maior eficiencia e eficacia. calidade do servizo que prestamos”, engadiu o rexedor municipal.

Alejandro Lorenzo mostrouse satisfeito de ter un equipo cohesionado que traballe xunto e témolo“. E citou como proba diso” o traballo da brigada de Deportes que se encarga de arranxar os parques infantís; ou a cooperación das concellerías de Vías e Obras, Servizos, Limpeza Viaria, Parroquias e Asociacións nas actuacións urxentes de lavado e limpeza como a que hoxe se leva a cabo no entorno da Igrexa de Santa María”, concluíu Alejandro Lorenzo.

Entrega do último lote de composteiros de 2021

 

A Concellería de Medio Ambiente citou hoxe a unha parte dos solicitantes de composteiros para vivendas unifamiliares que está a entregar o Concello do Porriño.

As veciñas e veciños aos que se adxudican este lote, de 50 composteiros, acudiron ás instalacións do Multiusos de Torneiros onde recibiron unha charla divulgativa a cargo de Emilio Rodríguez Cochón, mestre composteiro e técnico superior de residuos do Concello.

Mañá martes haberá unha segunda quenda, no mesmo lugar, para completar a información e entrega deste último lote de composteiros, correspondentes ao ano 2021.

“SOGAMA” cedeu eses 50 composteiros ao Concello do Porriño que se reparten entre os solicitantes no prazo que rematou hai uns días.

Eva Garcia anuncia que a adxudicataria do contrato de recollida de lixo comezará a traballar en xaneiro

Eva García recibiu na Alcaldía a Francisco Alonso, representante da empresa “SCG Servizos dos Concellos Galegos”, empresa adxudicataria da recente licitación do contrato de recollida de lixo. Así mesmo, “SCG” encargarase da recollida selectiva e da xestión do Punto Limpo. 

Despois da entrevista, a alcaldesa indicou que o contrato se formalizará nos próximos días, aínda que a concesionaria comezará a funcionar o 1 de xaneiro de 2022.

“Fai se pensando en cuestións de xestión. Entre outras razóns para non gravar aos traballadores que actualmente prestan ese servizo noutra empresa e que loxicamente serán subrogados, para evitar o prexuízo que suporía ter dous pagadores en 2021 a efectos fiscais. E por outra banda, as empresas que actualmente prestan estes servizos terán marxe ata fin de ano para liquidar todas as obrigas cos seus traballadores en materia de vacacións e outras”, aclarou Eva García de la Torre.

A alcaldesa lembrou que “é a primeira vez na historia do Concello de Porriño que se licita a xestión destes servizos, a través dunha mesa de contratación”. 

Declaracións de Eva García