Limpeza

Voluntarios e voluntarias de toda España traballan na rexeneración ambiental da ribeira do río Louro

  • O alcalde do Porriño recibiu na casa consistorial aos 11 participantes do campo de voluntariado “Sendeiros do Louro” no seu primeiro día e desprazouse tamén ata o río para coñecer de preto as súas tarefas

O Porriño, 12 de agosto de 2026. A ribeira do río Louro e os seus afluentes contan dende esta semana cun equipo de traballo moi especial. Un grupo de 11 mozos e mozas, de entre 18 e 30 anos e procedentes de diversos puntos da xeografía estatal —como Galicia, Madrid, Andalucía, Comunidade Valenciana, Castela-A Mancha, Aragón ou Estremadura—, que se atopan no Porriño participando no Campo de Voluntariado “Sendeiros do Louro”.

Con motivo do inicio dos traballos, o alcalde do Porriño, Alejandro Lorenzo, recibiunos na casa consistorial o día da súa chegada para darlles a benvida, amosarlles as instalacións municipais e trasladarlles o seu agradecemento polo seu compromiso ambiental e social. Ademais, o rexedor desprazouse ata a contorna do río Louro para visitar aos voluntarios in situ e comprobar de primeira man como se están a desenvolver os traballos de rexeneración.

“O río Louro é un dos nosos bens naturais máis prezados. Con este campo de voluntariado, ‘Sendeiros do Louro’, non só melloramos e protexemos a ribeira e a vexetación autóctona, senón que tamén sensibilizamos sobre a necesidade de manter vivos e limpos os nosos ecosistemas fluviais”, asegurou Lorenzo, quen amosou o seu orgullo por “recibir no Porriño a un grupo de mozas e mozos tan comprometidos co medio ambiente e co ben común”.

Acción directa no contorno natural

O Campo de Voluntariado Internacional “Sendeiros do Louro”, é un proxecto impulsado polo Concello do Porriño a través da Concellería de Voluntariado, coa colaboración das áreas de Cultura, Educación, Deportes e da OMIX.

O obxectivo deste campo de voluntariado é contribuír á conservación e posta en valor da ribeira do Louro mediante accións de eliminación de especies exóticas invasoras, protección da vexetación autóctona, limpeza de residuos e sensibilización ambiental, favorecendo ao mesmo tempo o intercambio cultural entre participantes.

A iniciativa foi deseñada pola cooperativa de educación, lecer e cultura Avada, entidade con cinco anos de experiencia no desenvolvemento de programas educativos e de participación xuvenil, que será a encargada da coordinación e execución da actividade. O proxecto conta ademais coa colaboración da asociación ecoloxista Verdegaia, que achega o seu coñecemento técnico nas actuacións de conservación do río Louro e os seus afluentes.

Durante doce días as e os voluntarios conviven nas instalacións do CEIP Ribeira de Torneiros. Polas mañás desenvolven as accións de voluntariado ambiental e, polas tardes, participarán nun amplo programa de actividades de lecer educativo, excursións, visitas culturais e dinámicas de convivencia organizadas por Avada (@avada.gal), promovendo valores como a cooperación, a participación e o respecto polo patrimonio natural e cultural galego.

Esta actividade inclúese na Campaña de Verán 2026 da Dirección Xeral de Xuventude da Xunta de Galicia, presentada baixo o lema “Modo Verán Activo”, que este ano oferta máis de 11.900 prazas en toda Galicia para a mocidade.

12/08/2026 in Alcaldía, Limpeza, Medio Ambiente, Mocidade, Patrimonio Municipal, Turismo

O Concello do Porriño recuperará e musealizará a ponte romana das Amíndoas

  • Esta obra enmárcase dentro dun ambicioso proxecto para evitar as inundacións e que converterá a zona nun gran parque fluvial

 

  • Este novo espazo será unha nova zona verde e unha conexión peonil entre O Porriño e Torneiros

O Porriño, 1 de agosto de 2026. O Concello do Porriño está a elaborar un ambicioso proxecto para recuperar e musealizar a Ponte romana das Amíndoas. Trátase dun importante vestixio histórico polo que discurría a vía romana e que na actualidade está escondido baixo formigón e asfalto. A intención é desfacelo desas capas de modernidade e que volva ao seu estado orixinal. É máis, o redactor do proxecto cre posible atopar e recuperar tamén parte desa vías romana  que comunicaban O Porriño coas Gándaras e tamén con Pontellas no seu camiño entre Astorga e Braga. Por iso esa ponte converterase novamente nunha ponte peonil e construirase unha nova vía paralela á actual para que pasen os vehículos. 

Esta importante intervención patrimonial está enmarcada no proxecto “De minoración das avenidas ordinarias e posta en valor da ponte das Amíndoas”. Un dos grandes proxectos do Concello do Porriño presentados ao Plan de Actuación Integrado (PAI) que cambiará por completo unha contorna que cada inverno sufre importantes inundacións.

“Trátase dun dos proxectos máis ilusionantes e importantes do noso concello”, explica o alcalde, Alejandro Lorenzo, que visitaba xunto a arquitecta municipal e o redactor do proxecto este espazo, engadindo que se trata de “recuperar e manter a nosa historia, cun proxecto que permitirá conectar as parroquias co casco urbano e crear máis zonas verdes que precisa o noso pobo”.

De feito, a principal actuación é aumentar a capacidade de desagüe do río, para que en época de crecida a auga non inunde esta importante zona verde do Porriño e a estrada que discorre por ela. Esta actuación farase na contorna da ponte, que se restaurará para que volva a lucir como na época romana.

Esta contorna, na actualidade cualificada como zona inundable, poderá así ser recuperada para o uso cidadán, posibilitando a creación dunha gran zona verde con acceso ao río e unha nova unión entre Torneiros e o centro urbano.

Trátase dunha aposta pola resiliencia ambiental, adaptar os espazos aos efectos do cambio climático e preparar o territorio para responder con garantías ante episodios de chuvias extremas. É precisamente por esta visión sustentable polo que o proxecto conta co apoio de fondos europeos FEDER. A Unión Europea prioriza este tipo de solucións baseadas na Natureza, que abandonan as canles de formigón para renaturalizar o río Louro, protexer a zona de Atios de futuras inundacións e recuperar o patrimonio histórico e ecolóxico do municipio.




03/08/2026 in Alcaldía, Infraestruturas, Limpeza, Medio Ambiente, Parques e xardíns, Parroquias, Patrimonio Municipal, Proxectos Europeos, Sen categoría

Sindicatos e concesionaria do lixo do Porriño alcanzan un preacordo e suspenden a folga prevista para esta semana

  • Tras semanas de mediación, o alcalde do Porriño, Alejandro Lorenzo, asegura que é unha boa nova para a cidadanía e tamén para os traballadores

O Porriño, 8 de xullo de 2026. Suspendida a folga do lixo no Porriño tras un preacordo asinado entre a empresa concesionaria e os sindicatos, e tras semanas de mediación por parte do Concello que, malia tratarse dun problema estritamente interno da empresa, decidiu interceder para defender o interese xeral da cidadanía e evitar o grave prexuízo que un paro de cinco días suporía para a salubridade das rúas. Así, o alcalde mantivo reunións tanto coa empresa como con representantes sindicais ata acadar este compromiso.

“En xeral é unha boa nova para a cidadanía do Porriño e tamén para os traballadores”, declarou Alejandro Lorenzo, alcalde do municipio, “satisfeito porque isto supón poder evitar unha folga e tamén poder mellorar os salarios dos traballadores e traballadoras nun servizo que non se vai interromper”. Neste senso, agradeceu á plantilla que traballa no servizo e á empresa o achegamento de posturas.

08/07/2026 in Alcaldía, Benestar, Limpeza, Medio Ambiente

O Concello do Porriño licita por máis de 23.800 € o servizo de control e esterilización de colonias felinas

  • O prego recolle a posibilidade de prorrogar o contrato de forma anual por dous anos máis , ascendendo o valor estimado total do servizo ata os 59.100,00 € sen IVE.
  • Na actuaidade o concello ten un total de 286 pasaportes felinos, expedidos dende o ano 2024

O Porriño, 01 de xullo de 2026 – O Concello do Porriño volve licitar o servizo para a xestión, control sanitario e aplicación do método C.E.S. (Captura, Esterilización e Solta) nas colonias felinas do municipio. O obxectivo prioritario desta actuación é garantir o benestar animal e supervisar de xeito ético as poboacións de felinos locais.

O orzamento base de licitación aprobado ascende exactamente a 23.837,00 € co IVE incluído  para o primeiro ano de duración. O prego recolle a posibilidade de prorrogar o contrato de forma anual por dous anos máis , ascendendo o valor estimado total do servizo ata os 59.100,00 € sen IVE.

O Concello do Porriño con esta licitación non soamente está aplicando o método C.E.S. senón que da un paso máis cara ao benestar animal. E dicir, ademais de incluír a captura dos felinos para proceder a súa esterilización e posteriormente a súa devolución a colonia ou calquera outro punto determinado para a súa solta, inclúe tamén a atención veterinaria dos gatos e gatas que aparecen feridos ou enfermos. Pero isto non é todo, xa que este concello quere seguir mellorando polo que tamén inclúe a organización de talleres formativos anuais  para concienciar e informar á poboación local. “Para controlar a estas colonias é importante a colaboración de todas e de todos por iso non me quero esquecer da gran labor que fan os voluntarios e voluntarias deste municipio”, explica o alcalde do Porriño, Alejandro Lorenzo, destacando a importancia de esta labor de concienciación e asimilación de boas prácticas.

286 pasaportes

Explica o Concelleiro de Medio Ambiente, Carlos Porto,  que na actualidade o concello ten un total de  286 pasaportes felinos, expedidos dende o ano 2024.Isto significa que o municipio xa ten identificados, rexistrados e censados un número importante de gatos a través deste documento oficial, o cal facilita o seguimento sanitario e o control das colonias sobre o terreo dentro do marco legal de benestar animal.

De feito, no municipio están identificados os emprazamentos das principais colonias, e alí colocaranse as casetas felinas que se realizaron durante o festival “O Porriño Animal Fest”.   Os creadores Eva Casais, Emma Suárez, Anxo Facal, Xabela García Rionegro, Sheila Viqueira, Miriam Benítez, El Taller de la Musa e Bruno Vázquez xunto aos seus alumnos da Escola de Arte de Ponteareas plasmaron o seu talento sobre seis colectores que foron adaptados e transformados en casetas de refuxio para as colonias felinas do municipio. Estas pezas artísticas non só embelecerán a vila, senón que garantirán un espazo digno e seguro para os gatos comunitarios. Colocaranse nas inmediacións do Centro de saíde, na rúa Ourense (xa colocado), na zona de caravanas de Leandro Diz (xa colocado) e no Multiusos de Torneiros.

01/07/2026 in Limpeza, Medio Ambiente, Parques e xardíns

O presidente da Xunta visita os traballos de recuperación das Gándaras de Budiño con motivo do Día Mundial dos Humidais

  • O proxecto conta cun investimento de 1,53 millóns de euros, cofinanciado cos fondos Next Generation UE e FEDER, para restaurar os humedais e poñer en valor a biodiversidade local.

O Porriño, 3 de febreiro de 2026.- O Concello do Porriño recibiu hoxe a visita institucional do presidente da Xunta de Galicia, Alfonso Rueda Valenzuela, acompañado pola conselleira de Medio Ambiente e Cambio Climático, Ángeles Vázquez, e polo alcalde do Porriño, Alejandro Lorenzo, co motivo do Día Mundial dos Humidais. Trátase dun proxecto estratéxico para a conservación dos humedais e da biodiversidade, cun investimento de 1,53 millóns de euros, cofinanciado polos fondos Next Generation UE e FEDER.


A visita comezou cun percorrido a pé polo centro do humidal, incluíndo a lagoa principal, cuxo obxectivo é duplicar a súa superficie de 6.000 m², actualmente en proceso de recuperación desde os traballos iniciados en agosto. Continuou coa inspección do Centro de Interpretación, do miradoiro de aves e doutros elementos mellorados. Durante o percorrido, Tomás José Fernández-Couto, subdirector xeral de Espazos Naturais, explicou as actuacións levadas a cabo pola Xunta: instalación dun sistema de filtrado das augas, acondicionamento do observatorio de aves, mellora do Centro de Interpretación, eliminación de especies alóctonas e mellora de accesos.


O alcalde, Alejandro Lorenzo, subliñou a importancia do proxecto: “Esta intervención permite recuperar un espazo natural único e devolvelo á cidadanía en mellores condicións ambientais. É un claro exemplo de colaboración entre administracións que dá resultados reais na protección do medio natural e na mellora da calidade de vida dos veciños e veciñas do Porriño. Ademais, garantimos a conservación dos humedais e reforzamos a protección do sapoconcho europeo, consolidando as Gándaras de Budiño como un enclave de referencia na conservación da biodiversidade”.


Pola súa banda, o presidente, Alfonso Rueda, destacou: “Esta actuación nas Gándaras de Budiño é un exemplo de que é posible compatibilizar o desenvolvemento industrial coa conservación da natureza e de que non hai que renunciar a ningunha das dúas cousas. O Porriño é un dos concellos máis industriais de Galicia, pero isto é a demostración de que é posible ter aquí industrias, naves, economía e un espazo tan bonito como este. É posible vivir no territorio, vivir na economía e coidar o territorio”.


Rueda salientou tamén a importancia deste tipo de proxectos para conservar e poñer en valor unha parte esencial do patrimonio natural de Galicia e recordou que, aínda que Galicia é un territorio con abundante auga, “hai que saber regulala, aproveitala e conservala”.


Un proxecto integral de restauración ecolóxica


O proxecto, denominado “Recuperación do hábitat asociado a Emys orbicularis a través da restauración dos humedais da ZEC Gándaras de Budiño”, ten como obxectivo principal mellorar e conservar o hábitat do sapoconcho europeo, réptil en maior perigo de extinción en Galicia, e restaurar o equilibrio ecolóxico dos humedais.


As actuacións desenvólvense nunha superficie de 376,86 hectáreas no termo municipal do Porriño, incluíndo tamén a lagoa de Campa do Rei e camiños na marxe do río Louro. Ademais da duplicación da lagoa principal, as accións inclúen recuperación de ecosistemas húmidos de alto valor ambiental, mellora do leito das lagoas, eliminación de especies alóctonas, acondicionamento de sendas e accesos, reparación do observatorio de aves e do Centro de Interpretación, así como instalación de sistemas de filtrado e mantemento de infraestruturas.

As Gándaras de Budiño, declaradas Lugar de Importancia Comunitaria (LIC) en 2004 e Zona de Especial Conservación (ZEC) en 2014, consolidan o seu valor como un dos enclaves máis importantes de Galicia para a conservación de humedais e especies ameazadas. Con esta actuación, o Concello do Porriño reafirma o seu compromiso coa protección da biodiversidade, a restauración ecolóxica e a posta en valor do patrimonio natural local.

03/02/2026 in Limpeza, Medio Ambiente

O Concello do Porriño reforza como nunca a limpeza viaria e o mantemento das zonas verdes cun investimento anual de preto de 1 millón de euros

  • Un salto histórico nos servizos municipais: 553.762 € para limpeza viaria e 431.513 € para zonas verdes, con baldeo diario, mantemento de papeleiras, rego e poda en todo o municipio

O Porriño, 30 de xaneiro de 2026.- O Concello do Porriño vén de aprobar a licitación de dous contratos fundamentais para o coidado do espazo público, o servizo de limpeza viaria e o mantemento das zonas verdes municipais, cun investimento anual conxunto de preto dun millón de euros destinado a mellorar de maneira notable a imaxe urbana, a salubridade e a calidade de vida da veciñanza.

Estas novas licitacións supoñen un salto cualitativo nos servizos municipais, incorporando máis medios, maior frecuencia de actuacións e novas prestacións tanto no núcleo urbano como nas parroquias, nos polígonos industriais e nos espazos naturais do municipio.

No ámbito da limpeza viaria, o novo contrato contará cun orzamento anual de 553.762,42 euros e permitirá reforzar de forma significativa os traballos de hixiene urbana. Entre as melloras previstas inclúese o baldeo manual diario nas principais rúas do núcleo urbano, o aumento dos baldeos tanto no centro como en Torneiros, así como o baleirado, reposición e mantemento das papeleiras en todo o municipio. O servizo abrangue tamén a recollida de animais mortos, a limpeza inmediata en caso de accidentes, a limpeza periódica do mobiliario urbano e a prestación de servizos de limpeza en todos os eventos e actos públicos que se celebren no termo municipal. A estas actuacións súmanse os traballos habituais de varrido manual, mixto e mecánico, a limpeza de sumidoiros e drenaxes, a retirada de residuos abandonados, a recollida intensiva de folla no outono, así como a limpeza de pintadas e a retirada de carteis.

Pola súa banda, o contrato de mantemento das zonas verdes, cun custo anual de 431.513,55 euros, permitirá unha atención máis completa e profesional dos parques, xardíns, sendeiros e espazos naturais do Porriño. O servizo inclúe a limpeza e o mantemento continuado das zonas verdes municipais, a limpeza de rúas e beirarrúas nos polígonos industriais, o mantemento e a limpeza de parcelas municipais e sendeiros, o mantemento e reposición das redes de rego no núcleo urbano e en Torneiros, así como a poda de árbores en parcelas municipais e centros educativos. Este contrato abrangue máis de 400.000 metros cadrados de zonas axardinadas, zonas verdes, monte baixo, sendeiros e viarios industriais, e contempla actuacións de sega, poda, fertilización, roza, prevención de incendios, retirada de árbores caídas ou ramas perigosas e mantemento das infraestruturas de rego.

O alcalde do Porriño, Alejandro Lorenzo, destaca que este conxunto de licitacións supón “un investimento pola limpeza e polo coidado do espazo público como nunca antes se fixera no Porriño”, subliñando que se trata dunha aposta clara por mellorar a calidade dos servizos municipais e responder ás demandas da cidadanía. O rexedor sinalou que máis limpeza, máis mantemento e unha maior presenza nas rúas, nos parques e nos polígonos industriais “tradúcense nunha vila máis coidada, máis saudable e máis agradable para vivir”. “Queremos ser un referente en medio ambiente, no coidado das zonas verdes e na limpeza viaria”, concluíu.

Con estas dúas licitacións, o Concello do Porriño reafirma o seu compromiso cun modelo de vila máis limpa, máis ordenada e máis sostible, apostando por servizos públicos de calidade que terán un impacto directo e visible no día a día da veciñanza.

30/01/2026 in Benestar, Limpeza, Medio Ambiente, Vías e obras

O Porriño denuncia a paralización indefinida da supresión do paso a nivel pese a ter o proxecto e o convenio xa preparados

 

  • O alcalde explica a situación trala última reunión con ADIF logo da cal “nos sentimos manipulados, esquecidos e enganados” e anuncia medidas do Concello para reclamar a reactivación da obra “defenderemos esta infraestrutura en tódalas instancias, esixindo igualdade de trato e o cumprimento dunha obra que xa debía ser unha realidade”

O Porriño, 5 de decembro de 2025.- O alcalde do Porriño Alejandro Lorenzo vén de explicar a situación actual da supresión do paso a nivel que parte en dous a vila dende fai máis de medio século. “Lamento profundamente esta nova situación, que implica a paralización indefinida desta actuación e demanda histórica de toda a veciñanza. Logo de ter xa o proxecto redactado e o convenio listo para ser aprobado polo pleno, esta é unha noticia nefasta coa que nos sentimos manipulados, enganados e esquecidos. O Concello do Porriño asumiu responsabilidade e compromisos históricos e agora o Goberno de España rompe unilateralmente un acordo técnico xa pechado”, sinalou o rexedor. Fíxoo nunha rolda de prensa ante os medios de comunicación na que trasladou o resultado da última xuntanza mantida con representantes de ADIF, o pasado mes de novembro. Nela, expúxose que a Dirección Xeral do Sector Ferroviario comunicáralle a ADIF que este proxecto non podía ser aprobado, xa que debía ser incluído no Estudo Informativo da Saída Sur de Vigo. “Cónstanos que ADIF amosouse contrariado e en desacordo con esta decisión a cal ademais nin o Ministerio tivo reparo de comunicarllo ao Concello directamente”.

O rexedor subliñou a importancia desta obra para a seguridade, a mobilidade e a cohesión urbana e criticou a decisión do Ministerio de Transportes y Movilidad Sostenible, o que supón un bloqueo indefinido e prazos moito máis prolongados. O alcalde explicou que o proxecto estaba completamente redactado, con informes favorables de todas as administracións afectadas, e cun borrador do convenio xa listo dende marzo de 2024 pendente unicamente de ser aprobado polo pleno, por ser competencia do mesmo. “O orzamento definitivo estaba xa cifrado en máis de 28,6 millóns de euros dos cales ADIF aportaría o 72,2% e o Concello 27,8% restante, e pola nosa parte xa se estaba incluso estudando distintas vías de financiamento para asumir a aportación municipal de preto de 8 millóns de euros, máis os dous millóns a maiores para a humanización da contorna, contemplando para elo posibles fondos europeos ou operacións de crédito, para as cales xa se dera tamén o visto bo”.

“Ata o de agora, esta obra non se podía executar pola súa complexidade, pero contabamos cunha solución técnica moi traballada, consensuada con ADIF e que tiña en conta a participación económica do Concello, algo que historicamente nunca se formulara”, subliñou o rexedor. O Ministerio investiu 800.000 euros nun proxecto que agora deixa sen efecto e o concello destinou 20.000 euros ao proxecto de humanización futura do ámbito, pensando xa nun Porriño sen barreiras, “de que serviu todo este investimento público se agora se deixa tirado cando estaba a piques de asinarse? Como se xustifica destruír anos de traballo e cartos públicos?”.

O paso a nivel do Porriño soporta diariamente o cruce de 8.000 vehículos e ocupa o posto 16º en densidade de tráfico de toda a rede de ADIF en España, o que evidencia a súa importancia vital para a mobilidade local. “O proxecto estaba totalmente preparado, cun convenio pactado, informes favorables e solucións técnicas consensuadas. Esta paralización é unha sorpresa e unha situación lamentable”, insistiu o alcalde.

A decisión do Ministerio implica que non se poderán continuar os trámites administrativos para a firma final do convenio e que a execución do proxecto queda bloqueada ata que se complete o Estudo da Saída Sur de Vigo. Ante este escenario, o alcalde anunciou que o “Concello adoptará tódalas medidas necesarias para garantir a reactivación da obra nos termos pactados”. Ademais esixe igualdade de trato, denunciando un agravio comparativo que o Ministerio impulse un investimento de 22,6 millóns de euros para eliminar un paso peonil en Cesantes, con expropiacións xa en marcha, “como se entende que se lle dea prioridade a un paso peonil mentres se bloquea unha obra vital para a seguridade de miles de persoas?”, pregúntase o alcalde porriñés.

“Sempre dixen que nunca sacaría unha foto no paso a nivel ata anunciar un acordo e inicio das obras; sei que ese día chegará, pero para iso non se pode xogar coa xente como se leva feito moitos anos, prometendo e anunciando algo que nunca quixeron facer. O Porriño non vai calar. Defenderemos esta infraestrutura en todas as instancias, porque non imos permitir que se nos trate como un municipio de segunda. Non é unha batalla política, senón unha cuestión de seguridade, mobilidade e dignidade”, concluíu Alejandro Lorenzo.

Resposta á tarxeta postal enviada a Pedro Sánchez

Curiosamente no día de hoxe, o alcalde Alejandro Lorenzo recibiu, xusto antes de comparecer ante os medios esta mañá, unha carta de Presidencia do Goberno de España. A tarxeta postal, conmemorativa de Antonio Palacios, que o rexedor porriñés enviara o pasado 26 de setembro cando se presentou este deseño e tamén o cuño turístico, solicitando que se cumprira o soño da supresión do paso a nivel na vila, dando resposta a unha demanda histórica, tivo

Asinada pola Unidade de Atención e Resposta á Cidadanía, a misiva limítase a dar as grazas pola postal enviada, indicando que se remitirá copia do escrito ao Ministerio de Transporte y Movilidad Sostenible e de xeito paradoxal remata dicindo “esperando unha pronta solución para esta cuestión de tanta transcendencia para o desenvolvemento do seu municipio”.

05/12/2025 in Limpeza

O Porriño celebra o Día da Sostibilidade cunha xornada festiva e educativa para toda a veciñanza

 

  • A Praza do Concello convértese este sábado 22 de novembro nun espazo de aprendizaxe, xogos e promoción de hábitos responsables co medio ambiente
  • O alcalde Alejandro Lorenzo e a concelleira Antía Carrera destacaron na presentación do evento que o obxectivo é seguir aprendendo de maneira sinxela e divertida, sen esquecer o compromiso colectivo coa transformación e protección ambiental, avanzando con decisión cara a un Porriño máis limpo e eficiente

O Porriño, 18 de novembro de 2025.- O Concello do Porriño celebrará este sábado 22 de novembro o Día da Sostibilidade cun gran evento participativo que converterá a Praza do Concello nun espazo aberto ao coñecemento, á educación ambiental e á convivencia veciñal. O alcalde Alejandro Lorenzo e a concelleira de Medio Ambiente, Antía Carrera, presentaron esta mañá o evento que se levará a cabo dende ás 12.00 e ata ás 19.00 horas a través de actividades, xogos, demostracións e stands divulgativos centrados na correcta separación dos residuos e no impulso dun modelo de vida máis responsable e respectuoso co medio ambiente.

“Este evento representa unha oportunidade única para reforzar este compromiso colectivo e para seguir aprendendo de maneira sinxela e atractiva como facer mellor as cousas no día a día”, explicou o rexedor. Neste senso, dende o Concello “convidamos a toda a cidadanía a participar nesta xornada, desfrutar das actividades e seguir construíndo entre todas e todos un Porriño máis verde e máis consciente”.

O evento contará con sete postos diferentes, un por cada fracción do sistema municipal: orgánico, aceite doméstico usado, téxtil, envases lixeiros, papel e cartón, vidro e fracción resto. En cada posto, a veciñanza poderá aprender de forma práctica e sinxela onde vai cada residuo, resolver dúbidas habituais e descubrir o impacto real que ten a separación correcta no día a día, tanto a nivel ambiental como económico. 

Para facer máis dinámica a aprendizaxe, instalaranse tamén tótems informativos interactivos con contidos audiovisuais, explicacións, exemplos e preguntas frecuentes, de maneira que persoas de todas as idades poidan comprender como funciona o sistema e cales son as claves para utilizalo ben. 

Ao mesmo tempo, durante toda a tarde haberá xogos e dinámicas para a cativada, retos de clasificación de residuos, explicacións guiadas e espazos de divulgación para adultos. “O obxectivo é crear unha xornada familiar, accesible e divertida, que permita aprender mentres se desfruta dun ambiente festivo e comunitario”. Ademais, repartiranse agasallos sostibles como embudes especiais para facilitar a reciclaxe do aceite usado, bolsas elaboradas con téxtil reciclado e outros detalles pensados para promover hábitos responsables. 

O evento contará cun posto de Cáritas no que se poñerá á venda roupa de segunda man grazas á colaboración de Aroupa, promovendo así a reutilización, o consumo consciente e a economía circular. A actividade servirá tamén para dar visibilidade á importante labor social destas entidades e á necesidade de reducir o desperdicio téxtil.

Acollida extraordinaria da campaña do colector marrón

A celebración do Día da Sostibilidade chega nun momento especialmente relevante para O Porriño, xa que a principios de novembro arrancou oficialmente a campaña do colector marrón no municipio, cunha acollida extraordinaria por parte da veciñanza. En apenas dúas semanas superáronse os 500 fogares inscritos, e o Concello ten marcado como obxectivo chegar aos 1.000 antes de que remate o mes. 

Grazas a esta participación inicial, xa se están a recoller 2.000 quilos máis de restos orgánicos cada semana, o que supón un aforro estimado de 12.000 euros ao ano no custo de tratamento dos residuos, ao desviar a materia orgánica cara a unha vía de aproveitamento máis eficiente e sostible. Por ese motivo, o Concello anima a todas as persoas que aínda non teñen a súa chave do colector marrón a achegarse ao evento deste sábado, onde poderán recibir información detallada, aprender como funciona o sistema e recoller o seu acceso ao colector de forma inmediata.

O Concello do Porriño agradece á veciñanza a súa implicación e boa resposta, así como ao persoal técnico e ás entidades colaboradoras que fan posible esta transformación ambiental. A participación cidadá está a demostrar que o cambio cara a un modelo máis sostible é unha responsabilidade compartida e que, coa colaboración de todos, é posible avanzar con decisión cara a un Porriño máis limpo, máis eficiente e máis comprometido coa protección ambiental. 

As persoas interesadas poden atopar toda a información actualizada na páxina web: porrino.ocaminosostible.gal. Tamén poden contactar a través do teléfono 647 521 464 ou do correo electrónico info@ocaminosostible.gal.

Esta iniciativa conta co apoio da Xunta de Galicia e o financiamento do Plan de Recuperación, Transformación e Resiliencia – Next Generation EU, e forma parte da aposta do concello por un modelo de xestión sostible e de proximidade, implicando á cidadanía na redución e valorización dos seus propios residuos.

18/11/2025 in Limpeza, Medio Ambiente, Sen categoría

O Porriño intensifica os labores de limpeza no cemiterio municipal de cara ao Día de Todos os Santos

  • O Concello realiza unha posta a punto especial de cara á festividade do 1 de novembro, reforzando os traballos habituais de mantemento que se desenvolven durante todo o ano.

O Porriño, 28 de outubro de 2025.- O Concello do Porriño está a levar a cabo labores de limpeza e acondicionamento no cemiterio municipal e nas súas inmediacións de cara á celebración do Día de Todos os Santos, o vindeiro 1 de novembro.

O alcalde, Alejandro Lorenzo, explicou que “estes traballos de limpeza realízanse de maneira habitual ao longo de todo o ano, cunha frecuencia semanal, para garantir o correcto mantemento das instalacións”. Porén, segundo engadiu, “chegadas estas datas, nas que o cemiterio recibe unha maior afluencia de veciños e visitantes, intensificamos as tarefas para que todo estea a punto e o recinto presente o mellor aspecto posible”.

Xunto co concelleiro de Limpeza e Cemiterios, Carlos González, o rexedor supervisou estes días os traballos que están a desenvolver os operarios municipais. As actuacións inclúen limpeza xeral, retirada de maleza, varrido de accesos, mellora das zonas axardinadas e mantemento das instalacións, tanto no interior do cemiterio como nas zonas circundantes. Ademais, dende o Concello tamén colabora co acondicionamento e posta a punto dos cemiterios situados nas diferentes parroquias.

Alejandro Lorenzo destacou que “non se trata dunha actuación puntual, senón dun labor continuo que se vén realizando ao longo de todo o ano para manter o cemiterio nas mellores condicións posibles”.

“Queremos que as persoas que se acheguen estes días a lembrar aos seus seres queridos atopen un espazo coidado e digno, acorde coa importancia desta celebración”, engadiu o alcalde.

O Concello agradece tamén a colaboración e o respecto da veciñanza no coidado e mantemento das instalacións nestas datas de especial afluencia.

 

28/10/2025 in Cemiterios, Limpeza

O Concello do Porriño súmase ao plan SEVIC da Deputación para mellorar a xestión de residuos e cumprir coa normativa estatal

 

  • Durante estas visitas, facilitaranse guías informativas para resolver calquera dúbida que poidan ter os axentes económicos e sociais locais.

O Porriño, 28 de maio de 2025. – O Concello do Porriño informa da súa adhesión ao Plan Bianual 2024-2025 do servizo de vixilancia, inspección e control da xestión de residuos (SEVIC), impulsado pola Deputación de Pontevedra, que ten como obxectivo garantir o cumprimento da Lei 7/2022, de residuos e solos contaminados para unha economía circular.

A par4r deste 28 de maio, os técnicos do SEVIC iniciarán as primeiras visitas formativas e informativas aos produtores de residuos do municipio, incluíndo establecementos comerciais, servizos e outros xeradores significativos de residuos non domésticos. Estas accións están centradas na comprobación da correcta separación das distintas fraccións de residuos (biorresiduos, papel, vidro, envases, aceites usados, téxtil, voluminosos, entre outros), así como na información sobre os procedementos axeitados para a súa xestión.

Durante estas visitas, facilitaranse guías informativas e porase á disposición un número de contacto telefónico para resolver calquera dúbida que poidan ter os axentes económicos e sociais locais.

“A nosa prioridade é avanzar cara a unha xestión máis sostible e eficiente dos residuos, e facelo da man da Deputación supón unha oportunidade para mellorar os servizos que prestamos e adaptarnos ao marco legal vixente”, sinalou o alcade, Alejandro Lorenzo.

 

28/05/2025 in Limpeza, Sen categoría