Educación e tecnoloxía

A concellería de Educación e Normalización Lingüística e a OMIX do Concello do Porriño continúa apostando por proxectos innovadores para difundir a lingua e cultura galegas entre a nosa comunidade educativa.

Tras o éxito das pasadas edicións, a celebración da III Xuntanza Literaria dará lugar a unha xornada de convivencia e fomento e animación á lectura, favorecendo a inclusión coa participación dos centros educativos do Porriño, ACEESCA, o Centro de Día de Torneiros e a Asociación AFAGA. Intentaremos facelo dun xeito lúdico e utilizando a contorna natural que nos ofrece a parroquia de Torneiros.

O programa para este día está organizado polos/as coordinadores/as das bibliotecas dos centros escolares, coas que o Concello do Porriño colabora.

Os centros participantes nesta III Xuntanza Literaria son o CPR Santo Tomás, IES Pino Manso, Aceesca, CEIPP Fernández López, CPR Hermanos Quiroga, CEIPP Antonio Palacios, IES Ribeira do Louro, CEIP da Cruz-Budiño, CEIPP de Atios, o Centro de Día de Torneiros, a Asociación Afaga e o CEIPP da Ribeira.

O alumnado distribuirase por grupos nos que, ademais da lectura individual, compartirán lecturas grupais de fragmentos de obras galegas. Estas expresións literarias reforzaranse tamén, coa música (outra forma de expresión literaria) que serve para expresar determinados sentimentos e emocións dunha forma máis lúdica e divertida.

Será da man, outro ano máis, de Xoán Curiel, con dous artistas máis en escena, que ofrecerán un concerto interactivo de 50 minutos ao estilo dunha representación teatral; no que pequenos, mozos e maiores, non serán simples espectadores/as senón que participarán desta actividade lúdica e cultural mediante coros e xogos e sempre empregando a lingua galega como ferramenta de traballo.

O Concello do Porriño, a través da súa concellería de Educación, que dirixe Carolina González, impulsa o programa “EDUCANDO EN POSITIVO para o desenvolvemento da intelixencia emocional e o coidado da saúde mental”.

Dende o Concello buscan con esta actividade que as familias saiban como poden achegar valor, adquirir os coñecementos e habilidades relevantes para elas/eles e acadar os seus obxectivbos coa “Disciplina Positivia”. As persoas asistentes aprenderán a corrixir os comportamentos dos seus fillos/as a través de límites e normas desde o cariño e a empatía.

 Coñecerán as ferramentas que nos permitirán establecer un vínculo emocional con eles/elas e brindarlles seguridade e confianza. Deste xeito, poderán fomentar a súa autoestima, creatividade, comunicación, xestión emocional e resolución de conflitos.

 “Pódese educar sen medo, sen berros nin ameazas. Convidámosvos a crear unha conexión maravillosa co voso fillo/a a través destes obradoiros e da conferencia”, sinalou a concelleira.

O programa desenvolverase os días 4, 11, 18 e 25 de abril no Centro Cultural do Porriño e consta dunha xornada informativa e tres obradoiros.

O 4 de abril, ás 18:30 h, terá lugar a xornada informativa dirixida a familias con fillas/os de idades comprendidas entre os 6 e os 12 anos. Será a cargo de Vanesa Cal, psicóloga, e Carlos Rodríguez, terapeuta en PNL e Intelixencia emocional. A entrada é libre e de balde ata completar aforo.

Os obradoiros desenvolveranse os días 11, 18 e 25 de abril, de 18:30 a 20:30 h, no segundo andar do Centro Cultural. É necesario inscribirse xa que os grupos están limitados a 15 prazas e haberá que facelo presencialmente na xornada informativa.

Escolares do CEIP Xosé Fernández López, CEIPP Antonio Palacios e CPR Hermanos Quiroga inauguraron hoxe as visitas guiadas á Casa Consistorial nas que participarán preto de 400 cativos/as do Porriño.

A Concellería de Educación e Normalización Lingüística e a OMIX organizan esta actividade en colaboración cos centros educativos co obxectivo de que o alumnado coñeza un pouco máis o funcionamento da Casa Consistorial, á vez que se dinamiza a lingua e cultura galegas. A técnica de Normalización Lingüística do Concello do Porriño, Andrea González, será nesta ocasión a encargada de guiar o alumnado polo edificio do Concello para dar a coñecer a súa historia, as distintas salas e espazos, o organigrama dos departamentos en que se organiza e, ao cabo, o seu funcionamento interno. O emprego de léxico administrativo galego, así como o desenvolvemento dun pequeño glosario galego-castelán de termos cotiáns dun concello, fan que as visitas guiadas deste ano teñan a lingua galega como o elemento catalizador. Deste xeito, as nenas e nenos do Porriño percorrerán os corredores das dependencias municipais, entrarán no salón de plenos, na alcaldía ou no balcón dende o que tradicionalmente se pregoa o inicio do Entroido, das festas do Cristo…, á vez que coñecen a importancia da lingua nunha Administración pública e o funcionamento do Servizo de Normalización Lingüística.

A concelleira de Educación e Normalización Lingüística, Carolina González, explicou que con esta iniciativa de portas abertas dirixida aos/ás escolares do municipio “pretendemos darlles a coñecer en profundidade o Concello para que tomen conciencia da importancia de participar na vida municipal, á vez que dinamizamos o uso da lingua galega nun grupo de idade que non adoita usala miúdo”.

Pola súa banda, o alcalde, Alejandro Lorenzo, aproveitou a visita para preguntar aos/ás pequenos/as polas súas demandas e impresións, e tamén para contestar ás súas dúbidas sobre como funciona o Concello. “É un luxo recibilos e escoitalos, as súas propostas, a súa opinión sobre o que pasa no seu pobo e o que queren para el é e debe ser moi importante”, explicou o rexedor, “Son parte moi importante do Porriño, o seu futuro, e deben ser parte activa, na maior medida posible, da vida municipal”.

No Día Mundial da Infancia o Concello do Porriño celebrou unha nova sesión do seu Pleno Infantil. “Traballamos todo o ano para conseguir cambios reais na vida de nenas e nenos, e este día é un momento clave para sumarse a este chamamento mundial a favor da infancia e dos nenos e nenas máis vulnerables”, explicou o alcalde, Alejandro Lorenzo, “Queremos tomar o pulso dos seus intereses e poñer especialmente o foco no tema da protección e prevención da violencia contra a infancia e a adolescencia”.

A tal fin, convocouse este novo pleno infantil en cumprimento do compromiso adquirido de conmemorar cada ano o día dos dereitos da infancia, pero tamén, para solicitar o apoio e compromiso dos nenos, nenas e adolescentes na resposta aos retos da situación actual e para impulsar e cumprir cos obxectivos da Axenda 2030, con máis equidade e, sobre todo, con máis oportunidades de prosperidade para todas e todos.

Neste pleno, os e as portavoces de cada un dos centros tiveron a oportunidade de trasmitirlle de primeira man, tanto ao alcalde coma ao resto de concelleiros e concelleiras, o resultado do traballo feito cos seus compañeiros e compañeiras nas aulas mediante a exposición de achegas sobre os dereitos da infancia, poñendo o foco na protección e prevención da violencia contra a infancia e a adolescencia e falaron das súas necesidades e preocupacións, centrándose en como lles está a afectar aos seus dereitos. Entre outras, propuxeron que se habilite un teléfono de atención ao menor, un gabinete de atención aos menores vítimas de violencia e atención psicolóxica, máis seguridade e iluminación nas rúas ou obradoiros para nais e pais.

Tamén estaba na orde do día a recollida de propostas para a realización de actividades durante este Nadal, e aprobouse a iniciativa centrada na recollida de alimentos e produtos de hixiene infantís, unha necesidade que trasladaban dende Asuntos Sociais, para que posteriormente sexan clasificados e repartidos entre as familias con menos recursos do concello e en colaboración co SOS.

O pleno, promovido polas concellerías de Educación e Infancia, que dirixen Carolina González e Rosa Isabel Alonso, a través da OMIX, puido seguirse na web do Concello en directo para facilitar a participación do resto da comunidade educativa e do público en xeral, e está á disposición da veciñanza na mediateca da web municipal xunto co resto de sesións.