O comercio do Porriño ten a súa disposición a intelixencia artificial para impulsar as súas vendas

A UNED organiza, coa colaboración do Concello do Porriño, unha xornada formativa de balde o vindeiro 10 de xuño para dotar aos negocios locais de ferramentas dixitais de vangarda
Xa está aberto o prazo de inscrición

O Porriño, 5 de abril de 2026. O comercio de proximidade do Porriño pode dar un paso cara ao futuro. A UNED pon nas súas mans as ferramentas. O vindeiro mércores 10 de xuño, a aula da UNED do Porriño converterase no epicentro da innovación comercial cunha sesión dedicada á implementación práctica da Intelixencia Artificial (IA) nos negocios locais.

A xornada, que terá lugar de 20:30 a 22:30 horas, para facilitar a asistencia, está deseñada especificamente para autónomos e persoal asalariado que desexen modernizar a súa estratexia de venda sen perder a esencia do trato directo co cliente.

IA para vender máis e mellor

A formación correrá a cargo de Iria Álvarez, consultora estratéxica e experta en crecemento dixital, quen amosará como a IA pode ser a mellor aliada do “tenda de toda a vida”. Entre os obxectivos principais destacan:

Marketing sen complicacións: Uso de ferramentas para crear automaticamente publicacións en redes sociais e descricións de produtos atractivas.
SEO Local: Estratexias para que os comercios do Porriño aparezan nos primeiros postos de busca cando un veciño busque un produto próximo.
Fidelización intelixente: Analizar o comportamento dos clientes para ofrecer promocións personalizadas e garantir que volvan ao establecemento.

Un formato adaptado á axenda comercial

Entendendo as dificultades de conciliación e os horarios do sector, a UNED ofrece tres modalidades de asistencia, todas elas gratuitas:

Presencial: Na sede da UNED Porriño, pero xa fora de horario
Online en directo: A través de Microsoft
En diferido: Para que os comerciantes poidan ver a sesión ao pechar os seus negocios, no momento que mellor lles conveña.

Inscrición aberta: Os interesados deben formalizar a súa matrícula a través da plataforma da UNED. É imprescindible rexistrar correctamente os datos persoais (NIF e nome completo) para obter o certificado de aproveitamento, que require a asistencia ou visionado do 85% das horas lectivas.

Esta iniciativabusca dotar ao tecido comercial porriñés das habilidades necesarias para competir nun mercado cada vez máis dixitalizado, transformando a tecnoloxía nunha oportunidade de crecemento para a economía local.

06/04/2026 in Educación e tecnoloxía, Novas Tecnoloxías, Urbanismo, comercio e industria

O Concello do Porriño reforza o seu compromiso coa empregabilidade moza acollendo alumnado de FP do IES Ribeira do Louro

Tres estudantes do Ciclo Básico de Reforma e Mantemento de Edificios realizan as súas prácticas en servizos municipais, contribuíndo á mellora do contorno urbano.
O alcalde destaca a importancia de que os mozos e mozas se formen nun sector con alta demanda laboral como é a construción e a reforma.

O Porriño, 1 de abril de 2026. O IES Ribeira do Louro segue afianzándose como centro de referencia na formación profesional vinculada ao sector da construción, un ámbito cunha alta demanda laboral e excelentes perspectivas de futuro, e o Concello do Porriño continúa a consolidarse como un espazo de aprendizaxe e inserción laboral para a mocidade local. Nesta ocasión, o goberno municipal amosa o seu apoio ao IES Ribeira do Louro a través do Ciclo Básico de Reforma e Mantemento de Edificios, cuxa terceira promoción está xa a demostrar a súa valía no mercado de traballo.

O Ciclo Básico de Reforma e Mantemento de Edificios forma alumnado capaz de incorporarse a unha ampla variedade de tarefas dentro do sector: desde empresas con obra nova, pasando por obras de mantemento e reforma, e terminando con empresas de decoración e acabados.

Este curso, todos os estudantes de 2º curso están a realizar prácticas en diversas empresas e entidades colaboradoras, demostrando a súa implicación, interese e capacidade de adaptación. A experiencia está a resultar un paso decisivo na súa traxectoria profesional, e a maioría deles terá acceso directo ao mercado laboral en canto finalice o ciclo, dada a forte demanda existente.

Entre estas colaboracións destaca a presenza de tres alumnos que están a desenvolver a súa formación en práctica no Concello do Porriño, contribuíndo ao mantemento e mellora do entorno urbano.

Gabriel, “un alumno enérxico e sempre disposto a aprender, destaca pola súa puntualidade e compromiso”, destaca a súa tutora Eva Groba, xa que a pesar de vivir preto do seu lugar de prácticas, cada día é o primeiro en chagar para comezar con calma e responsabilidade. Os profesionais que o acompañan subliñan a súa motivación e as súas ganas de traballar.

Ethan ten clarísimo o seu futuro profesional: a súa paixón é a construción. O seu obxectivo é converterse en albanel e incorporarse a unha pequena empresa, seguindo a tradición familiar, inspirándose, segundo conta, no oficio do seu avó. Nas prácticas está demostrando destreza, interese e unha vocación moi marcada polo traballo ben feito.

Andrei, máis tímido pero igual de constante, está especialmente ilusionado coa oportunidade de contribuír á mellora do seu propio concello. As tarefas de reparación de xardineiras, pintado de reixas e outros traballos de mantemento nas rúas de O Porriño permítenlle ver o impacto directo do seu esforzo. Contento coa experiencia, afirma que lle gustaría seguir os pasos do seu pai e continuar formándose e traballando no sector da construción.

A través destes exemplos, o IES Ribeira do Louro reafirma a importancia da FP como vía de acceso real ao emprego e como ferramenta esencial para formar profesionais preparados, responsables e capaces de responder ás necesidades dunha área en constante crecemento.

Esta colaboración permite que o alumnado aplique os coñecementos adquiridos na aula nun contorno real, ao tempo que prestan un servizo directo á cidadanía.

Un sector de futuro

O sector da construción, a reforma e a decoración vive un momento de gran dinamismo e demanda de profesionais. Desde o Concello, valórase moi positivamente que o IES Ribeira do Louro aposte por esta formación, que garante unha saída laboral case inmediata para os seus estudantes.

“É un orgullo ver como o noso alumnado se implica na mellora do Porriño mentres constrúen o seu propio futuro profesional”, destaca o alcalde, Alejandro Lorenzo, desde o goberno local. “A FP é unha peza clave para o desenvolvemento económico da nosa vila e sempre terá as portas do Concello abertas para colaborar na formación de novos especialistas”.

Con iniciativas coma esta, o Concello do Porriño e o IES Ribeira do Louro reafirman a súa alianza estratéxica para fomentar o emprego mozo e poñer en valor os oficios vinculados á construción e ao mantemento de edificios.

06/04/2026 in Educación e tecnoloxía, Emprego e formación

Oito exemplares de Sapoconchos nadan xa nas augas recuperadas das Gándaras de Budiño

Escolares do colexio de Atios xunto ao alcalde do Porriño e a conselleira de Medio Ambiente soltan oito exemplares de sapoconcho común no humidal das Gándaras de Budiño

Poden volver ao seu espazo natural tras as actuacións de restauración medioambiental levadas a cabo

O Porriño, 27 de marzo de 2026. Oito exemplares de sapoconcho común están de volta na súa casa nas Gándaras de Budiño. Foran retirados para poder levar a cabo as actuacións de restauración ambiental neste espazo natural e agora, volven á súa casa.

A titular de Medio Ambiente e Cambio Climático, Ángeles Vázquez, e o alcalde do Porriño, Alejandro Lorenzo, participaron, xunto a escolares de Atios, na solta destes réptiles de auga doce que hai en “moi poucas zonas de Galicia”, tal e como lembrou a conselleira. De feito, están en perigo de extinción.

Por iso foron trasladados: para protexelos durante os traballos de retirada de maleza e para recuperar a lámina de auga á que agora regresaron. “Cando se acometen esas obras hai que facer un estudo e control e retirar as tartarugas para volver despois a introducilas”, indicou Vázquez. Ao tempo, o alcalde mostraba a súa ledicia por esta recuperación e porque volvan ao seu espazo: “Demostramos así unha vez máis que o Porriño sabe xerar riqueza sen perder a súa alma verde. Non eliximos industria ou natureza. Eliximos ser referentes en ambas”, asegurou, engadindo que quere “un Porriño máis verde, máis sostible e máis vivo”.

Nese senso, a conselleira puxo en valor que as actuacións levadas a cabo deron como resultado “un ecosistema recuperado e preparado para a vida”, dixo Ángeles Vázquez, que engadiu que restaurar dun xeito planificado e baseado en criterios técnicos é clave “para conservar e preparar o futuro”.

Os traballos

En concreto, os traballos feitos para mellorar a dinámica hidrolóxica da lagoa, favorecendo a permanencia da auga durante todo o ano, permitiron recuperar a funcionalidade ecolóxica do humidal e garantir a continuidade das especies que dependen del. “Creamos un ecosistema máis equilibrado, resiliente e adaptado ás necesidades das especies propias das zonas húmidas”, subliñou a conselleira.

Así, hoxe se reintroduciron na lagoa oito exemplares de sapoconcho común, que é unha especie emblemática e moi vulnerable, que está incluída no Catálogo galego de especies ameazadas. Ten, ademais, un alto interese para a conservación da biodiversidade, asociada a humidais ben conservados e con abundante vexetación acuática.

Polo tanto, a súa reintrodución nesta área supón o mellor exemplo do éxito das actuacións levadas a cabo polo Goberno galego nas Gándaras de Budiño porque a súa presenza é un indicador da boa calidade ambiental deste ecosistema acuático, onde o sapoconcho común atopa condicións adecuadas para o seu desenvolvemento, grazas á existencia dunha lámina de auga permanente, vexetación palustre e zonas tranquilas para a cría e refuxio. De feito, este espazo natural constitúe un enclave estratéxico para a súa conservación no sur da provincia de Pontevedra, funcionando como área de reprodución, alimentación e hibernación.

Nesa liña, segundo explicou a conselleira, para garantir a protección desta especie, varias decenas de exemplares foron retirados da lagoa antes do inicio dos traballos e, agora, unha vez estabilizado o hábitat tras concluír as actuacións e finalizada a época de hibernación, procederase á súa reintrodución progresiva.

Deste xeito, o humidal das Gándaras de Budiño reforza o seu papel como hábitat esencial tanto para o sapoconcho común, como para aves acuáticas de interese, como a cerceta real (Anas crecca), que atopan neste espazo un lugar axeitado para alimentarse, reproducirse e refuxiarse ao longo do ano.

27/03/2026 in Educación e tecnoloxía, Medio Ambiente

O proxecto CONSTIC impulsa a presenza feminina nos sectores da construción e as TIC a través do documental “Terra de Canteiras”

Trátase dun proxecto con fondos europeos liderado dende o IES Ribeira do Louro do Porriño, coa colaboracion do Concello e empresas líderes do sector como Coperfi

O vídeo “Terra de Canteiras” narra a historia da pedra desde a súa extracción na canteira ata a súa incorporación na obra. Ao longo deste percorrido, móstranse diferentes perfís profesionais, na súa maioría de mulleres que traballan nas fases de extracción, transformación, deseño e construción

O Porriño, 25 de marzo de 2026.- O IES Ribeira do Louro, en colaboración con empresas líderes do sector e o Concello do Porriño, presentou hoxe CONSTIC, unha estratexia integral deseñada para mellorar as competencias e o acceso das mulleres aos sectores da construción e as TIC (Tecnoloxías da Información e Comunicación).

Como punta de lanza desta iniciativa, presentouse o vídeo “Terra de Canteiras”. Esta peza audiovisual realiza un percorrido emocional e técnico pola vida dunha pedra: desde a súa extracción na canteira ata a súa colocación final en obra. O fío condutor son os testemuños de mulleres que ocupan postos clave en toda a cadea de valor: operarias de extracción, enxeñeiras, arquitectas e empresarias que lideran o sector desde a innovación.

Fíxose nun acto no salón de plenos do Porriño, onde estiveron presentes, ademais do equipo directivo do centro educativo porriñés, o alcalde do municipio, a concelleira de Educación ou o delegado territorial da Consellería de Educación.

“Trátase de visibilizar o talento que xa existe e de inspirar ás novas xeracións, en especial ás mulleres, para que vexan nestes sectores tradicionais, pero á súa vez cheos de innovación, unha oportunidade de futuro vinculada á tecnoloxía”, explicou o alcalde neste evento que, neste mes de marzo, enmárcase nos actos en torno ao 8M. “Grazas ao proxecto CONSTIC, estamos demostrando que esa tradición non é cousa do pasado, senón un motor de futuro que debe ser innovador, tecnolóxico e, por riba de todo, igualitario”. O rexidor destacou tamén a importancia da pedra e da arquitectura no “pasado, presente e futuro do Porriño” e ensalzou o labor que se está a realizar tanto desde a formación como no ámbito da empresa privada.

No salón de plenos tamén estiveron as verdadeiras protagonistas do vídeo e do proxecto: Alba, Pili e Ari, alumnas do IES; Milagros, exalumna e primeira muller da promoción da pedra; e Eva Groba, profesora do centro, que participaron nunha mesa redonda.

Que é CONSTIC?

CONSTIC é “unha estratexia conxunta para a mellora de competencias e acceso da muller nos sectores TIC e construción”, visibilizando as grandes profesionais que xa traballan neles. Un proxecto que nace do IES Ribeira do Louro en asociación con o IES Dr. Lluís Simarro en Xàtiva, o IES Abastos en Valencia e Atin Services no Porriño; coa colaboración de importantes empresas do sector como Coperfi, Minera de Rocas, e Godoy Maceira, e do Concello do Porriño para mellorar os sistemas de formación e o acceso das mulleres na construción e TIC, co obxectivo de fomentar a súa incorporación a estas especialidades.

Este proxecto, financiado pola Unión Europea con fondos NEXT GENERATION EU, pretende mellorar os sistemas de Formación Profesional en Construción e TIC, fomentar o acceso de mulleres a estas especialidades e impulsar a innovación educativa cun enfoque de igualdade de xénero.

Os ciclos

As alumnas que aparecen no vídeo cursaron o Ciclo Medio Dual Intensivo de Pedra Natural que imparte o IES Ribeira do Louro en convenio coas empresas do clúster do Granito e con prácticas remuneradas nestas empresas do sector, nas que os alumnos e alumnas cobran xa 800€ euros mensuais.

O vídeo

Para iso, unha das súas primeiras iniciativas é o vídeo “Terra de Canteiras”, unha peza audiovisual que narra a historia dunha pedra desde a súa extracción na canteira ata a súa incorporación na obra. Ao longo deste percorrido, móstranse diferentes perfís profesionais, na súa maioría de mulleres que traballan nas fases de extracción, transformación, deseño e construción.

O vídeo lévanos por todo o proceso: con el viaxamos a través do relato de operarias polas fases de extracción e procesamento nas canteiras e empresas do sector; con enxeñeiras e arquitectas no proceso de deseño e especificacións técnicas, e con empresarias que tamén lideran o sector. Trátase de visibilizar este talento, inspirar a economía sostible e construír un futuro con igualdade en sectores tradicionais a través da innovación e a tecnoloxía.

Ligazón do vídeo:

26/03/2026 in Alcaldía, Educación e tecnoloxía, Emprego e formación, Igualdade, Urbanismo, comercio e industria

O Porriño convértese no aliado das familias esta Semana Santa con campamentos e obradoiros

Ao campamento de Semana Santa súmase o obradoiro de programación e tecnoloxía

24 de marzo de 2026, O Porriño. O Concello do Porriño prepara unha Semana Santa de conciliación familiar e de actividades para a cativada a través de diferentes propostas, como o campamento que se desenvolverá no colexio José Fernández López ou un novo obradoiro de programación e tecnoloxía que se impartirá na aula CeMIT do Multiusos de Torneiros.

No caso deste obradoiro, terá lugar os días 30 e 31 de marzo (luns e martes de Semana Santa) e 1 e 6 de abril (mércores de Semana Santa e luns de Pascoa), e está dirixido a nenos e nenas de 4 a 12 anos. Son obradoiros de balde que se desenvolverán en colaboración coa rede CeMIT (Centros para a Modernización e Inclusión Tecnolóxica). A programación é unha mostra da colaboración das concellarías de Formación, Política Social e Educación.

“A nosa aposta son actividades que axuden á conciliación e que, ao mesmo tempo, permitan que os máis pequenos e pequenas desfruten dun tempo de ocio educativo, compartindo experiencias e aprendizaxes nunha contorna segura”, sinalou o alcalde, Alejandro Lorenzo. Explicou, no caso concreto dos obradoiros, que conseguen “que os máis pequenos aprendan xogando e tamén que nais e pais poidan conciliar”. Pola súa parte, a concelleira de Formación, Teresa Veloso, destacou a importancia deste achegamento ás novas tecnoloxías de forma controlada na infancia. As inscricións poden facerse a través do correo electrónico cemit.oporrino@xunta.gal.

Os campamentos

Celebraranse no CEIP Xosé Fernández López en horario de 8:30 a 14:30 horas, os días 30 e 31 de marzo e 1 e 6 de abril. A actividade está dirixida a nenos e nenas de entre 3 e 12 anos, ambos inclusive, tendo prioridade aqueles que estean empadroados no Porriño.

A través desta proposta, o goberno municipal ofrece ás familias un espazo seguro, educativo e lúdico no que a cativada poderá compartir tempo cos seus iguais e participar en diferentes dinámicas durante as súas vacacións escolares, mentres as súas nais, pais ou titores cumpren coas súas responsabilidades. A listaxe provisional de admitidos está dispoñible premendo na seguinte ligazón:

LISTADO PROVISIONAL CAMPAMENTO SEMANA SANTA 2026

Aula CEMIT

A Aula CeMIT, integrada na rede da Xunta de Galicia a través da Axencia para a Modernización Tecnolóxica de Galicia, é un espazo público de referencia para o impulso das competencias dixitais no municipio, facilitando o acceso á tecnoloxía e promovendo a inclusión dixital.

Ademais destes obradoiros específicos para a mocidade, a aula ofrece cursos básicos de alfabetización dixital, formación específica en ferramentas ofimáticas como Word, Excel ou Access, así como accións formativas vinculadas ao emprego e ás novas tendencias tecnolóxicas. Entre elas inclúense propostas orientadas á creación de videoxogos, iniciación á robótica ou coñecementos prácticos sobre o uso de teléfonos móbiles e tablets.

Ademais da formación regrada, a veciñanza poderá facer uso dos equipos informáticos da aula co acompañamento dun técnico especializado, que prestará apoio personalizado para resolver dúbidas, realizar trámites electrónicos ou mellorar as habilidades dixitais.

Horario

O horario de funcionamento é de luns a venres de 9:00 a 13:00 horas, ampliándose tamén aos xoves pola tarde de 15:00 a 19:00 horas, co obxectivo de facilitar o acceso ao maior número posible de persoas usuarias.

24/03/2026 in Benestar, Educación e tecnoloxía, Emprego e formación

As nenas e nenos do Porriño celebran o Día da Árbore cunha prantación na Risca

Alumnado dos colexios Hermanos Quiroga e José Fernández López, visitaron o pulmón verde da
Louriña para aprender a importancia destes espazos e contribuir á súa conservación

O Porriño, 23 de marzo de 2025.- Medio cento de alumnos e alumnas dos colexios Hermanos Quiroga e José Fernández López do Porriño, participaron este luns pola maña na celebración do Día da Árbore e o Día dos Bosques, cunha plantación de árbores na contorna da Risca, na que participou o alcalde, Alejandro Lorenzo; o concelleiro de Medio Ambiente, Carlos González, e o presidente da Comunidade de Montes Santa María de O Porriño.

De feito, a prantación fíxose en terreos comunais, no entorno da Risca. 25 “castaños Maruxa”, un tipo de clon de castiñeiro híbrido que se elexiu polo seu bo crecemento e resistencia a enfermidades.

“Hoxe falamos de futuro: o futuro da nosa vila, con estes nenos e nenas que se educan nos valores do medio ambiente, e o futuro da nosa contorna, porque deles depende seguir conservando este espazo.”, explicou Alejando Lorenzo, apuntando que “O Porriño non só e industria: tamén é cultura, é deporte e é natureza, con estes árbores que nos axudan a mellorar a calidade do aire, a producir osíxeno, a previr incendios ou inundacións ou, simplemente, se subides ata aqui, ata a Risca, a respirar”.

A Risca

Os cativos tiveron a oportunidade de prantar así árbores nun dos espazos naturais máis valiosos e especiais do Porriño, tanto polo seu interese ambiental como polo seu valor paisaxístico e social. Situada nunha contorna privilexiada, este enclave destaca pola súa riqueza ecolóxica, converténdose nun punto de referencia para a conservación da biodiversidade e para o desfrute da natureza por parte da veciñanza.

De feito dende a Comunidade de Montes explicaron á cativada a importancia de conservar esta paisaxe, este pulmón verde, este espazo que serve si, para lecer, pero tamén para coidar: fonte de osíxeno e de prevención de incendios ou inundacións. Por iso o compromiso do Goberno Municipal é, con estes actos , a protección do medio ambiente e ao mesmo tempo, inculcar na mocidade unha aprendizaxe vital para entender a importancia do desenvolvemento sostible e responsable.

A Risca constitúe un dos espazos naturais máis ricos e importantes da comarca, así como unha auténtica infraestrutura verde para o conxunto do val do Louro. A súa masa forestal desempeña unha función esencial como pulmón natural, contribuíndo á mellora da calidade do aire, á regulación da temperatura e á absorción de dióxido de carbono, factores clave nun contexto de crecente preocupación polo cambio climático.

Entornos naturais coma este favorecen a conservación da biodiversidade, servindo de hábitat para numerosas especies de flora e fauna, e actúa como corredor ecolóxico dentro do territorio. A súa presenza resulta tamén fundamental para o equilibrio hídrico da contorna, facilitando a infiltración da auga e axudando a previr a erosión do solo.

Árbores e bosques, as claves do noso futuro

O Día da Árbore é unha xornada dedicada a poñer en valor a importancia dos ecosistemas forestais para a vida no planeta; para iso marca como o seu obxectivo fomentar a plantación de árbores e sensibilizar á sociedade sobre a necesidade de coidar e conservar o medio natural.

Esta celebración está estreitamente vinculada ao Día Internacional dos Bosques, promovido polas Nacións Unidas e celebrado cada 21 de marzo, co propósito de destacar o papel esencial dos bosques na loita contra o cambio climático, na protección da biodiversidade e no desenvolvemento sostible. Ambas datas comparten unha mesma finalidade: promover unha maior conciencia social sobre a importancia de preservar e xestionar de forma responsable os recursos naturais. Ambas datas constitúen unha oportunidade para reforzar valores como o respecto polo medio ambiente, a sustentabilidade e a responsabilidade colectiva. As árbores e os bosques desempeñan un papel fundamental na mellora da calidade do aire, na regulación do ciclo da auga e na conservación dos ecosistemas, contribuíndo tamén ao benestar das persoas e á calidade de vida nos núcleos urbanos e rurais.

23/03/2026 in Educación e tecnoloxía, Medio Ambiente

O Multiusos de Torneiros acolle novos obradoiros para achegar a tecnoloxía á cidadanía

O Concello do Porriño, en colaboración coa Fundación Cibervoluntarios, pon en marcha no Multiusos de Torneiros dous novos obradoiros de formación dixital dirixidos á veciñanza en xeral e ás persoas maiores de 60 anos.
As actividades desenvolveranse durante o mes de abril en horario de mañá, con continuidade en maio e xuño, e requiren inscrición previa dentro dos prazos establecidos.

Porriño 18 de marzo de 2026.- O Concello do Porriño continúa reforzando o seu compromiso coa formación tecnolóxica da cidadanía coa posta en marcha de dous novos obradoiros en colaboración coa Fundación Cibervoluntarios. Estas accións formativas están dirixidas tanto á veciñanza en xeral como, de maneira específica, ás persoas maiores de 60 anos, co obxectivo de reducir a fenda dixital e fomentar o uso seguro e práctico das novas tecnoloxías.

Os cursos desenvolveranse no Multicentro de Torneiros en horario de mañá ao longo do mes de abril, con continuidade prevista durante os meses de maio e xuño.

Por unha banda, impartirase o obradoiro “Apps útiles para a xestión de trámites en internet”, que terá lugar do 13 ao 16 de abril, en horario de 10:00 a 13:00 horas. As persoas interesadas deberán inscribirse previamente ata o día 24 .

Por outra, está programado o curso “Iniciación ao mundo dixital”, dirixido a maiores de 60 anos, que se desenvolverá do 20 ao 23 de abril no mesmo horario. Neste caso, o prazo de inscrición permanecerá aberto ata o día 30 .

Ambas iniciativas ofrecerán formación práctica sobre o uso de internet, administración electrónica, aplicacións móbiles, seguridade dixital e ferramentas de comunicación, facilitando así a autonomía dixital da cidadanía.

O alcalde do Porriño, Alejandro Lorenzo, destacou a importancia destas accións formativas: “Seguimos apostando por achegar a tecnoloxía a toda a veciñanza, especialmente ás persoas maiores, para que ninguén quede atrás nun mundo cada vez máis dixital. Estes obradoiros non só proporcionan coñecementos, senón tamén confianza e autonomía no uso das ferramentas tecnolóxicas”.

Pola súa banda, a concelleira de Emprego e Formación, Teresa Veloso, subliñou que “a colaboración coa Fundación Cibervoluntarios permítenos ofrecer unha formación de calidade, accesible e adaptada ás necesidades reais da poboación”.

As persoas interesadas poden formalizar a súa inscrición a través da web www.yoconecto.org, no teléfono 986 33 82 17 ou tamén a través do correo electrónico administracion@porremprego.org, dentro dos prazos establecidos para cada curso.

Con esta iniciativa, o Concello do Porriño reafirma o seu compromiso coa inclusión dixital e a mellora da calidade de vida da súa cidadanía mediante a formación e o acceso ás novas tecnoloxías.

18/03/2026 in Educación e tecnoloxía, Emprego e formación

Aberto o prazo de inscrición para o campamento de Semana Santa do Porriño

A actividade contará con 50 prazas e desenvolverase en instalacións municipais os días 30 e 31 de marzo e 1 e 6 de abril

Porriño 12 de marzo de 2026.– O Concello do Porriño abre o prazo de inscrición para participar no Campamento de Semana Santa, unha iniciativa que se desenvolve seguindo a liña de actuación do V Plan de Igualdade de Oportunidades e que ten como obxectivo facilitar a conciliación da vida familiar, laboral e persoal das familias do municipio.

A través desta proposta, o goberno municipal ofrece ás familias un espazo seguro, educativo e lúdico no que os nenos e nenas poderán compartir tempo cos seus iguais e participar en diferentes dinámicas e actividades durante as súas vacacións escolares, mentres as súas nais, pais ou titores cumpren coas súas responsabilidades.

O alcalde do Porriño, Alejandro Lorenzo, destacou que este tipo de iniciativas responden á vontade do Concello de apoiar ás familias nos períodos non lectivos. “Desde o Concello seguimos apostando por actividades que axuden á conciliación e que ao mesmo tempo permitan que os máis pequenos e pequenas disfruten dun tempo de ocio educativo, compartindo experiencias e aprendizaxes nun entorno seguro”, sinalou.

O campamento desenvolverase en instalacións municipais, sendo o lugar de entrega e recollida o CEIP Xosé Fernández López, en horario de 8:30 a 14:30 horas, os días 30 e 31 de marzo e 1 e 6 de abril. O aforo estará limitado a 50 participantes e a actividade está dirixida a nenos e nenas de entre 3 e 12 anos, ambos inclusive, tendo prioridade aqueles que estean empadroados no Porriño.

A concelleira de Educación e Igualdade, Carolina González, explicou que esta iniciativa forma parte da estratexia municipal para impulsar políticas de igualdade e apoio ás familias. “Este campamento está pensado para ofrecer ás familias un recurso útil durante as vacacións escolares e, ao mesmo tempo, para que os nenos e nenas poidan disfrutar de actividades dinámicas, creativas e de convivencia co resto dos participantes”, indicou.

O prazo de inscrición abrirase o venres 13 de marzo ás 9:00 horas e pecharase o venres 20 ás 9:00 horas, podendo realizarse tanto de maneira presencial a través do Rexistro municipal como mediante a sede electrónica do Concello.

As persoas interesadas deberán cubrir a folla de inscrición oficial, debidamente asinada, e achegar a documentación obrigatoria. No caso de existir algunha circunstancia excepcional, tamén deberán presentar a documentación correspondente que aparece debidamente descrita na propia folla de inscrición. O formulario estará dispoñible na páxina web municipal ou poderá recollerse presencialmente no Rexistro do Concello.

Con esta iniciativa, o Concello do Porriño continúa reforzando o seu compromiso coas familias do municipio, promovendo actividades que favorecen a conciliación e ofrecen aos máis pequenos e pequenas alternativas de lecer educativo durante os períodos non lectivos.

Preme na seguinte ligazón para descargar a folla de inscrición:

FOLLA DE INSCRIPCIÓN E BAREMO CAMPAMENTO DE SEMANA SANTA 2026

12/03/2026 in Benestar, Educación e tecnoloxía, Mocidade

O Concello do Porriño remata as súas Xornadas formativas sobre alimentación saudable nos centros educativos da vila

As actividades, impulsadas pola Concellería de Sanidade e a OMIX no marco do Plan de Saúde Local e coa colaboración do Sergas, realizáronse en horario lectivo ao longo de catro xornadas nas que participaron case 400 alumnos e alumnas.

O Porriño, 12 de marzo de 2026 – O Concello do Porriño desnvolveu por cuarto ano consecutivo as Xornadas Formativas sobre Alimentación Saudable nos centros educativos do municipio, unha iniciativa dirixida ao alumnado de 2º e 3º de Educación Primaria e 2º de ESO co obxectivo de fomentar hábitos de vida saudables na cativada.

As actividades, impulsadas pola Concellería de Sanidade e a OMIX no marco do Plan de Saúde Local e coa colaboración do Sergas, realizáronse en horario lectivo ao longo de catro xornadas nas que participaron case 400 alumnos e alumnas.

A posta en marcha destas formacións responde ao incremento de hábitos alimentarios pouco saudables entre a poboación infantil e xuvenil, asociados ao consumo de produtos ultraprocesados, bebidas azucradas e ao sedentarismo, factores que poden derivar en problemas como sobrepeso, obesidade ou dificultades de concentración no ámbito escolar. A escola constitúe un espazo clave para a adquisición de coñecementos e valores relacionados coa saúde, polo que adaptar os contidos á idade do alumnado permite traballar a nutrición dunha maneira próxima, práctica e comprensible.

As xornadas teñen como obxectivo promover unha alimentación equilibrada e variada, dar a coñecer os principais grupos de alimentos e a súa función no organismo, fomentar unha actitude crítica fronte á publicidade e ao consumo de produtos pouco saudables, sensibilizar sobre a relación entre alimentación, actividade física e benestar xeral e implicar ao alumnado na toma de decisións responsables sobre a súa propia saúde.

Alejandro Lorenzo destacou que actividades como estas teñen un valor esencial para os centros educativos, afirmando que “a escola é un espazo privilexiado para transmitir hábitos de vida saudables, e iniciativas como esta axudan ao alumnado a comprender, de maneira sinxela e práctica, a importancia de coidar a súa alimentación. Investir en educación para a saúde é investir no benestar presente e futuro da nosa mocidade.”

Con esta iniciativa, o Concello do Porriño reafirma o seu compromiso coa promoción da saúde e coa creación de contornas educativas que favorezan o desenvolvemento de hábitos de vida saudables entre a mocidade.

12/03/2026 in Benestar, Educación e tecnoloxía, Mocidade

A Aula CeMIT do Porriño amplía horario e reforza a súa oferta formativa en competencias dixitais

O espazo municipal de Torneiros incorpora novos cursos de alfabetización tecnolóxica, ofimática, robótica e ferramentas dixitais para mellorar a empregabilidade e a inclusión da veciñanza

Porriño, 4 de marzo de 2026.- O Concello do Porriño reforza a súa aposta pola formación dixital coa renovación da actividade da Aula CeMIT, situada no Multiusos de Torneiros, ampliando o seu horario de atención e incorporando unha oferta formativa máis ampla e adaptada ás necesidades actuais da veciñanza.

A Aula CeMIT, integrada na rede da Xunta de Galicia a través da Axencia para a Modernización Tecnolóxica de Galicia, consolídase como un espazo público de referencia para o impulso das competencias dixitais no municipio, facilitando o acceso á tecnoloxía e promovendo a inclusión dixital.

A partir de agora, a aula ofrecerá cursos básicos de alfabetización dixital, formación específica en ferramentas ofimáticas como Word, Excel ou Access, así como accións formativas vinculadas ao emprego e ás novas tendencias tecnolóxicas. Entre elas inclúense propostas orientadas á creación de videoxogos, iniciación á robótica ou coñecementos prácticos sobre o uso de teléfonos móbiles e tablets.

Ademais da formación regrada, a veciñanza poderá facer uso dos equipos informáticos da aula co acompañamento dun técnico especializado, que prestará apoio personalizado para resolver dúbidas, realizar trámites electrónicos ou mellorar as habilidades dixitais.

O horario de funcionamento será de luns a venres de 9:00 a 13:00 horas, ampliándose tamén aos xoves pola tarde de 15:00 a 19:00 horas, co obxectivo de facilitar o acceso ao maior número posible de persoas usuarias.

Entre os contidos que se abordarán destacan cuestións prácticas e de utilidade diaria, especialmente dirixidas ás persoas maiores, como as compras por internet, o uso seguro da banca electrónica, a xestión responsable das redes sociais ou o acceso a servizos dixitais como a e-saúde e a formación en liña.

O alcalde do Porriño, Alejandro Lorenzo, destacou que “nun contexto no que a dixitalización avanza a gran velocidade, é fundamental que desde as administracións públicas facilitemos ferramentas para que ninguén quede atrás. A Aula CeMIT é un recurso clave para mellorar a empregabilidade, fomentar a autonomía persoal e garantir un acceso seguro ás novas tecnoloxías”.

Con esta renovación, o Concello do Porriño reafirma o seu compromiso coa modernización e coa formación continua, promovendo unha cidadanía máis preparada, autónoma e adaptada aos retos dun mundo cada vez máis dixital.

05/03/2026 in Educación e tecnoloxía, Emprego e formación