Nenas e nenos, integrantes do ‘Consello Municipal da Infancia’ do Porriño, interveñen no Foro de Participación Infantil do Parlamento de Galicia antes do Pleno Infantil do vindeiro día 20

Representantes do Consello Municipal de Infancia do Concello do Porriño foron convidados a participar no VI Foro de Participación Infantil no Parlamento de Galicia con motivo da conmemoración do ‘Día Universal do Neno’.

É a primeira vez desde que se celebra este foro no parlamento de Galicia da man de UNICEF que conta coa presenza de nenos e nenas de fora de Santiago de Compostela.

Tratouse dunha boa oportunidade para que os representantes no consello municipal de infancia do noso municipio, recoñecido recentemente como Cidade Amiga da Infancia por UNICEF, se achegasen ao espazo no que se toman as decisións sobre as políticas autonómicas, a para que a súa voz fose escoitada mais alá do eido local.

Para esta ocasión a representación do Porriño recaeu en Noa Vázquez Ojea e David Alonso Pérez que como voceiros do CEIP de Atios foron escollidos por sorteo entre os participantes no Pleno Infantil do pasado mes de abril, que estiveron acompañados pola  concelleira de Educación e Xuventude Lourdes Moure Varela, ademais de  por Noelia de la Fuente Pérez, da OMIX do Concello do Porriño, e do director do seu centro educativo, Roberto Devesa Fernández.

A participación neste foro, xunto co Pleno Infantil, previsto para o próximo día 20 de novembro, no Concello,  supoñen unha nova oportunidade para dar relevancia á infancia na axenda pública, reafirmar a vixencia da Convención sobre os Dereitos da infancia e poñer a mirada nos cambios necesarios para que o seu contido sexa realidade para todos os nenos e nenas do Porriño.

Inaugurada a exposición ‘Flores para As Meninas’, que estará no Centro Cultural Municipal ata o vindeiro día 31

A Concellería de Ensino e Participación Cidadá do Concello de Ponteareas, que dirixe Cristina Fernández, abre fronteiras para que as trinta ‘Meninas’ realizadas por colectivos e centros de ensino de toda a área metropolitana expoñan a súa beleza e creatividade nos diferentes concellos veciños. Organizadas por quendas, as Meninas visitarán os concellos de Mondariz, Mondariz Balneario, Salceda, Covelo, As Neves, A Cañiza e O Porriño.

A responsable do departamento de Educación do Porriño, Lourdes Moure, abriu esta exposición que estará na nosa vila dende este martes, día 16, ao 31 de outubro, no Centro Cultural municipal para que toda a cidadanía poida desfrutar destas obras de arte realizadas na súa maior parte con materiais de refugallo.

O proxecto “Flores para as Meninas” creado pola profesora Pilar Gallego e dirixido dende a concellería de Ensino de Ponteareas, contou coa colaboración de toda a comunidade educativa e distintos colectivos que agasallaron estas pezas para que logo puideran ser patrocinadas e doados os cartos conseguidos a unha entidade sen ánimo de lucro.

Pinchonen@ este sábado co ‘Obradoiro de chocolates e galletas’ da cociñeira e blogueira Inés Carcacía

Este sábado, día 15, as actividades do Pinchonen@ comezaron ao mediodía cun ‘Obradoiro de chocolates e galletas’, coa famosa cociñeira e blogueira Inés Caracía, na que as rapazas e rapaces participantes aprenderon a facer estesalimentos;  ás 6 da tarde está un Show Cooking, impartido por Miri e as 9 da noite Photocall, todo coa participación de Noemí Fernández.

As persoas interesadas en seguir case en directo as actividades e o minuto a minuto deste ‘Pinchonen@’ poden facelo entrando no seu perfil de Facebook, creado para esta ocasión, www.facebook.com/pinchonenao.

O Porriño celebra este venres e sábado o ‘1º Pinchonen@’, coa participación de Miri, de Masterchef5, a blogueira e cociñeira Inés Carcacía, e Noemí García, finalista de ‘La Voz Kids’

A concelleira de Xuventude, Lourdes Moure, a responsable de Festas, Soledad Girón, e o concelleiro de Limpeza, Orlando Mázquez, inauguraron este venres a 1ª edición do ‘Pinchonen@’, organizado a través da OMIX do Porriño, como parte da iniciativa de participación infantil e adolescente, enmarcada na candidatura do Porriño ao recoñecemento de Cidade Amiga da Infancia de UNICEF.

O Consello Municipal de Infancia do Porriño,  órgano  que  representa a tódolos nenos, nenas e adolescentes da vila, acordara no seu último Pleno, entre outras iniciativas, a  realización do  “Pinchonen@” con produtos saudables e “non tan saudables” durante as datas  14 e 15  do mes de setembro,  coincidindo coa antesala das Festas do Cristo.

Miri, de Masterchef5, a cociñeira Inés Carcacía e Noemí finalista de La Voz Kids

Este 1º ‘Pinchonen@’ empeza a andar cunha completa axenda de actividades que terán coma escenario a   ‘Carpa do Roxy’ que hoxe acolleu a devandita presentación coa presenza de Miri, concursante de ‘Masterchef5’-á que os seus fans poden seguir na súa conta de Instagram @mirimchef5-  e da porriñesa Noemí García, finalista de ‘La Voz Kids’, seguida do concerto infantil ‘Eu cociño, ti cociñas?’, do grupo Mamá Cabral.

Mañá, sábado, día 15, as actividades empezarán ao mediodía cun ‘Obradoiro de chocolates e galletas’, coa famosa cociñeira e blogueira Inés Caracía; ás 6 da tarde un Show Cooking, impartido por Miri e as 9 da noite Photocall, todo coa participación de Noemí Fernández.

As persoas interesadas en seguir case en directo  as actividades e o minuto a minuto deste ‘Pinchonen@’ poden facelo entrando no seu perfil de Facebook, creado para esta ocasión, www.facebook.com/pinchonenao.

O Concello organiza, dentro da programación das ‘Festas do Cristo 2018’, o ‘1º Pinchonen@’, aprobado polo Pleno Infantil

A Concellería de Xuventude do Concello do Porriño a través da súa OMIX, impulsa a iniciativa de participación infantil e adolescente, enmarcada na candidatura do Porriño ao recoñecemento de Cidade Amiga da Infancia de UNICEF.
No tempo que se leva traballando conxuntamente con centros escolares no recoñecemento do Porriño de “Cidade Amiga da Infancia”, entre outros resultados acadouse a creación do ‘Consello Municipal de Infancia do Porriño’, órgano que representa a tódolos nenos, nenas e adolescentes deste concello.
Este órgano acordou no último Pleno, entre outras iniciativas, a idea de realización do “Pinchoneno’, con produtos saudables e “non tan saudables” durante as datas 14 e 15 do mes de setembro, coincidindo coa antesala das festas locais. Esta proposta logo de ser traballada nas aulas, e debatida no salón de plenos, foi aprobada por unanimidade no Pleno infantil do pasado mes de abril.
En resposta a esta demanda, dende a Concellería de Xuventude co apoio da Concellería de Festas levarase a cabo, a primeira edición deste ‘1º Pinchonen@’ dacordo co Pleno. Unha actividade especial, cun atractivo formato que, ademais, supón primeiro paso para tratar de consolidalo e acadar en futuras edicións a implicación do sector da hostalería e o comercio local.
Dende a Concellería de Educación sinálase que “agora o mais importante é dar resposta a esta iniciativa de participación infantil, enmarcada na candidatura do Porriño ao recoñecemento de Cidade Amiga da Infancia de UNICEF, tratando de atender as opinións, intereses e necesidades dos veciños e veciñas mais novos”.
O ‘Pinchonen@’ contará cunha completa axenda de actividades, que serán levadas a cabo na “carpa do Roxy”: entre outras, un concerto infantil, un show cooking, un obradoiro de cociña, un photocall ou agasallo.
Así mesmo, estará presente “Miri”, participante do 5º Masterchef-España, nos diversos talleres e actividades programadas para esas datas. Tamén estará Noemí Férnandez, segunda clasificada na final do programa ‘La Voz Kids’, veciña do Porriño, e tamén a famosa cociñeira e blogueira Inés Carcacía.
En relación cos obradoiros, dende a Concellería de Educación subliñase que: as prazas nos mesmos serán cubertas entre os interesados por rigorosa orde de chegada ao recinto no día da súa realización; as idades dos participantes serán desde os 7 ata os 14 anos; o Público que así o desexe poderá asistir ata completar aforo, 200 persoas máximo e o ‘Photocall’ para as dúas datas, non ten límite de aforo.

A alcaldesa supervisa o remate dos traballos de recuperación, reforma e mellora da Escola da Galiña Azul, en Torneiros, nos que o Concello investiu máis de 37.000€

A alcaldesa vén de supervisar, persoalmente, o remate dos traballos de reforma e mellora da Escola Infantil A Galiña Azul de Torneiros, que o Concello acometeu cun orzamento de 37.577,53€, con cargo á liquidación do Consorcio Galego de Benestar.

Eva García de la Torre, que estivo acompañada pola concelleira de Educación, Lourdes Moure, comprobou que as obras abrangueron a retirada do perpiaño superior do inmoble, a colocación de novas baixantes, a reparación da caneta posterior e do comedor; a demolición de varios tabiques; a eliminación das filtracións de auga; arranxo oe muro de contención do xardín de xogos; substitución do pavimento; colocación dun novo pechamento metálico na entrada; amaño do xardín e o céspede; substitución dos zócolos; reparación de   xogos, elementos e bambáns; pintado das varandas, selado de fiestras ou a limpeza das fachadas cun tratamento de auga a presión.

A alcaldesa subliñou que a reforma, recuperación e reparación desta gardería era unha demanda “xusta”, longamente solicitada polas veciñas e veciños, país e nais e os responsábeis do centro, “e un compromiso meu, persoal, con eles”, indicou, afirmando que seguirá a demandar ao Goberno de Galicia a creación dunha nova gardería no Porriño, “porque  na Xunta saben perfectamente que somos o concello no que máis nenas e nenos nacen na provincia de Pontevedra e o segundo en crecemento vexetativo de toda Galicia”.

O Goberno local cumpre co seu compromiso e acomete a reparación, mellora e reforma da Gardería da Galiña Azul, en Torneiros, que estará rematada a finais deste mes de agosto

O Goberno local do Porriño vén de iniciar as obra de mellora e reforma da Escola Infantil A Galiña Azul de Torneiros, con cargo á liquidación do Consorcio Galego de Benestar, cun orzamento de 37.577,53€.

Os traballos, que comezaron a semana pasada, estarán rematados a finais deste mes de agosto e abranguen a retirada do perpiaño superior do inmoble, a colocación de novas baixantes, a reparación da caneta posterior e do comedor, coa demolición de varios tabiques; a eliminación das filtracións de auga; arranxo de muro de contención do xardín de xogos, substitución do pavimento; reconstrución do cadro eléctrico; colocación dun novo pechamento metálico na entrada ou  arranxo xeral do mobiliario, xogos, elementos e bambáns.

A reforma, recuperación e reparación da Galiña Azul en Torneiros, non só era unha demanda longamente solicitada polas veciñas e veciños e responsábeis do centro, senón un dos compromisos da alcaldesa, Eva García de la Torre que, de novo, pide á Xunta a creación dunha nova gardería no Porriño, considerando que “somos o concello no que máis nenos nacen na provincia e o segundo en crecemento vexetativo de toda Galicia”.

O Concello inviste 15.000€ nas obras da cuberta e dos baños do CEIP de Atios que, lembra a alcaldesa, debería de facer a Xunta de Galicia

Coma sinalara a alcaldesa hai uns días, e dacordo co compromiso que adquirirá o pasado día 7 coa Asociación de Nais e Pais (ANPA) do CEIP Plurilingüe de Atios, o Concello do Porriño iniciou xa as obras de mellora do tellado do centro que, subliña Eva García de la Torre, “asume na súa totalidade o Concello, por medio da Concellería de Educación, maila que a competencia de realización das mesmas é da Xunta de Galicia, como establece o regulamento”.

No mesmo centro, e como a alcaldesa asegurara ás Nais e Pais e ao director do CEIP de Atios,  o Goberno local fixo unha avaliación do estado no que se atopan os baños e, así mesmo, realizará os traballos de substitución dos mesmos.

En total, subliña Eva García de la Torre, o Concello do Porriño investirá máis de 15.000€ nestas obras que, insiste, son competencia da Consellería de Educación da Xunta de Galicia, o mesmo que os danos estruturais nas fachadas que causan filtracións de auga provocando curtocircuítos no sistema eléctrico.

A alcaldesa repite queo Goberno local fará todo canto sexa preciso para que  as nenas e nenos que estudan nos centros educativos do Porriño acudan a clase coa máxima seguridade e que estuden en colexios en perfectas condicións, algo que, polo que se ve, non preocupa moito á Xunta”.

A alcaldesa cumpre o seu compromiso coas Nais e Pais (ANPA) do CEIP de Atios e o Concello inicia os traballos na cuberta do colexio

Tal e coma se comprometerá coa Asociación de Nais e Pais (ANPA) do CEIP Plurilingüe de Atios, nunha xuntanza mantida o pasado día 7, a alcaldesa do Porriño informa do inicio das obras de mellora da cuberta do centro, “traballos que asume na súa totalidade o Concello, por medio da Concellería de Educación”.

No mesmo centro, e como adiantara García de la Torre ás Nais e Pais e ao director do mesmo, o Concello fará unha avaliación do estado no que se atopan os baños e, en vista do mesmo, decidirá sobre a actuación nos mesmos.

Eva García de la Torre vén denunciando, “insistentemente”, o estado de “abandono” no que a Xunta de Galicia ten os colexios públicos do Porriño, nalgúns casos, como o do CEIP de Atios, con “danos estruturais nas fachadas que causan filtracións de auga provocando curtocircuítos no sistema eléctrico”, sen que o Goberno galego “asuma as súas obrigas, aínda que teña a  competencia exclusiva nesta materia”.

A alcaldesa subliña que “o Goberno local velará pola seguridade das nenas e nenos que estudan nos centros da nosa vila e a calidade da educación que reciben, que ademais de na capacitación dos seus profesores e nas materias que imparten, tamén está en que dispoñan de colexios en perfectas condicións, algo que, polo que se ve, non preocupa á Xunta”.

García de la Torre comunicou, polo miúdo,  aos responsábeis de Educación da Xunta esta situación, a última ocasión o pasado día 8, ao xefe territorial da Consellería de Educación na provincia de Pontevedra, co gallo da inauguración do novo salón de actos do CEIP da Ribeira, en Torneiros, proxecto no que colaborou o Concello do Porriño, o mesmo que no mantemento, ata o día de hoxe, do comedor deste centro.

A Gardería da Galiña Azul en Torneiros nun “estado inaceptábel e intolerábel”

Na mesma parroquia de Torneiros, lembra a alcaldesa, , moi preto do CEIP da Ribeira, está a Gardería da Galiña Azul que, enfatiza Eva García de la Torre está nun estado “inaceptábel e intolerábel con “gravísimas deficiencias” que é “moi urxente” arranxar para “garantir a seguridade das cativas e cativos”, circunstancia coñecida pola Xunta que lonxe de acometer obra algunha, priva a O Porriño, “o concello que máis medra en poboación de Galicia” das  prazas de garderías que precisa abrindo  novos centros en Mos, “a onde teñen que desprazarse os pequenos da nosa vila”.

O Goberno local, xunto coa Asociacion de Hostaleiros e a de Comerciantes do Porriño (ACIPOR), pon en marcha unha campaña para a organización do ‘I Pinchoneno’, aprobado polo Pleno Infantil

O Concello do Porriño  está a traballar na iniciativa de participación infantil e adolescente, enmarcada na candidatura do Porriño ao recoñecemento de ‘Cidade Amiga da Infancia’, de UNICEF, que trata  de facer un concello máis transparente e próximo, pero sobre todo pretende coñecer as opinións, intereses e necesidades dos veciños e veciñas máis novos, co compromiso de que estas serán atendidas.

Froito deste traballo é a creación do ‘Consello Municipal de Infancia’, que representa a tódolos nenos, nenas e adolescentes do Porriño e  que acordou no último Pleno, entre outras iniciativas, a realización de un Pinchorriño Infantil, que se chamará “Pinchoneno’.

O  “Pinchoneno’, que  tería lugar os días  14 e 15  do mes de setembro,  de 7 da tarde a 10 da noite, coincidindo coa antesala das  festas locais, foi unha proposta que saíu dos propios escolares e que logo de ser traballada nas aulas, e debatida, foi aprobada por unanimidade no Pleno infantil do pasado mes de abril.

O Concello quere atender e darlle resposta a esta iniciativa que serviría para reforzar a nosa candidatura ao recoñecemento outorgado por UNICEF e para isto, precisaríamos contar coa participación e colaboración do seu colectivo.

Aqueles hostaleiros que decidan sumarse a esta iniciativa e colaboren no proxecto, serán recoñecidos  a nivel local pola distinción que se lles otorgará desde o Concello coma ‘Socios impulsores  do 1º Pinchoneno’,  informando de  dita distinción  a Unicef ,  o  dereito a publicidade conxunta e cartelería e poder dispoñer do invitado  – Participante do programa de televisión Master Chef –  para a visita ó seu local  e promocionar ó seu pincho durante os dous días que dura a actividade.

O Goberno local confía no compromiso do sector hosteleiro do Porriño coa infancia, apoiando esta iniciativa xurdida dende os propios nenos e nenas porriñeses e que sen dúbida contribuirá a incrementar a imaxe e prestixio da nosa vila a nivel gastronómico e hostaleiro, involucrándonos todos para situar a O  Porriño como un referente no respecto e atención aos dereitos dos nenos e das nenas.

Os hostaleiros e hostaleiras interesados en en participar ou en recibir máis información poden dirixirxe  aos seguintes teléfonos: 986337624 de 15:00-19:00 horas.- OMIX do Concello; .- 986334000 de 9:30-14:00 horas, Asociación de Comerciantes e Industriais deo Porriño (ACIPOR), ou contactando con José Manuel Fernández, presidente da Asociación de Hostaleiros do Porriño. O prazo de inscrición remata o  mércores  día 20  de xuño.