Benestar arquivos - Páxina 12 de 21

Saúde Mental Feafes, colaborador do Servizo Público de Emprego de Galicia, desprazarase a O Porriño para prestar os seus servizos

Saúde Mental Feafes Galicia, prestará o seus servizos no despacho que vén de poñer á súa disposición, no Multiusos de Torneiros, a Concellería de Emprego, Igualdade e Servizos Sociais, que dirixe Soledad Girón.

Un técnico especializado realizará accións de información, orientación e asesoramento para a busca de emprego, diagnóstico e determinación do perfil profesional do demandante, deseño e xestión de Itinerarios Personalizados de Inserción, motivación, intermediación laboral con empresas e, en resumo, todas aquelas actuacións que favorezan a inserción laboral das persoas demandantes de emprego inscritas no Servizo Público de Emprego de Galicia.

Saúde Mental Feafes Galicia é unha entidade sen ánimo de lucro que defende os dereitos das persoas con problemas de saúde mental tratando de mellorar a súa calidade de vida e a dos seus familiares. Entre os seus servizos, Feafes Galicia ofrece orientación laboral especializada onde se atende a demandantes de emprego cunha enfermidade mental co obxectivo de mellorar a súa situación no mercado laboral.

As persoas que desexen ser atendidas poden solicitar unha cita previa, a través do número de teléfono 986 485 784, ou ben medio dos Servizos de Emprego ou Sociais do Concello.

Ademais para realizar calquera consultan teñen ao seu dispor a oficina de Feafes en Vigo a través do teléfono 986 485 784 ou do enderezo electrónico feafesvigo@feafesgalicia.org.

03/02/2018 in Alcaldía, Benestar, Igualdade

O paro baixou no Porriño en decembro por noveno mes no ano 2017 e a finais de ano traballaban 521 persoas máis que cando o actual Goberno local empezara a súa xestión

O paro descendeu por cuarto mes consecutivo no Porriño e a finais do pasado mes de decembro había na vila 1.618 persoas desempregadas, un dato que non se coñecía dende hai unha década.

Segundo os datos publicados este mércores polo Ministerio de Emprego e Seguridade Social e a Consellería de Economía, Emprego e Industria da Xunta de Galicia, a taxa de desemprego situouse no Porriño no 17,4%, en total 5,6 puntos menos que no inicio da xestión do actual Goberno Local cando 2.139 porriñeses estaban na procura dun posto de traballo, 521 máis que na actualidade.

En relación co mes de decembro de 2016, o número de veciñas e veciños anotadas coma demandantes na oficina do Servizo Galego de Emprego do Porriño baixou de 1.844 a 1.618, o que supón que hai 226 traballadoras e traballadores máis no concello: en so un ano o paro caeu en máis de 2,5 puntos.

A alcaldesa, Eva García de la Torre subliña a importancia das medidas que se están a tomar dende a Concellería de Emprego, que dirixe Soledad Girón,entre elas o programa ‘Porriño Accede’, baseado en convenios asinados entre o Concello e empresas da vila, grazas ao cal hai ducias de veciñas e veciños que volveron ao mercado laboral ou empezaron a traballar.

Tamén están a facilitar o descenso do paro os ‘Plans de Emprego’, posibles grazas ao investimento de máis de 600.000€ de fondos municipais, e os acordos con outras administracións, obtendo axudas e subvencións que tiveron coma destino accións que serviron para incrementar as probabilidades de empregabilidade das veciñas e veciños do Porriño, e pon coma exemplo o recen aprobado ‘Plan Integrado de Emprego para Mulleres’ (PIEM), que conta cunha importantes achega da Consellería de Economía, Emprego e Industria da Xunta de Galicia.

04/01/2018 in Alcaldía, Benestar, Emprego e formación

Empezaron os Campamentos de Nadal no Porriño

Preto de 40 nenas e nenos porriñeses, de entre 5 e 12 anos de idade, participan dende este venres, 22 de decembro, e ata o vindeiro 4 de xaneiro, no ‘Campamento de Nadal’, organizado polo Concello do Porriño, a través da Concellería de Igualdade que dirixe Soledad Girón, e co-financiado pola Deputación de Pontevedra.

O obxectivo do mesmo, coma lembra a concelleira, é o “facilitar a conciliación da vida laboral e familiar das veciñas e veciños”, o mesmo que os que se organizan no verán e, ao mesmo tempo, permitir o entretemento das cativas e cativos nestas datas, coa súa participación en actividades de lecer, coma xogos, a elaboración dun mural sobre o Nadal ou, coma no primeiro día, recibir a visita de Papá Noel.

25/12/2017 in Alcaldía, Benestar, Igualdade

‘Motivación’, primeiro dos cursos do ‘Plan de Inclusión Social da Poboación Xitana’ organizado no período formativo 2017-2018 pola Concellería de Benestar Social

16 persoas, integrantes do ‘Colectivo Machado’, acudiron ao curso de ‘Motivación’, impartido no Centro Multiusos Municipal de Torneiros no que é o primeiro dos cursos do período formativo 2017-2018 do ‘Plan de Inclusión Social da Poboación Xitana’.

O curso, organizado pola Concellería de Benestar Social, que dirixe Soledad Girón, e financiado con Fondos Europeos, é o primeiro dos programados nos que haberá tamén formación en Vivenda e Perruquería, ademais de clases de Apoio Escolar e Alfabetización de Adultos.

O obxectivo dos mesmos, sinala a concelleira, é a “normalización das condicións de vida das xitanas e xitanos pertencentes a este colectivo, de orixe portugués, fomentando a integración a muller xitana e a igualdade de oportunidades”.

22/12/2017 in Alcaldía, Benestar

#PorriñoSolidario Podes axudar a outras persoas doando sangue

Unha unidade móvil da Axencia Galega de Sangue, Órganos e Tecidos (ADOS) desprazarase ata O Porriño os días 26 e 27 deste mes de decembro e estará de 10:00 ás 14:30 horas e de 16:00 ás 21:00 horas diante da Cafetería ‘Scala’, na rúa Domingo Bueno.

A nova Axencia Galega de Sangue, Órganos e Tecidos (ADOS), que integra o traballo do Centro de Transfusión de Galicia, subministra compoñentes sanguíneos a todos os hospitais de Galicia.

Cada día, as doazóns de sangue recollidas nos locais de doazón e nas 10 unidades móbiles que percorren os concellos galegos envíanse ás dependencias de ADOS para o seu procesamento, análise e conservación. Establécese con cada hospital unhas reservas de seguridade de cada grupo sanguíneo e, diariamente, envíanse os compoñentes sanguíneos que precisan para a súa actividade asistencial programada e facer fronte ás urxencias.

22/12/2017 in Alcaldía, Benestar, Igualdade

Salceda, Ponteareas, Mondariz, As Neves, Mos e Porriño únense para impedir o despido de 140 traballadores, ou todos os empregados de Maderas Iglesias

Os alcaldes de Salceda, Marcos Besada, Ponteareas, Xosé Represas, Mondariz, Xoán Carlos Montes, As Neves, Xosé Manuel Rodríguez, a alcaldesa do Porriño, Eva García de la Torre, e o tenente de alcalde de Mos, Camilo Augusto Martínez, mantiveron este luns unha xuntanza, no Concello do Porriño, con representantes do Comité de Empresa de Maderas Iglesias, e dos sindicatos CIG, CCOO e UXT, que trasladaron aos rexedores que a empresa comunicoulles a apertura dun expediente de extinción de 140 contratos-ou de todos eles, preto de 300- o vindeiro día 12 de xaneiro.

Ante esta situación, os alcaldes e alcaldesa veñen de solicitar un encontro ao máis alto nivel, con representantes da Xunta de Galicia, acompañados polos membros do Comité de Persoal, de cara a evitar a eliminación destes empregos- ou da totalidade deles-e o peche dunha empresa que consideran parte dun sector estratéxico para a economía galega como é o da madeira.

Os alcaldes e a alcaldesa, coñecedores do interese da Xunta en evitar a eliminación destes empregos, considerando que a a empresa recibiu no seu día fondos públicos por medio do IGAPE e lembrando que todos os grupos do Parlamento de Galicia aprobaron unha iniciativa apoiando tomar a iniciativa para facer viable Maderas Iglesias, piden ao Goberno de Galicia que nesta situación de extrema gravidade para a continuidade desta firma, fagan efectivos os termos desta iniciativa e preste as garantías posibles e necesarias para manter os empregos.

19/12/2017 in Alcaldía, Benestar, Emprego e formación

Protección Civil do Porriño recibe da Xunta de Galicia un novo remolque que servirá para completar o material de emerxencias que manexa a diario este servizo

Manuel Carrera, tenente de alcalde do Porriño recibiu, en nome do Concello e de mans da Vicepresidencia do Goberno de Galicia, un novo remolque para o Servizo de Emerxencias e Protección Civil do Porriño.

O remolque inclúe unha electro-bomba somerxible, unha motobomba para augas residuais, un xerador de electricidade portátil de gasolina, unha motoserra, unha rozadora, unha torre de iluminación e kit de balizamento e sinalización todos estes elementos con todos os complementos de seguridade necesarios para una correcta utilización.

Carrera, que estivo acompañado por responsábeis de Protección Civil do Porriño, salientou o “importantísimo traballo, altruísta e desinteresado e constante” dos integran deste servizo que, subliñou, contribúen a garantir a seguridade e tranquilidade das porriñesas e porriñeses en cooperación co traballo que levan a cabo outros servizos profesionais de emerxencias.

15/12/2017 in Alcaldía, Benestar, Vías e obras

En marcha o ‘Plan Integrado de Emprego para Mulleres’ (PIEM) que permitirá que 85 porriñesas se formen e opten a un posto de traballo

Un total de 85 mulleres desempregadas, veciñas do Porriño, terán a oportunidade de formar e optar a un posto de traballo grazas ao ‘Plan Integrado de Emprego para Mulleres’ (PIEM), posto en marcha polo Concello do Porriño e o Goberno de Galicia.

O Plan conta cun orzamento total de 255.000€, dos cales a Consellería de Economía, Emprego e Industria achega 204.000€ e a Concellería de Emprego do Porriño, 51.000 para facilitar que as mulleres que participen neste plan realicen formación e prácticas en distintas empresas, 7 das cales xa amosaron o seu interese en participar nesta iniciativa.

A concelleira de Emprego, Soledad Girón subliña que o obxectivo do ‘Plan Integrado de Emprego para Mulleres’ é, “coma todas as medidas e proxectos que estamos desenrolando dende o Goberno municipal, a de reducir a taxa de desemprego no Porriño e en especial o que padecen as mulleres”.

Para conquerilo, se realizarán accións de orientación laboral, formativas, con prácticas en empresas, “que permitirán mellorar as competencias profesionais das participantes neste plan e chegar á súa inserción no mercado de traballo”.

Para que esta finalidade sexa máis doada de acadar, as beneficiarias do Programa gozarán de “medidas que permitan conciliar o seu aprendizaxe coa súa vida familiar, coma acceso ao servizo de gardería”, indica a concelleira de Emprego.

Para participar no ‘Plan Integrado de Emprego para Mulleres’ as interesadas deberán acudir á Oficina de Emprego e solicitar na súa demanda o servizo de “Programas experimentais” (930).

05/12/2017 in Alcaldía, Benestar, Emprego e formación, Igualdade

Xornada de portas abertas, o vindeiro martes, día 5 de decembro, no Centro de Maiores do Porriño

O centro de día de maiores do Porriño, pertencente a rede de centros de maiores da Xunta de Galicia, celebra unha xornada de portas abertas, á cal convida a participar a todas as veciñas e veciños.

Esta xornada terá lugar o vindeiro martes, día 5 de decembro, no Centro de Día do Porriño situado no lugar de Torneiros.

As persoas interesadas en participar nos obradoiros e actividades organizadas para ese día, ou que simplemente queiran coñecer o centro, poden poñerse en contacto chamando ao teléfono 986331750, ou enviando un correo ao enderezo electrónico cd.porrino@cogami.gal.

02/12/2017 in Alcaldía, Benestar, Igualdade

Este martes, día 28, Pleno Infantil no Concello do Porriño coincidindo co Día dos Dereitos da Infancia

Este martes, día 28 de novembro o Concello do Porriño celebra ás 12:00h. o seu Pleno Infantil no que estarán presentes alumnas e alumnos de centros educativos da vila que exporán os seus proxectos, ideas e propostas no mesmo, coincindindo coa celebración do Día dos Dereitos da Infancia, impulsado por UNICEF.

O Pleno, que estará moderado pola alcaldesa, Eva García de la Torre, seguirá o seguinte orde de intervencións, se seguindo un criterio de idades dos participantes, de menos a maior:

Proposta do Centro Santo Tomas – 3º e 4º, voceiros: Rodrigo Martín Pedrares e Carla Márquez Vaquero.

Centro de Educación Infantil e Primaria Xosé Fernandez López – 4º, voceiros: Raúl Servide Sequeiros e Irene Galloso Rodríguez.

Centro de Educación Infantil e Primaria Atios – 4º, voceiros: David Alonso Pérez e Noa Vázquez Ojea.

Proposta do Centro de Educación Infantil e Primaria de Budiño – 5º, voceiros: Pablo Férnandez Pérez e Antía Férnandez Ramirez.

Centro de Educación Infantil e Primaria da Ribeira – 5º e 6º, voceiros: Laura Dios Claro e Ainoha Guisande Fernández.

Centro de Educación Infantil e Primaria Antonio Palacios – 6º, voceiros: Alejandro Gómez Granja e Marta Estevéz Alonso

Proposta do Centro ACEESCA, voceiro: Lucas Baz Bernández

Instituto de Educación Secundaria Pino manso – 1º ESO, voceiros: Noa Castaño Rodríguez, Clara Giraldez Fernández, Hugo Novás González, Tiago Sebastián Fernández, Laura Barbosa Baladrón e Martin Bar Vieito.

Centro Hermanos Quiroga – 1º e 2º ESO, voceiros:Antía Martínez Márquez e Manuel Moras Fernández.

Proposta do Instituto de Educación Secundaria Ribeira do Louro – 4º ESO , voceiros: Hugo Rodríguez Iglesias e Tatiana Rodríguez Domínguez.

As exposicións, en varios dos casos, irán apoiadas por proxeccións de vídeos ou exposicións en Power Point. As persoas interesadas en seguir o Pleno en directo poden facelo entrando no portal web do Concello, www.oporrino.org, e poden debater sobre o mesmo nas redes sociais coa etiqueta #PlenoInfaltilPorriño.