Benestar

O vindeiro luns, día 19, ábrese o prazo para inscribirse no ‘Campamento de Nadal’ do Concello, financiado pola Deputación de Pontevedra, para rapazas e rapaces de 5 a 12 anos de idade

O Concello do Porriño, a través da Concellería de Igualdade continúa a  mesma liña de actuación que en anos pasados, e “para facilitar a conciliación da vida laboral e familiar das veciñas e veciños”, organiza, de novo, o ‘Campamento de Nadal’, co-financiado pola Deputación de Pontevedra.

O mesmo- que desenrolarase de 9 da mañá a 2 da tarde– abranguerá actividades coma música, obradoiros, xogos, talleres, reciclaxe, animación á lectura e actividades que terán coma fío condutor a igualdade.

O prazo de inscrición para o mesmo abrirase o luns, día 19 de novembro, e non pechará ata o venres, día 30 desde mesmo mes.

A concelleira de Igualdade, Soledad Girón, lembra que poden participar neste campamento as rapazas e rapaces residentes no Porriño que teñan entre 5 e 12 anos -nados entre 2006 e 2013, os dous inclusive– e que as persoas que precisen máis información poden dirixirse ao Centro de Información á Muller, no 3º andar do Concello, ou chamar ao número de teléfono 986 337429.

15/11/2018 in Alcaldía, Benestar, Igualdade

16 porriñesas e porriñeses en situación de desemprego realizarán durante 6 meses un obradoiro remunerado de Atención Socio-Sanitaria a domicilio e a institucións

Dezaseis veciñas e veciños do Porriño en situación de desemprego empezan o  luns, 1 de outubro, un obradoiro de emprego de garantía xuvenil, remunerado, de 6 meses de duración, impulsado polo Concello en colaboración coa Xunta de Galicia.

O obradoiro, como sinalou a súa directora na presentación do mesmo, abrangue formación teórica e práctica sobre Atención Socio-sanitaria a Domicilio e a Institucións, durante un período de medio ano no cal os participantes cobrarán o salario mínimo interprofesional-que para este 2018 está establecido en 735,90€- e ao remate recibirán una Certificación Profesional.

No acto de presentación, a concelleira de Emprego, Soledad Girón, subliñou que esta formación abre as portas de futuros traballos e animou ás e os participantes a que aproveiten esta oportunidade que pode ser un paso importante de cara á integración no mercado laboral.

https://www.facebook.com/ConcellodoPorrino/videos/568094380315246/

A alcaldesa, Eva García de la Torre, asegurou que  atención socio-sanitaria “é xa e aínda o será máis no futuro, unha das áreas nas que haberá máis saídas profesionais, considerando o aumento da esperanza de vida e o feito de que os organismos e institucións públicas queremos estender ese ‘Estado do Benestar’ de xeito que acolla a todas e todos os cidadás”.

29/09/2018 in Alcaldía, Benestar, Emprego e formación

Pinchonen@ este sábado co ‘Obradoiro de chocolates e galletas’ da cociñeira e blogueira Inés Carcacía

Este sábado, día 15, as actividades do Pinchonen@ comezaron ao mediodía cun ‘Obradoiro de chocolates e galletas’, coa famosa cociñeira e blogueira Inés Caracía, na que as rapazas e rapaces participantes aprenderon a facer estesalimentos;  ás 6 da tarde está un Show Cooking, impartido por Miri e as 9 da noite Photocall, todo coa participación de Noemí Fernández.

As persoas interesadas en seguir case en directo as actividades e o minuto a minuto deste ‘Pinchonen@’ poden facelo entrando no seu perfil de Facebook, creado para esta ocasión, www.facebook.com/pinchonenao.

15/09/2018 in Alcaldía, Benestar, Cultura e festas, Educación e tecnoloxía, Emprego e formación

A concelleira de Igualdade e Benestar pecha os Campamentos de Verán, que este ano estiveron subvencionados pola Deputación de Pontevedra e nos que participaron 240 nenas e nenos do Porriño

A concelleira de Benestar e Igualdade, Soledad Girón, entregou os diplomas ás nenas e nenos que participaron nos Campamentos de Verán do Concello, este ano. En total, sinala a concelleira, foron 240 participantes que puideron gozar durante 6 semanas de actividades coma xogos, deportes, excursións, ou saídas ao Museo do Mar de Galicia ou á Praia de Alcabre, en Vigo.

Este ano os campamentos, baixo o nome de ‘Leo e as viaxes polo tempo’, estiveron subvencionados pola Deputación de Pontevedra e tiveron coa obxectivo principal, subliña Soledad Girón, “ofrecer unha alternativa de lecer e tempo libre ás nenas e nenos do Porriño durante o verán e, ao mesmo tempo, facilitar a conciliación da vida familiar e laboral ás porriñesas e porriñeses”.

Os campamentos, que se desenrolaron entre o 2 de xullo e o pasado 10 de agosto, estiveron a  abertos a nenas e nenos de entre 5 e 12 anos de idade– nados entre 2006 e 2013-, que puideron elixir ata 6 quendas distintas: a 1ª.- do 2 ao 6 de xullo; 2ª.- do 9 ao 13 de xullo; 3ª.- do 16 ao 20 de xullo; 4ª.- do 23 ao 27 de xullo; 5ª.- do 30 de xullo ao 3 de agosto e 6ª.- do 6 ao 10 de agosto.

13/08/2018 in Alcaldía, Benestar, Igualdade

Unha unidade da Axencia de Doazon de Sangue estará no Porriño o xoves, día 28 e o venres, 29 de xuño

A nova Axencia Galega de Sangue, Órganos e Tecidos (ADOS), que integra o traballo do Centro de Transfusión de Galicia, subministra compoñentes sanguíneos a todos os hospitais de Galicia.

Cada día, as doazóns de sangue recollidas nos locais de doazón e nas 10 unidades móbiles que percorren os concellos galegos envíanse ás dependencias de ADOS para o seu procesamento, análise e conservación. Establécese con cada hospital unhas reservas de seguridade de cada grupo sanguíneo e, diariamente, envíanse os compoñentes sanguíneos que precisan para a súa actividade asistencial programada e facer fronte ás urxencias.

Unha destas unidades móbiles desprazarase ata O Porriño e estará diante da Cafetería ‘Scala’, na rúa Domingo Bueno, o vindeiro xoves , día 28 de xuño, e o venres, 29, de 16:00 ás 21:00 horas.

18/06/2018 in Alcaldía, Benestar

Ainda hai prazas para a ‘2ª Andaina dos Sentidos’ que, finalmente, será o vindeiro domingo 1 de xullo

A ‘2ª Andaina dos Sentidos’, programada para o pasado día 10 de xuño e que finalmente tivera que ser aprazada por mor do mal tempo, xa ten nova data: será o vindeiro domingo 1 de xullo.

Hai que lembrar que a mesma forma parte do ‘Proxecto de Prevención de Drogo-dependencias 2018-2019’, que está impulsada pola concellería de Formación e Emprego de Salceda de Caselas, que dirixe Loli Castiñeira, e pola de Benestar, Emprego e Igualdade do Porriño, que ten á fronte a Soledad Girón, e que conta coa subvención da Xunta de Galicia.

As familias de Salceda de Caselas e do Porriño que queiran participar nesta andaina que descorrerá polo medio da natureza, aínda poden inscribirse chamando ao teléfono  679151574.

15/06/2018 in Alcaldía, Benestar, Emprego e formación, Igualdade

Aberto o prazo para inscribirse na ‘2ª Andaina dos Sentidos’ que impulsan os Concellos do Porriño e Salceda de Caselas e que conta coa subvención da Xunta

A concelleira de Comercio, Formación e Emprego de Salceda de Caselas, Loli Castiñeira, e a responsable da área de Benestar , Emprego e Igualdade do Porriño, Soledad Girón, presentaron este luns a ‘II Andaina dos Sentidos’, que será o vindeiro domingo, día 10 de xuño.

Esta iniciativa, que forma parte do ‘Proxecto de Prevención de Drogodependencias 2018-2019’, que conta coa subvención da Xunta de Galicia, arrincou con programas coma ‘Cinensino’, nos centros educativos, abrangue diversos programas que levaranse adiante ao longo deste e do vindeiro curso, con iniciativas coma programas de prevención para autoescolas, formación de mediadores ou programas para centros escolares de Primaria e Secundaria, entre outros.

As familias de Salceda de Caselas e do Porriño que queiran participar nesta andaina que descorrerá polo medio da natureza, poden inscribirse chamando ao teléfono  679151574. Dende os dous concellos lembran que o número de prazas é limitado.

28/05/2018 in Alcaldía, Benestar, Igualdade

@depo_es organiza este luns, día 28 de maio, no Porriño, ‘Maior seguridade’, dirixida a persoas usuarias de Teleasistencia Domiciliaria

A Deputación de Pontevedra organiza para este luns, ás 11 e media da mañá, no salón de actos do Centro Cultural do Porriño a segunda das actividades socioculturais previstas para este ano e dirixidas ás persoas usuarias do servizo de Teleasistencia Domiciliaria.

Nesta ocasión, a Deputación preparou unha charla informativa titulada “Maior Seguridade” dirixida a  máis de 40 persoas dos concellos de Mos, O Porriño, Salceda de Caselas, Salvaterra de Miño, Tomiño e Tui.

“Maior Seguridade” será impartida por persoal especializado da Garda Civil que explicará ás persoas asistentes cuestións relacionadas coa prevención de actos de delincuencia enfocados á terceira idade, proporcionando técnicas tanto para detectalos como para reaccionar fronte a eles dentro e fóra do domicilio.

Na actualidade, o servizo de Teleasistencia Domiciliaria da Deputación de Pontevedra atende a un total de 523 persoas de 45 concellos da provincia. Esta iniciativa permite a persoas de avanzada idade ou con algún tipo de diversidade funcional manter a súa independencia e continuar vivindo no seu domicilio con tranquilidade e seguridade, coa consecuente mellora na súa calidade de vida.

Ao longo do 2017 atendéronse un total de 4.735 alarmas (cun tempo medio de atención de 10,6 segundos e de resolución de incidencias de 1 minuto e 28 segundos) desde os terminais. Por número de chamadas destacan as persoas usuarias dos concellos de Tomiño, con 358; O Porriño, con 327; Mos, con 299; O Grove, con 258 e Sanxenxo, con 232 chamadas.

27/05/2018 in Alcaldía, Benestar

Dende este xoves, día 10 de maio, está aberta a inscrición para os Campamentos de Verán do Concello que, un ano máis, estan co-financiados pola Deputación de Pontevedra

Dende este xoves, día 10 de maio, está aberto o prazo de inscrición para os Campamentos de Verán do Concello do Porriño, que baixo o nome de ‘Leo e as viaxes polo tempo’, ten coma obxectivo, tal e como sinala a concelleira de Benestar e Igualdade, Soledad Girón, “ofrecer unha alternativa de lecer e tempo libre ás nenas e nenos do Porriño durante o verán e, ao mesmo tempo, facilitar a conciliación da vida familiar e laboral ás porriñesas e porriñeses”.

Os campamentos, que están co-financiados pola Deputación de Pontevedra, abranguen do 2 de xullo ao 10 de agosto e están abertos a nenas e nenos de entre 5 e 12 anos de idade- nados entre 2006 e 2013-.

As quendas para os mesmos serán: 1ª.- do 2 ao 6 de xullo; 2ª.- do 9 ao 13 de xullo; 3ª.- do 16 ao 20 de xullo; 4ª.- do 23 ao 27 de xullo; 5ª.- do 30 de xullo ao 3 de agosto e 6ª.- do 6 ao 10 de agosto.

As inscricións poden facerse desde este mesmo xoves no Centro de Información á Muller (CIM), no 3º andar do Concello, de 9 da mañá a 2 da tarde. Para máis información as persoas interesadas poden chamar ao teléfono 986 337 429.

10/05/2018 in Alcaldía, Benestar, Igualdade