Novas

A presidenta da Deputación asina convenios cos equipos de Balonmán Feminino.

A presidenta da Deputación asina, a apenas 48 horas do inicio da Fase Final da Copa da Raíña no Porriño, convenios de colaboración cos grandes equipos de balonmán feminino da provincia, entre eles o Balonmano Porriño

A presidenta da Deputación de Pontevedra asinou este mércores na Sede da institución provincial en Vigo tres convenios de colaboración coas directivas dos tres clubs de balonmán da provincia que están na máxima categoría: Balonmán Cangas, o Atlético Guardés (que estivo acompañado polo rexedor da Guarda, Antonio Lomba) e o Club Balonmán Porriño. Estes acordos forman parte dos convenios de patrocinio establecidos cos clubs da provincia de Pontevedra que se atopan nas máximas categorías das súas disciplinas.

Carmela Silva sinalou que “este ano unha das nosas grandes apostas é o noso apoio ao deporte feminino, do que temos no Balonmán Porriño e o Atlético Guardés dous grandes exemplos de mulleres imparables, que non se renden por ver os seus soños cumpridos e que, ademais, están poñendo o nome da nosa provincia e dos nosos concellos no mapa” xa que “o seu alto nivel fainas estar no olimpo deportivo, na División de Honor feminina” ao igual que “o Balonmán Cangas, que actualmente está xogando na Liga ASOBAL”.

A presidenta da Deputación de Pontevedra afirmou que “con estes convenios queremos que os clubs de renome da nosa provincia sigan podendo manter a súa actividade, á vez que apoiamos unha actividade, como é o deporte, que cada vez ten máis adeptos e adeptas na nosa provincia”.

A este respecto, Carmela Silva lembrou que “soamente estes tres clubs moven a máis de 1.000 nenos e nenas e rapazas e rapaces que amosan a súa paixón polo deporte en cada adestramento e en cada partido”.

Silva tamén lles desexou sorte nos seus próximos encontros, que enfrontarán na Liga ASOBAL ao Balonmán Cangas co Villa de Aranda este sábado e, o seguinte (6 de maio), ao Balonmán Porriño co vasco Bera Bera e ao Atlático Guardés co Aula Valladolid na División de Honor feminina, ademáis de na Fase Final da Copa da Raíña que se disputa en O Porriño o sábado, domingo e lunes que ven, días 29 e 30 de abril e 1 de maio.

Carmela Silva lembrou que “as nosas xogadoras de balonmán están na segunda e na sexta posición da liga” e animou ao conxunto da cidadanía a que “non as perdan de vista, porque estou segura de que van dar moito máis que falar se cabe”.

26/04/2017 in Deportes

vaise xogar no Porriño a MINICOPA da raiña.

Paralela á competición da Copa da Raíña, vaise xogar no Porriño a MINICOPA (categoría. cadete feminino.), en horarios que non van coincidir coa competición senior´.
Os encontros serán de 2 tempos de 20 minutos (5 m. descanso), e a final será de 2 tempos de 30 minutos (10 m. descanso)

26/04/2017 in Deportes

Mellora de puntos de risco en todo O Porriño

A Concellería de Tráfico e Seguridade Vial segue coas obras para a eliminación ou mellora da protección en puntos de especial perigo de todo o Concello.

Estes días estase a rematar a colocación dun valado de 150 metros na Avenida de Antonio Palacios-a altura de ‘Talleres Gumerjo’-, nun lugar no que existía unha alta probabilidade de accidentes. Esta mesma obra seguirá ata a entrada de Cans o cal, sinala o concelleiro de Seguridade Vial, Orlando Márquez, “reducirá nunha alta porcentaxe o risco de accidentes nesta zona”.

Dende principio de ano, o Goberno local ven de executar distintos traballos en lugares nos que os veciños denunciaran que se producían contratempos ou que había perigo. Tal é o caso da Pontenova, no lugar de San Diego, en Mosende, na rotonda de Madeiras Iglesias, ou en Sequeiras, diante da urbanización As Rochas.

26/04/2017 in Tráfico

Este martes sáen á venda as primeiras 600 entradas para @festivaldecans

 As primeiras 600 entradas para o Festival de Cans, estarán á venda este martes. A organización do festival sinala que dende as 10 da mañá sairán a venda, on line, as entradas para a sección oficial de curtametraxes a concurso do sábado 27 de maio.

Destes 600 tickets, 350 serán para a sesión da tarde e 250 para a da mañá e poderán mercarse co todo 0 ‘pack’, e dicir coas camisetas deseñadas para os máis leais seguidores do certame.

25/04/2017 in Cultura e festas

O Porriño recibirá a máis de 15.000 persoas pola Copa da Raiña de Balonmán.

Pérez Ouro, xunto con representantes do Club Balonmano Porriño, mantiveron unha xuntanza para rematar cos derradeiros detalles que quedaban pendentes da organización da fase final da Copa da Raíña de Balonmán, que se disputará no Porriño o sábado 29 e domingo 30 de abril e o 1 de maio.

A alcaldesa lembrou que eses días O Porriño recibirá a máis de 15.000 persoas, entre afeizoados, adestradoras, xuíces, xogadoras, dirixentes deportivos e xornalistas, e que “todo está xa disposto para que se sintan entre nós coma na súa casa”.

García de la Torre, como xa manifestara o concelleiro de Deportes e tenente de alcalde, Manuel Carrera, subliñou a importancia que ten para a vila organizar “de novo, por segunda ocasión consecutiva”, este campionato que, sinalou, “sitúa de novo ao Porriño no chanzo máis alto do deporte nacional”, e que terá un considerable impacto, ademais, no ido económico e social.

A alcaldesa adiantou que nesta edición, se apostará por potenciar as actividades no exterior do Pavillón Municipal de Deportes, coa colocación, por parte da Federación Española de Balonmano, dun percorrido de inchábeis e propostas relacionadas co balonmán.

Ademais, haberá unha carpa cunha oferta culinaria variada de xeito que o público poida gozar, entre partido e partido, mesmo nos descansos dos mesmos.

Hai que lembrar que, dacordo co programa de competición, a fase final empeza coa disputa, o sábado día 29, dos cuartos de final. O primeiro partido –ás 12:30 h. será o que enfrontará a Granollers co Mecalia Guardés; ás 4 da tarde xogarán o Bera-Bera co B.M.Elche; ás 6 o Rocasa Canarias contra o C.R. Málaga e, ás 8 e media, chegará o encontro máis agardado, o do Alcobendas co Balonmano Porriño.

As semifinais se xogarán o domingo, día 30, ás 4 e ás 6 e media da tarde, e á final o luns, día 1 de maio, ás 13:00 h.

En paralelo á disputa da Copa da Raiña ‘absoluta’, as integrantes dos equipos cadetes- de 14 a 17 anos- do Granollers, Mecalia Guardés, Bera-Bera, B.M. Elche, Rocasa Canarias, C.R. Málaga, Alcobendas e Balonmano Porriño, xogarán por facerse coa ‘Minicopa da Raíña’ 2017.

23/04/2017 in Alcaldía, Deportes

Novo taller do punto SmartPeme do Porriño

Novo taller do punto SmartPeme do Porriño, este luns ás 7 da tarde, “Coma ser eficiente na organización do teu tempo”

“Coma ser eficiente na organización do teu tempo”. Este é o título do taller que organiza o punto SmartPeme do Porriño, o vindeiro luns, día 24, ás 7 da tarde, na súa sede do Multicentro Municipal de Torneiros.

O obxectivo do mesmo é o de expoñer as vantaxes que ten unha eficiente xestión do tempo de cara á mellora da produtividade laboral e, ademais, poñer a dispor dos asistentes as ferramentas axeitadas para a organización do traballo. Entre esas ferramentas están Trelo e TOGGL, coma contador de tempo, ademais doutros xestores de tarefas e proxectos.

As persoas interesadas en asistir a este taller poden mandar un correo electrónico ao enderezo: oporrino.smartpeme@depo.es; chamar ao teléfono 886 20 20 20, ou entrar no portal web www.smartpeme.depo.es.

22/04/2017 in Educación e tecnoloxía

A Concellería de Vías e Obras segue adiante cos traballos de mellora da rede de saneamento.

A Concellería de Vías e Obras segue adiante cos traballos de mellora da rede de saneamento, agora en Abelenda, na parroquia de Pontellas dando servizo a ooutras 9 vivendas máis

A Concellería de Vías e Obras, que dirixe Manuel Carrera, ven de iniciar os traballos para a mellora do saneamento no lugar de Abelenda, na parroquia de Pontellas, traballos que durarán ata os primeiros días do mes que ven.

Os mesmos consisten na substitución de parte da rede que chega a esta parte da parroquia e que, cando estean rematados, permitirán dar servizo a nove vivendas e a o bar da Comisión de Festas de San Pelayo.

Manuel Carrera subliña que esta é unha obra demandada polos veciños e que se enmarca dentro de todas as que está a impulsando a Concellería de Vías e Obras, “en todas as parroquias, ven sexa con fondos do propio Concello, como neste caso, ven optando a subvencións ou asinando acordos de colaboración con outras entidades, organismos e administracións, o que permite que as mesmas non teñan custo algún para as veciñas e veciños do Porriño”.

22/04/2017 in Vías e obras

Horarios dos cambios e cortes no tráfico pola proba de ciclismo

Horarios dos cambios e cortes no tráfico pola proba de ciclismo que pasará polo Porriño esta fin de semana

Co gallo da proba ciclista do vindeiro sábado, día 22, entre as 16:30 e as 20:00 h. vaise cortar o tráfico en varias rúas e estradas de Atios e Cans, pola zona de Paizal, Portela de Souto, Adroza, A Graña, Gulpilleira, subida A Risca.

Ademais, controlarase o paso pola N-120 á altura de Adroza, en Cans, con tráfico alternativo. Así mesmo, todo o circuíto estará debidamente valado e sinalizado.

21/04/2017 in Deportes, Tráfico

A proba ciclista Challege As Rías Baixas Pequenos Trasnos, implicará cambios no tráfico.

A proba ciclista Challege As Rías Baixas Pequenos Trasnos, que se disputa esta fin de semana, implicará cambios no tráfico de varias rúas do Porriño

O tenente de alcalde e concelleiro de Deportes do Porriño, Manuel Carrera, acompañado polo presidente da Federación Galega de Ciclismo, Juan Carlos Muñiz, o concelleiro de Deportes de Mos, Alberto Méndez, e os responsábeis do Club Ciclista Máster da Louriña, organizador da proba, presentou este xoves o I Challege As Rías Baixas Pequenos Trasnos de ciclismo que se correrá esta fin de semana- sábado 22 e domingo 23 de abril- en tres etapas, polos concellos de Mos e de O Porriño.

Como sublimaron os organizadores da proba, a competición-na que están inscritos 200 corredores, “o máximo permitido pola Unión Ciclista Internacional (UCI), terá o formato típico de tres etapas :un dobre sector e una etapa en liña.

A primeira delas será a I Gran Clásica Concello de Mos, sobre un percorrido de 80 quilómetros dos cales os primeiros son “asumibles” pero que remata con dúas voltas a un circuíto de 10 quilómetros que é un “creba-pernas”e que fará unha importante selección no pelotón.

A segunda etapa é unha ‘Cronoescalada’ con remate no Monte da Risca, de 6 quilómetros, con 230 metros de desnivel, dous repeitos de 600 metros moi duros e unha subida final de 1,4 quilómetros.

Por último, a terceira etapa consistirá na xa coñecidísima ‘Volta ao Val’, na que se decidirán os campións.

O presidente da Federación Galega de Ciclismo amosou a súa satisfacción pola disputa dunha proba coma esta e agradeceu a súa implicacións aos concellos do Porriño e de Mos que farán o farán posible. Juan Carlos Muñiz subliñou que falar de ciclismo no Porriño “é falar de importantísimos e grandísimos deportistas xurdidos grazas a un importante traballo co deporte de base”.

Pola súa banda o concelleiro de Deportes de Mos, Alberto Méndez, subliñou a importancia da colaboración dos dous concellos e a “estupenda” labor realizada polo Club Ciclista Máster da Louriña para conquerir que “traballemos conxuntamente para facer realidade esta proba”.

Rematou o acto Manuel Carrera lembrando a gran Clásica Máster do Porriño organizada o pasado 2016 polo Club Ciclista Máster da Louriña e felicitándose e felicitando aos organizadores por facer que esta carreira sexa tamén para xuvenís.

“É moi importante que haxa participación de deportistas que aínda están formándose xa que a base, en calquera modalidade, é esencial e, porén, é irrenunciábel, se queremos progresar, que poidan competir en probas desta calidade”.
Carrera, que foi ciclista profesional, gabou as “gañas, coñecemento e ilusión” dos organizadores e dos participantes, e subliñou que durante esta fin de semana os afeizoados terán a ocasión de ver “ciclismo en estado puro, do bo, en vivo e en directo”.

O tenente de alcalde do Porriño, sinalou que este mércores foi o Día Internacional da Bicicleta e pediu máis “prudencia e convivencia” a condutores de vehículos a motor e ciclistas, lembrando que están a producirse demasiados accidentes, e moi graves, nos que os ciclistas levan a peor parte.

Por último, a Policía Local do Porriño informa de que polo paso dos ciclistas, o sábado 22 de abril entre as 16:30 e 20:00 h. estará cortado o tráfico en varias rúas do Porriño e estradas de Atios e Cans, pola zona de Paizal, Portela de Souto, Adroza, A Graña, Gulpilleira subida A Risca.
Ademáis se controlará o paso pola N-120 á altura de Adroza, en Cans, con tráfico alternativo.

21/04/2017 in Deportes, Tráfico