Novas

O Pleno Infantil aproba o borrador do regulamento do Consello Municipal da Infancia e da outro paso de cara ao recoñecemento do Porriño, por parte de UNICEF, coma ‘Cidade Amiga da Infancia’

Nenos e nenas do Porriño, integrantes do Consello Municipal de Infancia, participaron nun novo Pleno Infantil que tivo lugar esta mesma semana no Concello.

A orde do día incluía a aprobación dun borrador de regulamento para este  Consello Municipal de Infancia, e o debate e aprobación de propostas relativas a Infraestruturas e Medio ambiente.

A alcaldesa, Eva García de la Torre, tivo a oportunidade de presidir un pleno moi animado, no que a concelleira de Educación, Lourdes Moure, actuou como secretaria, durante o cal cada un das voceiras e voceiros dos centros expuxo o resultado do traballo feito nos “obradoiros de participación”, convocados durante as últimas semanas nas súas aulas.

Entre as decisións adoptadas cabe subliñar a aprobación por unanimidade da realización dun “Pinchorriño infantil” con produtos saudables que terá lugar no vindeiro mes de setembro, coincidindo coas festas locais.

O Pleno Infantil, que foi retransmitida en directo pola web municipal, oporrino.org, contribúe a consolidar o Consello Municipal de Infancia, como un órgano de participación infantil e adolescente, de carácter consultivo e informativo, que representa ao conxunto das rapazas e rapaces do Porriño.

Esta iniciativa forma parte da candidatura do Porriño para o seu recoñecemento coma por parte de UNICEF coma Cidade Amiga da Infancia e, coma salientou a alcaldesa, “contribúe a facer un concello mais transparente, próximo e sobre todo, coñecedor das opinións, intereses e necesidades dos veciños e veciñas mais novos”.

20/04/2018 in Alcaldía, Educación e tecnoloxía

A Biblioteca Municipal invita as porriñesas e porriñeses a coñecer o seu patrimonio e realizar unha visita guiada a San Benito e San Sebastián

Dentro do programa de actividades da Biblioteca Municipal do Concello do Porriño, o 23 de abril, co gallo da celebración do ‘Día do Libro’ terá lugar a actividade: ‘O Noso Patrimonio’, un paseo polos barrios de San Benito e San Sebastián.

A historiadora da arte Rebeca Leboso dará a coñecer aos asistentes as bisbarras da vila os seus arredores: a partir do seu coñecemento, a través de bibliografía sobre o tema e como porriñesa, achegará, un pouco máis, ás veciñas e veciños a estes lugares.

Tras a charla, que terá lugar as 5 da tarde na Biblioteca Municipal, faráse un roteiro  por ditos barrios aproximándoos a súa historia e patrimonio.

É unha cita adicada a todos os públicos. Están invitados a asistir todos aqueles aos que lles interese saber un pouco máis sobre este tema, ou simplemente a aqueles que xa coñezan pero queiran lembrar.

20/04/2018 in Alcaldía, Cultura e festas

A alcaldesa mantén este venres unha reunión con altos cargos da Xunta para tratar das actuacións no barrio do Contrasto afectado pola aparición de lindano

A alcaldesa, Eva García de la Torre, manterá este venres, día 20, ás 12 e media, na delegación da Xunta en Vigo, unha xuntanza con técnicos e representantes políticos do Goberno de Galicia para tratar sobre as actuacións que se puxeron en marcha dende que se detectara a presenza de lindano no barrio do Contrasto, na parroquia de Torneiros.

Na reunión, na que estarán presentes, entre outros cargos da Xunta, Andrés Paz-Arez Rodríguez, director xeral de Saúde Pública,  Ángel Gómez Amorín, subdirector xeral de Programas de Control de Riscos Ambientais para a Saúde,  Xurxo Hervada Vidal, subdirector xeral de Información sobre saúde de Epidemioloxía, Mª Cruz Ferreira Costas, Directora xeral de Calidade Ambiental e  Cambio Climático ou  Carlos Calzadilla Bouzón, subdirección xeral de Avaliación Ambiental, a  alcaldesa coñecerá o informe sobre o estudo de solos, a situación en relación coa toma de mostras de auga para o seguimento de traídas, pozos e fontes, o estado da redacción do proxecto de descontaminación e acometerase a actualización da situación en relación co estudo epidemiolóxico.

Eva García de la Torre exporá as iniciativas acometidas polo Goberno local e as previstas para as vindeiras semanas, entre elas o desenrolo do  proxecto para levar a rede municipal de saneamento a todas e cada unha das casas afectadas polo lindano, unha obra orzamentada en máis de 350.000€ e que sufragará o Concello do Porriño.

19/04/2018 in Alcaldía

@festivaldecans abrirá a súa 15ª edición cos filmes ‘A estación violenta’ e ‘British winters’

O Festival de Cans continúa nesta edición a súa aposta polas novas xeracións de cineastas do país e acollerá a proxección de tres filmes realizados por novos profesionais da creación que veñen do ámbito da curtametraxe.

Así, na apertura proxectaranse British Winters, debut de Roque Cameselle no ámbito da imaxe real, e A estación violenta, primeira longa de Anxos Fazáns, que se atopa nestes días presentando o filme internacionalmente no prestixioso BAFICI. Nela, esta Novísima do cinema galego adapta libremente a novela homónima de Manuel Jabois. Protagonizada por Alberto Rolán, Xosé Barato e Nerea Barros, os dous primeiros estiveron este xoves na presentación da imaxe gráfica e as camisetas do 15º Festival de Cans que tivo lugar na tenda de Nikis Galicia en Santiago de Compostela.

“Cans cumpre 15 primaveras e eu síntome moi vello porque xa estiven na primeira edición”, bromeu Barato, recalcando a emoción que o equipo do filme sinte polo seu vínculo co festival. Alberto Rolán, pola súa parte, recalcou o carácter “xeracional” desta película que relata o reencontro entre tres amigos de xuventude nunha etapa complexa das súas vidas, dominada pola frustración e a ausencia dun futuro brillante. A estación violenta terá en Cans a súa primeira grande proxección pública en Galicia, xusto antes da súa estrea comercial en salas prevista para o 31 maio.

Entradas da sección oficial

A presidenta da Asociación Arela, Keka Losada, adiantou que a partir da semana que vén estarán xa dispoñibles na tenda virtual do festival as entradas para Furacáns (a competición de curtas de non-ficción) e os primeiros 500 packs de entradas para a Sección Oficial a concurso e camiseta, que inclúen tamén unha chapa exclusiva como agasallo.

Estes packs, que poderán recollerse nas tendas de Nikis Galicia e na tenda Tía Tata do Porriño, estarán á venda dende o martes 24 de abril ata o venres 4 de maio, e terán un prezo de 21,5 euros.

As entradas para Furacáns, pola súa parte, costarán 5 euros, estarán dispoñibles a partir do xoves 26 de abril en tenda.festivaldecans.com e poderán retirarse no posto de merchandising do festival durante os días de celebración do certame.

19/04/2018 in Alcaldía, Cultura e festas

200 ciclistas participarán esta fin de semana na II Challenge As Rías Baixas de ciclismo que percorrerá os concellos de Mos, Ponteareas e O Porriño

Douscentos corredores procedentes de distintos lugares de toda España, de Portugal e, por suposto, de Galicia, tomarán a saída o vindeiro sábado, día 21, na II Challenge As Rías Baixas de ciclismo, para máster e júnior, que cubrirá algo máis de 160 quilómetros pasando polos concellos de Mos, Ponteareas e O Porriño.

A proba, presentada este mércores no Concello do Porriño polos concelleiros de Deportes de Mos, Julia Loureiro, Ponteareas, Benito Márquez, e O Porriño, Manuel Carrera, xunto co director da organización, Juan Álvarez e Guillermo Sande, en representación da Federación Galega de Ciclismo, transitará o sábado por Mos, saíndo ás 10 e media da mañá do Centro Recreativo e Cultural de Torroso-sobre unha distancia final de 68,7 quilómetros; – e por Ponteareas, iniciándose ás 5 da tarde no Parque Avisoureira, para cubrir 8,7 quilómetros.

O domingo, día 22, os ciclistas sairán da rúa Domingo Bueno, no Porriño, ás 10 e media da mañá e se agarda que cheguen á meta no mesmo lugar, sobre a 1 da tarde, logo de facer un percorrido que pasará polo sur da provincia.

Esta proba, organizada polo Club Máster da Louriña, e que conta co patrocinio dos tres concellos e da Deputación de Pontevedra, ademais de numerosas firmas comerciais, permitirá, por primeira vez, coma salientou o representante da Federación Galega, “xuntar corredores novos de Ponteareas, que conta con tres gañadores da Volta a España, Mos, que ten un gañador do Tour de Francia, e O Porriño, un berce de ciclistas”.

Os tres concelleiros coincidiron en comprometer o seu apoio á Challengue As Rías Baixas, dado que permite impulsar a práctica do ciclismo, abrir a competición á categoría xuvenil e facer que percorra aldeas e lugares de cada un dos tres concellos.

19/04/2018 in Alcaldía, Deportes

A Policía Local súmase á campaña iniciada por Tráfico e establece controis de velocidade en todo O Porriño

Ata o domingo, 22 de abril, a Policía Local do Porriño súmase á campaña de control de velocidade posta en marcha pola Dirección Xeral de Tráfico.

O obxectivo da mesma é o de reducir o número de mortos e feridos causados polo exceso de velocidade: segundo os datos de Tráfico, transitando a unha velocidade axeitada poderían evitarse a cuarta parte de todas as mortes que se producen, anualmente en todo o país, en accidentes de circulación

A campaña, que se impulsa, ao mesmo tempo, en 25 países europeos por medio da Organización Internacional de Policías de Tráfico (TISPOL), quere mandar a mensaxe de que hai que respectar os límites de velocidade, considerando que no 21,5% dos accidentes mortais ocorridos no ano 2016 a velocidade foi un factor determinante.

O aumento do número de mortes por mor do exceso de velocidade aumentou, principalmente, en vías urbanas, cun crecemento do 18% o que fixo que en 2016 un total 386 peóns faleceran atropelados, o que representa 19 mortos máis que o ano anterior e preto do 25% de todas as vítimas de accidentes de tráfico.

Neste eido, a Organización Mundial da Saúde vén de facer público un estudo no que se indica que o risco de norte entre peóns é do 80% se son atropelados a 50 quilómetros por hora; por riba dos 80 quilómetros por hora as posibilidades do peón de sobrevivir son nulas mentres que a unha velocidade de 30 quilómetros por hora o risco de norte é do 10%.

A Lei de Seguridade Vial e o Regulamento Xeral de Circulación aplicable aos límites xenéricos e específicos de velocidade, velocidade en adiantamento e distancias entre vehículos, establece que o incumprimento destas normas está tipificado coma infracción grave ou moi grave, sancionadas con multas de 100 a 600 euros.

O artigo 379 del Código Penal, establece que “o que conducira un vehículo de motor o un ciclomotor a velocidade superior en 70 quilómetros por hora en vía urbana ou en 80 quilómetros por hora en vía interurbana á permitida, será castigado coa pena de cadea de 3 a 6 meses e á de multa de 6 a 12 meses e traballos a prol da comunidade de 31 a 90 días e, en calquera caso, á de privación do dereito  a conducir vehículos a motor e ciclomotores por tempo superior a 1 e ata 4 anos”.

Por último, a Lei do Permiso por Puntos contempla a perda de entre 2 e 6 puntos por esta infracción,  dependendo do del exceso de velocidade cometido.

19/04/2018 in Alcaldía, Tráfico

Máis da metade das persoas en paro que participaron o ano pasado en ‘Porriño Accede’ están traballando unha porcentaxe que e case do 74% entre aquelas que recibiron formación para o sector da automoción

O 56% das persoas en situación de desemprego que participaron o ano pasado no programa ‘Porriño Accede’, impulsado polo Goberno local a traveso da Concellería de Emprego, están traballando, unha porcentaxe que no caso daquelas que recibiron formación específica para desempeñarse no sector da automoción achégase ao 74%.

En conxunto, en 2017, un total de 67 persoas atoparon traballo logo de ter completado este programa, o que representa o 55,8% de todas e todos os participantes no mesmo, unha proporción que no caso das industrias do sector da automoción é do 73,3% -con 55 insercións de 75 alumnas e alumnos-.

‘Porriño Accede’ é un programa municipal de formación con prácticas en empresas, dirixido ás desempregadas e desempregados do Porriño, que proporciona accións formativas de calidade tendo en conta, ao mesmo tempo,as necesidades de emprego das empresas.

O obxectivo é facilitar a inserción ou a volta ao mercado laboral de persoas que están en situación de desemprego para o cal asínanse convenios, con diferentes compañías de distintos sectores, por medio dos cales o Concello do Porriño asume o custo da formación e estas firmas achegan o persoal especializado encargado de impartir a mesma.

En 2017 participaron neste programa 15 empresas, 8 delas do sector da automoción, por medio dun programa deseñado á medida. Ao mesmo tempo, ás empresas que o desexen tamén poden participar neste programa coa acollida de aspirantes en termos máis axustados, previa formación polo Concello, no marco dun programa avanzado pola empresa que asume o rol de promotora.

Este é o caso do compromiso asumido por Ti Automotive, radicada no Porriño, á que a alcaldesa, Eva García de la Torre, e a concelleira de Emprego, fixeron unha visita o venres pasado, que acolleu e contratou a participantes no programa ‘Porriño Accede’ ofrecendo máis dunha oportunidade laboral a porriñesas e porriñeses que hoxe teñen un posto de traballo.

Eva García de la Torre subliña que por medio de ‘Porriño Accede’, “proporciónase unha alternativa real a colectivos de difícil reinserción laboral pois permite formar a persoas desempregadas en postos demandado polas empresas, garantindo, deste xeito, o acceso ao mercado laboral”.

15/04/2018 in Alcaldía, Emprego e formación

A alcaldesa considera “moi decepcionante” a xuntanza con responsabéis de ADIF que estiveron no Porriño para falar do pso a nivel que atravesa o centro da vila

“Nin proxecto nin borrador , nin estudo, nin proposta algunha”. Este o resumo que fai a alcaldesa do Porriño, Eva García de la Torre, da xuntanza mantida este luns con representantes de ADIF.
 
García de la Torre cualifica a reunión de “moi decepcionante”, eido no que coinciden, subliña, os voceiros de todos os grupos da Corporación- Partido Popular, PSOE, UDDL, BNG, EU-SON e a representantes dos Non Adscritos- , que deron por rematada a xuntanza apenas media hora despois de que se iniciase.
 
O acontecido foi un “despropósito”, engade a alcaldesa que sinala que os delegdos de ADIF volveron preguntar ao Concello cales son as súas ideas para retirar o paso a nivel do centro do Porriño, algo que “non entendemos” posto que “xa o deixamos claro en setembro de 2015, cando estiven en Madrid con responsábeis de ADIF; o reiteramos en 2016 cando sufrimos un accidente no que perderon a vida 4 persoas e 50 resultaron feridas, e o repetimos o pasado mes de setembro, aquí , diante das vías, á directora directora xeral de Explotación e Construción de ADIF, só hai dúas alternativas posíbeis: ou se fai un desvío ou se soterran as vías, pero o tren non pode seguir circulando polo centro da vila, algo que os porriñeses levamos reclamando dende 1948”.
 
Así reiterouno García de la Torre, e os voceiros de todos os grupos municipais, ao subdirector de Infraestruturas de ADIF, Juan Tebar, e ao xefe de área de Pasos a Nivel de ADIF, Francisco Javier Soto del Río, que xunto con tres representantes da consultora G.O.C, entre eles o enxeñeiro Antonio Moreno, estiveron este xoves no Concello.
 
Estes cinco representantes o único que expuxeron é que o borrador de orzamentos xerais do Estado para este ano recolle unha partida de 880.000€ para a realización dun estudo previo sobre a supresión do paso a nivel, “nada máis”, e ignora, salienta a alcaldesa, o proxecto iniciado en 2006, “que caduca este mesmo ano, no mes de novembro”, sobre a ‘saída sur’ de Vigo no que se contempla un cambio no trazado das vías que deixarían de pasar polo casco urbano do Porriño.
 
“Rematada a xuntanza pediulle aos membros de ADIF e aos técnicos que ese estudo previo non se limite a uns cálculos, senón que consideren as nosas circunstancias: que vexan a qué velocidade transita o tren polo medio da vila ou a distancia, de moi poucos metros, á que pasan os vagóns das casas”, conclúe a alcaldesa.
14/04/2018 in Alcaldía

A Concellería de Vías e Obras impulsa un dos traballos máis importantes do mandato actual para que o saneamento chegue a 200 casas de budiño nun prazo de 4 meses

A vindeira semana empezan na parroquia de Budiño un dos traballos máis importantes do mandato do actual Goberno local do Porriño que permitirán a conexión á Rede Municipal de Saneamento de máis de 200 casas.

Os mesmos, impulsados pola Concellería de Vías e Obras, que dirixe Manuel Carrera, serán acometidos por Augas de Galicia, co-financiados polo Fondo Europeo Agrícola de Desenvolvemento Rural de Galicia (FEADER) e permitirán que a rede do saneamento chegue aos barrios da Cruz, Vaquería, Vitureira e se espallen ata o torreiro da Forna, en Budiño.

Trátase dunhas obras longamente desexadas por veciños desta parroquia que, subliña Manuel Carrrera, “nalgún caso levan agardando dez anos” para conectar as súas vivendas á rede municipal de saneamento e tamén por aqueles que queiran trasladarse a esta parroquia e que agora poderán facelo sen necesidade de ter que construír un pozo séptico.

Carrera, que o xoves pasado mantivo unha xuntanza en Santiago de Compostela co director xeral de Augas de Galicia, Roberto Rodríguez para darlle pulo a este proxecto, lembra que o mesmo, “que finalmente será unha realidade, data de de xaneiro de 2014, aprobárase polo Pleno do Concello daquela e, por motivos que non teñen explicación, fora esquecido”.

Hoxe,cun orzamento total de 425.000€ e un período de execución de 4 meses se fai realidade e fará posible levar o saneamento a preto de 1.000 veciñas e veciños, “continuando co propósito de que a rede municipal de saneamento chegue a todo O Porriño”.

08/04/2018 in Alcaldía, Vías e obras

A alcaldesa e os voceiros da Corporación manterán unha xuntanza, o vindeiro xoves no Porriño, con representantes de ADIF para a supresión do paso a nivel

A alcaldesa, Eva García de la Torre, acompañada polos voceiros dos grupos municipais recibirá o vindeiro xoves, día 12, ao xefe de Área de Pasos a Nivel do Administrador de Infraestruturas Ferroviarias (ADIF) para tratar do proxecto para a supresión do paso a nivel polo centro da vila.

Para a elaboración deste proxecto, a proposta de Presupostos Xerais do Estado, aprobada a semana pasada polo Consello de Ministros, contempla unha partida orzamentaria de 880.000€, segundo recolle na mesma o Ministerio de Fomento, como aparece no borrador dos Orzamentos entregados no Congreso dos Deputados.

A xuntanza servirá para expor, polo miúdo, o devandito proxecto que, coma reiterou Eva García de la Torre dende que asumirá á Alcaldía, pasa “ineludiblemente”, en primeiro lugar pola garantía “total” da seguridade dos milleiros de persoas que transitan cada día por este lugar e, “coma xa acordara a Corporación unanimemente, por un trazado que deixe de dividir a O Porriño evitando que os trens sigan pasando polo centro”.

A alcaldesa sostivo, en cada contacto que mantivo, tanto co Ministerio de Fomento, coma con ADIF, a necesidade de que se cumpran estas dúas condicións e así o expuxo o pasado mes de setembro na visita que fixo a O Porriño a directora xeral de Explotación e Construción de ADIF, Isabel Pardo de Vera, á que se lle reiterou a “negativa por parte do Concello a calquera trazado que supoña seguir mantendo as vías no medio da vila”.

García de la Torre amósase “expectante” ante a proposta que faga o xoves ADIF e reitera, como fixo dende a primeira xuntanza que mantivera en Madrid cos seus responsábeis, a “nosa vontade de diálogo e de colaboración para poñer fin logo de décadas de intentos por cada goberno local, a esta situación inxustificábel”.

06/04/2018 in Alcaldía