Novas

A Biblioteca Municipal pendura na súa web a programación de actividades para o ano 2018

A Biblioteca Municipal do Porriño, dependente da Alcaldía, vén de publicar a súa programación de actividades para o ano 2018. Na mesmas cabe salientar a variedade de propostas, os distintos formatos e a ampla temática da oferta formativa e lúdica, buscando que “a biblioteca municipal se converta nun espazo de aprendizaxe, encontro e inserción social”.

Ademais dos tradicionais servizos que prestan as bibliotecas públicas, o centro porriñés reorienta a súa actividade tentando adaptarse á evolución da comunidade de usuarios e as necesidades sociais.

Para este ano, a Biblioteca Municipal do Porriño ofrece distintos obradoiros, actuacións musicais, roteiros de patrimonio, clubs de lectura para adultos e menores, cursos de cociña, grupos de conversación en alemán e inglés en varios niveis; cursos de alfabetización dixital para maiores en distintos niveis, obradoiros de fotografía dixital, de escritura creativa, formación de usuarios, charlas, proxección de documentais ou encontros de ciencia.

Este 2018, a biblioteca iniciará un programa de visitas escolares durante todo o ano para formar ao alumnado local na utilización dos diferentes servizos e recursos que esta ofrece, como a consulta e manexo da súa páxina web e do catálogo, facilitando ordenadores para uso das alumnas e alumnos nestas visitas reguladas.

Por último, a Alcaldía do Porriño adianta que a Biblioteca Municipal levará a cabo durante o 2018 unha ampla programación de actividades de animación á lectura, con espectáculos para os máis pequenos, que se presentarán proximamente.

Na web www.bibliotecadoporrino.com  xa aparece publicada a relación de cursos e obradoiros para este ano, indicando que as inscrición xa está abertas para as que se celebren antes do verán.

Todas son gratuítas pero é necesario inscrición previa -presencial ou no teléfono 986337624-, tendo preferencia as persoas empadroadas no Porriño. Os participantes tamén deberán ser socios/as da Biblioteca Municipal do Porriño ou da rede de bibliotecas de Galicia.

14/01/2018 in Alcaldía, Cultura e festas

O Goberno local do Porriño informou “sempre, de inmediato, en persoa e polo miúdo” de toda incidencia relacionada co lindano e atendeu a todos e a cada un dos veciños afectados

Dende o momento mesmo no que se tivo coñecemento da presenza de lindano nas obras de saneamento de Pereira-Contrasto, o Goberno local deu conta, “de inmediato, polo miúdo e a todas veciñas e veciños, un por un, en persoa e telefonicamente” de todas as incidencias e resultados das analíticas realizadas no lugar.

A alcaldesa, Eva García de la Torre, lembra que foi o Concello quen informou-primeiro aos cidadáns e logo a todos os medios de comunicación- da presenza de lindano. Foi o Goberno local quen solicitou a primeira reunión con responsábeis e técnicos da Xunta de Galicia-que ten as competencias en Medio Ambiente-, xuntanza que se levou a cabo o 27 de outubro pasado en Compostela, con técnicos de Sanidade e de Medio Ambiente, e na que estivo presente a alcaldesa.

García de la Torre, subliña que foi ela a que convocou a todas e todos os veciños do barrio do Contrasto a unha primeira xuntanza conxunta o pasado día 8 de novembro e, 9 días despois, a unha  segunda reunión, no Salón de Plenos do Concello, con técnicos da Xunta de Galicia.

A esas alturas, e logo de falar, “un por un, con cada afectado, en diferentes ocasións”, o Concello xa fixera chegar auga en garrafas a cada unha das casas do Contrasto que so tiñan subministro de auga de pozo, “entrega de auga, necesaria para poder beber e cociñar, que continúa na actualidade”.

O día 25 de novembro, o Concello colocou nas vivendas afectadas depósitos de 1.000 litros de auga-nalgún caso ata dous-con motores que garanten a súa chegada ás casas, “que se limpan e revisan cada tres días e que se enchen cando o demandan as veciñas e veciños”.

Dende o 4 de decembro pasado, o Goberno local ten xa o proxecto para levar a rede municipal de saneamento a todas e cada unha das casas afectadas polo lindano, unha obra orzamentada en máis de 350.000€, que asumirá na súa totalidade o Concello do Porriño, sen axuda algunha da Administración Autonómica, e que está pendente dun permiso da Xunta de Galicia para poder iniciarse.

Hai un mes, como aprobara o Pleno do Concello, a Xunta de Voceiros aprobou a constitución da ‘Comisión de Seguimento do Lindano’, con presenza de todos os grupos políticos municipais, representantes da nova Plataforma de Afectados polo Lindano e a que se invitou a participar a responsábeis da Xunta de Galicia.

Así mesmo, o Goberno municipal contratou os servizos dunha empresa especializada en tratamento da terra na que apareceron restos de lindano, “seguindo as indicacións, criterios e normas do Servizo de Xestión de Residuos e da Administración Autonómica”. Procedeuse, ao mesmo tempo, a un dobre asfaltado da zona na que se realizaban as obras de saneamento na zona de Pereira-Contrasto e, “en cando o permitan as condicións meteorolóxicas, se retirará todo o xabre do lugar e se realizará unha nova limpeza intensiva por si quedasen aínda residuos”.

O pasado día 21 de decembro, Eva García de la Torre mantivo unha reunión en Vigo con 11 técnicos e responsábeis das consellerías de Medio Ambiente e Sanidade do Goberno de Galicia na que, ademais de dar conta das accións emprendidas polo Concello do Porriño, única administración que vén de destinar orzamentos e tomar medidas concretas e avaliábeis para protexer ás veciñas e veciños -como puido comprobar a propia alcaldesa nunha visita á zona de Pereira-Contrasto- recibiu información das accións que tiña previsto impulsar a Xunta, “que ten a competencia absoluta nesta materia”, e que ata o día de hoxe non se plasmaron en actos concretos.

Nestas semanas o Goberno local informou de cada incidencia e dos resultados das análise a cada veciña ou veciño que puideron ver, na mesma Alcaldía, as comunicacións remitidas pola Xunta. Ademais, a alcaldesa recibiu a todas aquelas persoas que o solicitaron e mantivo xuntanzas con quen o pediu, “xuntanzas algunhas delas ás que foi convocado o voceiro municipal de EU-SON, que non asistiu”.

O voceiro de EU-SON tamén recibiu “toda a información da que se dispón no Concello”, incluíndo todas as analíticas e comunicados remitidos pola Xunta de Galicia, e tivo a oportunidade de consultar canta documentación requiriu, “a última vez este mesmo xoves, día 11 de xaneiro, sen ir máis lonxe”.

Nos vindeiros días, logo de rematar o traballo para recompilar a mesma, o Concello enviará á Valedora do Pobo todo canto informe, factura, documento, analítica, proxecto e acción puxo en marcha a administración municipal nos últimos meses.

“Toda esta documentación estivo sempre, sen límite algún”, a dispor tanto dos cidadáns coma dos representantes dos grupos municipais, como ven sabe o voceiro de EU-SON.

Chama a atención que este representante, integrante dun grupo que nunca, en ningunha circunstancia, se ocupara da contaminación por lindano, ou presentara iniciativa algunha neste senso -maila que di coñecer a xestión doutras administracións e doutros partidos políticos, dende os anos 80 e 90 en todo O Porriño-, acuse agora ao actual Goberno local de “tentar tapar e silenciar” esta situación, como él mesmo declarou, sabendo que non era certo, a un medio de comunicación.

O representante de EU-SON coñece, “exactamente e paso a paso” o traballo que sen ten feito dende o Goberno local dende o primeiro intre, viu todos os documentos, estivo informado,  “puntual e persoalmente”, de cada acción, proposta e iniciativa e consultou, cando pareceulle ben, os resultados das analíticas enviadas por Sanidade e Medio Ambiente ao Concello do Porriño.

13/01/2018 in Alcaldía

O Concello impulsa o Plan Integrado de Emprego para Mulleres (PIEM), dirixido a 85 veciñas menores de 30 anos e sen cualificación profesional, de cara a súa volta ao mercado de traballo ou a súa inserción laboral

O Concello do Porriño porá en marcha o Plan Integrado de Emprego para Mulleres (PIEM) nos vindeiros meses. Este programa, co-financiado entre a Xunta de Galicia e o Concello do Porriño, “vai dirixido a un total de 85 mulleres, especialmente mulleres novas, menores de 30 anos e sen cualificación profesional”, como sinala a concelleira de Emprego e Igualdade, Soledad Girón.

O PIEM, engade a concelleira, ten como obxectivo afrontar o desemprego no Porriño “e, máis concretamente, combater a profunda fenda que afecta ás mulleres”. Para atallar esta situación,  levaranse adiante accións de orientación laboral e accións formativas, con prácticas en empresas, que permitirán mellorar as competencias profesionais e as posibilidades de inserción das usuarias no mercado laboral.

Para a participación no PIEM, as interesadas deberán poñerse en contacto coas oficinas da Concellería de Formación e Emprego  no Multicentro de Torneiros.

12/01/2018 in Alcaldía, Emprego e formación, Igualdade

O albergue do Porriño volve bater marcas de peregrinos a Compostela: 5.643 durmiron no mesmo o pasado ano, 2.250 máis dende 2015, o que supón un crecemento de máis do 66% en so 3 anos

Un total de 5.643 peregrinos a Compostela durmiron no albergue do Porriño o pasado ano, 429 máis que en 2016, o que supuxo un incremento do 8,22%. Por terceiro ano consecutivo aumenta o número de persoas que dormen no concello no seu paso cara a Santiago. Os meses de máis actividade no albergue foron os de agosto-con 1.065 persoas-setembro-con 951-, xullo-con 833- e abril- con 664-, mentres que tamén houbo unha actividade salientábel en xuño, con 658 estadías e maio, con 656.

Xa no ano 2015 houbo 1.435 persoas máis que usaran o albergue que no ano anterior, un 42% máis que en 2014, cando atoparan acomodo no albergue 3.393 camiñantes, e en 2016 un total de 5.214 peregrinos que durmiron no albergue do Porriño 386 máis que o ano anterior.

Isto sinala que en tres anos o uso do mesmo aumentou en 2.250 persoas, un 66,31% máis en tres anos, unha das porcentaxes máis altas dos albergues do Camiño Portugués neste mesmo tempo.

Hai que lembrar que O Porriño ocupa un lugar ‘clave’ no Camiño Portugués xa que é o final da primeira etapa do itinerario que vai de Tui e Compostela. Por iso, a vila conta, segundo subliña o propio Goberno de Galicia, cun dos albergues máis modernos do país, no Parque do Rubio, con 52 prazas en total e, subliña a alcaldesa, Eva García de la Torre, “unha acaída oferta de servizos para peregrinos, coma conexión a Internet, zonas verdes e calefacción, lavandería, comedor ou dereito a cociña”.

Dacordo cos datos recollidos este pasado ano, a maioría das persoas que chegan ao albergue son españois, fundamentalmente madrileños, andaluces, vascos e cataláns; en segundo lugar, os máis numerosos son os portugueses, seguidos dos alemáns, franceses, británicos e italianos, aínda que chegan nacionais de Xapón, Australia, Estados Unidos, Corea, China, Rusia ou Canadá.

12/01/2018 in Alcaldía, Cultura e festas

@regades confirma nunha visita ao Porriño que a vila disporá de case 2 millóns de euros do Plan Concellos da @depo_es

O deputado de Cooperación, David Regades, confirmou este xoves, na súa visita ao Concello do Porriño, que a Deputación de Pontevedra porá este ano a dispor do goberno municipal de Eva García de la Torre, case 2 millóns de euros co Plan Concellos. “Estamos a falar dunha inversión moi importante, dixo o deputado, 1.883.863,81€, dos cales 1,1 pertencen ao Plan 2018 e o importe restante ao adianto da liña 1 do 2019”.

Regades, quen estivo acompañado tamén polo tenente de alcalde e concellerio de Deportes e Vías e Obras, Manuel Carrera, sinalou que “a nosa aposta está clara, un incremento dun 88,4% respecto ás inversións do Plan no 2017, para que o goberno poida afrontar proxectos de envergadura, grandes actuacións pensadas para a veciñanza”.

O deputado de Cooperación tamén sinalou que “con esta decisión de sumar este ano o diñeiro da LIÑA 1 do Plan 2019, os concellos poderán planificar moito mellor as súas necesidades e, amais, facémolo coa marca propia deste Plan: o total respecto á autonomía local. Son os Concellos os que deciden os proxectos que fan cos cartos provinciais. Non decide a Deputación, deciden eles porque nós cremos que son os alcaldes, alcaldesas, concelleiros e concelleiras, os que mellor coñecen as necesidades dos seus pobos”

A remodelación e humanización da Avenida de Galicia, a entrada ao concello do Porriño, será un dos proxectos estrela de este ano que se financiará co Plan Concellos. “Hai que agradecer, dixo Regades, que o concello dedique as achegas da Deputación a proxectos como este porque falamos dunha obra de humanización que vai cambiar a vila, vai transformala para que as rúas deixen de ser lugares onde os vehículos son os protagonistas a espazos para o goce das veciñas e dos veciños”.

Pola súa banda, a alcaldesa, agradeceu o esforzo da Deputación. “O goberno provincial e nós temos unha forma de ver as cidades moi parecidas e por iso propuxemos investir as achegas na transformación desta vía de entrada ao Porriño para que sexa máis humana, máis compatible co uso do espazo público por parte da cidadanía”. García de la Torre subliñou que se vai reformar o Parque da Alameda e realizaranse actuacións na mediana e beirarrúas, con árbores e espazos máis atractivos e acondicionados para as veciñas e veciños.

Plan de Reequilibrio

O deputado, a alcaldesa e o tenente de alcalde e concelleiro de Vías e Obras e Deportes,  tamén visitaron as instalacións de atletismo da Granxa, acompañados pola directiva do Club de Atletismo, que serán reformadas ao abeiro do novo Plan de Reequilibrio da Deputación. As obras, cun orzamento dun millón de euros, serán cofinanciadas pola institución provincial con 800.000€.

O proxecto elixido polo concello, que Regades definiu como “unha aposta de futuro que dará un enorme impulso ao deporte do Porriño”,  dotará aos e ás integrantes do club dunhas instalacións óptimas para os seus adestramentos. Amais, as obras que está previsto que rematen no verán do 2019 servirán para homologar a pista con vistas a acoller competicións oficiais.

Na actualidade, a parcela posúe un campo de fútbol e unha pista perimetral que se usa para adestramentos pero carece das medidas necesarias para competición e do pavimento axeitado. Executarase un módulo cuberto con unha recta de 6 rúas de 60 m de lonxitude e unha pista homologada, e contará cunha cuberta dotada de lucernarios que permitan o paso da luz natural. Amais, dotarase da iluminación necesaria para o desenrolo de competicións e adestramentos e prevese a posible instalación dun sistema de “fotofinish”. Na parte central da pista executarase un módulo de lanzamento de peso cun aro de formigón provisto do aro de seguridade. O entorno terá un espazo verde de céspede que integra a instalación coa súa contorna.

A alcaldesa puxo en valor o proxecto nunha vila xa coñecida pola súa importancia no deporte.  “Nos vai permitir prestar servizos relacionados co deporte á cidadanía, incrementando a súa participación e impulsando a atracción de grandes eventos deportivos ata O Porriño”, dixo.

O Plan de Reequilibrio é unha iniciativa, con bases claras, transparentes e obxectivas, dirixida aos concellos de menos de 20.000 habitantes da provincia, para poñer en marcha novos investimentos en dotacións singulares. A través deste plan beneficiaranse 25 concellos para os que a Deputación inviste un total de 15 millóns de euros.

11/01/2018 in Alcaldía, Deportes, Vías e obras

A Biblioteca Municipal do Porriño, dependente da Alcaldía, retoma as ‘Visitas Escolares’ e o ‘Clube de Lectura Infantil’

Este ano 2018 a Biblioteca Municipal do Porriño, dependente da Alcaldía, renovará o servizo das ‘Visitas Escolares’ dándolle un novo enfoque e organizando a actividade de xeito regular para todo o curso 2017-18.

A finalidade desta actividade é potenciar as liñas de cooperación entre a biblioteca municipal  e os centros escolares co “obxectivo fundamental de acercar a biblioteca ao alumnado e formalo na utilización dos diferentes servizos e recursos que esta ofrece”.  

Os contidos das visitas serán unha ‘Presentación e benvida á Biblioteca’; Uso do carné de socio/a; Explicación dos diferentes Servizos e Actividades da Biblioteca; Procura de libros na sala infantil; Consulta e manexo da páxina web da biblioteca municipal e do catálogo en liña-opac  (actividade práctica na que se facilitarán ordenadores para uso das alumnas e alumnas).

As visitas realizaranse os mércores de febreiro a xuño- debendo concertar a data exacta chamando á biblioteca municipal- en horario de 11:15 a 12:45 horas, para estudantes dos cursos 4º, 5º e 6º de Educación Primaria.

O número de prazas non poderá superar as 25 por grupo e cada centro ten a posibilidade de concertar dúas visitas, con inscrición previa, podéndose ampliar no caso de que queden días libres sen ocupar.

Os colexios interesados en concertar unha visita escolar, deberán chamar ao teléfono 986 33 76 24 e aportar os seguintes datos: nome do centro, persoa de contacto e teléfono, curso do alumnado que asistirá á visita, número de participantes e se ten necesidade de autobús gratuíto.

Neste último caso, poñerase a disposición dos centros un autobús de balde para o desprazamento das alumnas e alumnas do colexio á biblioteca municipal, ida e volta.

Clube de lectura Infantil

Asemade, a Biblioteca Municipal, tendo en conta a importancia que a lectura ten na idade infantil, pon en marcha o ‘Clube de Lectura Infantil’ para nenas e nenos de 3º a 6º de Educación Primaria, como actividade de animación á lectura e como complemento á educación formal que se imparte na escola.

É unánime o saber que o hábito da lectura é un gran estímulo á creatividade, imaxinación, intelixencia e a capacidade verbal e de concentración de nenos e nenas. Desde sempre os libros nos enriquecen e nos levan a investigar en aventuras, historias, a soñar espertos. O libro é unha porta á formación e información en todos os sentidos.

10/01/2018 in Alcaldía, Cultura e festas

A alcaldesa ordea o peche da última planta do CEIP da Ribeira, logo de que se desprendese parte do teito, e esixe á Xunta que asuma a súa competencia e deixe de recortar no mantemento dos centros educativos do Porriño

A alcaldesa, Eva García de la Torre, acompañada pola concelleira de Educación, Lourdes Moure, e os concelleiros de Vías e Obras, Manuel Carrera, e Urbanismo, Marcelino Coto,acudiu este martes pola tarde ao CEIP da Ribeira, en Torneiros, centro no que por mor dunhas filtracións de auga, desprendeuse parte do teito nunha aula do último piso, empregada coma salón de actos, e onde apareceron importantes fendas noutra das dependencias empregada para dar as clases de música.

“Afortunadamente ninguén sufriu dano algún, aínda que sí quedou á vista a falla completa de mantemento deste centro e os danos ocasionados pola auga no teito de escaiola e  en varias paredes, polo cal tomamos a decisión de pechar toda a terceira planta do colexio”, sinalou a alcaldesa.

García de la Torre, quen adiantou que “mañá mesmo”, acudirá ao centro a arquitecta municipal para estudar o estado desta planta, esixiu á Xunta de Galicia que “asuma as súas competencias e, cando menos, se faga cargo do mantemento dos colexios que é o seu traballo”.

A alcaldesa lamentou que o Goberno galego que non preste atención algunha aos centros educativos do Porriño, “non só considerando que é a súa obriga, senón á vista de que somos o concello que máis medra de toda Galicia”, un abandono que transcende a outros eidos, que tamén son competencia da Xunta, como é “o centro de saúde, que ademais de carecer do persoal que precisa, como veñen de denunciar os veciños en constantes manifestacións, tamén sofre un considerable deterioro pola falla de mantemento, como puxo de manifesto a caída de varias lousas da súa fachada hai poucos días”.

09/01/2018 in Alcaldía, Educación e tecnoloxía

O Concello do Porriño destinará un total de 20.000€- o maior investimento da súa historia- ao Festival de Cans que este 2018 chega á súa XV edición

Así transmitiullo a alcaldesa, Eva García de la Torre, ao director do certame, Alfonso Pato, e a presidenta da Asociación Cultural Arela, organizadora do mesmo, Keka Iglesias, nunha xuntanza á que tamén asistiron as concelleiras de Benestar e Igualdade, Soledad Girón, e Educación e Seguridade, Lourdes Moure.

García de la Torre subliñou o compromiso do Goberno local e de todas as veciñas e veciños do Porriño, “que fan un importante esforzo”, co festival e cos veciños de Cans e de aí que no orzamento para 2018, “que está pechado e que se levará a Pleno”, haxa unha partida orzamentaria nominativa para o festival.

O obxectivo, apunta a alcaldesa, é o de garantir un “aporte económico vital para o festival” de xeito que  o mesmo poida seguir celebrándose cada ano con maior éxito e “siga a situar a O Porriño no mapa cultural dentro e fora de Galicia”.

Pola súa banda, Alfonso Pato amosouse “moi satisfeito pola nosa relación co Concello” e non só, comentou, polo seu apoio económico, senón polo “enorme esforzo de loxística” que ten que afrontar no caso dun festival que organizativamente é moi complicado e que pola súa “transversalidade”, require a intervención de distintas concellerías: a de Seguridade, Tráfico, Vías e Obras ou Educación, que contribúen a que o festival poida realizarse ano tras ano.

09/01/2018 in Alcaldía, Cultura e festas

Este mércores, no Pavillón Municipal do Porriño, con entrada de balde, partido das seleccións absolutas de Galicia e Arxentina de balonmano

A selección galega absoluta masculina volverá enfrontarse a Arxentina, nesta ocasión no Pavillón Municipal do Porriño, este mércores, día 10 as 8 e media da tarde, con entrada libre.

Hai que lembrar que este luns Galicia empatou contra o combinado arxentino no Rosal (22-22), nun choque no que foi sempre por diante no marcador.

O combinado galego, dirixido por Quique Domínguez, ten moitas novidades con respecto ao equipo que xogou onte, xa que os xogadores do BM Cangas non poden acudir á cita cos galaicos. Desta forma, a selección está formada por un núcleo moi importante de deportistas do Teucro, mesturados con membros do Novás, BM Lalín, Academia Octavio e OAR, para facer así un conxunto de bo nivel.

Enfronte estará un gran equipo dirixido por Manuel Cadenas, que está a comezar a preparación do ciclo olímpico. O conxunto arxentino está de xira por España, onde participou no Memorial Domingo Bárcenas. Neste torneo venceu a Polonia (por vez primeira) e plantou cara a España. O terceiro partido contra Bielorrusia foi o máis frouxo, e rematou na terceira posición do torneo con dous puntos.

O pasado ano, Galicia tamén xogou no mes de xaneiro, nesta oportunidade contra Xapón e logrou ofrecer un magnífico espectáculo, vencendo nun partido aos asiáticos e empatando o segundo.

09/01/2018 in Alcaldía, Deportes

Todo listo para a Cabalgata de Reis do Porriño que sairá este venres ás 6 da tarde

O Porriño ten ultimada xa para a Cabalgata das Súas Maxestades os Reis Magos, que chegarán á vila este venres,  día 5, ás 6 da tarde. A esa hora Melchor, Gaspar e Baltasar, sairán nas súas carrozas cara ao centro antes de empezar, xa pola noite, o reparto dos xoguetes.

A Cabalgata que estará encabezada pola Rondalla de Pontellas, estará composta polas tres carrozas das Súas Maxestades, outras dúas máis con regalos e unha terceira que pechara a comitiva na que haberá duendes, zancudos, cabalos ou figuras de luz, entre outras sorpresas. 

Os Reis, logo de saír da rúa Doantes de Sangue, percorrerán a Avenida Antonio Palacios, continuarán por Domingo Bueno, San Sebastián, San Benito e Ramón González para chegar, á Praza de Antonio Palacios, diante do Concello, logo de facer un percorrido ‘áxil’, posto que as previsións sinalan que podería chover ás 8 da tarde..

Diante do Concello, haberá un palco onde se disporán os tronos dos tres Magos nos que recibirán as nenas e nenos que se acheguen a saudalos, escoitarán os seus últimos pedidos, collerán as súas últimas cartas e posarán para as fotos que os pequenos queiran facerse con eles.

No caso de que chovese antes do remate da Cabalgata, a recepción ás Súas Maxestades se realizaría no Pavillón Municipal.

Rúas afectadas por cortes de tráfico

A Policía Local informa de que por mor da Cabalgata non se poderá estacionar na rúa Donantes de Sangue, dende as 3 da tarde deste venres, dende a entrada á piscina ata a rúa Antonio Palacios. Esta rúa estará cortada ao tráfico dende as 5 ás 6 da tarde, momento no que se iniciará a comitiva.

Tamén se cortará ao tráfico rodado a rúa Antonio Palacios, dende o cruzamento con Donantes de Sangue –pavillón- ata a rotonda de Aloqus- rúa Domingo Bueno- dende as 6 da tarde.

Así mesmo estará cortada a rúa Domingo Bueno, dende o número 1 ata o cruzamento da Pontenova, dende as 6 e cuarto da tarde; o mesmo pasará nos dous carrís da Avenida de Galicia- aínda que se permitirá o acceso a residentes-; tamén Pío XII e Ramón González, Manuel Rodríguez, dende o cruzamento de Xogo da Ola ata a Panadería Chinchina-nestas rúas tamén estará prohibido aparcar.

04/01/2018 in Alcaldía, Cultura e festas