Alcaldía

(Ampliación) A Concellería de Deportes comunica que as competicións en recintos pechados e abertos serán sen público

A Alcaldía e a Concellería de Deportes do Porriño comunican a decisión de prohibir o acceso de público aos eventos deportivos que se celebren en recintos pechados como o Polideportivo Municipal así como tamén nas instalacións ao aire libre, incluídos os campos de futbol.  

A restricción é para competicións federadas de ámbito autonómico e nacional. A medida é de aplicación a partir desta fin de semana e estará vixente en tanto en canto persista a actual situación sanitaria. Dende hoxe, O Porriño atópase en alerta vermella (nivel 3) cun total de 26 contaxios activos, segundo informouse a Alcaldía ante a Conselleria de Sanidade.

David Alonso, concelleiro de Deportes admitiu que “é unha decisión dura”. “Coido que debíamos adiantarnos ao avance do virus, a pesar de que no DOG informabase de que poderían permitirse certos cupos de espectadores”, manifestou o concelleiro.

 

22/10/2020 in Alcaldía, Deportes

O Concello decide precintar parques infantís, suspender o mercado ambulante, controlar aforos na Praza de Abastos e competicións deportivas sen público

A Alcaldía comunica que compre adoptar una serie de medidas complementarias no ámbito municipal á vista do crecemento dos contaxios por covid-19 que motivaron que dende hoxe, O Porriño estea en alerta vermella. O Porriño cun total de 26 contaxios activos, entrou en nivel 3 polo que o goberno municipal, tras unha reunión de urxencia, resolveu as seguintes disposicións:

 

  • Suspender o mercado ambulante dos martes
  • Precintar os parques infantís
  • Establecer na Praza de Abastos, un control de acceso e un aforo restrinxido, con circuito de entrada e saída.
  • Suspensión de actividades culturais tanto nos recintos municipais como nas asociacións.
  • Peche da Sala de Estudo Municipal
  • Competicions deportivas federadas sen público en recintos pechados e ao aire libre.

Todas estas medidas estarán vixentes ata que mellore a situación.

A alcaldesa Eva García explicou que todas estas decisións “precisan da colaboración da veciñanza” e fixo “unha chamada á prudencia para que os porriñeses e porriñesas limiten os contactos con persoas non convivintes para protexerse a sí mesmos, a súas familias e aos demais. O Ministerio de Sanidade advirtenos de que agardamos meses moi duros e teremos que ser moi responsables”.

22/10/2020 in Alcaldía, Cultura e festas, Deportes

Porriño entrou hoxe en alerta vermella segundo o mapa Covid do Sergas. A alcaldesa expresa a súa preocupación pola falla de información da Xunta de Galicia


O Porriño entrou hoxe en alerta vermella (nivel 3) segundo publica o mapa que diariamente difunde o Servizo Galego da Saúde. O Porriño aparece en nivel de alerta 3 por ter máis de 21 casos de covid activos nos últimos 7 días.
Despois de coñecer este dato, de xeito extraoficial, a alcaldesa Eva García contactou coa Consellería de Sanidade que lle informou que hoxe hai 26 casos activos de infectados por covid no termo municipal.

A alcaldesa declarou que “a actitude da Xunta de Galicia prodúcenos preocupación e angustia porque carecemos dunha información directa e periódica”. A rexedora sinalou que a Xunta de Galicia “comportase cos concellos con desconfianza o que causa prexuízo aos cidadáns por que produce que reaccionemos tarde”.

A alcaldesa avisou á veciñanza que “teremos que adoptar medidas duras e incomodas que non gustarán pero son polo ben común” e pediu que “todos os porriñeses e porriñesas cumpran cos protocolos de distancia e protección para evitar a propagación do virus”.

22/10/2020 in Alcaldía

Bando da Alcaldía recomendando responsabilidade nos cemiterios e evitar aglomeracións

 

Ante as inminentes datas de Defuntos e Todos os Santos, a Concellería de Cemiterios insta á veciñanza a que eviten aglomeracións e acudan con antelación dabondo e manteñan as debidas precaucións e protocolos anti-covid.  

A tal fin, a Alcaldesa Eva García de la Torre promulgou un bando nos seguintes termos:

“Con fin de visitar ós nosos defuntos nestes días; dende o Concello pedimos responsabilidade á hora de evitar aglomeracións nos cemiterios municipais e relixiosos”.

Este bando colocaráse nos accesos dos cemiterios existentes no Porriño.

 

21/10/2020 in Alcaldía

Presentadas 78 solicitudes para as axudas municipais a autónomos, pemes e micro empresas do Porriño afectadas pola crise sanitaria

78 solicitudes presentáronse para acceder as axudas que prestará o Concello para autónomos, pequenas e medianas empresas e micro empresas do Porriño afectadas pola crise derivada da pandemia sanitaria. O prazo de presentación de solicitudes comezou o martes 29 de setembro e rematou onte martes 20 de outubro, segundo informou a Alcaldía.

O Servizo de Intervención do Concello estudará de inmediato cada petición e revisará a documentación, requirindo a que puidera faltar no prazo de dez días que se comunicará. Unha vez rematado o proceso de revisión, será a comisión técnica a que resolverá a concesión das axudas económicas que para cada caso ten un tope de 1.200 € por peticionario.

Estas axudas a autónomos, pemes e micro empresas realízanse con cargo a un fondo de 100.000 euros, segundo acordo da corporación municipal.

21/10/2020 in Alcaldía

O Concello aprobou a Conta Xeral de 2019

A corporación municipal aprobou por maioría a Conta Xeral do Concello do Porriño do exercicio de 2019, nunha sesión extraordinaria telemática celebrada esta tarde.
A aprobación acadouse cos 9 votos que sumaron PSOE, BNG, EU Son e Manuel Carrera (UDDL). Previamente desestimáronse as alegacións presentadas polo Partido Popular e por un particular.
A aprobación da Conta Xeral é un trámite de obrigado cumprimento ao remate de cada exercicio por parte das administracións municipais cun informe sobre a súa situación patrimonial; gastos e ingresos , e grao de execución orzamentaria.
Na mesma sesión aprobouse definitivamente cos nove votos favorables de PSOE, BNG, EU Son e UDDL e as abstencións dos concelleiros do PP, o suplemento de crédito 2/2020 por importe de 326.000 € para diversos pagamentos xa recoñecidos.

19/10/2020 in Alcaldía

A Policía Local esclarece un roubo nunha lavandería e identifica ao presunto autor


A Policía Local do Porriño pechou a investigación para esclarecer un delito contra o patrimonio e entregou o atestado coas dilixencias no Xulgado de Garda desta vila. As pescudas policiais determinaron que o presunto autor é un veciño de Sanguiñeda, J.V.M., de 30 anos de idade e con numerosos antecedentes.

A súa identificación acadouse a través das imaxes gravadas polas cámaras de seguridade do establecemento, unha lavandería de auto-servizo, sita na avenida Buenos Aires, onde o presunto autor colleu un televisor de pantalla plana valorado en 289 €. Dous días despois do roubo, o presunto autor fora identificado por un dos axentes policiais levando a mesma roupa que vestía na data de autos e que aparece nas imaxes gravadas polas cámaras de seguridade.

16/10/2020 in Alcaldía

Porriño decide facer o vindeiro pleno en liña

A corporación local do Porriño celebrará o vindeiro luns 19, unha sesión plenaria telemática, segundo decidiu a Alcaldía despois de consultar cos voceiros de todos os grupos municipais.
Durante o estado de alarma, a corporación porriñesa xa fixera o pleno do 27 de maio de xeito telemática.

Agora a decisión fundamentase na interpretación que fai o Concello da recente normativa anti-Covid promulgada pola Xunta de Galicia que limita as reunións a 10 persoas.

O pleno, de carácter extraordinario, consta de tres asuntos. Ademais da aprobación da acta da sesión anterior, lévanse para aprobación definitiva a Conta Xeral do exercicio 2019 e o suplemento de crédito 2/2020.
A sesión comezará ás 17 horas e será retransmitida en “streaming”, dende a páxina web do Concello, na mediateca de plenos.

Adxuntamos a orde do día da sesión.

Pleno 19 de outubro

 

 

16/10/2020 in Alcaldía

Entrou en vigor a modificación da ORA (“zona azul”) na contorna do Mercado


O Concello e a Policía Local do Porriño informan de que entrou en vigor a modificación da ordenanza reguladora de aparcamentos (ORA), segundo o acordo acadado polo pleno da corporación municipal do Porriño o pasado 30 de xuño e unha vez cumprimentados os prazos legais de alegacións e publicidade.

As dúas principais novidades desta modificación son a contía das sancións e o límite de tempo de estacionamento.

A principal causa pola que se acometera esta modificación da ordenanza foi a limitación do tempo de aparcamento. Deste xeito aténdese unha reclamación da veciñanza pola escaseza de aparcamento na zona da Praza de Abastos e a gran demanda de prazas de estacionamento que se require para a atender o comercio.
A Concellería de Seguridade atendeu esta petición en aras de dinamizar ao Mercado e o comercio local e dar unha solución ao problema de circulación. Promulgou a modificación da ordenanza que regula o estacionamento, contando co informe da Policía Local, entendendo que na zona do entorno da praza de abastos, debese axilizar a circulación rodada. Por estas razóns, limítase o estacionamento dos vehículos a 45 minutos ( e non de hora e media como antes) considerando ese tempo como dabondo para realizar as compras no mercado e no comercio local.

No que atinxe ás multas por infracción da ordenanza, actualizase ao establecido polas leis de trafico. Polo tanto haberá unha redución do 50% se o pagamento da sanción se fixera efectivo no prazo de 20 días naturais. O importe das sancións non se incrementou. Sanción de 36 € por modificar a hora de chegada despois do estacionamento; e sancións de 24 € por falta de disco ou comprobante; superar o límite horario; estacionar de novo na mesma rúa ou praza sen que transcorreran dúas horas; ou ocupar dúas prazas de estacionamento.

As prazas destinadas a persoas con dificultades de mobilidade manterán o tempo de estacionamento de tres horas.

Por conseguinte, os sinais informativos serán cambiados para recoller estas novidades.

15/10/2020 in Alcaldía, Tráfico, Urbanismo, comercio e industria

A Policía Local rescata a un veciño maior que camiñaba desorientado pola Autovía

 

A Policía Local localizou a un home de 85 anos de idade, veciño de O Porriño, que circulaba a pé pola Autovía A-52, onte luns, ás 13,40 horas. A través do 112, recibiuse aviso de que un varón, de idade avanzada, camiñaba pola Autovía en dirección Vigo e que corría serio risco.
Os axentes que se desprazaron atopárono camiñando á altura do punto quilométrico 306 comprobando que se trataba dunha persoa maior que ten problemas de demencia, procedendo ao seu traslado e entrega a súa familia que xa estaba a buscalo.
Aínda que o ámbito de actuación das Policías Locais no eido do tráfico restrínxese ás zonas urbanas, non é a primeira vez que axentes do Porriño acoden a atender estas situacións en vías interurbanas, como aconteceu o pasado 5 de setembro deste ano, cun home de 80 anos, tamén veciño porriñés, que sen ningún tipo de roupa reflectante camiñaba pola autovía A-55.

Neste senso, dende a Concellería de Seguridade que dirixe Lourdes Moure, fai un chamamento á colaboración da veciñanza para que dean aviso á Policía Local do Porriño que dispón dunha contrastada capacidade de resposta operativa non superior a tres minutos ante calquera urxencia.

13/10/2020 in Alcaldía, Tráfico