Novas

O Concello reforza o mantemento do alumeado público para resolver de maneira urxente as avarías causadas polo clima

O Concello do Porriño vén de contratar por emerxencia o reforzo do mantemento do alumeado municipal ante os danos causados polas recentes treboadas.
 
A situación climatolóxica dos últimos meses ten ocasionado moitos danos. Son centos as intervencións do persoal do Concello e moitas máis as incidencias atendidas polos servizos municipais, debido aos fortes ventos, precipitacións que xeraron a caída de lámparas, queima de cadros eléctricos, caída do tendido en lugares con auga encourada que xeran perigo de descarga aos viandante, en suma, inseguridade cidadá tamén por falta de iluminación nos viais públicos. Si a isto lle sumamos a falta de mantemento que a instalación sufríu ao longo dos anos, fai que o persoal propio do Concello non sexa suficiente para repáralo e mantelo en condicións.
 
Por iso, o Concello do Porriño acordou contratar polo procedemento de emerxencia o mantemento do alumeado municipal. Cun orzamento de 27.000 euros reforzarase o traballo do persoal municipal de resolución de avarías e tamén se auditará o estado actual da instalación.
 
“A situación na que se atopa o alumbrado público require de medidas urxentes, xa que co persoal co que contamos no é suficiente e son moitas as incidencias”, explicou o alcalde, Alejandro Lorenzo , “Moitos veciños e veciñas están a verse perxudicados por isto e hai que darlles solución, xa que se trata dun servizo público ao que teñen dereito”.
 
 
25/01/2023 in Vías e obras

Juan Carlos Giráldez, un exemplo de empatía e loita

A silicose volve a cobrarse a vida dun dos nosos. Esta fin de semana Juan Carlos Giráldez, presidente da Asociación de Afectados por Silicose Osilice Galicia deixábanos a causa desta enfermidade que nos arrebatou a tantas persoas no Porriño.
 
Carlos, de 54 anos de idade e veciño de Atios, foi un exemplo de empatía e loita que perdurará sempre. Tal e como relataba o vicepresidente de OSÍLICE e amigo de Carlos dende a infancia, Serafín Ramilo, “adicou gran parte da súa vida a atender a persoas que padecían esta enfermidade e se atopaban perdidos ou desorientados sen saber como afrontar o diagnóstico. Carlos entregouse a acompañar e apoiar á xente que como él loitaba contra a silicose”. Con este fin, o de dar respaldo aos centos de afectados que había e hai no Porriño e na contorna, fundaron xuntos a asociación no ano 2013.
 
“Esta enfermidade marcou a súa vida e a da súa familia”, explica Serafín, “Tres xeracións faleceron por esta causa, o seu avó, o seu pai e logo el, tal vez por iso cando enfermou decidiu adicar gran parte da súa vida a axudar aos demais, a loitar polos seus dereitos e guialos neste duro camiño. Dende que fundamos a asociación asesoraba a moita xente que contactaban con el a través da web de Osílice, non só do Porriño ou Galicia, senón de toda España”.
 
“E todo ese traballo, como a el lle gustaría, debemos continualo para que as vindeiras xeracións non cometan os mesmos erros e poidan traballar co granito ou calquera outro material sin o risco de morir por esta enfermidade”, concluíu Serafín.
 
Por iso, dende Osílice queren agradecer publicamente a Carlos todo o traballo, tempo, esforzo e adicación que deu aos demais ata o último momento, incluso cando xa lle fallaban as forzas, e materializar ese agradecemento dando continuidade ao seu traballo.
 
O alcalde, Alejandro Lorenzo ,no seu nome e no do pobo quere “agradecer a Juan Carlos o inmenso e desinteresado labor que fixo para e polos demais. Perdemos a un amigo, a unha persoa excepcional e a un exemplo de humanidade e loita”. O rexedor quixo incidir na mensaxe dos seus compañeiros de OSÍLICE facendo unha chamada “a non deixar morrer o legado de Carlos xa que iniciou un camiño para mellorar a vida dos enfermos de silicose que agora nós debemos continuar ata o final”.
25/01/2023 in Alcaldía

O Concello do Porriño acomete a reforma da cuberta do Multiusos

O Concello do Porriño vén de tramitar por emerxencia as obras de reparación da cuberta do Multiusos de Torneiros.

Como consecuencia da absoluta falta de mantemento a cuberta do edificio atópase en moi mal estado polo que, dende hai varios anos, estanse a producir entradas de augas pluviais.  Dado inusual réxime de precipitacións e treboadas dos últimos meses as entradas de auga téñense incrementado en grado tal que imposibilitan a práctica das actividades que se desenvolven no mesmo e están a producir importantes danos no interior. ademais de supoñer un risco para usuarios e usuarias das instalacións.

Con tal motivo, dende a concellería de Vías e Obras, que dirixe Ramón Porto, acometeranse de maneira inmediata os traballos de reparación que, tal e como explicou o edil,  inclúen “a limpeza da totalidade dos canalóns perimetrais de recollida de pluviais, reposición das últimas de tella, reposición da estrutura e a xanela de acceso á cuberta e a reposición dos entronques”.

“A situación na que se atopa o edificio nos últimos anos é insostible e, ademais de imposibilitar o normal uso das instalacións, supón un risco para os usuarios e usuarias das mesmas xa que os pasillos e aulas anéganse cando chove”, explicou o alcalde, Alejandro Lorenzo, “A falta de mantemento de moitas instalacións municipais está a causar moitos problemas e traballamos para solventalos á maior brevidade”. 

As obras a executar supoñen un investimento de 22.286 euros.

23/01/2023 in Vías e obras

O Consorcio de Augas do Louro aproba un crédito extraordinario de preto de 2 M de euros para obras de saneamento e abastecemento

O Consorcio de Augas do Louro, que preside Alejandro Lorenzo, vén de aprobar unha modificación orzamentaria para acometer inversións de carácter urxente por un importe total de 1.890.000 euros. O Comité Directivo aprobou este crédito extraordinario, financiado co remanente líquido de tesourería para gastos xerais, co fin de  levar a cabo obras e proxectos de saneamento e abastecemento nos catro concellos que integran a entidade.

Tal e como explicou Lorenzo, “o criterio de reparto das contías a investir en cada municipio resolverase en función da participación de cada un deles nos ingresos do Consorcio, tal e como establecen os seus estatutos”.

Así,  no Concello de Mos investiranse 221.275,59 euros con destino a eliminación de verteduras en zonas onde non existe rede de saneamento , tales como a contorna da urbanización San Antoíño ou en varios núcleos das parroquias de Cela e Sanguiñeda.

O Porriño recibirá 1.025.054,46 euros cos que se acometerán proxectos e obras de saneamento nas sete parroquias que conforman o municipio.

Pola súa banda, Salceda disporá de 172.103,24 euros para investir en actuacións de saneamento en Ataúde e Loureiro (Picoña), Ponte do Ameal-Presa (Parderrubias), Outeiro (San Xurxo) e Santa María (Santa María).

Os 472.811,10 euros restantes corresponderán ao Concello de Tui, cos que se realizarán investimentos en diversos ramais da rede de saneamento nos lugares de Laranxeiras, Sardadiñas, Costal, Mallón, Campo de fútbol de Ribadelouro, Mourentán, Souto (Pexegueiro), Magdalena, O Castro e Souto de Arriba, así como obras de renovación das instalacións de abastecemento na rúa San Telmo.

20/01/2023 in Alcaldía, Vías e obras

Escolares do Porriño coñecen de primeira man a actividade municipal

Un grupo de alumnas/os do CEIP Xosé Fernández López inaugurou hoxe as visitas guiadas á Casa Consistorial nas que participarán preto de 400 escolares do municipio.

A concellería de Educación, que dirixe Carolina González, a través da OMIX, organiza esta actividade para que as/os nenas/os poidan coñecer de primeira man os diferentes departamentos dos que se compón o Concello do Porriño e o traballo que se desenvolve no consistorio. 

“Con esta iniciativa de portas abertas pretendemos dar a coñecer en profundidade o Concello ás/aos máis pequenas/os, xa que normalmente só teñen acceso á zona de rexistro cando van acompañados dun adulto, e tomen conciencia da importancia de participar na vida municipal”, apuntou a concelleira, Carolina González, “Hoxe visitounos alumnado do CEIP Xosé Fernández López e nas próximas semanas recibiremos ao IES Pino Manso, CPR Hnos. Quiroga, CEIP P. Antonio Palacios, CEIP da Ribeira, CEIP Cruz Budiño, CEIP P. Atios , Aceesca, CPR Santo Tomás e IES Ribeira do Louro”.

Acompañadas/os por unha funcionaria municipal que actúa como guía, poden coñecer a historia do edificio e as funcións das distintas salas e espazos, así como as dos órganos municipais que ocupan cada unha delas.  Percorren os corredores do Concello, salón de plenos, o balcón dende o que tradicionalmente se pregoa o inicio das Festas do Cristo, Entroido, etc…

As visitas finalízan na Alcaldía, onde son recibidos polo rexedor, Alejandro Lorenzo, que se encarga persoalmente de explicarlles cal é a súa función e como é o seu día a día.  “Para min é un pracer recibilos, amosarlles o que se fai no Concello e facelos partícipes. Pero tamén o é escoitalos e aproveitar este momento para resolver as súas dúbidas, contestar as súas preguntas e tamén recoller as propostas que teñen para mellorar o seu pobo e o seu colexio”, explicou Lorenzo, “Estar con elas/es sempre é enriquecedor para min, como persoa e como Alcalde, xa que teñen moito que dicir”.

20/01/2023 in Educación e tecnoloxía

O Concello do Porriño acomete o cambio de cuberta do pavillón do CEIP Plurilingüe de Atios

O Concello do Porriño acometerá nos próximos días os traballos se sustitución da cuberta do pavillón polideportivo do CEIP Plurilingüe de Atios.

A consecuencia do deterioro polo paso do tempo o material que cubre o pavillón non cumpre xa coa súa función de impermeabilización. “Estanse a producir entradas de augas pluviais ao interior e o problema agravouse coas choivas do último mes, en grado tal imposibilita a practica das actividades deportivas, tanto as escolares como outras de carácter municipal”,  explicou o alcalde, Alejandro Lorenzo, “Isto entraña un un perigo para os nenos e nenas que fan uso do pavillón e impide o normal desenvolvemento das actividades lectivas.  Por iso acordamos actuar de inmediato”.

Con tal motivo, contratouse polo procedemento de urxencia a renovación de toda a cuberta por unha nova formada por panel metálico con illamento intermedio e, ademais, instalarase unha nova rede de evacuación, formada por canalones metálicos de sección rectangular e baixantes de PVC.

As obras, financiadas con fondos municipais, contan cun orzamento de 70.304,65 euros.

17/01/2023 in Educación e tecnoloxía

Aceesca construirá unha nova residencia de atención á discapacidade no Porriño

Aceesca, asociación porriñesa centrada no apoio a persoas con diversidade intelectual, resultou beneficiaria dunha achega de 2 millóns de euros que a Xunta de Galicia lle concede para a creación dunha residencia de atención á discapacidade no Porriño. A conselleira de Política Social e Xuventude, Fabiola García, acompañada pola delegada territorial da Administración autonómica en Vigo, Marta Fernández-Tapias, e o alcalde do Porriño, Alejandro Lorenzo, visitou hoxe as instalacións da asociación en Torneiros.

Aceesca é unha das dez entidades de Galicia que se beneficiará da nova orde de axudas para a construción ou remodelación de centros para a atención a persoas maiores e con discapacidade de titularidade social, dotada de 13 millóns de euros. Con este apoio económico por parte do Goberno galego, Aceesca creará un novo centro residencial con 48 prazas .

Fabiola García destacou o traballo que realiza entidade no Porriño nos seus centros de día e ocupacional, nos que a Xunta financia no seu conxunto 73 prazas ás que destina 800.000 euros ao ano -36 prazas no centro de día e 37 no centro ocupacional-. Ademais, recoñeceu o compromiso do Concello do Porriño na atención ás persoas con discapacidade e aos maiores e sinalou que o Goberno galego seguirá a traballar da man do Concello para ampliar o financiamento do Servizo de Axuda no Fogar ou para levar ao municipio atención gratuíta en audioloxía, podoloxía e estimulación da memoria a través do programa de Coidados porta a porta.

A conselleira referiuse tamén a outras medidas dirixidas a apoiar ás entidades que actúan no ámbito da discapacidade, como a nova orde de axudas para a adquisición de vehículos adaptados, dotada de 3,6 millóns de euros e das que se beneficiarán 80 entidades, entre elas Aceesca.

Pola súa banda, o alcalde agradeceu a axuda da Xunta de Galicia para poder facer realidade este ilusionante proxecto e destacou a importancia de que todas as administracións se impliquen para facer posible que esta asociación poida levar a cabo as súas iniciativas, todas elas en beneficio das persoas con discapacidade intelectual do Porriño e tamén da contorna. O rexedor concluíu reiterando que a man do Concello estará tendida para Aceesca sempre que a necesiten.

 

17/01/2023 in Servizos sociais

O Concello do Porriño planta 100 novas árbores na zona urbana

A concellería de Parques, Xardíns e Limpeza, que dirixe José Carlos González, comezou xa os traballos de replantación do arboredo do casco urbano e Torneiros.

En total serán un centenar de exemplares os que se plantarán en posicións onde non se repuxeran, seleccionando a tal fin árbores de boa calidade acaídos para o marco de plantación como tilos, camelios e magnolios, entre outros.  O Concello procede tamén á retirada de 47 tocóns , con medios mecánicos e manuais, e posterior traslado destes restos vexetais cun xestor autorizado.

“Os traballos comezaron no Parque do Cristo, onde se retiraron os restos das 18 árbores danadas (tocóns de aproximadamente 50/70 cm de diámetro) e se replantaron 17 novas árbores, concretamente 14 na contorna da Capela e 3 na zona do parque infantil”, explicou o concelleiro, “Continuaremos repoñendo 4 árbores na rúa Domingo Bueno, 4 na rúa Foz, 6 en Xogo da Ola, 3 na Avda. de Galicia, 4 na rúa Cruceiro, 2 na rúa Pinar, 3  no Cristo dos Cachos, 1 na contorna dos Xulgados, 1 na rúa Codesal, 3 na contorna da ponte do Valo, 25 no velódromo municipal e 17 na Fase III de Torneiros”.

“As árbores deterioradas deixan o seu lugar a novos exemplares que devolverán á zona urbana do Porriño ese verde que precisa”, afirmou o alcalde, Alejandro Lorenzo, “Substituiranse aquelas árbores que, por diversas circunstancias, sufriron danos e non se atopan en bo estado e tamén plantando en novas ubicacións. Traballamos co obxectivo de dotar o Porriño de máis zonas verdes, non só levando a cabo esta reposición, senón creando novos espazos que sirvan de pulmón desta contorna urbana”.

 

 

16/01/2023 in Parques e xardíns

A XIV promoción de Policías Locais da AGASP inicia o Camiño no Porriño

Máis dun centenar de axentes da Policía Local iniciaron hoxe o Camiño de Santiago dende  O Porriño. Trátase dos alumnos e alumnas da décimo cuarta promoción de Policías Locais da Academia Galega de Seguridade Pública que, acompañados por profesores e a Xefa de Estudos da AGASP, Mónica Castro, completan o seu plan formativo con esta actividade.

O Alcalde do Porriño, Alejandro Lorenzo, e o Inspector Xefe da Policía Local, Daniel Rodríguez, desexaron aos peregrinos/as un bo camiño. “É un pracer tervos hoxe no Porriño, o mellor punto de inicio para unha experiencia como a que ides a vivir, que de seguro lembraredes sempre”, apuntou o rexedor, “Agardo que a disfrutedes ao máximo e que á volta, cando vos incorporedes como policías locais nos vosos respectivos concellos, sigades disfrutando e amando o voso traballo”.

Axentes da Policía Local do Porriño encargáronse de selar as credenciais que, unha vez completadas todas as etapas, darán paso á obtención da “Compostela” que acredita que completaron o Camiño coa súa chegada á Catedral de Santiago de Compostela.

16/01/2023 in Seguridade

O Porriño licita o desbroce e limpeza das parroquias

O Concello do Porriño vén de sacar a licitación o contrato de desbroces, limpeza e reperfilado de beiravías de todas as parroquias do municipio. Este servizo víñase prestando con contratacións puntuais que non permitían a correcta prestación do servizo e, durante anos se fixo sen contrato nin fiscalización algunha, o que foi obxecto de apertura de causa xudicial que a día de hoxe permanece en fase de instrucción. 

Ata este momento, tan só o centro urbano e os polígonos residenciais de Torneiros tiñan o servizo contratado, polo que no resto do termo municipal era imposible manter as zonas rurais en bo estado. 

O contrato dará cobertura á roza e limpeza de maleza en camiños municipais, corte de todo tipo de vexetación, poda de árbores ata unha altura máxima de 3 metros e limpeza de caños, arquetas etc, entre outros. 

A duración do servizo a licitar é de 2 anos, prorrogable 2 máis, e conta cun orzamento total para os 4 nos de 1.335.446 euros.

“Ata o de agora este servizo non estaba a prestarse correctamente”, explico o alcalde, Alejandro Lorenzo, “Ao non estar regularizado ou se contrataba a maiores ou se executaba con persoal municipal, algo que resulta insuficiente dada a extensión rural do Porriño e a necesidade de limpar de maneira continuada para manter estas zonas en boas condicións”. O rexedor concluíu afirmando que “a regularización de toda a contratación do Concello é un traballo complexo e duro, pero tal e como defendín sempre, é esencial para poder prestar ben os servizos aos que a cidadanía ten dereito e tamén para garantizar a correcta utilización dos fondos públicos”. 

10/01/2023 in Limpeza