Novas

O mércores realizarase a obra de mellora da pavimentación da rotonda sur das Gándaras


O Concello do Porriño informa que este mércores día 22 realizarase a obra de mellora da pavimentación da rotonda das Gándaras que afectará ao tráfico rodado do acceso sur aos polígonos industriais de As Gándaras e A Granxa.

A empresa “ENDENOR, Construcción, Mantenimiento y Servicios”, adxudicataria da contrata, informou ao Concello que a duración dos traballos será dun día, de xeito que o xoves 23, recuperarase á normalidade, se non xurde algún imprevisto.

Os traballos a realizar son o levantado e novo asfaltado da rotonda sur das Gándaras sita a continuación da saída 21 da Autovía A-55 en dirección Tui, polo que cumpre cortar o tráfico rodado. Mentres duren as obras, a circulación de vehículos cara ao sur do Polígono das Gándaras, se realizará pola saída anterior, número 18.

Tamén o acceso dende a rotonda sur do polígono de A Granxa, queda cortado namentres se realizan estes traballos, desviándose a circulación entre o sur dos polígonos á altura da saída 18 da A-55, dirección Tui.

O Concello do Porriño agradece a colaboración dos condutores e usuarios.

20/07/2020 in Alcaldía, Tráfico, Vías e obras

O Concello recepciona as obras de lixado, barnizado e pintado da pista 1 do Polideportivo Municipal

David Alonso, concelleiro de Deportes realizou hoxe a recepción das obras de lixado, barnizado e pintado da pista 1 do Polideportivo Municipal. Estes traballos estiveron paralizados polo estado de alarma e retomáronse cando se relaxaron as restricións no sector de construción e carpintería.


Este emprendimento realizouse polo Concello do Porriño con cargo a unha subvención de 48.000 euros do Plan Concellos da Deputación Provincial.
Anteriormente realizouse tamén a mellora da pista 2 de Polideportivo. Sen embargo, a enchente de auga que provocou unha tormenta na noite do 1 de xuño, causou danos que serán reparados con cargo á póliza de seguro, antes de que comece a vindeira tempada.


Por outra banda, hoxe tamén recepcionouse a entrega de diversos material deportivo consistente en novas canastras, marcadores e altofalantes que mellorarán o funcionamento dos pavillóns cara á reanudación das competicións deportivas.

17/07/2020 in Deportes

O Concello lembra que a Piscina Municipal,está aberta dende hai unha semana e funciona segundo os protocolos anti-Covid



A Concellería de Deportes do Concello do Porriño lembra que dende hai unha semana está aberta a Piscina Municipal baixo unas estritas pautas de prevención do Covid-19.

O emprego da máscara é obrigatorio en todo momento, agás dentro da piscina.

A solicitude de cita previa é un requisito imprescindible. Debe solicitarse cun máximo de 48 horas de antelación, ben por teléfono a través do número 986 34 44 20 ou por correo electrónico no enderezo: piscinaporrino.eulen@gmail.com

O tempo de nado é de unha hora e non poderá haber máis de dúas persoas por cada rúa na piscina grande. No vaso pequeno, o aforo máximo será de 8 persoas.

O horario de apertura da Piscina Municipal do Porriño será:
de luns a venres, de 7 da mañá a 14 horas; e de 16 h. a 23 horas. Os sábados, de a 14 h. e de 17 a 20,30 h. E domingos, tan só en quenda matinal, de 10 a 14 horas.

Os responsables da instalación municipal advirten que non se permitirá o acceso a persoas con síntomas compatibles co “Covid-19”: tose, febre ou dificultade para respirar.

16/07/2020 in Alcaldía, Deportes

Programación cultural do Concello do Porriño “para un tempo novo”: CONCERTO DO “DÚO DELÍS” NA PRAZA DO CONCELLO, CUN AFORO RESTRINXIDO

A Concellería de Cultura e Festas informa que o vindeiro sábado 18 ofrecerá un concerto musical a cargo do “Dúo “DeLís”, ás 21 horas, na praza Arquitecto Antonio Palacios. O espazo para público, diante do Concello, terá un aforo restrinxido, só para 100 cadeiras, segundo organizou a devandita Concellería que dirixe Cami Moreira.

Este concerto enmarcase na programación cultural do Concello do Porriño “Para un tempo novo”, coa ocasión de rematar co estado de alarma e transitar cara a chamada “nova normalidade”.

“Dúo DeLís” está formado por Irma Bau e Irina Veselova  que coñecéronse en Barcelona a principios do 2017, nas “máster-class” do mestre Peter Bruns. A conexión entre elas é inmediata, e deciden dar continuidade a aquel encontro, formando un dúo estable.

Presentáronse en público no mes de marzo dese cun concerto en Barcelona, e en abril gañan por unanimidade o primeiro premio no 23º Concurso Internacional Papel de Música de Capellades. Despois acadaron o 2º premio no concurso internacional de Música de “Les Corts”, no auditorio AXA de Barcelona, e logo conseguen o 1º premio, tamén por unanimidade, no Concurso Internacional Mirabent i Magrans de Sitges, na modalidade de música de cámara.

Isto lévaas a ofrecer recitais en prestixiosas salas, ciclos de concertos e festivais de toda Cataluña e no resto do estado. Grazas ao premio obtido no concurso Papel de Música, gravan o seu primeiro CD, chamado “Joyas del romanticismo” no auditorio Atlántida de Vic baixo o selo de Solfa Recordings, coas sonatas de César Franck e Sergei Rachmaninov.

Concerto: Dúo DeLIS

 

15/07/2020 in Cultura e festas

A Xunta de Voceiros estudará se é posible algunha compensación ás canteiras polo estado de alarma


A Xunta de Voceiros Municipais convocada para o vindeiro venres 17, ás 12 horas, tratará a petición dunha posible devolución de parte do canon que canteiras radicadas no Porriño aboan anualmente ao Concello. A petición basease na paralización forzosa –entre as canteiras que aínda están activas- durante os tres meses que durou o estado de alarma polo “Covid-19”.

O primeiro tenente de alcalde, Pedro Pereira como concelleiro responsable do Patrimonio Municipal, levará a proposta á consideración dos voceiros dos restantes grupos da corporación para determinar se procede algunha compensación. Ata este intre, catro canteiras solicitaron formalmente ao Concello a devolución de parte do canon anual que pagan.


Precisamente outro asunto que tratará a Xunta de Voceiros, a proposta de Pereira, vai ser o establecemento dun Prego Xeral para as Canteiras, como ferramenta para ordenar a relación deste sector co Concello do Porriño.

Son dous dos seis asuntos que forman a orde do día da reunión da xunta de voceiros municipais que tamén, tratará en qué situación atópase a Comisión de Deslinde con Mos cúa actividade que retomaron ambos concellos, paralizouse co estado de alarma

15/07/2020 in Alcaldía, Urbanismo, comercio e industria

O Concello amplía o prazo para participar na Batalla de Debuxantes “Improvisdado”

A Concellería de Cultura e Festas e a Oficina Municipal de Información Xuvenil (OMIX) informan da ampliación do prazo para participar na “Batalla de Debuxantes Improvisdado”, convocada polo Concello do Porriño.

O prazo de presentación de propostas que comezou o 1 de maio, amplíase ata o 31 de agosto.

Lembramos que esta convocatoria está dirixida a debuxantes con idades comprendidas entre os 12 e os 45 anos, de nacionalidade española ou estranxeira. Terán que desenvolver de xeito profesional ou aficionado algunha das seguintes disciplinas artísticas relacionadas coa pintura: ilustración, graffiti, tatuaxe, banda deseñada ou outras técnicas de debuxo de man alzada.

A convocatoria lanzouse o 30 de marzo dende a Concellería de Cultura e a través da Oficina Municipal de Información á Xuventude (OMIX), durante o pasado estado de alarma “como un estímulo para os creativos, para que puideran traballar dende as súas casas pese ao confinamento”. 

Para facilitar a participación, pódense facer os debuxos na casa e ser enviados por vía telemática e ademais, a inscrición é de balde. Os debuxos deberán presentarse por vía electrónica en formato JPG ou PDF cunha resolución igual ou superior a 1.200 px por 1.200 px. Deberán enviarse escaneados ao correo info@vellaescola.com indicando como asunto: InscriciónConcurso ImprovisDado”.

De entre todos os debuxos presentados serán seleccionados os artistas que concorrerán á final que sí será presencial, que está prevista para celebrarse o 19 de setembro. Terá unhas regras específicas e unha dotación económica en premios que se detallan nas bases da convocatoria que pódese consultar tanto nesta web do Concello coma na web do departamento de Cultura.

Deixamos ligazón para interesados/as

Batalla de debuxantes “ImprovisDado”

14/07/2020 in Cultura e festas

Galería de imaxes das Festas de San Bieito 2020

Unha visita guiada ao cultivo de vimbieiras de Julia De La Cal foi unha das actividades máis sobranceiras das que tiveron lugar onte coa ocasión das Festas de San Bieito 2020.


Despois da visita, na Praza de San Sebastián, Julia de la Cal mantivo unha conversa para achegar á cestería ao público que acudiu, entre os que estaban os concelleiros do goberno municipal, Pedro Pereira e Cami Moreira.


Ademais tamén celebrouse un concerto musical a cargo do dúo “Lagoa Folk”, na praza de San Bieito.

 

14/07/2020 in Cultura e festas

15.680 PORRIÑESES ESTÁN CHAMADOS A VOTAR NAS ELECCIÓNS GALEGAS DO VINDEIRO DOMINGO 12-X. – Polos protocolos anti-Covid19, modificáronse espazos de votación en varios colexios electorais

O Concello do Porriño, colaborando co a Xunta Electoral de Zona, está rematar hoxe a preparación do dispositivos das 23 mesas distribuídas en 14 colexios electorais onde poderán exercer o seu voto 15.680 porriñeses e porriñesas con dereito a votos nestes comicios autonómicos do vindeiro domingo 12.

Debido aos protocolos anti-Covid19 que son de aplicación para gardar as distancias interpersoais e evitar as aglomeracións, Concello e Xunta Electoral acordaron certas modificacións na ubicación de algunhas mesas electorais na procura de espazos máis abertos. É o caso das mesas electorais situadas no CEIP de Atios que en vez de quedarse nas instalacións do centro educativo, están situadas no pavillón polideportivo do colexio. O mesmo acontecerá nas mesas localizadas no CEIP de A Ribeira. 

Ademais no CEIP Xosé Fernández López que acolle catro seccións cun total oito mesas electorais que suman 6.410 electores, repetirase a súa colocación no pavillón deportivo do colexio. Como xa se fixera nas últimas eleccións xerais, para mellorar a accesibilidade e previr aglomeracións.

 

10/07/2020 in Alcaldía

A Policía Local realizou as primeiras denuncias para sancións de 100 € por non empregar a máscara

 

A Policía Local do Porriño impuxo onte á noite na Avenida de Buenos Aires, as primeiras denuncias a varias persoas, todas elas mozas, que non facían uso das máscaras de protección nunha reunión. Cada denuncia dará lugar a multas económicas de 100 € por persoa, segundo a normativa vixente da Xunta de Galicia.

A Policía Local do Porriño, seguindo as instrucións da Concellería de Seguridade que dirixe Lourdes Moure, considera que rematou o período pedagóxico. Ata onte, os axentes lembraban aos cidadáns que debían facer uso das máscaras de protección, tanto as cirúrxicas coma as téxtiles, “de xeito obrigatorio cando non sexa posible garantir o mantemento dunha distancia de seguridade interpersoal”, segundo estableceu a Xunta no decreto publicado no DOG do pasado 27 de xuño.

Tanto a Concellería de Seguridade coma a Policía Local recomendan o uso permanente das máscaras de protección aos peóns nas rúas para previr situacións de risco.

09/07/2020 in Alcaldía

Celebradas once mesas de contratación: vendéronse, de momento, 6 dos vehículos en desuso do parque móbil municipal

Esta mañá celebráronse once mesas de contratación doutras tantas licitacións convocadas polo Concello do Porriño por un importe aproximado de 3 millóns de euros. Entre elas a poxa de vehículos municipais en desuso, dos que se venderon media ducia.

 

Dous licitadores adquiriron eses vehículos. Un deles ofreceu un total de 7.500 € para mercar unhas furgonetas Citroen Berlingo, Peugeot Partner, Peugeot Expert, un turismo Citroen Xsara e un Kia Picanto que utilizaron diversos servizos municipais nos últimos 20 anos. O outro licitador, ofreceu 701 € por unha Fiat Ducato que mercou. Houbo máis ofertas nesta poxa que abrangue ata 26 vehículos en desuso, pero incorrían en baixa temeraria e serán valoradas polos técnicos municipais.

Entre os pregos con máis empresas interesadas figura o proxecto de humanización da rúa Aloques, cun orzamento de partida de 422.000 € ao que aspiran 9 construtoras, e a pavimentación de camiños municipais en Torneiros, Centeáns, Covelo e Cavadas que saen en tres lotes de adxudicacións aos que aspiran 6 construtoras. En ambos casos, son obras con cargo ao Plan Concellos 2020 e os plicas pasarán agora á valoración dos técnicos municipais.

09/07/2020 in Alcaldía