Vías e obras

En funcionamento a nova rotonda de A Costeira e a ordenación da zona entre Cerquido e Budiño, que ten un elevado índice de accidentes de tráfico

A alcaldesa, Eva Garcia de la Torre, xunto con Uxío Benítez, deputado provincial de Mobilidade da Deputación de Pontevedra, e o concelleiro de Vías e Obras, Manuel Carrera, supervisou hoxe as obras realizadas polo organismo provincial para reordenar o tráfico e mellorar a seguranza viaria na estrada provincial EP-2405 entre Cerquido e Budiño, no lugar de A Costeira.

García de la Torre  salientou que a obra supón “unha mellora ostensible” na ordenación da zona e asegurou que “coa construción da rotonda evítase a altísima sinistralidade que había tal e como estaba configurado o espazo. Agora os viandantes e as persoas usuarias adaptáronse perfectamente á existencia da glorieta, o que dá idea da necesidade que había de facela”.

Para o responsable das infraestruturas provinciais a nova glorieta ven a redistribuír a circulación e calmar a velocidade nunha intersección que ata o de agora era moi perigosa e fora escenario de diversos accidentes.

Benitez subliñou que a actuación en A Costeira incluíuse dentro do Plan de Interseccións  da Estratexia de Mobilidade 3.0 da Deputación, que ten como un dos seus obxectivos prioritarios eliminar a violencia viaria e os puntos negros de toda a rede de estradas provincial.

Os traballos de mellora consistiron principalmente na ampliación do radio de curvatura da estrada principal, preto da conexión da EP-2405 da Deputación co parque empresarial das Gándaras, á altura do Centro Tecnolóxico do Automóbil de Galicia.

Doutra banda, urbanizouse a zona con beirarrúas para prestar continuidade ao tránsito peonil, habilitáronse pasos de peóns e baixouse a velocidade máxima de 50 a 30 quilómetros hora. Tamén se solucionaron as drenaxes mediante a remodelación de beiravías e sumidoiros e instaláronse oito luminarias tipo led sobre columnas de nove metros, catro na propia glorieta e outras catro nas inmediacións da intersección.

O orzamento global ascendía inicialmente a 220.336,36€, sendo 21.534€ destinados a expropiacións e o resto á execución da obra. Finalmente a licitación pechouse por un prezo de 132.719,68.

09/10/2018 in Alcaldía, Tráfico, Vías e obras

24 vivendas maís do barrio de A Gándara, en Torneiros, poderán conectarse á Rede Municipal de Abastecemento dende principios de outubro

Un total de 24 vivendas do barrio de A Gándara, en Torneiros, que ata hoxe eran usuarias da traída veciñal, poderán conectar coa Rede Municipal de Abastecemento  en canto rematen os traballos que está a realizar nesta zona a Concellería de Vías e Obras.

O tenente de alcalde, Manuel Carrera subliña que “as veciñas e veciños desta zona poderán ter servizo de auga potable, logo dunha modificación orzamentaria impulsada dende o Goberno local, á que opúxose o Partido Popular”, dado que se fixera pouco tempo despois de que o Pleno aprobase os orzamentos municipais, os primeiros que ten O Porriño en seis anos.

Maila a esta oposición do PP, os residentes de A Gandara  terán acceso ao saneamento municipal, “algo que era debía de facer este Goberno local e que será unha realidade a principios do mes que vén”.

Para que sexa así, vanse instalar 416metros lineais de tubaxe e se completarán 16 acometidas, que rematarán cuns traballos iniciados a principios de setembro e que contan cun orzamento de 36.000€.

29/09/2018 in Alcaldía, Vías e obras

A Concellería de Vías e Obras, coordinando os seus traballos cos de asfaltado que realiza a Deputación na EP-2405, leva o saneamento a 11 vivendas do barrio de Casal, na parroquia de Budiño

A Concellería de Vías e Obras, simultaneando os seus traballos cos de asfaltado que a Deputación de Pontevedra está a realizar na estrada EP-2405, ao seu paso polo barrio de Casal, na parroquia de Budiño, está a levar o saneamento a 11 vivendas deste lugar.

Manuel Carrera lembra que para poder realizar esta obra o Goberno local aprobara, pola vía de urxencia, a redacción dun proxecto que supuxo impulsar unha modificación orzamentaria “moi criticada polo Partido Popular”, dado que se fixera pouco tempo despois de que o Pleno aprobase os orzamentos municipais, os primeiros que ten O Porriño en seis anos.

“Pois ben”, engade o tenente de alcalde, “grazas a ese proxecto e esa modificación orzamentaria, que era necesaria, en contra do criterio amosado polo PP, as veciñas e veciños desta parte de Casal verán cumprida unha antiga demanda e, o que é moito máis importante: terán acceso ao saneamento, que é o que tiñamos que garantir dende o Concello”.

Carrera subliña que para que isto sexa unha realidade vanse instalar 518 metros lineais de tubaxe de 315 mm de diámetro, se completarán 11 acometidas, remataremos 19 pozos de rexistro e 5 sumidoiros de pluviais, ademais de varios ‘cruzamentos’ de  abastecemento para vivendas que precisaban pasar á outra parte da estrada para acceder á rede municipal.

Manuel Carrera amosa a súa “ledicia” por cumprir cunha demanda de hai anos das veciñas e veciños e agradece á Deputación de Pontevedra que “atendese, de novo, as nosas solicitudes” arranxando unha estrada que ten treitos que non se tocaban dende hai máis de 10 anos.

As obras que comezaron hai dúas semanas e que contan cun orzamento total de 50.000 euros, estarán rematadas a principio do vindeiro mes de outubro.

15/09/2018 in Alcaldía, Vías e obras

O Goberno local remata os traballos de mellora e reforma da zona do Torreiro da Forna, na parroquia de Budiño

A Concellería de Vías e Obras que dirixe Manuel Carrera, vén de facer realidade o compromiso que o propio concelleiro adquirira coas veciñas e veciños de Budiño, e rematou os traballos de reforma do Torreiro da Forna.

As obras abrangueron o axeitamento do propio torreiro, a pavimentación da zona a colocación de beiravías de formigón, a mellora da zona de aparcamento de vehículos, a situación dun paso peonil, ademáis da recollida de augas pluviais do Centro Cultural e a colocación dunha nova tubaxe de saneamento.

Manuel Carrera subliña o feito de que os traballos fixéronse con cargo ao Plan Concellos da Deputación de Pontevedra 2017 e que os mesmos contaron cun orzamento total de máis de 45.000€, “cos que non so recuperamos un lugar que é o centro das festas de San Blas, senón que melloramos e enriquecemos unha parte da parroquia de Budiño especialmente querida polos seus habitantes”.

11/09/2018 in Alcaldía, Vías e obras

Os traballos de recuperación da antiga Escola Unitaria de Covelo, en Atios, a piques de rematar, logo da colocación das novas fiestras, portas e persianas

As obras de recuperación da antiga Escola Unitaria de Covelo, na parroquia de Atios, están chegando á súa finalización logo dun traballo levado a cabo polas concellerías de Vías e Obras, que dirixe Manuel Carrera, e de Emprego e Formación e Benestar, a fronte das cales está Soledad Girón.

Precisamente, a Concellería de Vías e Obras vén de rematar a colocación das fiestras, portas e persianas no inmoble, cun investimento total de 24.000€ con cargo ao ‘Plan Concellos’ da Deputación de Pontevedra.

Manuel Carrera sinala que as novas fiestras son de PVC, de cor branca no interior e alumiño no exterior, “gardando a estética xeral deste edificio que finalmente podemos dicir que vaise a recuperar para as veciñas e veciños de Atios”.

Novo tellado

O alcalde accidental lembra que “xusto hai un ano”, substituímos o tellado que, daquela, estaba nun estado de total deterioro, polo que era “moi urxente” mudalo dada que as filtracións poderían causar o derrubo do mesmo.

Carrera subliña que, coma neste caso, aquela obra fíxose con cargo a dúas achegas da Deputación de Pontevedra, que abranguía a colocación dunha nova cuberta metálica de 3.800 quilos de peso, con tella cerámica sobre unha superficie total de 390 metros cadrados, para o cal dispúxose dun orzamento total de 60.080,71€.

10/08/2018 in Vías e obras

Os traballos para levar o saneamento aos novos vestiarios e aos baños públicos do Campo do Atios estarán rematados este mes

A Concellería de Vías e Obras, que dirixe Manuel Carrera, está realizando dende hai unha semana os traballos para levar o saneamento aos novos vestiarios e aos baños públicos do Campo de fútbol de Atios.

Carrera apunta que as obras contan cun orzamento total de 30.000€ e abranguen o ancheamento da estrada, dende a popularmente coñecida coma ‘chegada do Carballo’ ata a Travesía de Novás, un treito de máis de 200 metros, “o cal mellorará a entrada e saída de vehículos dende o campo de fútbol”.

Os fondos para acometer estes traballos, como subliña o alcalde accidental, corresponden ao ‘Plan Concellos’ da Deputación de Pontevedra, e a previsión é que os mesmos estean rematados a finais deste mes de agosto.

09/08/2018 in Vías e obras

O Goberno local xa tomara medidas, hai días, para arranxar os dous puntos deteriorados da beirarrúa de 2 quilómetros de Pontellas que empezará a repararse pasadas as Festas de San Campio

O tenente de alcalde e concelleiro de Vías e Obras, logo da denuncia do PP local sobre o estado das beirarrúas feitas hai un ano na parroquia de Pontellas, sinala estaba xa ao tanto desta situación e que en canto tivo coñecemento da mesma “púxeme en contacto co que fora director desta obra, cos técnicos municipais e coa empresa que realizou os traballos para arranxar este problema”.

Manuel Carrera subliña que o ‘deterioro’ ao que se refire o PP local “está localizado en dous sitios concretos” dunha beirarrúa que mide máis de 2 quilómetros e que, dacordo coas primeiras análises do mesmo, trátase dunha circunstancia “atípica”, que vaise arranxar axiña.

Carrera reitera que xa hai días que falou coa empresa fixera a obra que “tomará as medidas precisas e levará a cabo as reparacións que sexan necesarias en canto rematen as Festas de San Campio”.

O concelleiro de Vías e Obras engade que “agradezo ao PP que estea pendente destas circunstancias, coma fan os veciños, e que vele pola seguridade e integridade das porriñesas e porriñeses porque iso si é facer política en positivo”.

14/07/2018 in Vías e obras

A Concellería de Vías e Obras acomete a mellora de camiños en Pontellas que completan os traballos de saneamento realizados nesta mesma parroquia en febreiro

A Concellería de Vías e Obras, que dirixe Manuel Carrera, vén de acometer, con cargo á subvención do ‘Plan Marco 2018’, da Consellería do Medio Rural da Xunta de Galicia, a mellora de camiños na parroquia de Pontellas, unha vella reivindicación dos veciños da mesma que, salienta Carrera, agora faise realidade.

Nos vindeiros días rematarase o asfaltado, cunha capa de calidade D12, de 5 centímetros de grosor, e sinalización das liñas horizontais da calzada, nos camiños de O Corzón, onde se completará unha superficie de 1.000 m2; A Rotea, con 1.680 m2, Abelenda e a contorna do Torreiro de San Pelaio.

Completan as obras de saneamento realizadas en febreiro

En total estes traballos contan cun orzamento de 63.367,70€, e veñen a completar os acometidos pola Concellería de Vías e Obras, en febreiro deste mesmo ano, que consistiron na colocación dun total de 190 metros lineais de tubaxes para o saneamento, 10 metros de colectores para recollida de pluviais e 6 pozos de saneamento, cun investimento de 15.000 €, todo, lembra o tenente de alcalde, “cuberto con fondos municipais”.

Manuel Carrera subliña que esta nova obra non podería realizarse sen a inestimable colaboración de varios veciños da zona que cederon, “de xeito desinteresado e para beneficio do ben común”, parte dos terreos que permitiron aumentar  o ancho destes camiños “mellorando deste xeito a seguridade para vehículos e peóns”.

02/07/2018 in Alcaldía, Vías e obras

@depo_es inicia as obras da glorieta do lugar da Costeira, na intersección de Cerquido-Budiño

A Deputación de Pontevedra vén de iniciar nesta semana as obras da nova glorieta de ordenación do tráfico no cruce  da intersección da estrada provincial EP-2405 Cerquido-Budiño con dúas vías municipais no lugar de A Costeira.

Segundo explicou o deputado de Mobilidade Uxío Benítez, xa están derrubadas a antiga marquesiña de autobús e os galpóns expropiados para ampliar a zona de actuación, e tamén se están a realizar estudos sobre as canalizacións existentes na zona co que o persoal técnico denomina unha ‘toupeira’. Estímase, segundo o nacionalista, que se non se producen complicacións a obra poderá estar rematada no mes de xullo.

O concelleiro de Vías e Obras Manuel Carrera, que estivo visitando os traballos, subliña que os mesmos comezan logo de ser “longamente demandados por veciñas e veciños desta zona” e lembra que xa pedirá ao anterior goberno da Deputación, “sen que nos fixeran caso”, que acometeran esta obra.

Carrera agradece aos actuáis responsábeis do organismo provincial que tomaran en conta a reivindicación do Porriño, e salientou que ista é unha actuación “moi necesaria” dada a perigrosidade deste lugar , con “moi pouca visibilidade” e dificultades para circular sen correr riscos.

Hai que lembrar que as obras en A Costeira estaban paralizadas debido a que no momento en que a empresa adxudicataria, Construcciones Vale SL, asinara o contrato e pressentara a acta de replantexamento había unha climatoloxía moi adversa debido á chuvia. Unha vez mellorou o tempo a actuación comezou tan pronto a empresa estivo dispoñible.

O orzamento global do proxecto ascendeu a 220.336,36€, sendo 21.534 para expropiacións e o resto á execución da obra. Finalmente a licitación pechouse por un prezo menor: 132.719,68€.

Os traballos consisten na instalación dunha nova glorieta para reordenar o tráfico, suavizar o trazado e mellorar as condicións de visibilidade e manobra dos vehículos. Foi necesario ocupar dúas parcelas privadas e unha municipal, e víronse afectadas dúas construcións, un alpendre-almacén e unha marquesiña de bus na parcela municipal, cuxa demolición e nova instalación se incluíu no orzamento do proxecto.

Urbanizarase a zona con novas beirarrúas para prestar continuidade ao tránsito peonil, habilitaranse pasos de peóns e a limitación específica de velocidade baixará de 50 a 30 quilómetros hora. Tamén se instalarán oito novas luminarias tipo led que garantirán a correcta visibilidade na intersección.

18/05/2018 in Alcaldía, Vías e obras

Rematadas as obras na cuberta do Pavillón Municipal, anunciadas polo concelleiro de Deportes, e que supuxeron na práctica a reforma de todo o teito do mesmo

Tal  e como adiantara o tenente de alcalde e concelleiro de Deportes, Manuel Carrera, as obras de mantemento que precisaba a cuberta do Pavillón Municipal quedaron rematadas a finais do mes pasado logo de que “fose posible acometelas unha vez que as condicións climatolóxicas o permitiron”.

Carrera subliña que estes traballos precisaban para a súa realización “varios días seguidos sen choiva”, como explicara xa a usuarios do pavillón, veciños e á Corporación en resposta a preguntas formulada no Pleno da mesma.

As obras, explica Manuel Carrera, realizáronse sobre as dúas ‘alas’ do pavillón, de 250 metros cadrados cada unha, e requiriron a retirada da anterior impermeabilización, a malla que había debaixo dela e picar unha cuberta de formigón de 20 centímetros de groso. Logo de rematada esta tarefa, procedeuse á substitución das tubaxes de fibrocemento por unhas novas de pvc, á cobertura da parte superior do inmoble cunha primeira capa de ‘polibreal’, a colocación doutra de ‘geotextil’, un material permeábel e flexible de fibras sintéticas, principalmente polipropileno e poliéster, unha segunda capa de ‘polibreal’ e, finalmente, pedregullo.

Así mesmo a nova cuberta conta cunha chapra illante que, ao mesmo tempo, protexe o teito  contra a acción dos paxaros, do sol e das correntes de aire.

Rematados os traballos, elimináronse, finalmente, as goteiras nos baños, a cafeterías, a oficinas adicadas ao balonmán, salas e a oficina do encargado xeral do pavillón.

16/05/2018 in Alcaldía, Deportes, Vías e obras