Emprego e formación arquivos - Páxina 22 de 26

Avanzan as obras na senda peonil e ciclista na PO-331 ata o CEIP de Atín, nos concellos do Porriño e Mos

O concelleiro de Vías e Obras, Manuel Carrera, xunto coa alcaldesa de Mos, Nidia Arévalo, e o delegado da Xunta en Vigo, Ignacio López-Chaves, desprazouse hoxe ata a PO-331, no lugar de Atín, para supervisar o avance das obras da senda peonil e ciclista que a Administración galega executa nesta estrada, concretamente entre os puntos quilométricos 1+890 e 2+810, ao seu paso polos concellos de Mos e O Porriño.

Durante a visita constataron que os traballos avanzan a bo ritmo e que as obras iniciadas o pasado 2 de setembro poderían estar finalizadas no vindeiro mes de novembro. Esta actuación conta cun orzamento de máis de 378.000 euros, e enmárcase no Plan de sendas de Galicia que na comarca de Vigo proxecta 11 treitos, que foron definidos en 9 proxectos de construción. A Axencia Galega de Infraestruturas executará 12,5 quilómetros de novas sendas nesta bisbarra, cun orzamento que se achega aos 5 millóns de euros, para o que conta co financiamento asegurado ao terse incluído no programa operativo de Galicia dos fondos europeos FEDER para o período 2014 -2020.

A senda na estrada PO-331 dará continuidade ao itinerario peonil existente no núcleo do Porriño ata o paso superior existente sobre a AP-9 nas proximidades de Atín.

A intervención iníciase na marxe esquerda da estrada, na que se construirá unha senda da 933 metros de lonxitude, desde as proximidades do Colexio Santo Tomás no que finalizan as actuais beirarrúas, ata a ponte sobre a AP-9, pasando pola intersección existente coa estrada a Pereiras–Tameiga.

Pola marxe dereita da PO-331, a obra terá unha lonxitude de 200 metros e comezará na intersección coa estrada municipal Pereiras- Tameiga, dado que ata este punto xa existe beirarrúa. A senda nesta marxe desviarase da estrada nos últimos 80 metros ata o acceso ao centro escolar de Atín. Neste último tramo terá un ancho de tres metros. Coa execución desta senda existirá un itinerario peonil continuo polas dúas marxes da vía que comunicará os dous centros de ensinanza co Porriño.

Tamén se proxecta a mellora da intersección entre a PO-331 e a estrada Pereira-Tameiga, na que se construirá unha semiglorieta para facilitar os xiros á esquerda neste punto.

02/10/2017 in Alcaldía, Benestar, Educación e tecnoloxía, Emprego e formación, Igualdade, Limpeza, Parques e xardíns, Tráfico, Turismo, Vías e obras

O Concello impulsa nos centros de Educación Infantil, Primaria e Secundaria do Porriño distintos programas a prol da igualdade e contra a Violencia de Xénero

A Concellería de Igualdade, que dirixe Soledad Girón, presentou este venres dous proxectos que se desenrolarán nos centros educativos do Porriño e que teñen coma obxectivo o de impulsar, “dende as ideades máis temperás” o concepto de igualdade.

O primeiro deles, destinado a cativas e cativas de 5 anos, que cursan Educación Infantil, quere “quitar as etiquetas” de xénero empregando para eles os xoguetes e as profesións de xeito que as pequenas e pequenos visualicen e perciban unha realidade que xa superada: que non hai xoguetes ou profesións que sexan diferenciadas para homes e para mulleres.

Unha segunda actividade estará destinada a alumnas e alumnos de 6º de Primaria e terá coma obxectivos a eliminación do ‘Bulling’, o acoso escolar, usando o que se coñece coma ‘Mapa de Empatía’ que pon o foco deste problema na persoas acosada e no seu acosador ou acosadora, de xeito que as rapazas e rapaces se poñan no pel delas.

Os mesmos estudantes traballarán, en equipo, cunha APP que lles permitirá fomentar a creatividade tendo coma referencia o xénero.

Polo que atangue a Educación Secundaria, a Concellería de Igualdade impulsa un programa para a Prevención da Violencia de Xénero en Adolescentes, no que os protagonistas son as rapazas e rapaces de 2º e 3º.

A súa finalidade es que sexan elas e eles mesmos os que o desenrolen e o xestionen como queiran para chegar ás conclusións e deducións propias debatendo sobre certos roles que teñen que ver con este problema.

A necesidade de poñer en marcha este proxecto veu dado polas conclusións dun estudo sobre a Violencia de Xénero nestas idades que aportaron datos tan preocupantes como que en España número de adolescentes con problemas relacionados coa violencia de xénero aumentou nun 50% no último ano; máis de 2.000 adolescentes contan con protección coma vítimas deste tipo de maltrato; un 12,2% de menores de 18 está sometido a medidas policiais neste ámbito.

Aínda que o 96% das chicas e o 92% dos chicos rexeiten a violencia de xénero, non recoñecen que haxa este tipo de violencia en actitudes ou comportamentos coma o control por parte da súa parella do seu teléfono móbil ou o seu xeito de vestir.

O 60% das rapazas que denuncian este comportamento non recoñecen que son elas as vítimas; as primeiras relacións sexuais consúmanse con 12-13 anos e nesa mesma idade moitas rapazas e rapaces xa tiveron contacto co alcohol e as drogas.

“O feito de que o 27,7% dos centros, o 39,9% das profesoras e profesores traballen nestes temas e que a metade dos adolescentes sinalen que lles falaron nos seus centros educativos de violencia de xénero, fai que os institutos sexan o lugar máis axeitado e convinte para impulsar este programa”, indica Soledad Girón.

23/09/2017 in Alcaldía, Benestar, Educación e tecnoloxía, Emprego e formación, Igualdade

#FestasdoCristo, este martes, Antonio Serrano e o mércores, Cándido Pazó e a actuación de Xoana e MQM Band

Este martes, día 19, dentro da programación das ‘Festas do Cristo 2017’, ás 10 da noite, na Carpa do Roxy, actuación de Antonio Serrano e o mércores, día 20, no mesmo lugar, sesión dobre: ás 8 da tarde Cándido Pazó e o seu espectáculo de humor e, ás 10, Concerto de Xoana e MQM Band.

Antonio Serrano é un virtuoso do seu instrumento, unha das maiores promesas do jazz español actual e un dos músicos de sesión máis solicitados do país. Dotado dunha asombrosa facilidade técnica e uns profundos coñecementos teóricos, Serrano mostra así mesmo unha enorme versatilidade musical que queda fielmente reflectida no seu amplo historial de colaboracións. O armonicista móvese con idéntica soltura en ámbitos musicais tan distantes entre si como o jazz, flamenco, pop e clásica.

Compartiu escenario con grandes artistas como Barbara Hendricks ou Placido Domingo, con orquestras sinfónicas de toda Europa, a Wynton Marsalis, Lou Bennet oToots Thielemans a Vicente Amigo, Clarles Benavent e o gran Paco de Lucía entre moitos outros.

Cándido Pazó (Vigo, 1960), é un actor, autor teatral, guionista de series televisivas e director de escena con numerosos espectáculos estreados e premiados, entre os que destacan: O Merlo Branco (Premio Xeración Nós de Teatro Infantil 1989) Commedia, un xoguete para Goldoni …

É autor da maior parte das súas historias -inda que tamén as recolle da tradición e da literatura- e ten querencia polo chamado conto tabernario ou de tertulia: enfiados de anécdotas, sucesos e personaxes dos que demostran que a realidade supera á ficción.

Aos seus 18 anos, Xoana está inmersa nun proxecto musical que ten coma principal aliada á lingua galega, promocionando o uso desta coa axuda de ritmos coma o pop, o rock, o jazz, o funky e mesmo o reggae. En proceso está Dardos, o disco co que pretende irromper no mundo da música e utilizar esta coma un medio de denuncia. Todas as cancións xiran arredor de temas actuais que precisan ser escoitados e que mellor que a música para invitar a realizar cambios!

19/09/2017 in Alcaldía, Benestar, Cultura e festas, Educación e tecnoloxía, Emprego e formación, Turismo

O escritor e xornalista porriñés Diego Giráldez lerá o pregón das Festas do Crsito o vindeiro sábado día 23

O vindeiro sábado, día 23, ás 12 e media do mediodía, na Praza de Antonio Palacios, o escritor Diego Giráldez, será o encargado de ler o pregón co que darán comezo as Festas do Cristo 2017.

Diego Giráldez (O Porriño, 1976), é licenciado en Historia da Arte, exerceu o xornalismo en distintos medios escritos e dixitais. Durante cinco anos, traballou na redacción do xornal ‘A Peneira’ dirixindo unha das súas cabeceiras comarcais e coordinando o seu suplemento cultural, ‘Kalaikia’ a nivel galego. Ao tempo, colaboraba como columnista de opinión cos xornais ‘A Nosa Terra’ e ‘Xornal de Galicia’ e, a través de reportaxes culturais, co El País. Na actualidade, escribe no diario Praza Pública -formando parte do seu consello de redacción- e na revista ‘Luzes’.

Ten varios libros publicados relacionados coa historia do Porriño, dirixiu a revista de recuperación histórica local ‘Malladoura’ e fundou e dirixiu o ‘CanZine’, a publicación oficial do Festival de Cans.

En 2016, a editorial Xerais publicou o seu primeiro traballo literario “Galería de saldos”.

En 2010, recibiu o Premio Literario “José Saramago” de relato curto. En 2011, no Porriño, concedéronlle o Premio Círculo “Cultura”. En 2015, fíxose co primeiro accésit do Certame Nacional de Narracións Breves “Modesto R. Figueiredo” e en 2016 gañou o premio literario “Manuel Murguía”, o máis importante certame de relato curto de Galicia. Nos premios “Fervenzas Literarias” de 2016, o seu libro “Galería de saldos” foi elixido polos lectores o segundo mellor traballo de narrativa galega e Diego Giráldez “mellor autor galego do ano”.

18/09/2017 in Alcaldía, Cultura e festas, Educación e tecnoloxía, Emprego e formación, Turismo

A Concellería de Emprego e Benestar impulsa a sinatura de 20 contratos por 1 ano e a tempo completo por persoas que cobren a RISGA

A Concellería de Emprego e Benestar, que dirixe Soledad Girón, impulsa a sinatura de 20 contratos laborais a outras tantas veciñas e veciños do Porriño que na actualidade están percibindo a Renda de Inserción Social de Galicia (RISGA).

A diferencia doutros anos, nesta ocasión a duración dos contratos aumenta ata 1 ano e serán a tempo completo. Ata o dagora os mesmos eran por un período de 7 meses e abranguían o 75% da xornada laboral.

Soledad Giron explica que para facer posible este incremento de duración, á cantidade que aporta o Goberno galego para a realización dos mesmos, 119.463,4€, o Concello do Porriño, por medio da Concellería de Emprego, engade 160.000€ máis que cobren, os 5 meses de duración dos traballos que quedaban ata completar o ano, e o 25% que restaba para que a contratación pasase do 75% a ser a xornada completa.

A concelleira salienta a importancia que ten a dobre ampliación da duración destes contratos dado que as persoas que traballen este ano a tempo completo adquirirán, ademais da experiencia laboral, uns dereitos, á finalización do contrato, que son moi distintos aos que outorgaban contratos de 7 meses ao 75% da xornada.

Soledad reitera, de novo, que “a creación de emprego segue a ser a principal prioridade do Goberno local” e que neste eido fará todos os esforzos e impulsará, coma ven facendo, todas as iniciativas que faciliten a creación de postos de traballo no Porriño.

Por último, indica que as persoas que asinen estes contratos empezarán a traballar xa en outubro.

17/09/2017 in Alcaldía, Educación e tecnoloxía, Emprego e formación, Igualdade

O Concello colaborará con especialistas do PAC do Porriño para que alumnas e alumnas da vila aprendan a reaccionar ante un paro cardíaco

O Concello colaborará coa celebración do ‘Día Europeo de Concienciación do Paro Cardíaco’, impulsada dende o Punto de Atención Continuada (PAC) do Porriño.

Este xoves a alcaldesa, Eva García de la Torre, e a concelleira de Educación, Lourdes Moure, mantiveron unha xuntanza coas organizadoras deste evento, programado para o vindeiro 16 de outubro, que pretende chegar ás alumnas e alumnos dos centros dos concellos as que presta servizo o PAC: Mos, Salceda e O Porriño.

Unha das impulsoras desta celebración, a doutora do PAC Montserrar Rodríguez Cabaleiro, explicou á alcaldesa e á concelleira de Educación que o acto farase en colaboración grupo musical “As Maimiñas” e consistirá nunha actividade lúdica para concienciar ás rapazas e rapaces da importancia de saber que “so coas túas mans podes salvar vidas”, ‘As túas mans salvan vidas’, e lograr que adquiran os coñecementos básicos de reanimación para poder axudar e reaccionar nun caso de morte súbita.

A doutora Rodríguez salientou a importancia deste aprendizaxe dende os primeiros anos e de levar a mesma aos colexios, “polos que pasa o cen por cen da poboación” e nos que é posible que aprendan a técnica dunha reanimación cardiopulmonar (RCP), cómo actuar diante dun paro cardíaco e a quen chamar para pedir axuda.

A actuación dentro dos primeiros 5 minutos despois dunha parada cardíaca é transcendental e pode marcar a diferencia entre manter a unha persoa con vida ou que morra.

15/09/2017 in Alcaldía, Benestar, Educación e tecnoloxía, Emprego e formación

A alcaldesa aiste no CEIP Fernández López ao primiero día de clase en Infantil e Primaria

A alcaldesa, Eva García de la Torre, xunto coa concelleira e Educación, Lourdes Moure, asistiu este luns no CEIP Fernández López ao inicio das clases en Infantil e Primaria. Acompañadas polo director do centro, Benito Rodríguez, estiveron nunha das clases de Primaria na que aproveitaron para falar coas cativas e cativos que afrontaban hoxe o seu primeiro día da ‘Volta ao colexio’.

A alcaldesa subliñou que nos centros educativos do Porriño cursan os seus estudos uns 520 alumnas e alumnos de Infantil e 1.200 de Primaria e indicou que o número de estudantes medrara neste curso en preto de 180 nos colexios da vila, “un dato que reafirma o feito de que O Porriño é o concello que máis medra de toda Galicia”.

Eva García de la Torre insistiu, unha vez máis, nas necesidades que teñen os centros educativos porriñeses en xeral e, en concreto a esixencia “urxente” de mellorar e ampliar as instalacións do CEIP Fernández López e esixiu, de novo, ao Goberno de Galicia, “que ten as competencias en Educación”, que atenda esta demanda.

A alcaldesa reiterou que “o Goberno local seguirá a facer todo o que estea na súa man” para que as profesoras e profesores dos colexios do Porriño teñan todos os recursos que precisen para que a formación que imparten “siga tendo este altísimo nivel”, e para que as rapazas e rapaces dispoñan de canto sexa preciso para a súa educación.

García de la Torre lembrou con emoción a María Ferreira, a novísima profesora do Colexio Santo Tomás, quen perdeu a vida nun accidente no Angliru, e trasladou a súa familia e aos seus amigos “todo o meu agarimo e o apoio, meu, de toda a Corporación e todas e cada unha das veciñas e dos veciños do Porriño”.

12/09/2017 in Alcaldía, Educación e tecnoloxía, Emprego e formación, Igualdade

Aberto o prazo de incrición para os Cursos de Accións Formativas para Persoas Desempregadas que pon en marcha o Concello do Porriño

Logo de 2 anos de ‘seca’, sen concesión algunha de accións formativas para o concello do Porriño, “aínda sabendo a importancia das mesmas para as persoas que están sen traballo”, finalmente a Concellería de Emprego e Formación, que dirixe Soledad Girón, ven de conquerir da Consellería de Economía, Emprego e Industria de Goberno de Galicia tres cursos AFD ( Accións Formativas para Persoas Desempregadas), cunha subvención de 96.174€.

Soledad Girón lembra que O Porriño é un concello de 20.000 habitantes cunha taxa de paro que foi baixando nos dous últimos anos do 26,3%-porcentaxe no que estaba cando o actual Goberno local tomara posesión- ao 18,2%-ao peche de agosto: máis dun 8% en total, grazas á posta en marcha de distintos programas formativos, impulsados e financiados polo propio Concello, e os acordos asinados con representantes do mundo empresarial, coma “Porriño Accede”, os plans de emprego co-financiados coa Deputación de Pontevedra e, “agora mesmo, pendentes da concesión do PIEM ( Plan Integral de Emprego para Mulleres), plan no que temos posto gran entusiasmo, investindo tempo e recursos, máis de 100.000€ se finalmente se nos concedese”.

Os cursos impartidos polo Concello do Porriño serán: Servizos de Restaurante (HOTRO608), de nivel 2; Operacións Básicas de Restaurante e Bar (HOTRO208), de nivel 1 e, finalmente, Operacións Básicas de Cociña (HOTRO108), tamén de nivel 1.

Dende a Concellería de Emprego e Formación lémbrase ás veciñas e veciños que xa está aberto o prazo de inscrición, que o lugar para cumprimentar a mesma é a Oficina de Emprego do Porriño e que o único curso que esixe un nivel de estudos mínimo –ESO ou similar- é o de Servizos de Restaurante, que é do nivel 2.

Por último, Soledad Girón subliña que impulsar medidas para reducir o desemprego “non é só labor do Goberno local do Porriño o é, especialmente, da Xunta de Galicia, que ten competencia para elo, e as dúas administracións temos o deber e a obriga de entendernos, á marxe de posturas políticas diferentes pois cando gobernamos facémolo para os cidadáns”.

05/09/2017 in Alcaldía, Benestar, Emprego e formación

A Concellería de Formación e Emprego programa varias actividades formativas, este mes de agosto, para personas en situación de desemprego

A Concellaría de Formación e Emprego do Concello do Porriño, que dirixe Soledad Girón, ven de programar distintas actividades formativas, para persoas en situación de desemprego, durante este mes de agosto.

As mesmas empezarán con ‘Iniciación á Informática’. A actividade terá unha duración de 30 horas, se iniciará o vindeiro luns, día 7 de agosto, rematá o día 14 e impartirase en horario de 9 da mañá a 2 da tarde.

A mesma está dirixida a todas as persoas que se queiran iniciar no manexo básico dun ordenador. Ao rematar o usuario/a será capaz, de crear e xestionar os arquivos no ordenador, crear un texto, navegar por Internet, enviar e recibir correos electrónicos.

‘Libre Office Calc-Iniciación’. Terá unha duración de 20 horas, empezará o xoves 17 de agosto e rematará o martes, día 22, impartíndose de 9 da mañá a 2 da tarde a persoas que teñan coñecementos básicos de ordenador.

O obxectivo é que ao final da aprendizaxe osarticipantes sexan quen de realizar operacións básicas e funcións sinxelas, saber dar formato as celas e configurar a páxina.

‘Libre Ofifice Base-Iniciación’, cunha duraciónde 30 horas, impartidas de 9 da mañá a 2 da tarde dende o xoves día 24 ao xoves, 31 de agosto, está dirixida persoas que teñan teñan coñecementos básicos de ordenador.

Ao rematar o usuario/a será capaz de crear e modificar táboas, consultas, formularios, informes e crear relacións entre datos.

Lembrar que estas actividades da Concellaría de Formación e Emprego están destinadas a persoas que se atopan actualmente nunha situación de desemprego.

Para poder participar é necesario inscribirse e pode facerse chamando ao seguinte teléfono 986 348944.

04/08/2017 in Alcaldía, Emprego e formación, Igualdade

A Confederación do Miño-Sil empeza a recuperación das beiras do Louro nunha actuación que completará o Concello con varias actuacións nas vindeiras semanas

O alcalde accidental do Porriño, Manuel Carrera, xunto coa concelleira Soledad Girón e o concelleiro Orlando Márquez, acompañaron este xoves ao presidente da Confederación Hidrográfica do Miño-Sil, Francisco Marín, e a subdelegada do Goberno en Pontevedra, Ana María Ortiz, na visita que fixeron ás obras iniciadas pola Confederación, na beira do río Louro ao seu paso pola vila.

O proxecto, que ten un orzamento total de de 62.000€, abrangue varias actuacións en diferentes treitos que suman, en conxunto, máis dun quilómetro de lonxitude e que reforzarán as beiras máis afectadas pola subida das augas nas épocas de choiva.

Para as mesmas empregaranse troncos, estacas verticais, de piñeiro, e a parte superior estará recuberta de terra vexetal que facilitara a reforestación da mesma con especie propias da zona. Así mesmo, haberá unha actuación na senda, que ten partes moi danadas e que, coma lembrou o alcalde accidental, é moi empregada no so polos porriñeses, senón polos peregrinos, dado que a mesma é parte do Camiño Portugués a Santiago.

A actuación da da Confederación Hidrográfica do Miño-Sil estará completada por outras cinco que porá en marcha o Concello do Porriño nas vindeiras semanas para a mellora de camiños, e que contarán cun orzamento duns 45.000€.