Educación e tecnoloxía

Coma sinalara a alcaldesa hai uns días, e dacordo co compromiso que adquirirá o pasado día 7 coa Asociación de Nais e Pais (ANPA) do CEIP Plurilingüe de Atios, o Concello do Porriño iniciou xa as obras de mellora do tellado do centro que, subliña Eva García de la Torre, “asume na súa totalidade o Concello, por medio da Concellería de Educación, maila que a competencia de realización das mesmas é da Xunta de Galicia, como establece o regulamento”.

No mesmo centro, e como a alcaldesa asegurara ás Nais e Pais e ao director do CEIP de Atios,  o Goberno local fixo unha avaliación do estado no que se atopan os baños e, así mesmo, realizará os traballos de substitución dos mesmos.

En total, subliña Eva García de la Torre, o Concello do Porriño investirá máis de 15.000€ nestas obras que, insiste, son competencia da Consellería de Educación da Xunta de Galicia, o mesmo que os danos estruturais nas fachadas que causan filtracións de auga provocando curtocircuítos no sistema eléctrico.

A alcaldesa repite que “o Goberno local fará todo canto sexa preciso para que  as nenas e nenos que estudan nos centros educativos do Porriño acudan a clase coa máxima seguridade e que estuden en colexios en perfectas condicións, algo que, polo que se ve, non preocupa moito á Xunta”.

Tal e coma se comprometerá coa Asociación de Nais e Pais (ANPA) do CEIP Plurilingüe de Atios, nunha xuntanza mantida o pasado día 7, a alcaldesa do Porriño informa do inicio das obras de mellora da cuberta do centro, “traballos que asume na súa totalidade o Concello, por medio da Concellería de Educación”.

No mesmo centro, e como adiantara García de la Torre ás Nais e Pais e ao director do mesmo, o Concello fará unha avaliación do estado no que se atopan os baños e, en vista do mesmo, decidirá sobre a actuación nos mesmos.

Eva García de la Torre vén denunciando, “insistentemente”, o estado de “abandono” no que a Xunta de Galicia ten os colexios públicos do Porriño, nalgúns casos, como o do CEIP de Atios, con “danos estruturais nas fachadas que causan filtracións de auga provocando curtocircuítos no sistema eléctrico”, sen que o Goberno galego “asuma as súas obrigas, aínda que teña a  competencia exclusiva nesta materia”.

A alcaldesa subliña que “o Goberno local velará pola seguridade das nenas e nenos que estudan nos centros da nosa vila e a calidade da educación que reciben, que ademais de na capacitación dos seus profesores e nas materias que imparten, tamén está en que dispoñan de colexios en perfectas condicións, algo que, polo que se ve, non preocupa á Xunta”.

García de la Torre comunicou, polo miúdo,  aos responsábeis de Educación da Xunta esta situación, a última ocasión o pasado día 8, ao xefe territorial da Consellería de Educación na provincia de Pontevedra, co gallo da inauguración do novo salón de actos do CEIP da Ribeira, en Torneiros, proxecto no que colaborou o Concello do Porriño, o mesmo que no mantemento, ata o día de hoxe, do comedor deste centro.

A Gardería da Galiña Azul en Torneiros nun “estado inaceptábel e intolerábel”

Na mesma parroquia de Torneiros, lembra a alcaldesa, , moi preto do CEIP da Ribeira, está a Gardería da Galiña Azul que, enfatiza Eva García de la Torre está nun estado “inaceptábel e intolerábel” con “gravísimas deficiencias” que é “moi urxente” arranxar para “garantir a seguridade das cativas e cativos”, circunstancia coñecida pola Xunta que lonxe de acometer obra algunha, priva a O Porriño, “o concello que máis medra en poboación de Galicia” das  prazas de garderías que precisa abrindo  novos centros en Mos, “a onde teñen que desprazarse os pequenos da nosa vila”.

A alcaldesa lembroulle este venres ao representante da Consellería de Educación da Xunta de Galicia a necesidade de que o goberno galego se faga cargo do arranxo das fendas dos centros de ensino públicos do Porriño e subliñou que trátase dunha competencia, exclusiva, da administración autonómica.

Durante o acto de inauguración da novo salón de actos do CEIP da Ribeira a alcaldesa, logo de agradecer á Xunta a súa contribución á construción do mesmo-en colaboración da Concellería de Educación, quen encargouse do escenario- e que aprobase facerse cargo do comedor, que ata hoxe mantén o Concello, pediulle ao César Pérez Ares, xefe territorial da Consellería de Educación na provincia de Pontevedra, que  o Goberno de Galicia prestase moita máis atención aos centros do Porriño que teñen “problemas moi serios”.

CEIP Pliriligüe de Atios

Eva García de la Torre, quen este xoves xa mantivera unha xuntanza coa dirección e a Asociación de Nais e Pais (ANPA) do CEIP Plurilingüe de Atios para coñecer e atender as súas reclamacións sobre o estado do colexio, denunciou, de novo, que no mesmo hai “danos estruturais nas fachadas que causan filtracións de auga provocando curtocircuítos no sistema eléctrico”, e marcou que  “hai so uns días a uns alumnos caeulles moi preto parte do mosaico da parede sen causarlles, por sorte, dano algún”. Esta situación, engadiu, “amosa a prema que hai para realizar unhas reparacións que son xa inaprazábeis”.

Gardería A Galiña Azul de Torneiros

A alcaldesa cualificou de “inaceptábel e intolerable” o estado no que se atopa, moi preto do CEIP da Ribeira, a Gardería da Galiña Azul da parroquia de Torneiros que ten “gravísimas deficiencias” que é “moi urxente” arranxar para “garantir a seguridade das cativas e cativos”.

Para a alcaldesa esta moi ben que os responsábeis da Xunta veñan a O Porriño “congratularse e facerse a foto” cando, como este venres, se inaugura un salón de actos, pero o que non deben de esquecer é que “teñen a obriga de poñer en condicións os nosos colexios para que as nenas e nenos do Porriño, veciños dun dos concellos que máis medran en Galicia, teñan una educación axeitada”.

Sen prazas de gardería no concello que máis medra de Galicia

Eva García de la Torre criticou o feito de que dende o Goberno da Galicia se repita que aposta pola educación pública e de calidade e “no Porriño resulta que carecemos de prazas, péchanse aulas e as garderías que precisamos vanse a Mos, a onde teñen que desprazarse os pequenos da nosa vila”.

Neste eido, a concelleira de Educación, Lourdes Moure, resaltou que, “como se pode comprobar, porque os datos son públicos, á gardería do Polígono da Veigadaña, acoden nenas e nenos do Porriño porque aquí non hai prazas”,algo que non se pode entender fora do interese político, considerando que O Porriño é, dende o ano 2015, o concello galego que máis aumenta en poboación.

O punto SmartPeme do Porriño  impartirá distintos talleres a semana que ven, na súa sede no Multicentro de Torneiros, aos que as persoas que queiran poden anotarse chamando ao teléfono 886 20 20 20 ou entrando no portal web SmartPeme  – www.smartpeme.depo.es

O luns, día 23, ás 7 da tarde tratarase ‘Smartdata, o CRM coma aliado para conquistar ao cliente”. O taller ten coma obxectivo explicar qué é un CRM, porqué é unha ferramenta útil para as empresas e coma aprender a facer un ‘plan de acción’ que leve a nosa estratexia de negocio ata os consumidores.

O mércores, día 25, á mesma hora, ‘Habilidades ofimáticas: uso de fórmulas en follas de cálculo”.

As follas de cálculo son un dos programas máis empregados polas empresas pola súa  versatilidade e posibilidades. Neste taller, pensado para usuarios con coñecementos en follas de cálculo, falarase do uso de función adiantadas e das posibilidades de combinación de varias delas.

Nenos e nenas do Porriño, integrantes do Consello Municipal de Infancia, participaron nun novo Pleno Infantil que tivo lugar esta mesma semana no Concello.

A orde do día incluía a aprobación dun borrador de regulamento para este  Consello Municipal de Infancia, e o debate e aprobación de propostas relativas a Infraestruturas e Medio ambiente.

A alcaldesa, Eva García de la Torre, tivo a oportunidade de presidir un pleno moi animado, no que a concelleira de Educación, Lourdes Moure, actuou como secretaria, durante o cal cada un das voceiras e voceiros dos centros expuxo o resultado do traballo feito nos “obradoiros de participación”, convocados durante as últimas semanas nas súas aulas.

Entre as decisións adoptadas cabe subliñar a aprobación por unanimidade da realización dun “Pinchorriño infantil” con produtos saudables que terá lugar no vindeiro mes de setembro, coincidindo coas festas locais.

O Pleno Infantil, que foi retransmitida en directo pola web municipal, oporrino.org, contribúe a consolidar o Consello Municipal de Infancia, como un órgano de participación infantil e adolescente, de carácter consultivo e informativo, que representa ao conxunto das rapazas e rapaces do Porriño.

Esta iniciativa forma parte da candidatura do Porriño para o seu recoñecemento coma por parte de UNICEF coma Cidade Amiga da Infancia e, coma salientou a alcaldesa, “contribúe a facer un concello mais transparente, próximo e sobre todo, coñecedor das opinións, intereses e necesidades dos veciños e veciñas mais novos”.

A alcaldesa, Eva García de la Torre,  e a concelleira de Educación, Lourdes Moure, reuníronse este xoves cos voceiros e voceiras de cada un dos centros de ensino, para preparar un novo pleno infantil.

O Concello do Porriño continúa así co proceso iniciado o pasado ano, no que nenos, nenas e adolescentes dos distintos centros públicos da vila, teñen oportunidade de expresar a súa opinión sobre aqueles aspectos que mais lle preocupan, así como tamén facer as propostas de solucións que consideren.

Trátase dun paso mais na consolidación dun órgano estable de participación infantil a nivel municipal, que colabore no deseño das políticas locais que lle afecten mais directamente.

Os nenos, nenas e adolescentes do Porriño terán oportunidade de traballar os contidos do próximo pleno infantil en obradoiros de participación que se realizarán nas aulas de cada un dos centros, co apoio de persoal especializado, para mais tarde achegar as súas propostas a un pleno que terá lugar o próximo mes de abril.

No orde do día da xuntanza deste xoves coa alcaldesa, estaba, entre outros asuntos, a presentación dun borrador de regulamento do futuro Consello Municipal de Infancia e Adolescencia, así como respostas e explicacións as preguntas feitas no anterior pleno infantil.

Esta iniciativa enmarcase na candidatura do Concello do Porriño ao recoñecemento como Cidade Amiga da Infancia, promovido por UNICEF, en colaboración coa Federación Española de Municipios e Provincias (FEMP), e que trata de poñer en marcha políticas locais de infancia que  melloren o benestar impulsando actuacións que garantan o desenvolvemento integral de nenos, nenas e adolescentes, e dos seus dereitos.

Este programa aséntase na promoción da participación infantil e adolescente, e o impulso de alianzas entre todos os actores relacionados coa infancia a nivel municipal para avanzar no camiño da mellora no cumprimento dos dereitos de nenos, nenas e adolescentes no ámbito local, focalizando accións de inclusión e cohesión social no ámbito local,  atendendo aos grupos máis vulnerables. É dicir, realizar un esforzo para protexer aos nenos e nenas que corren maior risco de “quedar atrás”.

O Punto SmartPeme do Porriño organiza o taller “Promociona a túa empresa con Pinterest” que será o mércores, día 21, ás 7 da tarde no sede de SmartPeme no Multicentro do Concello do Porriño, en Torneiros.

No taller coñecerase polo miúdo Pinterest, unha rede social na que a imaxe é todo. Baseada en taboleiros nos que compartir e gardar  fotografías. Os asistentes aprenderán a sacarlle o partido e cómo implementala na estratexia social media das empresas.

Os contidos serán: Introdución, Como crear unha conta en Pinterest, Primeiros pasos, Taboleiros,  ¿Que é como se engade un pin? ou Pinterest para negocios.

A asistencia pode facerse por teléfono, no 886 20 20 20 ou tamén mediante alta no portal web SmartPeme  – www.smartpeme.depo.es.

O Concello do Porriño, a través súa  Oficina Municipal de Información Xuvenil (OMIX), e coa colaboración dos, IES Pino Manso e  IES Ribeira do Louro,  vai levar a cabo uns ciclos de charlas, obradoiros e  cursos formativos  dentro  da terceira edición  do Programa de Actividades de  Educación en Valores “XUVENTUDE EN VALORES 2018” (educación non formal)  dirixido  ao redor de  1.100  alumnos  da  E.S.O  e Ciclos de FP.  

A temporalización establecida para o desenvolvemento deste programa será entre os meses de febreiro e xuño de 2018 cun total de 73 obradoiros  sobre os seguintes temas:

Non sexas bocachancla. Comportamento nas Redes Sociais; O meu corpo é meu.Sexualidade responsable; Prevención, drogadiccións e outras adiccións; Dinámica da risa. Accións positivas; Hábitos saudables de alimentación; Hábitos saudables.Botellón; Educación emocional; Igualdade e diversidade; Prevención de condutas aditivas nas TIC-IS e Sensibilización e prevención de condutas sexuais de risco.

No desenvolvemento deste programa, prevalecen as dinámicas que xeran aprendizaxe dunha forma máis didáctica e divertida, para  xerar reflexión e debate de forma participativa co alumnado.