Alcaldía

O Concello acollerá o acto de entrega do III Premio Roberto Vidal Bolaño

A Alcaldesa Eva García de la Torre presidirá este mércores 23 de setembro o acto de entrega do premio literario “Roberto Vidal Bolaño” 2020 que terá lugar a mediodía no salón de plenos do Concello do Porriño.

A identidade do autor que resultou gañador desta terceira edición será desvelada durante unha comparecencia previa na que participarán Francisco Castro, director xeral de Editorial Galaxia, Raquel Castro, profesora do IES Ribeira do Louro e Lourdes Moure, concelleira de Educación do Concello do Porriño que son as tres entidades que convocan este galardón.

O premio Roberto Vidal Bolaño pretende fomentar a escrita de textos teatrais en galego, dirixidos ao alumnado de Ensino Secundario e Bacharelato e que poidan ser representados por eles.

O premio consta de 2.000 €, suxeitos ás retencións fiscais correspondentes e que computarán como dereitos de autor. Ademais o escritor galardoado recibirá un diploma acreditativo e a súa obra será publicada por Editorial Galaxia. 

22/09/2020 in Alcaldía, Educación e tecnoloxía

A Policía Local colaborou coa Garda Civil na detención do presunto responsable dunha plantación de marihuana nun espazo da Rede Natura

A Policía Local do Porriño colaborou coa Garda Civil na detención do presunto responsable da plantación de marihuana localizada hai un par de semanas nun espazo da Rede Natura 2000, dentro do termo municipal porriñés.

O detido é un veciño da bisbarra, de 57 anos, que quedou en liberdade con cargos á espera de xuízo.

A investigación conxunta de Garda Civil e Policía Local porriñesa conclúe que o arrestado plantou medio milleiro de plantas de marihuana nun chan público e instalou cámaras provistas de sensores de movemento para controlar o perímetro.  

22/09/2020 in Alcaldía

Presentado o primeiro equipo do Balonmán Porriño

O Balonmán Porriño presentou hoxe o seu equipo que xogará unha tempada máis na “Liga Guerreras Iberdrola” da División de Honra feminina. O vindeiro sábado 19 realizará a súa estrea ante a afición local recibindo no Pavillón Municipal ao BM. Morvedre.

O acto celebrouse no patio do Centro Cultural Municipal. Polos protocolos anti-covid tan só presentouse o primeiro equipo que este ano denominase “Conservas Orbe Rubensa BM Porriño”. Abel Estévez, presidente do club, agradeceu de xeito especial que o xogador do Celta de Vigo, Rubén Blanco incrementase o seu apoio económico, razón pola que  a firma “Rubensa” incorporase ao nome oficial do equipo xunto con Conservas Orbe que comezou a pasada campaña.

Estévez referiuse ao Concello do Porriño “ao que adicamos este acto para agradecerlle o seu apoio xa que é o noso principal soporte económico” e definiu os meses anteriores como “moi difíciles ata que soubemos que o equipo non descendería porque non puidemos pelexar pola permanencia nas canchas a causa do parón da Liga que impuxo a pandemia”.

O presidente vaticinou que “este ano, se as lesións nos respectan, temos plantel para facer unha boa tempada”.

A continuación, David Alonso, concelleiro de Deportes do Porriño dixo “celebrar a unión de vontades das diferentes administracións e o club para garantir deporte seguro”. Alonso felicitou a Abel Estévez e a xunta directiva do club “polo cumprimento dos protocolos anti-covid que observo cada día nos adestramentos no Pavillón e polo traballo que estades a realizar”.

Pola súa banda, Bruno López, presidente da Federación Galega de Balonmán, dirixíndose ás xogadoras, díxolles que “sodes o punto de mira de 10.000 deportistas, xogadores e xogadoras de balonmán que aínda non poden volver á normalidade polo que o voso comportamento e responsabilidade, amosará que o balonmán é un deporte seguro”.

O presidente da FGB garantiu que os protocolos anti-covid que se acordaron coa Secretaria Xeral do Deporte que permiten aforo reducido nos pavillóns, “van funcionar”.    

Daniel Benavides, xefe territorial de Deportes da Xunta de Galicia ponderou “a importancia de que levedes o nome de O Porriño, o concello do deporte, e que estades mantendo e dando continuidade ao compromiso de moita xente que vos apoia como a Secretaria Xeral para O Deporte”.

Por último, pechou os discursos a alcaldesa Eva García que abundou na referencia á hostalaría local que “realiza un esforzo moi especial”. “Ten moito valor o apoio económico que dan os hostaleiros do Porriño a este club nun intre tan durísimo a pesar de ser un dos sectores máis castigados”.

17/09/2020 in Alcaldía, Deportes

Eva García insta por carta a 15 alcaldes e alcaldesas de concellos afectados pola crise de “Maderas Iglesias” a formar unha fronte común

Hoxe saíron as quince cartas que Eva García de la Torre dirixe aos seus homólogos nas alcaldías dos concellos tamén afectados, coma O Porriño, pola crise da empresa “Maderas Iglesias”, localizada no polígono industrial das Gándaras.
A rexedora porriñesa insta a formar “unha fronte común que acade protexer o futuro económico dos traballadores cos mecanismos que conta a Xunta de Galicia, a través da Consellería de Economía e Industria”.
Eva García expresa na súa misiva “considero que un grupo institucional de alcaldes e alcaldesas teremos a fortaleza para chegar ao máis alto da administración autonómica”.
As cartas dirixíronse aos alcaldes e alcaldesas de Salvaterra, Ponteareas, Mos, Vigo, Salceda de Caselas, Tui, As Neves, Redondela, Tomiño, Mondariz, Fornelos de Montes, A Guarda, Moaña, O Rosal e Soutomaior. Xunto co Porriño, todos eles contan con traballadores afectados que son veciños dos seus respectivos concellos.
Actualmente “Maderas Iglesias” ten 148 traballadores en nómina. Hai nove anos, chegou a superar os 800 pero o estoupido da burbulla inmobiliaria afectoulle reducindo a fabricación de tarima flotante. Leva unha década en perdas e cunha imparable redución de traballadores con nove EREs consecutivos.


Na reunión que mantiveron o pasado luns 14, os representantes dos traballadores coa alcaldesa, expuxeron a súa inquedanza polo inminente anuncio da poxa do inmoble da fábrica como consecuencia dunha resolución do Xulgado nº 3 do Porriño, segundo sentenza do pasado mes de agosto. O inmoble está valorado en 28 millóns de euros por unha peritaxe xudicial pero os traballadores temen que sexa vendido por unha cantidade moi inferior e con miras ao negocio inmobiliario.

17/09/2020 in Alcaldía

Inclúese unha comunidade de augas máis no reparto de subvencións do Concello

Finalmente son dez as comunidades de augas de consumo que acadaron subvencións do Concello do Porriño para realizar control sanitario, mantemento de instalacións e reparacións na rede de distribución durante este ano 2020.

Sumouse a comunidade de Chan-Casal-Orbenlle ás nove comunidades de augas beneficiadas das que informamos a finais de xullo e que son: Cerquido; Rozadas-Eirís; Atios; Torneiros; San Jorge-Mosende; Chenlo; Carracido; Budiño-Cruz e Cans.

A comunidade de Chan-Casal-Orbenlle quedou fora por un erro burocrático e atendeuse a reclamación que formulou. Concédenselle 7.813 € de subvención para financiar o 80% do proxecto presentado.

Deste xeito, finalmente, suman un total 59.976 euros as achegas municipais que se repartirán entre as dez comunidades solicitantes, conforme resolución final e definitiva da comisión de avaliación que presidiu o concelleiro de Infraestruturas, Pedro Pereira asistido por tres técnicos municipais.

As achegas maiores corresponden a Cerquido, San Jorge-Mosende, Chenlo e Cans que recibirán o importe máximo que estaba limitado nas bases da convocatoria a 8.000 euros. 

As restantes recibirán: Chan-Casal-Orbenlle, 7.813 €; Atios, 7.647; Rozadas-Eiris, 5.914 €; Torneiros, 2.800 €; Carracido, 2.542 €; e Budiño-Cruz, 1.258 €.

16/09/2020 in Alcaldía, Urbanismo, comercio e industria, Vías e obras

O Concello manifesta o seu orgullo de que unha empresa local sexa a primeira de España en producir unha vacina contra a “covid-19”

O Concello do Porriño manifesta “o seu orgullo de que unha empresa asentada neste termo municipal” sexa a primeira de España en producir unha vacina contra a Covid-19. Trátase de “Biofabri”, filial do grupo “Zendal” que foi elixida pola compañía norteamericana “Novavax” para realizar a produción da vacina para a Unión Europea, segundo o acordo anunciado.

“Para Porriño constitúe un motivo de ledicia e satisfacción que unha fábrica asentada en Torneiros reciba esta encarga o que acredita o alto grao de especialización e recoñecemento a nivel mundial que ten a nosa industria”, valorou Eva García, alcaldesa de O Porriño.

Hai que lembrar que no pasado mes de xullo, o ministro de Ciencia, Pedro Duque visitou as instalacións de “Biofabri” en Torneiros, despois da concesión de preto dun millón de euros en subvencións do Goberno de España para continuar esta investigación en vacinas.

A alcaldesa subliñou que a actual fábrica de “Biofabri” e o grupo empresarial “Zendal” ao que pertence “ten as súas raíces nos proxectos de familias como os Fernández López que crearon o grupo Zeltia hai máis de 80 anos”.

Eva García ofreceu a “Biofabri” “toda a colaboración que sexa posible dende o Concello do Porriño”.

16/09/2020 in Alcaldía, Educación e tecnoloxía

Eva García ofrece a súa mediación aos traballadores de “Maderas Iglesias” e instará unha reunión conxunta de alcaldes co conselleiro de Industria

A plantilla da firma porriñesa “Maderas Iglesias” solicitou hoxe a Eva García de la Torre que inste unha reunión conxunta de alcaldes dos concellos afectados por la crise desta firma co conselleiro de Industria e vicepresidente económico da Xunta, Francisco Conde.

Actualmente “Maderas Iglesias” conta con 148 traballadores, veciños de concellos da zona. Os que máis teñen son de Porriño, Salvaterra, Mos, Ponteareas, Salceda e Vigo.

Eva García, acompañada de Lourdes Moure, concelleira de Facenda, comprometeuse a trasladar a invitación ás alcaldesas e alcaldes destes concellos para que se sumen á petición de entrevista co conselleiro de Industria.  

Os representantes dos traballadores trasladaron á alcaldesa a súa inquedanza polo inminente anuncio da poxa do inmoble da fábrica como consecuencia dunha resolución do Xulgado nº 3 do Porriño, segundo sentenza do pasado mes de agosto. O inmoble está valorado en 28 millóns de euros por unha peritación xudicial pero os traballadores temen que se sexa vendido por unha cantidade moi inferior e con miras ao negocio inmobiliario.

“Maderas Iglesias” foi un dos fabricantes de tarima flotante máis importantes do sector pero desde que estallou a burbulla inmobiliaria leva unha década en perdas e cunha imparable redución de plantilla con nove EREs consecutivos.

14/09/2020 in Alcaldía, Emprego e formación

Fomento amosa disposición favorable a ceder ao Concello o tramo da N-120 entre Cans e O Confurco


O Concello do Porriño trasladou hoxe ao Goberno Central a petición de que o tramo da estrada Nacional 120, entre Cans e a rotonda do Confurco sexa cedido á administración municipal.

A alcaldesa Eva García e o concelleiro de Infraestruturas, Pedro Pereira expuxeron a petición a Maica Larriba, subdelegada do Goberno Central e a Pablo Alonso, representante da Demarcación de Estradas do Estado dependente do Ministerio de Fomento.


Os interlocutores da administración central amosaron “unha disposición favorable á cesión, aínda que condicionada a sexa respaldada por un acordo plenario da corporación municipal porriñesa”, explicou despois da reunión a alcaldesa. “Pola nosa banda tamén condicionamos a cesión a que sexa dotada dunha partida orzamentaria por parte do Ministerio de Fomento para acometer a urbanización dese tramo”, engadiu Eva García.

No encontro celebrado hoxe na Subdelegación do Goberno en Pontevedra, abordáronse outros asuntos entre os que cabe subliñar a petición do Concello do Porriño para que Fomento arranxe a xunta de dilatación dun viaduto na Risca que sobrevoa por riba da Autovía A-55 e que constitúe un perigo para os vehículos que transitan por esa ponte.


Por último, a delegación porriñesa reiterou unha proposta para que o Ministerio de Fomento e “Audasa” contemplen un acceso á autoestrada AP-9 en Torneiros que xa fixera o Concello do Porriño hai anos.

11/09/2020 in Alcaldía, Tráfico, Urbanismo, comercio e industria, Vías e obras

Presentada a XXIII edición de “Merca na rúa”

Sergio Casal, conselleiro de Comercio e Juana Pérez, presidenta da asociación de comerciantes “Acipor” presentaron a XXIII edición da feira de oportunidades “Merca na rúa” que terá o vindeiro fin de semana.
26 stands (seis deles dobres) reunirán na rúa peonil, a diversa oferta de productos que propón esta nova edición de “Merca na rúa” que “será diferente coa ocasión dos protocolos anti-Covid que debemos observar”, manifestou a presidenta da asociación organizadora.
“Este ano os postos de venda esarçan máis distanciados entre sí para observar os protocolos de seguridade e garantir a de todos os que desexen asistir”, manifestou o concelleiro Casal.

10/09/2020 in Alcaldía, Cultura e festas, Urbanismo, comercio e industria

Alcaldesa e concelleira de Educación comprobaron os protocolos no primeiro día de volta ás clases

A alcaldesa do Porriño, Eva García de la Torre, acompañada da concelleira de Educación, Lourdes Moure acudiron esta mañá ao CEIP “Antonio Palacios” para comprobar in situ o desenvolvemento dos protocolos anti-covid no primeiro día de volta ás clases.

Andrés Vieitez, director do colexio e outros membros do claustro de profesores explicaron á comitiva municipal como fixeron o reparto e distribución de espazos seguros para as diversas actividades docentes, tempos de lecer e servizos de Plan Madruga e comedor escolar. O CEIP Antonio Palacios ten preto de 400 alumnos. Xunto co CEIP “Fernández López”, tamén con 400 alumnos, son os dous colexios con máis matrículas do Porriño.  

“A normalidade, pese as restriccións esixidas, foi a boa nova deste primeiro día de actividade docente no Porriño”, sinalou Lourdes Moure que agarda que “mañá sexa igual de tranquilo” coa incorporación ás aulas dos alumnos de outros cursos de Infantil e Primaria, ata completar a cifra estimada de 1.500 escolares nese nivel na nosa vila.

A vindeira semana, será a quenda dos estudantes de ESO, FP e Bacharelato que, aproxidamente son outros 1.500 máis.

Tanto no CEIP “Antonio Palacios” coma nos restantes centros docentes de Educación Infantil, Primaria e Especial do Porriño, realizouse hoxe polos axentes da Policía Local e continuará nestes primeiros días do curso, un control para verificar que o acceso ás instalacións sexa conforme aos protocolos establecidos e se faga coas debidas garantías de seguridade e de xeito ordenado. Tamén se efectuará a mesma vixilancia na saída dos escolares.

10/09/2020 in Alcaldía, Educación e tecnoloxía