Alcaldía

Porriño decide facer o vindeiro pleno en liña

A corporación local do Porriño celebrará o vindeiro luns 19, unha sesión plenaria telemática, segundo decidiu a Alcaldía despois de consultar cos voceiros de todos os grupos municipais.
Durante o estado de alarma, a corporación porriñesa xa fixera o pleno do 27 de maio de xeito telemática.

Agora a decisión fundamentase na interpretación que fai o Concello da recente normativa anti-Covid promulgada pola Xunta de Galicia que limita as reunións a 10 persoas.

O pleno, de carácter extraordinario, consta de tres asuntos. Ademais da aprobación da acta da sesión anterior, lévanse para aprobación definitiva a Conta Xeral do exercicio 2019 e o suplemento de crédito 2/2020.
A sesión comezará ás 17 horas e será retransmitida en “streaming”, dende a páxina web do Concello, na mediateca de plenos.

Adxuntamos a orde do día da sesión.

Pleno 19 de outubro

 

 

16/10/2020 in Alcaldía

Entrou en vigor a modificación da ORA (“zona azul”) na contorna do Mercado


O Concello e a Policía Local do Porriño informan de que entrou en vigor a modificación da ordenanza reguladora de aparcamentos (ORA), segundo o acordo acadado polo pleno da corporación municipal do Porriño o pasado 30 de xuño e unha vez cumprimentados os prazos legais de alegacións e publicidade.

As dúas principais novidades desta modificación son a contía das sancións e o límite de tempo de estacionamento.

A principal causa pola que se acometera esta modificación da ordenanza foi a limitación do tempo de aparcamento. Deste xeito aténdese unha reclamación da veciñanza pola escaseza de aparcamento na zona da Praza de Abastos e a gran demanda de prazas de estacionamento que se require para a atender o comercio.
A Concellería de Seguridade atendeu esta petición en aras de dinamizar ao Mercado e o comercio local e dar unha solución ao problema de circulación. Promulgou a modificación da ordenanza que regula o estacionamento, contando co informe da Policía Local, entendendo que na zona do entorno da praza de abastos, debese axilizar a circulación rodada. Por estas razóns, limítase o estacionamento dos vehículos a 45 minutos ( e non de hora e media como antes) considerando ese tempo como dabondo para realizar as compras no mercado e no comercio local.

No que atinxe ás multas por infracción da ordenanza, actualizase ao establecido polas leis de trafico. Polo tanto haberá unha redución do 50% se o pagamento da sanción se fixera efectivo no prazo de 20 días naturais. O importe das sancións non se incrementou. Sanción de 36 € por modificar a hora de chegada despois do estacionamento; e sancións de 24 € por falta de disco ou comprobante; superar o límite horario; estacionar de novo na mesma rúa ou praza sen que transcorreran dúas horas; ou ocupar dúas prazas de estacionamento.

As prazas destinadas a persoas con dificultades de mobilidade manterán o tempo de estacionamento de tres horas.

Por conseguinte, os sinais informativos serán cambiados para recoller estas novidades.

15/10/2020 in Alcaldía, Tráfico, Urbanismo, comercio e industria

A Policía Local rescata a un veciño maior que camiñaba desorientado pola Autovía

 

A Policía Local localizou a un home de 85 anos de idade, veciño de O Porriño, que circulaba a pé pola Autovía A-52, onte luns, ás 13,40 horas. A través do 112, recibiuse aviso de que un varón, de idade avanzada, camiñaba pola Autovía en dirección Vigo e que corría serio risco.
Os axentes que se desprazaron atopárono camiñando á altura do punto quilométrico 306 comprobando que se trataba dunha persoa maior que ten problemas de demencia, procedendo ao seu traslado e entrega a súa familia que xa estaba a buscalo.
Aínda que o ámbito de actuación das Policías Locais no eido do tráfico restrínxese ás zonas urbanas, non é a primeira vez que axentes do Porriño acoden a atender estas situacións en vías interurbanas, como aconteceu o pasado 5 de setembro deste ano, cun home de 80 anos, tamén veciño porriñés, que sen ningún tipo de roupa reflectante camiñaba pola autovía A-55.

Neste senso, dende a Concellería de Seguridade que dirixe Lourdes Moure, fai un chamamento á colaboración da veciñanza para que dean aviso á Policía Local do Porriño que dispón dunha contrastada capacidade de resposta operativa non superior a tres minutos ante calquera urxencia.

13/10/2020 in Alcaldía, Tráfico

O concelleiro de Infraestruturas convoca aos veciños da rúa Aloques para informarlles do plan de obra

 

Pedro Pereira, concelleiro de Infraestruturas convoca aos veciños da rúa Aloques a unha xunta informativa que terá lugar o vindeiro martes día 13, ás 19 horas, no salón de sesións do Concello. Trátase de informarlles sobre o plan de obra para executar o proxecto de humanización da devandita rúa.

Os traballos comezarán o luns 19 a cargo da empresa adxudicataria que resultou ser “Escavacións e Construcións Pérez Portela”.

O Concello do Porriño sacou a licitación pública a humanización da rúa Aloques, cun orzamento de 422.636 €, con cargo ao Plan Concellos 2020.

Este proxecto do goberno municipal, a proposta do concelleiro de Infraestruturas, Pedro Pereira plántea o tratamento deste espazo urbano cunha mellora que abrangue a renovación e ampliación dos servizos existentes. A tal fin compre a demolición do firme actual e a súa substitución por un en-lousado en pedra. E ademais acometerase a recollida de pluviais, saneamento, abastecemento de auga, telecomunicacións e electricidade.

Como apreciase nas imaxes de recreación virtual que acompañan esta nova, a rúa Aloques quedará de tránsito peonil, sen tráfico de vehículos agás residentes, segundo o proxecto que foi presentado previamente polo concelleiro de infraestruturas  aos residentes na reunión que celebraron o 5 de decembro de 2019 na casa do Concello.

 

09/10/2020 in Alcaldía, Tráfico, Urbanismo, comercio e industria

O Concello apoia a candidatura de “Aceesca” no programa “Xuntos Sumamos”

A alcaldesa, Eva García de la Torre expresou o apoio do Concello do Porriño á candidatura da asociación “ACEESCA” á convocatoria do programa “Xuntos Sumamos” que realiza “Ferrovial”.

A alcaldesa ven de enviar unha carta dirixida á empresa construtora que institúe esta iniciativa creada para apoiar proxectos desenvolvidos por organizacións privadas sen ánimo de lucro para a mellora das condicións de vida das persoas en risco de vulnerabilidade social.

Na súa carta de apoio á candidatura de “ACEESCA”, a alcaldesa porriñesa lembra que esta entidade “traballa para mellorar a calidade de vida das persoas con discapacidade intelectual e das súas familias, tanto no Porriño como na bisbarra”.
“As actividades de ACEESCA supoñen unha notoria achega á comunidade, no eido social e de emprego, a través da promoción integral das persoas con discapacidade intelectual , promovendo a súa autonomía e facilitando a súa integración laboral”, explica Eva García.

09/10/2020 in Alcaldía

As alcaldesas de Porriño, Mos, Salceda e Tomiño comprometéronse cos traballadores de “Maderas Iglesias” na procura de solucións

 

 

Seis dos concellos máis afectados pola crise de “Maderas Iglesias”, xa que teñen máis veciños entre os 148 traballadores, estiveron representados na xuntanza celebrada hoxe no Porriño co comité de persoal desa industria.

Á convocatoria realizada e presidida pola alcaldesa porriñesa, Eva García de la Torre, acudiron as súas homólogas de Mos, Nidia Arévalo; Salceda de Caselas, Loli Castiñeira e Tomiño, Sandra Gónzalez. Tamén asistiron os tenentes de alcalde de Salvaterra do Miño, Ernesto Groba e de Ponteareas, Cristina Fernández. Tamén participou na reunión Lourdes Moure, concelleira de Economía do Porriño.  

De todos estes concellos, Salvaterra é o máis afectado con 34 veciños entre os traballadores de “Maderas Iglesias”. Porriño ten 25; Ponteareas, 23; Mos, 20; Salceda de Caselas, 10 e Tomiño, 2. 

Os membros do comité de persoal e delegados sindicais expuxeron as súas críticas “ante a falla de compromiso por parte do empresario Juan Ramón Iglesias en presentar un proxecto viable que esixe o IGAPE”. E tamén amosaron a súa inquedanza porque “a Xunta de Galicia tarda en materializar o apoio que din que quere darnos”, manifestou Vicente Molares, presidente do comité laboral. 

As representantes dos diversos concellos manifestaron o seu respaldo aos traballadores e deron conta das xestións que están a realizar. Nomeadamente Nidia Arévalo que informou que fala “a diario” co novo director do Instituto Galego de Apoio e Promoción Económica (IGAPE) e adiantou que agarda que “o vindeiro martes manteña unha reunión con vos”.

En paralelo, realizaranse outras xestións preto do empresario e dos acredores bancarios, segundo comprometeron as alcaldesas e representantes dos concellos presentes.

“Por nos non vai quedar facer todo o posible, e sabemos que a Xunta está tamén por botar unha man, para evitar a desaparición dos 148 postos de traballo que están en xogo”. “Temos que ter con eles unha sensibilidade especial e unha disposición absoluta para axudarlles”, rematou a alcaldesa do Porriño, Eva García.

 

08/10/2020 in Alcaldía, Emprego e formación

Porriño acollerá mañá a xuntanza conxunta de concellos e comité de empresa de “Maderas Iglesias”

 

A alcaldesa, Eva García de la Torre presidirá mañá a reunión conxunta de representantes de concellos e comité de empresa de “Maderas Iglesias”, convocada por iniciativa do goberno municipal do Porriño. A intención é facer unha fronte común dos concellos que demanden ao IGAPE e ao Conselleiro de Industria, unha solución para evitar o peche da factoría con 148 empregados, na súa meirande parte, mulleres.

Xunto a Eva García de la Torre e membros do goberno municipal porriñés, confirmaron a súa asistencia, entre outros, Loli Castiñeira, alcaldesa de Salceda de Caselas; Cristina Fernández, primeira tenente de alcalde de Ponteareas e máis Ernesto Groba, primeiro tenente de alcalde de Salvaterra do Miño.
A convocatoria fixose extensiva aos quince axuntamentos que xunto co Porriño, contan con traballadores afectados pola crise de “Maderas Iglesias” e son veciños dos seus respectivos concellos.

A xuntanza terá lugar a partir das 11 horas, no salón de plenos do Concello porriñés.

07/10/2020 in Alcaldía

Policía Local e Garda Civil interceptaron unha operación de compra venda de marihuana no Porriño que rematou con 4 detidos


Policía Local do Porriño e Garda Civil impediron una operación de compra venda de dous quilos de marihuana e detiveron a catro persoas en relación con estes feitos. Tamén os axentes interviñeron preto de 7.000 euros en efectivo.

A transacción impedida polo operativo policial tiña lugar en Porriño. Detivéronse aos compradores, dous veciños de Portugal e aos dous responsables da venda, veciños do Porriño e Madrid.

As investigacións, coordinadas pola Garda Civil, iniciáronse a mediados de setembro por mor dunha alerta cidadá informando dun posible punto de venda de marihuana nunha parroquia do municipio porriñés, segundo informou a Subdelegación do Goberno.

As pescudas, que se desenvolveron coa colaboración de varios compoñentes da Policía Local porriñesa, deron o seu froito a semana pasada cando se intercepta un vehículo con placas de matrícula portuguesas, que acaba de realizar unha compra de marihuana na mesma parroquia do Porriño.

Garda Civil e Policía Local do Porriño outorgan unha importancia sobranceira á colaboración cidadá que facilitou o traballo de investigación dos corpos policiais.

05/10/2020 in Alcaldía

Unha avaría na central de “Movistar” no Porriño afecta ás liñas telefónicas fixas de 1.300 clientes. Entre eles, as oficinas do Concello


Unha avaría telefónica na central “Movistar” en Porriño, situada no edificio que esta empresa ten na praza do Cristo, afecta a 1.300 subscritores de liña fixa. Entre os afectados está o Concello do Porriño, que desde o xoves está sen servizo de telefonía fixa nas oficinas do concello.

Segundo “Movistar”, a falla xurdiu á unha da tarde de onte e esta mañá aínda estaba sen resolver.

02/10/2020 in Alcaldía

Porriño convocará unha xuntanza de concellos e comité de empresa de “Maderas Iglesias”

 

O vindeiro xoves 8 de outubro, o Concello do Porriño acollerá unha xuntanza de alcaldes e alcaldesas dos 16 concellos que teñen entre os seus veciños, traballadores afectados polo risco de peche da empresa “Maderas Iglesias”. Reuniranse co comité de persoal da factoría que actualmente ten 148 operarios, na súa meirande parte mulleres.

O goberno municipal e concelleiros dos restantes grupos políticos da Corporación porriñesa reuníronse hoxe co comité de empresa de “Maderas Iglesias” no salón de sesións, ao remate da manifestación que os traballadores realizaron dende a factoría ata a praza do Concello.

Ademais de convocar a devandita reunión de alcaldes e alcaldesas para o 8 de outubro, os grupos políticos da corporación porriñesa comprometéronse a trasladar aos seus deputados no Parlamento de Galicia este asunto para demandar explicacións do Conselleiro de Economía e Industria. Tamén, Pedro Pereira, en condición de alcalde accidental manifestou que solicitará unha reunión urxente co director do IGAPE (Instituto Galego de Apoio e Promoción Económica) para instar a súa intervención para evitar o peche de “Maderas Iglesias”. 

Paralelamente os sindicatos e o comité de empresa da firma anunciaron que continuarán con máis mobilizacións. “O vindeiro mércores día 7, os traballadores de Maderas Iglesias nos trasladaremos ata Vigo, diante da delegación territorial da Xunta de Galicia e se temos que ir cara a Santiago, faremo-lo”, manifestou Vicente Molares, voceiro do comité.

 

01/10/2020 in Alcaldía, Emprego e formación