O Porriño incrementou a inversión en atención social nun 68,13% os últimos tres anos

O alcalde do Porriño, Alejandro Lorenzo, e o concelleiro de Benestar Social, Abel Estévez, fixeron hoxe balance da xestión realizada polos Servizos Sociais do Concello do Porriño, un departamento fundamental para protexer ás persoas máis vulnerables.

O Goberno Municipal mantén a súa forte aposta por este área tan sensible, invertindo no último ano máis de 2,5 M de euros, un 31,14% máis que no anterior exercicio. O reforzo da inversión na atención social por parte do executivo incrementouse nun 68,13% desde o ano 2020.

“Os Servizos Sociais son un eixo fundamental do Concello dando resposta á veciñanza máis vulnerable e que máis o necesita”, apuntou o alcalde, “O traballo que realizan moitas veces é invisible pero sen eles deixaríamos a moita xente atrás. Por iso reforzaremos sempre as nosas políticas sociais e tamén inversión”.

As cifras reflicten a importancia dos Servizos Comunitarios, que pechan o 2023 con 5.928 atencións de información, orientación e asesoramento á veciñanza no que respecta a recursos públicos en xeral.

Ademais, lévanse a cabo diferentes programas municipais creados directamente para respostar a necesidades detectadas a través da propia actividade do departamento. Entre eles, o Programa municipal de emerxencia social, do que se tramitaron 85 solicitudes relacionadas con necesidades de carácter básico (alimentación, farmacia, etc…) e outro de caracter urxente, o Programa de Bono enerxético municipal do que se benefician 213 familias, o Préstamo de axudas técnicas que resolveu de xeito favorable o prestamo de 13 camas articuladas e 3 grúas eléctricas, a intervención no Servizo de axuda no fogar que atende a 147 persoas, Xantar na casa con 14 usuarios ou a Teleasistencia, tramitando o traslado de 59 usuarios ao sistema de Dependencia.

Outro dos programas fundamentais é o programa de alimentos SOS Porriño, no que causaron alta o pasado ano 222 familias, ao que hai que sumar Xoguetes polo Nadal que achegou lotes de xoguetes libros a 109 menores.

Infancia e educación

A infancia e a educación é un dos grandes núcleos deste departamento, intervindo a través de diferentes programas. No marco do Programa de Educación Familiar atendeuse a 130 familias, 80 persoas participaron no Programa de formación básica para familias en situación de risco, centrándose na preparación do graduado da ESO, e 81 menores o fixeron no Programa de reforzo escolar. Cabe destacar deste último o alto nivel de satisfacción das familias e a mellora dos resultados académicos dos pequenos/as. Ademais, está funcionando como un importante elemento prpotector fronte ao abandono escolar. Destacable tamén é o Servizo de Atención Temperá, que atendeu a 89 menores.

Maiores

Os maiores tamén xogan un papel importante no día a día dos servizos sociais con programas de respiro familiar, Obradoiros de prevención do deterioro cognitivo no que participaron 36 persoas, Depotermal ou Tempo para Nós, con máis de 310 usuarios/as. Á xestión nesta área hai que suma as tramitacións da área de inclusión, dependencia, discapacidade ou pensións non contributivas.

Publicada a listaxe de admitidos e admitidas no Campamento de Semana Santa

O vindeiro 25 de marzo comenzará o Campamento de Semana Santa para os e as máis pequenas da casa ; e como ben sendo de costume, o mesmo desenvolverase no C.E.I.P Plurilingüe Xosé Fernández López e instalacións municipais

O lugar de entrega e recollida dos e das participantes será na porta principal do centro escolar no horario,de 8:30 a 14:00 horas. Os rapaces e rapazas deberán levar roupa cómoda : calzado cómodo e outro de reposto para poder utilizar ,no seu caso, as pistas do pavillón , unha mochila co calzado de reposto, unha merenda e auga.

No caso de precisar algunha vestimenta diferente , serán as monitores e monitores as persoas encargadas de comunicalo.

Recordade as únicas persoas autorizadas a entregar e recoller aos rapaces e rapazas do Campamento de Semana Santa serán as que instaron a solicitude.

En caso de ser outra persoa a encargada, ésta, deberá ser maior de idade e levar xunto ós monitores e monitoras a autorización correspondente, asinada con copia dos D.N.I ou N.I.E da persoa autorizante e autorizada

Listado de admitidos: https://oporrino.org/wp-content/uploads/2024/03/LISTADO-DE-ADMINISTIDOS-E-ADMITIDAS-NO-CAMPAMENTO-DE-SEMANA-SANTA-2024-1.pdf

Consentimento para fotografías e gravacións: https://oporrino.org/wp-content/uploads/2024/03/Consentimento-para-fotografias-e-gravacions.pdf

Nota de Información sobre o Proceso da Secretaría Xeral da Igualdade: https://oporrino.org/wp-content/uploads/2024/03/Nota-de-Informacion-sobre-o-Proceso-da-Secretaria-Xeral-da-Igualdade.pdf

A cativada do Porriño reafirma o seu compromiso coa auga

Co fin de crear conciencia entre a cativada da importancia da auga para o noso benestar e o dos ecosistemas, o Concello do Porriño e Consorcio de Augas do Louro uníronse hoxe para conmemorar da man dos coles o Día a Auga.

148 nenos e nenas de 4º de primaria, do CEIP Antonio Palacios, CEIP Xosé Fernández López, CEIP de Atios e CPR Hermanos Quiroga, participaron hoxe da actividada organizada por ambas entidades no marco do proxecto do Consorcio Misión Imposible.

Acompañándoos estiveron o alcalde do Porriño, Alejandro Lorenzo, e representantes do Consorcio de Augas do Louro, Rufino Rodríguez, xerente, Manuel Viñas, xefe de servizo de FCC Aqualia, e Alberto Fernández, técnico de abastecemento de FCC Aqualia.

A iniciativa iniciouse cunha parte teórica na que se explicou aos/as nenos/as o ciclo natural e a importancia deste recurso, por medio de fichas didácticas e dun xogo de tarxetas onde cada un tivo que explicar a súa vinculación en base ao debuxo que lle tocou. Seguidamente, realizaron un xogo sobre a posibilidade de tirar polo sanitario diferentes elementos resolvendo as dúbidas que lles puideron aparecer.

Tamén se centraron na explicación da depuración da auga que chega á EDAR recreando con xogos os diferentes procesos. Realizaron medicións de cloro e aprenderon sobre a potabilidade.

“Saben ben da importancia que ten este recurso na nosa vida e na do planeta e hoxe asinaron o seu `compromiso coa auga´, que levaron para a súa casa para tamén implicar ás súas familias”, explicou o alcalde, Alejandro Lorenzo.

Para terminar, todos os participantes, incluído o rexedor e o persoal do Consorcio, rapearon xuntos na praza para que toda a veciñanza do Porriño se comprometa tamén con este recurso.

A Biblioteca do Porriño sigue liderando en Galicia con 9.200 usuarios, máis de 2000 préstamos mensuais e máis de 45.000 visitas ao ano

No mundo das bibliotecas, o principal indicador de eficacia é o número de préstamos e o número de usuarios. Estes datos soen amosar a boa saúde, ou non, do servizo bibliotecario.

Nos últimos tempos estase a notar en España un descenso xeral destes indicadores, debido principalmente á competencia dos contidos dixitais e doutras formas de ocio por parte dos cidadáns.

Esto obriga ás bibliotecas a buscar novos servizos para seguir xogando un papel destacado na sociedade.

Pero isto non parece afectar á multipremiada Biblioteca do Porriño, que ademais de ofrecer tamén novos servizos (como a recente inauguración da Sala de Estudo Municipal) e contidos dixitais (ebooks a través da plataforma GaliciaLe, películas na plataforma eFilm, implementación da nova app RBGalicia que inclúe o carné dixital…), leva anos encabezando o ranking galego de usuarios e número de préstamos por habitante. E as cifras seguen en contínuo ascenso, ano tras ano.

Con respecto ao número de préstamos, nos dous últimos anos incrementouse nun 25%, prestando unha media de 2374 exemplares ao mes, destacando meses como o pasado xaneiro onde se chegaron a prestar case 2700 exemplares. E con respecto ao 2006 anótase un espectacular incremento dun 1.722% no número de préstamos. A biblioteca porriñesa presta hoxe nun día case o mesmo que no 2006 prestaba durante todo un mes.

“Este éxito débese ao contínuo traballo por ofrecer unha colección actualizada, atractiva e viva, onde se prima o uso dos libros por riba da súa acumulación, onde se coida a xestión da colección basada nos datos e as persoas, e onde se concede gran importancia ás novidades e recomendacións de lectura, moi apreciadas polos usuarios”, explicou o alcalde, Alejandro Lorenzo, agradecendo o enorme labor que realiza o persoal da Biblioteca e o concelleiro de Cultura, Bienvenido Estévez, “O labor dos nosos bibliotecarios é encomiable e xunto co concelleiro Beni conforman ese equipo capaz de levar a nosa biblioteca ao máis alto”.

Con respecto ao número de usuarios, a biblioteca porriñesa ten rexistrados a día de hoxe un total de 9.224 persoas usuarias, é dicir, case o 50% da poboación censada no concello. Un incremento do 330% desde 2006 e unha cifra espectacular a nivel galego e español, que destaca aínda máis se sumamos o uso que fan da biblioteca porriñesa os cidadáns da contorna: un 30% do volume do servizo corresponde a cidadáns de Mos, Vigo, Ponteareas e Tui.

O rexedor concluíu indicando que dende o Concello do Porriño continuarán apostando por “unha xestión encamiñada a que a veciñanza de todas as idades inclúa a lectura nos seus hábitos culturais e de ocio. Que a vivan e a disfruten”.

Conmemoramos o Día dos Bosques plantando árbores!

Usuarios e usuarias de Afaga e Aceesca participaron hoxe na plantación de árbores organizada polo Concello do Porriño polo Día Internacional dos Bosques.

Foi na contorna do río Louro, o pulmón verde da vila. No desenvolvemento desta acción plantáronse varios exemplares de Liquidambar, unha especie moi acaída para este entorno, e informouse a todos os participantes dos métodos de transplante dunha árbore, así como dos coidados posteriores que requiren.

O Día Internacional dos Bosques é un recordatorio da importancia que teñen os poboadores máis antigos do planeta, as árbores, que sosteñen ao ser humano e ao medio ambiente. Non só son os encargados de liberar osíxeno e transformar o dióxido de carbono (CO2), reducindo o efecto invernadoiro na atmósfera, senón que, ademais, son alimento, fogar e acubillo de multitude de especies. A efeméride, é polo tanto, unha data que lembra a importancia de protexer as superficies arborizadas como unha forma de asegurar que a vida no noso planeta siga sendo posible.

“Neste día queremos lembrar a necesidade de manter o respecto polas árbores e a natureza e recalcar os beneficios que proporcionan, tamén nas contornas urbanas”, explicou o alcalde, “Son xestos simbólicos que pretenden infundir na veciñanza a necesidade de coidar e valorar o noso medio natural”

Andainas Saudables para promover a actividade física entre os maiores do Porriño

O Centro de Saúde do Porriño en colaboración coa concellería de Sanidade, que dirixe Teresa Veloso, pon en marcha un programa de Andainas Saudables dirixido a persoas maiores de 65 anos.

“Este programa impúlsase cun dobre obxectivo, por unha banda promover a actividade física e un envellecemento activo, e por outra loitar contra o illamento social que tanto afecta aos nosos maiores, indicou o alcalde”, Alejandro Lorenzo.

As andainas durarán aproximadamente unha hora e os participantes irán acompañados por persoal sanitario do Centro de Saúde do Porriño e voluntarios de Protección Civil. A marcha discorrerá polo paseo do Louro.

Serán todos os mércores, ás 10:30 h e ás 19 h,  e venres, ás 10:30 h, dos meses de abril, maio e xuño. Para participar é necesario inscribirse no rexistro do Concello do Porriño indicando as quendas nas que se quere participar.

“Estas andainas son unha oportunidade perfecta para evitar o sedentarismo, movernos un pouquiño e á vez compartir momentos, establecer lazos e coñecer xente”, explicou a concelleira, Teresa Veloso, “Por iso, anímovos a todos e todas a participar e movernos xuntos!”

Defensa persoal para mulleres, O Porriño implícase contra a violencia machista

O Concello do Porriño segue traballando co obxectivo de sensibilizar á veciñanza en xeral da gravidade e dimensión do problema da violencia contra as mulleres e, á vez, avanzar na prevención destas condutas violentas. Neste eido, dende a concellería de Igualdade, que dirixe Carolina González, inclúen na súa folla rota tamén a necesidade de dotar ás mulleres das ferramentas necesarias para defenderse dun ataque adquirindo coñecementos de defensa persoal da man de persoal cualificado.

A proposta abrangue dúas iniciativas: unha dirixida ao alumnado dos centros de educación secundaria e unha segunda dirixida ás mulleres en xeral aberta a participación de todas aquelas que queiran formarse.

Hoxe desenvolveuse a primeira das sesións, no IES Pino Manso, na que participaron os alumnos e alumnas de primeiro de bacharelato. Comezaron cunha ponencia sobre a violencia machista da man de Juan Antonio Sagredo, fiscal en violencia de xénero do partido xudicial de Ponteareas con máis de 20 anos de experiencia. A continuación, da man de axentes da policía local e expertos en defensa persoal, comezou a sesión práctica na que as rapazas, acompañadas polos seus compañeiros de clase, aprenderon maniobras de defensa para solventar un posible ataque.

O día 2 a actividade desenvolverase no IES Ribeira do Louro.

As quendas abertas ao público serán os días 13, 20, 27 de abril e o 4 de maio, no pavillón municipal, e contarán coa intervención do maxistrado Juan José Trashorras, titular do Xulgado Penal número 1 de Pontevedra. Serán de 10 a 13 h.

Están dirixidas a mulleres, co fin de desenvolver máis confianza nelas memas e no seu entorno, implementar estratexias de preveción e detección de situacións de perigo, integrando na súa vida diaria hábitos de seguridade persoal e promovendo a súa confianza e autoestima.

Para participar non é preciso inscripción previa.

A Praza de Abastos abre de novo as súas portas cunhas instalacións totalmente renovadas

Tras un mes pechada por obras de mellora, a Praza Abastos do Porriño abriu as súas portas este martes e o fixo por todo o alto. Unha vez completados os traballos da primeira fase da mellora, que incluíron a renovación do pavimento, instalación de fontanería e eléctrica e reparación dos danos que presentaba a estructura, os praceiros e praceiras atenderon de novo aos centos de usuarios que hoxe pasaron polo mercado municipal para facer as súas comprar e coñecer as melloras.
 
O alcalde, Alejandro Lorenzo, e a concelleira de Mercados, Antía Carrera, acompañaron á conselleira de Promoción do Emprego e Igualdade, Elena Rivo, que hoxe se uníu á inauguración. Con eles estiveron a xerente do Instituto Galego de Consumo e da Competencia, Sol Vázquez, e a delegada da Xunta en Vigo, Ana Ortiz, así como concelleiros e concelleiras do goberno local.
 
“Con esta reforma daremos ese salto de calidade que necesitaba a nosa Praza de Abastos para transformarse de novo no centro neurálxico do comercio da vila”, explicou o alcalde, “Estamos máis cerca de conseguir o selo de Mercado Excelente de Galicia e de que a praza sexa de novo o foco de dinamización económica que foi antaño. Contamos cunha ampla variedade de produtos de alta calidade á venta, unha representación de todos os sectores: florerías, froiterías, peixeiras, carnicerías… e un incontestable traballo dos nosos praceiros e praceiras. Só nos quedaba por tachar o único dos requisitos que estaba pendente dende hai décadas: a mellora das nosas instalacións”.
 
O rexedor incidiu en que se trata só da primeira fase dun proxecto global que “modernizará e dinamizará a praza” e en que iso non sería posible sen o respaldo da Xunta de Galicia “que apoiou sempre este proxecto” e sen o “dos nosos praceiros e praceiras, que dende o principio traballaron con nós man a man. Moitas grazas por isto e por facer pobo”.
 
A conselleira destacou tamén esta infraestrutura como “punto dinamizador do comercio e da economía da contorna” e felicitou ao alumnado traballador da especialidade de Cociña “Porremprego Cualifica II”, que prepararon in situ uns petiscos elaborados con produtos da Praza de Abastos que puido degustar toda veciñanza.
 
Tamén os nenos e nenas tiveron o seu espazo, participando en obradoiros para eles na contorna da praza onde aprenderon xogando sobre os productos que ofrece o mercado municipal.

O Porriño impulsa o programa dirixido ás familias “Educando en positivo”

O Concello do Porriño, a través da súa concellería de Educación, que dirixe Carolina González, impulsa o programa “EDUCANDO EN POSITIVO para o desenvolvemento da intelixencia emocional e o coidado da saúde mental”.

Dende o Concello buscan con esta actividade que as familias saiban como poden achegar valor, adquirir os coñecementos e habilidades relevantes para elas/eles e acadar os seus obxectivbos coa “Disciplina Positivia”. As persoas asistentes aprenderán a corrixir os comportamentos dos seus fillos/as a través de límites e normas desde o cariño e a empatía.

 Coñecerán as ferramentas que nos permitirán establecer un vínculo emocional con eles/elas e brindarlles seguridade e confianza. Deste xeito, poderán fomentar a súa autoestima, creatividade, comunicación, xestión emocional e resolución de conflitos.

 “Pódese educar sen medo, sen berros nin ameazas. Convidámosvos a crear unha conexión maravillosa co voso fillo/a a través destes obradoiros e da conferencia”, sinalou a concelleira.

O programa desenvolverase os días 4, 11, 18 e 25 de abril no Centro Cultural do Porriño e consta dunha xornada informativa e tres obradoiros.

O 4 de abril, ás 18:30 h, terá lugar a xornada informativa dirixida a familias con fillas/os de idades comprendidas entre os 6 e os 12 anos. Será a cargo de Vanesa Cal, psicóloga, e Carlos Rodríguez, terapeuta en PNL e Intelixencia emocional. A entrada é libre e de balde ata completar aforo.

Os obradoiros desenvolveranse os días 11, 18 e 25 de abril, de 18:30 a 20:30 h, no segundo andar do Centro Cultural. É necesario inscribirse xa que os grupos están limitados a 15 prazas e haberá que facelo presencialmente na xornada informativa.

Sumámonos un ano máis á Hora do Planeta

O Concello do Porriño súmase un ano máis ao apagón máis comprometido coa natureza e o clima. O vindeiro 23 de marzo as luces da Casa Consistorial apagaranse de 20:30 a 21:30h para darlle unha hora máis ao planeta.

Dende o Concello convidan á veciñanza a unirse a esta iniciativa que promove WWF a nivel mundial para reivindicar a necesidade de tomar medidas contra o cambio climático. Miles de vilas e cidades apagarán nese momento as luces dos seus principais edificios e monumentos.

O ano pasado foi o máis cálido da historia desde que se teñen rexistros. Este aumento da temperatura global traduciuse en fenómenos meteorolóxicos extremos como inundacións, olas de calor e incendios devastadores cada vez máis frecuentes. Sobran evidencias da crise climática e neste contexto a Hora do Planeta brinda ás persoas de todo o mundo a oportunidade de demostrar a súa preocupación pola degradación ambiental do planeta (quecemento global, pérdida de natureza, contaminación) e resaltar a necesidade de actuar.