Novas

O Concello apoia ao comercio local coa campaña de Nadal e Reis de Acipor

 

  • A iniciativa repartirá 3000 euros en vales para incentivar as compras no comercio de proximidade durante estas datas festivas

O Porriño, 11 de decembro de 2025.- O Concello do Porriño únese ao tecido empresarial local para apoiar a campaña de Nadal impulsada pola Asociación de Comerciantes e Industriais de Porriño (Acipor). A nova edición da campaña de promoción do comercio, que se desenvolve do 5 de decembro de 2025 ao 10 de xaneiro de 2026, sorteará 50 cheques-compra de 60 euros cada un deles entre a clientela que realice as súas compras nos establecementos asociados.

A iniciativa conta, un ano máis, coa colaboración do Concello do Porriño, que destaca o impacto positivo deste tipo de accións na economía local e na dinamización das rúas durante o Nadal. “O comercio local é unha parte esencial da identidade do noso municipio, un motor económico e social que mantén vivas as nosas rúas. Por iso, desde o Concello estamos sempre ao lado de Acipor para impulsar este tipo de campañas que favorecen tanto aos negocios como á veciñanza porriñesa”, salientou o alcalde do Porriño, Alejandro Lorenzo, durante a presentación na que estivo unha representación dos comerciantes encabezada pola súa presidenta Juana Pérez.

A campaña contempla dúas modalidades de participación: por un lado, rifas en papel que entregarán os comercios adheridos e que permitirán participar nos sorteos presenciais do 22 de decembro de 2025 e do 14 de xaneiro de 2026, ás 20.30 horas, na propia sede de Acipor; e, por outro, o rexistro de tíckets a través da páxina web www.ccamorea.es ou escaneando o código QR, opción que ofrece aos clientes a posibilidade de inscribirse tamén nos dous sorteos dixitais, previstos para as mesmas datas. Nun acción de incentivar a participación online, dende Acipor promocionan esta vía destinando 34 vales para o sorteo dixital, que se realizará mediante unha app, e 16 para os boletos entregados fisicamente.

En total, repartiranse 25 cheques en decembro e 25 cheques en xaneiro, que deberán ser consumidos exclusivamente nos establecementos pertencentes a ACIPOR nas datas indicadas en cada vale.

O alcalde concluíu destacando que “apostar polo comercio de proximidade é investir no Porriño. Cada compra que facemos aquí revértese directamente na economía local, no emprego e na vida diaria do noso pobo. Esta campaña de Nadal é un exemplo de colaboración que funciona, e estou convencido de que volverá ser un éxito”.

11/12/2025 in Urbanismo, comercio e industria

O Concello aproba por unanimidade o traspaso á Xunta de Galicia do Servizo da Unidade Asistencial de Drogodependencias

 

  • A corporación municipal deu luz verde ao acordo que permitirá integralo no Servizo Galego de Saúde, garantindo a continuidade da atención e a estabilidade do persoal e dos recursos

 

O Porriño, 10 de decembro de 2025.- O Concello do Porriño celebrou esta mañá un Pleno extraordinario urxente no que se aprobou por unanimidade o traspaso á Xunta de Galicia dos servizos e medios persoais e materiais vinculados á Unidade Asistencial de Drogodependencias (UAD) municipal, un recurso que leva preto de catro décadas prestando asistencia sanitaria e apoio ás persoas con problemas de drogodependencias dunha vintena de concellos do sur da provincia de Pontevedra.

Co acordo adoptado hoxe, o Concello valida o borrador do Decreto de traspaso elaborado pola Consellería de Sanidade e remitido pola FEGAMP, así como o certificado da Comisión Mixta encargada de avaliar e formalizar a integración das UADs municipais no sistema sanitario autonómico. O Porriño é unha das 13 unidades existentes en Galicia que se incorporarán ao Servizo Galego de Saúde (SERGAS).

A concelleira de Sanidade e Política Social, Teresa Veloso, explicou no Pleno que este traspaso “supón un avance importante na integración funcional e sanitaria dun servizo esencial, garantindo unha atención máis coordinada, estable e plenamente incorporada ao ámbito sanitario autonómico”.

O acordo plenario inclúe tamén a aprobación dos anexos correspondentes ao persoal que se integra no SERGAS, os postos vacantes, o inventario de bens, contratos e inmobilizado, así como a cesión temporal do local municipal situado no edificio do Centro Cívico, onde continuará funcionando a UAD.

Desde a Intervención Municipal emitiuse un informe favorable ao considerar que o traspaso é positivo para a estabilidade orzamentaria, mentres que o Secretario Municipal informou tamén favorablemente tanto sobre a cesión do inmoble como sobre o proceso de integración do persoal.

O Concello notificará ás persoas traballadoras afectadas a súa nova situación administrativa e remitirá ao SERGAS toda a documentación preceptiva. O acordo queda supeditado á aprobación definitiva do Decreto por parte da Xunta de Galicia, previsto para entrar en vigor a partir do 1 de xaneiro de 2026.

O alcalde Alejandro Lorenzo lembra que o Concello do Porriño vén prestando desde fai 37 anos o servizo de atención a persoas drogodependentes a través do denominado centro de asistencia de drogodependencias e marxinación no ano 1988, que logo pasou a ser denominado Unidade Asistencial de Drogodependencias (UAD) no ano 1991, nome que persiste na actualidade. Expertos nesta materia fixeron recomendacións de que este tipo de centros debían integrase, funcional e organicamente, nos servizos de atención primaria das Comunidades Autónomas ou, de ser o caso, de atención especializada-saúde mental.

10/12/2025 in Sanidade

O Porriño celebra unha xornada para abordar a prevención da violencia de xénero e a protección das vítimas desde unha perspectiva social e tecnolóxica

 

  • Será este xoves, ás 17.30 horas, na Sala de Comunicacións aberta a toda a cidadanía

O Porriño, 9 de decembro de 2025.- Baixo o nome de “A prevención da violencia de xénero e a protección das vítimas, dende unha perspectiva social e tecnolóxica”, o Concello do Porriño organiza unha xornada enmarcada na conmemoración do 25N. Trátase de tres relatorios a través dos cales se busca ofrecer un espazo de reflexión, formación e coordinación entre profesionais, ademais de achegar á cidadanía información actualizada sobre os recursos dispoñibles fronte á violencia de xénero.

O encontro, co lema “non á violencia. Si a unha sociedade libre, xusta e segura” terá lugar este xoves, 11 de decembro, ás 17.30 horas na Sala de Comunicacións e contará coa participación de distintos perfís expertos na atención, intervención e apoio ás mulleres vítimas.

Roberto Barba, director Xeral de Loita contra a Violencia de Xénero da Xunta de Galicia, abrirá a xornada cun relatorio centrado nas prestacións económicas e dispositivos a man das mulleres vítimas de violencia de xénero. A continuación, Mª José Rodríguez, xefa da Unidade da Violencia sobre a Muller en Pontevedra, abordará o papel das mesas locais de violencia de xénero como mellora na coordinación entre os axentes que interveñen directamente coas vítimas. Ademais, profundará nos dispositivos de seguridade destinados a garantir a protección destas. Pechará as intervencións Elena Molanes, directora do Centro de Emerxencias para Mulleres Vítimas de Violencia de Xénero (CEMVI), co relatorio “Cando a emerxencia se transforma en esperanza: o rol dos centros de acollida”, na que explicará como estes recursos se converten nun espazo seguro e nunha oportunidade de reconstrución vital para as mulleres que dan o primeiro paso para saír da violencia.

Con esta xornada, o Concello do Porriño reafirma o seu firme compromiso na loita contra a violencia de xénero e na promoción dunha sociedade libre, xusta e segura, facilitando espazos de colaboración e formación que contribúan a mellorar a prevención, a detección e a atención ás vítimas.

09/12/2025 in Igualdade

O Concello impulsa o gran parque fluvial do Louro coa compra de 64 novas parcelas

 

  • O alcalde Alejandro Lorenzo vén de asinar a adquisición de 32 e antes de que remate o ano rubricará a compra doutras tantas, que sumadas ás 24 mercadas en 2023 suman unha superficie total de máis de 6 hectáreas que xerarán un gran espazo de recreo e lecer que actuará tamén como corredor ecolóxico e infraestrutura de protección fronte as inundacións

O Porriño, 8 de decembro de 2025.- O Concello do Porriño dá un novo paso decisivo na transformación ambiental da contorna do río Louro. O alcalde Alejandro Lorenzo vén de formalizar a compra de 32 novas parcelas situadas na marxe do río, unha actuación estratéxica que permitirá avanzar na creación do futuro Espazo Público de Lagunaxe Multifuncional, unha infraestrutura verde destinada a reducir o risco de inundación, restaurar o ecosistema fluvial e xerar un novo ámbito de convivencia e uso social para a cidadanía. Un proxecto incluído no PIA que se levará a cabo con fondos europeos.

O alcalde destacou a relevancia deste avance asegurando que “este é un paso histórico para o Porriño. Veño de asinar cos propietarios a compra destas 32 parcelas que nos permiten consolidar o espazo necesario para un gran parque fluvial que protexerá das inundacións e que, ao mesmo tempo, se converterá nun novo punto de encontro, recreo e calidade de vida para toda a veciñanza”. O rexedor subliñou tamén que o proxecto “coloca ao municipio á vangarda das políticas ambientais e de adaptación ao cambio climático”.

Lorenzo lembra que “estas novas adquisicións súmanse ás 24 parcelas mercadas en 2023 e outras 32 cuxa compra asinarei antes de rematar este ano”, configurando un conxunto continuo de terreos que suman 63.475,19 metros cadrados, que “con futuras adquisicións que seguiremos facendo” completará a superficie necesaria para a execución integral do espazo.

O proxecto define un modelo de adaptación climática fundamentado en solucións baseadas na natureza, coa creación dun lagunaxe multifuncional capaz de almacenar auga en episodios de choivas intensas. Isto permitirá protexer áreas urbanas e industriais especialmente vulnerables ás inundacións, ao tempo que se xera un novo pulmón verde para o municipio.

A intervención inclúe tamén a restauración ecolóxica das ribeiras e humedais asociados ás Gándaras de Budiño, espazo da Rede Natura 2000, incorporando vexetación autóctona, eliminando especies invasoras e creando zonas de alta biodiversidade.

O futuro parque fluvial ofrecerá novos espazos públicos para o lecer e a vida activa, con sendas peonís e ciclistas, pasarelas de madeira sobre zonas inundables, áreas de xogo, puntos de encontro e zonas recreativas que conectarán directamente O Porriño con Torneiros, superando a actual fractura territorial xerada pola canle do Louro.

Con esta adquisición de parcelas, o Concello consolida un proxecto clave para o seu futuro ambiental e urbano: un espazo natural resiliente, accesible e útil para a cidadanía, pensado para mellorar a calidade de vida e para afrontar con garantías os efectos crecentes do cambio climático.

 

 

08/12/2025 in Sen categoría

O Porriño dá a benvida ao Nadal con música de rondallas

 

  • Un dos grandes piares desta programación serán as tres rondallas que tocarán no casco urbano e por tódalas parroquias, comezando o percorrido mañá mesmo e clausurando o calendario festivo o domingo 11 de xaneiro co tradicional certame
  • O Concello reforza a programación infantil con contacontos, espectáculos, teatro, cinema, obradoiros, unha cúpula máxica e moita animación de rúa, sen esquecer a visita de Papá Noel e do Apalpador
  • Non faltarán as dúas grandes citas: a Festa Pre-Fin de Ano con dobre repique de badaladas e a Cabalgata do Reis Magos, colofón do Porriño Peque Fest

O Porriño, 6 de decembro de 2025.- O Porriño dá a benvida ao Nadal 2025 cunha programación ampla e chea de vida, pensada para que toda a veciñanza, e moi especialmente as familias e a infancia, poidan desfrutar dun mes cheo de música, tradición e ilusión. Tralo multitudinario acto de acendido do alumeado, serán as rondallas, un dos grandes piares desta programación e símbolo de identidade e arraigo cultural, as grandes protagonistas. “As nosas tres rondallas, Pontellas, Atios e Santa María do Porriño, son especialmente importantes nestas datas do Nadal, cando percorren rúas e parroquias levando alegría, participación e memoria colectiva; a chegada dunha rondalla é sinal de festa e emoción, un costume que se mantén vivo polo esforzo das asociacións e persoas que, ano tras ano, conservan e transmiten esta parte tan valiosa da nosa cultura”, sinala o alcalde Alejandro Lorenzo. Así pois, a música de rondallas comezará mañá mesmo a soar no Porriño co inicio da ruta de actuacións que as levarán polas diferentes parroquias e o casco urbano, nesta ocasión o percorrido iniciarase, por parte da Rondalla de Santa María do Porriño no Círculo Recreativo Cultural e nas rúas do centro da vila ás 19.00 horas e, por parte da Rondalla da Asociación Recreativa Santa Eulalia de Atios na propia parroquias de Atios, ás 19.30 horas; e o luns 8 será a quenda da Rondalla Cultural Musical de Pontellas que actuará ás 16.30 horas en Mosende e ás 17.30 horas en Chenlo, coincidindo coa festividade da Inmaculada Concepción nesta parroquia. A ruta continuará as dúas seguintes fins de semana, culminando con tres citas destacadas: a celebración pre fin de ano o martes 30, a cabalgata do Reis Magos o 5 de xaneiro e o domingo 11, no tradicional Encontro de Rondallas, converténdose así tamén nas encargadas de clausurar a programación.

Ao longo de todo este mes de decembro e comezos de xaneiro, as rúas e prazas converteranse en escenarios onde convivirán espectáculos, concertos, actividades culturais, deporte, animación, o tren turístico de Nadal e as propostas máis ligadas á tradición galega. “Para nós é fundamental manter o espírito máis auténtico do Nadal porriñés: a tradición das rondallas, a ilusión dos máis pequenos, a convivencia na rúa e a maxia da Cabalgata de Reis. Esta programación reflicte o que é O Porriño, unha vila unida pola música, a cultura e o afecto”.

A atención á infancia volve ser outro dos eixos fundamentais do Nadal porriñés, cunha programación especialmente deseñada para a cativada. Contacontos, espectáculos, teatro, cinema, unha cúpula máxica con Papá Noel e os Reis Magos, que se instalará a partir do vindeiro venres no Parque do Cristo, e diversas propostas de animación de rúa. A cita máis inmediata terémola mañá domingo co mago Alberti, que actuará ás 18.00 horas na Praza Arquitecto Antonio Palacios.

Ao longo destas semanas realizaranse tamén obradoiros de elaboración de beléns e creación de postais, ofrecendo aos máis pequenos espazos creativos e participativos. Non faltará a visita do Apalpador, o día 23 a partir das 17.00 horas e a de Papá Noel o día de Noiteboa ás 18.00 horas na praza do Concello. A celebración do Porriño Peque Fest, do 2 ao 4 de xaneiro no pavillón, consolidarase como un dos grandes encontros familiares das festas, repleto de actividades, xogos, inchables e sorpresas pensadas para converter as xornadas previas á chegada dos Reis Magos nun momento de diversión compartida. “As novas xeracións teñen que ter un Nadal no que sentirse identificadas, onde a creatividade, a alegría e a participación formen parte do día a día. Por iso dedicamos un espazo central ás actividades infantís —obradoiros, teatro, xogos—, para que os nenos e nenas vivan esta festa coas emocións que merecen”, explica o alcalde.

Outro dos puntos fortes da programación é a gran Festa Pre-Fin de Ano, que transforma O Porriño nun espazo festivo para todas as idades o día 30 de decembro. A mañá estará dedicada á cativada, con actividades e pasarrúas de personaxes, coas badaladas infantís, pensadas para que os nenos e nenas poidan vivir a súa propia “pre-noitevella”, acompañada de animación musical e ambientación festiva. Xa pola noite terá lugar as badaladas adultas, unha gran festa aberta a toda a veciñanza para despedir o ano dun xeito simbólico, compartido e anticipado. Trátase xa dun dos eventos máis agardados do Nadal no Porriño, que reúne centos de persoas e crea un ambiente único na vila, onde non faltará as uvas da sorte, cotillón e chocolate de balde. “A Festa Pre-Fin de Ano non é só unha despedida do 2025, é unha cita para xuntarnos, compartir, celebrar e preparar o 2026 con optimismo e esperanza. Queremos que este momento sexa especial para todos os veciños e  veciños”.

O gran colofón das festas chegará o 5 de xaneiro coa tradicional Cabalgata de Reis, precedida nos días anteriores polas visitas das Súas Maxestades ás parroquias, centros educativos e centros de día. Na tarde do día 5, os Reis Magos percorrerán as rúas acompañados de música, animación e a participación de colectivos locais, nun desfile que encherá O Porriño de luz e ilusión. A chegada á vila converterase, como cada ano, nun dos momentos máis emocionantes do Nadal, especialmente para o público infantil, que poderá entregar as súas derradeiras cartas e vivir de preto a maxia desta noite tan especial.

Con esta programación, o Concello do Porriño aposta por un Nadal diverso, participativo e accesible, que combina tradición e modernidade, cultura e ocio e especialmente deseñado para fortalecer o espírito comunitario que caracteriza estas datas. O Nadal 2025 chega así cargado de música, actividades e ledicia para toda a cidadanía.

Toda a programación pódese consultar polo miúdo na páxina web ecultura.net, onde estará actualizada toda a información relativa a posibles cambios por mor da climatoloxía ou outros factores.

 

 

06/12/2025 in Cultura e festas

O Porriño denuncia a paralización indefinida da supresión do paso a nivel pese a ter o proxecto e o convenio xa preparados

 

  • O alcalde explica a situación trala última reunión con ADIF logo da cal “nos sentimos manipulados, esquecidos e enganados” e anuncia medidas do Concello para reclamar a reactivación da obra “defenderemos esta infraestrutura en tódalas instancias, esixindo igualdade de trato e o cumprimento dunha obra que xa debía ser unha realidade”

O Porriño, 5 de decembro de 2025.- O alcalde do Porriño Alejandro Lorenzo vén de explicar a situación actual da supresión do paso a nivel que parte en dous a vila dende fai máis de medio século. “Lamento profundamente esta nova situación, que implica a paralización indefinida desta actuación e demanda histórica de toda a veciñanza. Logo de ter xa o proxecto redactado e o convenio listo para ser aprobado polo pleno, esta é unha noticia nefasta coa que nos sentimos manipulados, enganados e esquecidos. O Concello do Porriño asumiu responsabilidade e compromisos históricos e agora o Goberno de España rompe unilateralmente un acordo técnico xa pechado”, sinalou o rexedor. Fíxoo nunha rolda de prensa ante os medios de comunicación na que trasladou o resultado da última xuntanza mantida con representantes de ADIF, o pasado mes de novembro. Nela, expúxose que a Dirección Xeral do Sector Ferroviario comunicáralle a ADIF que este proxecto non podía ser aprobado, xa que debía ser incluído no Estudo Informativo da Saída Sur de Vigo. “Cónstanos que ADIF amosouse contrariado e en desacordo con esta decisión a cal ademais nin o Ministerio tivo reparo de comunicarllo ao Concello directamente”.

O rexedor subliñou a importancia desta obra para a seguridade, a mobilidade e a cohesión urbana e criticou a decisión do Ministerio de Transportes y Movilidad Sostenible, o que supón un bloqueo indefinido e prazos moito máis prolongados. O alcalde explicou que o proxecto estaba completamente redactado, con informes favorables de todas as administracións afectadas, e cun borrador do convenio xa listo dende marzo de 2024 pendente unicamente de ser aprobado polo pleno, por ser competencia do mesmo. “O orzamento definitivo estaba xa cifrado en máis de 28,6 millóns de euros dos cales ADIF aportaría o 72,2% e o Concello 27,8% restante, e pola nosa parte xa se estaba incluso estudando distintas vías de financiamento para asumir a aportación municipal de preto de 8 millóns de euros, máis os dous millóns a maiores para a humanización da contorna, contemplando para elo posibles fondos europeos ou operacións de crédito, para as cales xa se dera tamén o visto bo”.

“Ata o de agora, esta obra non se podía executar pola súa complexidade, pero contabamos cunha solución técnica moi traballada, consensuada con ADIF e que tiña en conta a participación económica do Concello, algo que historicamente nunca se formulara”, subliñou o rexedor. O Ministerio investiu 800.000 euros nun proxecto que agora deixa sen efecto e o concello destinou 20.000 euros ao proxecto de humanización futura do ámbito, pensando xa nun Porriño sen barreiras, “de que serviu todo este investimento público se agora se deixa tirado cando estaba a piques de asinarse? Como se xustifica destruír anos de traballo e cartos públicos?”.

O paso a nivel do Porriño soporta diariamente o cruce de 8.000 vehículos e ocupa o posto 16º en densidade de tráfico de toda a rede de ADIF en España, o que evidencia a súa importancia vital para a mobilidade local. “O proxecto estaba totalmente preparado, cun convenio pactado, informes favorables e solucións técnicas consensuadas. Esta paralización é unha sorpresa e unha situación lamentable”, insistiu o alcalde.

A decisión do Ministerio implica que non se poderán continuar os trámites administrativos para a firma final do convenio e que a execución do proxecto queda bloqueada ata que se complete o Estudo da Saída Sur de Vigo. Ante este escenario, o alcalde anunciou que o “Concello adoptará tódalas medidas necesarias para garantir a reactivación da obra nos termos pactados”. Ademais esixe igualdade de trato, denunciando un agravio comparativo que o Ministerio impulse un investimento de 22,6 millóns de euros para eliminar un paso peonil en Cesantes, con expropiacións xa en marcha, “como se entende que se lle dea prioridade a un paso peonil mentres se bloquea unha obra vital para a seguridade de miles de persoas?”, pregúntase o alcalde porriñés.

“Sempre dixen que nunca sacaría unha foto no paso a nivel ata anunciar un acordo e inicio das obras; sei que ese día chegará, pero para iso non se pode xogar coa xente como se leva feito moitos anos, prometendo e anunciando algo que nunca quixeron facer. O Porriño non vai calar. Defenderemos esta infraestrutura en todas as instancias, porque non imos permitir que se nos trate como un municipio de segunda. Non é unha batalla política, senón unha cuestión de seguridade, mobilidade e dignidade”, concluíu Alejandro Lorenzo.

Resposta á tarxeta postal enviada a Pedro Sánchez

Curiosamente no día de hoxe, o alcalde Alejandro Lorenzo recibiu, xusto antes de comparecer ante os medios esta mañá, unha carta de Presidencia do Goberno de España. A tarxeta postal, conmemorativa de Antonio Palacios, que o rexedor porriñés enviara o pasado 26 de setembro cando se presentou este deseño e tamén o cuño turístico, solicitando que se cumprira o soño da supresión do paso a nivel na vila, dando resposta a unha demanda histórica, tivo

Asinada pola Unidade de Atención e Resposta á Cidadanía, a misiva limítase a dar as grazas pola postal enviada, indicando que se remitirá copia do escrito ao Ministerio de Transporte y Movilidad Sostenible e de xeito paradoxal remata dicindo “esperando unha pronta solución para esta cuestión de tanta transcendencia para o desenvolvemento do seu municipio”.

05/12/2025 in Limpeza

O Concello mellorará a eficiencia enerxética do Centro Cívico cunha inversión de 150.000 euros

 

  • O proxecto permitirá reducir o consumo enerxético e mellorar o confort deste edificio que alberga a Escola Municipal de Música e múltiples aulas que acollen actividades lúdicas e culturais de diferentes asociacións e colectivos

 

O Porriño, 4 de decembro de 2025.- O Concello do Porriño levará a cabo as obras de mellora da eficiencia enerxética do Centro Cívico, cun orzamento total de 149.950 euros. As intervencións previstas inclúen a mellora dos sistemas de climatización e ventilación na segunda planta, a substitución integral das carpinterías exteriores por outras máis eficientes e o illamento térmico das fachadas, así como a instalación dun novo sistema de iluminación eficiente. No caso concreto da ventilación, o proxecto prevé a instalación dun sistema con recuperador de calor e redes de condutos de impulsión e extracción, co obxectivo de optimizar o confort térmico e a calidade do aire.

O alcalde do Porriño, Alejandro Lorenzo, destaca que “este proxecto é un paso máis na modernización das nosas infraestruturas municipais e na aposta decidida por reducir o consumo enerxético e as emisións de CO₂. Mellorar a eficiencia do Centro Cívico significa tamén mellorar o confort das veciñas e veciños que fan uso diario deste espazo, ao tempo que reducimos custos de mantemento e contribuímos á sostibilidade ambiental do Porriño”, engade.

O Centro Cívico do Porriño é un espazo de referencia para a veciñanza, que acolle a Escola Municipal de Música, que conta con máis de 150 alumnos, así como diversas asociacións e colectivos locais que empregan as súas instalacións para a realización de cursos e actividades formativas e de lecer. Así, a mellora da eficiencia e do confort do edificio repercutirá directamente no benestar de todas as persoas usuarias.

A actuación está subvencionada pola Consellería de Presidencia, Xustiza e Deportes, ao abeiro dunha orde de axudas destinada a promover a eficiencia enerxética en edificios municipais e cofinanciada pola Unión Europea a través do programa Galicia Feder 2021-2027. A parte subvencionada será do 80% (119.960 euros) tendo que aportar o Concello o 20% restante (29.990 euros). Neste sentido, o rexedor subliña a importancia da colaboración institucional,  “agradecemos o apoio da Consellería de Presidencia, Xustiza e Deporte que, a través dos Fondos Feder, fai posible acometer actuacións que doutro xeito serían moi difíciles de financiar só con recursos municipais”.

Con esta iniciativa, o Concello do Porriño reafirma o seu compromiso coa sostibilidade e a mellora continua das infraestruturas públicas, avanzando cara a un modelo de xestión máis respectuoso co medio ambiente e máis eficiente no uso dos recursos. As obras no Centro Cívico representan un exemplo claro de como a innovación e a eficiencia enerxética poden ir da man para ofrecer espazos municipais máis confortables, modernos e adaptados ás necesidades actuais da cidadanía.

 

 

 

04/12/2025 in Infraestruturas

A xustiza avala ao Concello do Porriño e frea a pretensión do Concello de Vigo de cobrar pola auga de Eiras

 

 

  • Dúas sentenzas do Contencioso Administrativo estiman o recurso do Concello do Porriño declarando nulo o acordo plenario de 2023 do Concello de Vigo e, consecuentemente, as liquidacións emitidas por importe de preto de 150.000 euros
  • O alcalde Alejandro Lorenzo sostén que “pagaremos o que nos corresponda, en concepto de mantemento das infraestruturas, e non o que Vigo decida e impoña unilateralmente” e lembra que “a auga non é de Vigo, Porriño conta cunha concesión outorgada no ano 1962 polo Ministerio de Obras Públicas”
  • O maxistrado-xuíz exhorta a ámbalas administracións ao diálogo en aras de evitar unha “cascada litixiosa”, cuestión á que xa se referiu dende fai anos o Concello do Porriño, ofrecéndose a negociar e chegar a un entendemento, sen obter nunca resposta por parte de Vigo

O Porriño, 3 de decembro de 2025.- O Xulgado do Contencioso-Administrativo vén de emitir dúas sentenzas que dan a razón ao Concello do Porriño fronte ao Concello de Vigo no conflito polos custos asociados ao encoro de Eiras. “A xustiza confirma que Vigo non podía modificar nin impoñer unilateralmente os importes que pretendía cobrarnos, por iso anula o acordo plenario de 2023 e, consecuentemente as liquidacións que foron derivadas del”, explica o alcalde Alejandro Lorenzo.

Así, a primeira das resolucións anula o acordo plenario adoptado polo Concello de Vigo o 29 de marzo de 2023, no que Vigo modificaba, de maneira unilateral, os importes que debía asumir O Porriño en función do antigo acordo de 27 de xaneiro de 1998, o cal tamén fora determinado unilateralmente. Aquel acordo de 1998 establecía unha participación nos custos de mantemento e, sobre todo, o pagamento vinculado á construción do canal, que quedou totalmente amortizado no ano 2023. Chegado ese momento, Vigo decidiu actualizar os custos e establecer un novo canon de mantemento, pero fíxoo sen negociación, sen xustificación suficiente e sen competencia para impoñelo unilateralmente, tal e como agora confirma a xustiza.

A segunda sentenza declara que, ao quedar anulado o acordo plenario de 2023, tamén quedan anuladas consecuentemente todas as liquidacións bimensuais derivadas del, que Vigo lle reclamara ao Concello do Porriño durante o ano 2023. En total, son case 150.000 euros en conceptos que non estaban acreditados e que Vigo pretendía cobrar sen base legal válida.

O alcalde do Porriño destacou que “o Concello pagará sempre o que lle corresponda, pero non o que Vigo decida e impoña pola súa conta”, lembrando que “O Porriño non ten que pagar polo subministro de auga, pois para iso xa ten unha concesión outorgada no ano 1962 polo Ministerio de Obras Públicas, senón polo mantemento das infraestruturas de captación e condución e sempre conforme á lei e aos acordos vixentes”.

Lorenzo sinala tamén que o Concello do Porriño leva tempo ofrecéndose a sentar e negociar os posibles pagos, ante o cal nunca obtivo resposta por parte do concello vigués, unha disposición ao diálogo que o propio maxistrado recolle tamén na sentenza. Nel exhórtase ás partes a “sentar adecuadamente, con solidez, os cimentos desta relación xurídica que indudablemente as vincula”, evitando así “unha cascada litixiosa” como a vivida nos últimos anos. O xuíz sostén que “sería óptimo que abandonasen a unilateralidade na determinación da achega, que ambas partes se reunisen e examinasen a cuestión, despexando aspectos como os gastos de mantemento da presa de Eiras”. Tamén indica que Vigo debe actuar con “auténtica transparencia” e poñer á disposición do Porriño a documentación detallada dos gastos reais que xera o mantemento e conservación desta infraestrutura.

Sen dúbida, ámbalas dúas sentenzas son unha boa nova para O Porriño e para os intereses da veciñanza, “seguiremos defendendo o que é xusto e garantindo unha xestión responsable dos recursos públicos”, conclúe Alejandro Lorenzo quen, á súa vez, remarca o feito de que “na propia sentenza se ratifique o que xa vimos pedindo dende fai tempo, a necesidade da existencia dun entendemento entre administracións”.

03/12/2025 in Infraestruturas

Un Porriño unido pola diversidade

 

  • Tradicional concurso de paraugas, andaina simbólica, lectura de manifesto e música folk para conmemorar o Día Internacional das Persoas con Discapacidade

O Porriño, 3 de decembro de 2025.- O Porriño celebra hoxe o Día Internacional das Persoas con Discapacidade, que cada ano se conmemora o 3 de decembro, cunha xornada marcada pola participación, a creatividade e a reivindicación dos dereitos das persoas con diversidade. A previsión meteorolóxica obrigou a trasladar ao pavillón municipal todas as actividades previstas inicialmente para as rúas da vila e a Praza do Concello.

Aceesca foi a gran protagonista da xornada, acompañada de usuarios e alumnado doutros centros como Afaga, Cogami, IES Pino Manso e os colexios Ribeira, Antonio Palacios e Hermanos Quiroga. Tódolos participantes realizaron unha pequena andaina simbólica no interior do pavillón, á que se sumou tamén a veciñanza, a concelleira de Política Social Teresa Veloso e o alcalde Alejandro Lorenzo que sinalou que “hoxe é un día para poñer en valor o que nos fai únicos, para lembrar que a diversidade constrúe O Porriño que queremos: inclusivo, accesible e cheo de oportunidades. É unha alegría conmemorar o Día Internacional das Persoas con Discapacidade acompañados de todos vós. Gracias por estar aquí e por facer desta mañá un espazo de convivencia e respecto; gracias tamén ás familias, profesionais e veciñanza pola súa implicación e cariño. O voso traballo, a vosa forza e, sobre todo, a vosa diversidade enriquece e dá sentido ao Porriño que construímos cada día”, rematou dicindo.

A continuación celebrouse o tradicional concurso de paraugas, no que se puideron contemplar diversos deseños todo eles con mensaxes reivindicativas, resultando gañador o elaborado polos escolares do CEIP Antonio Palacios. O momento central da xornada foi a lectura do manifesto do grupo de autoxestores de Aceesca, “Os Dez de Porriño”, que fixeron un chamamento contundente a derrubar barreiras e garantir os dereitos das persoas con diversidade. No seu texto, lembraron que “non só é un día para celebrar a nosa fortaleza, senón tamén para esixir os cambios necesarios que nos permitan formar parte da sociedade dunha maneira plena, activa e equitativa”. Reivindicaron tamén a necesidade dun traballo digno, a accesibilidade universal física e cognitiva, e unha sociedade que respecte dereitos fundamentais como o da non discriminación, a ter familia, saúde con atención especializada, identidade propia, liberdade de expresión, privacidade, vivenda digna e unha vida independente. “Queremos que se escoite a nosa voz e que se respecten os nosos dereitos. Reivindicamos todo isto porque desexamos vivir nunha sociedade na que a diversidade sexa sinónimo de oportunidades para todos e todas”, proclamaron.

A xornada rematou con música, coa actuación do grupo de folk de Aceesca, que puxo o peche a unha mañá de convivencia e sensibilización colectiva. Desde a organización agradeceron o apoio nesta loita compartida.

 

 

 

03/12/2025 in Cultura e festas, Política Social