Novas

O Porriño Peque Fest, a gran antesala infantil á cabalgata de Reis

O Porriño, 29 de decembro de 2025.- O Concello do Porriño quenta motores para a chegada das Súas Maxestades os Reis Magos cunha das citas máis agardadas polo público infantil e familiar: O Porriño Peque Fest, a gran festa do Nadal pensada para as nenas e nenos, que se celebrará os días 2, 3 e 4 de xaneiro na pista 2 do Pavillón Municipal dos Deportes.

Durante tres xornadas consecutivas, en horario continuado de 11:30 a 19:00 horas, o pavillón municipal converterase nun gran espazo de lecer infantil que servirá como antesala perfecta á Cabalgata de Reis, permitindo que a cativada goce e viva con intensidade os días previos á noite máis máxica do ano. Inchables, animación, obradoiros, xogos e diversas sorpresas conformarán unha programación pensada para o desfrute das familias, nun ambiente seguro, participativo e cheo de ilusión. A entrada será libre e gratuíta ata completar aforo.

O alcalde do Porriño, Alejandro Lorenzo, destacou que “O Porriño Peque Fest é unha cita clave dentro da programación de Nadal, pensada especialmente para manter viva a ilusión das nenas e nenos nos días previos á chegada dos Reis Magos”. Así mesmo, subliñou que “este tipo de actividades reforzan a convivencia familiar, dinamizan os espazos públicos e contribúen a facer do Porriño unha vila viva tamén durante as festas”.

O Peque Fest enmárcase dentro da programación de Nadal impulsada polo Concello que o 5 de xaneiro  acada un dos momentos máis agardados coa tradicional Cabalgata de Reis Magos, precedida polas visitas das Súas Maxestades ás parroquias, centros educativos e centros de día do municipio. A Cabalgata encherá as rúas de música, cor e ilusión, coa participación de colectivos locais e cun protagonismo especial para o público infantil.

Desde o Concello do Porriño anímase á veciñanza a participar nas actividades programadas e a compartir estes días de Nadal en familia, facendo do municipio un espazo de encontro, ilusión e convivencia.

29/12/2025 in Cultura e festas

Papá Noel toma as rúas do Porriño cunha invasión moteira esta fin de semana

O Porriño, 27 de decembro de 2025.- O Concello do Porriño acollerá este domingo, 28 de decembro, unha nova cita dentro da programación de Nadal coa celebración do Roteiro Moteiro, unha actividade que contará coa participación da Vulcan Riders Association Galicia e que encherá as rúas da vila de motor, ambiente festivo e espírito de Nadal.                                     

A actividade desenvolverase a partir das 11.00 horas, cun percorrido de motos polas rúas do Porriño, converténdose nunha das últimas concentracións sobre dúas rodas do ano. O evento celebrarase xusto unha hora antes do inicio da Carreira de Nadal do Concello do Porriño, completando así unha mañá chea de actividade deportiva, social e lúdica no centro da vila.

O Roteiro Moteiro contará coa participación de moteiros e moteiras que, nun ambiente lúdico e familiar, caracterizaranse como Papá Noel e con motivos propios destas datas, decorando tamén as súas motos para achegar aínda máis cor e ilusión ao percorrido urbano pola vila. Ao remate da ruta, as persoas participantes compartirán un momento de convivencia arredor dun chocolate quente, poñendo o broche final a esta cita festiva.

O alcalde do Porriño, Alejandro Lorenzo, destacou que “este tipo de iniciativas reflicten o espírito participativo e acolledor do Porriño, convertendo as nosas rúas en espazos de encontro durante o Nadal, combinando deporte, lecer e convivencia”. Así mesmo, subliñou que “eventos como o Roteiro Moteiro e a Carreira de Nadal contribúen a dinamizar a vila e a reforzar o sentimento de comunidade”.

Desde o Concello do Porriño destácase o valor deste tipo de propostas, que fomentan a colaboración con colectivos locais e a dinamización social e comercial da vila durante as festas do Nadal.

27/12/2025 in Cultura e festas

O Porriño covértese na capital galega do Pre-fin de ano

  • A xornada contará coa actuación da Orquestra París de Noia, as rondallas, actividades infantís, sesións DJ, uvas, cotillón e chocolate quente gratis 

O Porriño, 22 de decembro de 2025. – O Porriño despedirá o ano 2025 de maneira anticipada cunha gran xornada festiva dirixida a toda a veciñanza, que se celebrará o vindeiro 30 de decembro. Trátase dunha cita xa consolidada no calendario cultural e de lecer do municipio, organizada polo Concello e pensada para todos os públicos.

A programación arrancará pola mañá, ás 11:00 horas, cunha festa infantil na carpa do Parque do Cristo, onde a cativada será a gran protagonista. Os nenos e nenas poderán celebrar o seu propio Pre-fin de Ano co grupo de música infantil Mamá Cabra con xogos, animación e un pasarrúas protagonizado por personaxes infantís, creando un ambiente festivo e familiar desde primeiras horas do día.

Xa pola tarde, a partir das 19:00 horas, terá lugar o pasarrúas das tres rondallas —a Rondalla de Santa María do Porriño, a Rondalla da Asociación Recreativa Santa Eulalia de Atios e a Rondalla Cultural Musical de Pontellas—, que percorrerán as rúas do centro da vila, enchendo O Porriño de música tradicional e espírito festivo.

A celebración central dará comezo ás 21:30 horas, cunha gran festa de Pre-fin de Ano que incluirá actuacións musicais, repartición de uvas, cotillón e chocolate quente de balde para todas as persoas asistentes.

A noite continuará coas doce badaladas que volverán soar a medianoite, cunha sesión DJ a cargo de Dumore e Groove Amigos e coa actuación da Orquestra París de Noia, completando unha proposta musical pensada para todos os gustos. O escenario principal da xornada festiva será a rúa Domingo Bueno.

“Dende o Concello convidamos á veciñanza, e tamén a todas as persoas que se acheguen dende fóra, a participar nesta celebración colectiva coa que festexamos, de maneira anticipada, o remate do ano 2025 e a benvida ao novo ano. É unha cita que xa se converteu nunha tradición no Porriño”, sinala o alcalde, Alejandro Lorenzo, quen asegura ademais que este evento continuará formando parte do calendario festivo e cultural do municipio.

22/12/2025 in Cultura e festas

O Concello do Porriño pon en marcha autocares gratuítos para visitar as luces do Nadal os días 23 e 29 de decembro

O Porriño, 22 de decembro de 2025. – O Concello do Porriño volverá poñer en marcha neste Nadal o servizo de autocares gratuítos para facilitar á veciñanza o acceso á iluminación e á decoración de Nadal da vila, repetindo unha iniciativa que contou cunha excelente acollida o pasado ano.

O servizo estará operativo os días 23 e 29 de decembro, permitindo que persoas de distintos puntos do municipio poidan desprazarse comodamente ata o centro do Porriño para gozar das luces de Nadal, do ambiente festivo e das actividades programadas durante estas datas.

Esta acción ten como obxectivo achegar as parroquias ao centro urbano, evitando desprazamentos en vehículo privado, mellorando a seguridade viaria e favorecendo a participación, especialmente das persoas maiores de 65 anos, cunha proposta accesible, cómoda e segura.

O servizo organizarase en dúas liñas diferenciadas.

A Liña 1, con saída desde Chenlo, realizará o percorrido Chenlo – Mosende – Pontellas – Torneiros – Carracido, con saída ás 17:00 horas e regreso ás 20:00 horas. Os puntos de recollida serán: Igrexa de San Xoán de Chenlo e Canadelo; Igrexa de San Xurxo de Mosende; Centro Cultural de Pontellas e parada de autobús de Arrotea; Igrexa de San Salvador de Torneiros, Froiz Torneiros e Campo de Fútbol Lourambal; e a A.V.C. As Mimosas de Carracido.

A Liña 2, con saída desde Budiño, percorrerá Budiño – Atios – Cans, con saída ás 18:00 horas e regreso ás 21:00 horas. En Budiño, as paradas serán Orbenlle (Café Chimay), parada de autobús de Cerquido, Capela de San Blas, Centro Recreativo Cultural Mosteiro, farmacia, Centro Cultural Cruz e parada de Vaquería; en Atios, Centro Cultural de Atios, Igrexa de Santa Eulalia, parada de Vilafría, Outeiro, Covelo e Casa Cultural de Chenlo; e en Cans, Bar Fortes.

Os autocares terán como destino o centro da vila, onde a veciñanza poderá pasear polas rúas decoradas, contemplar a iluminación de Nadal e desfrutar do ambiente propio destas datas.

O alcalde do Porriño, Alejandro Lorenzo, sinala que “con este servizo queremos que todo o mundo poida vivir o Nadal do Porriño, independentemente de onde viva. É unha iniciativa pensada para facilitar os desprazamentos, compartir momentos en familia e seguir facendo do Nadal unha celebración próxima, inclusiva e para todos”.

Desde o Concello destacan que esta iniciativa se enmarca na aposta por un Nadal inclusivo, sostible e pensado para todos, ao tempo que contribúe á dinamización social e comercial do municipio durante o período festivo.

22/12/2025 in Cultura e festas, Sen categoría, Turismo

O Concello do Porriño dispón de máis de 328.000 euros en axudas para a rehabilitación de vivendas en Torneiros

 

• A convocatoria permanece aberta ata o 31 de xaneiro de 2026 e está dirixida a comunidades e veciñanza que queiran mellorar a eficiencia enerxética das súas vivendas
• O importe total das axudas ascende a preto de 1 millón de euros

O Porriño, 20 de decembro de 2025.– O Concello do Porriño informa de que continúa aberta a convocatoria de axudas para a rehabilitación residencial na contorna residencial de rehabilitación programada (ERRP) de Torneiros, financiada a través do Plan de Recuperación, Transformación e Resiliencia, e que aínda quedan dispoñibles 328.164,97 euros na bolsa de subvencións para novas solicitudes.

Ata o de agora, dos 872.425,00 euros destinados á rehabilitación de vivendas, foron adxudicados 544.260,03 euros, correspondentes a tres actuacións, o que supón un 62,38 % dos fondos totais desta liña de axudas. Un cuarto decreto de adxudicación, non foi aceptado pola comunidade beneficiaria, polo que ese importe engrosa a bolsa e ponse a disposicións de futuras concesións.

Ademais das axudas á rehabilitación de edificios residenciais, o Concello do Porriño prevé investir arredor de 102.000 euros na mellora e urbanización da contorna, reforzando así unha intervención integral en Torneiros orientada á súa humanización e revitalización que se complementará con outros proxectos futuros de mellora anunciados xa nas últimas semanas, e que se enmarcan no Plan Extra de Deputación e no PAI beneficiario de fondos europeos.

O alcalde do Porriño, Alejandro Lorenzo, salientou que “aínda hai unha cantidade moi importante de fondos dispoñibles e queremos que cheguen directamente á veciñanza. Esta convocatoria é unha oportunidade real para mellorar as vivendas, reducir o consumo enerxético e revalorizar os edificios”.
O rexedor engadiu que “o Concello está a acompañar a todas as comunidades durante todo o proceso, que foron notificadas, ofrecendo o asesoramento técnico e xurídico que precisen para facilitar a tramitación das solicitudes e garantir que ninguén quede fóra por falta de información”.

O prazo para solicitar estas axudas permanece aberto ata o 31 de xaneiro de 2026, polo que desde o Concello anímase ás comunidades de veciños de Torneiros a informarse e presentar solicitudes. Para iso, están á súa disposición os servizos técnicos e xurídicos municipais e a Oficina Municipal de Vivenda, que ofrecen atención personalizada durante todo o proceso.

“O noso obxectivo é claro: aproveitar o 100 % dos fondos dispoñibles e seguir transformando Torneiros nun zona máis eficiente, accesible e con maior calidade de vida”, concluíu Alejandro Lorenzo.

20/12/2025 in Urbanismo, comercio e industria

O Concello do Porriño promove o comercio local cun sorteo de catro cestas de Reis

  • Na campaña repartiranse 4.000 papeletas e o sorteo celebrarase o 2 de xaneiro ás 18:00 horas na Praza Arquitecto Antonio Palacios

O Porriño, 19 de decembro de 2025. – O Concello do Porriño pon en marcha unha nova iniciativa de Nadal baixo o lema “Mercar no Porriño ten premio”, coa que se sortearán catro cestas de Reis entre as persoas que realicen as súas compras no comercio local durante estas datas.

Este ano a campaña contará con 4.000 papeletas, que serán distribuídas entre os establecementos participantes. Os comercios interesados en entregar papeletas á súa clientela deberán recollelas previamente no Concello do Porriño.

O sorteo terá lugar o 2 de xaneiro de 2026, ás 18:00 horas, na Praza Arquitecto Antonio Palacios. As papeletas poderán depositarse no Concello do Porriño, na Praza de Abastos ou no propio establecemento no que se realizase a compra, facilitando así a participación da veciñanza.

O alcalde do Porriño, Alejandro Lorenzo, destaca a importancia desta iniciativa para o comercio local, sinalando que “o comercio de proximidade é un piar fundamental da vida económica e social do Porriño. Con campañas coma esta queremos recoñecer o seu papel, apoiar o seu traballo diario e animar á veciñanza a mercar na vila, especialmente nestas datas tan sinaladas”.

Esta acción forma parte da programación de Nadal do Concello do Porriño e enmárcase nas políticas municipais de apoio ao comercio de proximidade, co obxectivo de dinamizar a actividade económica local, fomentar o consumo responsable e reforzar o tecido comercial da vila durante unhas datas especialmente significativas.

19/12/2025 in Cultura e festas, Urbanismo, comercio e industria

O Concello do Porriño organiza un obradoiro infantil de elaboración de galletas de Nadal

 

O Porriño, 18 de decembro de 2025. – O Concello do Porriño organiza un obradoiro infantil de elaboración e decoración de galletas de Nadal, unha actividade dirixida á infancia que se desenvolverá durante varios días das festas co obxectivo de fomentar a creatividade, a participación e o achegamento ás tradicións propias destas datas.

O obradoiro amplíase cunha nova sesión o 2 de xaneiro, que se engade ás datas xa programadas dos días 23, 29 e 30 de decembro de 2025 e 5 de xaneiro de 2026. Todas as sesións desenvolveranse en horario de 11:00 a 12:00 horas, na zona infantil da Praza de Abastos Municipal.

A actividade está dirixida a nenos e nenas de entre 5 e 12 anos e contará con 12 prazas por quenda, co fin de garantir unha atención adecuada e un correcto desenvolvemento do obradoiro.

Esta iniciativa forma parte da programación de Nadal do Concello do Porriño, que inclúe propostas pensadas para o público infantil e familiar, apostando por actividades que combinan lecer, aprendizaxe e tradición, ao tempo que contribúen á dinamización dos espazos públicos do municipio durante estas datas.

INSCRICIÓN PARA O OBRADOIRO INFANTIL DE GALLETAS

As persoas interesadas en participar deberán formalizar a inscrición a través do documento que se achega a esta nota. Unha vez cuberto, debe enviarse á dirección de correo electrónico cultura@oporrino.org . As prazas asignaranse segundo a orde de recepción das solicitudes ata completar o número máximo de participantes.

18/12/2025 in Cultura e festas

O Tren do Nadal do Porriño arranca este mércores cargado de ilusión e escolares

 

  • O servizo especial de tren turístico comeza a súa ruta con alumnado de centros educativos do municipio para descubrir a iluminación e decoración do Nadal na vila
  • O tren estará operativo para o público xeral a partir do vindeiro sábado día 20 de decembro

O Porriño, 17 de decembro de 2025.- O Concello do Porriño pon en marcha este mércores 17 de decembro o Tren do Nadal, unha actividade especial pensada para que o alumnado de distintos centros educativos do municipio poida desfrutar dunha saída cultural e festiva para coñecer de primeira man a decoración e iluminación das rúas nesta época do ano.

Ao longo das tardes dos días 17, 18 e 19 de decembro, un total de medio centro de persoas por centro educativo (incluíndo alumnado e persoal acompañante) realizarán o percorrido en tren. A actividade ten como protagonistas aos nenos e nenas dos colexios de Ribeira, Cruz Budiño, Antonio Palacios, Fernández López e tamén os usuarios de Aceesca, que vivirán unha experiencia educativa e lúdica ao tempo que descobren a maxia do Nadal no seu propio concello.

O alcalde Alejandro Lorenzo destaca que “con esta iniciativa queremos achegar o espírito do Nadal aos nosos escolares e ás súas familias, fomentando a participación e o sentido de comunidade, ao tempo que promovemos actividades accesibles para todos”. O rexedor engade que “ver aos máis pequenos desfrutar das luces e da ambientación festiva pola vila é sempre un motivo de satisfacción para o Concello, que traballa para facer destas datas unhas festas cheas de emoción e participación”.

Ademais destas viaxes escolares, a partir do sábado 20 de decembro o Tren do Nadal estará aberto a toda a veciñanza e visitantes, formando parte da completa programación cultural e festiva de Nadal que o Concello ten prevista para estas datas e que se pode consultar na páxina web ecultura.net.

O servizo ao público xeral ofrecerá ruta polas rúas da vila do 20 ao 23 e do 26 ao 29 de decembro en horario de 11.00 a 13.00 horas e de 16.30 a 21.00 horas. Xa en xaneiro, o tren funcionará os días 2, 3 e 4 no mesmo horario de mañá e de tarde, con parada neste caso no polideportivo municipal onde se celebrará ao longo destas tres xornadas O Porriño Peque Fest. O 24 e o 30 de decembro, e o 5 de xaneiro o tren circulará en horario de mañá de 11.00 a 13.00 horas, ademais formará parte tamén da Cabalgata de Reis.

17/12/2025 in Cultura e festas

O Concello do Porriño saca a licitación a mellora do pavimento de camiños en Devesa, Filgueiras e Portela de Souto por máis de 132.000 euros

 

  • A actuación permitirá mellorar a seguridade viaria e a mobilidade en tres viarios municipais situados en Budiño, O Porriño e Atios

O Porriño, 16 de decembro de 2025.- O Concello do Porriño vén de sacar a licitación o proxecto de mellora do pavimento en tres camiños de titularidade municipal, situados nos lugares de Devesa, Filgueiras e Portela de Souto, cun orzamento base de licitación de 132.979,42 euros (IVE incluído).

A actuación, financiada pola Deputación de Pontevedra a través do Plan + Provincia, ten como obxectivo mellorar o estado actual destes viarios, incrementar a seguridade viaria e facilitar a mobilidade da veciñanza, xa que os camiños presentan diversos signos de deterioro, como fisuras, baches e unha degradación xeral da capa de rodadura.

O alcalde do Porriño, Alejandro Lorenzo, destaca que “esta licitación é unha mostra máis do compromiso do goberno municipal coa mellora das infraestruturas básicas, especialmente nos núcleos rurais, onde os camiños municipais son fundamentais para o día a día da veciñanza”. O rexedor subliña tamén que “seguimos investindo en obras útiles, pensadas para mellorar a seguridade viaria e a calidade de vida dos porriñeses e porriñesas”.

O proxecto contempla, entre outras actuacións, o desbroce e limpeza de marxes e cunetas, o fresado puntual do firme existente, a reposición da zahorra artificial nos puntos necesarios, así como o reforzo do pavimento mediante a execución dunha nova capa de mestura bituminosa en quente de cinco centímetros de espesor.

Ademais, procederase ao recrecido de arquetas e tapas de rexistro, á reposicion dun colector de drenaxe transversal no camiño de Filgueiras e á execución de nova sinalización horizontal e vertical, co fin de mellorar a seguridade e a ordenación do tráfico.

Pola súa banda, o concelleiro de Vías e Obras, Ramón Porto, sinalou que “se trata dunha actuación moi necesaria, que dá resposta ao mal estado do pavimento nalgúns tramos e que permitirá contar con camiños máis seguros e duradeiros”, engadindo que “as obras están deseñadas para minimizar as molestias á veciñanza e garantir unha execución áxil e eficiente”.

As obras desenvolveranse en camiños situados nas parroquias de San Salvador de Budiño, O Porriño e Atios. O prazo previsto de execución dos traballos será de seis semanas, unha vez adxudicadas as obras, establecéndose durante ese período as medidas necesarias de sinalización e regulación do tráfico.

Con esta licitación, o Concello do Porriño reafirma o seu compromiso coa mellora das infraestruturas municipais, especialmente nos núcleos rurais, apostando por actuacións que contribúen á seguridade viaria e á calidade de vida da cidadanía.

16/12/2025 in Parroquias, Vías e obras

O Porriño aposta pola enerxía limpa cunha inversión de máis de 113.000 euros nun proxecto innovador de autoconsumo colectivo

 

  • O Concello adhírese ao programa “Concellos + Renovables”, impulsado pola Deputación de Pontevedra e financiado con fondos Next Generation
  • A iniciativa permitirá instalar unha planta fotovoltaica con almacenamento no pavillón municipal e reducir custos enerxéticos e emisións de CO₂

O Porriño, 15 de decembro de 2025.- O Concello do Porriño vén de adherirse ao proxecto PR-RENOINN Concellos + Renovables I, unha iniciativa innovadora promovida pola Deputación de Pontevedra e presentada ante o Instituto para a Diversificación e Aforro da Enerxía (IDAE), co obxectivo de impulsar o autoconsumo colectivo con sistemas de almacenamento e garantir a participación de consumidores vulnerables.

O proxecto permitirá avanzar cara a un modelo enerxético máis sostible, eficiente e tamén inclusivo, reducindo o consumo eléctrico, os custos asociados e as emisións de CO₂, ao tempo que se combate a fenda enerxética.

O alcalde do Porriño, Alejandro Lorenzo, sinalou que “este proxecto supón un paso firme na aposta do Concello polas enerxías renovables e pola sustentabilidade. O rexedor destacou ademais que “o autoconsumo colectivo permítenos optimizar os recursos públicos e avanzar cara a un Concello máis eficiente e responsable co medio ambiente”.

O custo total das actuacións previstas ascende a 113.654,09 euros, dos cales 64.440,50 euros serán financiados a través dunha subvención do IDAE con cargo aos fondos Next Generation EU; a Deputación de Pontevedra achegará 24.975 euros, mentres que o Concello do Porriño asumirá os 24.238,59 euros restantes con fondos propios.

Deputación e Concello xa asinaron o convenio para levar a cabo os traballos de instalación e posta en funcionamento dunha instalación fotovoltaica de autoconsumo colectivo no pavillón municipal de capacidade máxima de 99,99 kWp, composta por 185 paneis solares de 540 W, así como dun sistema de almacenamento de enerxía de 50 kWh mediante baterías de litio. A instalación contará tamén cun sistema software de monitorización, que permitirá controlar en tempo real a produción e o consumo enerxético.

O proxecto inclúe ademais a participación obrigatoria de consumidores vulnerables, que representarán polo menos o 10 % da enerxía producida, garantindo así un acceso máis xusto e sostible á enerxía renovable e contribuíndo a reducir a fenda enerxética no municipio.

Con esta iniciativa, o Concello do Porriño reafirma o seu compromiso coa transición enerxética, a innovación e a sustentabilidade, avanzando cara a un modelo de desenvolvemento máis respectuoso co medio ambiente e socialmente responsable.

 

15/12/2025 in Infraestruturas, Medio Ambiente