Novas

O Concello do Porriño asina un convenio urbanístico que permitirá un novo local municipal de Servizos Sociais na Avenida de Galicia

  • O acordo desbloquea unha promoción de vivendas en alugueiro e permite ao Concello incorporar en propiedade un baixo municipal valorado en preto de 400.000 euros, destinado a Servizos Sociais, ao Centro de Información á Muller (CIM) e a novos servizos de atención ás familias

O Porriño, 17 de xaneiro de 2026.- O Concello do Porriño vén de asinar un convenio urbanístico que permitirá avanzar na construción dunha nova promoción de vivendas en réxime de alugueiro na contorna da rúa Antonio Palacios – Avenida de Galicia e, ao mesmo tempo, incorporar ao patrimonio municipal un novo local destinado a Servizos Sociais, en plena propiedade e cun elevado valor social e económico.

A actuación desenvólvese sobre unha parcela adquirida pola entidade promotora a unha entidade bancaria, na que existían varias pequenas parcelas de titularidade municipal, cunha superficie aproximada duns 400 metros cadrados, segundo os informes técnicos municipais. Tras a revisión da situación xurídica e logo do correspondente informe do secretario municipal, alcanzouse un acordo de permuta que permitiu desbloquear a actuación urbanística.

O alcalde do Porriño, Alejandro Lorenzo, explicou que “a través desta construción de vivendas en réxime de alugueiro, o Concello vén de asinar un convenio coa entidade promotora para permitir o uso duns terreos municipais que estaban integrados na parcela. Aínda que a valoración destes terreos non é moi elevada, a contraprestación que recibe o Concello é moi importante”.

Como resultado do convenio, o Concello recibirá un baixo de nova construción, completamente equipado e acondicionado para uso público, que se destinará a Servizos Sociais. “Falamos dun local amplo, moderno e en condicións óptimas, cunha valoración técnica próxima aos 400.000 euros, o que supón unha mellora moi relevante para o patrimonio municipal e para a atención á cidadanía”, sinalou o rexedor.

Alejandro Lorenzo destacou tamén que “os Servizos Sociais municipais contan hoxe con instalacións moi compartimentadas e con espazos que era necesario mellorar. Este novo local permitiranos dispoñer dunhas dependencias axeitadas, non só para Servizos Sociais, senón tamén para o Centro de Información á Muller (CIM) e para a posta en marcha de novos servizos. Para nós é unha prioridade dotar cunhas oficinas axeitadas a Servizos Sociais e, especialmente, reforzar a atención á cidadanía e ás mulleres a través do CIM. Este novo espazo nace coa vontade de converterse nun punto de encontro para aquelas familias que atravesan algunha situación de necesidade e que requiren o apoio dos servizos municipais. En definitiva, trátase dunha actuación prioritaria para mellorar a atención e o acompañamento ás persoas.”

Neste senso, o alcalde engadiu que “o obxectivo é crear un espazo no que as unidades familiares poidan ser atendidas en condicións dignas, con zonas de espera e descanso, mellorando a atención presencial e a coordinación entre os distintos servizos municipais”.

O convenio permite compatibilizar a promoción de vivenda en alugueiro —unha actuación subvencionada pola Xunta de Galicia— cunha achega municipal que se traduce nun equipamento público estratéxico, reforzando o interese xeral e a mellora dos servizos públicos no Porriño.

17/01/2026 in Benestar, Servizos sociais

A conselleira de Medio Ambiente visita O Porriño no marco das axudas ás traídas veciñais

  • Dúas comunidades de augas do municipio, Atios e San Xurxo de Mosende, reciben 30.000 euros para mellorar as súas infraestruturas de abastecemento

O Porriño, 16 de xaneiro de 2026.- O alcalde do Porriño, Alejandro Lorenzo, acompañou esta mañá á conselleira de Medio Ambiente e Cambio Climático, Ángeles Vázquez, nunha visita institucional ao municipio no marco das axudas autonómicas destinadas ás comunidades de augas veciñais, na que tamén estiveron presentes a delegada territorial da Xunta de Galicia en Vigo, Ana Ortiz, e o concelleiro de Xestión de Comunidades de Augas e Montes, Marcos Martínez.

A visita desenvolveuse na Comunidade de Usuarios de Atios, unha das traídas do Porriño beneficiarias destas subvencións, onde representantes da Xunta, do Concello e das comunidades de usuarios coñeceron sobre o terreo as actuacións realizadas e previstas, orientadas á mellora das infraestruturas de abastecemento e á optimización do servizo.

Estas actuacións forman parte das liñas de axuda impulsadas pola Xunta de Galicia, a través de Augas de Galicia, dirixidas a apoiar ás comunidades de usuarios na execución de melloras en captación, bombeo, almacenamento, control e eficiencia enerxética das traídas veciñais.

Durante o encontro, a conselleira explicou aos representantes das comunidades o alcance destas axudas e o destino dos fondos concedidos, destacando a importancia de seguir avanzando na mellora da xestión do ciclo da auga, especialmente no ámbito rural.

O alcalde Alejandro Lorenzo sinalou que “este tipo de investimentos permiten ás comunidades de augas acometer actuacións necesarias para manter e modernizar unhas infraestruturas que prestan un servizo básico á veciñanza do Porriño”. Ademais, destacou “a importancia da coordinación entre a Xunta de Galicia, a Deputación de Pontevedra e o Concello, que hoxe en día xa se está a cumprir, reforzando o apoio ás comunidades de augas, que desempeñan unha labor esencial na xestión dun recurso básico”. Neste senso, o rexedor subliñou que “as tres administracións estamos levando a cabo axudas anuais co obxectivo de garantir o bo funcionamento e a mellora continua destas infraestruturas”.

Pola súa banda, a conselleira Ángeles Vázquez quixo destacar que ao longo deste primeiro semestre a Xunta porá en marcha novas liñas de axudas nesta materia por un importe de 9,3 millóns de euros, subliñando que “vivimos nun paraíso, pero que ese paraíso ten que traducirse tamén nunha calidade excelente das nosas augas”. Neste senso, puxo en valor o traballo da Comunidade de Usuarios de Atios polo bo aproveitamento destas axudas, que permiten mellorar o control sanitario da auga, avanzar no aforro enerxético mediante paneis solares e apostar pola dixitalización dos sistemas, facilitando a detección inmediata de incidencias e unha xestión máis eficiente do abastecemento.

Comunidades de augas do Porriño beneficiarias das axudas

A Comunidade de Usuarios de Atios recibiu unha axuda de 15.000 euros destinada á mellora das súas instalacións mediante a instalación de sistemas de protección no equipo de bombeo e no telecontrol, a incorporación dun panel solar e dunha válvula de control de enchido, a instalación de contadores no depósito de bombeo e a execución do conexionado eléctrico entre o cadro de control e o depósito, co obxectivo de mellorar a eficiencia e a seguridade do sistema de abastecemento.

Pola súa banda, a Comunidade de Augas San Xurxo de Mosende – Porriño contou tamén cunha axuda de 15.000 euros que permitirá realizar actuacións de impermeabilización no depósito da ETAP do Casal, mellorar a seguridade das instalacións coa colocación dunha porta de aceiro, e instalar contadores de entrada tanto no depósito da ETAP do Casal como no depósito da ETAP Circular de Fox, co fin de optimizar o control do consumo e a xestión do abastecemento.

Desde o Concello do Porriño reafírmase o compromiso de seguir colaborando coas comunidades de augas veciñais e co resto das administracións para mellorar a calidade e a eficiencia dos servizos de abastecemento, especialmente no rural, apostando por infraestruturas máis seguras, sostibles e adaptadas ás necesidades da veciñanza.

16/01/2026 in Medio Ambiente, Parroquias

A Conselleira de Política Social visita a nova Escola Infantil de Pontellas, xa rematada

  • O proxecto conta cun financiamento conxunto que se achega aos 800.000 € da Xunta de Galicia e do Concello do Porriño

O Porriño, 15 de xaneiro de 2026.- O alcalde do Porriño, Alejandro Lorenzo, acompañou hoxe á conselleira de Política Social da Xunta de Galicia, Fabiola García Martínez, nunha visita institucional ás instalacións da nova Escola Infantil municipal de Pontellas, cuxas obras xa se atopan rematadas e que abrirá as súas portas no vindeiro curso escolar, unha vez se completen os traballos de equipamento e amoblamento.

Durante a visita, o alcalde destacou que “este novo centro é unha mostra do compromiso do Concello do Porriño coa educación infantil, coa conciliación da vida familiar e laboral e coa prestación de servizos públicos de calidade”, subliñando tamén a importancia da colaboración entre administracións para facer realidade proxectos estratéxicos para o municipio.

Nas súas declaracións, Lorenzo puxo tamén en valor que “tanto as características, como o funcionamento e os custos desta escola infantil serán exactamente os mesmos que os dunha Galiña Azul”, aclarando ademais que “a atención educativa será totalmente gratuíta, acollida ao Plan de Gratuidade da Xunta de Galicia do ano 2022”.

O rexedor salientou ademais o contexto demográfico actual do concello, sinalando que “O Porriño está a vivir un crecemento de poboación e unha suba da natalidade como nunca antes, o que fai imprescindible seguir ampliando e reforzando a rede de servizos públicos, especialmente no ámbito educativo”. Neste sentido, destacou tamén “a enorme relevancia que ten este tipo de infraestruturas para o rural, xa que permiten fixar poboación nas parroquias e garantir servizos de proximidade ás familias, vivan onde vivan”.

Con este novo centro crearanse 66 novas prazas públicas de Educación Infantil de 0 a 3 anos, reforzando a rede municipal e dando resposta á crecente demanda das familias. A preinscrición para acceder a estas prazas abrirá a partir de mediados do mes de febreiro.

En canto ao investimento económico, a achega do Concello do Porriño ascende a preto de 385.000 euros, distribuídos en 25.000 € para equipamento e case 360.000 € para obras. Esta achega complétase co financiamento da Consellería de Política Social da Xunta de Galicia que supón máis de 408.000 euros, permitindo un investimento total de 788.367,755 €.

O rexedor engadiu que “proxectos como esta nova escola infantil é posibles gracias á colaboración entre o Concello do Porriño e a Xunta de Galicia. Esta cooperación institucional é fundamental para facer realidade iniciativas que responden ás necesidades das familias e fortalecen os servizos públicos no noso municipio”.

A escola ten prevista a súa apertura entre os meses de setembro e outubro, coincidindo co inicio do vindeiro curso escolar, unha vez se complete a dotación de mobiliario e equipamento.

Pola súa banda, a conselleira de Política Social, Fabiola García Martínez, quixo agradecer expresamente “ao alcalde e ao equipo de goberno do Concello do Porriño polo seu compromiso coa educación infantil e pola aposta decidida pola creación de novos servizos públicos”, destacando que esta nova escola infantil “vai dar servizo a máis de 70 familias, que poderán compatibilizar a súa vida persoal e laboral grazas a un recurso público e de proximidade”.

A conselleira subliñou tamén que este tipo de investimentos son clave para apoiar ás familias, favorecer a conciliación e garantir a igualdade de oportunidades desde as primeiras etapas da vida, poñendo en valor a colaboración institucional para seguir ampliando a rede de escolas infantís públicas en Galicia.

O Concello do Porriño reitera o seu firme compromiso coa educación infantil e coa creación de servizos públicos que respondan ás necesidades das familias. A posta en marcha desta nova escola infantil é unha mostra clara da aposta do Concello por unha educación de proximidade, accesible e de calidade, que contribúa á conciliación da vida laboral e familiar e ao benestar das veciñas e veciños do municipio.

15/01/2026 in Sen categoría

O Concello do Porriño inicia os trámites para convidar ao Papa León XIV no Xacobeo 2027 e valora a dedicación dun espazo público co seu nome

O Porriño, 14 de xaneiro de 2026.- O Concello do Porriño vén de iniciar os trámites institucionais para trasladar formalmente ao Vaticano a invitación para que o Papa León XIV poida visitar O Porriño con motivo do Xacobeo 2027, no marco das relacións históricas e culturais recentemente documentadas entre o Pontífice e o municipio.

Esta iniciativa baséase nunha investigación histórica rigorosa, elaborada polo canónigo e arquiveiro da catedral de Tui, Avelino Bouzón Gallego, que confirma que un antepasado directo do Papa León XIV viviu no século XVII na parroquia de San Salvador de Torneiros. Trátase dunha liñaxe documentada en arquivos parroquiais, da que xa se tiña coñecemento previo e que vén sendo agora recoñecida públicamente.

O alcalde do Porriño, Alejandro Lorenzo, sinala que “falamos dun feito histórico de enorme relevancia para o noso concello, que conecta O Porriño cunha figura central da historia contemporánea a través das nosas raíces”. Segundo explicou, “é unha oportunidade única para poñer en valor a nosa historia e o papel das parroquias porriñesas ao longo dos séculos”.

Á vista desta circunstancia, o Concello considera que o Papa León XIV pode ser recoñecido como fillo ilustre de orixe porriñesa, polo que, ademais da invitación oficial para unha posible visita no contexto do Xacobeo 2027, está a estudarse a dedicación dunha praza ou dunha rúa co seu nome, como recoñecemento institucional e símbolo do vencello histórico entre O Porriño e a figura do Pontífice.

Neste sentido, Alejandro Lorenzo subliñou que “non se trata dun xesto simbólico sen máis, senón dun recoñecemento institucional baseado no rigor histórico e no orgullo pola nosa identidade”, engadindo que “O Porriño é unha terra de emigrantes, e esta historia representa a moitas familias que ao longo dos séculos levaron o nome da nosa vila polo mundo. A historia deixa pegadas e, ás veces, esas pegadas volven ao lugar onde todo comezou”.

Desde o goberno municipal destácase tamén que esta proposta se enmarca na vontade de proxección cultural e institucional do Porriño coincidindo cun acontecemento de alcance internacional como é o Ano Santo Xacobeo 2027, e sempre desde o respecto ás institucións e á historia.

O Concello do Porriño continuará traballando de maneira coordinada con outras administracións, co tecido social e cos medios de comunicación para que esta iniciativa poida avanzar de forma ordenada e consensuada.

14/01/2026 in Alcaldía, Cultura e festas, Vías e obras

Aberto o prazo para solicitar subvencións de ata 10.000 € para asociacións

  • As axudas poden cubrir ata o 100 % do investimento, cun importe mínimo de 6.000 €, e o prazo de solicitude remata o 1 de abril de 2026

O Porriño, 12 de xaneiro de 2025.- O Concello do Porriño informa ás asociacións veciñais e entidades sociais do municipio da apertura do prazo para solicitar as subvencións do Plan Provincia Comunitaria 2026, unha liña de axudas impulsada pola Deputación de Pontevedra destinada a financiar investimentos que contribúan á mellora das infraestruturas, dos equipamentos e dos locais sociais das entidades.

O prazo de presentación de solicitudes xa está aberto e remata o vindeiro 1 de abril de 2026, polo que se recomenda ás asociacións interesadas iniciar canto antes a preparación da documentación necesaria para concorrer á convocatoria.

As subvencións poden cubrir ata o 100 % do investimento presentado, cun importe mínimo de 6.000 euros e un máximo de 10.000 euros por entidade beneficiaria, o que supón unha oportunidade destacada para levar a cabo actuacións sen necesidade de achega económica propia.

A convocatoria está dirixida a asociacións de veciños, federacións, confederacións ou unións de asociacións veciñais, así como a asociacións de mulleres rurais, sempre que estean legalmente constituídas e debidamente inscritas no Rexistro de Asociacións da Comunidade Autónoma de Galicia.

As axudas están destinadas exclusivamente a investimentos, incluíndo actuacións como obras de mellora de locais sociais, a mellora ou creación de infraestruturas, equipamentos e espazos destinados á actividade da entidade, así como a adquisición de mobiliario e equipamento informático, audiovisual ou específico para o desenvolvemento das súas actividades. Tamén son subvencionables determinados gastos vinculados á tramitación da subvención, ás taxas e licenzas necesarias e aos traballos previos de desbroce ou limpeza cando formen parte dunha obra.

As actuacións deberán realizarse integramente na provincia de Pontevedra e será requisito indispensable que a entidade solicitante sexa titular ou conte cun dereito de uso mínimo de cinco anos sobre os inmobles ou terreos nos que se vaian executar os investimentos.

O alcalde do Porriño, Alejandro Lorenzo, destaca a importancia desta convocatoria para o tecido asociativo local e animou ás entidades do municipio a presentar as súas solicitudes. “Estas axudas son unha oportunidade moi importante para que as asociacións poidan mellorar os seus locais, renovar equipamentos e poñer en marcha investimentos que repercuten directamente na calidade de vida da veciñanza. Desde o Concello queremos que todas as entidades coñezan esta convocatoria e a aproveiten”, sinalou o rexedor.

Lorenzo subliñou tamén o papel fundamental que desenvolven as asociacións no ámbito social e comunitario do Porriño a as súas parroquias e barrios, e insistiu na necesidade de difundir amplamente esta liña de subvencións para que chegue ao maior número posible de colectivos.

Cada entidade poderá presentar unha única solicitude, que deberá tramitarse exclusivamente por vía electrónica, achegando o acordo do órgano competente da entidade e o resto da documentación esixida nas bases da convocatoria, incluíndo a memoria ou proxecto técnico cando resulte necesario.

Desde o Concello do Porriño anímase ás asociacións veciñais e entidades sociais do municipio a aproveitar esta oportunidade de financiamento, que contribúe á mellora dos seus espazos e recursos e ao fortalecemento do tecido asociativo local.

A data límite para a presentación de solicitudes é o 1 de abril de 2026.

12/01/2026 in Benestar, Parroquias, Política Social

O Certame de Rondallas do Porriño encheu o pavillón municipal ata completar aforo

 

  • Música, tradición, sorpresas e máis de 2.000 asistentes nun domingo cheo de emoción

O Porriño, 11 de Xaneiro de 2025.- Esta tarde o Concello do Porriño pechou a súa programación de Nadal por todo  alto cunha nova edición do Certame de Rondallas, que encheu por completo o pavillón municipal de deportes. Veciños e visitantes de tódalas idades reuníronse para desfrutar dun espectáculo que combina música, tradición e alegría, consolidando o certame como un dos eventos culturais máis importantes da comarca.

O certame reuniu 17 agrupacións de distintos puntos da provincia, que ofreceron actuacións cheas de variedade e musicalidade. Cada rondalla contou con 12 minutos para presentar o seu repertorio, cumprindo ao detalle o regulamento do evento. 

Entre os aplausos e a emoción do público, actuaron a Rondalla Santa Eulalia (Mos), a Rondalla de Ventosela (Redondela), a Asociación Rondalla O Mosteiro de Pexegueiro (Tui), a Rondalla Airiños da Lagoa de Baíña (Baiona), a Rondalla do CSCR de Beade (Vigo), a Asociación Veciñal, Cultural e Recreativa San Mamede de Zamáns (Vigo), a Rondalla Asociación Centro Veciñal e Cultural de Valladares (Vigo), a Rondalla da SCDR Helios de Bembrive (Vigo), a Rondalla do Centro Cultural A Merced de Chaín (Gondomar), a Rondalla da Asociación de Veciños do Galiñeiro de Vincios (Gondomar), a Asociación Rondalla Club Santiaguiño de Guizán (Mos), a Rondalla da Asociación Cultural, Social e Veciñal de Herville (Mos), a Rondalla da Asociación Centro Recreativo e Cultural de Torroso (Mos) e a Rondalla Santiago de Parada (Nigrán) xunto ás formacións anfitrioas: a Asociación Cultural e Musical Rondalla de Pontellas, a Rondalla Santa María do Porriño e a Rondalla Santa Eulalia de Atios, que pechou o certame.

Durante a entrega de detalles, o alcalde do Porriño, Alejandro Lorenzo, subliñou que “o Certame de Rondallas volveu demostrar unha vez máis o seu éxito, con aforo completo e un público entregado. A tradición das rondallas está máis viva que nunca, gracias ao esforzo das agrupacións e á implicación da veciñanza”.

Entre a música e os aplausos o evento consolidouse como un referente cultural da comarca, pechando máis dun mes de programación de Nadal e deixando unha magnífica impresión entre participantes e asistentes. Un domingo no que a música e a tradición se atoparon para crear un momento inesquecible no Porriño.

11/01/2026 in Cultura e festas

O Porriño inicia a reforma da que será a única sala de cine da comarca

 

  • O espazo ten capacidade para 170 persoas, con equipamento audiovisual en 4K e son envolvente
  • Esta actuación conta cun orzamento que supera os 250.000 euros ao abeiro do Plan +Provincia

O Porriño, 10 de xaneiro de 2026. – O Concello do Porriño iniciou esta semana os traballos de reforma interior do que será o único cine municipal da comarca, e que se atopa no Centro Cultural, un proxecto pioneiro en Galicia que abrirá as súas portas ao longo deste ano. 

A reforma, cun orzamento de 251.739,60 euros financiado pola Deputación de Pontevedra a través do Plan +Provincia, suporá unha transformación integral da planta baixa do edificio, adaptando os espazos de auditorio, escenario e camerinos para acoller unha sala versátil, moderna e tecnolóxicamente avanzada, coa capacidade para 170 butacas.

Segundo o alcalde, Alejandro Lorenzo, “esta nova sala permitirá gozar do cine no Porriño sen ter que desprazarse fóra do municipio, algo moi demandado, especialmente pola veciñanza máis nova. É un proxecto que combina cultura, innovación e dinamismo económico, colocando á nosa vila no mapa cultural de Galicia”.

O proxecto inclúe a redistribución dos espazos, eliminando o escenario elevado e os camerinos traseiros; a mellora acústica e estética das paredes mediante trasdosado con illamento e acabado en madeira; a renovación das butacas para adaptar a sala a diferentes usos, desde proxeccións cinematográficas ata conferencias e charlas; e novas instalacións de iluminación e son, aproveitando a climatización existente.

O equipamento audiovisual xa foi adquirido, cun investimento de preto de 100.000 euros subvencionado pola AGADIC da Xunta de Galicia. “Esta nova sala disporá dun sistema de proxección en 4K Ultra Alta Definición, pantalla profesional de 5×3 metros con sistema de tiro directo, servidor con capacidade de 16TB e un avanzado sistema de son envolvente, que permitirá exhibir estreas de cine e ofrecer unha experiencia cinematográfica de primeiro nivel”, apunta o rexedor. 

A duración estimada das obras é de seis meses, e o proxecto permitirá que a sala se converta nun espazo multifuncional, apto para proxeccións, conferencias e actividades culturais, dinamizando o centro cultural e o tecido económico e social do Porriño.

“É unha gran noticia para a veciñanza e tamén para atraer visitantes doutros municipios. Estamos moi orgullosos de iniciar estas obras, que cumpren un soño histórico da veciñanza e consolidan ao Porriño como un referente cultural na comarca”, conclúe o alcalde Alejandro Lorenzo.

10/01/2026 in Cultura e festas, Vías e obras

O Concello do Porriño informa da apertura dunha nova liña de axudas da Xunta para modernizar o comercio local

  • O prazo de presentación de solicitudes abrirá o 16 de xaneiro de 2026 ás 9:00 horas e terá unha duración dun mes ou ata o esgotamento do crédito dispoñible

O Porriño, 9 de xaneiro de 2026.- O Concello do Porriño informa ao comercio local da publicación no Diario Oficial de Galicia (DOG) da convocatoria 2026 das axudas CO300C, impulsadas pola Xunta de Galicia para o impulso da innovación, a modernización e a sostibilidade do comercio local e da artesanía, cun orzamento global de case 4 millóns de euros.

Esta liña de axudas ten como obxectivo incrementar a competitividade do comercio local, apoiándose na modernización, a innovación, a sustentabilidade e o uso das novas tecnoloxías, así como consolidar o sector comercial como un sector profesional, cualificado, de calidade e fortalecido, que promova o consumo responsable e desenvolva unha actividade económica sostible.

O alcalde de O Porriño, Alejandro Lorenzo, destacou a importancia de difundir a convocatoria para que todos os comerciantes poidan beneficiarse: “É fundamental que todos os comerciantes do Porriño coñezan esta oportunidade. O noso obxectivo é apoiar aos negocios locais para que se modernicen, innoven e se fagan máis sostibles, e para iso necesitamos que se presenten e se beneficien destas axudas. Desde o Concello seguiremos informando e acompañando ao comercio local para que ninguén quede atrás nesta convocatoria.”

As axudas concédense en réxime de concorrencia non competitiva, polo que as solicitudes serán atendidas por orde de entrada ata esgotar o crédito dispoñible, polo que resulta especialmente importante presentar a solicitude no inicio do prazo.

Actuacións subvencionables

A convocatoria contempla tres liñas principais de actuación: 

Modernización comercial, cun investimento máximo subvencionable de ata 20.000 euros, para obras de acondicionamento do local, adquisición de mobiliario e equipamento, mellora da iluminación, climatización, fachada ou rótulos comerciais. 

Dixitalización e innovación, cun investimento máximo subvencionable de ata 18.750 euros, para a implantación ou mellora de páxinas web, comercio electrónico, xestión de redes sociais, software de xestión, sistemas TPV, ciberseguridade e outras solucións dixitais. 

Sostibilidade ambiental, cun investimento máximo subvencionable de ata 2.500 euros, destinada á adquisición de embalaxes máis sostibles, como bolsas de papel ou tea e materiais reciclables, coa eliminación de plásticos.

Prazo e presentación de solicitudes

O prazo de presentación de solicitudes abrirá o 16 de xaneiro de 2026 ás 9:00 horas e terá unha duración dun mes, ou ata o esgotamento do crédito dispoñible. As solicitudes deberán presentarse de forma electrónica a través da sede electrónica da Xunta de Galicia. A información completa da convocatoria pode consultarse no Diario Oficial de Galicia (DOG) a través da seguinte ligazón: https://www.xunta.gal/dog/Publicados/2026/20260108/AnuncioG0767-261225-0001_es.html

Desde o Concello do Porriño anímase ao comercio local a informarse desta convocatoria e preparar con antelación a documentación necesaria, co obxectivo de aproveitar esta oportunidade para seguir mellorando a competitividade, modernización e sustentabilidade dos establecementos comerciais do municipio.

09/01/2026 in Urbanismo, comercio e industria

Rondallas de toda a comarca daranse cita este domingo no Certame de Rondallas do Porriño

  • O pavillón municipal acollerá a participación de 17 agrupacións nun evento que pecha a programación de Nadal e que contará cun pasarrúas previo polo centro urbano 

O Porriño, 8 de xaneiro de 2026.- O Concello do Porriño celebrará este domingo, 11 de xaneiro, unha nova edición do seu emblemático Certame de Rondallas, unha cita xa consolidada no calendario cultural do municipio que supón o broche final á programación de Nadal, desenvolvida durante máis dun mes e pensada para públicos de tódalas idades e gustos.

O pavillón municipal de deportes será o escenario no que 17 agrupacións de distintos puntos da comarca ofrecerán as súas actuacións, nun evento que tradicionalmente completa aforo e que destaca pola alta participación e pola resposta do público.

Tal e como recolle o regulamento do certame, cada rondalla disporá dun máximo de 12 minutos para a súa actuación. O tempo comezará a contabilizarse coa interpretación da primeira peza e rematará cando o último compoñente abandone a pista.

Nesta edición participarán, por orde de actuación, a Rondalla Santa Eulalia (Mos), a Rondalla de Ventosela (Redondela), a Asociación Rondalla O Mosteiro de Pexegueiro (Tui), a Rondalla Airiños da Lagoa de Baíña (Baiona), a Rondalla do CSCR de Beade (Vigo), a Asociación Veciñal, Cultural e Recreativa San Mamede de Zamáns (Vigo), a Rondalla Asociación Centro Veciñal e Cultural de Valladares (Vigo), a Rondalla da SCDR Helios de Bembrive (Vigo), a Rondalla do Centro Cultural A Merced de Chaín (Gondomar), a Rondalla da Asociación de Veciños do Galiñeiro de Vincios (Gondomar), a Asociación Rondalla Club Santiaguiño de Guizán (Mos), a Rondalla da Asociación Cultural, Social e Veciñal de Herville (Mos), a Rondalla da Asociación Centro Recreativo e Cultural de Torroso (Mos) e a Rondalla Santiago de Parada (Mos) xunto ás formacións anfitrioas: a Asociación Cultural e Musical Rondalla de Pontellas, a Rondalla Santa María do Porriño e, pechando o certame, a Rondalla Santa Eulalia de Atios.

O certame dará comezo ás 17:00 horas, aínda que previamente, se a climatoloxía o permite, celebrarase un pasarrúas polas rúas do centro urbano. As agrupacións sairán de maneira simultánea ás 16:15 horas desde o Centro Cívico, San Benito, a praza Central e a avenida de Galicia.

O alcalde do Porriño, Alejandro Lorenzo, sinalou que “o Certame de Rondallas é un evento plenamente consolidado que ano tras ano volve demostrar o seu éxito, cun pavillón municipal que sempre completa aforo e cun público entregado”. O rexedor destacou tamén que “esta cita pon de manifesto que a tradición das rondallas está máis viva ca nunca, gracias ao traballo das agrupacións e á implicación da veciñanza, e supón o broche de ouro a máis dun mes de programación de Nadal pensada para todas as idades”.

A entrada será libre e gratuíta ata completar aforo, coa apertura de portas prevista para as 16:00 horas. Ademais, o evento poderá seguirse en directo a través das redes sociais do Concello do Porriño.

08/01/2026 in Cultura e festas

O Goberno municipal do Porriño reestrutúrase para reforzar servizos esenciais e optimizar a execución dos fondos europeos

 

  • A reorganización inclúe a creación de novas concellerías e a remodelación doutras manténdose as mesmas dedicacións exclusivas e parciais, sen incremento ningún de gasto
  • Servicios sociais, saneamento, parroquias e formación e emprego serán as áreas que experimenten un maior fortalecemento, adaptándose ás novas necesidades da veciñanza e para o cal se incrementarán as respectivas partidas orzamentarias

O Porriño, 7 de xaneiro de 2026.- O alcalde do Porriño, Alejandro Lorenzo, anuncia unha actualización da estrutura do Goberno municipal coa finalidade de reforzar áreas clave e optimizar a capacidade executiva ante a chegada de proxectos estratéxicos financiados con fondos europeos, entre eles o PAI cun investimento global de preto de 11 millóns de euros. O rexedor subliñou que se trata dunha medida “pensada para dar un paso máis, consolidar o traballo destes anos e afrontar con maior capacidade técnica e organizativa os importantes proxectos que están a piques de iniciarse”.

Nesta liña, Lorenzo lembrou que este equipo “leva catro anos traballando de maneira estable e coordinada”, e que agora, aproveitando tamén que se dan determinadas circunstancias persoais nalgúns concelleiros, “é o momento de reforzar a estrutura para que O Porriño aproveite ao máximo os fondos europeos e cada proxecto se execute co nivel de esixencia que merece”. O alcalde insistiu en que “as cousas funcionan, e funcionan ben, pero agora entramos nunha fase que require máis dedicación e especialización debido ao volume de investimento que imos recibir e a infraestruturas que estamos creando, como as novas escolas infantís e o centro de día de Atios, e que se porán en servizo proximamente”.

Un dos principais axustes é a creación da Concellería de Saneamento, Servizos Rurais e Patrimonio Parroquial, que asumirá Marcos Martínez e que se coordinará en parte con outra nova área, a de Promoción da Identidade, Transformación dixital e Goberno Aberto a cargo de Bienvenido Estévez que continuará levando tamén Eventos e Festexos. O alcalde explicou que o obxectivo é dar un impulso adicional a un servizo esencial no rural, onde o Concello mantén obras continuas de ampliación da rede. 

“As nosas parroquias e o saneamento son unha das nosas máximas prioridades. Avanzamos día a día, ás veces de forma lenta pero sempre sen pausa, como sempre digo trátase dun servizo cunha altísima complexidade técnica e cun custo económico moi elevado. Esta nova concellería dálle máis forza a ese traballo e permítenos acelerar a súa execución”, afirmou Lorenzo. Nesta liña, é a destacar a inminente incorporación de sete persoas ao cadro de persoal do Concello como operarios de obras e servizos que, sen dúbida, reforzarán as actuacións neste campo, realizando acometidas pequenas e puntuais que axudarán a completar toda a rede, combinando así grandes e pequenas obras. “Poremos fincapé na mellora de todos os servizos xerais nas nosas parroquias, dende a mellora de viarios, a sinalización identificativa de cada un dos barrios, instalación de redes wifi e a comunicación co centro urbano a través dunha liña de autobús eléctrico”. Estas dúas concellerías complementaranse para preservar o patrimonio parroquial e potenciar todas e cada unha destas zonas rurais.

Outro eixo fundamental desta nova estrutura é a reorganización dos servizos sociais municipais, aos que se destinarán no vindeiro exercicio unha maior inversión, superando os dous millóns de euros ao ter en conta a dúas novas escolas infantís e centro de día de Atios. Estes dividiranse agora en dúas áreas especializadas para ofrecer unha atención máis eficaz e adaptada ás necesidades da veciñanza. A nova Área de Atención á Vulnerabilidade e Programas de Emerxencia, dirixida por Rosario Costas, centrarase na prevención e na resposta ás situacións máis urxentes. Pola súa banda, Bárbara Troncoso quedará á fronte da Área de Atención Cidadá, Asistencia Domiciliaria, Coidados e Benestar, reforzando o Servizo de Axuda no Fogar, os programas de envellecemento activo, a saúde comunitaria e a atención directa. “Con esta reestruturación gañamos eficacia, coordinación e capacidade para chegar mellor ás persoas”, explicou o alcalde.

A área de Emprego e Formación será asumida por Teresa Veloso, quen pasará a ocupar a dedicación exclusiva vacante trala xubilación de Rosario Costas. O obxectivo é fortalecer os programas de inserción laboral, a formación profesional e as novas competencias dixitais, nun momento no que o Porriño se prepara para importantes proxectos ligados ao desenvolvemento económico, no que se acondicionarán novas aulas de formación homologadas e salas de formación dual. 

Así mesmo, o alcalde informou de que, debido á baixa por maternidade da concelleira de Urbanismo, Promoción e Xestión de Vivenda, Medio Ambiente e Mercados, Antía Carrera, estas áreas serán asumidas temporalmente polo concelleiro de Industria, Contratación e Patrimonio, Carlos Martínez, garantindo deste xeito a continuidade e o normal funcionamento de todos os servizos municipais durante este período.

O rexedor destacou que esta reestruturación do equipo de goberno local non supón un maior gasto público, xa que se manteñen as mesmas dedicacións exclusivas e parciais e tódolos concelleiros conservan competencias. “Non é unha reforma por necesidade, senón por responsabilidade. Temos por diante proxectos europeos de enorme envergadura e queremos que se executen coa máxima eficiencia. Este Goberno funciona, e agora reforzámolo para funcionar aínda mellor”, concluíu.

07/01/2026 in Alcaldía, Proxectos Europeos