Novas

O Porriño reforzará a competitividade empresarial con novas actuacións nos Polígonos de As Gándaras e A Granxa

 

O Concello do Porriño ven de solicitar unha subvención á Consellería de Economía e Industria da Xunta de Galicia para levar a cabo dúas actuacións clave de mellora nas infraestruturas dos parques empresariais de A Granxa e As Gándaras. Esta iniciativa, cun orzamento total de preto de 300.000 euros, busca reforzar a competitividade das empresas locais e fomentar a creación de emprego na comarca.

O alcalde do Porriño, Manuel Alejandro Lorenzo Alonso visitou as futuras obras acompañado por David Sobral, Secretario Xeral da Federación Galega de Parques Empresariais, e Indalecio Cuevas, Presidente da Entidade Urbanística de Conservación de A Granxa. Durante a visita, analizáronse posibles melloras nas infraestruturas co obxectivo de optimizar a competitividade dos polígonos e afianzar o seu desenvolvemento futuro.

No marco deste proxecto, o Concello propón dúas intervencións concretas. A primeira, centrada na mellora das infraestruturas do parque empresarial de As Gándaras, contará cun investimento de 149.900 euros. Deste importe, 119.920 euros serán achegados pola Xunta de Galicia, mentres que os 29.980 euros restantes provirán de fondos municipais. As obras, cun prazo de execución estimado de tres meses, inclúen a renovación do firme, a ampliación da calzada, a aplicación de novas capas de rodadura, a execución de cunetas de seguridade e a actualización da sinalización horizontal e vertical. Esta actuación abranguerá unha lonxitude de 780 metros.

A segunda intervención estará centrada na mellora da seguridade viaria no polígono industrial de A Granxa. Con un orzamento de 149.723,28 euros, dos cales 119.794,62 euros procederán das axudas da Xunta e 29.948,66 euros de fondos propios, esta actuación contempla a construción de tres novas glorietas en puntos de maior intensidade de tráfico, co obxectivo de reducir a sinistralidade viaria derivada da ampliación do polígono. Ademais, tamén se levará a cabo a demolición e reposición de beirarrúas, a aplicación de novas capas de rodadura e a renovación da sinalización.

O alcalde subliñou que “a constante mellora da oferta de solo empresarial é esencial para atraer e consolidar empresas na nosa contorna. Estas accións permiten dotar aos nosos parques empresariais de infraestruturas modernas e eficaces, facilitando as condicións idóneas para o desenvolvemento da actividade industrial”.

Por outra banda, o concelleiro de Vías e Obras, Ramón Porto Oya, resaltou que “con estas melloras non só se favorece a implantación de novas empresas, senón que tamén se incrementa a seguridade vial, optimizando a mobilidade dentro dos parques industriais”.

Estas actuacións son parte do compromiso do goberno local coa mellora da competitividade empresarial e a creación dun entorno máis favorable para o investimento. Boa proba disto foi a declaración de O Porriño como membro da Rede de Concellos Emprendedores de Galicia, un recoñecemento que reforza a súa posición como destino estratéxico industrial referente en toda Galicia.

19/03/2025 in Vías e obras

Atletas de renome afrontan un novo récord na O Porriño 10 Km

 

O Porriño volve facer gala do seu lema “O Concello do Deporte” coa organización, xunto co Club Atletismo Porriño, da proba O Porriño 10 Km – OP 10K. Preto de mil persoas tomarán a saída o vindeiro domingo para completar un circuíto homologado pola Real Federación Española de Atletismo polas rúas do centro urbano, cuxa lonxitude variará en función da categoría, dende os 100 metros dos máis pequenos (chupetes e pitufos), aos 1.000 dos benxamíns e alevíns, 2.000 para a categoría infantil e 5.000 para cadete e xuvenil; na categoría absoluta ademais dos 10 quilómetros, ofrécese a posibilidade de facer unha única volta e completar os 5 quilómetros.

“Para os que aínda non se inscribiron, están a tempo de facelo ata esta medianoite a través da páxina web ccnorte.com”, lembra o alcalde Alejandro Lorenzo á vez que anuncia a participación de atletas de renome que fan que esta proba sexa considerada “posiblemente o 10K máis rápido de Galicia”.

En categoría feminina está confirmada a asistencia da internacional francesa Alice Finot, do R.C. Celta Atletismo, campioa de Europa 2024 en 3.000 metros obstáculos e cuarta na mesma proba nas Olimpíadas de París 2024. Finot tentará superar o récord feminino da O Porriño 10 km, 33’18’’ que rexistrou Ester Navarrete o pasado ano, quen compartiu podio con Uxía Pérez do RC Celta Atletismo e Sonia Abad do Taninos Runners, que volverán participar tamén nesta XVI edición. Na categoría masculina tomarán a saída David de la Fuente (CD Pinarium), Pablo Otero (Atletismo Narón) e Carlos Porto (Ximnastica Pontevedra), todos eles en disposición de correr os 10.000 metros por debaixo do récord que marcara no ano 2015 Alejandro Fernández, 29’23’’.

Este ano a saída e a meta trasládase ao Parque Infantil, antigo campo da feira, na mesma avenida Domingo Bueno, uns 300 metros máis adiante, onde ao finalizar a competición terá lugar unha festa na que se procederá a entrega de premios e trofeos. Repartiranse 3.100 euros de premios en metálico, “cos que se busca incentivar a participación e o rendemento deportivo dos atletas, así como recoñecer o esforzo e a dedicación que supón a preparación e competición nunha carreira desta natureza”, sinala o concelleiro de Deportes, Abel Estévez.

Así establécese un premio especial de 500 euros ao primeiro atleta e á primeira atleta que logren bater o récord da proba, será un recoñecemento destacado ao logro deportivo; e outros aos tres primeiros clasificados na carreira de 10 km en cada unha das categorías (masculina e feminina), deste xeito a primeira e o primeiro clasificados recibirán 500 euros, os que rematen en segunda posición 350 euros e os terceiros 200 euros. A maiores haberá trofeos para os tres primeiros (masculino e feminino) de cada categoría e tamén se levará a cabo un sorteo de agasallos coa inscrición, que se entregarán aos afortunados no momento da recollida do dorsal.

17/03/2025 in Deportes

“FLI-PO MARKET”: O primeiro mercado sostible chega a O Porriño

 

A Praza 8 de Marzo, na Avenida de Galicia, será o escenario dunha iniciativa pioneira para promover o consumo responsable durante a primeira fin de semana de maio. O Fli-Po Market, organizado polo Concello do Porriño, ofrecerá un espazo para a compra, venda e intercambio de produtos de segunda man. Ademais, contará cunha ampla programación de actividades lúdicas, música en directo e unha variada oferta gastronómica con postos de comida.

O alcalde do Porriño, Manuel Alejandro Lorenzo Alonso, destacou a importancia deste mercado como unha acción innovadora e comprometida co medio ambiente, subliñando que “o Fli-Po Market supón unha oportunidade para concienciar á cidadanía sobre a importancia de reducir residuos e apostar pola reutilización, co obxectivo de converter O Porriño nun referente en iniciativas sostibles”.

O sábado 3 de maio abrirá as súas portas ás 11:30 e estenderase ata as 22:00 horas, con participación de profesionais do sector. O domingo 4 de maio funcionará entre as 12:00 e as 21:00 horas e estará dirixido principalmente a particulares. Durante ambas xornadas, os asistentes poderán gozar de espectáculos en directo, foodtrucks, obradoiros infantís e un showcooking.

A concelleira de Mercados e Medio Ambiente, Antía Carrera Couselo, manifestou que “este evento pretende dar visibilidade á economía circular e ofrecer unha alternativa sostible de consumo, especialmente no sector téxtil, un dos máis contaminantes”. Ademais, destacou que “o mercado estará dinamizado con actividades para todas as idades, garantindo unha experiencia enriquecedora para os asistentes”.

As persoas interesadas en participar ofrecendo produtos de segunda man poderán presentar a súa solicitude ata o 18 de abril ás 14:00 horas, de forma presencial no Rexistro do Concello do Porriño, en horario de 9:00 a 14:00 horas, ou a través da sede electrónica na ligazón https://oporrino.sedelectronica.gal.

Dende o Concello do Porriño, animamos á veciñanza a sumarse a este mercado sostible, contribuíndo así ao consumo responsable e á protección do medio ambiente.

Bases Reguladoras I Mercado Sostible Fli-Po

15/03/2025 in Medio Ambiente, Urbanismo, comercio e industria

O Club de Lectura do Porriño conmemora o Ano Castelao cunha sesión especial en diálogo coa exposición “Castelao grafista (facsímile)”

 

O Club de Lectura da Biblioteca Municipal do Porriño celebrará o vindeiro 17 de marzo unha sesión especial en aberto dedicada á figura de Castelao, coincidindo coa exposición “Castelao grafista (facsímile)”, que pode visitarse no Centro Cultural Municipal ata o 19 de marzo. Esta iniciativa enmárcase na conmemoración do Ano Castelao, ao cumprirse o 75 aniversario do seu pasamento.

A sesión, aberta a toda a cidadanía interesada, estará guiada pola coordinadora do Club de Lectura, Ana Abad de Larriva, quen participou como tradutora no catálogo Castelao grafista. Pinturas, dibujos, estampas. Durante o encontro, que se desenvolverá no Centro Cultural Municipal de 18.00 a 19.30 horas, abordarase especialmente a relación entre pintura, ilustración e texto na obra do autor rianxeiro, achegando unha perspectiva singular sobre a súa produción artística e literaria.

O alcalde do Porriño, Manuel Alejandro Lorenzo Alonso, quixo salientar a relevancia desta actividade dentro do panorama cultural local: “Con esta sesión especial, seguimos a fomentar o acceso á cultura e a poñer en valor o legado de Castelao, unha figura fundamental da nosa identidade e do noso patrimonio”.

Pola súa banda, o concelleiro de Cultura, Benvido Estévez Maceira, destacou o papel que xoga esta iniciativa dentro da ampla programación cultural do Concello: “A exposición e o encontro do club de lectura son unha oportunidade excepcional para que a veciñanza se achegue a Castelao desde diferentes perspectivas, promovendo un diálogo enriquecedor entre a literatura e a arte”.

A exposición Castelao grafista (facsímile) está comisariada por Miguel Fernández-Cid e organizada pola Fundación Gonzalo Torrente Ballester, a Real Academia Galega de Belas Artes e Turismo de Galicia – Xunta de Galicia. Trátase dun dos proxectos máis ambiciosos para difundir a obra e o pensamento de Castelao a nivel internacional. Ademais, enmárcase dentro da iniciativa Cultura por Alimentos, promovida por Afundación a favor de FESBAL (Federación Española de Bancos de Alimentos).

Esta actividade especial forma parte da ampla travesía literaria e artística que realiza o Club de Lectura da Biblioteca Municipal do Porriño, que combina paradas en referentes do contexto máis próximo con achegamentos a culturas máis afastadas. Despois de explorar a figura de Castelao, o club continuará a súa viaxe literaria ata Corea do Sur, coa lectura de A vexetariana, obra da recente gañadora do Premio Nobel de Literatura, Han Kang.

13/03/2025 in Cultura e festas

Xogos tradicionais e música para reivindicar a igualdade no Porriño

 

O Concello do Porriño estende aos 365 días do ano a reivindicación dos dereitos das mulleres e da igualdade de xénero. Así, pasado xa o 8 de Marzo, continúan esta semana as actividades integradas na programación organizada con motivo do Día Internacional da Muller baixo o lema “8M, 365 días”.

Mañá xoves, a partir das 17,00 horas, na praza Arquitecto Antonio Palacios, celebranse xogos tradicionais con enfoque de xénero para a cativada. Serán Xogos de Sororas, “unha proposta lúdica para fomentar a igualdade a través de xogos populares e tradicionais, incluíndo o xogo Sororas na Memoria, que permitirá coñecer mulleres galegas clave na historia”, explica a concelleira de Igualdade, Carolina González.

Xa o venres, no mesmo escenario, ás 8 do serán, concerto de LAW, quen traerá ao Porriño un dos seus recoñecidos “rituais de barrio”, mesturando reggae, r&b, psytrance e música tradicional galega, para reivindicar a igualdade a través da música e celebrar o papel das mulleres artistas na historia.

“Dende o Concello animamos á veciñanza a participar activamente nos actos programados co convencemento de que a igualdade real e efectiva constrúese coa implicación de toda a sociedade, día a día”, sinala o alcalde Alejandro Lorenzo, á vez que se reafirma no seu compromiso de “construír un Porriño máis igualitario e libre de violencia machista”.

As actividades polo 8M proseguirán no mes de xuño coa celebración do acto conmemorativo “Mulleres da vila” e, de xeito paralelo, lévase a cabo a iniciativa educativa “Banco de Igualdade”. E é que ademais da programación aberta ao público, a Concellaría de Igualdade, en colaboración coa OMIX, desenvolverá esta actividade nos centros educativos do municipio consistente en facer entrega a cada centro participante un banco de madeira e pintura púrpura, co obxectivo de que o alumnado o decore con frases inspiradoras sobre igualdade, respecto, tolerancia e apoderamento das mulleres.

12/03/2025 in Igualdade

O Porriño creará un gran corredor verde no centro da vila

 

O Concello do Porriño vén de presentar un novo proxecto co obxectivo de mitigar os efectos adversos do cambio climático e favorecer a adaptación da cidadanía aos novos escenarios ambientais. Son dúas as actuacións contempladas consistentes na adecuación de dous espazos públicos urbanos en zonas verdes con sombra, una delas na Avenida de Galicia e outra na rúa Ramón González, que abrangue a zona peonil do centro da vila.

Para elo instalaríanse un total de 16 grandes xardineiras equipadas con árbores autóctonas de gran porte entre as que se inclúen oliveiras de máis de 30 anos de antigüidade e outras especies vexetais (calibrachoa, salvias de tipo rosmarinus -romero rasteiro- e juníperos horizontais) con fins ornamentais e de mellora ambiental, proporcionando sombra para mitigar o efecto illa de calor urbana.

A ausencia de espazos naturais en contornas densamente urbanizadas supón un impacto directo na calidade de vida da poboación, xerando ambientes pouco saudables e limitando as posibilidades de lecer ao aire libre. “A creación de infraestruturas verdes como as que proxectamos non só melloran a calidade ambiental, senón que favorecen a conexión e a continuidade dos espazos, creando unha rede que impulsa a mobilidade sostible e a interacción social. Ademais, a dispoñibilidade de zonas verdes e elementos de sombra contribúe á regulación térmica, á mellora da calidade do aire, á redución da contaminación acústica e á xeración dunha contorna máis habitable”, explica o alcalde Alejandro Lorenzo.

Na rúa Ramón González instalaríanse unha decena de xardineiras de tres tipoloxías: tres de forma circular, de 2 metros de diámetro e 60 centímetros de altura; catro de forma elíptica, con eixes de 4 e 2 metros e altura de 70 cm, elaboradas en granito Rosa Porriño; todas elas terán integrados en todo o seu perímetro bancos para poder desfrutar da sombra das plantacións que nelas se leve a cabo; e outras tres grandes xardineiras con paredes curvas, de medidas exteriores 1,5 por 1,5 metros e altura de 1,60 metros. O custe desta actuación ascende a 128.214,83  euros.

De igual maneira, levarase a cabo unha intervención completa na Avenida de Galicia coa instalación de dúas xardineiras con medidas de 14,70 x 2,60 x 0,90 metros e outras catro de 10,40 x 2,20 x 0,90 metros, elaboradas tamén en granito Rosa Porriño e con bancos integrados. O orzamento deste proxecto é de 127.470,86 euros.

Ámbalas dúas sendas verdes quedarán interconectadas no Parque do Cristo, mellorando non só a conectividade ecolóxica entre diferentes espazos naturais urbanos, senón que tamén incentivará a mobilidade peonil e o uso do transporte non motorizado, reducindo a pegada de carbono na zona.

Impacto no medio ambiente e na calidade de vida da veciñanza

Para a posta en marcha destas obras, o Concello do Porriño vén de solicitar unha subvención de 120.000 euros a Consellería de Medio Ambiente e Cambio climático dentro do programa Galicia Refuxio Climático para sufragar o seu custo. “A execución destes proxectos terá, sen dúbida, un impacto moi significativo no medio ambiente e na calidade de vida da veciñanza”, subliña a concelleira de Urbanismo e Medio Ambiente, Antía Carrera. A fai referencia á mitigación do efecto illa de calor, pois “a creación de zonas verdes con sombra permitirá reducir a temperatura ambiental local, mellorando a calidade do aire e o confort térmico dos usuarios, o que contribuirá á prevención de riscos relacionados coas altas temperaturas estivais”;  ao incremento da biodiversidade urbana, e “é que a plantación de especies vexetais autóctonas e adaptadas ao cambio climático incrementará a biodiversidade local, fomentando un ecosistema máis resiliente”; ao fomento da mobilidade sostible e á creación de espazos públicos saudables e inclusivos.

 

12/03/2025 in Medio Ambiente, Parques e xardíns

Preto de 200 escolares do Porriño viaxan á neve

 

Preto de 200 escolares de tódolos centros educativos do Porriño participan nos vindeiros días da coñecida como Semana Branca. Unha actividade consistente nunha viaxe de tres días a unha estación de esquí de San Isidro, provincia de León.

Están organizadas tres saídas, a primeira delas foi hoxe luns, 10 de marzo, con alumnado, acompañado de docentes, dos colexios Antonio Palacios e Budiño; a segunda será o día 12, cando partirán estudantes do CEIP Fernández López e do Ribeira e, por último, o alumnado de Atios, Hermanos Quiroga e Santo Tomás irase o luns seguinte, 17 de marzo. 55 persoas integran o primeiro grupo, 60 o segundo e 69 o terceiro.

A iniciativa está organizada pola Asociación Xornadas Brancas en colaboración, un ano máis, co Concello do Porriño que realiza unha achega de 20.000 euros a través da sinatura dun convenio con este colectivo constituído por tódolos centros de Educación Primaria do municipio.

O alcalde Alejandro Lorenzo explica que estas excursións á neve realízanse cun dobre obxectivo, “por unha parte a práctica do esquí, aprendendo nocións básicas desta modalidade deportiva, combinando con xogos multideporte na neve como trineos, xogos tradicionais, de grupo… e por outra banda, e non menos importante, a convivencia entre compañeiros, traballando a responsabilidade, a independencia e o respeto”. Na mesma liña, a concelleira de Educación, Carolina González, destaca as cualidades de actividades como esta, “enriquecedoras, que aportan boas experiencias e un bo recordo”.

10/03/2025 in Educación e tecnoloxía

Recoñecemento ás mulleres do Porriño: Unha emotiva homenaxe no 8M

 

O Concello do Porriño converteuse hoxe nun espazo de memoria, recoñecemento e reivindicación coa celebración do acto central do 8M, organizado pola Concellería de Igualdade, no marco da campaña municipal “8M, 365 días”. Numerosos veciños e veciñas achegáronse ata o Concello para sumarse a esta homenaxe, que puxo en valor a loita histórica das mulleres e a importancia de seguir traballando pola igualdade real, non só cada 8 de marzo, senón todos os días do ano.

A xornada deu comezo ás 12:00 horas coa presentación do libro “Corpo Nómade”, de Tere Ríos Noya, recoñecido co Accésit do XVII Premio de Poesía Erótica Illa de Sisargas. A autora estivo acompañada dun recital poético con música de guitarra, creando un clima íntimo e reivindicativo que serviu de preludio á lectura do manifesto institucional.

Ás 12:15 horas chegou un dos momentos máis especiais da xornada: a lectura do Manifesto do 8M, que este ano correu a cargo de tres mulleres centenarias do Porriño, acompañadas por representantes da corporación municipal. Este xesto simbólico serviu para render homenaxe ás súas vidas, marcadas polo esforzo, a entrega e a loita cotiá, poñendo en valor a pegada que deixaron na vila e o exemplo que seguen representando para as novas xeracións.

Juana Da Cruz (Juaniña), costureira de referencia en toda a comarca, recoñecida pola súa habilidade para crear deseños innovadores nunha época na que ser muller e atreverse a innovar non era doado; Carmen González Rodríguez, veciña de Cans, que aos 97 anos acaba de publicar as súas memorias, converténdose nun referente de que nunca é tarde para compartir a súa propia historia; e María Dolores Quiroga (Lolita), mestra de vocación e de corazón, que contribuíu a educación de xeracións enteiras de porriñeses desde o Colexio Hermanos Quiroga. As súas palabras, cheas de emoción, sabedoría e dignidade, emocionaron ás persoas presentes e fixeron visible o legado silenciado de tantas mulleres ao longo da historia.

A concelleira de Educación e Igualdade, Carolina González Costas, destacou durante a súa intervención que “hoxe recordamos que a igualdade non é unha conquista definitiva, senón un camiño que debemos percorrer cada día, de xeito colectivo, dende as administracións, os colexios, as familias e a sociedade no seu conxunto.”

A continuación, a Concellería repartiu rosas moradas entre as mulleres asistentes como símbolo do seu papel fundamental na sociedade. O acto pechouse cunha vídeo reportaxe conmemorativa protagonizada por mulleres porriñesas de todas as idades e ámbitos: dende as concelleiras do goberno local ata deportistas, estudantes, empresarias e traballadoras da industria. Todas elas, coa súa voz e testemuñas, deixaron claro que o futuro do Porriño constrúese desde a igualdade e coas mulleres como protagonistas.

“As mulleres do Porriño somos quen de construír o noso futuro”, proclamouse no vídeo, que rematou cunha mensaxe clara: o 8M é unha cita imprescindible, pero a loita pola igualdade no Porriño escríbese todos os días do ano, nos colexios, nos centros de traballo, nos fogares e na rúa.

Antes de dar por finalizado o acto, o alcalde do Porriño, Manuel Alejandro Lorenzo Alonso, subliñou a importancia de visibilizar o papel fundamental das mulleres no desenvolvemento do municipio: “As mulleres do Porriño foron, son e serán clave no avance social, cultural e económico da nosa vila. Sen a súa achega, o Porriño non sería o que é hoxe”. Reafirmou tamén o seu compromiso co obxectivo de construír un Porriño máis igualitario e libre de violencia machista.

A emotiva xornada concluíu cun forte aplauso colectivo, símbolo da unión de todo un pobo decidido a seguir avanzando cara a unha sociedade máis igualitaria, máis xusta e libre de violencias.

08/03/2025 in Igualdade

Aviso de cortes de tráfico polo Enterro da Sardiña – 5 de marzo de 2025

 

O próximo 5 de marzo de 2025, con motivo da celebración do tradicional Enterro da Sardiña, estableceranse restricións de tráfico nas seguintes rúas:

  • A partir das 18:00 h:
    Rúa Domingo Bueno ata a baixada da fonte da rúa San Sebastián.
  • Última hora da tarde:
    Rúa Peña e rúa Buenos Aires ata a ponte do Valo.

Ademais, infórmase do percorrido da comitiva do Enterro da Sardiña:

  • Saída ás 18:00 h desde o Círculo Recreativo Cultural.
  • Itinerario: Rúa Domingo Bueno, rúa San Sebastián, rúa San Bieito e rúa peonil ata a praza Arquitecto Antonio Palacios.
  • A última hora da tarde, a comitiva continuará dende a praza Arquitecto Antonio Palacios por rúa Peña e rúa Buenos Aires ata a ponte do Valo.

Pregamos desculpen as molestias e agradecemos a colaboración da veciñanza.

04/03/2025 in Seguridade, Tráfico

O Porriño presenta a programación do 8M baixo o lema “8M, 365 DÍAS”

 

O Concello do Porriño, a través da Concellaría de Igualdade, presentou hoxe na Casa Consistorial a programación de actividades para conmemorar o Día Internacional da Muller. Baixo o lema “8M, 365 días”, o programa deste ano pon o foco na necesidade de reivindicar os dereitos das mulleres e a igualdade de xénero non só cada 8 de marzo, senón todos os días do ano.

O acto de presentación contou coa participación do alcalde do Porriño, Manuel Alejandro Lorenzo Alonso, e da concelleira de Igualdade e Educación, Carolina González Costas, que destacaron a importancia de seguir traballando en políticas de igualdade e na visibilización das mulleres.

“O 8M é un día simbólico, pero a loita pola igualdade é diaria. Con esta programación queremos poñer en valor o papel das mulleres do noso concello, da nosa historia e da nosa cultura”, sinalou o alcalde. “Queremos que O Porriño sexa un referente na loita feminista, e iso conséguese coa implicación de todas e todos”, engadiu.

Pola súa banda, a concelleira Carolina González Costas destacou a diversidade das actividades programadas: “Esta programación quere chegar a todas as idades e sectores da poboación, desde a infancia ata as persoas maiores. Apostamos por actividades culturais, educativas e de lecer que poñan en valor ás mulleres e a súa historia”.

 

Programación 8M 2025

Sábado 8

  • Ás 12:00 horas: Instalación do Punto Violeta na Praza do Concello e presentación do libro “Corpo Nómade”, de Tere Ríos Noya, acompañada dun recital poético con música de guitarra.
  • Ás 12:15 horas: Lectura do manifesto do 8M, seguida do reparto de rosas moradas entre as mulleres presentes.
  • Ás 12:30 horas: Proxección dunha video reportaxe conmemorativa do 8M.

Xoves 13

  • Ás 17:00 horas: Xogos tradicionais con enfoque de xénero para a cativada: Xogos de Sororas. Unha proposta lúdica para fomentar a igualdade a través de xogos populares e tradicionais, incluíndo o xogo SororAs na Memoria, que permitirá coñecer mulleres galegas clave na historia.

Venres 14

  • Ás 19:30 horas: Concerto de LAW, quen traerá ao Porriño un dos seus recoñecidos “rituais de barrio”, mesturando reggae, r&b, psytrance e música tradicional galega, para reivindicar a igualdade a través da música e celebrar o papel das mulleres artistas na historia.

 

Actividade educativa: “Banco da Igualdade”

Ademais da programación aberta ao público, a Concellaría de Igualdade, en colaboración coa OMIX, desenvolverá a actividade “Banco da Igualdade” nos centros educativos do concello. Cada centro participante recibirá un banco de madeira e pintura púrpura, co obxectivo de que o alumnado o decore con frases inspiradoras sobre igualdade, respecto, tolerancia e apoderamento das mulleres.

“Esta actividade é unha forma de implicar á infancia e mocidade na reflexión sobre a igualdade, promovendo ao mesmo tempo o uso do galego e a creatividade”, explicou Carolina González Costas.

O Concello do Porriño anima á veciñanza a participar activamente nos actos programados, co convencemento de que a igualdade real e efectiva constrúese coa implicación de toda a sociedade, día a día.

04/03/2025 in Igualdade