Novas

O mundo do running darase cita no Porriño nunha nova edición da OP10K

O mundo do running ten unha cita no Porriño o vindeiro domingo 28 de abril nunha nova edición da ‘Porriño 10k’. O alcalde, Alejandro Lorenzo, e o concelleiro de Deportes, Abel Estévez, presentaron a XV edición da proba a pé de pista, xunto cunha nutrida representación de directiva, equipo deportivo e atletas do Atletismo Porriño.
 
Como cada ano a clásica carreira OPK10, organizada polo Concello do Porriño e o club Atletismo Porriño, disputarase xunto coa proba OP5K, nun circuíto de 5 km no centro urbano homologado pola RFEA.
Así, os amantes deste deporte poderán correr un ano máis polas rúas da vila nesta edición que xa ten aberta a inscrición. As persoas que queiran participar xa poden inscribirse ata o 16 de abril na seguinte ligazón: https://ccnorte.com/…/ide/2745/xv-carreira-ou-porrino-10k
 
A carreira de pitufos e chupetes non require de proceso de inscrición e poderán participar na mesma presentándose na liña de saída á hora estipulada.
 
A proba de 10K ofrecerá unha atractiva gama de premios en metálico para recoñecer o desempeño excepcional dos participantes. Haberá premios por clasificación aos tres primeiros en cada unha das categorías masculinas e femininas, de 500 euros para o primeiro posto, 350 para o segundo e 200 para o terceiro.
 
Cabe destacar que a OP10K conta con records establecidos por destacados atletas en edicións anteriores. O masculino osténtao Alejandro Fernández, que completou a carreira nun tempo de 00:29:23 no ano 2015, e o feminino Ester Navarrete, quen rexistrou un tempo de 00:34:38 en 2019. Co fin de recoñecer o esforzo e a dedicación que conleva a preparación e competición nunha proba desta natureza, outorgarase un premio especial de 500 euros ao atleta feminino e/ou masculino que logre bater o record na súa categoría.
 
“Un ano máis seremos epicentro do atletismo podendo gozar de deportistas de primeiro nivel nas nosas rúas”, explicou o alcalde, “Podemos dicir que se trata da gran festa do atletismo, que cada ano reúne a miles de persoas na vila, entre participantes e público. E isto require dun gran traballo de organización que agradecemos enormemente ao club de Atletismo Porriño”.
08/04/2024 in Alcaldía, Deportes

O ciclismo de montaña volve ser protagonista no Porriño da man da AD Avanza

O ciclismo de montaña volverá a ser protagonista no Porriño da man da AD Avanza que este ano organiza xa a sétima edición do Trofeo Mini BTT Concello do Porriño e a cuarta do Trofeo XCO Concello do Porriño.

Será os días 13 e 14 de abril, respectivamente, e como os últimos anos disputarase nun lugar privilexiado aos pés do Faro de Budiño.

O alcalde, Alejandro Lorenzo, o concelleiro de Deportes, Abel Estévez, e o presidente da AD Avanza, David García, presentaron onte os eventos no lugar que será o seu punto neurálxico, a Forna de Budiño. Estiveron acompañados por ciclistas da asociación deportiva organizadora que tamén se subirán á bici para disputar as probas nas que se estima unha participación total de máis de 700 deportistas.

O VII Trofeo Mini BTT Concello do Porriño discurrirá en horario de tarde. Esta proba, dirixida a nenos e nenas de ata 13 anos, está incluída no calendario da Federación Galega de Ciclismo e suma puntos no ranking mini BTT 2024. Arrancará ás 13:30 cos adestramentos e terminará sobre as 18 h.

O IV Trofeo XCO Concello do Porriño, tamén incluído no calendario da federación e puntuable para o ranking da Copa de Galicia 24, arrancará ás 9 h cos adestramentos, seguidas das series de competición cadetes masucilino, master 30-40-50-60 e infantís (10 h); cadete feminino, élite masculino e feminino, junior masculino e feminino, master 30-40-50 feminino (11:30 h) e finalizará coa entrega de trofeos arredor das 13:30 h.

Os representantes municipais puxeron en valor o traballo que a AD Avanza fai no Porriño coa súa escola deportiva permitindo a moitos nenos e nenas que medren neste deporte tan vencellado ao Porriño. Quixeron tamén convidar a toda a veciñanza do Porriño e da contorna a achegarse a Budiño os próximos 13 e 14 de abril e disfrutar dun verdadeiro espectáculo deportivo en plena natureza.

05/04/2024 in Sen categoría

Os monos de Laxeiro, a exposición da súa obra humorística na prensa chega ao Porriño

O Porriño acollerá este mes un acontecemento cultural de primeira orde reunindo nunha mostra todas as viñetas humorísticas que Laxeiro publicou na prensa, concretamente nos xornais El pueblo gallego e Faro de Vigo, nos anos 1928, 1929 e 1930. Durante estes anos o humor gráfico galego vivía unha época dourada e Laxeiro foi un dos seus estandartes.

A exposición “Os monos de Laxeiro”  componse de corenta e nove reproducións fotográficas, realizadas case ao tamaño orixinal das viñetas e respectando a cor de fondo tan recoñecible do papel de periódico. Cada viñeta vai enmarcada de forma individual e, tanto os textos dos diálogos, como a referencia do medio e día de publicación, van impresas, dentro de cada cadro, respectando as formas idiomáticas do orixinal e, por tanto, sen adaptar ao galego normativo de hoxe.

Debido a que os debuxos orixinais están perdidos, optouse por facer reproducións fotográficas, tomadas directamente das páxinas dos periódicos, grazas á colaboración de Faro de Vigo e do Arquivo Municipal de Vigo, que posibilitaron acceder á documentación orixinal para poder así reproducir cada viñeta do xeito máis fiel posible. Unha vez realizadas as fotografías, resultou de capital importancia a busca da forma de impresión e do papel máis axeitados.

O resultado é unha colección de corenta e nove cadros, todos do mesmo tamaño, a través dos que o público se pode achegar a esas viñetas imaxinando o seu aspecto orixinal cando foron publicadas na prensa hai xa noventa anos e percorrendo a evolución, tanto formal, como nos contidos do, entón, artista debutante, José Otero Abeledo, Laxeiro.

A mostra estará aberta ao público do 11 de abril ao 11 de maio. Co gallo da inauguración da exposición, Javier Pérez Buján, director artístico da Fundación Laxeiro, dará unha conferencia sobre a mesma que comezará ás 19 h.

04/04/2024 in Sen categoría

O Porriño impulsa a declaración da Festa dos Callos e a Feira Apícola como Festas de Interese Turístico de Galicia

O Concello do Porriño iniciará os trámites necesarios para declarar a Festa dos Callos e a Feira Apícola Rías Baixas, dous emblemáticos eventos da localidade, como Festas de Interese Turístico de Galicia, en recoñecemento á súa importancia cultural, gastronómica e turística para a rexión.

A Festa dos Callos é un evento enraizado na cultura e tradición do municipio que este chegará xa á súa trixésimo primeira edición. Esta festividade, que se celebra anualmente os meses de setembro/outubro, é unha ocasión única para exaltar os sabores da gastronomía local e para compartir momentos de convivencia e fraternidade coa comunidade e visitantes. “A Festa dos Callos, ademais de ser unha celebración gastronómica, é unha oportunidade para poñer en valor os nosos produtos e os nosos artesáns, así como para dinamizar a nosa economía local e promover o turismo na nosa rexión”, expuxo a concelleira de Turismo, Vanessa Ucha, “Cada ano, a festa atrae a un gran número de visitantes, que quedan cautivados pola autenticidade e o ambiente festivo que se vive nas nosas rúas”. Neste sentido, a declaración da Festa dos Callos como Festa de Interese Turístico de Galicia non só recoñecería o valor e a trascendencia desta festa para O Porriño, senón que tamén abriría novas oportunidades para a súa promoción e difusión a nivel rexional e nacional. “Ademais, esta declaración contribuiría a reforzar a nosa identidade cultural e turística e a poñer en valor os nosos recursos gastronómicos e turísticos”, continuou a edil.

Unha declaración á que aspirará tamén a Feira Apícola Rías Baixas, un evento emblemático en toda a rexión que se celebra cada ano na vila do Louro. Esta feira, que pon en valor tradición apícola do concello e a calidade dos nosos produtos derivados da colmea, é un verdadeiro escaparate da cultura e gastronomía local.

A Feira Apícola Rías Baixas non só é un evento de interese para os amantes da apicultura e da natureza, senón tamén unha oportunidade para dinamizar o sector turístico e promover a identidade do Porriño como destino turístico. Cada ano, a feira atrae a un gran número de visitantes, que gozan das actividades, exposicións e degustacións que se organizan durante os días do evento.

“A súa declaración como Festa de Interese Turístico de Galicia tamén nos permitiría reforzar o noso compromiso co turismo sostible e responsable e poñer en valor os nosos recursos naturais e gastronómicos”, concluíu a concelleira.

O primeiro paso para iniciar a solicitude deuse hoxe no pleno da corporación, onde as propostas do executivo foron aprobadas, sumándose á do Xogo da Ola que se está a tramitar tamén.

02/04/2024 in Alcaldía

O Porriño incrementou a inversión en atención social nun 68,13% os últimos tres anos

O alcalde do Porriño, Alejandro Lorenzo, e o concelleiro de Benestar Social, Abel Estévez, fixeron hoxe balance da xestión realizada polos Servizos Sociais do Concello do Porriño, un departamento fundamental para protexer ás persoas máis vulnerables.

O Goberno Municipal mantén a súa forte aposta por este área tan sensible, invertindo no último ano máis de 2,5 M de euros, un 31,14% máis que no anterior exercicio. O reforzo da inversión na atención social por parte do executivo incrementouse nun 68,13% desde o ano 2020.

“Os Servizos Sociais son un eixo fundamental do Concello dando resposta á veciñanza máis vulnerable e que máis o necesita”, apuntou o alcalde, “O traballo que realizan moitas veces é invisible pero sen eles deixaríamos a moita xente atrás. Por iso reforzaremos sempre as nosas políticas sociais e tamén inversión”.

As cifras reflicten a importancia dos Servizos Comunitarios, que pechan o 2023 con 5.928 atencións de información, orientación e asesoramento á veciñanza no que respecta a recursos públicos en xeral.

Ademais, lévanse a cabo diferentes programas municipais creados directamente para respostar a necesidades detectadas a través da propia actividade do departamento. Entre eles, o Programa municipal de emerxencia social, do que se tramitaron 85 solicitudes relacionadas con necesidades de carácter básico (alimentación, farmacia, etc…) e outro de caracter urxente, o Programa de Bono enerxético municipal do que se benefician 213 familias, o Préstamo de axudas técnicas que resolveu de xeito favorable o prestamo de 13 camas articuladas e 3 grúas eléctricas, a intervención no Servizo de axuda no fogar que atende a 147 persoas, Xantar na casa con 14 usuarios ou a Teleasistencia, tramitando o traslado de 59 usuarios ao sistema de Dependencia.

Outro dos programas fundamentais é o programa de alimentos SOS Porriño, no que causaron alta o pasado ano 222 familias, ao que hai que sumar Xoguetes polo Nadal que achegou lotes de xoguetes libros a 109 menores.

Infancia e educación

A infancia e a educación é un dos grandes núcleos deste departamento, intervindo a través de diferentes programas. No marco do Programa de Educación Familiar atendeuse a 130 familias, 80 persoas participaron no Programa de formación básica para familias en situación de risco, centrándose na preparación do graduado da ESO, e 81 menores o fixeron no Programa de reforzo escolar. Cabe destacar deste último o alto nivel de satisfacción das familias e a mellora dos resultados académicos dos pequenos/as. Ademais, está funcionando como un importante elemento prpotector fronte ao abandono escolar. Destacable tamén é o Servizo de Atención Temperá, que atendeu a 89 menores.

Maiores

Os maiores tamén xogan un papel importante no día a día dos servizos sociais con programas de respiro familiar, Obradoiros de prevención do deterioro cognitivo no que participaron 36 persoas, Depotermal ou Tempo para Nós, con máis de 310 usuarios/as. Á xestión nesta área hai que suma as tramitacións da área de inclusión, dependencia, discapacidade ou pensións non contributivas.

26/03/2024 in Alcaldía

Publicada a listaxe de admitidos e admitidas no Campamento de Semana Santa

O vindeiro 25 de marzo comenzará o Campamento de Semana Santa para os e as máis pequenas da casa ; e como ben sendo de costume, o mesmo desenvolverase no C.E.I.P Plurilingüe Xosé Fernández López e instalacións municipais

O lugar de entrega e recollida dos e das participantes será na porta principal do centro escolar no horario,de 8:30 a 14:00 horas. Os rapaces e rapazas deberán levar roupa cómoda : calzado cómodo e outro de reposto para poder utilizar ,no seu caso, as pistas do pavillón , unha mochila co calzado de reposto, unha merenda e auga.

No caso de precisar algunha vestimenta diferente , serán as monitores e monitores as persoas encargadas de comunicalo.

Recordade as únicas persoas autorizadas a entregar e recoller aos rapaces e rapazas do Campamento de Semana Santa serán as que instaron a solicitude.

En caso de ser outra persoa a encargada, ésta, deberá ser maior de idade e levar xunto ós monitores e monitoras a autorización correspondente, asinada con copia dos D.N.I ou N.I.E da persoa autorizante e autorizada

Listado de admitidos: https://oporrino.org/wp-content/uploads/2024/03/LISTADO-DE-ADMINISTIDOS-E-ADMITIDAS-NO-CAMPAMENTO-DE-SEMANA-SANTA-2024-1.pdf

Consentimento para fotografías e gravacións: https://oporrino.org/wp-content/uploads/2024/03/Consentimento-para-fotografias-e-gravacions.pdf

Nota de Información sobre o Proceso da Secretaría Xeral da Igualdade: https://oporrino.org/wp-content/uploads/2024/03/Nota-de-Informacion-sobre-o-Proceso-da-Secretaria-Xeral-da-Igualdade.pdf

22/03/2024 in Alcaldía

A cativada do Porriño reafirma o seu compromiso coa auga

Co fin de crear conciencia entre a cativada da importancia da auga para o noso benestar e o dos ecosistemas, o Concello do Porriño e Consorcio de Augas do Louro uníronse hoxe para conmemorar da man dos coles o Día a Auga.

148 nenos e nenas de 4º de primaria, do CEIP Antonio Palacios, CEIP Xosé Fernández López, CEIP de Atios e CPR Hermanos Quiroga, participaron hoxe da actividada organizada por ambas entidades no marco do proxecto do Consorcio Misión Imposible.

Acompañándoos estiveron o alcalde do Porriño, Alejandro Lorenzo, e representantes do Consorcio de Augas do Louro, Rufino Rodríguez, xerente, Manuel Viñas, xefe de servizo de FCC Aqualia, e Alberto Fernández, técnico de abastecemento de FCC Aqualia.

A iniciativa iniciouse cunha parte teórica na que se explicou aos/as nenos/as o ciclo natural e a importancia deste recurso, por medio de fichas didácticas e dun xogo de tarxetas onde cada un tivo que explicar a súa vinculación en base ao debuxo que lle tocou. Seguidamente, realizaron un xogo sobre a posibilidade de tirar polo sanitario diferentes elementos resolvendo as dúbidas que lles puideron aparecer.

Tamén se centraron na explicación da depuración da auga que chega á EDAR recreando con xogos os diferentes procesos. Realizaron medicións de cloro e aprenderon sobre a potabilidade.

“Saben ben da importancia que ten este recurso na nosa vida e na do planeta e hoxe asinaron o seu `compromiso coa auga´, que levaron para a súa casa para tamén implicar ás súas familias”, explicou o alcalde, Alejandro Lorenzo.

Para terminar, todos os participantes, incluído o rexedor e o persoal do Consorcio, rapearon xuntos na praza para que toda a veciñanza do Porriño se comprometa tamén con este recurso.

22/03/2024 in Alcaldía, Medio Ambiente

A Biblioteca do Porriño sigue liderando en Galicia con 9.200 usuarios, máis de 2000 préstamos mensuais e máis de 45.000 visitas ao ano

No mundo das bibliotecas, o principal indicador de eficacia é o número de préstamos e o número de usuarios. Estes datos soen amosar a boa saúde, ou non, do servizo bibliotecario.

Nos últimos tempos estase a notar en España un descenso xeral destes indicadores, debido principalmente á competencia dos contidos dixitais e doutras formas de ocio por parte dos cidadáns.

Esto obriga ás bibliotecas a buscar novos servizos para seguir xogando un papel destacado na sociedade.

Pero isto non parece afectar á multipremiada Biblioteca do Porriño, que ademais de ofrecer tamén novos servizos (como a recente inauguración da Sala de Estudo Municipal) e contidos dixitais (ebooks a través da plataforma GaliciaLe, películas na plataforma eFilm, implementación da nova app RBGalicia que inclúe o carné dixital…), leva anos encabezando o ranking galego de usuarios e número de préstamos por habitante. E as cifras seguen en contínuo ascenso, ano tras ano.

Con respecto ao número de préstamos, nos dous últimos anos incrementouse nun 25%, prestando unha media de 2374 exemplares ao mes, destacando meses como o pasado xaneiro onde se chegaron a prestar case 2700 exemplares. E con respecto ao 2006 anótase un espectacular incremento dun 1.722% no número de préstamos. A biblioteca porriñesa presta hoxe nun día case o mesmo que no 2006 prestaba durante todo un mes.

“Este éxito débese ao contínuo traballo por ofrecer unha colección actualizada, atractiva e viva, onde se prima o uso dos libros por riba da súa acumulación, onde se coida a xestión da colección basada nos datos e as persoas, e onde se concede gran importancia ás novidades e recomendacións de lectura, moi apreciadas polos usuarios”, explicou o alcalde, Alejandro Lorenzo, agradecendo o enorme labor que realiza o persoal da Biblioteca e o concelleiro de Cultura, Bienvenido Estévez, “O labor dos nosos bibliotecarios é encomiable e xunto co concelleiro Beni conforman ese equipo capaz de levar a nosa biblioteca ao máis alto”.

Con respecto ao número de usuarios, a biblioteca porriñesa ten rexistrados a día de hoxe un total de 9.224 persoas usuarias, é dicir, case o 50% da poboación censada no concello. Un incremento do 330% desde 2006 e unha cifra espectacular a nivel galego e español, que destaca aínda máis se sumamos o uso que fan da biblioteca porriñesa os cidadáns da contorna: un 30% do volume do servizo corresponde a cidadáns de Mos, Vigo, Ponteareas e Tui.

O rexedor concluíu indicando que dende o Concello do Porriño continuarán apostando por “unha xestión encamiñada a que a veciñanza de todas as idades inclúa a lectura nos seus hábitos culturais e de ocio. Que a vivan e a disfruten”.

21/03/2024 in Alcaldía, Cultura e festas

Conmemoramos o Día dos Bosques plantando árbores!

Usuarios e usuarias de Afaga e Aceesca participaron hoxe na plantación de árbores organizada polo Concello do Porriño polo Día Internacional dos Bosques.

Foi na contorna do río Louro, o pulmón verde da vila. No desenvolvemento desta acción plantáronse varios exemplares de Liquidambar, unha especie moi acaída para este entorno, e informouse a todos os participantes dos métodos de transplante dunha árbore, así como dos coidados posteriores que requiren.

O Día Internacional dos Bosques é un recordatorio da importancia que teñen os poboadores máis antigos do planeta, as árbores, que sosteñen ao ser humano e ao medio ambiente. Non só son os encargados de liberar osíxeno e transformar o dióxido de carbono (CO2), reducindo o efecto invernadoiro na atmósfera, senón que, ademais, son alimento, fogar e acubillo de multitude de especies. A efeméride, é polo tanto, unha data que lembra a importancia de protexer as superficies arborizadas como unha forma de asegurar que a vida no noso planeta siga sendo posible.

“Neste día queremos lembrar a necesidade de manter o respecto polas árbores e a natureza e recalcar os beneficios que proporcionan, tamén nas contornas urbanas”, explicou o alcalde, “Son xestos simbólicos que pretenden infundir na veciñanza a necesidade de coidar e valorar o noso medio natural”

21/03/2024 in Alcaldía, Medio Ambiente

O Porriño acolleu a primeira xornada da XXVIII Liga Galega de Baloncesto Adaptado

O Porriño foi de novo epicentro do deporte adaptado. 17 equipos, que reuniron a 170 deportistas, participaron hoxe na primeira xornada da XXVIII Liga Galega de Baloncesto Adaptado organizada pola Federación Galega de Deporte Adaptado.

Nesta primeira quenda disputáronse un total de 14 partidos nas canchas habilitadas nas dúas pistas do polideportivo municipal. Na competición masculina participaron o ASDAN, Celta Integra e San Rafael; na adaptada masculina Aceesca, Aspanaex, Celta Integra, Juan María e San Rafael, e na adaptada mixta Aspavi, Juan XXIII, Los Milagros “A”, Los Milagros “B”, Méndez Núñez, Saiar, Saladino Cortizo “A”, Saladino Cortizo “B” e Vilagarcía.

20/03/2024 in Deportes