Novas

O Porriño busca espazos de recreo máis inclusivos, libres de violencias e igualitarios, a través do proxecto Patios Coeducativos

  • A iniciatia realizouse en todos os colexios públicos e concertados do municipio implicando a alumnado, profesorado e familias

O Porriño, 20 de maio de 2026. – O Concello do Porriño vén de completar no CEIP Ribeira o desenvolvemento do proxecto “Patios coeducativos”, unha iniciativa que xa foi implantada nos centros nos centros educativos de Atios, Antonio Palacios, Budiño, Fernández López, Santo Tomás e Hermanos Quiroga, acadando así a súa extensión a todos os colexios do municipio.

Este programa ten como obxectivo principal transformar os patios escolares en espazos máis inclusivos, diversos e igualitarios, favorecendo unha convivencia máis respectuosa e promovendo a cultura dos bos tratos entre o alumnado. A través dunha metodoloxía participativa, o proxecto implica á comunidade educativa no seu conxunto -alumnado, profesorado e familias- para repensar os usos do patio e romper cos estereotipos de xénero que tradicionalmente condicionan estes espazos.

Entre as actuacións desenvolvidas inclúense obradoiros de sensibilización co alumnado, actividades formativas coas familias e procesos de análise e redeseño dos patios, co fin de convertelos en lugares polivalentes onde teñan cabida diferentes formas de xogo e relación.

O alcalde do Porriño, Alejandro Lorenzo, que participou no obradoiro que se desenvolveu na biblioteca do CEIP da Ribeira, destacou a importancia desta iniciativa “para avanzar cara unha educación en igualdade real desde as primeiras idades”. “Estamos a falar de transformar espazos cotiáns como os patios escolares en lugares que fomenten o respecto, a convivencia e a igualdade de oportunidades para todos os nenos e nenas”, sinalou.

Pola súa banda, a concelleira de Educación, Carolina González, puxo en valor o carácter participativo do proxecto: “Este programa non só cambia os patios, senón tamén a maneira de relacionarse do alumnado. Implica a toda a comunidade educativa e contribúe a construír unha sociedade máis xusta desde a base”.

O proxecto “Patios coeducativos” enmárcase nas políticas municipais de promoción da igualdade e prevención das violencias, apostando pola educación como ferramenta clave para combater estereotipos e fomentar valores como o respecto, a empatía e a inclusión.

 

20/05/2026 in Educación e tecnoloxía, Igualdade

Éxito rotundo do I Foro do Porriño Conecta Talento cun pavillón ateigado e centos de encontros laborais

  • O Polideportivo Municipal converteuse no epicentro Emprego, reunindo a centos de mozos, relatores de primeiro nivel e preto dunha decena de empresas punteiras.
  • O Conselleiro de Educación visitou o espazo expositivo pola mañá e o Conselleiro de Emprego participou no acto de clausura xunto ao alcalde, Alejandro Lorenzo.
  • Joaquín Dosil, Pedro Rodríguez e Emilio Duró inspiraron coas súas conferencias aos asistentes

O Porriño, 19 de maio. – O Porriño demostrou hoxe o enorme potencial do seu capital humano e o músculo empresarial coa celebración do I Foro de Emprego e Desenvolvemento Profesional: O Porriño Conecta Talento. A xornada, que superou todas as expectativas da organización, saldouse cun éxito rotundo de participación, deixando a imaxe dun pavillón municipal ateigado de estudantes, profesionais e desempregados en busca de novas oportunidades.

Desde primeira hora da mañá, a afluencia de asistentes foi constante no Polideportivo Municipal. O gran atractivo do evento non só estivo no seu potente programa de relatorios e mesas redondas, senón tamén no espazo Talent Hub, onde se xeraron numerosas citas interpersoais e entrevistas rápidas de traballo entre os mozos e os responsables de recursos humanos de grandes compañías multisectoriais.

O foro contou ademais coa presenza do conselleiro de Educación, Ciencia, Universidades e Formación Profesional, quen realizou unha visita institucional ao recinto, percorrendo os diferentes stands do espazo expositivo e compartindo impresións co medio cento de empresas representadas e aqueles que acudían a visitalas. Durante o seu percorrido, destacou a importancia de aliñar a oferta formativa coas demandas reais do tecido produtivo galego.

Pola súa banda, o broche de ouro á intensa xornada tivo lugar ás 19:00 horas co acto de clausura oficial. Nel participou o conselleiro de Emprego, Comercio e Emigración, quen estivo acompañado polo alcalde do Porriño, Alejandro Loreaalcnzo, presente durante toda a xornada.

O rexedor porriñés amosou a súa enorme satisfacción pelo resultado deste primeiro foro: “Ver este pavillón cheo de talento, de mozos con ganas de comerse o mundo e de empresas dispostas a escoitalos é o mellor indicador de que O Porriño ten moito futuro. Este concello vai seguir sendo o motor industrial da contorna e o mellor aliado para o emprego”, sinalou Lorenzo, quen agradeceu o traballo de todas as entidades colaboradoras e a implicación dos relatores. Con esta primeira edición, O Porriño Conecta Talento consolídrase como unha ferramenta indispensable para conectar de forma directa a oferta e a demanda laboral, impulsando a empregabilidade local e motivando as novas xeracións a construír o seu futuro profesional desde Galicia.

Con esta primeira edición, O Porriño Conecta Talento consolídrase como unha ferramenta indispensable para conectar de forma directa a oferta e a demanda laboral, impulsando a empregabilidade local e motivando ás novas xeracións a construír o seu futuro profesional desde Galicia.

Conferencias

Joaquín Dosil, profesor da Universidade de Vigo e presidente de Libredón, deu as claves para facer entrevistas de traballo importantes e impactantes. Porque o talento que buscan as empresas está, explicou, “nas competencias transversais: hoxe en día as empresas están a buscar candidatos ou candidatas que teñan a capacidade de saber traballar en equipo, capacidade de poder persistir, ter resiliencia, persoas que teñan capacidade de relacionarse con outras persoas con facilidade e crear bo clima de traballo”. Así, puxo o foco en como desenvolver individualmente estas habilidades sociais que son tan necesarias para chegar á entrevista e causar impacto desde a chegada, desde o saúdo inicial ata o desenvolvemento da propia entrevista, e como facer o peche desta.

Xa na xornada de tarde, foi a quenda de Pedro Rodríguez, que plantexou a busca de traballo como un proceso de venda, e “ao igual que as decisións de compra de produtos ou servizos se basean fundamentalmente nas emocións que os vendedores e as vendedoras transmitimos, no caso da venda nun proceso de selección, exactamente igual”. Polo tanto, adestrar a actitude e a motivación que temos ante un process de busca de emprego é fundamental para xerar oportunidades e para conseguir ese traballo que tanto desexamos, explicou. Neste senso, apuntou que “o que diferencia as persoas non é o que saben, senón o que fan con iso que saben. É moi importante ante a busca de emprego facer cousas, e moitas veces, lamentablemente, o medo paralízanos e fai que nos quedemos parados ante esa situación.”

Durante o Talent Briefing, os directores de Recursos de ZENDAL, Gonvarri Steel Industries, Ganain, Clece, Grupo Trapega e CEAMSA deron as claves sobre as necesidades reais de talento no mercado laboral.

O prato forte era Emilio Duró, e non defraudou, cunha conferencia interpretada en lingua de signos, na que desbordaron a enerxía, a paixón e o optimismo, animou o pavillón, ateigado de público, ao que asegurou que “a ilusión segue a ser a enerxía máis rendible do mundo”, sinalando que “a actitude é a diferenza entre ver problemas… ou ver oportunidades” e que “emprender non é non ter medo, é avanzar a pesar do medo” e concluíndo que “O Talento abre portas, pero a attitude decide ata onde chegas”.

Durante o Foro, ademáis o Talent Pitch, con sete candidatos que tiveron dous minutos para mostrar as súas fortalezas e coa especialista en reclutamento e xestión de talento de Abanca Lara Ríos que os introduciu no programa TOP ABANCA, o programa para impulsar carreiras profesionais e que logo deu feedback a cada un dos participantes. Tamén a oferta formativa da Universidade de Vigo,  con Noa Lema Rodríguez, egresada no Grao de Publicidade e Relacións Públicas da UVigo no Campus de Pontevedra. 

O acto de clausura contou coa participación do alcalde do Porriño, e o Conselleiro de Emprego José Gonzáñez Vázquez.

Diversidade de postos de traballo

Como estaba anunciado, as empresas participantes chegaron con ofertas de traballo en busca de candidatos, que se dividiron entre perfís técnicos, talento altamente cualificado e sector servizos e atención social. Así, os perfís técnicos estiveron presentes sobre todo na industria pesada e de automoción.

Durante o encontro, as entidades participantes ofertaron postos para técnicos/as de calidade, operarios/as de produción, specialists en mantemento industrial e montaxe, así como perfís especializados en robótica industrial, automatización e programación de robots. Tamén houbo un oco destacado para oficios especializados como soldadores/as TIG e MIG/MAG, caldeireiros/as e profesionais de loxística con manexo de carretilla elevadora. O talento altamente cualificado e a innovación tecnolóxica foron outros dos piares fundamentais do Talent Hub, con ofertas para enxeñeiros/as industriais, químicos, mecánicos e electrónicos, xunto con programadores/as Python e profesionais do sector das telecomunicacións. No ámbito da xestión e a saúde laboral, buscáronse técnicos/as superiores en PRL, consultores/as de formación e especialistas en xestión empresarial e normativa. Ademais, a oferta incluíu perfís de investigación ligados á innovación tecnolóxica e á I+D+i. Por último, o sector servizos e a atención social completaron unha oferta laboral moi heteroxénea. O foro serviu para cubrir vacantes de repartidores/as, condutores/as profesionais, persoal de atención ao cliente e xestores de banca. No ámbito social e educativo, ofertáronse postos para o Servizo de Axuda no Fogar (SAF), educación infantil e persoal de cociña. Incluso os oficios tradicionais como a albanelería, fontanería ou carpintería, así como tarefas agrícolas de recollida e poda, tiveron o seu espazo nesta exitosa convocatoria.

19/05/2026 in Alcaldía, Educación e tecnoloxía, Emprego e formación, Industria

O Porriño Conecta Talento: un evento 100% accesible e con opcións de aparcamento gratuíto

  • Existen tres zonas de aparcamento gratuíto no entorno do pavillón: os dous aparcamentos xa existentes na rúa Antonio Palacios e o aparcamento situado en fronte da pista de tenis, na rúa Fernández Areal.

O  Porriño, 18 de maio de 2026 . Este martes 19 de maio, o Polideportivo Municipal do Porriño acollerá o primeiro Foro de Emprego  e Desenvolvemento Profesional O Porriño Conecta Talento. Este gran encontro, orientado a conectar o talento local con oportunidades laborais nunha contorna dinámica, reunirá a máis de 50 empresas e entidades de sectores estratéxicos como a automoción, industria, alimentación, loxística, banca e innovación.

Cun firme compromiso pola inclusión, a organización confirmou que o evento será totalmente accesible. Para facilidade dos asistentes, todo o aparcamento da Piscina Municipal estará reservado exclusivamente para persoas con mobilidade reducida. Para o resto do público, existen tres zonas de aparcamento gratuíto no entorno do pavillón: os dous aparcamentos xa existentes na rúa Antonio Palacios e o aparcamento situado en fronte da pista de tenis, na rúa Fernández Areal.

Ademais, no eido da accesibilidade comunicativa, a agardada conferencia de clausura do recoñecido experto Emilio Duró contará con tradución simultánea á linguaxe de signos.

Contacto directo coas grandes empresas

O espazo expositivo Talent Hub permanecerá aberto de 09:30 a 14:00 horas e de 16:00 a 19:30 horas. Alí, os candidatos poderán establecer contacto directo con firmas de referencia como Zendal, Magna, BorgWarner, Constellium, Unimate, Maier Ferroplast, Seur, Serveo, Mapfre, Abanca, Aimen, Ceamsa ou Citic Censa, ademais de diversas empresas de traballo temporal.

Á súa chegada, os asistentes poderán consultar no stand de Porremprego os perfís profesionais demandados e solicitar unha das citas limitadas para realizar entrevistas. No caso de non conseguila, poderán enviar a súa candidatura directamente escaneando os códigos QR que cada compañía terá visibles no seu stand.

Entre os perfís máis demandados destacan postos vinculados á industria, mantemento, robótica, soldadura, loxística, administración, enxeñaría e atención ao cliente. “O obxectivo principal é desmitificar a entrevista de traballo e achegar a realidade dos despachos de selección á rúa, amosando o que de verdade valoran as empresas”, explica Alejandro Lorenzo, alcalde do Porriño.

Programa Completo: Horarios e Actividades

A xornada complementarase con relatorios, obradoiros e mesas redondas clave para coñecer o que buscan as organizacións “detrás do currículo” nesta Galicia de 2026.

🕒 Horario de Mañá

  • 09:30 h. – Recepción de asistentes (Acreditación, benvida e recollida de documentación).
  • 09:30 a 14:00 h. – Apertura do espazo Talent Hub.
  • 10:00 h. – Apertura e inauguración oficial das xornadas.
  • 10:30 h. – Relatorio: “Oferta formativa Universidade de Vigo” (Área de Captación de Alumnado da UVigo).
  • 11:00 h. – Sesión Coach: “Actitude que transforma: claves para converter metas en logros”, impartida por Joaquín Dosil.
  • 12:00h.– Visita do Conselleiro de Educación.
  • 12:30 h. – Talent Briefing: Necesidades reais de talento no mercado laboral. Unha mesa de debate con directores de Recursos Humanos de empresas punteiras (CITIC, Gonvarri, Zendal, Constellium, GANAIN, Magna, Clece, Grupo Taprega e CEAMSA).
  • 13:30 h. – Espazo de networking con aperitivo.

🕒 Horario de Tarde

  • 16:00 a 19:30 h. – Reapertura do espazo Talent Hub.
  • 16:00 h. – Obradoiro práctico: “Motivación e Habilidades para a Búsqueda de Emprego: Descubre o teu Oceano”, impartido por Pedro Rodríguez.
  • 17:00 h. – Talent Pitch: “O teu talento en 2 minutos”.
  • 17:30 h. – Conferencia inspiradora: “Vivir con Sentido, Optimismo e Esperanza” a cargo de Emilio Duró (Traducida á linguaxe de signos).
  • 19:00 h. – Acto de Clausura e peche institucional. Co alcalde do Porriño e o conselleiro de Emprego.
18/05/2026 in Cultura e festas, Emprego e formación, Industria

Industria, automoción, loxística e enxeñería lideran os perfís máis demandados no primeiro Talent Hub de “O Porriño Conecta Talento”

  • O espazo expositivo permanecerá aberto de 09:30 a 14:00 horas e de 16:00 a 19:30 horas, permitindo ás persoas asistentes contactar directamente coas empresas participantes, coñecer as súas ofertas e participar en procesos de selección
  • Entre as entidades participantes figuran firmas de referencia como Zendal, Magna, BorgWarner, Constellium, Unimate, Maier Ferroplast, Seur, Serveo, Mapfre, Abanca, Aimen, Ceamsa ou Citic Censa, ademais de empresas de traballo temporal
  • O Foro reúne a expertos de Recursos Humanos que darán claves de cómo enfrentarse a unha entrevista de traballo


O Porriño, 17 de maio de 2026. Máis de 50 empresas e entidades participarán o vindeiro 19 de maio no primeiro Talent Hub de O Porriño Conecta Talento, un gran encontro orientado a conectar talento e oportunidades laborais nunha contorna dinámica na que empresas e candidatos poderán establecer contacto directo, realizar entrevistas e explorar novas posibilidades profesionais.

O evento, que se desenvolverá no Polideportivo Municipal ao longo de toda a xornada, reunirá compañías de sectores estratéxicos como a automoción, industria, alimentación, loxística, servizos, banca, recursos humanos e innovación.

Entre as entidades participantes figuran firmas de referencia como Zendal, Magna, BorgWarner, Constellium, Unimate, Maier Ferroplast, Seur, Serveo, Mapfre, Abanca, Aimen, Ceamsa ou Citic Censa, ademais de empresas de traballo temporal …

O espazo expositivo Talent Hub permanecerá aberto de 09:30 a 14:00 horas e de 16:00 a 19:30 horas, permitindo ás persoas asistentes contactar directamente coas empresas participantes, coñecer as súas ofertas e participar en procesos de selección.

Á súa chegada ao recinto, os asistentes poderán consultar no stand de Porremprego os perfís profesionais demandados por cada unha das empresas participantes e solicitar unha entrevista coa compañía do seu interese.

As citas, que serán limitadas, comezarán a asignarse a partir das 09:30 horas. No caso de non conseguir entrevista, os asistentes poderán igualmente visitar o Talent Hub e remitir directamente a súa candidatura ás empresas expositoras desde o seu dispositivo móbil mediante a captura dos códigos QR que cada compañía terá visibles no seu stand.

Entre os perfís máis demandados destacan postos vinculados á industria, automoción, mantemento industrial, robótica, soldadura, loxística, alimentación, administración, enxeñaría, telecomunicacións, comercio e atención ao cliente, entre outros.

O encontro contará tamén cunha zona de networking destinada a favorecer un contacto máis próximo entre empresas e candidatos nun ambiente distendido, promovendo a creación de conexións profesionais e novas oportunidades de emprego.

A programación complementarase con relatorios, obradoiros e conferencias centradas na orientación laboral, a formación e as necesidades actuais do mercado de traballo, coa participación de profesionais e expertos como Joaquín Dosil, Pedro Rodríguez ou Emilio Duró, que ofrecerán sesións orientadas á motivación, á empregabilidade e ao desenvolvemento persoal e profesional.

Expertos en recursos humanos darán as claves
O mercado laboral actual esixe unha conexión real entre as necesidades das empresas e o potencial dos candidatos. Ademáis da conferencia que impartirá a Universidade de Vigo, haberá unha sesión Coach con Joaquín Dosil sobre “Actitude que transforma: claves para converter metas en logros”; un obradoiro práctico impartido por Pedro Rodríguez sobre “Motivación e Habilidades para a Búsqueda de Emprego: Descubre o teu Oceano”, ou un Talent Pitch: “O teu talento en 2 minutos” . Ademais, claro, a conferencia de Emilio Duro sobre “Vivir con Sentido, Optimismo e Esperanza” .

Ademais celebrarase un Talent Briefing sobre necesidades reais de talento no mercado laboral. Nesta xornada, expertos de primeiro nivel de sectores estratéxicos como o industrial, biotecnolóxico e servizos compartirán a súa visión sobre o que as organizacións buscan hoxe en día e como os profesionais poden destacar nun proceso de selección.

Así, na mesa, que terá lugar o martes 19 de maio ás 12:30 h participarán: Ana Alonso, vicedirectora xeral en CITIC HIC Gándara Censa; Mª Eugenia Blanco, responsable de Recursos Humanos, Prevención e Medio Ambiente en Gonvarri Steel Industries; Cecilia Mariño, directora corporativa de Recursos Humanos en Zendal; Gorka Hermo, HR Manager en Constellium; Pablo Búa, director de Persoas en GANAIN; Cristian Pereyra,, HR Director de Magna e especialista en transformación organizativa e estratexia de talento; Flavia González, técnica de Selección de Persoal en Clece S.A.; Emilio Troncoso, director de Recursos Humanos de Grupo Taprega, e Jorge Trigo, director de Recursos Humanos en CEAMSA – Compañía Española de Algas Mariñas.

O obxectivo principal do encontro é desmitificar a entrevista de traballo e achegar a realidade dos despachos de selección á rúa. “Tamén as claves do que valoran as empresas”, explica Alejandro Lorenzo, alcalde do Porriño. Os relatores abordarán temas como as competencias máis demandadas, a importancia da actitude, a adaptación ás novas contornas dixitais e como construír unha carreira sólida na Galicia de 2026.

Este evento supón unha oportunidade única para que demandantes de emprego, estudantes e profesionais en activo coñezan de primeira man o que as empresas están a buscar “detrás do currículo”, fomentando un diálogo directo entre o talento local e os responsables de contratación.

Os horarios do Porriño Conecta Talento


09:30 h. – Recepción de asistentes
Acreditación, benvida e recollida de documentación.
09:30 a 14:00 horas e de 16:00 a 19:30 horas. – Talent Hub
10:00 h. – Apertura e inauguración das xornadas
Acto institucional de benvida.
10:30 h. – Relatorio
“Oferta formativa Universidade de Vigo”
Relator: Área de Captación de Alumnado. Universidade de Vigo
11:00 h. – Sesión Coach
“Actitude que transforma: claves para converter metas en logros”
Imparte: Joaquín Dosil
12:30 h. – Talent Briefing: Necesidades reais de talento no mercado laboral
13:30 h. – Espazo de networking con aperitivo
Momento para xerar contactos, intercambiar ideas e oportunidades.
Tarde
16:00 h. – Obradoiro práctico
“Motivación e Habilidades para a Búsqueda de Emprego: Descubre o teu Oceano”
Imparte: Pedro Rodríguez
17:00 h. – Talent Pitch: “O teu talento en 2 minutos”
17:30 h. – Conferencia inspiradora
“Vivir con Sentido, Optimismo e Esperanza”
Relator: Emilio Duró
19.00 h. – Acto de Clausura
Peche institucional da xornada e agradecemento ás persoas participantes.

17/05/2026 in Alcaldía, Emprego e formación, Igualdade, Industria, Novas Tecnoloxías, Sen categoría, Urbanismo, comercio e industria

O Porriño acolle este sábado un concerto que percorrerá a historia das bandas musicais a través dos séculos

  • A proposta da BRILAT ofrecerá ao público un itinerario sonoro que conecta a tradición das bandas co nacemento da música popular contemporánea

O Porriño, 15 de maio de 2026. A praza Arquitecto Palacios do Porriño converterase este sábado ás 19:30h nun punto de encontro para a música de banda cun concerto da Unidad de Música del Cuartel General del Mando de Apoyo a la Maniobra baixo a dirección do comandante músico D. Iván Rodríguez Armán. Este concerto trasladará ao público nunha viaxe pola evolución histórica das formacións musicais de vento e percusión, desde as primeiras agrupacións europeas ata a influencia que exerceron no desenvolvemento da música popular do século XX.

A actividade, enmarcada no día das Forzas Armadas, está promovida pola unidade musical da BRILAT en colaboración co Concello do Porriño, dentro dunha proposta cultural aberta á veciñanza que busca achegar a música de banda ao público desde unha perspectiva divulgativa e artística. O repertorio previsto fará un percorrido por diferentes estilos e tradicións musicais, mostrando como estas formacións foron ampliando a súa sonoridade e incorporando novos instrumentos ao longo do tempo.

O programa incluirá pezas recoñecidas da tradición bandística europea, así como composicións que evidencian a conexión entre as bandas e o posterior desenvolvemento de xéneros populares como o jazz ou o swing. Ao longo da actuación poderá apreciarse a evolución instrumental e estética das bandas, especialmente coa incorporación do saxofón e a expansión das grandes formacións musicais no século XIX e comezos do XX, que ocuparán un lugar destacado neste percorrido musical.

A proposta permitirá tamén descubrir como a música de banda chegou a converterse, durante décadas, nunha das principais expresións culturais colectivas antes da aparición da radio e do cine. A través das distintas pezas interpretadas, o público poderá recoñecer a pegada que estas formacións deixaron na música contemporánea e na memoria colectiva de varias xeracións.

O alcalde do Porriño, Alejandro Lorenzo, destaca: “actividades como esta contribúen a ampliar a programación musical do municipio e achegan ao público a unha experiencia divulgativa arredor da historia da música; é un concerto pensado para desfrutar, pero tamén para comprender a orixe das nosas tradicións”.

15/05/2026 in Cultura e festas

O Concello do Porriño dedicará cada 14 de maio ao mestre Antonio I. Paz Valverde

  • O Centro Cultural acollerá unha exposición permanente sobre o compositor

O Porriño, 15 de maio de 2026. Nunha praza ateigada de xente, este xoves destapouse o gravado en bronce que dá nome á nova praza Antonio Ignacio Paz Valverde. Un espazo no corazón do municipio, na nova humanización de Pío XII, que se atopa fronte á casa do aclamado compositor.

Alí, xunto ao piano no que compuxo a maioría das súas case 180 obras, un dos pianistas máis destacados de Galicia, Alejo Amoedo, tocou varias das súas pezas, acompañado de Dolores Crespo, soprano e destacada figura da lírica galega, e de Rita Baladrón, unha das mellores voces que saíron do municipio do Porriño e parte daquela coral que fundara Paz Valverde.

Foi unha emotiva homenaxe, na que participou tamén a Banda de Música do Porriño e, claro, a familia do compositor. A súa neta, Águeda, agradeceu que o seu legado puidera ser visible no municipio, mentres o alcalde, Alejandro Lorenzo, foi máis alá e anunciou que cada 14 de maio, data de nacemento do compositor, se lembrará no Porriño ao mestre. Ademais, engadiu que a exposición que durante a homenaxe presidiu a praza, na que figura gran parte da vida e da obra de Paz Valverde, será trasladada como exposición ao Centro Cultural, onde os músicos máis mozos poderán coñecer de preto a un gran referente que revitalizou a música galega nas décadas dos 60, 70 e 80.

Antonio foi un referente no Porriño, fundador da Coral Polifónica do CRC e, máis tarde, do Orfeón Porriñés, tamén do Coro Infantil. Pero a súa pegada viaxou moito máis alá desta vila. Autor de case 180 obras, entre composicións e arranxos, destacando a súa extensa produción relixiosa e tamén esas pezas nas que musicaba a grandes poetas do século XX, modernizando tamén a música polifónica do país. Poetas como Cunqueiro, Manuel María ou Celso Emilio Ferreiro, con quen mantiña correspondencia. Música que seguiu sendo e aínda hoxe é interpretada por grandes artistas como Carlos Núñez ou María do Ceo.

Música que se escoitou nunha homenaxe sentida e aplaudida no Porriño.

15/05/2026 in Alcaldía, Infraestruturas, Parques e xardíns, Parroquias, Patrimonio Municipal, Urbanismo, comercio e industria

O alcalde do Porriño reforza a colaboración co tecido industrial para impulsar novas infraestruturas e a atracción de investimentos

  • O encontro serviu tamén para ultimar detalles do foro de emprego “O Porriño Conecta Talento”

O Porriño, 14 de maio de 2026. O alcalde do Porriño, Alejandro Lorenzo, mantivo esta mañá unha reunión de traballo cunha ampla representación de empresas e asociacións empresariais situadas no municipio. Este encontro forma parte da folla de ruta do Goberno local para manter un contacto directo co sector industrial, motor económico da vila, que conta cunha superficie de solo industrial de preto de e 3,5 millóns de metros cadrados.

Durante a xuntanza, Lorenzo loubou o tecido empresarial porriñés e debullou os plans de modernización das áreas industriais. O rexedor destacou que, ademais dos investimentos realizados con fondos propios, o Concello está a ultimar proxectos que contarán co apoio financeiro da Xunta de Galicia e da Deputación de Pontevedra.

Unha das principais novidades será a creación de novas áreas de estacionamento, unha demanda tanto do empresariado como dos cadros de persoal, co obxectivo de mellorar a mobilidade e a funcionalidade diaria dos polígonos.

Compromiso fiscal: Orzamentos 2026

Co proxecto de orzamentos municipais xa finalizado o alcalde trasladou unha mensaxe de estabilidade e apoio ao sector: “A nosa prioridade é facilitar a actividade económica. Por iso, os novos orzamentos non inclúen subas de taxas tampouco para as empresas e manteñen as bonificacións fiscais para todas aquelas que decidan apostar polo Porriño para instalar os seus proxectos”, sinalou Alejandro Lorenzo. Para promover a implantación de novas empresas e o crecemento das que xa están instaladas, existen, de feito, bonificacións fiscais de ata o 95% nos impostos, sendo os máis baixos de Galicia . Tamén para promover a creación de emprego.

Conta atrás para ‘O Porriño Conecta Talento’

O encontro serviu tamén para ultimar detalles do foro de emprego “O Porriño Conecta Talento”, que terá lugar o vindeiro martes 19 de maio. Os empresarios trasladaron o seu máximo interese por esta iniciativa, que reunirá a medio cento de compañías.

Este primeiro Foro de Emprego, Formación e Oportunidades nace coa vocación de converterse nunha ponte directa entre as necesidades de contratación das empresas locais e o talento dos demandantes de emprego, fortalecendo a competitividade do Porriño como referente industrial de Galicia.

14/05/2026 in Alcaldía, Industria, Urbanismo, comercio e industria

O Porriño énchese de cor coa inauguración dos “Mini Can Parede” e o obradoiro “Pintando Cans”

O Porriño, 14 de maio de 2026 – O centro do Porriño transformouse hoxe nunha improvisada galería de arte ao aire libre. O alcalde, Alejandro Lorenzo, acompañou esta mañá aos escolares da vila na inauguración da exposición “Mini Can Parede”, unha das actividades máis queridas e agardadas que serven de limiar ao recoñecido Festival de Cans.

Durante a xornada os alumnos máis dun cento de alumnos e alumnas dos diferentes centros educativos do Porriño participaron nesta xornada de creación colectiva na que decoraron os míticos cans do Festival.

Este proxecto, que tanto éxito acada entre os/as máis cativos/as da vila, volve para facer partícipes a todos os nenos e nenas, traballando xuntos (sen importar a idade) na decoración dun “Can Parede” (unha silueta do noso emblema oficial que a organización lles facilitará aos colexios participantes).

A temática é libre e o material decorativo tamén. Non hai restricións técnicas nin materiais.

Todos os “Mini Can Parede”- 9 siluetas- se exhibirán nos farois da zona peonil do Porriño

O alcalde, Alejandro Lorenzo, quixo poñer en valor o talento e o esforzo dos participantes durante o percorrido: “Cada ano os nosos nenos e nenas sorpréndennos coa súa creatividade e ilusión. O ‘Mini Can Parede’ demostra que a cultura pode e debe ser accesible, participativa e integradora dende as primeiras etapas da vida”. Neste mesmo senso a concelleira de Educación, Carolina Gonzalez, destacou que “esta actividade é unha oportunidade para que os rapaces se sintan parte activa do festival, ao tempo que desenvolven habilidades artísticas e valores fundamentais como a cooperación e o respecto polo traballo común”.

14/05/2026 in Alcaldía, Cultura e festas, Educación e tecnoloxía, Mocidade, Parroquias, Patrimonio Municipal

Sete alumnos do Porriño sitúanse na elite creativa nacional co seu vídeo sobre o benestar emocional

  • O alcalde, Alejandro Lorenzo, felicitou persoalmente aos sete estudantes de Comercio Internacional que foron seleccionados entre os mellores de España polo seu vídeo sobre solidariedade e equidade.

O Porriño, 13 de maio de 2026.– O alcalde do Porriño, Alejandro Lorenzo, recibiu na Casa do Concello a un grupo de sete alumnos e alumnas de 1º curso do Ciclo Superior de Comercio Internacional do IES Ribeira do Louro. O motivo da recepción foi o recoñecemento ao seu traballo audiovisual titulado “Juventud en acción: Solidaridad y equidad en 60 segundos”, que resultou seleccionado polo SEPIE (Servizo Español para a Internacionalización da Educación) como un dos sete mellores proxectos a nivel nacional.

Un reto entre centros de toda España

A iniciativa xurdiu como un reto lanzado pola axencia nacional SEPIE para celebrar a Semana Europea da Xuventude. O comité de avaliación elixiu a proposta porriñesa entre múltiples centros de toda España. O equipo, formado por Verónica Vilaboa, David Lago, Gala Torres, Cristóbal Olmedo, Nerea Costas, Caroline Finol e Daniel Gregores, desenvolveu un “reel” que simboliza o peso emocional que cargan os mozos hoxe en día e como o apoio mutuo pode aliviar esa carga.

O alcalde salientou “o orgullo que supón para O Porriño contar con mocidade tan talentosa, capaz de unir a creatividade técnica cos valores de solidariedade e compromiso social”.

Formación práctica e transversal

Este éxito é froito da colaboración educativa no centro. A actividade encadrouse dentro da asignatura de negociación internacional como práctica real de comunicación dentro deste módulo formativo e dentro do proxecto de centro, integrado na temática anual da Biblioteca do IES Ribeira do Louro, dedicada ao Cine.

O equipo de traballo

O proxecto foi un esforzo colaborativo onde cinco alumnos exerceron como actores e actrices, mentres que os outros dous asumiron as tarefas de guión e dirección. No dossier presentado ao alcalde, detállase o uso de recursos simbólicos como unha mochila chea de pezas de roupa que representan os problemas invisibles da mocidade, que se van repartindo grazas á axuda dos compañeiros ata acadar un final de liberación e benestar emocional.

Con este recoñecemento, o Concello do Porriño quere poñer en valor a calidade do ensino público do municipio e a capacidade dos seus estudantes para destacar en certames de ámbito estatal.

13/05/2026 in Cultura e festas, Educación e tecnoloxía, Mocidade

O Porriño convértese no epicentro das letras coa Feira do Libro do 14 ao 17 de maio

  • Desde o pregón da Libraría Paz ata obradoiros de seres fantásticos e teatro familiar, o programa busca converter o libro no protagonista absoluto do lecer porriñés.

O Porriño, 12 de maio de 2026 – O Barrio de San Bieito acollerá desde este xoves a Feira do Libro do Porriño, unha cita imprescindible para os amantes da lectura que contará cunha ampla representación de librarías, autores e actividades culturais para todas as idades.

O evento, que se estenderá ata o domingo 17 de maio, ofrecerá un desconto do 10% en todos os libros. O horario de apertura será de 11:30 a 14:00 h e de 17:30 a 21:00 h, agás o xoves (só pola tarde) e o domingo, que pechará as súas portas ás 20:00 h.

Unha programación para todos os públicos

A feira arrancará oficialmente o xoves 14 ás 18:00 h co acto inaugural e o pregón a cargo da Libraría Paz, precedido pola actuación musical das Cantareiras Fonteliño.

Destaca o rexedor, Alejandro Lorenzo, a historia desta libraría no Porriño, apuntando a importancia das librarías para afianzar o comercio local. “Co desconto do 10% en todos os exemplares, esta é a oportunidade perfecta para que os a cidadanía porriñesa apoie o sector libreiro e leven a cultura ás súas casas. Convido a todo o mundo a participar nos obradoiros e a compartir este tempo cos autores e autoras que nos visitan.”

Entre os pratos fortes da programación destacan as actividades  infantís e familiares, con obradoiros de biblioterapia como “Contos que curan” , o espectáculo “Os Xogos do Paporrubio” e diversas sesións de teatro con Pablísimo e a compañía Pedras de cartón. Haberá, claro, encontros literarios coa  presentación de Mulleres que viven xuntas de Abril Camino ou a actividade de lecturas compartidas “Ler o que les” con Lucía Aldao, Silvia Penas e Samuel Merino o domingo.Tamén obradoiros: o sábado pola tarde, David Rodríguez guiará aos asistentes nun curioso obradoiro sobre os seres fantásticos de Galicia.

Autores nas casetas

Un nutrido grupo de escritores darase cita nas casetas das librarías participantes (Libraría Paz, Porto, Bahía Ribadeo, Copi-Rey, Uróboros, Boulevar e A Gata Tola) para asinar os seus últimos traballos. Entre os autores confirmados figuran Manuel Esteban, Amara Castro Cid, Samuel Ferro, Carlos Gabriel Fernández e Alba López Geada, entre moitos outros.

As persoas interesadas en participar nos obradoiros poden realizar a súa inscrición a través do sitio web oficial da Federación de Librarías de Galicia (www.librarias.org).

Actividades infantís

A Feira contará cun completo programa de actividades pensadas para todas as idades. Dentro destas actividades o Concello do Porriño ten programado  un contacontos que se levará a cabo no barrio de San Bieito o vindeiro 15 de maio (con dúas representacións, ás 11 e ás 12 horas, de 40 minutos de duración cada unha).

Mireia Casal, artista e especialista en desenvolvemento infantil, trasladrá o seu espectáculo de contacontos ao barrio de San Bieito  na data 15 de maio , para o disfrute dos nenos/as do noso Concello.

Como extensión do seu programa de biblioterapia infantil, “Contos que curan” (unha colección de boletíns que se publican periodicamente desde a biblioteca, para previr e xestionar distintos problemas emocionais na infancia), a biblioteca do Porriño ofrece tamén distinta sesións de contacontos nas instalacións da biblioteca.

Desde marzo a xuño, os segundos xoves de cada mes ás 17:30, a contacontos Mireia Casal escolle un dos contos recomendados na publicación para leer ao nenos e nenas de 3  a12 anos de idade.

Estas funcións van destinadas ao alumnado de 6º de Educación Infantil dos centros educativos do Porriño e ao alumnado de Educación Infantil do CEIP de Mosende, o que fai un total de 169 alumnos/as.

“Esta Feira do Libro é moito máis que un mercado de novidades editoriais; é a porta a universos infinitos que abrimos para toda a veciñanza do Porriño. Queremos que nenos, nenas e adultos se acheguen á carpa de actividades para gozar dunha programación que mestura literatura, música e teatro”, dixo Lorenzo.

Esta edición da Feira do Libro está organizada pola Federación de Librarías de Galicia e conta co apoio da Xunta de Galicia, o Concello do Porriño e a Deputación de Pontevedra.

Podes consultar o programa premendo aquí.

12/05/2026 in Cultura e festas, Educación e tecnoloxía, Mocidade, Normalización Lingüística