Novas

• Durante as sesións, combinaranse exercicios físicos con actividades de estimulación cognitiva, co obxectivo de que os participantes se sintan máis activos, autónomos e conectados coa contorna.

O Porriño, 2 de maio de 2025.– O Concello do Porriño continúa ampliando a súa oferta de actividades destinadas a mellorar a calidade de vida das persoas maiores. Nesta ocasión, faino a través do programa de envellecemento activo “CombiActívate”, promovido en colaboración co Centro de Día do Porriño, que ofrecerá talleres de memoria e actividade física no Centro Cultural Alba, en Torneiros.

As sesións desenvolveranse todos os martes, de 16:00 a 17:00 horas, durante os meses de maio e xuño —comezando a vindeira semana— e retomaranse de setembro a decembro. As persoas interesadas poden formalizar a súa inscrición directamente no Centro de Día do Porriño.

O alcalde do Porriño, Alejandro Lorenzo, sinalou que “seguimos traballando para que os nosos maiores teñan acceso a programas que favorezan un envellecemento activo e saudable. Este tipo de iniciativas non só melloran o seu benestar físico e mental, senón que tamén fortalecen o tecido social da nosa comunidade”.

O programa busca ofrecer un espazo de encontro e dinamización no que as persoas maiores poidan manterse activas tanto física como mentalmente, promovendo a súa autonomía e benestar emocional.

Pola súa parte, a concelleira de Sanidade e Política Social, Teresa Veloso, destacou que “a colaboración entre o Centro de Día e o Concello está a dar moi bos resultados. Estes talleres son unha ferramenta clave para manter as capacidades cognitivas e físicas dos nosos maiores, e tamén para previr o illamento social”.

Durante as sesións, combinaranse exercicios físicos con actividades de estimulación cognitiva, co obxectivo de que os participantes se sintan máis activos, autónomos e conectados coa contorna.

• Debido á previsión de fortes precipitacións para esta fin de semana, o Concello do Porriño apraza a celebración do Fli-Po Market e reabre o prazo de inscrición ata o 30 de maio.

O Porriño, 2 de maio de 2025.– O Concello do Porriño informa que, debido á previsión de fortes choivas para esta fin de semana, o Fli-Po Market queda adiado. O evento celebrarase finalmente os días 7 e 8 de xuño, mantendo o seu emprazamento na Praza 8 de Marzo (Avenida de Galicia).

A decisión foi adoptada mediante Decreto de Alcaldía co fin de garantir a seguridade das persoas asistentes e participantes, así como o bo desenvolvemento de todas as actividades programadas.

Co cambio de datas, ábrese tamén un novo prazo para a presentación de solicitudes, co obxectivo de facilitar a incorporación de novas propostas. As persoas interesadas poderán inscribirse ata o 30 de maio ás 14:00 horas, conforme ás condicións recollidas nas bases dispoñibles na web municipal.

O Fli-Po Market, organizado polo Concello do Porriño, é unha iniciativa pioneira para fomentar o consumo responsable e dar visibilidade á economía circular. O evento contará con postos de venda, troco e doazón de produtos de segunda man, ademais dunha ampla programación que incluirá obradoiros creativos, concertos, actividades infantís e propostas gastronómicas.

Desde o Concello anímase a toda a cidadanía e visitantes a participar nesta edición reprogramada, que combina sustentabilidade, cultura e lecer nun formato innovador e inclusivo.

• A cita desenvolverase a partir das 19:00 horas na Praza Antonio Palacios e converterá este emblemático espazo nun escenario de encontro coa tradición e co folclore galego da man de diferentes agrupacións do municipio

O Porriño, 2 de maio de 2025.– O Porriño celebra este sábado, 3 de maio, o Festival Folclórico das Asociacións Culturais e Veciñais. A cita desenvolverase a partir das 19:00 horas na Praza Antonio Palacios e converterá este emblemático espazo nun escenario de encontro coa tradición e co folclore galego, da man de diferentes agrupacións do municipio que traballan na preservación e difusión da nosa cultura popular.

O alcalde do Porriño, Alejandro Lorenzo, sinalou que “a celebración deste festival é unha oportunidade para recoñecer o labor das asociacións culturais que manteñen vivas as nosas tradicións. É tamén un momento para reforzar a identidade colectiva e o orgullo de pertencer a unha vila con tanta riqueza cultural”.

Durante a tarde, o público poderá gozar das actuacións do Grupo Cantareiras da Forna Budiño, o Grupo de Gaitas de Chenlo, o Grupo de Cantareiras de Carracido, o Grupo Acordecans e Os Penedíños de Atios. Todos eles ofrecerán unha mostra do seu repertorio tradicional, nunha cita que promete música, cor e sentimento de pertenza.

O concelleiro de Cultura, Bienvenido Estévez, expresou o seu agradecemento ás entidades participantes e destacou que “este festival é un exemplo do enorme potencial cultural do Porriño. As nosas asociacións non só conservan o patrimonio inmaterial, senón que fan que forme parte activa da vida cultural do municipio”.

A organización do festival é froito da colaboración entre o Concello do Porriño e as propias asociacións culturais e veciñais, que suman esforzos para que esta xornada se converta nun punto de encontro para a veciñanza.

Segundo Alejandro Lorenzo, “eventos coma este fortalecen os lazos entre parroquias e xeran espazos de convivencia arredor da nosa cultura, algo fundamental para seguir construíndo unha sociedade cohesionada e orgullosa da súa historia”.

O Concello anima a toda a cidadanía a achegarse á Praza Antonio Palacios e participar nesta festa da tradición, que ofrece unha ocasión única para desfrutar do folclore local en comunidade.

• Cunha traxectoria de máis de 80 anos e unha facturación anual de 85 millóns de euros, os seus produtos chegan a máis de 50 países.
• A visita do alcalde Alejandro Lorenzo puxo en valor a aposta da compañía pola innovación sostible e o crecemento industrial.

O Porriño, 30 de abril de 2025.– O alcalde do Porriño, Alejandro Lorenzo, visitou esta mañá as instalacións de Zelnova Zeltia, compañía referente na fabricación de produtos para o fogar e líder no seu sector a nivel europeo. Acompañado polo tenente de alcalde, Carlos Martínez, e pola concelleira de Sanidade e Política Social, Teresa Veloso, o rexedor percorreu as instalacións e coñeceu de primeira man os novos proxectos e investimentos que a empresa está a desenvolver.

Durante a visita, Alejandro Lorenzo destacou a importancia estratéxica de Zelnova Zeltia para o tecido industrial do municipio: “Zelnova Zeltia é un orgullo para O Porriño e un exemplo de como se pode apostar pola innovación e a sustentabilidade sen renunciar ás raíces locais. Que empresas coma esta aposten por crecer dende aquí é unha garantía de futuro para o noso concello e para Galicia”, asegurou o alcalde.

O equipo directivo da compañía, encabezado polo seu presidente Pedro Fernández Puentes, explicou o proceso de expansión sostida que está a vivir Zelnova Zeltia, cun modelo baseado na innovación, o compromiso ambiental e a internacionalización. Fernández Puentes salientou: “Estamos nun momento clave para a compañía. Demostramos que é posible crecer de forma sostida apostando pola innovación, a sustentabilidade e o compromiso con Galicia”.
Ademais, destacou a importancia de manter as operacións no Porriño:
“Para nós é fundamental seguir desenvolvendo a nosa actividade desde O Porriño, xerando emprego e valor na contorna”.

A compañía, cunha traxectoria de máis de 80 anos, alcanzou unha facturación anual de 85 millóns de euros en 2023 e conta cunha presenza internacional que supera o 55 % das súas vendas fora de España. Con máis de 250 traballadores, Zelnova Zeltia mantén as súas fábricas e laboratorios en España, ademais de contar con oficinas comerciais en Italia.

Durante a visita, o alcalde tivo ocasión de coñecer algúns dos logros máis destacados da empresa no eido da innovación e a sustentabilidade. Zelnova Zeltia foi pioneira na fabricación do primeiro insecticida en aerosol en España e no lanzamento do primeiro ambientador eléctrico a nivel mundial. Ademais, leva décadas comprometida coa protección ambiental, sendo unha das primeiras compañías en empregar propelentes que non danan a capa de ozono.

Desde o Concello do Porriño reiteramos o noso compromiso co apoio ás empresas que apostan polo desenvolvemento sostible, pola xeración de emprego de calidade e pola proxección internacional dende a nosa terra. O éxito de Zelnova Zeltia é, sen dúbida, un reflexo do potencial industrial e humano do Porriño.

• Douscentos ciclistas das categorías máster e xuvenil participarán esta fin de semana nunha proba por etapas que percorrerá os concellos de Mos, Ponteareas e O Porriño, nun desafío que mestura esixencia física, organización exemplar e paixón polo ciclismo galego.

O Porriño, 30 de abril de 2025.– O Concello do Porriño foi escenario esta mañá da presentación oficial da IX Challenge As Rías Baixas, unha das citas máis importantes do ciclismo galego, que reunirá a douscentos corredores das categorías máster e xuvenil durante a fin de semana do 3 e 4 de maio. A proba, organizada polo club ciclista Master da Louriña, percorrerá os municipios de Mos, Ponteareas e O Porriño nun percorrido esixente que combina tramos en liña e contrarreloxo.

No acto participaron o alcalde do Porriño, Alejandro Lorenzo, o concelleiro de Deportes, Abel Estévez, así como os seus homólogos de Ponteareas e Mos, Nicolás Rodríguez e Camilo Grandal, respectivamente. Tamén asistiron o presidente do club organizador, Juan José Álvarez Cerdeira, por parte da Federación Galega de Ciclismo, Óscar Sánchez,  Rafael Pérez, representando a unha das empresas patrocinadoras do evento deportivo e Horacio Barros.

Alejandro Lorenzo salientou a importancia que ten para O Porriño ser sede dunha proba desta dimensión, afirmando que “a Challenge As Rías Baixas é moito máis ca unha competición deportiva; é unha oportunidade para mostrar o dinamismo e o compromiso dos nosos concellos coa promoción da actividade física e coa organización de eventos de primeiro nivel”. O rexedor destacou tamén o impacto positivo que terá na economía local e no tecido asociativo, animando a toda a cidadanía a vivir esta festa do ciclismo.

Pola súa parte, Abel Estévez destacou o traballo conxunto realizado entre administracións e entidades deportivas para facer realidade esta nova edición. “Estamos moi orgullosos de acoller unha cita que combina deporte de alto nivel e participación cidadá”, asegurou o concelleiro de Deportes, quen engadiu que “o ciclismo representa valores fundamentais como o esforzo, a solidariedade e a superación, principios que desde O Porriño queremos seguir impulsando entre os máis novos”.

A IX Challenge As Rías Baixas desenvolverase en tres etapas moi esixentes. O sábado 3 de maio disputarase o Gran Premio de Mos, cun percorrido en liña de 79 quilómetros e 800 metros de desnivel acumulado. Esa mesma tarde terá lugar a contrarreloxo individual de Ponteareas, sobre un trazado técnico de 11 quilómetros. O domingo 4, o Gran Premio do Porriño pechará a competición cun percorrido de 85 quilómetros e preto de 1.000 metros de desnivel, nunha etapa que decidirá os vencedores finais.

O evento premiará aos líderes das diferentes clasificacións xerais e de especialidades, co obxectivo de fomentar a competitividade e a emoción ata a última pedalada. Desde a organización e os concellos implicados convidan a todos os veciños e visitantes a apoiar aos corredores, convertendo esta IX Challenge As Rías Baixas nunha verdadeira festa do ciclismo galego.