Novas

O Porriño lederou en abril, xunto a Vigo, a creación de emprego na Área Metropolitana: a finais do mes pasado traballaban na vila 539 persoas máis que cando o actual Goberno local iniciara a súa xestión

O Porriño liderou o mes pasado, xunto con Vigo, a creación de emprego na Área Metropolitana de Vigo. A finais do mes pasado había na vila 1.600 persoas sen traballo, 68 menos que a finais de marzo.

Dacordo cos datos publicados este venres polo Ministerio de Emprego e Seguridade Social, e a Consellería de Economía, Emprego e Industria da Xunta de Galicia, a taxa de desemprego situouse no Porriño no 17,3%, preto de 6 puntos menos que cando o actual Goberno Local empezara  o seu mandato, cando 2.139 porriñeses estaban na procura dun posto de traballo, 539 máis que na actualidade.

En relación co mes de abril de 2017, o número de veciñas e veciños anotadas coma demandantes na oficina do Servizo Galego de Emprego baixou de 1.842 a 1.600, o que supón que hai 241 traballadoras e traballadores máis no Porriño: en so un ano o paro caeu en máis de 3 puntos.

A alcaldesa, Eva García de la Torre subliña que “as medidas que estamos a impulsar dende o Goberno local están dando os seus froitos”. O programa ‘Porriño Accede’, baseado en convenios asinados entre o Concello e empresas da vila, grazas ao cal o ano pasado 67 persoas atoparon traballo logo de ter completado este programa, o que representa o 55,8% de todas e todos os participantes no mesmo, unha proporción que no caso das industrias do sector da automoción é do 73,3% -con 55 insercións de 75 alumnas e alumnos

Doutra banda, o ‘Plan de Emprego para Mulleres (PIEM)’, dirixido este ano a un total de 85 porriñesas en situación de desemprego, especialmente, mulleres novas, menores de 30 anos e sen cualificación profesional, conqueriu xa que, o mes pasado, 11 delas comezasen a traballar coma soldadoras na planta de Viza Automoción no Porriño, que conta cun plantel de 500 persoas e subministra os seus produtos a grupos tan importantes coma PSA Peugeot Citroën, Audi, Renault, Volkswagen, Mercedes, Toyota ou Porsche.

Dentro destes mesmos programas, 16 persoas iniciaron as súas prácticas en Gestamp grupo internacional adicado ao deseño, desenrolo e fabricación de compoñentes metálicos para o automóvil,de cara a súa posible integración laboral nesta compañía.

05/05/2018 in Alcaldía, Emprego e formación

A alcaldesa recibe no Concello a Noemí García, veciña do Porriño e semifinalista de ‘La Voz Kids’ e agarda que poida actuar nas Festas do Cristo deste ano

A alcaldesa do Porriño, Eva García de la Torre, xunto coa concelleira de Educación, Lourdes Moure, recibiu no Concello a Noemí Fernández, a concursante de 15 anos de ‘La Voz Kids’, o programa de Telecinco, que este vindeiro luns disputa a semifinal do concurso.

Noemi, veciña do Porriño, ademais de ter unha magnífica voz, toca a guitarra e o piano, é unha alumna de “sobresaíntes” no IES Pino Manso, segundo confirmou o seu pai quen indicou que a ilusión da súa filla é a de estudar medicina.

https://www.dailymotion.com/video/x6ic8sl

Noemí chega á semifinais de ‘La Voz Kids’ logo de superar unhas probas nas que participaron, en toda España, 30.000 nenas e nenos das que saíron 120 candidatos e candidatas que logo quedaron en 90, finalmente en 15, logo en 8 e, por fin, en 5 nas semifinais, das que pasarán á final 3 por equipo.

A alcaldesa trasladoulle a Noemí e ao seu pai o seu interese en que poida actuar nas vindeiras Festas do Cristo, para que “todas as veciñas e veciños do Porriño admiremos o seu talento en directo”.

05/05/2018 in Alcaldía, Cultura e festas

A Biblioteca Municipal do Porriño, unha das 4 mellores bibliotecas públicas de Galicia, segundo os datos da Xunta

A Biblioteca Municipal do Porriño, que depende directamente da Alcaldía, é segundo os datos proporcionados pola Xunta, unha das 4 mellores bibliotecas públicas de Galicia.

Na actualidade, dacordo cos devanditos datos, a Biblioteca Municipal do Porriño é a primeira biblioteca galega en número de préstamos por habitante, superando un crecemento do 1.000% nos últimos 11 anos, un aumento que, dacordo coas estatísticas do primeiro trimestre deste 2018, indican que o número de préstamos aumentou un 30% en relación co mesmo período do ano pasado.

Hoxe a Biblioteca Municipal ten preto de 6.100 usuarios, está recoñecida pola Federación Española de Municipios e Provincias (FEMP) coma unha das 350 mellores bibliotecas do Estado, recibindo esta distinción ata en 13 ocasións entre os anos 2002 e 2017 e, entre outros recoñecementos conta con Premio Mes de Abril da Xunta de Galicia, Mención Especial do Premio María Moliner de Animación á Lectura, do Ministerio de Cultura ou o 1º Premio Nacional de Animación á Lectura.

En febreiro de 2017 a Consellería de Cultura elixiu á Biblioteca do Porriño para integrarse na renovada Rede de Bibliotecas de Galicia baseada na plataforma de software de código aberto Koha; un ano antes puxo en marcha un programa de actividades, que seguiu en 2017 e 2018, no que participaron varios centos de persoas.

As devanditas actividades abranguen obradoiros de alfabetización dixital para persoas maiores, clubs de lectura, grupos de conversa en alemán e inglés con profesores titulados, obradoiros de fotografía dixital con profesionais, de escritura creativa, roteiros, cursos de cociña ou documentais.

Ese 2018, a Biblioteca ten en marcha o programa ‘Bibliocultura’, que supón a realización dunha obra de teatro infantil ao mes coa finalidade de animar á lectura e achegar as artes escénicas á poboación infantil:  trátase de 9 actuacións de 9 compañías de teatros e monicreques de Galicia.

03/05/2018 in Alcaldía, Cultura e festas

@festivaldecans contará con Kevin Weatherill, dos Immaculate Fools, estreará o ‘Invernadoiro’, un novo espazo para o audiovisual e a música

O Festival de Cans inaugura este ano o ‘Invernadoiro’, un novo espazo para o audiovisual e a música, e faino coa visita de Kevin Weatherill, un artista de relevancia internacional no pop das últimas décadas.

Á fronte da súa banda ‘Immaculate Fools’, Weatherill alcanzou o recoñecemento nos anos 80 con emocionantes cancións como “Hearts of Fortune”, “Tragic Comedy” ou a mesma “Immaculate Fools” que deu nome ao grupo, sempre cun pé no pop de autor e outro nas tradicións folk e blues. A súa actuación conformará no ‘Invernadoiro de Mucha do Peso’ un programa dobre coa presentación e proxección dun avance de Kevin vs. Ray, o documental dos galegos Eduardo Herrero e Manuel Lemos sobre a singular peripecia vital de Weatherill, afincado hoxe nunha pequena aldea de Cambados.

https://vimeo.com/256553555

A de Kevin Weatherill non será a única actividade que una música e audiovisual no Invernadoiro, que concentrará a súa programación o sábado 26 de maio. Alí terá tamén lugar unha retrospectiva adicada aos videoclips do realizador, deseñador e músico Rubén Domínguez, unha figura indispensable no underground galego da última década, que actuará ademais con Pantis, o seu aclamado proxecto de pop electrónico.

Domínguez, membro tamén de Chicharrón ou Telephones Rouges, gañou o premio a mellor videoclip en Cans en 2012 e dirixiu máis de vinte pezas para bandas como Novedades Carminha, Franc3s ou A Veces Ciclón nas que deu forma a un persoal universo, caracterizado polo risco no uso da posprodución e a animación ou a exploración das posibilidades rítmicas da imaxe.

02/05/2018 in Alcaldía, Cultura e festas

11 porriñesas en situación de desemprego consiguen traballo logo de completar a súa formación coma soldadoras nos programas impulsados pola Concellería de Emprego

16 persoas en situación de desemprego veñen de rematar a primeira parte da formación do Curso de Soldadura, organizado pola Concellería de Emprego e Igualdade, que dirixe Soledad Girón, e que tivo unha duración de 40 horas.

Todas e todos empezaron este mesmo luns semana as prácticas, que durarán ate ao 22 de maio, en varias empresas do Porriño, a meirande parte deles, 12 exactamente, en Gestamp, grupo internacional adicado ao deseño, desenrolo e fabricación de compoñentes metálicos para o automóvil que ten un plantel de 407 empregadas en empregados no Porriño, de cara a súa posible integración laboral nas mesmas.

A metade dos participantes neste curso forman parte do Programa ‘Porriño Accede’, posto en marcha polo Goberno local e que mediante convenios asinados con empresas, especialmente dos polígonos industriais do Porriño, deseña programas de formación específicos adaptados ás necesidades de persoal desas empresas.

Estes acordos entre o Concello do Porriño con diferentes compañías fixo posible que o ano pasado das 120 persoas que estaban neste programa  67 atoparan traballo logo de rematar a súa formación, o cal representa preto dun 56% do total, unha porcentaxe que chega ao 73%-preto de dous de cada tres- en canto se refire a sinatura de contratos laborais en empresas da automoción.

A outra metade proceden do Plan Integral de Emprego para Mulleres (PIEM), no que están integradas 85 porriñesas, na súa maioría menores de 30 anos, sen cualificación profesional.

11 integrantes do PIEM están xa traballando en Viza automoción

Once das integrantes do Plan Integral de Emprego para Mulleres, que tamén se formaran nun taller de soldadura, están traballando na actualidade  en Viza Automoción, logo do convenio subscrito co Concello para a formación das mesmas a a súa incorporación coma soldadoras nesta compañía, que na actualidade emprega a 500 traballadores e traballadoras na súa planta do Porriño e que subministra os seus produtos a grupos tan importantes coma PSA Peugeot Citroën, Audi, Renault, Volkswagen, Mercedes, Toyota ou Porsche.

01/05/2018 in Alcaldía, Emprego e formación

O Goberno local levará a cabo unha reforma e humanización integral da Avenida de Galicia, cun investimento de 600.000€ dinanciado con cargo ao ‘Plan Concellos 2018’ da @depo_es

O Goberno local do Porriño acometerá a reforma e humanización integral da Avenida de Galicia, un proxecto que disporá dun orzamento total de 600.000€ e que estará financiado con cargo ao ‘Plan Concellos 2018’ da Deputación de Pontevedra.

A alcaldesa, Eva García de la Torre, subliña que o obxectivo principal é o de “recuperar espazos públicos para os veciños” e para o cal, engade , “haberá elementos que van a dar resposta ás demandas dos cidadáns”, coma un parque infantil, zonas verdes, espazos de lecer e partes que disporán de sombra de xeito que se poida gozar dos mesmos nos meses do verán.

Ao tempo que “se integra esta zona na nosa vida cotiá, creando un lugar con atractivo e personalidade propia”, tamén “apostamos polo impulso económico dunha das arterias do Porriño”, buscando o incremento de número de establecementos e negocios de todo tipo, dende hostaleiros ata de novas tecnoloxías, cubrindo un déficit dotacional e acabando coa falla de atractivo desta parte da vila pola que pasan cada día milleiros de persoas.

O prazo de realización dos traballos, unha vez sexan licitados e adxudicados, será duns 6 meses e os mesmos acometeranse sobre unha distancia total duns 450 e máis de 2.270 metros cadrados de superficie, incluíndo a medianeira que separa os carrís de cada sentido de circulación.

Considerando que a Avenida de Galicia é unha das principais vías de acceso ao casco urbano, as obras vanse realizar en dúas fases coa finalidade de reducir ao máximo as molestias que poidan ocasionar.

Os traballos, ademais das melloras dotacionais e estéticas, abranguerán unha nova rede de conexión de pluviais, instalación de luminarias e xardineiras, adiamento da praza e das beirarrúas, reposición de pavimentos e mobiliario urbano, plantación de árbores, colocación de xardíns ou a instalación dunha pérgola de folla.

29/04/2018 in Alcaldía

@festivaldecans incorpora 9 curtas a ‘FuraCans’, a súa nova sección competitiva de non ficción

Por primeira vez na súa historia, o Festival de Cans incorpora na súa Sección Oficial unha competición de curtametraxes de non ficción, que leva o nome de ‘FuraCans’.

“Deste xeito, outorga un espazo preeminente a aqueles filmes que exploran as diferentes variantes do documental e o cinema experimental, dando un novo pulo a esta sección ofrecéndolle ao público de Cans unha mostra de pezas cheas de procura estética e con xeitos de narrar afastados do convencional”.

O público pode atopar unha banda aproximacións ao documental dende unha perspectiva social, como ‘Marxes’, de Sara Chuerches (que celebrará a súa estrea absoluta en Cans); ou ‘La mujer invisible’, a curta de Noemí Chantada gañadora de tres premios en Curtocircuito, froito dunha longa e sensible investigación sobre mulleres en situación de prostitución.

Por outra banda, hai na escolma pezas que traballan con material etnográfico como ‘Salitre’ nas veas, de Adrián Canoura; ‘Rapa das bestas’, de Jaione Camborda; ou ‘Charkpen (esperanza)’ de Paulino Cadórniga. Se esta última ten un espírito fotográfico no seu rexistro dos pobos indíxenas Selk’nam en Arxentina e Chile, as curtas de Canoura e Camborda empregan recursos experimentais para achegarse ao traballo dos mariñeiros e á citada rapa das bestas respectivamente. Esta experimentación estética é común a pezas como ‘Forest’, de Guille Vázquez; ou ‘Tiempo’, de Alicia Alonso, que tamén se verá por primeira vez no Festival. Completan a selección dous filmes encadradas en proxectos ambiciosos dos seus autores: ‘Americano’, curta de Fon Cortizo sobre Emanuel Xavier, unha das voces máis representativas da escena Spoken Word de Nova York, que é parte do seu traballo prolongado arredor de poetas e o seu proceso creativo. Por último, ‘Europa’, de Hugo Amoedo, forma parte dunha “Triloxía Belga” deste cineasta galego que utiliza o formato do diario fílmico e que xa pasou por ZINEBI, ALCINE ou o OUFF.

‘El séptimo vicio’ instalarase en Cans

A programación do Festival vén de sumar outra presenza fundamental do mundo do cinema en España: Radio 3 fará unha programación especial en Cans para celebrar o 15º do certame. Javier Tolentino realizará tres días consecutivos en Cans o seu programa El Séptimo Vicio, o programa de referencia dos cinéfilos e cinéfilas.

28/04/2018 in Alcaldía, Cultura e festas

Remata o asfaltado do Contrasto e este venres os técnicos e a directora da obra reúnense para tratar do proxecto para levar a Rede Municipal de Abastecemento a todo o barrio

Este mesmo xoves rematou o asfaltado no barrio do Contrasto, en Torneiros, para tapar o pavimento nas zonas da catas realizadas polos técnicos da Xunta de Galicia que tomaron mostras para a realización dun ‘mapa’ sobre a presencia de lindano.

As obras,  que como todas as realizadas ata hoxe, están financiadas polo Concello do Porriño, contaron cun orzamento dun 30.000€ destinados, ademáis da realización do asfaltado, ao transporte de contedores e xestión das terras.

Para as vindeiras semanas está previsto o inicio dos traballos para levar a rede municipal de abastecemento a todas as vivendas deste barrio. Coma paso previo, este mesmo venres, día 27 de abril, no Concello do Porriño, está convocada unha xuntanza entre técnicos da Xunta de Galicia, do Consorcio de Augas do Louro, do Concello do Porriño e a enxeñeira que dirixirá os mesmos.

Hai que lembrar que este proxecto, que estaba xa deseñado a finais do ano pasado, e que contará cun orzamento de 350.000€ que será asumido na súa totalidade con fondos municipais.

27/04/2018 in Alcaldía

As medidas adoptadas polo Goberno local para a mellora do alumeado e o cambio de caldeiras supoñen 100.000€ anuais de aforro no recibo do subministro de enerxía e 220 toneladas menos de emisión de dióxido de carbono á atmosfera

Esa é a cantidade que deixará de pagar o Concello do Porriño e a de CO2 que deixarán de respirar as veciñas e veciños logo das iniciativas postas en marcha pola Concellería de Vías e Obras, que abranguen dende a renovación das instalacións do alumeado público, a substitución de 1.200 novas luminarias led, o cambio de caldeiras por outras tipo de ‘pallets’ ou a eliminación de parte dos coñecidos como ‘puntos de tantos alzados’ por modernos contadores que permiten a facturación real e que se pague pola enerxía consumida en realidade.

O tenente de alcalde, Manuel Carrera, amósase “especialmente orgulloso” de ter cumprido o abxectivo que se fixara a principios do actual mandato, hai preto de tres anos, e adianta que a inversión de 1 millón de euros nos vindeiros meses, cantidade solicitada ao Instituto para a Diversificación e Aforro de la Enerxía (IDAE) para rematar, coa “alegalidade, logo de 30 anos”, dos ‘tantos alzados’, e rematar a “legalización total” de todos os puntos de subministro e a extensión das luminarias tipo led a todas as parroquias do concello.

‘Plan Concellos 2016’ da Deputación

Manuel Carrera subliña que con cargo ao Plan Concellos 2016, da Deputación de Pontevedra, colocáronse, en total, 467 luminarias novas de 30 e de 60W, delas 96 en Torneiros, 176 en Budiño, 84 en Mosende, e 111 en Pontellas, ás que hai que engadir as preto de 400 nos polígonos industriais- PPI 6, PPI7, A Granxa e As Gándaras-.

Estes novos focos teñen unha vida útil, media, de 60.000 horas, un custo mínimo en mantemento, ofrecen un alumeado de 110 lumens por watt, “mantendo os niveis de luminosidade nesta zona tan transitada”, recortan o consumo de máis de 220.000 Kilowatios/Hora a 82.000 e, “e o máis importante: reducen en máis de 80 toneladas as emisións de CO2 á atmosfera”.

 Novas caldeiras de biomasa

O aforro e a redución da contaminación complétanse coa posta en funcionamento das novas caldeiras de biomasa instaladas polo Goberno local en 11 dependencias da vila, entre elas o propio Concello ou o Pavillón Municipal do Deporte-como tivo ocasión de comprobar hai xa un ano o conselleiro de Economía, Emprego e Industria, Francisco Conde, quen felicitara ao Concello por esta iniciativa-.

As novas caldeiras, indica Manuel Carrera, “están a aforrarnos preto de 20.000€ anuais no recibo de enerxía e teñen evitado xa, en este ano, a emisión de 142 toneladas de CO2 ao aire”.

25/04/2018 in Alcaldía, Vías e obras

@festivaldecans ten este ano a Burning coma prato forte da súa oferta musical

O mesmo espírito ecléctico que traslada a selección audiovisual do Festival de Cans está nas bandas e artistas que estarán nesta 15ª edición do certame.  Dende nomes consagrados como os Burning ou Magín Blanco a grupos novos e cada vez máis populares como Esteban & Manuel, a proposta busca atender a todos os públicos, buscando a variedade de estilos coa calidade como denominador común.

O sábado, día 26 de maio, centrará un número importante de actuacións, entre elas a da que é probablemente a banda en activo máis mítica de España: Burning. Aínda fieis ao estilo que os fixo populares, a súa actitude rock é capaz de trasladar ao público a un universo plasmado en clásicos como “¿Qué hace una chica como tú en un sitio como este?”, “Jim Dinamita” ou “Mueve tus caderas”. Burning, que se converteu na banda sonora de máis dunha xeración, logrou sobrevivir co seu rock and roll ao paso dos anos ata chegar á súa formación actual encabezada polo emblemático Johnny Cifuentes. O concerto terá lugar ás 00h00 no Torreiro, onde haberá dobre sesión de rock and roll xa que á tarde pasarán polo mesmo escenario Familia Caamagno co seu vibrante garaxe sesenteiro.

Xa se poden mercar as entradas da Sección Oficial

Dende este martes 24 de abril, xa están dispoñibles na tenda virtual do festival os primeiros 500 packs de entradas para a Sección Oficial a concurso e camiseta, que inclúen tamén unha chapa exclusiva como agasallo. Estes packs, que poderán recollerse nas tendas de Nikis Galicia e na tenda Tía Tata do Porriño, estarán á venda dende o martes 24 de abril ata o venres 4 de maio, e terán un prezo de 21,5 euros, que sen acollerse a esta oferta sería de 28,5 euros (entrada 12 euros, camiseta 12 euros, chapa 1 euro, catálogo do Festival 2 euros e 1,5 euros correspondentes aos gastos de xestión).

As entradas para FuraCans, pola súa parte, costarán 5 euros, estarán dispoñibles a partir do xoves 26 de abril en tenda.festivaldecans.com e poderán retirarse no posto de merchandising do festival durante os días de celebración do certame.

25/04/2018 in Alcaldía, Cultura e festas