Novas

O Goberno local vén de convocar, un por un, ás  veciñas e veciños do Contrasto afectados pola presenza de lindano a unha xuntanza con técnicos das consellerías de Sanidade e Medio Ambiente, no Salón de Plenos do Concello o vindeiro luns, día 19, ás 6 da tarde.

Nesta xuntanza, que se realiza logo de que a alcaldesa mantivese unha reunión en Santiago, o pasado luns, día 12, con responsábeis das dúas consellerías, os especialistas de Sanidade e Medio Ambiente do Goberno de Galicia, que é quen ten a competencia exclusiva no tratamento e resolución da contaminación por lindano, informarán aos veciños das xestións que están a realizar para solucionar esta situación.

Antes da dar explicacións ás veciñas e veciños de Torneiros, os técnicos manterán unha xuntanza coa alcaldesa e os voceiros dos grupos municipais e na mesma, Eva García de la Torre reiterará a demanda que ven de facer a Corporación do Porriño dende hai meses, “que non é outra que a esixencia de que a Xunta de Galicia, que ten a competencia exclusiva nesta situación, asuma os custes da des-contaminación”.

Neste senso, a alcaldesa lembra que, ata hoxe, “en todo o que se refire á contaminación por lindano a iniciativa foi sempre, dende o primeiro día, do Concello do Porriño”: foi o Concello quen informou-primeiro aos veciños e logo a todos os medios de comunicación- da presenza de lindano; foi o Goberno local quen solicitou a primeira reunión con responsábeis e técnicos da Xunta de Galicia, xuntanza que se levou a cabo o 27 de outubro pasado en Compostela, coa presenza da alcaldesa; foi o Concello a que convocou a todas e todos os veciños do barrio do Contrasto a unha primeira xuntanza conxunta o 8 de novembro e, 9 días despois, a unha  segunda reunión, no Salón de Plenos do Concello, con técnicos da Xunta;  foi o Concello quen fixo chegar, hai meses, auga en garrafas a cada unha das casas do Contrasto que so tiñan subministro de auga de pozo, auga, necesaria para poder beber e cociñar, subministro que continúa na actualidade.

Foi o Concello o que, o día 25 de novembro, colocou nas vivendas afectadas depósitos de 1.000 litros de auga-nalgún caso ata dous-con motores que garanten a súa chegada ás casas; foi o Goberno local quen, dende o 4 de decembro pasado, ten xa un proxecto para levar a rede municipal de saneamento a todas e cada unha das casas afectadas polo lindano, unha obra orzamentada en máis de 350.000€, que asumirá na súa totalidade o Concello do Porriño, sen axuda algunha Xunta.

Foi a Xunta de Voceiros o órgano que, como aprobara o Pleno do Concello, aprobou a constitución da ‘Comisión de Seguimento do Lindano’; foi o Goberno municipal quen  contratou os servizos dunha empresa especializada en tratamento da terra na que apareceron restos de lindano, “seguindo as indicacións, criterios e normas do Servizo de Xestión de Residuos e da Administración Autonómica”; o pasado 21 de decembro, a alcaldesa mantivo unha reunión en Vigo con 11 técnicos e responsábeis das consellerías de Medio Ambiente e Sanidade do Goberno de Galicia para dar conta, “moi polo miúdo”, das accións emprendidas polo Concello.

Ata o día de hoxe, o Concello do Porriño, é única administración que vén de destinar orzamentos e tomar medidas concretas, avaliábeis e demostrábeis, con accións e datas exactas e rexistradas, para protexer á saúde das veciñas e veciños.

Neste tempo, o Concello recibiu información das accións que tiña previsto impulsar a Xunta de Galicia, que ata o día de hoxe non se plasmaron noutro acto que a toma de mostras no Contrasto, sendo o Concello do Porriño, de novo, quen asumiu a totalidade dos gastos tanto das catas previas coma das obras de levantado do pavimento para poder tomar as devanditas mostras, sen que a Goberno de Galicia asumise o pago de un so euro, maila “que, hai que reiterar, é quen ten a competencia absoluta e exclusiva nesta materia” . 

O Porriño estreará orzamentos logo de seis anos de prórrogas –hai que lembrar que o goberno do PP non foi quen de aprobalos entre 2012 e 2015 maila a ter maioría absoluta- das contas municipais tra-lo acordo acadado pola alcaldesa cos voceiros de EU-SON, Pedro Ocampo, BNG, Pedro Pereira, e a concelleira do Grupo de Non Adscritos, Sabela Landín.

As contas que ían este xoves a un Pleno Extraordinario, serán ratificadas a semana que ven nunha nova xuntanza da Corporación, tempo que será necesario para incorporar as propostas, negociadas hoxe ata apenas 2 horas antes do comezo do Pleno desta tarde e, subliña Eva García de la Torre, “abren tamén unha marxe para intentar sumar aos oito concelleiros do Partido Popular”.

A alcaldesa amósase “moi satisfeita” polo feito de reeditar o apoio que tivo na sesión de investidura e recoñece e agradece a “actitude e a predisposición de Pedro Ocampo [voceiro de EU-SON], Sabela Landín [Non Adscritos] e Pedro Pereira [portavoz do BNG], para poder sacar adiante estas contas”.

García de la Torre, quen reitera que este acordo é froito dun traballo “moi intenso e prolongado”, sinala que o contido do novo orzamento é “realista”, con partidas “suficientemente dotadas para non ter que acudir a outras fórmulas, como os créditos extraordinarios” e, sobre todo, “fai posible que contemos con máis de 3 millóns que se adicarán integramente a inversión para resolver moitos dos problemas que preocupan ás veciñas e veciños do Porriño”.

Estes 3 millóns terán como destinos principais a extensión da rede municipal de saneamento ás parroquias; a mellora de camiños e estradas municipais; a realización dun estudo urbanístico, social e medio-ambiental, “moi polo miúdo”,  en Torneiros; acometer una “moi necesaria e agardada” humanización de San Benito ou afrontar a regularización da situación de traballadores municipais e considerar una Oferta Pública de Emprego na medida que nos permita a lei.

Este xoves, día 15 ás 6 da tarde, o Pleno do Concello debatirá, nunha xuntanza extraordinaria, a Aprobación Inicial do Orzamento Municipal para 2018.

A alcaldesa maniféstase “especialmente satisfeita” polo acordo asinado o sábado, día 10, con Pedro Ocampo, voceiro do Grupo Municipal de EU-SON no Concello do Porriño para a aprobación dos orzamentos municipais para o ano 2018.

Eva García de la Torre amósase segura de que as propostas presentadas por EU-SON “non so melloran os orzamentos, senón que serán beneficiosas para o conxunto das veciñas e veciños do Porriño”, salienta a “boa sintonía” que houbo durante as negociacións con Pedro Ocampo e agradece a súa disposición para chegar a un entendemento.

O acordo recolle distintas actuacións, unhas no eido económico e outras sociais, que estarán en marcha ao longo deste ano. Entre as primeiras un estudo para investimentos na mellora da Parroquia de Torneiros, que irá reflectido nos orzamentos; a creación dunha Oficina de Participación Cidadá que serva de enlace entre a veciñanza e o Concello; a elaboración da Ordenanza, aprobada en Pleno, para modificar a taxa para a utilización privativa, ou o aproveitamento especial do dominio público local; traballar na transparencia en todos os eidos da xestión municipal, ou que nos pregos de contratación que se realicen desde o Concello e as súas empresas dependentes se incorporen cláusulas sociais e ambientais.

Entre os compromisos económicos cabe salientar o investimento, cando menos, de 1 millón de euros na parroquia de Torneiros, ou que os contratos de Recollida de Residuos Sólidos Urbanos e da Limpeza Viaria se fagan polo mínimo tempo mentres se licita un estudio para a xestión directa por parte do Concello ou de xeito mancomunado con outros limítrofes: un ano prorrogable a dous no caso de Limpeza Viaria e catro anos no caso da Recollida de Residuos Sólidos Urbanos.

Eva García de la Torre agarda que sexa posible, así mesmo, acadar o apoio do Bloque Nacionalista Galego e, neste sentido mantivo varias xuntanzas moi proveitosas e útiles co seu voceiro, Pedro Pereira, nos días pasados, o mesmo que sumar a este acordo á representante do Grupo Municipal de Non Adscritos, Sabela Landín.

“Estamos moi preto de poder aprobar uns novos orzamentos por maioría, sen ter que acudir a outras posibilidades, como a Cuestión de Confianza vencellada aos presupostos a cal, dende logo, non dubidaría en presentar se fose necesario”, engade.

Sexa coma fose, a alcaldesa, como expresou ao voceiro de EU-SON, Pedro Ocampo, manterá o acordo asinado con él e co seu grupo, aínda no caso de que se vise obrigada a recorrer a esa Cuestión de Confianza.