O Servizo de Infraestruturas da Deputación de Pontevedra fixo chegar ao Concello do Porriño as actuacións previstas no “III Plan Móvese” para aumentar a seguridade viaria nas estradas provinciais que, no que atinxe a este municipio, proxectan instalar “lombos” e pasos de peóns sobreelevados, na E.P. 2401. Concretamente nun treito de 5 quilómetros entre O Porriño e Mosende, proxéctanse 5 redutores físicos de velocidade (lombos) e 8 pasos de peóns sobreelevados.
Ademais estas actuacións de calmado do tráfico levarán aparelladas pequenas reformas dos tramos de beirarrúas e dos espazos de aparcadoiro ao carón dos pasos de peóns para facilitar a visibilidade neses treitos da estrada., como se pode apreciar no gráfico adxunto
As actuacións definidas polos técnicos da Deputación son produto dun proceso participativo co Concello do Porriño e despois dun traballo de campo para analizar as necesidades demandadas para deseñar as solucións técnicas en cada caso.
A concelleira de Vías e Obras, Lourdes Moure anuncia que “a parroquia de Mosende disporá dun novo Centro Cultural en condicións, atendendo deste xeito unha vella demanda veciñal que esta concelleira asumiu como un compromiso político e persoal”, segundo manifestou a segunda tenente alcalde.
O contrato sairá a licitación nas vindeiras semanas cun prezo base de 381.150 euros (IVE incluído). As obras deberán ter un prazo de execución de 9 meses.
A actuación pretende corrixir o problema de espazo actual no centro social existente e prestar un mellor servizo á parroquia de Mosende. A mellora do equipamento tal e como propón o anteproxecto encargado pola concelleira Moure, “permitirá dotar dunha moderna e cómoda instalación na que usuarios como visitantes dispoñan dos servizos axeitados ás súas necesidades”, declarou a edil socialista.
O anteproxecto propón un novo Centro Cultural no que se pretende ubicar un salón multiusos e unha aula polivalente nun novo inmoble de planta baixa nos terreos ao carón do centro social preexistente.
Pretendese executar unha nova edificación, formado por dous bloques, un para un gran salón multiusos e o outro como aula polivalente. Segundo o anteproxecto “trátase dun sólido con cuberta plana de 14 m x 15 m para o salón multiusos e conectado, outro sólido con cuberta plana de 6 m x 13 m para aula polivalente cos aseos e instalacións axeitadas para cubrir as necesidades para persoas con mobilidade reducida que utilicen este equipamento que ocupará una superficie total de 300 metros cadrados.
Esta mañá operarios do Servizo de Vías e Obras do Concello iniciaron un zafarrancho de reparacións de beirarrúas que se estenderá ao longo das vindeiras semanas polo centro urbano, parroquias e polígonos industriais. Comezaron co arranxo e reposición de baldosas de pedra na praza Arquitecto Antonio Palacios e na rúa peonil. “Demos preferencia á contorna do Concello pola maior afluencia de peóns que está a notarse co incremento dos peregrinos e visitantes” subliñou a alcaldesa Eva García.
Indicou que “de seguido continuarán co zafarrancho por outras rúas do centro urbano e despois pasarán a reparar beirarrúas en parroquias e nos polígonos industriais, nomeadamente, na Granxa onde hai moitas deterioradas”, engadiu a alcaldesa. Estes traballos realízanse grazas á incorporación de novos traballadores ao Servizo Municipal de Vías e Obras, contratados por seis meses, a través da achega do Plan Concellos 2021 da Deputación.
Os votos conxuntos do PP e de Manuel Carrera obrigaron a deixar enriba da mesa, a tramitación do Plan Estratéxico de Obras de Mantenento en Vías Municipais e Saneamento que a Concellería de Vías e Obras, dirixida pola socialista Lourdes Moure, levou hoxe a ditame pola Comisión Municipal de Economía. O devandito Plan, cun investimento previsto de 730.000 €, está baseado nunha moción que presentara o PP no pleno de abril, aprobada por unanimidade. Unha primeira proposta de plan plurianual da Concellería, levada ao pleno de maio, quedou pendente para matizar cos voceiros que foron chamados a consultas.
Segundo a concelleira Lourdes Moure “das reunións con Manuel Carrera e Alejandro Lorenzo e Pedro Pereira concluímos que había acordo coas actuacións descritas no Plan aínda que formularon algunhas propostas concretas que temos recollido”, indicou a responsable de Vías e Obras.
Tan só as concelleiras de EU SON non acudiron á convocatoria de reunións previas realizada pola concelleira Moure.
Hoxe, na Comisión Municipal de Economía, o Plan Estratéxico de Obras non se ditaminou. Os tres votos favorables a súa tramitación (2 PSOE e 1 BNG) foron derrotados por 5 votos en contra. “Produciuse, de xeito inesperado, unha pinza entre os concelleiros do PP e o voceiro de UDDL para obstruir o traballo desta concelleira”, explicou Lourdes Moure.
O catro concelleiros do PP pediron deixar enriba da mesa o asunto, proposta que contou co respaldo de Manuel Carrera. EU SON non asistiu.
Lourdes Moure valorou que “a pinza que fan PP e Manuel Carrera o que intentan é obstruir e non permitir que esta Concellería de Vías e Obras faga o seu traballo”. A segunda tenente de alcalde lamentou a “falla de coherencia dos que presentan mocións queixándose que todo está fatal e reclamando que hai que arranxar O Porriño”.
A concelleira reclamou “unha política sinceira de mellorar Porriño, tanto desde o goberno como na oposición” e pediu que “nos deixemos de pataleos, non vaia ser que o faga ésta e non o fixeramos nós”, rematou Moure.
A Concellería de Vías e Obras que dirixe a socialista Lourdes Moure anuncia o arranxo por vía de urxencia de dous camiños en Chenlo e Torneiros que se atopan en moi mal estado. Trátase do Camiño de Penedo, en Chenlo onde a concelleira comprobou o estado do mesmo en compañía do alcalde pedáneo da entidade local menor, Jacobo Alonso. E do Camiño existente en Torneiros entre a Fase 1 e o local da AAVV San Salvador, cun grao de deterioro moi importante, segundo comprobou a concelleira en compañía do enxeñeiro municipal.
Estas obras acometeranse con cargo a unha partida de 30.000 € de fondos propios. Sepáranse e priorízanse estes arranxos de ambas vías municipais en Chenlo e Torneiros, do proxecto máis ambicioso que é o Plan Estratéxico de Obras e Mantemento en Vías Municipais e Saneamento que elaborou a Concellería que dirixe Lourdes Moure. Precisamente hoxe venres levase para ditame o devandito Plan, á Comisión Municipal Informativa de Economía pois require dunha modificación orzamentaria de 730.000 euros para o seu desenvolvemento.
O Concello do Porriño segue a desenvolver o plan de bacheos que realiza a Concellería de Vías e Obras en rúas e estradas de titularidade municipal en todas as parroquias do termo municipal. Hoxe actúase en Budiño, nomeadamente en rúas do Polígono Industrial de A Granxa para reparar numerosos desperfectos orixinados polo numeroso tráfico pesado que soportan. A alcaldesa Eva García e a concelleira delegada, Lourdes Moure acudiron a comprobar os traballos en compañía de Miguel Feijóo, encargado da brigada de obras. As imaxes refiren os arranxos que se realizaban na rúa “J A Toxa” na confluencia coa avenida principal, á altura das naves das empresas “Megalta” e “Velpa”. Esta actuación solicitouse ao Concello na última reunión da comisión delegada da Entidade Urbanística de Conservación do Polígono A Granxa. As obras realízanse con medios propios e os contratados por concurso para subministrar materiais e maquinaria pesada.
Trinta estradas e rúas de titularidade municipal terán sido arranxados ata esta semana dentro do plan de bacheos que realiza a Concellería de Vías e Obras que dirixe Lourdes Moure. Ata agora, 15 carreteiras bachearonse Atios, 5 en Cans e outras 5 rúas no Porriño Centro. As rúas bacheadas no casco urbano foron Xogo da Ola, Navuxil, Sequeiras, Manuel Rodríguez e Gurpilleira. Esta mañá a concelleira acudiu a inspeccionar o resultado dalgúns destes traballos en Cans e Atios. Esta semana o persoal de Vías e Obras do Concello acomete arranxos na parroquia de Torneiros. A continuación seguirán por Pontelllas, Mosende, Chenlo e Budiño, segundo a planificación establecida. Levará esta orde “por economía de esforzos e aforro de tempo e materiais”, explicou Lourdes Moure. Ata o momento, utilizáronse 28 toneladas de asfalto, 3.000 litros de emulsión quente e unha tonelada de area. As obras realízanse con medios propios e os contratados por concurso para subministrar materiais e maquinaria pesada. Doutra banda, a Concellería de Vías e Obras prepara un plan de reasfaltados para camiños e estradas municipais que xa non poden ser bacheados ao grao de deterioro. Unha acción que se realizará cunha partida específica pendente de asignar no seguinte orzamento municipal.
Durante esta tarde e ata a noite, persoal da empresa “Naturgalia”, contratada para desenvolver o arranxo da rotunda da Avenida Principal coa rúa Arousa, no acceso ao polígono industrial de A Granxa, realiza o fresado da anterior capa de rodadura, moi deteriorada, para pavimentar de novo. As obras serán reiniciadas mañá sábado coa previsión de que poden concluír ao longo do día.
Lourdes Moure, concelleiro de Vías e Obras, departamento do que depende esta actuación, foi esta tarde a comprobar o progreso das tarefas.
Esta acción está financiada con fondos do Plan Concellos 2020 da Deputación Provincial e responden a unha demanda da Entidade Urbanística de Conservación do Polígono Industrial de A Granxa.
A Concellería de Vías e Obras informa que o pavimentado da rotonda da Avenida Principal-Rúa Arousa do polígono industrial de A Granxa realizaranse entre a tarde deste venres 26 e ao longo do sábado 27, buscando o menor impacto no tráfico de vehículos.
Lourdes Moure, concelleira responsable explicou que a empresa que levará a cabo a pavimentación, a firma “Naturgalia”, informoulle que o fresado da rotonda comezará a partir das catro da tarde deste venres e que a Policía Local xa foi notificada para regular o tráfico.
Do mesmo xeito, Moure Varela tamén comunicou a execución das obras á Entidade Urbanística de Conservación do polígono de A Granxa cumprindo un compromiso adquirido polo Concello. Esta rotonda rexistra a diario aforos de tráfico de milleiros de vehículos, especialmente tráfico pesado.
Os traballos desenvolvense con fondos do Plan Concellos 2020 da Deputación de Pontevedra.
A concelleira de Vías e Obras de Porriño, Lourdes Moure e o seu homólogo de Salceda, Miguel González acordaron hoxe dar unha solución máis integral ao problema das inundacións que se produce en Budiño.
A inundación de fincas no Rego da Lama-Casal, viuse agravada polos recentes traballos realizados no almacén de “Amazon” pola empresa “EAM” que xa prometera a semana pasada solucionar desviando a auga á rede de pluviais.
Non obstante, tras a reunión mantida esta mañá no terreo polos concelleiros de ambos municipios, acordouse estender esta canle ata o límite co concello de Salceda, que, pola súa banda, tamén prolongará os traballos para solucionar un problema similar.
