O Concello seguirá apoiando á Asociación Osilice

O Concello seguirá apoiando de xeito “total” á Asociación Osilice, que axuda a traballadores afectados pola silicose

O alcalde accidental do Porriño, Manuel Carrera, e o concelleiro de Industria, Marcelino Coto, mantiveron unha xuntanza con Juan Carlos Giraldez, representante da Asociación Osilice, que axuda aos traballadores afectados pola silicose e que é a única asociación deste xénero en Galicia.

A xuntanza serviu para que o alcalde accidental confirmase o “apoio total” do Goberno local ao traballo de Osilice que, coma sinalou Juan Carlos Giraldez, ofrece a súa axuda ás persoas que padecen esta doenza que, dacordo co Instituto Nacional da Silicose son o 17,5% dos traballadores das canteiras de Porriño e Ponteareas, preto de 1 de cada 5, segundo os estudos realizados a 440 operarios de 24 empresas da zona.

Coma apuntan os datos desta asociación, preto dun 90% de quen leva traballando máis de 20 anos na canteira ten silicose e aínda que queda moito camiño para acabar con esta enfermidade, principalmente porque hai doentes que non saben que a padecen. Afortunadamente, nos últimos anos, grazas ás novas medidas de prevención produciuse unha notable rebaixa dos riscos de contraer silicose no territorio español.

Na xuntanza, Manuel Carrera e Marcelino Coto reiteraron a disposición do Concello de seguir mantendo unha estreita cooperación coa asociación, considerando que O Porriño é zona de España que ten máis número de afectados pola inhalación de partículas de sílice e que os mesmos precisan orientación á hora de coñecer a enfermidade, un axeitado asesoramento xurídico, orientación para a tramitación da incapacidade, para o cal incorporará nos vindeiros días a un traballador social.

Así mesmo, polo que se refire á asistencia médica, Juan Carlos Giraldez subliñou que Osilice ven de asinar un acordo coa dirección do Hospital Álvaro Cunqueiro para a mellora do tratamento dos traballadores que presentan síntomas de neumoconiose, ocasionada polo depósito de po de sílice nos pulmóns.

 

O Porriño celebra este domingo a Festa dos Cachos

O Porriño celebra este domingo, día 14, a tradicional ‘Festa dos Cachos’ na que se agarda que os asistentes den conta de centos de pratos deste riquísimo crustáceo

A O concelleiro de Comercio, Marcelino Coto presentou no Concello unha nova edición da ‘Festa dos Cachos’ que se celebra este domingo, día 14 no Porriño. O concelleiro estivo acompañado por membros da directiva da Asociación de Veciños de San Benito e San Sebastián, impulsora desta festa, e o presidente da Asociación de Hostaleiros do Porriño, José Manuel Fortes.

Marcelino Coto lembrou que foi esta asociación veciñal a que recuperou esta celebración, que data de 1810, e que se celebra “no lugar mesmo na que a sitúa a tradición: no Cristo dos Cachos, un lugar emblemático do Porriño”.

O concelleiro sinalou que as pasadas edicións foron un “éxito” e que agardaba que a deste 2017 seguise na mesma liña. Para facelo posible, engadiu, conta coa colaboración do Concello que este ano, ademais da ‘Animación de rúa’ coa actuación de charangas, tamén farase cargo da colocación dunha carpa de 150 metros cadrados, para adiantarse ás posibles inclemencias do tempo, do sistema de son e do corte do tráfico para “garantir que os asistentes poidan gozar do día con total comodidade”.

Sindo Lago, vicepresidente da Asociación de Veciños de San Benito e San Sebastián, adiantou que o programa deste ano empezará ao mediodía co pregón a cargo de Manuel Areal, que fora presidente desta asociación, seguirá coa ‘Sesión Vermú’, na que os asistentes tamén poderán pedir pulpo ou empanada, a degustación e venda dos cachos na carpa, ‘Animación na rúa’ con charangas, sen esquecer que haberá unha zona de lecer para os máis cativos.

Pola súa banda, o presidente dos hostaleiros sinalou que, ademais dos cachos que se sirvan ou se vendan na carpa, “que o ano pasado apenas duraron unha hora ante a cantidade de público que se achegou á festa”, tamén se servirán, dende a 1 da tarde, nos restaurantes Val da Louriña, Maracaibo, Cólleo con Pinzas, O Carreteiro, La de Chato, Adega de Montero e Restaurante Manolo.

José Manuel Fortes indicou que os prezos deste ano serán de 6€, para as persoas que acudan a degustar os cachos á carpa, e de 7€ para quen o fagan nos sete restaurantes participantes. Fortes confirmou que logo de que o ano pasado se agotasen “en moi poucos minutos entre cincocentos e seiscentos cachos”, este ano hai máis cantidade en previsión da cantidade de persoas que se agarda cheguen a O Porriño este domingo.

 

O Goberno Local acorda un convenio coa directiva do Colexio Santo Tomás

O Goberno Local acorda coa directiva do Colexio Santo Tomás, a ANPA e representantes da Comunidade de Montes de Torneiros, asinar un convenio que garantia, oara sempre, o acceso ao centro educativo

O tenente de alcalde, Manuel Carrera, a concelleira de Educación, Lourdes Moure, e o concelleiro de de Urbanismo, Marcelino Coto, mantiveron unha xuntanza este mércores con representantes do Colexio Santo Tomás, Asociacións de Nais e Pais (ANPA) e Comunidade de Montes de Torneiros, para tratar do problema do acceso ao centro.

Manuel Carrera sinalou que trátase, ademais do feito de que dos país e nais que levan e recollen aos seus fillos no colexio e teñen que deixar os coches na estrada PO-331, senón, “especialmente, un problema de seguridade que hai que resolver canto antes”.

Neste eido, o tenente de alcalde comprometeuse a que o Concello faga axiña unha valoración dos camiños que levan ao centro educativo, para proceder ao seu arranxo e asfaltado de xeito que teña saía á devandita estrada-da que é titular a Deputación- á altura de A Mota e, ao tempo “asinar un convenio a tres bandas entre o Concello, o Colexio Santo Tomás e a Comunidade de Montes de Torneiros” de xeito que os camiños que dan a este centro educativo pasen a ser considerados coma camiños públicos, poidan ser usados para sempre polo colexio.

Ao mesmo tempo, salientou Manuel Carrera, o Goberno local acometerá a conexión á rede de saneamento de varias das vivendas situadas nestes camiños ao tempo que un deles se deixará no seu estado natural para que Comunidade de Montes poida rematar unha zona de lecer.

Porén o Goberno local levará ao Pleno do Concello esta iniciativa, co seu estudo e valoración económica, posto que , como salienta o tenente de alcalde, “é o xeito máis rápido de poder levar este traballo adiante”.

Carrera salientou que todas as partes amosaron a súa satisfacción ao remate da xuntanza. Que todos eles están citados a unha segunda reunión dentro dunha semana para dar conta da contía económica desta obra, e amosouse especialmente satisfeito por acabar coas denuncias e queixas das veciñas e veciños da zona pero “particularmente polo feito de que remataremos cun risco moi considerable que se está a dar na entrada e saída do colexio cada día”.

O conselleiro de Economía, Emprego e Industria, está no Porriño

A alcaldesa, xunto co tenente de alcalde, Manuel Carrera, o concelleiro de Industria, Marcelino Coto, e a concelleira de Emprego,Soledad Girón, recibe ao conselleiro de Economía, Emprego e Industria, que está no Porriño para coñecer o funcionamento das novas caldeiras de biomasa instaladas polo Concello en 11 dependencias da vila, entre elas o Pavillón Municipal do Deporte.

O conselleiro de Economía, Emprego Industria, felicita ao Porriño pola súa aposta pola biomasa

A alcaldesa, xunto co tenente de alcalde, Manuel Carrera, o concelleiro de Industria, Marcelino Coto, e a concelleira de Emprego,Soledad Girón, recibe ao conselleiro de Economía, Emprego e Industria, que está no Porriño para coñecer o funcionamento das novas caldeiras de biomasa instaladas polo Concello en 11 dependencias da vila, entre elas o Pavillón Municipal do Deporte.
O conselleiro felicitou ao Concello do Porriño pola súa aposta pola biomasa, as enerxias renovables e os combustibles de orixe galego.

200 trampas en todas as parroquias do Porriño para loitar contra a Vespa velutina

A Concellería de Medio Ambiente coloca 200 trampas en todas as parroquias do Porriño para loitar contra a Vespa velutina

A Concellería de Medio Ambiente segue adiante coa “loita activa” contra a Vespa Velutina, “realizando unha campaña moi polo miúdo que ten coma obxectivo o trampeo das raíñas e un seguimento constante do número delas atrapadas”, indica o concelleiro Marcelino Coto.

Precisamente este mércores, especialistas de Adoa, a empresa contratada polo Concello para que colocase as 200 trampas que están situadas en todas as parroquias do Porriño, procedían a renovar as mesmas, “un proceso que se fai cada 15 días”.

Coto subliña que estes ‘cepos’ están dotados cun atraínte de nova xeración “específico para insectos desta especie e que ten coma principal obxectivo captura das raíñas fundadoras dos niños xusto neste intre, coincidindo co inicio da primavera,no que é máis prolífica”.

O concelleiro amósase especialmente agradecido á Asociación de Apicultores que, coincidindo coa celebración da Feira Apícola das Rías Baixas no Porriño, felicitou á Concellería de Medio Ambiente polo seu esforzo na loita contra esta especie invasora e puxo á mesma coma un exemplo.

“Este traballo -sinala Marceino Coto- responde a unha sensibilidade histórica deste concello co mundo apícola, que ten coma exemplo a Feira que se organiza na vila dende hai preto de 30 anos, e co interese de dar unha resposta rápida e organizada a un problema que afecta a todas as veciñas e veciños do Porriño”.

Coto adianta que o Concello seguirá asumindo o custo da loita contra a Vespa velutina e que ao final da campaña se analizarán os resultados para medir a súa efectividade e decidir que outras medidas haberá que poñer en marcha.

Lucy’s Tire, establecese no Porriño

Lucy’s Tire, que ven de establecer no Porriño o seu centro principal para España, amosa o seu interese no Plan de Formacion Laboral do Concello, durante a visita á mesma da alcaldesa e do concelleiro de Industria

A alcaldesa, Eva García de la Torre, e o concelleiro de Industria, Marcelino Coto, visitaron a firma Lucy´s Tire, que terá no Porriño a súa planta principal en España.

Lucy’s Tire, é unha empresa comercializadora de neumáticos, establecida nos Estados Unidos en 1985 que no ano 2000, logo de chegar a liderar a exportación do sector ao Centro e Sur de América e o Caribe, abre sete filiais no estado de Florida dando servizo, anualmente, a máis de 25.000 transportistas, converténdose nunha referencia nesta industria.

Os propietarios desta multinacional, José Ríos, natural de Galicia, e Lucy García Rios, de país galegos, deciden hai 4 anos abrir unha delegación en Galicia, concretamente en Pontevedra, fundando Lucy’Tire España, dirixida por Jeronimo Rios.

Logo de integrarse no mercado europeo, a empresa ven de dar un novo paso e investir no seu propio centro de servizo de Automóbiles e Camións no Porriño e, dende aquí, levar os seus produtos a toda a Península Ibérica.

A alcaldesa transmitiu ao presidente de Lucy’s Tire a súa satisfacción polo feito de que decidise radicar a central para España no Porriño, amosoulle a total colaboración do Concello e expúxolle os plans formativos, “orientados á creación de emprego”, impulsados dende o Goberno local e que veñen de cristalizar en diferentes acordos con empresas de varios sectores, plans nos que os responsábeis de Lucy’s Tire amosáronse interesados en canto facilitan a formación profesional de futuros empregados, baseados nas necesidades das diferentes empresas da área do Porriño.

Pola súa banda, o concelleiro de Industria sinalou que dende o Concello se fixera “todo o traballo” para que esta nova empresa se establecese no Porriño. Marcelino Coto subliñou que “axilizar e facilitar todos os trámites para que as empresas que queiran investir na vila e radicarse nela, é unha prioridade para o Goberno local” dado que supón máis riqueza, máis desenrolo e máis traballo, “obxectivos que son xa unha norma que este Goberno se ten marcado”.

A alcaldesa mantén unha xuntanza coa Asociación Lena

A alcaldesa e os voceiros dos grupos municipais manterán, o xoves, unha xuntanza coa Asociación Lena para tratar, coma xa se fixo en catro ocasións anteriores, a creación dun refuxio de animais no Porriño

O vindeiro xoves, día 16, a alcaldesa, xunto cos responsábeis dos grupos municipais, manterá unha xuntanza cos representantes da Asociación Protectora de Animais Lena para tratar, de novo, sobre a creación dun refuxio de animais no Porriño.

O Goberno local mantivo, con antelación, distintas reunións cos responsábeis de Lena, nas que estiveron presentes o concelleiro de Urbanismo ou a alcaldesa, para tentar de atopar unha solución conxunta á necesidade de que exista un refuxio na vila. Ese foi o tema tratado nas catro xuntanzas anteriores celebradas o 27 de agosto e 19 de novembro de 2015, o 3 de marzo de 2016-hai apenas un ano-, e o pasado 24 de novembro, hai menos de catro meses.

Netas ocasións, o Goberno local informou á asociación sobre as xestións feitas ara atopar un lugar acaído no que sexa posible situar o refuxio, os reparos postos pola Xunta de Galicia ás propostas feitas polo Concello, as dificultades que plantexan os lugares hachados polo feito de non ter conexión á rede de saneamento e o plantexamento do propio Goberno local de facer, no caso de que fose necesario, unha poza séptica-e a valeirala cando sexa preciso-. Nesa mesmas reunións o Goberno local mesmo solicitou a Lena a súa colaboración nestas xestións e, en todas elas, as dúas partes acordaron traballar xuntas.

Dende que se fixera cargo da responsabilidade de Goberno, o equipo dirixido por Eva García de la Torre mantivo unha colaboración constante coa Asociación Protectora Lena, un traballo en común que deu coma froitos, ademáis da percura dun lugar para o refuxio, dúas campañas para promover á adopción, a impulsada nas pasadas Festas do Cristo de 2016 que tivo a súa continuación no Nadal pasado, hai apenas tres meses, na que se puxo a atención no feito de que os animais non son xoguetes para regalar en Reis.

A coperación con Lena seguiu o mes pasado: a Concellería de Educacion impulsou un obradoiro sobre a Linguaxe Canina destinado a alumnas e alumnos de 2º de Primaria dos colexios do Porriño. No mesmo, os cativos aprenderon como achegarse a un can, a distinguir entre un can ou cadela asustada, leda ou enfadada, o que tiñan que facer antes de acariñala e que sinais deben buscar para tranquilizala, ou tranquilizalo.

O Goberno Local asina un convenio cun “importante grupo inversor”

O Goberno Local asina un convenio cun “importante grupo inversor” que suporá a creación dunha grande área comercial e a transformación da rúa Antonio Palacios e a parroquia de Cans

O Goberno local do Porriño ven de dar un importante paso para confirmar as expectativas dun ambicioso plan que abrangue a rúa Antonio Palacios e a parroquia de Cans.

Este xoves, a alcaldesa, Eva García de la Torre, e o concelleiro de Urbanismo, Marcelino Coto, subscribiron un convenio entre un “importante grupo inversor” e o Concello que ten coma obxectivo, como salientou Marcelino Coto, “acometer unha reforma integral” nesta parte da vila.

O concelleiro sinala a relevancia desta decisión, “xustificada polo interese público”, que suporá a eliminación do tráfico pesado do casco urbano e a “humanización de Antonio Palacios, con novas beirarrúas, alumeado, ou faixas verdes e de esparexemento, que fará posible que esta rúa pase a ser unha grande avenida”.

Coto lembra que en neste entorno están o Colexio Hermanos Quiroga, o IES Pino Manso, o CEIP Fernández López, unha gardería da Galiña Azul, o Pavillón e a Piscina Municipal, e que a reforma significará unha “mellora substancial na seguridade e na calidade de vida” das veciñas e veciños da contorna, en particular, e de todas as porriñesas e porriñeses, en conxunto.

O convenio abrangue, ademais, a radicación nunhas parcelas que conforman unha superficie de máis de 25.000 metros cadrados no que se abrirá unha grande área comercial e de lecer, con novos espazos dotacionais que, subliña Marcelino Coto, “creará numerosos postos de traballo, tanto directos coma indirectos”.

Logo da sinatura do convenio, o seguinte paso é promover unha reforma puntual do Plan Xeral de Ordenación Urbana que, remata Coto, está en xa en marcha.