Urbanismo, comercio e industria arquivos - Páxina 7 de 26

Entregados os seis premios do Xogo “A Miña Avoa”

Hoxe celebrouse nun acto no Centro Cultural Municipal, a entrega dos seis premios aos gañadores do Xogo “A Miña Avoa”, un concurso organizado polo Concello e a Oficina Municipal de Información Xuvenil, Omix, destinado a promover o consumo no comercio e a hostalería do Porriño. O Xogo contou coa colaboración de 145 establecementos da vila.
A veciñanza porriñesa participou dun xeito moi activo e acadou descubrir nun tempo record os seis “tesouros”, pois o xogo comezou o sábado 10 de abril e tense rematado en dez días cando a previsión era que durase ata primeiros de xuño.
O xogo que era aberto a toda a cidadanía da vila, consistiu na procura dos seis “tesouros”, premios de 50€ para consumir no comercio e na hostalería locais. Dando protagonismo á economía local, non só coa súa implicación, senón tamén, porque os premios reverten no consumo das propias empresas locais. Era imprescindible para participar, facer previamente algunha compra nos establecementos asociados e dispor do ticket de compra correspondente.

Unha vez localizados os 6 “tesouros”, fíxose entrega hoxe dos premios e dos diplomas que constitúen un recordo desta procura do tesouro e destes aventureiros do Porriño.

Os gañadores foron os seguintes:
Por partida dobre Monste Davila que atopou os tesouros en Correos e na Biblioteca Municipal.
Sonia Barciela Ozores que o atopou na Capela de San Benito.
Noelia Davila Fernández atopouno no Parque Alcalde Ordoñez.
Julia Cerrada González na Fonte Do cristo.
E Branca Inés Gómez Fortes no Muro do Albergue Peregrino.
Todos son veciños do Porriño agás unha das gañadoras, que traballa en Porriño pero reside en A Cañiza.

A concelleira de Cultura e Festas, Cami Moreira e o concelleiro de Comercio, Sergio Casal fixeron entrega dos premios xinto con representantes das asociacións de comerciantes “ACIPOR” e de hostaleiros “AHOSPOR”.

30/04/2021 in Cultura e festas, Urbanismo, comercio e industria

O prazo para presentar solicitudes ás subvencións municipais para as comunidades de augas de consumo do Porriño rematará o vindeiro 3 de maio

O Concello do Porriño informa de que o prazo para presentar as solicitudes para beneficiarse das subvencións municipais ás comunidades de auga potable, que este ano 2021 teñen un importe total de 95.000 €, rematará o vindeiro luns 3 de maio.

A convocatoria, a través da Concellería de Infraestruturas e Urbanismo que dirixe Pedro Pereira, ten por obxecto apoiar e promover, en réxime de concorrencia competitiva, a concesión de subvencións entre as comunidades de usuarios de augas de consumo do Porriño que reúnan os requisitos establecidos nas bases.

O obxecto das axudas comprenderá a contratación de obras de reparación, substitución de redes de distribución cando non superen os 20 metros, así como os gastos correspondentes a analíticas de control sanitario e os gastos de mantemento e conservación en captación de augas, sistemas de almacenamento e potabilización e mantemento das instalacións.

Para estas axudas estableceuse un importe máximo de 8.000 euros por asociación.

No ano 2020 repartíronse un total 59.976 euros nas achegas municipais que acadaron dez comunidades solicitantes, conforme a resolución final da comisión de avaliación que presidiu o concelleiro de Infraestruturas, Pedro Pereira asistido por tres técnicos municipais.

26/04/2021 in Alcaldía, Urbanismo, comercio e industria

O Concello outorgou hoxe licenza de construción ao Sergas para a ampliación do Centro de Saúde que “unha vez máis urximos”.

Con data de hoxe, o Concello do Porriño comunicou ao SERGAS a concesión de licenza de construción para a proxectada reforma e ampliación do Centro de Saúde, segundo comunicou Pedro Pereira, concelleiro de Infraestruturas e Urbanismo. O primeiro tenente de alcalde manifestou que “unha vez máis urximos á Consellería de Sanidade da Xunta de Galicia para que acometa a prometida ampliación”.
O licenza de construción é para unha ampliación de 1.105 metros cadrados do actual inmoble e conta cun orzamento de 2,9 millóns de euros.
A licenza outorga concédese baixo varias condicións: previo ao comezo das obras, o Servizo Galega de Saúde deberá achegar ao Concello entre outros trámites, proxecto de execución e constituír unha garantía cuxo importe calcúlase nunha cantidade de 7.800 euros para facer fronte a posibles danos na vía pública e nos bens municipais durante a execución das obras.

22/04/2021 in Alcaldía, Urbanismo, comercio e industria

Atopado o último tesouro, remata o Xogo “A Miña Avoa”

Coa localización do último “tesouro” que aconteceu onte martes, remata o xogo “A Miña Avoa”, unha iniciativa promovida polo Concello para dinamizar o consumo no comercio de proximidade e na hostalería locais.

A Oficina Municipal de Información Xuvenil (OMIX de Porriño) organizou a iniciativa co apoio da Concellería de Festexos e da Concellería de Comercio, as asociacións de comerciantes “ACIPOR” e de hostaleiros “AHOSPOR” e coa produción a cargo da firma “Especialistas Hípica Celta”.

En total 145 establecementos de hostalería e comercio de proximidade participaron desta iniciativa.

A veciñanza porriñesa participou dun xeito moi activo e acadou descubrir nun tempo record os seis “tesouros”, pois o xogo comezou o sábado 10 de abril e tense rematado en dez días cando a previsión era que durase ata primeiros de xuño.

O xogo que era aberto a toda a cidadanía da vila, consistiu na procura dos seis “tesouros”, premios de 50€ para consumir no comercio e na hostalería locais. Dando protagonismo á economía local, non só coa súa implicación, senón tamén, porque os premios reverten no consumo das propias empresas locais. Era imprescindible para participar, facer previamente algunha compra nos establecementos asociados e dispor do ticket de compra correspondente.

O último “tesouro” atopouno Blanca Inés Gómez Fortes. Estaba agochado nun muro preto do Albergue de Peregrinos. Blanca mercou no establecemento “Meigallo Porriño” e coa pista que colleu, localizouno. A pista dicía así: “”Que gran xente esa que fai o camiño de Santiago… Dío o valado que contempla o descanso do peregrino. E ao pé do camiño ata podes atopar un tesouro pequeniño.”

21/04/2021 in Cultura e festas, Urbanismo, comercio e industria

Deputados provinciais, alcaldesa e concelleiros comprobaron os traballos de asfaltado realizados en Torneiros con cargo ao Plan Concellos

Os deputados provinciais, Santos Héctor e Ana Laura Iglesias, acompañados da alcaldesa do Porriño, Eva Garcia, do primeiro tenente de alcalde, Pedro Pereira e dos concelleiros Lourdes Moure e David Alonso comprobaron hoxe en Torneiros o resultado das obras de asfaltado realizadas polo Concello, sufragadas coa achega da Deputación de Pontevedra, a cargo do Plan Concellos 2020. Tamén participaron do percorrido Enrique Navarro, xerente e Lucía Barros, directora de obra da empresa “Fechi” que foi a contratada para executar os asfaltados.

En concreto, a achega da Deputación foi de 90.249 € que a xuízo do deputado provincial responsable de Cooperación cos Concellos “á vista do resultado, non podo dicir outra cousa máis que é un investimento moi ben feito”. Santos Héctor valorou que “é unha actuación moi relevante para Torneiros que ten o 25% da poboación total do concello dos traballos”, significou que serven para “mellorar o entramado urbano da parroquia” e “para garantir a seguridade vial”.

Pola súa banda, a alcaldesa subliñou que os asfaltados realizados en diversas rúas de Torneiros “forman parte das actuacións de mellora e posta en valor desta zona”. Eva Garcia agradeceu o traballo feito polo primeiro tenente de alcalde “na supervisión das actuacións” e recoñeceu “a capacidade que acredita Pedro Pereira”. E por último, a alcaldesa deu as grazas, “moitas grazas á Deputación pola atención que ten co Porriño como sei que tamén o fai co resto dos concellos” e comparouna coa Xunta de Galicia que “fai un investimento de cero euros no Porriño”.

20/04/2021 in Alcaldía, Urbanismo, comercio e industria

Aberto o prazo para presentar as solicitudes de axudas económicas con cargo ao “Plan Porriño Impulsa”

Desde esta mañá xa está aberto o prazo de presentación de solicitudes para recibir axudas económicas directas con cargo ao “Plan Porriño Impulsa” que dispón dun fondo de 140.000 € aportados polo Concello e pola Deputación. As bases e os impresos das solicitudes xa están dispoñibles na páxina web do Concello.

Paralelamente esta mañá o concelleiro de Emprego, David Alonso presentou as liñas fundamentais deste Plan que se aprobou por unanimidade da corporación no último pleno municipal celebrado.

Acudiron a presentación Juana Pérez e Noelia Conde, pola Asociación de Comerciantes de Porriño (ACIPOR) e José Manuel Fernández, pola Asociación de Hostalería do Porriño (AHOSPOR).

O concelleiro de Emprego lembrou que esta liña de axudas destinase aos establecementos de hostalería, comercio de proximidade, autónomos e microempresas do Porriño afectados polos peches total ou parciais ocorridos coa ocasión das restricións aplicadas dende xaneiro.

David Alonso ofreceu “o asesoramento gratuíto que a través da técnico da Axencia de Desenvolvemento Local (ADL) prestamos nas oficinas de ‘Porremprego’, para todos aqueles solicitantes que non dispoñan de asesoría para tramitar as solicitudes”.

O concelleiro avogou por que “non teñamos que habilitar novas liñas de axuda pero se chegado o momento hai que asumir outra liña de crédito, haberá que valoralo. Ao mellor non serían axudas económicas directas senón outras medidas de apoio e incentivo ao consumo, por exemplo”, manifestou Alonso Bargiela.

Para rematar a presentación, José Manuel Fernández, presidente de “AHOSPOR” expresou “o agradecemento dos hostaleiros do Porriño ao concelleiro e a toda a corporación municipal por esta liña de axudas e agardemos que non sexan necesarias outras ao longo do ano”.

Do importe total do Plan Impulsa Porriño, a Deputación Provincial autorizou a utilización do 20% da liña 1 do Plan Concellos para financiar achegas económicas directas por importe de 57.861,02 euros. O resto é a achega que aporta o Concello con recursos propios na cantidade de 82.138,98 euros ata acadar a cifra total de 140.000 euros o que supón un 1% do orzamento municipal total en vigor.

O límite por beneficiario das axudas establécese na cantidade de 1.500 euros para aqueles sectores que sufriron o peche total e 1200 euros para aqueles outros que estiveran limitados no horario de apertura ao público ou sufriran perdas significativas.

16/04/2021 in Alcaldía, Emprego e formación, Urbanismo, comercio e industria

O Delegado de Zona Franca entregou as chaves do local que acollerá a futura gardería infantil dos polígonos industriais do Porriño

David Regades, delegado do consorcio Zona Franca entregou este mediodía, en presenza da alcaldesa, Eva Garcia, as chaves do local que acollerá a futura gardería infantil dos polígonos industriais da Granxa e das Gándaras.

O local atópase no centro de servizos do Consorcio Zona Franca, no polígono da Granxa.

Beatriz Cabaleiro, directora da firma de centros de educación infantil “Trastes”, recibiu as chaves co propósito de axeitar as instalacións para a súa apertura no vindeiro setembro cunha capacidade para 74 nenos e nenas.

Desde xeito atendese unha demanda histórica da Entidade de Conservación de A Granxa e da Asociación de Empresarios de As Gándaras que por fin será implementada.

12/04/2021 in Alcaldía, Educación e tecnoloxía, Servizos sociais, Urbanismo, comercio e industria

Comeza o xogo “A Miña Avoa”, unha iniciativa do Concello para estimular o consumo no comercio e na hostalería do Porriño

A partir de mañá, sábado 10 de abril comeza o xogo “A Miña Avoa”, unha iniciativa do Concello en colaboración coas asociacións de comerciantes “ACIPOR” e de hostaleiros “AHOSPOR”, para estimular o consumo dos porriñeses no comercio de proximidade e na hostalería local.
A Oficina Municipal de Información Xuvenil (OMIX) organiza este certame que promove o Concello, a través da Concellería de Festexos e co apoio da Concellería de Comercio e coa producción a cargo da firma “Especialistas Hípica Celta”.
O xogo, aberto a toda a cidadanía da vila, consiste na procura dun “tesouro”, premios de 50€ para consumir no comercio e na hostalería locais. Da protagonismo á economía local, non só coa súa implicación, senón tamén, porque os premios reverten no consumo das propias empresas locais.

É imprescindible para participar, facer previamente algunha compra nos establecementos asociados e dispor do ticket de compra correspondente.

O xogo consiste en localizar páxinas dun xornal vello polos establecementos adheridos á iniciativa. Cada folla do xornal conteñen 3 enigmas distintos. A través deles, a veciñanza ten que adiviñar onde se atopa o “tesouro” escondido. Poida que se xogue ao engano, pero só na primeira ollada, posto que non é imposible de acertar.
En total son 145 establecementos do Porriño os que participan desta iniciativa que durará como máximo ata o 8 de xuño,
Deixamos ligazón co pdf das bases para maior información. e coa páxina web de de Cultura

https://ecultura.net/wp-content/uploads/2021/04/BASES_A-MINA-AVOA.pdf

Xogo “A miña avoa”

09/04/2021 in Cultura e festas, Urbanismo, comercio e industria

O pleno aprobou o plan de axudas “Porriño Impulsa 2021″e decidiu a nova concesionaria da Piscina Municipal

O goberno municipal acadou a aprobación plenaria e, polo tanto, aceptase a proposta realizada pola mesa de contratación para adxudicar á firma “Soom Management”, a explotación da Piscina Municipal. Esta empresa, que actualmente leva as piscinas municipais de Marín, Boiro e Cangas, foi a plica máis valorada, cunha oferta anual de 508.000 € e adquire o compromiso de subrogar ao persoal actual, de 24 traballadores, da piscina municipal.

O acordo tomouse esta tarde pleno municipal ordinario de marzo, na sesión retomada no punto no que se suspendeu o pasado mércores. Votaron a favor os sete concelleiros presentes hoxe (4 do PSOE, 2 do BNG e Manuel Carrera da UDDL). Non acudiron os concelleiros e concelleiras dos restantes grupos municipais.

A alcaldesa Eva García explicou que a convocatoria respondía ao principio de “unidade de acto” recollido na lexislación municipal vixente e polo tanto a sesión retomábase e rematábase hoxe. “E o mesmo pleno coa mesma orde do día que se celebra en dúas sesión. Non hai nin nulidade nin ilegalidade nesta convocatoria”, rematou a alcaldesa que citou que “tamén ese é o criterio” do secretario xeral do Concello, Eduardo Portela.

Lembremos que na primeira parte deste pleno, tomáronse dous acordos salientables e ambos por unanimidade dos 17 concelleiros da corporación. Deste xeito acordouse que o Concello do Porriño habilite a liña de axudas económicas directas aos sectores máis afectados pola Covid, cunha asignación total de 140.000 €. O plan, chamado “Porriño Impulsa 2021” está destinado á hostalería, comercio e autónomos, os máis afectados polas restricións derivadas da pandemia actual. Tamén aprobouse por unanimidade unha modificación do orzamento por unha cantidade de 108.000 € para afrontar as achegas municipais a varios programas de contratación de persoal subvencionado que suporán a creación de 196 postos de traballo.

Tamén na primeira deste pleno tomou posesión como nova concelleira do grupo municipal do Partido Popular, Ascensión Rosario Costas que cubre a vacante deixada por Ana María Paradela.

06/04/2021 in Alcaldía, Deportes, Emprego e formación, Urbanismo, comercio e industria

“A Miña Avoa”, un xogo para dinamizar o consumo no comercio a na hostalería do Porriño

Cento vinte e seis establecementos, unha cifra que aínda pode medrar un pouco máis, entre locais de hostalería e comercios de proximidade participarán na iniciativa “A Miña Avoa”, un xogo para dinamizar o consumo no Porriño.

A Oficina Municipal de Información Xuvenil (OMIX) organiza este certame que promove o Concello do Porriño , a través da Concellería de Festexos e co apoio da Concellería de Comercio. Ambos departamentos estiveron representados polos seus respectivos concelleiros responsables, Cami Moreira e Sergio Casal, xunto cos representantes da Asociación de Comerciantes (Acipor), Hostaleiros do Porriño (Ahospor) e Jaoquín Rodríguez, da firma “Especialistas Hípica Celta”, produtora do evento.

Este proxecto consiste na procura dun tesouro, que da protagonismo á economía local, non só coa súa implicación, senón tamén, porque os premios reverten no consumo das propias empresas locais, “algo primordial nestes tempos de pandemia e crise que remontaremos co esforzo de todos”, manifestou Cami Moreira.

O xogo consiste en localizar páxinas dun xornal vello polos establecementos da zona, Cada folla do xornal conteñen 3 enigmas distintos. A través deles, a veciñanza ten que adiviñar onde se atopa o tesouro escondido. Poida que se xogue ao engano, pero só na primeira ollada, posto que non é imposible de acertar, segundo explicou o representante da produtora.