Deportes arquivos - Páxina 10 de 37

A danza urbana de máis alto nivel darase cita este domingo no Porriño

O polideportivo municipal do Porriño será este domingo epicentro da danza urbana. Uns 150 bailaríns e bailarinas chegados de toda a xeografía galega disputarán o I Trofeo Concello do Porriño de Hip-Hop, unha competición puntuable no ranking nacional da Federación Española de Baile Deportivo.

No evento, organizado polo CBD Pasos-BaileGalicia, en colaboración co Concello do Porriño, a Xunta de Galicia e a Deputación de Pontevedra, os deportistas competirán en trece categorías, con premio para os tres primeiros de cada unha delas.

O xurado está composto por tres bailaríns do máis alto nivel na modalidade: Max One, que chega dende Barcelona, Lidia Rioboo, de Madrid, e Julia Laport, que ven dende A Coruña.

Dende a organización destacan o nivel dos participantes e a vistosidade do evento. “Entre os deportistas que competirán no Porriño están grupos que son campións nacionais, bailaríns do máis alto nivel da Federación de Baile Deportivo”, explicou Miguel Abreu, “Convido a todo o mundo a disfrutar deste evento, que non defraudará pola súa espectacularidade”.

Cabe destacar que a danza urbana é unha modalidade relativamente nova dentro da Federación de Baile Deportivo. O breaking será por primeira vez deporte olímpico en París 2024 tras ser recoñecido dende hai pouco como deporte polo Comité Olímpico Internacional.

17/03/2022 in Alcaldía, Deportes

As xuvenís do BM Porriño proclámanse Campioas de Galicia

A falta de tres xornadas para que remate a liga o equipo xuvenil feminino do Club Balonmano Porriño proclamouse Campión de Galicia, obtendo o pase ao Campionato de España.

As xogadoras, acompañadas polas súas adestradoras Ana Alonso e Laura Barros, foron recibidas no Concello polo alcalde, Alejandro Lorenzo, e o tenente de alcalde e concelleiro de deportes, Abel Estévez, que quixeron felicitalas polo seu logro en nome todas e todos os porriñeses.

“Temos un gran equipo”, indicou Estévez, “Queremos desexarlles a maior das sortes no sector do Campionato de España, lembrarlles que terán o apoio do Concello e que faremos as xestións necesarias para que o sector se xogue no Porriño e todos poidamos disfrutar con elas”.

Un apoio no que incidiu o alcalde, que lles pediu que seguiran “na mesma liña, erforzándovos e disfrutando do que facedes e das recompensas ao voso esforzo, xa que así será como seguiredes sumando éxitos”. Lorenzo quixo estender o seu recoñecemento ás dúas adestradoras e de maneira especial ao presidente do Club Balonmano Porriño, Abel Estévez, do que dixo “é sen dúbida o mellor concelleiro de Deportes que pode ter O Porriño”.

11/03/2022 in Deportes

O Porriño será a saída de “O Gran Camiño”

O Porriño dará o pistoletazo de saída da proba deportiva que recuperará unha volta ciclista profesional en Galicia tras dúas décadas de suspenso, “O Gran Camiño”.

O que será un dos maiores eventos deportivos do ano na comunidade galega disputarase entre o 24 e o 27 de febreiro e constará de catro etapas, unha por cada provincia, asegurando espectáculo, valores deportivos e difusión mediática.

O alcalde do Porriño, Alejandro Lorenzo, interviu onte na presentación oficial da proba.

“Como alcalde e como porriñés é un orgullo que O Gran Camiño comece no Porriño”, manifestou o rexedor, “O noso é un concello berce de ciclistas, onde este deporte ten unha arraigada tradición. Tamén é un concello de comezos, que abre unha nova etapa na que perseguimos unha maior proyección cara o mundo”. Neste sentido, Lorenzo afirmou con rotundidade que “O Porriño é un lugar único e o mundo debe coñecernos” e concluíu, que “`O Gran Camiño´ será un escaparate perfecto que nos axudará a conseguilo”.

O Porriño foi elixido como saída da primeira etapa que se disputará o 24 de febreiro. Percorrerá algo máis de 163 km finalizando en Vigo. Será unha etapa chaira na súa maior parte na que, a 23 km da meta, os corredores subirán a Peinador antes de chegar ao sprint no centro de Vigo.

A segunda delas disputarase na Coruña, a terceira na provincia de Ourense e a última será en Lugo.

O Gran Camiño está incluida no calendario UCI, na categoría 2.1, conseguindo chamar a atención de equipos profesionais de alto nivel, tanto nacionais como internacionais. Xa está confirmada a participación de Movistar, Israel Start Up Nation, Education First, Cofidis, Tavira e Euskaltel Euskadi. Tamén do RP-Boa Vista, Eolo Kometa, Androni Giocattoli e Bardiani.

Conta co respaldo das cinco principais institucións galegas: a Xunta de Galicia e as catro deputacións provinciais.

15/01/2022 in Deportes, Turismo

Cancelada a Carreira Nocturna de Reis ante a imposibilidade de garantir a seguridade sanitaria no evento

Pola contra valorouse que no desfile conxunto de rondallas de Mos e O Porriño, sí poderán manterse as debidas garantías e distancias polo seu longo percorrido

O Goberno Municipal acordou a suspensión da Carreira Nocturna de Reis programada para o 8 de xaneiro ante a imposibilidade de garantir na mesma a seguridade sanitaria dos/as participantes, segundo anunciou hoxe o concelleiro de Deportes, Abel Estévez. A decisión obtivo un respaldo unánime na xuntanza da Comisión de Seguimento da Covid-19 que presidiu hoxe o alcalde Alejandro Lorenzo.

O feito de que os atletas participantes na carreira non leven a máscara de protección mentres corren e a imposibilidade de establecer a obrigatoriedade desta medida fixo que dende a organización se valoraran fórmulas alternativas como unha contrareloxo individual. Pero desestimouse xa que desvirtuaba a propia natureza lúdico-deportiva do evento.

Tamén se abordou a seguridade do Desfile Conxunto de Rondallas do Porriño e Mos que se celebrará o vindeiro día 2. O Goberno Municipal, tras analizar as características do evento, que se celebrará ao aire libre nun amplo percorrido que permite a distribución dos asistentes, mantendo a distancia de seguridade, acordou mantelo.

30/12/2021 in Alcaldía, Deportes, Sanidade

O novo goberno municipal potenciará a atención cidadá e a transparencia, e dedicará unha concellería á terceira idade

O alcalde Alejandro Lorenzo fixo público hoxe o reparto de responsabilidades e delegacións entre os seus concelleiros. Destaca a creación das áreas de Atención Cidadá e Transparencia que dependerán da concelleira Antía Carrera.

A subliñar tamén a creación da área de Terceira Idade que desenvolverá Ascensión Rosario Costas. Trátase dunha concellería específica para dar resposta ás necesidades dos nosos maiores e garantir que a nosa vila ofreza a calidade de vida que merecen, traballando conxuntamente co resto de departamentos.

DISTRIBUCIÓN DE ÁREAS E DELEGACIÓNS

O propio alcalde, Manuel Alejandro Lorenzo levará tamén as áreas de Economía e Persoal.

Abel Estévez, que será o primeiro tenente de alcalde dirixirá Seguridade, Policía Local, Protección Civil, Voluntariado, Deportes e Benestar Social.

Carolina González, segunda tenente alcalde, desenvolverá as delegacións de Educación, Uned e Programas Europeos; Igualdade; Sanidade e Normalización Lingüística.

Ramón Porto será o concelleiro responsable de Vías, Obras e Servizos

Antía Carrera levará Urbanismo, Patrimonio Municipal do Solo, Contratación, Comercio, Mercado, Atención Cidadá e Transparencia, e Medio Ambiente.

José Carlos González terá as competencias de Parques e Xardíns; Limpeza; Lixo e Cemiterios.

Bienvenido Estévez colle as competencias de Traída de Augas Veciñais; Asociacións; Parroquias; Novas Tecnoloxías; Xuventude; Cultura e Festas.

Por último, Ascensión Rosario Costas asume a nova área de Terceira Idade e ademais as deegacións de Industria, Turismo, Formación e Emprego.

“EQUIPO POR E PARA PORRIÑO”

As competencias repártense entre os oito concelleiros do equipo. A idea é desenvolver un traballo transversal e coordinado que beneficie á cidadanía”, explicou o alcalde.

Trátase de “un equipo por e para Porriño”, afirmou Alejandro Lorenzo como síntese do esquema de traballo que propón.

“Xorden problemas e demandas cotiáns que non afectan só a un ámbito senón ao conxunto do Concello e tamén a diversos sectores da poboación e por iso son necesarias actuacións integrais para optimizar os recursos dos que dispoñemos, aproveitar as sinerxías, e dar unha maior eficiencia e eficacia. calidade do servizo que prestamos”, engadiu o rexedor municipal.

Alejandro Lorenzo mostrouse satisfeito de ter un equipo cohesionado que traballe xunto e témolo“. E citou como proba diso” o traballo da brigada de Deportes que se encarga de arranxar os parques infantís; ou a cooperación das concellerías de Vías e Obras, Servizos, Limpeza Viaria, Parroquias e Asociacións nas actuacións urxentes de lavado e limpeza como a que hoxe se leva a cabo no entorno da Igrexa de Santa María”, concluíu Alejandro Lorenzo.

28/12/2021 in Alcaldía, Benestar, Cemiterios, Cultura e festas, Deportes, Educación e tecnoloxía, Emprego e formación, Igualdade, Limpeza, Medio Ambiente, Mocidade, Novas Tecnoloxías, Parques e xardíns, Patrimonio Municipal, Proxectos Europeos, Seguridade, Servizos sociais, Tráfico, Turismo, Urbanismo, comercio e industria, Vías e obras

O alcalde Alejandro Lorenzo encarga a reparación urxente dos parques infantís do concello

Unha das primeiras medidas ordenadas polo alcalde Alejandro Lorenzo, é a reparación urxente de columpios e outros elementos de todos os parques infantís do concello.

As actuacións iniciaronse esta mañá no Parque Infantil onde tres operarios do Servizo de Deportes comezaron a reparar o tobogán e outros elementos deste espazo, que se atopa en estado de abandono. O alcalde, en compañía do concelleiro Abel Estévez, acudiu a comprobar o inicio dos traballos.

Alejandro Lorenzo decidiu que “o mantemento dos preto de trinta parques infantís pase directamente á competencia da Concellería de Deportes, que conta con medios propios para acometer esta actuación de emerxencia que se estenderá a todos os parques infantís do municipio que se atopen nun estado lamentable”, segundo manifestou o novo alcalde.

Alejandro Lorenzo anunciou que se fará un “mantemento diario” e que “a principios de ano trataremos de destinar un orzamento para mellorar os parques infantís do Porriño cunhas instalacións acordes ao século que vivimos”, concluíu o rexedor porriñés.

27/12/2021 in Alcaldía, Deportes, Parques e xardíns

“Porriño escapa das clásicas San Silvestres coa Carreira Nocturna de Reis”, reivindicou o concelleiro de Deportes na presentación

A Carreira Nocturna de Reis que celebrará O Porriño o vindeiro 8 de xaneiro “é un concepto novo, fuximos das clásicas San Silvestres que se solapan a finais de ano e apostamos por unha proba orixinal”, dixo hoxe David Alonso, concelleiro de Deportes na presentación do evento.

Xunto ao concelleiro responsable, compareceron o alcalde accidental do Porriño, Pedro Pereira e o triatleta Gustavo Rodríguez, medalla de prata xunto a Héctor Catalá nos Xogos Parolímpicos de Toquio, quen interveu como padriño da presentación.

Alonso Bargiela explicou as características do percorrido de 3 quilómetros, que parte da rúa Antonio Palacios, á altura do Instituto “Pino Manso” e remata en pendente fronte ao Pavillón Municipal de Deportes.

A partir de mañá mércores ábrese o prazo de inscrición, que se pode realizar “online” na páxina web www.carreirasgalegas.com, baixo o patrocinio da Federación Galega de Atletismo e coa colaboración do Club Atletismo Porriño.

O concelleiro de Deportes anunciou que todos os participantes deberán presentar, como requisito indispensable, o pasaporte de vacinación contra o Covid ou a proba negativa.

Gustavo Rodríguez agradeceu a súa elección como “cabeza visible deste evento” e expresou o seu desexo de que “as lesións evolucionen e permitan vir ao Porriño e facer algunha rodaxe ese 8 de xaneiro e gozar do ambiente da carreira que de seguro será un éxito”, afirmou o triatleta tudense, vinculado ao Porriño.

O alcalde accidental, Pedro Pereira considerou un éxito a decisión de David Alonso de trasladar a carreira a xaneiro e agradeceu a asistencia de Gustavo Rodríguez á presentación “porque é un reclamo para fomentar a participación tanto de afeccionados como de profesionais”.

Pereira Fernández desexou prometeu que a evolución da actual sexta onda da pandemia non nos impide poder celebrala. “Estamos nunha situación sanitaria complicada e se houbese un aumento das restricións decidiríamos atrasar a data da celebración”, indicou o alcalde accidental.

21/12/2021 in Alcaldía, Deportes

A Piscina Municipal recupera a normalidade

A Piscina Municipal do Porriño recupera a normalidade no seu funcionamento coa incorporación de cursos e clases para diferentes grupos de idade, como consecuencia do alivio das restricións debidas á pandemia.
Estes días habilitáronse as clases de iniciación á natación para bebés, dende os 6 meses ata os 18 meses. Do mesmo xeito, tamén se imparten clases de natación para nenos e nenas a partir dos 3 anos.

Por outra banda, tamén se retomaron as clases con grupos de alumnos a través das Anpas, así como as clases para adultos e maiores de natación, aquagym e Pilates, segundo Belén Pazos, directora da Piscina Municipal.

Finalmente lembramos o horario de funcionamento das instalacións:
– Luns: de 7.00 a 22.00 h.
– Martes: de 7:00 a 22:15.
– Mércores: de 07:00 a 22:00 h.
– Xoves: de 07:00 a 22:15.
– Venres de 7:00 a 14:00 e de 15:45 a 22:15.
– Sábados: de 10:00 a 14:00 e de 17:00 a 20:30.
– Domingos: de 10:00 a 14:00.

13/10/2021 in Deportes

A Policía Local e Protección Civil farán cortes de tráfico intermitentes polo paso da proba de ciclismo “Grava & Polbo”

A Policía Local e a agrupación de Protección Civil do Porriño anuncian que mañá sábado día 2, realizarán cortes intermitentes de tráfico polo paso do evento ciclista “Grava & Polbo”.
Os cortes de tráfico están previstos entre as 9.30 e as 11.00 horas.
O tramo afectado no Porriño por estes cortes será de 5 quilómetros de estradas desde o acceso de Herville á parroquia de Chenlo, baixando por Mosende ata chegar á estrada de Ribadelouro, xa no concello de Tui.
Grava & Polbo é unha marcha ciclista non competitiva para bicis de grava. Este evento desenvolverase por estradas, pistas forestais e camiños da provincia. A saída e chegada situaranse na praza do Concello de Gondomar.

01/10/2021 in Deportes, Tráfico

Inscricións e axenda da homenaxe a José Antonio Gónzalez

As persoas que desexen asistir ao acto deberán inscribirse na seguinte ligazón: https://app.cluber.es/…/1e3e516afe2fd2e51975111f20c2481…

AXENDA DA HOMENAXE A JOSÉ ANTONIO:

–

Apertura de portas: ás 18:30 h.

–

Balonmán Feminino: de 19:00 a 19:50 h. (Club Balonmano Porriño – Club Balonmano Porriño)

–

Patín sobre rodas: de 19:20 a 19:30 h. (Club Patín Porriño)

–

Homenaxe: ás 20:00 h. coa presenza da familia de José Antonio, a Alcaldesa de O Porriño, o Concelleiro de Deportes, concelleiros da Corporación Municipal, presidentes/as dos clubs deportivos e compañeiros.