O Porriño celebrará por todo o alto o centenario da Casa Consistorial

O Concello do Porriño prepara un nutrido programa cultural para conmemorar que en 2024 cúmprense 100 anos da construción da Casa Consistorial, a obra máis representativa das deseñadas por Antonio Palacios na súa vila natal.

Esta efeméride coincide co 150 aniversario do nacemento do arquitecto porriñés, polo que dende a entidade local impulsarase unha ampla programación anual para poñer en valor a figura de Palacios.

“Antonio Palacios é un absoluto referente na vila e queremos poñer en valor o seu legado, especialmente o que deixou no Porriño”, explicou o alcalde, Alejandro Lorenzo,  “Este ano Palacios estará se cabe máis presente no Porriño”.

O rexedor adiantou que  unha das grandes propostas do centenario será a apertura da Sala de Exposicións Antonio Palacios, que contará cunha mostra permanente con todos os textos, debuxos, planos, maquetas e documentos que se gardan.  “Temos moito material orixinal de gran valor, un verdadeiro tesouro cultural que queremos dar a coñecer”, engadiu.

Ademais, entre outras iniciativas impulsarase a Ruta Palacios, como reclamo turístico e cultural. O groso da programación xirará en torno ao edificio da Casa Consistorial.

A obra máis representativa deseñada por Palacios para a súa vila natal

A Casa do Concello do Porriño é sen dúbida o edificio máis emblemático do Porriño e unha seña de identidade da vila. É tamén a obra máis representativa deseñada por Palacios para a súa vila natal. O proxecto foi entregado de balde ao Concello en setembro do ano 1919, así e todo, debido a certas dificultades económicas, as obras non comezaron ata o 1921, ano no que o indiano Ramón González Fernández anunciou a súa intención de sufragar os gastos de construción.

Os traballos foron realizados baixo a dirección do construtor e mestre canteiro Manuel Ruibal Solla, que remata os traballos en setembro de 1923.

Neste edificio Palacios amosa unha linguaxe rexionalista de raíces galegas e contidos propios que toma referencias da arquitectura tradicional e da expresión dos estilos medievais da súa terra. Un rexionalismo singular e de acentos persoais que o arquitecto define no momento no que se produce a afirmación do sentir galego. Os seus coetáneos sentiron o proxecto deste xeito. O poeta Ramón Cabanillas, por exemplo, afirmou cando viu a casa consistorial: “A Casa do Concello do Porriño ten que ser, -xa é, porque ben mirado o proxectala desta maneira prodixiosa vale máis que fagula, -a primeira construción civil galega”. Deste edificio parte orixinal e potente obra rexionalista de Palacios na súa terra.

O 25 de setembro do ano 1976 o edificio sofre un demoledor incendio que acaba coa estrutura de madeira do interior así como, por exemplo, coas fermosas vidrieiras doadas polo propio arquitecto, emprazadas na fachada lateral e hoxe substituídas por outras cunha nova traza, ante a imposibilidade de recuperar o deseño orixinal da casa Maumejeam. A rehabilitación do Concello do Porriño foi proxectada polos arquitectos Tomás Pérez-Lorente Quirós e Francisco Yáñez Ulloa, levándose a cabo entre os anos 1980 e 1983. Mantivéronse sen alteración as fachadas, o vestíbulo e a escaleira de honra. Tamén se conservou o emprazamento orixinal do salón de sesións. No ano 2001 produciuse unha nova intervención, proxectada polos arquitectos Manuel Jesús Freijeiro Martínez e Luis Sarasquete Otero. Nela cambiouse a disposición do salón de sesións que pasou ao edificio contiguo.  

30 anos de Festa dos Callos no Porriño

O domingo do Recristo, como manda a tradición, a Festa dos Callos do Porriño poñerá o broche de ouro á celebración das festas patronais. A festa gastronómica por excelencia do Porriño chega este ano á súa décimo terceira edición, congregando na vila a milleiros de persoas cada ano.

O alcalde, Alejandro Lorenzo, xunto co presidente de Ahospor representantes de Acipor , a cociñeira Macu Moreno e a que xa se converteu en protagonista destas festas, a porriñesa Juaniña da Cruz, presentaron hoxe esta festa que se celebrará o domingo 1 de outubro. Á presentación acudiron os usuarios e usuarias do centro de día de Navuxil, da unidade asistencial de Afaga e representantes da comunidade educativa que, xunto cos vecinos que se achegaron á praza, disfrutaron dunha degustación de callos.

“Este certame gastronómico é un dos principais reclamos para quen nos visita nestas datas e tamén parte moi importante da nosa cultura, as Festas do Cristo xa non se poden entender sen unha boa tapa de callos para despedilas”, explicou o alcalde, Alejandro Lorenzo, “Estou moi contento de presentar esta edición con todos os que hoxe están aquí, estes porriñesas e porriñesses que tanto nos ensinaron e dos que tanto seguimos a aprender. Eles escribiron a historia deste pobo e desexo de todo corazón que a sigamos a escribir xuntos”. O rexedor agradeceu a “implicación da hostalería local, que fai posible que cada ano agotemos as existencias de callos e sempre nos sorprendan con novas propostas”.

E é que haberá receitas para todos os gustos, como indicou o presidente de AHOSPOR, José Manuel Fernández. “Cada un de nós dalle a este prato o seu toque especial e tedes que vir a probalos todos. E para que ninguén quede sen disfrútalos hai tamén a opción vegana, como a de Macu, que penso que foi a primeira persoa en facer callos veganos”.

Pola súa banda, Macu, que conta con miles de seguidores nas súas redes sociais, nas que comparte receitas de cociña vegana, convidou a todo mundo a achegarse este domingo ao Porriño e disfrutar desta festa.

O humorista Isi será o encargado de dar o pistoletazo de saída á xornada ás 12:30h na Praza Arquitecto Antonio Palacios.

O custo da ración unifícase a 7 euros por acordo dos organizadores e dos establecementos de hostalería e este prezo inclúe unha ración de callos, pan e cazola.

📌 ESTABLECEMENTOS HOSTALEIROS PARTICIPANTES

A Francachela, A Vinoteca, Amaquía, Argentino 2, Bar A Guía, Bolboreta Café, Cafetería CRC, Casa di Mili, Celtiña, Churrasquería Pontenova, Cólleo con pinzas, El alambre del abuelo, El Pincho, El cincuentaicinco, Galibar, Hamburguesería Fran, Hotel Parque, La Bendecida, La Bici, La Cueva, Liceum, Maracaibo, Nómadas, Origen Café, Paso a Nivel, Restaurante Val do Louriña, Scala, The Classic Coffe Beer, Treinta y Tau, Xantar de Pepa, Zentral.

A Banda de Gaitas Irmandade de Montevideo súmase ás Festas do Cristo

A Banda de gaitas Irmandade do Centro Social Cultural e Deportivo de Bolos Val Miñor de Montevideo, dará un concerto este mércores 13 de setembro ás 21 h na Praza Arq. Antonio Palacios. Con motivo da celebración dos seus 20 anos de existencia, a banda de música tradicional galega decide cumprir o seu sono de poder actuar e participar de festas na terra dos seus antergos.

Por iso, cunha representación de 10 integrantes, neste mes de setembro viaxou a Galicia para poder facer realidade este obxectivo de amosar o que fan con moita paixón e agarimo, desde hai xa 20 anos.

Esta banda foi creada a principios do ano 2003 en Uruguay por iniciativa dun grupo de mozos descendentes de galegos, para poder continuar coa tradición musical dos seus pais e avós.

Desde o seu comenzo ata hoxe está dirixida por Carlos González, fillo de inmigrante galego da zona de Baiona, comarca que xunto a Nigrán e Gondomar forman o que se coñece como Val Miñor.

É unha banda denominada tradicional xa que tanto o seu repertorio como os seus instrumentos son de orixe tradicional.

TES TALENTO? Abre mañá o seu prazo de inscrición

Chegan as Festas do Cristo e con elas unha nova edición do Concurso de Novos Talentos Musicais Val da Louriña, Tes talento?.

A concellería de Cultura e Festexos fixo públicas hoxe as bases que rexen a participación deste certame dirixido a artistas afeccionados. Como cada ano a participación quedará fixada nunha preselección (pechada ao público) o día 15 de setembro (infantís e adultos/as) no auditorio do Centro Cultural Municipal .

Os adultos terán unha semifinal, celebrarase o 22 de setembro, na praza Arquitecto Antonio Palacios e a final de infantil e de adultos será o día 1 de outubro ás 17 h na praza Arquitecto Antonio Palacios.

Poderán participar neste concurso todas aquelas persoas que o desexen, con límite de idade de 15 anos na modalidade infantil e de 16 en diante na de adultos. Poderán presentarse tamén grupos ata un máximo de catro componentes nas dúas modalidades.

O prazo de inscrición abrirase mañá, mércores 6 de setembro, e rematará o 14 de setembro, en horario de luns a venres de 9 a 14 h, nas dependencias do Rexistro do Concello do Porriño.

Podedes descargar as bases e os impresos de solicitude na seguinte ligazón:

 

BASES DO CONCURSO NOVOS TALENTOS MUSICAIS VAL DA LOURIÑA 2023

SOLICITUDE DE INSCRICIÓN PARA O CONCURSO NOVOS TALENTOS MUSICAIS VAL DA LOURIÑA 2023 – TES TALENTO?

AUTORIZACIÓN PARA A PARTICIPACIÓN DE MENORES NO CONCURSO NOVOS TALENTOS MUSICAIS VAL DA LOURIÑA 2023

O Porriño recibirá arredor de 10.000 persoas no Negrita Music Festival

O Porriño posicionase como referencia cun dos eventos máis importantes da música urbana no país, o Negrita Music Festival, que terá lugar os días 9 e 10 de setembro. A catro días do evento o aforo roza o sold-out e serán arredor de 10.000 as persoas que vibrarán en cada unha das xornadas da que será a última gran cita da tempada estival no sur de Galicia.
 
O evento, promovido polo grupo Berdinet baixo a dirección de Leitmotiv Producciones, conta coa colaboración do Concello do Porriño, da Xunta de Galicia e da Deputación de Pontevedra. Así, esta mañá foi presentado na vila polo alcalde, Alejandro Lorenzo, a delegada territorial da Xunta de Galicia en Vigo, Ana Ortiz, e a vicepresidenta primeira da Deputación Pontevedra , Marta Fernández-Tapias, xunto con representantes da organización.
 
A vicepresidenta primeira da Deputación, Marta Fernández-Tapias, destacou que acudir esta fin de semana ao Negrita Music Festival “É unha boa forma de despedir a programación musical do verán”. Tras felicitar aos organizadores, ensalzou a calidade dos festivais que se celebran na provincia e que se teñen convertido nun importante reclamo desde o punto turístico e cultural”.
 
Pola súa banda, a delegada territorial da Xunta de Galicia en Vigo, Ana Ortiz, destacou o cartel das festas do Concello do Porriño e sinalou que o Goberno galego sempre dará o seu apoio ás iniciativas municipais destinadas á cidadanía. “O labor da Xunta está e estará en todo momento volcado no fomento da cultura e as actividades que teñen como obxectivo a súa divulgación”, sinalou a representante autonómica.
 
O alcalde, Alejandro Lorenzo, concluíu destacando a importancia de “acoller un evento desta magnitude, que non so xerará un gran impacto económico no noso pobo senón que contribuirá a posicionalo como un lugar de referencia”. O rexedor agradeceu á organización que “elixira O Porriño para levar a cabo este festival con artistas e músicos de gran repercusión para disfrute da veciñanza e reforzando a nosa aposta por dalo a coñecer e convertilo nun destino cultural e turístico de primeiro nivel”.
 
MELENDI, RELS B, CRUZ CAFUNÉ O LA ZOWI DOMINAN o CARTEL
 
Este formato que leva xirando por toda España dende abril terá aquí a súa última parada tras Alicante, Barcelona ou Santander.
 
A última incorporación, como se anunciou dende a organización a pasada semana, é Melendi, que completa un cartel que xa rozaba o sold-out cos primeiros nome. Con 20 anos de traxectoria, converteuse nun símbolo do vintage grazas ao tema de Supernova de Saiko ou os remix do Nano en honor a Fernando Alonso.
 
Xunto a él, grandes nomes como Rels B, Cruz Cafuné o La Zowi, todos eles iconos absolutos da música urbana no último lustro no noso país. Soamente o primeiro roza os 20 millóns de oíntes mensuais en Spotify, mentre que os outros destacaron coas súas colaboracións con Don Patricio, Soto Asa ou Yung Beef.
 
Nesa mesma xornada tamén actuarán os últimos representantes da nova ola de artistas arxentinos que copan as listas de éxitos con outros nomes como Duki, Nathy Peluso, Nicki Nicole ou Bizarrap. Os DJs de Bresh pincharán a súa coidada selección de éxitos que xa soaron na celebración arxentina do último mundial ou n Son do Camiño, onde puxeron a guinda tras as actuacións de Vetusta Morla e Aitana no Monte do Gozo.
 
Como representación da música electrónica en Galicia destacan especialmente o local Groove Amigos –que xa pinchou no Ultra ou con Guetta en Castrelos- ou Galician Army, dúo lucense que revolucionou este verán as pistas de baile. Pincharán tamén os porriñeses Traffic House, Samu Pexe, Keva e Pitty
Na xornada do domingo destacan xunto a Melendi o dúo colombiano Cali y el Dandee, líderes da nova onda do reggaeton a comezos da década pasada que soou en todo o noso país.
 
As entradas para cada xornada están á venta desde 23 euros para cada día, mentres que o abono xeral costa 37 euros. A plataforma de venta ofrece a opción de adquirilos aproveitando o Bono Cultural e conta con reservas para o aparcamento anexo.
 
A organización fletará autobuses desde Vigo, Pontevedra, A Coruña, Santiago, Barbanza e Ourense para acudir ao recinto ubicado na rúa Progreso, entre a estación de tren e a A-55.

O elenco de Teatro Fontevella dará o pregón das Festas do Cristo 2023

As Festas do Cristo regresan este ano ao Porriño con máis dun cento de actividades para todos os públicos e gustos. Propostas deportivas, espectáculos, animación de rúa, monólogos, verbenas, concertos e moitas sorpresas conforman a programación que xa deu comezo esta fin de semana e que se prolongará ata o domingo 1 de outubro coa tradicional cita gastronómica dos callos, que este ano chega á súa trixésimo edición.

O alcalde, Alejandro Lorenzo, e o concelleiro de Cultura e Festexos, Bienvenido Estévez, presentaron hoxe o cartel das festas acompañados por unha representación da hostalería porriñesa e polos pregoeiros deste ano: o elenco de Teatro Fontevella.

“As nosas festas son unha seña de identidade, cultura e tradición e ninguén mellor que os actores e actrices de Fontevella para representar estes valores”, apuntou o alcalde, “Para O Porriño será unha verdadeira honra velos no balcón da Concello dando o pistoletazo de saída aos nosos días grandes”.

O rexedor quixo facer unha mención especial a Amparo Tellado, que a piques de cumprir os 94 anos será a encargada de dirixir o pregón. “Amparo é a actriz galega de maior idade e ten un talento que non deixa a ninguén indiferente”, engadiu Lorenzo, “Estou seguro que co seu pregón nos cautivará a todos como o fai cada vez que se sube ao escenario”.

Xunto a Amparo, estarán os seus compañeiros e compañeiras da compañía: Adriano, Balbina, Susana, José, Enrique, Daniel, Lola, Valentina, Andrés e Chelo Pampillón, a directora do grupo.

“É para nós unha honra ser os pregoeiros das Festas do Cristo”, manifestou Pampillón, “A ver se o balcón do Concello aguanta, porque ese día ten que soster os máis de 500 anos que sumamos de recordos, historia e moitas Festas do Cristo vividas”.

Cabe destacar que o pregón, á vez que recoñece a traxectoria deste grupo, será tamén unha celebración do aniversario xa que foi nas Festas do Cristo, hai xa 28 anos, cando subiron por primeira vez a un escenario con Castelao e a obra “Os vellos non deben namorarse”.

30 días festexando O Porriño

A programación arrancou xa na Vila do Louro e estenderase durante todo o mes de setembro. Como cada ano, a música e o deporte terán un papel protagonista, ao igual que as actividades infantís.

Panorama , El Combo Dominicano, Grupo América, Girls Gang, Os CoriBantes e moitos máis poñerán a banda sonora a estas festas, sen esquecernos do Louro Valley Festival, cuxo cartel será presentado nos vindeiros días, o Negrita Music Festival, que traerá ao Porriño a Melendi, Rels B e Cali & el Dandee, entre outros, e o Montando Cristo Festival, que reunirá a Buxa, Hard Trip Castro e Los Escoltas/ The Brooke.

Regresa tamén outro dos clásicos, o certame musical Tes Talento, e tamén o fai a Batalla de Galos. O deporte, da man dos clubs deportivos do municipio, xogará de novo un papel fundamental nestas festas.

O broche final, como cada ano, o poñerá a Festa dos Callos que chega xa á súa 30 edición e o fará por todo o alto.

“Agardo que estas Festas do Cristo sexan do agrado dos vecinos e veciñas e de todas aquelas persoas que queiran visitarnos”, concluíu o rexedor que quixo trasladar o seu “agradecemento á hostalería e comercio local, asociacións e clubs deportivos do Porriño que nos axudan a dar forma a estes días para que todos podamos disfrútalos xuntos e seguir facendo do noso pobo un lugar de referencia”.

NOVA LOCALIZACIÓN POR PREVISIÓN DE CHOIVA – “MAXIA PARA SOÑAR” este sábado no Porriño

 

  • O Centro Cultural Municipal acolle este espectáculo do Mago Marco Pombo, ás 19.00 horas

O espectáculo “Maxia para soñar” do ilusionista Marco Pombo representarase no Porriño este sábado, 19 de agosto. Enmarcada no programa Cultura no Camiño 2023 da Xunta de Galicia, a función celebrarase no Centro Cultural Municipal ás 19.00 horas.

Trátase dun espectáculo para todos os públicos a través do cal o mago propón unha viaxe de soños envoltos nun misterio.

Marco Pombo é un ilusionista cunha ampla experiencia no mundo da animación e o espectáculo. Provén dunha familia cunha forte e enraizada tradición artística e desde moi novo demostrou moito interese nas artes escénicas, especialmente no teatro e o ilusionismo, pero foi nesta última onde realmente destacou. É membro da Sociedade Española de Ilusionismo (SEI). O seu obxectivo e proporcionar entretemento de alta calidade a través da maxia, o humor e a comunicación, sempre cunha constante participación do público, que entra así a formar parte do espectáculo.

Chenlo prepárase para celebrar a XIII Festa do Cabrito ao Espeto

A parroquia de Chenlo celebra o 6 de agosto a décimo terceira edición da súa Festa do Cabrito ao Espeto. Como cada primeiro domingo de agosto, o campo de fútbol en Chan da Carreira, acollerá esta festa gastronómica que grazas ao esforzo e á implicación dos veciños, logrou consolidarse como evento de referencia en toda a provincial.

Os verdadeiros cabritos, acompañados polo alcalde Alejandro Lorenzo, que é un deles, presentaron a nova edición que aspira a repetir o éxito das anteriores. A parroquia preparará preto de 100 cabritos con todo disposto para recibir a centos de comensais.

A festa arrancará ás 11 h coa degustación de pinchos , amenizada por un grupo de gaiteiros e unha charanga. Ás 13 h dará comezo a comida popular do Cabrito ao Espeto, na que todos poderán degustar este exquisito prato elaborado na súa forma máis tradicional. A nota musical da xornada correrá a cargo do grupo 3.COM e como cada ano levarase a cabo entre todos os asistentes o sorteo dun cabrito dos Cabreiros de Chenlo.

No tocante aos prezos, o cabrito enteiro terá un custe de 220 euros, medio cabrito 110 euros, a ración de churrasco será de 20euros e o pincho degustación de 5 euros. Este ano hai unha novidade, o Combo para parellas que costará 70 euros.

As reservas pódense facer físicamente ata o venres, 4 de agosto no restaurante Timarsane, no Café Bar Lourambal e na tenda de Natursueño Porriño. Tamén se pode se pode ata o 3 de agosto facendo unha unhta trasferencia na conta ES24 2100 9302 0051 3345 e enviando o comprobante de pago a cabritoespeto@chenlo.gal ou ao whatsapp 666979043 indicando número de persoas e teléfono de contacto. Para máis información podedes chamar aos números 647142782 ou 666979043.

“Para min esta festa é orgullo e identidade, ademais de significar a unión de toda unha parroquia que se xunta para pasar un día marabilloso xunto a todos os que nos visitan”, explicou o rexedor, animando a todas e todos “a visitarnos e gozar con nós da nosa gastronomía e da nosa xente”.

I Tractorada de Chenlo

Este ano a festa gastronómica terá como antesala un evento que arranca con ánimo de consolidarse tamén. Trátase da I Tractorada de Chenlo, que ofrecerá unha exhibición de tractores clásicos e novos a todo aquel que se achegue ao campo de fútbol o 5 de agosto. A partir das 17 h comezarán a ruxir os motores e comezará a festa, con premios, agasallos para os participantes e o chouripán para coller forzas.

A Mochila da Luz chega ao Porriño

Hoxe recibimos no Porriño á Mochila da Luz, unha mochila que percorre o Camiño Portugués desde Oporto cargada de luz e esperanza organiza ao longo do ano saídas desde Oporto a Santiago que, a raíz da pandemia, dedícanse especialmente ás vítimas do covid, aínda que nesa mochila peregrina cárganse de xeito simbólico recordos de moitas persoas que quedaron atrás.

A súa porteadora este ano foi a peregrina Mila Rodao, que esta tarde xunto aos peregrinos que a acompañan chegou á vila do Louro onde foi recibida polo alcalde, Alejandro Lorenzo, concelleiros do goberno municipal e os usuarios e usuarias da unidade de AFAGA no Porriño que tiñan preparado un regaliño para eles.

Trátase dunhas fermosas cunchiñas que pintaron para que acompañen a estes peregrinos durante o seu Camiño, unha das cales pendura xa da Mochila da Luz.

Aos pés do Concello os estaban agardando todos eles xunto aos gaiteiros, Yoli e Anxo, e todos xuntos botamos uns bailes.

BO CAMIÑO!

Recuperadas máis de 1600 ferramentas líticas do xacemento paleolítico das Gándaras de Budiño

O equipo de investigadores liderado polos arqueólogos Eduardo Méndez-Quintas e Manuel Santonja, da Universidade de Vigo e do Centro Nacional de Investigación sobre a Evolución Humana (CENIEH), retoman estes días os traballos de investigación das Gándaras de Budiño, o xacemento paleolítico máis importante e antigo de Galicia.
 
Esta sería a terceira intervención na zona, e a primeira dende que se determinou que os niveis máis antigos do xacemento datan de máis de 310.000 anos e se confirmou que no Porriño viviron os primeiros habitantes de Galicia.
 
Os traballos, que contan co apoio económico do Concello do Porriño, consistiron na última campaña nunha excavación dun área de 30 m cadarados, que complementaban a fase de sondaxes arqueolóxicos de 2018 que deu valiosa información sobre as condicións de formación dos depósitos xeolóxicos e, sobre todo, das densas acumulacións de ferramentas líticas que se atopan no lugar. E é que se trata dun xacemento de referencia para Galicia tras o seu descubrimento en 1961 por Emiliano Aguirre, reputado arqueólogo impulsor do proxecto de Atapuerca.
 
Naquel momento determinouse erroneamente que tiña unha antigüidade duns 26.000 anos, algo que levou a concluír que no noroeste da Península Ibérica existía un paleolítico anacrónico e tardío respecto do que acontecía no resto do suroeste europeo e consolidaba a equivocada idea do atraso secular de Galicia.
 
Nesta pequena superficie recuperáronse xa 1623 artefactos líticos, entre os que destacan abundantes exemplos de bifaces e outras pezas características do tipo achelense.
 
O alcalde, Alejandro Lorenzo, acompañado polo concelleiro Marcos Martínez, visitou hoxe o xacemento para interesarse polo desenvolvemento dos traballos e incidiu no “valor cultural e patrimonial que estes teñen para O Porriño xa que nos axudan a escribir a nosa historia e tamén, en gran parte, a do resto do mundo”. Incidiu o rexedor en que a man do Concello estará sempre tendida para “que continuedes coa investigación e a posta en valor deste tesouro que gardou a nosa terra durante séculos”.
 
Os traballos desta terceira fase concluirán este venres e, en colaboración co Concello do Porriño, os nenos e nenas do campamento municipal participarán nunha visita guiada para coñecelos. Ademais será tamén unha xornada de portas abertas na que todo aquel que queira coñecer de primeira man a excavación poida facelo guiado polos arqueólogos que dirixen o estudo.