A Porriño Fashion Weekend transformará O Porriño nunha gran pasarela

A Porriño Fashion Weekend volverá facer da vila do Louro no epicentro galego da moda da man do seu comercio local e da súa hostalería.

O evento arrancará o venres 19 de abril coa Shopping Night, unha noite de comercio aberto para ir de tendas e disfrutar do ambiente nas rúas. Os comercios estarán abertos dende as 21 ata as 24 h con dinamizadoras propostas. Pero a celebración abrangue toda a vila e ademais de sorteos, regalos e moitas outras actividades impulsadas polos comerciantes, haberá Dj´s nas rúas e prazas do centro urbano.

O sábado 20 de abril terá lugar a Fashion Night. O exclusivo desfile dará comezo ás 18:30 h e transformará a rúa peonil nunha pasarela na que mostrarán as súas propostas 31 comercios e 9 salóns de peiteado do Porriño. Roupa, calzado, xoiería, complementos, peiteados, maquillaxe…as últimas tendencias desfilarán aos pés do Concello da man das/os modelos da Escola de Modelos Small Big Models. A encargada de dirixir o evento será a xornalista porriñesa, Raquel Atanes.  

A música non podía faltar nesta xornada, polo que a Orquestra América encargarase do Fin de Festa . Será ás 22h na rúa Domingo Bueno.

O Fashion Market poñerá o broche de ouro á fin de semana da moda no Porriño. Será o domingo 21 de abril, na parcela situada na rúa Progreso, onde de 10 a 22 h se instalará o mercadiño, con dj´s e inchables para os máis pequenos desde as 12 h. Ás 12 h sesión vermú coa Turre´s Band e para rematar por todo o alto, ás 19 h arrancará o concerto da Orquestra Panorama.

O alcalde, Alejandro Lorenzo, acompañado polas concelleiras Antía Carrera e Rosa Isabel Alonso, e polos establecementos participantes, presentaron a programación convidando a toda a veciñanza do Porriño e da contorna a sumarse a este evento que “é de todos/as e para todos/as”. Neste sentido o rexedor quixo agradecer “a implicación e ilusión que puxeron os nosos comerciantes, hostaleiros e asociacións á hora de organizar e dar forma a este evento. Facemos equipo e iso é garantía de éxito”.

Lorenzo destacou que “a moda é un importante dinamizador do comercio local e, polo tanto, da economía do Porriño e coa Fashion Weekend pretendemos visibilizalo e poñelo en valor”.   

Volve “Do libro ás letras”

O club de lectura da Biblioteca Municipal do Porriño volve celebrar este ano o Día do Libro e o Día das Letras Galegas dun xeito moi especial: con varias actividades en aberto que enlazarán as dúas festividades, a do 23 de abril e a do 17 de maio, nun programa que leva como título Do Libro ás Letras.

Calquera persoa interesada está convidada a unirse ao club de lectura os luns 15 e 29 de abril e 13 de maio na biblioteca, en horario de 18.00 a 19.30 horas, nuns encontros especiais que porán en valor tanto os libros como a riqueza do mundo das letras.

Neles, “as persoas asistentes poderán participar e compartir o amor polos libros a través de lecturas conxuntas, recomendacións, xogos e retos literarios, así como coloquios arredor de anécdotas e inquedanzas relacionadas co mundo das letras, e achegaranse tamén á figura e á obra da autora homenaxeada este ano no Día das Letras Galegas, Luísa Villalta, explicou o alcalde, Alejandro Lorenzo, que hoxe se compartiu un ratiño co Club de Lectura.

O club de lectura volve celebrar en 2024 este programa especial de actividades, que complementa os seus encontros regulares e que se abre a calquera persoa interesada en participar nel. Do Libro ás Letras está organizado pola Biblioteca Municipal e a coordinadora do club, Ana Abad de Larriva, en colaboración coas participantes, e tivo xa moi boa acollida en anos anteriores.

O Porriño acolle a XXXVI Feira Apícola Rías Baixas

A Feira Apícola Rías Baixas chega á súa trixésimo sexta edición con máis forza ca nunca da man dun nutrido programa de actividades dirixidas tanto aos maiores como aos cativos da casa, que nos convidan a vivir unha doce e diferente fin de semana no Porriño.

Organizada polo Concello do Porriño, xunto coa Agrupación Apícola de Galicia e a Asociación de Apicultores da Provincia de Pontevedra, este evento constitúe un importante encontro cos mellores profesionais do sector e unha cita indispensable para todas aquelas persoas versadas ou afeccionadas ao interesante mundo das abellas.

A apertura da feira terá lugar este sábado 13 de abril, ás 10 h, cun programa cheo de actividades que se estenderán ata última hora da tarde. As Xornadas Técnicas Internacionais de Apicultura emprazaranse nunha carpa situada no parque do Cristo, entre as 10 h e as 19:30 h. Case o mesmo horario no que permanecerá activo o mercado de artesanía Bee Happy Market e a Feira do Mel, concretamente de 10:30 h a 20 h. As catas, degustacións e obradoiros infantís terán lugar tanto en horario de mañá coma de tarde. A asistencia a calquera das actividades é totalmente de balde, pero contan con aforo limitado.

Mentres, a ruta hostaleira convídanos a saborear diferentes preparacións e cócteis os días 12 e 13, ao longo de todo o día, nos locais do municipio.

A trixésimo sexta edición desta feira foi presentada hoxe no Concello do Porriño polo alcalde, Alejandro Lorenzo, as concelleiras de Mercados e Turismo, Antía Carrera e Vanessa Ucha, respectivamente, o presidente da Agrupación Apícola de Galicia, José María Seijo, a presidenta da IXP Mel de Galicia, Ester Ordóñez, e Diego Collazo en representación da Asociación de Apicultores da provincia de Pontevedra.

O Porriño promociona o Festival de Cans cunha nova edición da novela de Carlos Meixide, “Cans”

Xa non queda nada para o XXI Festival de Cans e o Concello do Porriño xa vai quentando motores. Co fin de promover o certame, dende a concellería de Cultura, que dirixe Bienvenido Estévez, lánzase unha nova edición da novela de Carlos Meixide, Cans, que ten como escenario o festival e a aldea que lle da nome.

Trátase da décimo cuarta edición da obra que levará outros cen exemplares ás librarías. Cabe destacar que dende que se publicara por primeira vez no ano 2016 vendéronse xa máis de 2000 exemplares.

Autoeditada e ilustrada por María Mejide, a novela conta a historia dun grupo de mozos, os cinco de Ons, que deciden rodar unha curta durante o Festival. Ao longo da historia aparecerán persoaxes que de seguro resultarán moi familiares aos/as lectores e a calquer asíduo ao certame: actores e actrices, xornalistas, cineastas e veciños/as da aldea. Todos eles formando parte dunha novela con moitos rasgos de humor propios do autor, pero tamén con partes de suspense e misterio.

Os monos de Laxeiro, a exposición da súa obra humorística na prensa chega ao Porriño

O Porriño acollerá este mes un acontecemento cultural de primeira orde reunindo nunha mostra todas as viñetas humorísticas que Laxeiro publicou na prensa, concretamente nos xornais El pueblo gallego e Faro de Vigo, nos anos 1928, 1929 e 1930. Durante estes anos o humor gráfico galego vivía unha época dourada e Laxeiro foi un dos seus estandartes.

A exposición “Os monos de Laxeiro”  componse de corenta e nove reproducións fotográficas, realizadas case ao tamaño orixinal das viñetas e respectando a cor de fondo tan recoñecible do papel de periódico. Cada viñeta vai enmarcada de forma individual e, tanto os textos dos diálogos, como a referencia do medio e día de publicación, van impresas, dentro de cada cadro, respectando as formas idiomáticas do orixinal e, por tanto, sen adaptar ao galego normativo de hoxe.

Debido a que os debuxos orixinais están perdidos, optouse por facer reproducións fotográficas, tomadas directamente das páxinas dos periódicos, grazas á colaboración de Faro de Vigo e do Arquivo Municipal de Vigo, que posibilitaron acceder á documentación orixinal para poder así reproducir cada viñeta do xeito máis fiel posible. Unha vez realizadas as fotografías, resultou de capital importancia a busca da forma de impresión e do papel máis axeitados.

O resultado é unha colección de corenta e nove cadros, todos do mesmo tamaño, a través dos que o público se pode achegar a esas viñetas imaxinando o seu aspecto orixinal cando foron publicadas na prensa hai xa noventa anos e percorrendo a evolución, tanto formal, como nos contidos do, entón, artista debutante, José Otero Abeledo, Laxeiro.

A mostra estará aberta ao público do 11 de abril ao 11 de maio. Co gallo da inauguración da exposición, Javier Pérez Buján, director artístico da Fundación Laxeiro, dará unha conferencia sobre a mesma que comezará ás 19 h.

A Biblioteca do Porriño sigue liderando en Galicia con 9.200 usuarios, máis de 2000 préstamos mensuais e máis de 45.000 visitas ao ano

No mundo das bibliotecas, o principal indicador de eficacia é o número de préstamos e o número de usuarios. Estes datos soen amosar a boa saúde, ou non, do servizo bibliotecario.

Nos últimos tempos estase a notar en España un descenso xeral destes indicadores, debido principalmente á competencia dos contidos dixitais e doutras formas de ocio por parte dos cidadáns.

Esto obriga ás bibliotecas a buscar novos servizos para seguir xogando un papel destacado na sociedade.

Pero isto non parece afectar á multipremiada Biblioteca do Porriño, que ademais de ofrecer tamén novos servizos (como a recente inauguración da Sala de Estudo Municipal) e contidos dixitais (ebooks a través da plataforma GaliciaLe, películas na plataforma eFilm, implementación da nova app RBGalicia que inclúe o carné dixital…), leva anos encabezando o ranking galego de usuarios e número de préstamos por habitante. E as cifras seguen en contínuo ascenso, ano tras ano.

Con respecto ao número de préstamos, nos dous últimos anos incrementouse nun 25%, prestando unha media de 2374 exemplares ao mes, destacando meses como o pasado xaneiro onde se chegaron a prestar case 2700 exemplares. E con respecto ao 2006 anótase un espectacular incremento dun 1.722% no número de préstamos. A biblioteca porriñesa presta hoxe nun día case o mesmo que no 2006 prestaba durante todo un mes.

“Este éxito débese ao contínuo traballo por ofrecer unha colección actualizada, atractiva e viva, onde se prima o uso dos libros por riba da súa acumulación, onde se coida a xestión da colección basada nos datos e as persoas, e onde se concede gran importancia ás novidades e recomendacións de lectura, moi apreciadas polos usuarios”, explicou o alcalde, Alejandro Lorenzo, agradecendo o enorme labor que realiza o persoal da Biblioteca e o concelleiro de Cultura, Bienvenido Estévez, “O labor dos nosos bibliotecarios é encomiable e xunto co concelleiro Beni conforman ese equipo capaz de levar a nosa biblioteca ao máis alto”.

Con respecto ao número de usuarios, a biblioteca porriñesa ten rexistrados a día de hoxe un total de 9.224 persoas usuarias, é dicir, case o 50% da poboación censada no concello. Un incremento do 330% desde 2006 e unha cifra espectacular a nivel galego e español, que destaca aínda máis se sumamos o uso que fan da biblioteca porriñesa os cidadáns da contorna: un 30% do volume do servizo corresponde a cidadáns de Mos, Vigo, Ponteareas e Tui.

O rexedor concluíu indicando que dende o Concello do Porriño continuarán apostando por “unha xestión encamiñada a que a veciñanza de todas as idades inclúa a lectura nos seus hábitos culturais e de ocio. Que a vivan e a disfruten”.

AFAGA recupera para O Porriño a memoria do Entroido

“Porriñesas!! Porriñeses!! E os que veñen de fóra tamén!! Por fin chegou o día!!”. Así arrancaban o seu pregón os usuarios e usuarias de Afaga Alzheimer no Porriño para dar a benvida a ao Entroido na vila do Louro.

Javier, Fita, Lourdes, Merchi, Santiago e Elva, subiron ao balcón da Casa Consistorial para dar o pistoletazo de saída das festas. “Aínda que lle vimos aquí, non é por facerlle mal, vimos por lle anunciar que estamos de carnaval”, entonaron os pregoeiros. O ano pasado foron os nenos e nenas dos colexios os encargados de facelo e hoxe tocoulles a eles. “Menudo salto de xeración”, dixeron, “pero este Entroido celebramos a nosa diversidade e riqueza cultural. Por iso a xente de Afaga queremos reivindicar que nós tamén formamos parte deste día”.

Porque, tal e como reza o cartel deste ano “é un Entroido para todas e todos”.

“Aquí os anos non importan, sempre e cando a tradición continúe”, afirmaron os pregoeiros, “e nós de tradicións sabemosche muito ou non nos mirades. Mirade que disfraces bonitos fixemos en tan poucos metros cadrados”, aproveitando para pedir ao alcalde un novo local, “a ver se este ano, polo noso 30 aniversario, Caroca nos arranxa algo mellor”.

Como non podía ser doutra forma, a sorna non faltou no seu pregón. “A nosa vila é un lugar único onde cheira a…bueno, xa nos entendedes. A fariña non falta, a da panadería malpensados. E as comparsas, carrozas e participantes engaden a súa cor e encanto propio en cada recuncho das nosas rúas. A peatonal énchese de disfraces divertidos, música contaxiosa e bailes animados”. Lembrando tamén que “é unha oportunidade para compartir”.

“Como di o refran `Xente do Porriño tropa do carallo´ e xa que levamos a sona levamos o proveito”, concluíron chamando á xente a pasalo ben estas festas.

O broche final ao seu pregón o puxeron cantando, como debe ser, “O galo cando canta é día, imos de parranda de noite e de día. E nós que somos uns gandules imos de parranda de sábado a lunes. E nós que somos Porriño do imos de parranda cun vaso de viño”.

Pero non estiveron sós, os/as pregoeiros/as estiveron acompañados no balcón polo alcalde, Alejandro Lorenzo, e a autora do cartel deste Entroido, Carmen Sebastián que foi a encargada de presentalos.

“Chorei moito da emoción o día que me enterei de uqe era a gañadora do concurso de carteis do Entroido”, contou Carmen aos seus veciños e veciñas que escoitaban atentos na praza, “Da emoción pasei á felicidade. Creo que son moi afortunada porque grazas á choiva o meu cartel durou moito máis tempo”.

A pequena prometeu ao seu pobo que seguirá “pintando, esforzándome e aprendendo” e quixo dar públicamente as grazas á súa profe Nuria e ao seu avó Carlos “porque eles son os que ensinan a pintar desde ben pequena”.  Antes de dar paso a Afaga desexou que “este Entroido 2024 quede grabado na memoria de todos e todas para sempre”.

O Entroido volverá ao Porriño o 24 e 25 de febreiro

O Concello do Porriño fixo públicas hoxe as novas datas nas que se desenvolverá a programación do Entroido que foi aprazada polo mal tempo. As comparsas volverán percorrer as rúas da vila o 24 de febreiro, cando retomaremos toda a programación.

O sábado 24 de febreiro arrancará a festa co pregón de Afaga Alzhéimer e o desfile de comparsas sairá ás 18 h do pavillón muncipal. A programación será a mesma que a prevista para o sábado de Entroido, excepto o concerto dos Gin Tonic´s, xa que no seu lugar tocarán Los Coleguitas.

O domingo 25 as rúas vestiranse de loito e celebrarase, cos mesmos horarios e programación, o velorio e enterro da Sardiña. Hai que sumar este día o fin de festa que será a cargo da Turre´s Band unha vez finalizados os actos fúnebres.

Queremos agradecer ás comparsas participantes, grupos musicais, de animación…. a súa disposición para coordinar axendas e conseguir que o Entroido, aínda que uns días máis tarde, se celebre por todo o alto.