Alcaldía

Toda a poboación do concello beneficiarase da plena mobilidade sen franxas horarias coa nova orde do Goberno

 

Toda a poboación do Porriño beneficiarase da plena mobilidade sen franxas horarias coa nova orde do Goberno que retira as limitacións para os núcleos de menos de 10.000 habitantes, segundo anunciou onte o presidente do Goberno Central.

Cando entre en vigor esta nova instrución, a mobilidade sen franxas horarias chegará tamén ao centro da vila, á parroquia do Porriño que ten unha poboación de 9.057 habitantes.

O centro da vila quedara ao marxe cando o pasado 8 de maio, elimináronse as franxas horarias para os habitantes de núcleos de menos de 5.000 persoas, medida que beneficiou a Torneiros, Atios, Pontellas, Budiño, Mosende, Chenlo e Cans, ademais do núcleo de Carracido.

A eliminación de franxas horarias para núcleos de menos de 10.000 habitantes entrará en vigor cando se publique no BOE unha orde ministerial do ministro de Sanidade que agárdase ao longo do día de hoxe, segundo a información que obra no Concello do Porriño e na Policía Local.

18/05/2020 in Alcaldía

O Concello traslada a través de UNICEF, as actuacións que están a realizarse para unha mellor atención á infancia neste estado de alarma

O Concello do Porriño, a través da Concellería de Educación e da Oficina Municipal de Información á Xuventude, participa dende o pasado martes e ata o vindeiro 2 de xuño, nun ciclo de seminarios “on line”, promovidos a nivel nacional por UNICEF. O obxectivo é mellorar a atención á infancia e á mocidade no contexto actual de crise pola pandemia do “Covid-19”.
Os gobernos locais expoñan as súas respectivas experiencias explicando como están a actuar para mitigar os efectos da crise económica nos sectores máis desfavorecidos.

“Porriño amosara aos restantes concellos participantes as súas actuacións para rachar coa fenda dixital entre alumnos perante a compra e reparto de 250 routers e tarxetas de conexión wifi entre os estudantes cúas familias carecían de conexión á Rede, así como o traballo que estamos a realizar no eido dos Servizos Sociais procurando alimentos para máis de 800 porriñeses, entre eles 311 menores”, subliñou Lourdes Moure, concelleira de Educación.


Perante este ciclo de seminarios preténdese reforzar a aprendizaxe colectiva e compartida entre Porriño e os demais gobernos locais de cidades vencelladas á rede de UNICEF. Os seminarios propoñen prácticas innovadoras para enfocar problemas de xénero, participación infantil e igualdade neste estado de alarma no que continuamos.

14/05/2020 in Alcaldía, Educación e tecnoloxía, Servizos sociais

Máis de 800 porriñeses recibiron axuda alimentaria do Concello debido ao estado de alarma

O departamento de Servizos Sociais do Concello do Porriño realizou un resumo das axudas alimentarias se están a prestar, tanto para a adquisición de productos frescos e de primeira necesidade coma da entrega de lotes de conservas e outros productos non perecedoiros a través de “SOS Porriño”.

As cifras resultantes amosan a gravidade do impacto do estado de alarma e a inactividade económica na poboación do Porriño.

336 familias que agrupan a 847 porriñeses (536 adultos e 311 menores) recibiron axuda directa do Concello entre o 14 de marzo e ata o 30 de abril, para a adquisición de productos alimentarios frescos e de primeira necesidade.  Trátase do abastecemento realizado perante contratos do Concello coa firma distribuidora “Froiz”. Os receptores son familias cuias necesidades son previamente avaliadas plos técnicos do departamento de Servizos Sociais do Concello.

Esta acción extra do Concello de O Porriño que está a manterse neste mes de maio , complementa á axuda periódica que distribúe o Banco de Alimentos “SOS Porriño” que tamén medrou.

Actualmente 758 persoas do Porriño reciben productos do Banco de Alimentos, das que 555 persoas xa eran usuarias y 203 son novos solicitantes de axuda.

As doazóns de empresas e industrias da contorna ao Banco de Alimentos continúan nestas semanas de estado de alarma. Hoxe recibiuse unha achega de productos conxelados doados por “Nueva Pescanova”, como reflicten as imaxes adxuntas.

13/05/2020 in Alcaldía, Servizos sociais

O goberno municipal acorda foemntar o consumo no comercio de proximidade e consensuará co resto dos grupos as posibles axudas


O goberno municipal do Porriño e os grupos políticos da Corporación continuarán “mantendo todas as reunións que sexan precisas ata establecer un acordo consensuado para determinar de que xeito o Concello do Porriño pode axudar ao reinicio da actividade económica local”, subliñou a alcaldesa Eva Garcia. A rexedora considerou “moi proveitosas” as reunións que onte á tarde mantivo o goberno municipal. Primeiramente cunha representación de diversos sectores da economía local. E logo cos voceiros dos grupos políticos da Corporación.

No primeiro encontro participaron representantes da Asociación de Comerciantes e Industriais de Porriño (ACIPOR); da Asociación de Hostalaría; praceiras do Mercado de Abastos, taxistas e autónomos. Expuxeron as dificultades que atopan e as necesidades que teñen para recuperar a actividade comercial, da hostalaría e doutros sectores. Eva García relatou que o goberno municipal explicoulles que o Concello pode darlles apoio mediante campañas de promoción do consumo local fomentando que se compre aquí”, dixo a alcaldesa.
Os representantes dos sectores económicos tamén solicitaron axudas directas que para reiniciar as súas actividades despois de dous meses de paralización. A alcaldesa explicoulles que dentro das competencias limitadas da administración municipal, “queremos consensuar con todos os grupos políticos da Corporación que modificacións orzamentarias poderíamos realizar para inxectar catos na economía local”.

Precisamente o goberno municipal mantivo onte unha reunión cos voceiros dos grupos municipais na que trasladaron as peticións dos sectores económicos e valoraron que tipo de medidas de apoio poderían acometerse polo Concello.
“Imos traballar para determinar as posibles modificacións necesarias do Orzamento Municipal e habilitar partidas para canalizar axudas”, manifestou Eva García.

12/05/2020 in Alcaldía

Carracido tamén pódese beneficiar da norma que suprimiu as franxas horarias nos núcleos de menos de 5.000 habitantes


O Concello do Porriño quere aclarar que a norma que dende o pasado venres 8, por orde da Xunta de Galicia, eliminou as restricións de mobilidade por franxas horarias en núcleos separados de menos de 5.000 habitantes, TAMÉN É DE APLICACIÓN EN CARRACIDO.

A Concellería de Ordenación do Territorio que dirixe Pedro Pereira, fai esta aclaración ante as consultas xurdidas entre veciños de Carracido. Aínda que Carracido forme parte da parroquia de Santa María do Porriño, constitúe un núcleo diferenciado o que permite a aplicación da mesma norma que rexe para Torneiros, Atios, Budiño, Mosende, Chenlo, Pontellas e Cans.

En cambio no centro da vila, en Santa María do Porriño (centro urbano) SEGUEN AS RESTRICIÓNS POR FRANXAS HORARIAS E IDADES que están vixentes nesta fase 1 do Plan de Desescalada. que surpimiu

11/05/2020 in Alcaldía

O goberno municipal escoitará as demandas de axuda de diversos sectores para reiniciar a economía local


O goberno municipal convocou hoxe, a partir das 17 horas, a representantes de diversos sectores da economía local para escoitar as súas necesidades de axuda para a reactivación.
Están convocados representantes da Asociación de Comerciantes e Industriais de Porriño (ACIPOR); da Asociación de Hostalaría; praceiras do Mercado de Abastos, taxistas e autónomos.
Despois, a partir das 19 horas, está convocada unha xunta de voceiros do grupos municipais para determinar os asuntos que se tratarán nun vindeiro pleno da Corporación. Entre eles, as modificacións orzamentarias de diversas partidas que non se empregarán e serán redirixidas para axudas sociais e para reiniciar a economía local.

11/05/2020 in Alcaldía, Educación e tecnoloxía, Servizos sociais, Urbanismo, comercio e industria

Axentes da Policía Local reanimaron a unha nena de 2 anos que estaba atragoada, en parada cardiorrespiratoria

Dous axentes da Policía Local do Porriño acadaron reanimar con éxito a unha nena de 2 anos que estaba atragoada e xa non respiraba. Os feitos ocorreron onte sábado, ás 19,40 horas. Os pais da nena acudiron á Xefatura da Policía Local coa nena explicando que acababa de atragoarse na casa. Un dos axentes que estaban de garda, fixo a manobra de reanimación cardiorrespiratoria a que respondeu co éxito, namentres o outro axente solicitou unha ambulancia. Cando chegaron os efectivos sanitarias, a nena xa estaba reanimada. Non obstante foi trasladada ata o Centro de Saúde do Porriño para a súa valoración.

Tanto dende a Alcaldía coma pola Concellería de Seguridade valorase moi positivamente a actuación dos axentes que ven a revalorizar a importancia da formación continua pola que aposta o goberno municipal porriñés. Toda a plantilla da Policía Local recibiu e completou en 2019 un curso de reanimación cardiopulmonar e manexo de desfibriladores (DESA) para poder atender emerxencias como a ocorrida onte. Ao mesmo tempo todos os vehículos de patrulla están equipados cun “DESA” que se engade ó restante material que levan para atender emerxencias.

De feito xa en novembro pasado, a dotación dun coche patrulla da Policía Local do Porriño atendeu a un condutor en parada cardiorrespiratoria que sufriu un accidente na rotonda do Cristo de Belén, acadando a súa estabilización ata que chegou a ambulancia do 061.

Por outra banda, a Policía Local, en colaboración co persoal do 061, impartiron cursos de reanimación e primeiros auxilios tanto a veciños, a través das AAVV, coma ao alumnado dos institutos da vila.

10/05/2020 in Alcaldía, Seguridade

A Concellería de Deportes lembra a necesidade de cumprir coas normas de uso dos circuítos habilitados no paseo do río Louro

A Concellería de Deportes anuncia que ven de solicitar á Policía Local do Porriño que faga rondas de vixilancia nos circuítos habilitados no paseo do Río Louro para correr e camiñar ante as denuncias de certos comportamentos que infrinxen as normas establecidas e poñen en perigo aos restantes usuarios.

Chegaron ao coñecemento da Concellería denuncias de persoas que circulan en sentido contrario ao establecido e tamén a presenza de ciclistas por esas sendas, o que está expresamente prohibido.

Lembramos as normas de uso destes circuítos:

Normas Obrigatorias:

  1. Dirección única. Inicio na marxe esquerda do río e volta pola marxe dereita.
  2. Distancia mínima entre corredores. 10. Metros.
  3. Corre sempre pola marxe dereita do camiño.
  4. Trata de evitar ol rebufo do corredor que leves diante.
  5. No caso de adiantamento, fai algún sinal acústico para avisar ao corredor que vas rebasar.
  6. Circuíto prohibido para patíns, bicicletas e monopatíns.
  7. No caso de que prefiras pasear, segue as normas; mantén unha distancia mínima de 4 metros, e ocupa só a marxe dereita do camiño.
  8. Nos sitios estreitos, fai o favor de extremar a túa precaución evitando contactos.
  9. Recomendamos o uso de máscara de protección e luvas.
  10. No primeiro tramo do circuíto existen marcas para a realización de series. Nunca vaias atrás; recupérate camiñando e volve ao circuíto atravesando a ponte de madeira, xira á dereita e camiña ata o inicio de percorrido.

08/05/2020 in Alcaldía, Deportes, Parques e xardíns

A Concellería de Tráfico pide aos porriñeses que respecten as normas para circular polas beirarrúas

O Concello do Porriño, a través da Concellería de Tráfico, fai un chamamento aos porriñeses para que observen o xeito de circulación peonil polas beirarrúas para cumprir coas normas de distancia social e seguridade que impón o actual estado de alarma. É dicir: que circulen polas beirarrúas pola man dereita, segundo o sentido da marcha, evitando cruzarse.

Sergio Casal, concelleiro responsable de Tráfico, manifestou que “este chamamento fai se con maior fincapé para os veciños que circulan polas beirarrúas de entrada e saída dende o centro do Porriño cara a Cans, Atios e Torneiros”. O concelleiro engadiu que “tamén debe observarse a norma de que os peóns circulen pola súa man dereita nas rúas peonalizadas do centro”.

08/05/2020 in Alcaldía, Tráfico

O “VII Triatlón Concello do Porriño” cancelase ata 2021 e os cartos serán redirixidos para axuda á economia local

 

A Concellería de Deportes anunciou hoxe que a sétima edición do Triatlón Concello do Porriño queda cancelada. Esta proba que ten un especial recoñecemento entre os triatletas de Galicia e Portugal reunindo a máis de 200 participantes como acontecera en 2019, ía celebrarse o sábado 20 de xuño.

Como todos os demais eventos calendados no mes de xuño pola FEGATRI (Federación Galega de Triatlón) foron suspendidos por decisión deste organismo á vista da prolongación do estado de alarma e ante os prazos previsibles do plan de desescalada. A decisión federativa adoptouse esta semana e comunicouse onte ao Concello do Porriño.

 

David Alonso, concelleiro de Deportes manifestou hoxe que a dotación económica que estaba asignada polo Concello para a organización do Triatlón que son 8.000 euros “serán redirixidos a axuda social xunto coas outras partidas orzamentarias municipais que serán modificadas segundo acorde a corporación porriñesa para contribuír a reiniciar a economía local”, declarou Alonso Bargiela.

08/05/2020 in Alcaldía, Deportes