Alcaldía

Nova quenda das Xornadas Gastronómicas do Entroido

Esta tarde haberá unha nova quenda das Xornadas Gastronómicas do Entroido do Porriño nas que participan 20 establecementos de hostalaría da vila.
Ata o 14 de marzo, cada venres e sábado, a partir das 19 horas, os bares e cafeterías participantes ofrecerán un pincho polo prezo de 1 € con elaboracións propias do Entroido.

Nas Xornadas participan os establecementos:
“Tapería La de Evi”, “Saspi”, “Paso a Nivel”, “Argentino 2”, “Adéle”, “Segredos”, “Millenium 33”, “Cólleo con pinzas”, “La de Chato”, “A Francachela”, “El Patio”, “Pantera Rosa”, “Maloserá”, “Sol”, “Adega de Montero”, “Maracaibo”, “Mesón Mondariz”, “La Cueva” y “Cafetería O Porriño”.

28/02/2020 in Alcaldía, Cultura e festas

A Concellería de Infraestruturas humanizará a rúa Aloques con cargo ao Plan Concellos 2020

A Xunta de Goberno Local, a proposta do concelleiro de Infraestruturas, Pedro Pereira acordou incluír no Plan Concellos da Deputación de Pontevedra para o ano 2020 a humanización da rúa Aloques ata a súa intersección coa rúa Tarela cun orzamento estimado de 422.000 euros.

O proxecto foi presentado previamente polo concelleiro de infraestruturas aos residentes na rúa Aloques o pasado 5 de decembro nunha reunión que se celebrou na casa do Concello.

A mellora deste espazo urbano conleva a reorganización do tráfico, unha mellora estética e a renovación e ampliación do servizos existentes. A tal fin compre a demolición do firme actual e a súa substitución por un enlousado en pedra. E ademais acometerase a recollida de pluviais, saneamento, abastecemento de auga, telecomunicacións e electricidade.
A rúa Aloques quedará de tránsito peonil, sen tráfico de vehículos agás residentes.

O proxecto sairá a licitación, cando estean rematados os trámites burocráticos, para a súa execución ao longo deste ano.

27/02/2020 in Alcaldía, Tráfico, Urbanismo, comercio e industria

A IV Challenge Rías Baixas de ciclismo presentouse no CEIP Fernández López co alumnado como espectadores de luxo

A cuarta edición da “Challenge Rías Baixas” de ciclismo que organiza o club “Máster da Louriña” co apoio da Concellería de Deportes do Concello do Porriño, presentouse este mediodía nas instalacións do CEIP “Fernández López” co alumnado como espectadores de luxo, o tempo de lecer.

A diferencia de anos anteriores, o club e o concelleiro de Deportes, David Alonso decidiron sacar o acto fora da casa consistorial e á vista da resposta dos rapaces e a súa implicación, “foi todo un acerto” segundo valorou David Alonso.


Xunto con Juanjo Alvarez Cerdeira e David Alonso, protagonizaron a presentación da proba Begoña Toucedo, concelleira de Deportes de Mos e Miguel Bouza, edil de Mocedade de Ponteareas.

A Challenge consta de tres etapas que se disputarán entre o sábado 29 de febreiro e o domingo 1 de marzo. A primeira etapa será unha contra reloxo individual de 8 kilómetros no parque de Avisoureira, en Guláns (Ponteareas). A segunda etapa será unha etapa en liña de 81 kilómetros, ó longo do concello de Mos. E a terceira e última etapa, “Gran Premio do Porriño” consistirá noutra etapa en liña, de preto de 78 kilómetros.
A Challenge Rias Baixas 2020 terá 192 participantes. Está reservada para corredores Máster 30, Máster 40, Máster 50 e Máster 60, así como para Féminas Máster. Tamén hai unha categoría júnior para a que se reservaron 30 prazas.

27/02/2020 in Alcaldía, Deportes

Hoxe terá lugar o pleno municipal ordinario de febreiro

A corporación local de Porriño decidirá sobre a cesión dunha parcela ao Centro Tecnolóxico do Automobil de Galicia para habilitar un aparcadoiro e servizos conforme a petición trasladada polo CTAG ao Concello. A proposta que vai a pleno é para ceder unha parcela de titularidade municipal de 5.377 metros cadrados no Polígono Industrial de A Granxa, conforme valorou a Comisión Municipal de Urbanismo nunha sesión celebrada na tarde do luns.

O pleno ordinario de febreiro vaise celebrar hoxe xoves, a partir das 18 horas, segundo acordou a Xunta de Voceiros Municipais, para evitar a coincidencia da sesión cos actos de remate do Entroido no Mércores de Cinza.

A orde do día contempla 17 asuntos. Entre eles tamén incluese para o seu debate, a solicitude á Consellería de Educación para que desafecte as cinco casas dos mestres no CEIP Antonio Palacios de Torneiros para a súa posterior conversión en vivendas sociais.

Por iniciativa da concelleira delegada Cami Moreira, levase ao pleno o Plan de Igualdade de Oportunidades entre Mulleres e Homes do Porriño para o cuatrienio 2020/2024.

No capítulo de mocións haberá ata tres relativas ao 8 de marzo e unha específica de EU Son sobre os traballos de desbroce e adecentamento que se realizan na parcela cedida polo Concello a “Aceesca” para o seu futuro centro de formación dual, no Polígono das Gándaras.

27/02/2020 in Alcaldía

IV Challenge Rías Baixas de ciclismo presentase este xoves no CEIP Fernández López

A cuarta edición da “Challenge Rías Baixas” de ciclismo que organiza o club “Master da Louriña” co apoio da Concellería de Deportes do Concello do Porriño, será presentada este xoves 27, ás 11,30 horas. A diferencia de anos anteriores, o club e o concelleiro de Deportes, David Alonso decidiron sacar o acto fora da casa consistorial e elixiron o CEIP Fernández López e na hora do recreo para facer a presentación.

A Challenge consta de tres etapas que se disputarán entre o sábado 29 de febreiro e o domingo 1 de marzo. A primeira etapa será unha contrareloxo individual de 8 kilómetros no parque de Avisoureira, en Guláns (Ponteareas). A segunda etapa será unha etapa en liña de 81 kilómetros, ó longo do concello de Mos. E a terceira e última etapa, “Gran Premio do Porriño” consistirá noutra etapa en liña, de preto de 78 kilómetros.

A Challenge Rias Baixas está reservada para corredores Master 30, Master 40, Master 50 e Master 60, así como para Féminas Master. Tamén hai unha categoría junior para a que se reservan 30 prazas mentres que as 170 restantes son para as categorías master masculina e feminina.

26/02/2020 in Alcaldía, Deportes

Entroido 2020: Os actos do Mércores de Cinza rematarán cun espectáculo de pirotecnia fría

O entroido do Porriño rematará este serán con actos do Mércores de Cinza que xiran en torno ó Velorio e Enterro da Sardiña.

O Velorio coemzará ás 17 horas na praza Arquitecto Antonio Palacios. Posteriormente, dende as 19 horas coa compañía “Troula Animación” que trae o espectáculo pasarrúas “Errantes” terá lugar o cortexo fúnebre que contará ademais coa participación das comparsas inscritas este ano.

O percorrido será polas rúas Antonio Palacios, Domingo Bueno, San Sebastián, Manuel Rodriguez, Ramón Gónzalez e remate na praza do Concello.

A continuación seguirá a lectura do testamento e despois o acompañamento da Sardiña ata o río Louro, na Ponte do Valo onde terá lugar a incineración.

O acto concluirá cun espectáculo de pirotecnia fría. Tratase dun formato que non implica nin ruido nin outras emisións conforme o acordo que adoptou o Goberno Municipal do Porriño e ratificou o pleno da Corporación Local no pasado mes de xaneiro.

A proposta da Concelleira de Festexos, Cami Moreira nas festas que organiza o Concello do Porriño empregarase exclusivamente pirotecnia fría ou insonora a fin de eliminar a contaminación acústica por espectáculos de lucería e fogos artificiais.
Deste xeito, O Porriño é o primeiro concello da área metropolitana de Vigo que establece semellante veto.

Enterro da Sardiña. Espectáculo “Errantes”

26/02/2020 in Alcaldía, Cultura e festas

Programación do Martes de Entroido: mantense os actos previstos

A Concellería de Cultura e Festexos informa que, de momento, mantense a programación prevista para hoxe, Martes de Entroido, á vista das previsións meteorolóxicas que sinalan que a partir de mediodía, deixará de chover.

De xeito que, a partir das 16,30 horas, comezará na praza Arquitecto Antonio Palacios, unha nova quenda do Obradoiro de Máscaras para nenos e nenas maiores de 5 anos., a cargo do grupo Tanxarina.
Engadimos unha galería de imaxes de onte.

Ademais, a partir das 18 horas, haberá animación de rúa coas Charanga do Dr. Anchoa, Charanga Noroeste e Xigantes e Cabezudos.

E dende as 18,30 horas, terá lugar o Desfile de Comparsas, coas dezaseis agrupacións que participan este ano, en percorrido dende o barrio de San Sebastián ata a praza Arquitecto Antonio Palacios.

25/02/2020 in Alcaldía, Cultura e festas

Obradoiros de máscaras para a infancia

 
A Concellería de Cultura e Festextos lembra que tanto hoxe luns como mañá martes haberá obradoiros de máscaras para a infancia.
Unha actividad incluída na programación do Entroido do Porriño 20202.
Os obradoiros están a cargo do grupo Tanxarina, para nenos e nenas a partir de 5 anos.
En horario de 16,30 a 18,30 horas, na praza Arquitecto Antonio Palacios.
No caso de mañá martes, a actividade quedará supeditada ás condicións meteorolóxicas xa que hai previsión de choiva.
 
24/02/2020 in Alcaldía, Cultura e festas

Os Xogadores da Ola deron a benvida ó Entroido

Os Xogadores da Ola foron os encargados de dar a benvida ó Entroido do Porriño como pregoeiros. Un recoñecemento a súa contribución á animación das rúas nestas datas. 

Fixeron o pregón en verso e animaron a toda a veciñanza a participar do Entroido. E logo protagonizaron o tradicional Xogo que se celebra dende hai 77 anos.

Deixamos algunhas imaxes do pregón e do Xogo da Ola. 

 

 

 

 

 

24/02/2020 in Alcaldía, Cultura e festas