Alcaldía

O Porriño acolleu hoxe a presentación do Obradoiro de Emprego “O Noso Encontro co Emprego”, un innovador programa de formación e emprego dirixido a mozos menores de 30 anos. O evento, que tivo lugar nas instalacións de Porremprego, contou coa participación do alcalde de Porriño, Alejandro Lorenzo e a delegada territorial da Xunta en Vigo, Ana Ortiz, que estiveron acompañados polo director territorial de Emprego, José Antonio Rodríguez e a directora do Obradoiro, Begoña Echegaray.

Este novo programa, que require un investimento total de máis de 480.000 euros, financiarase principalmente a través da Consellería de Emprego, Comercio e Emigración da Xunta de Galicia, con 439.000 euros, aos que se suma unha achega municipal de 45.000 euros. Un total de 16 alumnos-traballadores beneficiaranse desta formación, divididos en dúas especialidades: albalenería urbanización e carpintería, con oito participantes en cada unha.

Os alumnos de carpintería poñerán en práctica os seus coñecementos reparando tres pasarelas no Paseo do Louro, mellorando así a accesibilidade na senda peonil que bordea o río. En canto aos futuros albaneis, encargaranse dos labores de urbanización e pintura na rúa Paralela 3 do Polígono Industrial da Granxa, onde se executarán novas beirarrúas.

O programa “O Noso Encontro co Emprego” terá unha duración de doce meses e “representa unha valiosa oportunidade para que os mozos se formen e adquiran experiencia en profesións altamente demandadas no mercado laboral, aumentando así as súas posibilidades de inserción laboral”, tal e como trasmitiu o alcalde Alejandro Lorenzo, quen  instou aos novos traballadores a “aproveitar ao máximo esta experiencia”, subliñando a importancia do servizo público que brindarán a todo o pobo.

Pola súa banda, a delegada Ana Ortiz, incidiu en que están “ante unha ocasión magnífica para abrir unha ventá ao mercado de traballo, xa que tanto a sociedade como as empresas necesitan xente formada, aí é onde tedes a vosa oportunidade”.  

O acto de presentación celebrouse dun xeito especial, xa que os alumnos doutro obradoiro de emprego do Porriño, centrado na especialidade de cociña, ofreceron un almorzo, dando a benvida aos novos compañeiros e demostrando, unha vez máis, a súa preparación e habilidades adquiridas tras un ano de formación.

Con esta iniciativa, desde o Concello do Porriño continúan reafirmando o seu compromiso coa creación de emprego e a formación da súa mocidade, sentando as bases para un futuro laboral máis prometedor para todos eles.

O Centro Tecnolóxico do Granito acolleu hoxe un importante encontro técnico centrado na protección fronte á exposición á sílice cristalina, un tema de vital relevancia para a saúde dos traballadores no sector da extracción e tratamento de pedra, que no Porriño ten unha especial relevancia xa que esta actividade é fundamental.

Organizado polo Clúster do Granito e o Centro Tecnolóxico do Granito de Galicia, en colaboración co Concello do Porriño, o ISSGA e Mediplus, o evento reuniu a profesionais de diversas disciplinas para reflexionar sobre a necesidade de minimizar os riscos asociados á sílice cristalina, que pode provocar enfermidades graves como a silicose, que lamentablemente afecta a centos de veciños do Porriño e da súa contorna.

O acto foi inaugurado por José Ángel Lorenzo, Secretario Xeral do Clúster do Granito, quen destacou a importancia de abordar esta problemática desde unha perspectiva multidisciplinar. A xornada comezou cun relatorio do experto xurídico en silicose, D. Serapio Martín, quen expuxo a normativa vixente que afecta ás empresas, así como aspectos cruciais para os traballadores, como sancións, indemnizacións e incapacidade.

Posteriormente, o xefe do centro territorial do ISSGA en Pontevedra abordou os retos actuais en materia de prevención de riscos laborais e a resposta do sector ante estes desafíos.

O segundo bloque centrouse na prevención e na presentación de equipos de protección fronte a nanopartículas, así como en solucións de extracción e mellora da calidade do aire. Este segmento contou coa participación de destacados profesionais como Sindo Prieto, responsable de Casella; Marco Giacomelli, director en Europa de BLS Safety; Benjamín Feteira, enxeñeiro técnico de SENSO; e Fernando Viscuña, director técnico de ADRESYS, quen compartiu os seus coñecementos e experiencias no ámbito da seguridade laboral.

A xornada concluíu coa presentación do programa de concienciación de Mediplus Atlántico, a cargo de Myriam Lemos, quen salientou a importancia da formación e a sensibilización na prevención de riscos laborais.