Novas

O Porriño pon en marcha unha ludoteca municipal

O Concello do Porriño, a través da concellería de Igualdade que dirixe Carolina González, pon en marcha por primeira vez unha ludoteca municipal gratuíta.

“Dende o vindeiro 1 de outubro e ata o 30 de novembro ponse en funcionamento o servizo de ludoteca nas instalacións do Centro Cultural Municipal, cun horario que abranguerá dende as 16 h ata as 20 h”, explicou a concelleira, “Desenvolveranse actividades dirixidas a nenas e nenos de idades comprendidas entre os 3 e os 12 anos nun espacio común que lles permitirá relacionarse entre eles e compartir momentos de ocio, á vez que se traballan valores tales como o respecto e a solidariedade”.

O aforo será de 30 nenas e nenos cada día que as súas familias poderán deixar ao cargo das monitoras e monitores dentro do horario establecido. Non é necesaria inscrición previa, e os pequenos e pequenas serán admitidos ata completar as prazas diarias.

“Queremos contribuír a mellorar a conciliación da vida persoal e laboral das familias do Porriño e á vez fomentar nos máis pequenos valores como a cooperación, igualdade e corresponsabilidade”, concluíu o alcalde, Alejandro Lorenzo, “Nese sentido traballamos e, dentro das nosas competencias, pretendemos impulsar medidas que poidan a curto/medio prazo consolidarse na vila”.

Cabe destacar que esta iniciativa forma parte do “Plan corresponsables 2022” da Secretaría Xeral de Igualdade.

 

19/09/2022 in Igualdade

A Aula CeMIT retoma a súa actividade formativa

A Aula CeMIT do Concello do Porriño volve a ofrecer cursos de formación presenciais desde este mes. As actividades desenvolveranse na aula, situada no Multiusos de Torneiros en horario  de mañá e tarde.

Entre a oferta formativa atópanse cursos competencias dixitais, ofimática e optimización e mantemento de equipos, en diferentes niveis.

Toda a información sobre os cursos, horarios e inscricións en  cemit.oporrino@gmail.com ou a través do 655 626 203.

A aula CeMIT está equipada coa última tecnoloxía , Internet e sistemas de videoconferencia a disposición da cidadanía, tanto para actividades formativas como para o acceso libre. Está xestionada por un axente TIC que imparte e planifica os cursos e ademais presta apoio aos usuarios e usuarias no seu achegamente ás TIC.

16/09/2022 in Educación e tecnoloxía, Emprego e formación

SOS Porriño adáptase ás necesidades para prestar un servizo máis xusto

O Goberno Municipal conseguiu onte o respaldo do pleno á proposta de modificación das bases que regulan o banco municipal de alimentos, SOS Porriño.

Tendo en conta que a actual situación socioeconómica agravou as condicións de precariedade e vulnerabilidade de moitas familias residentes no Porriño, a actividade do banco municipal de alimentos SOS Porriño debe adaptarse a este contexto.

“É necesario redefinir os requisitos e criterios económicos de acceso ao programa para poder prestar este servizo da maneira máis xusta e igualitaria posible. Trátase de que ninguén se quede atrás e sen respaldo na difícil situación económica que se presenta”, explicou o alcalde, Alejandro Lorenzo.

A tal fin, impulsouse unha modificación das bases que permita un acceso máis acaído ao servizo. “Ata o de agora para acceder a esta axuda había un límite de ingresos de 579 euros para unha persoa que viva soa”, explicou o concelleiro de Benestar Social, Abel Estévez, “Con esta modificación deduciranse neste importe o aluguer ou hipoteca ata un límite de 400 euros”.  En definitiva, tal e como indicou o edil, “o que queremos é que un incremento no aluguer ou hipoteca non impida o acceso á axuda”.

O programa municipal de alimentos, SOS Porriño, atende na actualidade a unhas 150 familias, que reciben unha vez ao mes alimentos , con carácter xeral, aínda que tamén hai achegas a maiores en ocasións destacadas dependendo da dispoñibilidade de recursos.

15/09/2022 in Benestar

Volven as clases de defensa persoal para mulleres

As clases de autodefensa para mulleres, impulsadas pola concellería de Igualdade, volven este sábado tras o parón estival. Impartiranse no ximnasio “Jovhen Sport” , de 10 h  12 h.

Dende o Concello do Porriño convidamos a todas as mulleres interesadas en recibir esta formación a acudir a estas clases, que son totalmente gratuítas e para as que non se require inscrición previa. Tan só é necesario acudir á hora sinalada anteriormente con roupa deportiva e ganas de aprender.

 O curso, organizado polo Concello coa colaboración do Ministerio de Igualdade, o Pacto de Estado contra a violencia de xénero e á Policía Local, conta con monitores de defensa persoal que, en colaboración con axentes da Policía Local, ensinan ás participantes técnicas de fácil asimilación para repeler os ataques máis habituais.

15/09/2022 in Igualdade

O Goberno Municipal propón a declaración de ERRP nos polígonos residenciais de Torneiros

O Goberno Municipal leva mañá a pleno a declaración dos polígonos residenciais de Torneiros como “Entorno Residencial de Rehabilitación Programada” , o que permitiría á veciñanza o acceso ao programa de axudas para actuacións de rehabilitación a nivel de barrio financiadas con fondos da Unión Europea-NextGenerationEU.

O ERRP abranguería unha superficie total de 124.560 m2 que inclúe 50 bloques de edificios ( 15 na Fase I, 7 na Fase II, 23 na Fase III, 4 na Fase IV e 1 na Fase V) e os viais e zonas libres que os rodean.

“A proposta que poñemos sobre a mesa permitiría á veciñanza dos polígonos residenciais optar a axudas para a mellora e rehabilitación de inmobles, edificios ou vivendas unifamiliares, sobre todo envolventes –fachadas, cuberta…- cambio de ventás ou para a retirada de elementos con amianto, algo que urxe nos polígonos de Torneiros”, explicou o alcalde, Alejandro Lorenzo.

Falamos dunha contía de 22,9 M de euros para barrios, 22,9 M de euros total para edificios e 13,5 M para vivenda as que á que a veciñanza da zona declarada  como ERRP podería optar.

No caso das vivendas as axudas poden acadar o 40% do investimento, cun máximo de 3.000 euros. As actuacións subvencionables inclúen a mellora ou rehabilitación do inmoble que deberá obter un aforro enerxético polo menos do 7% , unha reducción no consumo de Enerxía primaria non renovable do 30% ou adecuar aos requisitos do CTE os elementos da envolvente.

Neste caso Se se trata de edificios, os beneficiarios serán particulares ou comunidades de propietarios, e as axudas poden acadar o 80% do custo, cun máximo de 18.800 euros por edificio , contía que se incrementa en 12.000 euros máis en caso de retirada de elementos con amianto.  As actuacións están dirixidas á mellora ou rehabilitación (do edificio ou de vivenda dentro do mesmo), sobre todo as tocantes á cuberta ou fachada, e en calquera caso, deberán conseguir unha reducción do consumo d eenrxía primaria non renovable do 30% e ademais unha reducción da demanda enerxética anual glopbal da calefacción e refrixeración da vivenda ou edificio do 25% ou 35%.

Destacar que no caso de persoas en situación de vulnerabilidade económica a axuda pode acadar o 100%.

“Trátase dun dos principais núcleos de poboación do Porriño e hai que acondicionalos, non só para adecualos á normativa vixente, senón tamén para mellorar a calidade de vida da veciñanza que reside neles”, concluíu o alcalde, “Dende as asociacións veciñais e particulares veñen reclamando que se actúe nestes bloques de vivendas sen ser escoitados. Esta financiación é vital para eles”.

13/09/2022 in Parroquias

A Policía Local informa de cortes de tráfico no paso a nivel

A Policía Local do Porriño informou hoxe de cortes de tráfico na contorna do paso a nivel polas obras que o ADIF acometerá na liña férrea.

Os cortes estenderanse dende a tarde de hoxe ata o venres, cando está previsto que finalicen os traballos. Os vehículos que circulen pola rúa Cando xirarán cara a praza Central.

Os residentes na rúa Peña poderán acceder pola Rúa Ramirás e os que circulen pola Avda. de Buenos Aires xirarán cara a rúa Progreso. Os peóns poderán cruzar a pé o paso a nivel.

13/09/2022 in Tráfico

Volta ao cole con normalidade

O alcalde do Porriño, Alejandro Lorenzo, e a concelleira de Educación, Carolina González, acompañaron hoxe ao xefe territorial de Educación, César Pérez Ares e aos directores e directoras dos centros educativos do Porriño no acto de inauguración do curso escolar no municipio.

Este ano, o acto realizouse no CEIP da Ribeira, en Torneiros, un centro que acolle a nenos e nenas das parroquias de Torneiros, Chenlo e Pontellas.

“Recuperamos a normalidade nas aulas tras dous anos marcados polas restricións da pandemia, os nenos e nenas poden verse as caras, xogar e abrazarse, con precaucións por suposto, pero poderán volver a ser nenos”, afirmou o alcalde, quen agradeceu aos profesores e profesoras “o enorme traballo que fixestes en momentos tan difíciles, tanto vós como as ANPAS”. “Gracias a vós todo foi máis sinxelo para eles e moito menos traumático”, apuntou.

O rexedor aproveitou para reiterar o apoio do Concello do Porriño aos equipos directivos. “Tedes a nosa man tendida para o que precisedes”, concluíu, “Os nosos centros precisan moitas melloras e traballaremos para todas elas se leven a cabo”. Lorenzo quixo poñer en valor o labor da concelleira de Educación, Carolina González, que compaxina a súa labor de docente coa de concelleira e “traballa moi duro para atender todas as necesidades de todos os centros do Porriño, cunha máxima sempre: os nosos nenos e nenas merecen unha educación pública de calidade”.

13/09/2022 in Educación e tecnoloxía

A fin de semana sáldase con catro detidos no Porriño

A Policía Local do Porriño informou da detención de catro persoas esta fin de semana.

A primeira actuación policial desenvolveuse na noite do sábado 10 de setembro. Ás 5:25 h unha patrulla da Garda Civil solicitaba a colaboración dos axentes tras saltar a alarma de roubo nun céntrico establecemento da vila. Unha vez no lugar, compobaron as imaxes dos presuntos autores dos feitos nas cámaras de seguridade. Nelas distinguíase claramente a tres mozos dunhas características moi concretas, dos que ademais se tiña constancia de que intentaran abrir vehículos estacionados na vía pública en outra ocasión.

Tras montar un dispositivo conxunto coa Garda Civil de vixilancia estreita no centro urbano, localizaron a un dos mozos nas proximidades do pavillón municipal e, minutos máis tarde, a outros dous escondidos baixo dous turismos. Por todo isto, procederon á detención destas tres persoas por un presunto delito de Roubo con forza nas cousas, cuxas penas oscilan entre 1 e 3 anos de prisión.

A segunda intervención tivo lugar o domingo pola tarde nun dos Polígonos Residenciais de Torneiros. Unha persoa foi detida pola presunta comisión dun Delito de furto, tras subtraer a un veciño pertenzas por valor de 1050 euros. A vítima, denunciou que se olvidara nas escaleiras da súa vivenda un ordenador portátil e unha cazadora e que ao ir buscalo non estaba. O home viu sair a unha persoa cargada con bolsas cara un vehículo e, tras preguntarlle, este negou ter algo que ver co roubo, polo que alertou á policía. Tras personarse no lugar localizaron no interior dun turismo o material roubado.

13/09/2022 in Seguridade

O Porriño súmase ao programa de dixitalización para mulleres “Galegas Dixitais”

O Concello do Porriño vén de formalizar a súa colaboración co programa de formación “Galegas Dixitais”, cuxo principal obxectivo é mellorar as capacidades dixitais de mulleres que se atopan en situación de desemprego ou que simplemente queren mellorar a súa capacidade de empregabilidade, ademais de impulsar o emprendemento no Porriño e contribuír a reducir a fenda de xénero.  

A actividade é totalmente gratuíta, xa que está impulsada Xunta de Galicia e financiada polos Fondos Europeos NextGenerationEU  e o Plan de recuperación, transformación e resiliencia.

A formación agrúpase nos seguintes bloques temáticos:

• Competencias dixitais básicas con 40 horas de duración

• Competencias dixitais avanzadas con 40 horas de duración

• Competencias dixitais para o emprendemento con 40 horas de duración

O programa desenvolverase de luns a venres, en horario de 9h a 14h, no Multiusos de Torneiros. Dará comezo o 3 de outubro e finalizará o 14 de novembro.

Xunto co material didáctico, e co fin de facer posible o uso das novas tecnoloxías tras a formación, as participantes serán obsequiadas cun ordenador portátil co que poderán poñer en práctica todo o aprendido.

Para máis información pode contactar chamando 986 338 217 ou por whatsapp no 604 039 575.  

09/09/2022 in Educación e tecnoloxía, Emprego e formación, Igualdade

José Luis Baños de Cos gaña o V Premio Roberto Vidal Bolaño

A quinta edición do Premio de Textos Teatrais Roberto Vidal Bolaño xa ten gañador: José Luis Baños de Cos, coa súa obra “Lume”.

Reunido o xurado do certame, organizado polo IES Ribeira do Louro e a editorial Galaxia en colaboración co Concello do Porriño, decidiu por unanimidade outorgarlle o premio ao ser unha obra moi acaída pola temática e pola linguaxe empregada para a súa representación ou lectura nos centros de ensino secundario.

O xurado, formado polo dramaturgo Ernesto Is, a actriz Cecilia Vázquez, o profesor do IES Ribeira do Louro, Delio García, e Raquel Castro, como secretaria, destacou da peza que sexa unha obra que aborda o tema das diversas violencias sociais , como a homofobia ou a violencia de xénero, das que todas as persoaxes sofren as consecuencias. A escrita, cunha dramaturxia que mestura relato e drama, dalle relevancia ás partes grupais, onde a xeito de coro clásico agroma a conciencia social.

Fotografía do autor: Eva Camba

08/09/2022 in Cultura e festas, Educación e tecnoloxía