Novas

A gaita de Susana Seivane soará no Porriño en homenaxe a Rosalía de Castro

O Concello do Porriño, a través das concellerías de Normalización Lingüística e Cultura e en colaboración coa Rede de Dinamización Lingüística da Xunta de Galicia,  preparou unha programación específica para celebrar o 185 aniversario do nacemento de Rosalía de Castro.

Co fin de homenaxear a esta figura clave das letras e cultura galegas, recordar a súa labor e facer que siga presente para as novas xeracións,  propón un programa de actos o 23 de febreiro, Día de Rosalía de Castro. Arrancará ás 19 h no Círculo Recreativo Cultural co concerto da reputada pianista, Andrea García.

Susana Seivane será o prato forte da programación. A célebre gaiteira ofrecerá un concerto en formato reducido (1/2 hora aproximadamente) na Praza Arquitecto Antonio Palacios ás 20:30 h (no caso de que as condicións meteorolóxicas non o permitan trasladarase ao CRC). 

Versos de Rosalía

Rosalía de Castro ensinou á sociedade da época, e á de hoxe en día, que as mulleres teñen voz e moito que dicir. Unha muller do século XIX que foi quen de marcar un punto de inflexión para o auxe do Rexurdimento, momento clave no eido literario e sobre todo, no político e no social.

Por iso dende o Concello do Porriño decidiuse que foran mulleres as que puxeran voz aos versos da autora, en representación do tecido social da vila. Juana Pérez, presidenta de ACIPOR, Chus Barros do Club Ciclista SPOL, Chus Lemos e Beatriz Correa do Centro Cultural de Pontellas, Eva González do Club de Lectura do Porriño, Alicia Campos do Club Balonmán Porriño, Candela Carballas de Atrezo Teatro e a xornalista porriñesa, Icía Alcalde, farán unha lectura conxunta dun poema da autora.

Será en dúas quendas, unha en cada un dos concertos que conforman a programación.

 

14/02/2022 in Cultura e festas

O Entroido do Porriño 2022 xa ten cartel e pregoeiros

O Concello do Porriño, a través da concellería de Educación, deu a coñecer hoxe o cartel oficial do Entroido 2022.  O deseño de Valeria Lage, alumna de primeiro curso da ESO do CPR Santo Tomás, foi elixido como gañador do I Concurso Escolar de Carteis do Entroido no que se buscaban as mellores ilustracións para promocionar as festas deste ano.

O xurado, composto polo alcalde, Alejandro Lorenzo, e as pintoras locais Nuria Vilanova e Chelo Rodríguez, seleccionaron o deseño de Valeria entre os preto de 200 carteis que presentaron os centros educativos de primaria e secundaria e Aceesca. As ilustracións presentadas foron moitas e variadas, realizadas con ceras, acuarelas, colaxe ou carbón, valéndose de multitudes de técnicas creativas, tanto en formato papel como en cartolina.

O Alcalde do Porriño, acudiu hoxe ao colexio a dar a nova por sorpresa á gañadora do certame, que emocionada recibiu a felicitación do rexedor e dos seus compañeiros de clase entre aplausos.

“Non foi doado elexir entre tantas propostas de calidade, cada cal era máis orixinal e bonita”, explicou o alcalde, “Os nosos pequenos e pequenas dérono todo e podo decir que no Porriño temos unha boa canteira de talento”.

Ante tal dificil decisión, o xurado resolveu ampliar dous accesit quedando os premiados da seguinte maneira: 

  • CARTEL GAÑADOR: Valeria Lage Fernández – 1º ESO do CPR Santo Tomás
  • 2º Premio: Rubén Rodríguez Rodríguez – 5ºB do CEIP Xosé Fernández López
  • 3º Premio: Saray Rodríguez Pérez – Aceesca

ACCESITS:

  • Carlota Rodríguez Miranda- 1º ESO do CPR Santo Tomás
  • Laura Pampillón Teijeira- 3º ESO do IES Ribeira do Louro

O carteis gañadores recibirán un lote de material escolar e os seus autores serán os encargados de ler o pregón que dará inicio ás festas do Entroido na vila.

O acto de entrega de premios terá lugar o vindeiro xoves 17 de febreiro no Centro Cultural Municipal, coincidindo coa inauguración da exposición na que se mostrarán todos os carteis participantes.

 

14/02/2022 in Alcaldía, Cultura e festas, Educación e tecnoloxía

O Concello do Porriño reactiva o Servizo de Normalización Lingüística

O Concello do Porriño reactiva o Servizo de Normalización Lingüística, que conta con persoal técnico ao dispor da cidadanía.

“Desde a concellería queremos que a veciñanza saiba que dispón dun servizo local ao que pode recorrer en busca de asesoramento en materia lingüística ou do proceso de normalización”, explicou a concelleira de Normalización Lingüística, Carolina González, “Fomentar o uso do galego e garantir a súa calidade lingüística é responsabilidade de todos e todas”.

A tal fin habilitouse unha dirección de correo a través da cal os interesados poden comunicarse coa técnico e resolver as súas dúbidas: servizonormalizacion@oporrino.org.

A técnica, Andrea González, ofrece asesoramento nos diferentes departamentos municipais en todo o relacionado coa política lingüística e na planificación, xestión e execución de programas municipais de dinamización e fomento do uso do galego.

Agora, o servizo contará con nova imaxe corporativa e o seu propio espacio web, onde se divulgarán materiais de promoción do uso do galego e información sobre as distintas actividades de dinamización postas en marcha.

 

11/02/2022 in Cultura e festas

A cultura invade O Porriño co teatro e a música como protagonistas

A concellería de Cultura, que dirixe Bienvenido Estévez, presentou hoxe a súa programación cultural para este trimestre. Música, teatro, animación á lectura e conferencias conforman esta oferta cultural dirixida tanto a público adulto como infantil.

A música será unha das grandes protagonistas. Coincidindo co Día de Rosalía de Castro a pianista Andrea García González ofrecerá un concerto no Círculo Recreativo Cultural e o domingo 20 de marzo, será o músico de jazz Rafa Fernández quen actúe na praza Arquitecto Antonio Palacios.  Tamén haberá pasarrúas a cargo dos grupos folk Carapaus, Fondaos do Pífaro e da Asociación Cultural de Mosende.

Para celebrar o día de San Valentín, a reputada Tuna da Facultade de Dereito de Santiago de Compostela percorrerá as rúas e prazas do Porriño .

O teatro será parte importante da oferta cultural do Porriño para este trimestre, tanto para o público familiar como para os máis pequenos. A compañía Animar-T representará a súa obra musical “De cando un paxariño espertábame tódalas mañás no confinamento” para conmemorar o Día Internacional do Teatro, e tamén se subirá o telón para disfrutar das propostas de Atrezo Teatro “Que familia!” e “Pequeatrezos” e de “A nena que se comia todos os contos” de Trémola Teatro.

“A progamación base que hoxe presentamos completarase coas específicas deseñadas para celebrar o Entroido e conmemorar o Día Internacional da Muller e o Día de Rosalía de Castro, que se farán públicas nos próximos días”, indicou o concelleiro, Bienvenido Estévez.   

Pola súa banda, o alcalde Alejandro Lorenzo, explicou que a “cultura será un dos nosos eixos esenciais, queremos que O Porriño sexa un referente cultural”. “Queremos que as manifestacións culturais aneguen a nosa vila, sacalas á rúa e traballamos para que, nos vindeiros meses, cada fin de semana actúen no Porriño agrupacións e artistas locais, ademais dos grupos das nosas asociacións culturais e veciñais”, concluíu o rexedor.

10/02/2022 in Cultura e festas

“Acompañando na aventura de crecer”: xornadas para familias e profesionais

O Centro Cultural Municipal acolle mañá, venres 11 ás 18:30 h, as xornadas para familias e profesionais “Acompañando na aventura de crecer”.

Nestas xornadas organizadas desde a Concellería de Cultura do Porriño, a través da biblioteca municipal, abordarase desde diferentes puntos de vista como podemos favorecer o correcto desenvolvemento das nosas fillas e fillos desde que nacen e na súa primeira etapa infantil, para favorecer unha vida adulta máis saudable e enriquecedora.

Desde diferentes perspectivas profesionais, trataranse varios temas de suma importancia para o desenvolvemento infantil, que funcionan como termómetros para avalialo: a linguaxe, o psicomotricidade, as emocións ou a visión, entre outros. 

O ciclo de charlas “Acompañando na aventura de crecer” desenvolverase ao longo dos meses de febreiro, marzo, abril, maio e xuño, o segundo venres de cada mes.

 “Entende como crece”

Nesta quenda será a fisioterapeuta Vanesa Gómez Gándara a encargada de dirixir a xornada baixo o título “Entende como crece”.

O contido da charla será o desenvolvemento motor na primeira infancia, falarase sobre os principais fitos de cada etapa e explicarase como acompañar ás crianzas en cada momento, así como algunhas claves para detectar calquera disfunción de maneira precoz.

Vanesa é especialista en pediatría, con formación en fisioterapia respiratoria, desenvolvemento motor, problemas dixestivos e terapia manual.

Imparte talleres de formación para familias, en colaboración coas matronas nos talleres prenatais e postnatais. Na súa imparable curiosidade por aprender, actualmente traballa na formación “Método B-B”, unha disciplina integradora no tratamento coas crianzas. Ademais, organiza charlas sobre masaxes infantís e é asesora de lactancia e porteo, entre outras.

 

10/02/2022 in Cultura e festas

O Alcalde comeza en CITIC Censa a rolda de contactos para mellorar a empregabilidade das persoas desempregadas no Porriño

O alcalde do Porriño, Alejandro Lorenzo, acompañado pola concelleira de Emprego e Formación, Rosario Costas, visitou esta mañá as instalacións de CITIC Censa para coñecer de primeira man a actividade da factoría e establecer posibles vías de colaboración entre a empresa e o Concello.

Durante a visita, os representantes municipais estiveron acompañados polo Director Xeral da firma, Juan J. Agulla, a Directora Financieira e Vice Directora Xeral, Ana Alonso, e a Directora de Recursos Humanos, Brenda Senra, quenes transmitiron a súa perspectiva económica de crecemento e a necesidade de persoal especializado.

“Temos plena carga de traballo e o noso principal problema é a falta de persoal cualificado para incorporar”, explicou Juan J. Agulla, “A formación é o noso cabalo de batalla e a colaboración co concello sería beneficiosa para ambas partes”.

Neste sentido, o rexedor apuntou que precisamente establecer vías de colaboración en materia de formación e emprego é o fin da rolda de visitas ás empresas do Porriño que hoxe iniciaron en CITIC Censa.

“O noso obxectivo é detectar as necesidades de recursos humanos e a formación específica que requiren as empresas para poder deseñar acción formativas acordes ás demandas do noso tecido empresarial”, explicou Lorenzo, “Así poderemos ofrecer aos demandantes da bolsa de emprego posibilidades reais de inserción laboral”.

“Pretendemos impulsar a nosa bolsa de emprego e volver a ser un referente para as persoas do Porriño que se atopan en situación de desemprego”, apuntou a edil, “Para iso é imprescindible a coordinación do servicio municipal coas empresas dos nosos polígonos industriais”.

Sobre CITIC-Censa

 Con máis de 50 anos de historia CITIC Censa é unha empresa de calderería pesada que desenvolve a súa actividade en mercados como minería, cemento, enerxías renovables, petróleo, gas e petroquímica.

É un referente mundial na fabricación de equipos de calderería pesada para o sector mineiro e cementeiro que exporta o 100% dos seus productos. Na actualidade conta con 200 empregados e un volumen de facturación de 30 M de euros.

09/02/2022 in Emprego e formación

O Porriño xestiona facilidades de pago nas cotas do IBI resultantes da revisión catastral

O Concello do Porriño vén de solicitar á Deputación de Pontevedra o aprazamento e fraccionamento do pago das cotas do IBI resultantes da revisión da valoración catastral iniciada no ano 2021 para intentar reducir o impacto desta medida na economía dos porriñeses e porriñesas.

“Este procedemento ten unha inicidencia considerable no Porriño, afectando ao redor de 14 mil parcelas”, explicou o alcalde, Alejandro Lorenzo, “Tendo en conta que ten carácter retroactivo, con efectos tributarios dende xaneiro de 2016, supoñerá unha considerable presión fiscal sobre os contribuíntes porriñeses. Isto é algo que xa advertimos no seu momento, facer pagar aos cidadáns o correspondente aos últimos catro anos sin negociar dende o Concello un fraccionamento ou alternativa era inadmisible”.

Para facilitar a xestión das liquidacións e dar maiores facilidades de pagamento aos  afectados, o Concello solicitou ao ente provincial que se emitan as liquidacións de xeito gradual e que, na medida do posible, non se liquide máis dun exercicio pechado en cada anualidade. É dicir, que se fraccione o pago de oficio e que non se acumulen máis de dous recibos do IBI coas novas valoracións.

Ademais, pediuse que se incrementen os prazos das fraccións e meses de aprazamento e que non se cobren os xuros de demora.

“Neste momento, tras dous anos de pandemia, a situación económica para moitas familias non é doada e dende o Concello faremos todo que estea na nosa man para minimizar a carga fiscal e adaptala a esta realidade”, concluíu o alcalde.

 

 

 

09/02/2022 in Alcaldía

Unha hamburguesa porriñesa aspira a ser a mellor de España

245 hamburguesas de todo o país participan ata o 28 de febreiro no II Campeonato de España de Hamburguesas “Best Burger Spain”, un certame ao que concurren unha amplísima variedade de preparacións que van dende as propostas máis tradicionais ás máis vangardistas.

En Galicia presentaronse en total catorce establecementos e un deles é do Porriño. A icónica Hamburguesería Alhambra presenta a súa “Hamburguesa 40 Aniversario”, unha proposta de terneira madurada galega con leituga, cebola caramelizada, queixo D.O. de Arzúa e pan do Porriño, rematada coa súa salsa estrela: o chupitroco.

Foi o seu aniversario o que serviu de inspiración e os animou a presentarse ao concurso. “A hamburguesería abriuse no ano 1981”, explica o responsable do establecemento, Santiago Puertas, “O ano pasado cumprimos 40 anos, pero por mor da pandemia non puidemos celebralo. Presentarnos a este concurso pareceunos unha boa forma de iniciar as celebracións do aniversario”. 

Desde que abrirá as súas portas da man do pai de Santiago, Juan Francisco Puertas, a hamburguesería Alhambra postulouse como todo un referente na hostalería porriñesa atraendo a moita xente dos municipios de arredor que veñen ao Porriño a disfrutar das súas hamburguesas. A oferta foi ampliándose e a día de hoxe a carta a compoñen tamén propostas veganas ou de polo, pero o producto estrela segue a ser a de sempre. “A receita é a tradicional, basada na calidade do produto”, apunta Santiago, “Esa é a clave do seu éxito”.

O alcalde, Alejandro Lorenzo achegouse hoxe a probar a “Hamburguesa 40 aniversario” e felicitar a Santi pola súa iniciativa. “É un local de referencia na vila que leva servidas máis de dous millóns de medio de hamburguesas, non hai quen non coñeza o Alhambra incluso fora do Porriño”, apuntou o rexedor, “Anímovos a todos a probar esta delicia e votar para axudar a que a do Porriño sexa recoñecida como o que é: a mellor hamburguesa”.

Será un xurado popular quen determine cal é o prato gañador tras valorar a calidade do pan, o queixo, a carne e o sabor e a presentación da proposta. Para participar hai que pedir unha da hamburguesa e recibirase unha tarxeta cun código. O seguinte paso é crear un perfil na web do concurso, acceder a `votar´ e calificar a hamburguesa que se probou. Ademais, por rexistrarse e ser xuíz desta edición entrarase nun sorteo de 1.000 euros.

 

08/02/2022 in Urbanismo, comercio e industria

Persoal especializado limpará o manantial da fonte de San Sebastián para asegurar a súa potabilidade

O Concello do Porriño vén de recibir o resultado das analíticas realizadas ao manantial que abastece a Fonte de San Sebastián, que permanecía pechada tras detectarse contaminación na auga.

A análise realizada na mina determina que os valores paramétricos alterados (microorganismos aerobios 22ºC e bacterias coliformes) xa se atopan dentro dos límites que garanten a potabilidade da auga.

“Para maior seguridade dos usuarios e usuarias, é preciso que persoal especializado acometa a limpeza do manantial que abastece á fonte e valore, se é preciso, proxectar a canalización do caudal no tramo ata o grifo”, explicou o concelleiro de Vías e Obras, Ramón Porto, “Queremos asegurarnos de que non se producen filtracións contaminantes como a que obrigou a cortar o subministro”.

“Sabemos que esta fonte ten un gran valor, non só patrimonial senón tamén funcional, xa que son moitos os veciños e veciñas da vila que consumen esa auga cada día, e que supón un gran perxuizo que non esté en funcionamento”, concluíu o alcalde, “Pero estamos facendo o necesario para restablecer o subministro o antes posible con todas as garantías sanitaria, o importante é asegurar que a auga mantén a súa calidade e é apta para consumo”.

Dende o Concello informan tamén que xa se deu orden de retirar o valado que protexía a fonte e limitarase á zona do grifo, para permitir o uso e disfrute do resto do entorno.

 

07/02/2022 in Medio Ambiente, Patrimonio Municipal

Publicadas as bases para o desfile de comparsas do Entroido porriñés

Despois do parón provocado pola pandemia, o Entroido do Porriño volve este ano ás rúas da vila para que as comparsas exhiban a súa creatividade e imaxinación. O Concello vén de facer públicas as bases que rexerán o tradicional desfile de comparsas dentro do programa de actividades do Entroido 2022.

Os desfiles terán lugar nas datas e horarios sinalados no programa de festas do Entroido, o sábado 26 de febreiro ás 18h e o e o martes  1 de marzo ás 18:30h, sempre e cando a situación sanitaria o permita e cun estricto cumprimento das medidas de seguridade sanitaria. 

Tal e como recollen as bases, o prazo de inscripción abrirase o 10 de febreiro e as asociacións poderán inscribir as súas comparsas ata o día 18, ambos incluídos.  Estas deberán formalizarse no Rexistro Xeral do Concello do Porriño. 

Este ano os grupos optarán a premios de ata 1.000 euros, dependendo do número de componentes da comparsa (300 euros de 10 a 19 compoñentes, 550 euros de 20 a 39 compoñentes, 850 euros de 40 a 55 compoñentes e 1.000 euros de 56 ou máis comopoñentes). O importe máximo que se establece é de 13.950 euros polo que os premios se repartirán ata acadar esta cifra seguindo rigorosamente a orde de inscrición.

As bases poden consultarse na seguinte ligazón: https://oporrino.org/documentos/bases-do-desfile-de-comparsas-do-entroido-2022/

Modelo de declaración responsable: https://oporrino.org/documentos/modelo-de-declaracion-responsable/

Impreso de solicitude de inscripción no Desfile de Comparsas do Entroido 2022: https://oporrino.org/documentos/impreso-de-solicitude-de-inscripcion-no-desfile-de-comparsas-2022/

05/02/2022 in Cultura e festas