Novas

O Concello celebra o impulso da Xunta de Galicia para crear 300 novas vivendas no municipio, o 80% protexidas

O alcalde Alejandro Lorenzo salienta que a medida responde ao forte crecemento demográfico e ao atractivo do municipio para as familias, “O Porriño é un municipio de oportunidades e necesitamos máis vivenda para acompañar o crecemento que estamos a experimentar”

O Porriño, 25 de novembro de 2025.- O Concello do Porriño celebra a decisión adoptada polo Consello da Xunta de Galicia, que vén de autorizar o inicio da tramitación do expediente para declarar de interese autonómico o ámbito destinado a habilitar solo residencial na contorna do pavillón municipal de deportes, dentro do sector SUR-PPR-2, cunha superficie total de 4,3 hectáreas.

Esta actuación permitirá transformar o solo urbanizable para crear 300 novas vivendas, das cales 240 estarán sometidas a réxime de protección pública, ademais de incorporar novos espazos libres e zonas verdes vencelladas ao río Couso, respectando a contorna natural e ampliando as zonas públicas de esparexemento.

O alcalde do Porriño, Alejandro Lorenzo, cualifica esta medida como “unha excelente nova para o noso municipio, que chega nun momento no que O Porriño está a experimentar un crecemento sostido e moi significativo”. O rexedor subliña que “O Porriño é un dos concellos que máis medra en poboación na provincia e en toda Galicia, cunha das taxas de natalidade máis altas da contorna, que se reflexa por exemplo en que neste curso escolar fomos o único municipio da área que aumentou o número de matrículas, un indicador claro de que seguimos sendo un lugar atractivo para as familias”. Outro indicador do incremento da poboación reflexouse nas últimas eleccións municipais, na que a corporación incrementouse en número de concelleiros ao superarse oficialmente os 20.000 habitantes. “Isto non é unha casualidade, senón o reflexo dun municipio dinámico, vivo e en expansión, que necesita máis vivenda para acompañar este crecemento e garantir un futuro sólido para a súa veciñanza”. Segundo o alcalde, “O Porriño é hoxe un municipio de oportunidades, atractivo para vivir, traballar e formar unha familia, e proxectos como este consolídanos como un dos concellos con maior proxección da área metropolitana”.

Dende o Concello expresan o seu compromiso para colaborar coa Xunta de Galicia en todos os trámites necesarios co obxectivo de que o proxecto avance con axilidade e se converta nunha realidade canto antes, contribuíndo a ofrecer vivenda accesible e a planificar o crecemento do municipio de forma ordenada e sostible.

25/11/2025 in Urbanismo, comercio e industria

O Porriño escribe un novo capítulo na identidade do municipio coa aprobación do escudo e bandeira oficiais

O pleno municipal aproba inicialmente o expediente logo dun proceso aberto no que a veciñanza puido coñecer e opinar sobre as propostas
As creacións, avaladas pola Comisión Heráldica da Xunta, integran símbolos que recollen a historia, a economía, o patrimonio local e tódalas parroquias

O Porriño, 24 de novembro de 2025.- O Porriño vive hoxe un momento histórico. O municipio dá a coñecer os que serán os seus primeiros símbolos oficiais, un escudo e unha bandeira deseñados seguindo a normativa heráldica e construídos a partir dos elementos que definen o carácter do territorio.

O pleno do Concello do Porriño vén de aprobar inicialmente, por maioría absoluta, o expediente. Ata o de agora, o que se utilizaba eran simples debuxos sen ningunha oficialidade, non recoñecidos pola autoridade heráldica, nin aprobados nunca en pleno. O paso que se deu hoxe chega logo de que no mes de agosto o Concello abrise unha consulta pública para que a veciñanza puidese coñecer e opinar sobre as propostas elaboradas coa colaboración da Comisión Heráldica da Xunta de Galicia. Unha vez analizadas todas as achegas e suxestións cidadás e incorporado o ditame final da Comisión, as propostas chegaron ao pleno para a súa aprobación inicial. “Hoxe é un fito para O Porriño, por fin teremos uns símbolos oficiais que representen a nosa identidade, a nosa historia e o que somos como pobo”, declarou o alcalde, Alejandro Lorenzo. O rexedor destacou que esta iniciativa non supón un gasto extraordinario e que non implicará cambios inmediatos en carteis, documentación ou material municipal, senón que a substitución realizarase progresivamente conforme se renoven existencias, “sempre con criterios claros e responsables”.

Lorenzo tamén subliñou que “a heráldica non é un deseño libre nin un exercicio artístico ao gusto persoal, senón unha disciplina histórica con normas moi claras e consolidadas ao longo dos séculos. A elaboración dun escudo ou dunha bandeira require coñecementos específicos, pois deben basearse en símbolos recoñecidos pola tradición heráldica, respectando regras sobre as cores, as figuras, a súa disposición e a interpretación histórica correspondente”. Segundo o alcalde, as propostas heráldicas son traballos fundamentados en criterios científicos e normativos contrastados.

Neste deseño en concreto integráronse varios elementos que nunca foran resaltados: o pan, a industria, a pedra ou a lembranza do ilustre arquitecto Antonio Palacios. “Como sempre dixen, a elaboración dun escudo ou dunha bandeira non é un exercicio libre de creatividade, senón que está suxeita a normas heráldicas moi precisas. Estes símbolos deben basearse en figuras recoñecidas pola tradición, cumprir regras que regulan cores, disposicións e significados, co fin de garantir que o resultado sexa lexítimo, representativo e válido oficialmente”, explicou Lorenzo.

Así pois, o escudo aprobado integra elementos que representan a historia, a economía, o patrimonio e a identidade do municipio. Mantense a ponte defendida como elemento central, coroada por unha torre que evoca a Casa Consistorial, obra emblemática do arquitecto Antonio Palacios; engádese un compás e unha chumbada de prata como homenaxe directa a Palacios, figura senlleira da nosa arquitectura; dúas espigas de trigo de ouro fan referencia á tradición panadeira do Porriño, mentres que oito rodas dentadas de prata representa ás oito parroquias e ao forte tecido industrial do Concello, cunha presenza destacada dos sectores da automoción, construción, industria farmacéutica e as explotacións de granito. O escudo vai timbrado cunha coroa real.

A bandeira deseñada garda coherencia co escudo e incorpora os mesmos elementos principais: fondo azul, torre amarela entre dúas espigas da mesma cor, compás, chumbada, roda dentada en branco na parte superior e, ao batente, dúas franxas verticais e ondadas de branco en alusión ao río Louro.

Segundo o alcalde, estes símbolos recollen elementos que nunca foran suficientemente resaltados e representan a identidade, a historia e a tradición do Porriño e tódalas súas parroquias de forma lexítima e recoñecida pola autoridade heráldica.

Procedemento para a aprobación definitiva

Trala aprobación inicial de hoxe, o expediente sométese agora a información pública durante un mes, tempo no cal a veciñanza poderá presentar alegacións. En caso de non habelas considerarase definitivo o acordo de aprobación inicial e de habelas, unha vez resoltas, o expediente será remitido á Comisión de Heráldica da Xunta de Galicia, que emitirá un informe preceptivo e vinculante. Se o informe resulta favorable, a proposta elevarase ao Consello da Xunta de Galicia, que aprobará definitivamente o escudo e a bandeira do Porriño.

Con este proceso, O Porriño dá un paso histórico e definitivo para contar con símbolos oficiais que reflictan con fidelidade a súa identidade, a súa historia e os valores que definen o municipio.

24/11/2025 in Patrimonio Municipal

O Concello apoia ao artista local Rapper, un dos 19 seleccionados de toda España para un campamento musical de referencia

O artista porriñés participa no VIII Flowpegao Campus, un punto de encontro para os novos talentos da música urbana
Rapper prepara o lanzamento do seu disco “5 razones 5 sentidos por un mismo motivo”, previsto para o vindeiro mes de marzo

O Porriño, 22 de novembro de 2025.- O alcalde do Porriño, Alejandro Lorenzo, recibiu esta semana ao artista porriñés Jorge Fernández, coñecido artisticamente como Rapper, que vén de ser escollido entre os 19 artistas emerxentes seleccionados en toda España para participar nun dos campamentos musicais máis destacados do panorama actual, o VIII Flowpegao Campus.

A iniciativa, que comezou onte en Castilla-La Mancha e que remata mañá domingo ofrécelle a Jorge unha experiencia intensiva de creación e aprendizaxe na que pode traballar en cinco estudos de gravación xunto a produtores e compositores de primeiro nivel, convive durante dous días con artistas consolidados e profesionais clave do sector, recibe masterclasses especializadas, grava un ou varios temas con beat exclusivo, participa en entrevistas profesionais e obtén material audiovisual pensado para impulsar a súa visibilidade e consolidar o seu proxecto musical.

Durante o encontro mantido no Concello, Alejandro Lorenzo expresoulle a Jorge Fernández o apoio total do consistorio neste momento clave da súa traxectoria, subliñando que para o Porriño é un orgullo que un talento local destaque nun espazo de proxección estatal. “No Porriño hai moito talento e Jorge é un exemplo claro. Para nós é unha satisfacción poder darlle apoio e visibilidade nun paso tan importante da súa carreira. Estamos convencidos de que vai aproveitar esta oportunidade e deixar o nome do Porriño en moi bo lugar”, declarou o alcalde.

Pola súa banda, o veciño de Cans, de 33 anos, mostrou o seu entusiasmo e agradecemento polo respaldo recibido: “Estou moi ilusionado. Para min é unha oportunidade enorme poder compartir espazo con profesionais que levo anos admirando. Vou aprender moito e tamén poderei ensinar o que estou facendo. Agradezo de corazón ao Concello do Porriño por estar aí, por recoñecer o meu traballo e por axudarme a darlle visibilidade. Sinto o apoio do meu pobo e iso motívame aínda máis”.

Ademais, o artista subliñou que quere aproveitar ao máximo esta experiencia para preparar un 2026 “que vén moi forte”, xa que o vindeiro mes de marzo publicará o seu novo disco, titulado “5 razones 5 sentidos por un mismo motivo”. O traballo incluirá colaboracións destacadas, tanto a nivel local —como a de Rack Eterno— como internacionais, entre elas a do artista El Completo Rd. “Todo o que estou aprendendo aquí vai servirme para chegar ao lanzamento do disco no mellor momento posible”, engadiu.

O Concello deséxalle ao artista unha experiencia inspiradora e os maiores éxitos neste paso decisivo da súa carreira.

22/11/2025 in Cultura e festas

O Porriño avanza no seu plan de saneamento cunha nova obra en O Sobral-Eiriz que dará servizo a 38 vivendas

A actuación, adxudicada por máis de 300.000 euros, financiarase con fondos propios e ten un prazo de execución de catro meses e eliminará as fosas sépticas actuais
Preto de 200 veciños de Budiño beneficiaranse directamente desta nova conexión co sistema xeral de saneamento do río Louro, unha cifra que se duplicará ao ter en conta que o remate desta obra suporá o enganche á rede doutros barrios cubrindo practicamente a totalidade da parroquia

O Porriño, 21 de novembro de 2025.- O Concello do Porriño continúa a executar o seu plan integral de mellora do saneamento co inicio dos traballos do proxecto de O Sobral–Eiriz, na parroquia de Budiño, unha obra que permitirá conectar 38 vivendas unifamiliares do núcleos rurais de Picouzo, Cruz, Cortés e Eiriz ao sistema xeral de saneamento municipal do río Louro.

Os traballos, adxudicados por un importe total de 303.813,81 € e cun prazo de execución de catro meses, consisten na prolongación da rede municipal ao longo dos viais que dan servizo ás vivendas, eliminando as fosas sépticas actualmente empregadas. En total, instalaranse 1.142 metros de colectores de PVC de 250 e 300 mm de diámetro, cunha superficie de repavimentación de 5.450 metros cadrados, o que permitirá unha mellora integral dos camiños municipais afectados.

O alcalde do Porriño, Alejandro Lorenzo, vén de visitar as obras xunto cos concelleiros Ramón Porto e Carlos González, comprobando “o bo ritmo dos traballos e a importancia que teñen estas actuacións para mellorar a calidade de vida da veciñanza e protexer o noso medio natural”.

É importante sinalar que o remate desta obra está condicionado á recepción dunha autorización xudicial que se prevé recibir proximamente, xa que é precisa a ocupación dunha parcela privada, no barrio de Picouzo, pola que non foi posible chegar a un acordo co propietario, o que obrigou a realizar unha expropiación, un proceso longo e complexo que está sufrindo retrasos pero que se está a traballar para resolvelo canto antes polo interese común da veciñanza. Nesta liña, o alcalde tamén lembra que moitas veces o feito de depender da recepción de informes e autorizacións por parte doutras entidades como a Confederación Hidrográfica, é o que fai que se retrase a súa posta en marcha, pero en canto aos medios materiais e técnicos están xa todos comprometidos. “É un proceso arduo e lento por tódolos trámites administrativos que require pero estamos traballando para acadalo o antes posible”.

Ademais, é a destacar que a execución deste tramo de rede de saneamento permitirá conectar nun futuro á mesma rede a outros barrios como Benunes, do que está pendente precisamente o permiso por parte de Confedración Hidrogáfica, Mosteiro, Sanguío e Trapa, “creando así unha trazabilidade cubrindo practicamente a totalidade da parroquia”. Desta maneira, o número de vivendas e veciños beneficiarios duplicaranse.

Saneamento en tódalas parroquias

“Desde o inicio do noso mandato, as obras de saneamento foron unha prioridade absoluta. A redacción destes proxectos foi o punto de partida da nosa folla de ruta e cada día vemos como ese esforzo continúa a materializarse en obras reais que melloran a vida dos porriñeses e porriñesas”, subliñou o rexedor.

O proxecto de O Sobral–Eiriz finánciase con fondos propios do Concello do Porriño e forma parte dun plan municipal máis amplo co que se pretende completar a rede de saneamento en todas as parroquias. Alejandro Lorenzo lembra que, nos últimos tres anos e medio, “realizouse unha inversión histórica en materia de saneamento. Somos plenamente conscientes de que o saneamento é unha prioridade para moitos dos nosos veciños e veciñas, e así o compartimos, pero tamén somos conscientes de que se trata dun servizo cunha altísima complexidade técnica e cun custo económico moi elevado. Por iso, estamos a avanzar de maneira progresiva, e sen pausa, segundo a dispoñibilidade orzamentaria e coa colaboración doutras administracións”, engadiu o alcalde.

Con esta nova actuación, o Concello do Porriño segue a cumprir coa súa folla de ruta en materia de infraestruturas básicas, garantindo un saneamento eficiente, sostible e adaptado ás necesidades actuais e futuras da veciñanza de tódalas parroquias.

21/11/2025 in Infraestruturas

O Porriño avanza coa voz da infancia

Parques renovados, mellora da accesibilidade, actividades inclusivas, zonas verdes e con sombra, carrís bicis, unha piscina ao aire libre e unha biblioteca móbil foron algunhas das propostas presentadas polo alumnado dos centros educativos do municipio nunha sesión plenaria especial
O alcalde Alejandro Lorenzo aseguroulles que “escoitamos todo o que propoñedes; moitas destas ideas xa forman parte do noso traballo diario e outras tomámolas como compromisos para seguir mellorando O Porriño entre todos e conseguir un Concello mais verde, mais sostible, accesible e inclusivo
O Concello conmemora deste xeito o Día Mundial da Infancia, iluminando de cor azul a fachada da Casa Consistorial e apoiando unha carreira contra e leucemia infantil

O Porriño, 20 de novembro de 2025.- O salón de plenos do Concello do Porriño transformouse esta mañá nun espazo diferente: as butacas ocupáronas voces novas, participación activa e moita ilusión por formar parte da vida municipal. No Día Mundial da Infancia, foi o alumnado dos centros escolares quen marcou o rumbo, converténdose en concelleiros e concelleiras por un día para explicar como queren que sexa o Porriño do futuro.

A sesión estivo dirixida polo alcalde Alejandro Lorenzo que explicou que “este pleno infantil é unha mostra de que a participación non ten idade. É unha satisfacción ver tanta implicación na vida do noso municipio”. Como secretaria actuou a concelleira de Educación, Carolina González, e como interventora a concelleira de Infancia, Ana Isabel Alonso, que agradeceron aos escolares e ao seu profesorado a implicación nesta e noutras actividades organizadas dende o Concello. Foron unha vintena de participantes os que se subiron ao estrado, dous estudantes en representación de cada un dos colexios: Budiño, Atios, Santo Tomás, Aceesca, Ribeira, Antonio Palacios, Fernández López e Hermanos Quiroga e os institutos Ribeira do Louro e Pino Manso. Ao igual que na celebración de calquera outro pleno, as propostas votáronse e, por suposto, contaron co respaldo unánime.

Entre propostas, ilusión e responsabilidade, a rapazada coincidiu, ademais de en melloras nos seus propios centros, en aspectos para mellorar o municipio como pode ser a accesibilidade e inclusión, con máis espazos adaptados, como parques e actividades e campamentos de conciliación onde todos teñan cabida; máis zonas verdes e con sombras; mobilidade sostible a través da creación de carrís bici e liña de transporte que una as zonas rurais co casco urbano; instalacións deportivas e de ocio: canchas de baloncesto, pista de patinaxe e, sobre todo, unha piscina ao aire libre. A creación dun centro xuvenil ou unha biblioteca móbil que percorra tódalas parroquias foron as propostas máis destacada no ámbito cultural, cun novo auditorio e sala de cine, que serán xa pronto unha realidade. Neste aspecto, solicitan actividades interxeracional, poñendo de exemplos sesións de contacontos con avós. Baños públicos, máis iluminación e seguridade con outras das peticións formuladas.

“A vosa voz é imprescindible. Cando a infancia fala, o Concello aprende, mellora e avanza. Hoxe deixástesnos moi claro o Porriño que queredes, e imos seguir traballando nesa dirección.” O alcalde agradeceu a participación e o traballo dos escolares e asegurou que moitas das propostas xa están contempladas en proxectos algúns deles en execución e outros que botarán a andar proximamente, “e o resto quedan anotadas para seguir construíndo, xuntos, O Porriño que queredes. Queremos que saibades que o Concello escoita todo o que propoñedes. Moitas destas ideas xa forman parte do noso traballo diario e outras tomámolas como compromisos para seguir mellorando o Porriño entre todos. O Porriño que construímos hoxe será o voso Porriño mañá e por iso é tan importante escoitarvos. Agradezo a responsabilidade e o cariño con que fixestes cada unha das propostas que hoxe nos presentastes”.

Ademais do Pleno Infantil, o Concello suma dúas accións especiais neste 20 de novembro baixo o lema “Acéndete polos dereitos da infancia”, a iluminación azul da fachada do Concello, como símbolo de apoio aos dereitos da infancia e o apoio dunha carreira solidaria contra la leucemia infantil, organizada polo CEIP da Ribeira en Torneiros.

20/11/2025 in Educación e tecnoloxía

A biblioteca municipal emprega a forza dos contos para loitar contra o acoso escolar

O Concello presenta o segundo volume do proxecto de biblioterapia infantil “Contos que curan”, unha serie de boletíns temáticos que teñen como obxectivo axudar a previr, identificar e xestionar problemas e trastornos entre a cativada de 3 a 12 anos
Nesta ocasión, ofrécese unha selección de setenta e sete contos apropiados para tratar o bullyIng amosando o inmenso valor que a lectura pode ter no campo da saúde mental

O Porriño, 19 de novembro de 2025.- O aumento dos problemas e trastornos mentais representa un desafío para o futuro da humanidade, e actuar na idade infantil resulta clave para atallalo. Todos os axentes sociais poden traballar neste obxectivo desde o seu campo de acción, facendo posible unha vida máis alentadora para os nosos nenos e nenas. No que respecta ao ámbito das bibliotecas, estas teñen a oportunidade de colaborar coa biblioterapia: unha disciplina que usa os libros con finalidade terapéutica, e que nos últimos tempos está amosando o inmenso valor que a lectura pode ter no campo da saúde mental.

A biblioteca do Porriño, comprometida na construción social da súa comunidade, presenta o segundo volume do proxecto “Contos que curan”, un programa de biblioterapia infantil que pretende axudar a previr, identificar e xestionar distintos problemas e trastornos infantís en nenos e nenas entre os 3 e os 12 anos.

Cada boletín ofrece un repertorio de contos de ficción seleccionados, clasificados e recomendados. Desta volta, o número 2 céntrase no acoso escolar, un tipo de violencia entre iguais que afecta a un de cada dez nenos en España. O boletín reúne 77 contos que poden atoparse na propia biblioteca municipal, pensados para apoiar a familias, educadores e profesionais da saúde na súa mediación terapéutica.

“As bibliotecas non só son espazos de lectura, tamén son espazos de coidado, de empatía e de aprendizaxe emocional. Con este proxecto queremos contribuír á saúde mental da nosa infancia desde o que mellor sabemos facer: ofrecer libros que axudan a comprender e a curar”, explica o autor e bibliotecario municipal, David Pérez Rego.

Pola súa parte, o alcalde do Porriño, Alejandro Lorenzo, salientou que “o Concello está firmemente comprometido co benestar dos máis pequenos e coa creación dunha sociedade máis xusta e solidaria. A través da lectura, podemos educar na empatía, no respecto e na convivencia”.

O boletín número 2, titulado Acoso Escolar, explica que o bullying pode ser verbal, social ou físico, e subliña a importancia de actuar con todos os roles implicados: acosador, vítima e testemuña. Ademais, incide en que denunciar o acoso non é ser “acusón”, senón un acto de valentía e solidariedade.

Afortunadamente, no mercado hai moitos contos que presentan estes aspectos nas súas historias, e neste novo boletín de “Contos que curan” ofrécese unha coidada selección de setenta e sete títulos apropiados para traballar o tema, ordenados segundo a idade recomendada.

“Queremos que a biblioteca sexa un espazo seguro e de encontro, tamén un recurso de axuda para as familias e o profesorado. Os nenos de hoxe son quen forxarán a sociedade do futuro”, engadiu Pérez Rego.

O proxecto “Contos que curan” continuará proximamente co volume 3, dedicado á timidez, e consolídase como unha iniciativa pioneira en biblioterapia desde o ámbito municipal.

19/11/2025 in Cultura e festas

O Porriño celebra o Día da Sostibilidade cunha xornada festiva e educativa para toda a veciñanza

A Praza do Concello convértese este sábado 22 de novembro nun espazo de aprendizaxe, xogos e promoción de hábitos responsables co medio ambiente

O alcalde Alejandro Lorenzo e a concelleira Antía Carrera destacaron na presentación do evento que o obxectivo é seguir aprendendo de maneira sinxela e divertida, sen esquecer o compromiso colectivo coa transformación e protección ambiental, avanzando con decisión cara a un Porriño máis limpo e eficiente

O Porriño, 18 de novembro de 2025.- O Concello do Porriño celebrará este sábado 22 de novembro o Día da Sostibilidade cun gran evento participativo que converterá a Praza do Concello nun espazo aberto ao coñecemento, á educación ambiental e á convivencia veciñal. O alcalde Alejandro Lorenzo e a concelleira de Medio Ambiente, Antía Carrera, presentaron esta mañá o evento que se levará a cabo dende ás 12.00 e ata ás 19.00 horas a través de actividades, xogos, demostracións e stands divulgativos centrados na correcta separación dos residuos e no impulso dun modelo de vida máis responsable e respectuoso co medio ambiente.

“Este evento representa unha oportunidade única para reforzar este compromiso colectivo e para seguir aprendendo de maneira sinxela e atractiva como facer mellor as cousas no día a día”, explicou o rexedor. Neste senso, dende o Concello “convidamos a toda a cidadanía a participar nesta xornada, desfrutar das actividades e seguir construíndo entre todas e todos un Porriño máis verde e máis consciente”.

O evento contará con sete postos diferentes, un por cada fracción do sistema municipal: orgánico, aceite doméstico usado, téxtil, envases lixeiros, papel e cartón, vidro e fracción resto. En cada posto, a veciñanza poderá aprender de forma práctica e sinxela onde vai cada residuo, resolver dúbidas habituais e descubrir o impacto real que ten a separación correcta no día a día, tanto a nivel ambiental como económico.

Para facer máis dinámica a aprendizaxe, instalaranse tamén tótems informativos interactivos con contidos audiovisuais, explicacións, exemplos e preguntas frecuentes, de maneira que persoas de todas as idades poidan comprender como funciona o sistema e cales son as claves para utilizalo ben.

Ao mesmo tempo, durante toda a tarde haberá xogos e dinámicas para a cativada, retos de clasificación de residuos, explicacións guiadas e espazos de divulgación para adultos. “O obxectivo é crear unha xornada familiar, accesible e divertida, que permita aprender mentres se desfruta dun ambiente festivo e comunitario”. Ademais, repartiranse agasallos sostibles como embudes especiais para facilitar a reciclaxe do aceite usado, bolsas elaboradas con téxtil reciclado e outros detalles pensados para promover hábitos responsables.

O evento contará cun posto de Cáritas no que se poñerá á venda roupa de segunda man grazas á colaboración de Aroupa, promovendo así a reutilización, o consumo consciente e a economía circular. A actividade servirá tamén para dar visibilidade á importante labor social destas entidades e á necesidade de reducir o desperdicio téxtil.

Acollida extraordinaria da campaña do colector marrón

A celebración do Día da Sostibilidade chega nun momento especialmente relevante para O Porriño, xa que a principios de novembro arrancou oficialmente a campaña do colector marrón no municipio, cunha acollida extraordinaria por parte da veciñanza. En apenas dúas semanas superáronse os 500 fogares inscritos, e o Concello ten marcado como obxectivo chegar aos 1.000 antes de que remate o mes.

Grazas a esta participación inicial, xa se están a recoller 2.000 quilos máis de restos orgánicos cada semana, o que supón un aforro estimado de 12.000 euros ao ano no custo de tratamento dos residuos, ao desviar a materia orgánica cara a unha vía de aproveitamento máis eficiente e sostible. Por ese motivo, o Concello anima a todas as persoas que aínda non teñen a súa chave do colector marrón a achegarse ao evento deste sábado, onde poderán recibir información detallada, aprender como funciona o sistema e recoller o seu acceso ao colector de forma inmediata.

O Concello do Porriño agradece á veciñanza a súa implicación e boa resposta, así como ao persoal técnico e ás entidades colaboradoras que fan posible esta transformación ambiental. A participación cidadá está a demostrar que o cambio cara a un modelo máis sostible é unha responsabilidade compartida e que, coa colaboración de todos, é posible avanzar con decisión cara a un Porriño máis limpo, máis eficiente e máis comprometido coa protección ambiental.

As persoas interesadas poden atopar toda a información actualizada na páxina web: porrino.ocaminosostible.gal. Tamén poden contactar a través do teléfono 647 521 464 ou do correo electrónico info@ocaminosostible.gal.

Esta iniciativa conta co apoio da Xunta de Galicia e o financiamento do Plan de Recuperación, Transformación e Resiliencia – Next Generation EU, e forma parte da aposta do concello por un modelo de xestión sostible e de proximidade, implicando á cidadanía na redución e valorización dos seus propios residuos.

18/11/2025 in Limpeza, Medio Ambiente, Sen categoría

O Concello do Porriño reivindica un 25N cheo de unidade, memoria e compromiso na loita pola eliminación da violencia á muller

Baixo o lema “Non á violencia, si a unha sociedade libre, xusta e segura”, o alcalde Alejandro Lorenzo e a concelleira de Igualdade, Carolina González, presentaron unha programación ampla e participativa que envolve centros educativos, colectivos sociais e veciñanza en xeral

O Porriño, 18 de novembro de 2025.- O Concello do Porriño conmemora este 25N, Día Internacional da Eliminación da Violencia á Muller, cun amplo programa de actividades presentado polo alcalde, Alejandro Lorenzo, e pola concelleira de Igualdade, Carolina González. Baixo o lema “Non á violencia, si a unha sociedade libre, xusta e segura”, a administración local reafirma o seu compromiso firme coa loita contra todas as formas de violencia machista, apostando pola prevención, a educación e a concienciación social.

“O Porriño non pode nin quere permanecer en silencio ante a violencia machista. A educación, a implicación da cidadanía e o apoio ás vítimas son a nosa prioridade”, destacou o alcalde. Pola súa banda, a concelleira subliñou “a importancia de facer visible esta realidade os 365 días do ano e de ofrecer recursos efectivos que permitan avanzar cara a unha sociedade verdadeiramente libre e igualitaria”.

A colocación dun lazo morado na fachada do Concello o vindeiro luns, como símbolo de apoio ás vítimas e de rexeitamento rotundo a esta lacra, será o punto de partida da programación que terá como xornada central o propio 25 de novembro. Ás 12.00 horas instalarase na Praza do Concello o Punto Violeta, un espazo de información e sensibilización, ao tempo que se levará a cabo a inauguración da nova Praza 25N, un lugar que pretende converterse nun recordo permanente e colectivo de solidariedade, situado enfronte á igrexa parroquial de Santa María.

Un dos momentos máis emotivos da xornada será sen dúbida o lazo humano que se formará coa colaboración do alumnado de 2º da ESO, na Praza do Concello, que participará portando cartolinas moradas co nome das vítimas deste ano. O acto rematará cun minuto de silencio, tralo cal a Escola de Música do Porriño ofrecerá un concerto de corda.

Pero a celebración do 25N vai máis alá do propio día, e o Concello do Porriño desenvolve actividades ao longo de todo o ano. Así organízanse as II Xornadas 25N “A prevención da violencia de xénero e a protección das vítimas, dende unha perspectiva social e tecnolóxica”; cursos de defensa persoal dirixidos ao alumnado de 1º de Bacharelato dos IES do municipio, que se celebran cada trimestre en coordinación cos profesores de educación física; un taller de empoderamento feminino, destinado a mulleres vítimas de violencia e aberto a todas aquelas que queiran fortalecer a súa autonomía persoal e o proxecto de patios coeducativos en igualdade dirixido ao alumnado de 3º de Educación Primaria d os centros educativos ao longo de todo o curso 2025/2026, promovendo actitudes igualitarias desde idades temperás.

O Concello do Porriño reafirma así o seu compromiso coa erradicación da violencia de xénero, coa memoria das vítimas e coa construción dun futuro no que todas as mulleres poidan vivir en liberdade, dignidade e seguridade.

18/11/2025 in Igualdade

O Concello do Porriño anima ás persoas maiores que viven soas a pasar unhas festas diferentes a través do “Xuntos polo Nadal”

A iniciativa, da Xunta de Galicia, vai dirixida a persoas de 60 anos ou máis e ten o prazo de inscrición aberto ata o 26 deste mes de novembro

As persoas interesadas poden acudir ao Departamento de Servizos sociais do Concello onde recibirán información e axuda para formalizar a inscrición

O Porriño, 18 de novembro de 2025.- O Concello do Porriño informa de que a Xunta de Galicia abriu o prazo de inscrición no programa “Xuntos polo Nadal”, dirixido a persoas de 60 anos ou máis que viven soas e desexan pasar acompañadas as festas do Nadal. O período para presentar solicitudes permanecerá aberto ata o vindeiro 26 de novembro.

O programa ofrece un total de 270 prazas, das que 130 corresponden á Residencia de Tempo Libre do Carballiño –para solicitantes das provincias de Pontevedra e Lugo– e 140 á Residencia de Panxón, en Nigrán -destinada ás persoas das provincias da Coruña e Ourense-. Esta iniciativa desenvolverase entre o 23 de decembro de 2025 e o 7 de xaneiro de 2026, establecéndose tres quendas entre as que só se poderá elixir unha: do 23 de decembro ao 7 de xaneiro (16 días), do 23 ao 30 de decembro (8 días) ou do 31 de decembro ao 7 de xaneiro (8 días). O programa inclúe aloxamento e manutención en réxime de pensión completa, transporte en autobús ás residencias e de regreso, así como actividades de animación sociocultural.

Poderán participar aquelas persoas que teñan 60 anos ou máis, estean empadroadas en Galicia, vivan soas e non teñan con quen compartir estas datas, ademais de valerse por si mesmas. Terán prioridade na selección as persoas que perderan o seu cónxuxe ou persoa convivinte nos últimos dous anos, as de maior idade e aquelas que non participaran en edicións anteriores.

As solicitudes presentaranse preferentemente por vía electrónica a través da Sede Electrónica da Xunta de Galicia, aínda que tamén se poderán entregar de maneira presencial no Concello. As persoas interesadas do Porriño que precisen apoio na tramitación poden dirixirse ao Departamento de Servizos Sociais do Concello, onde recibirán información e axuda para formalizar a inscrición.

18/11/2025 in Benestar, Servizos sociais

O Concello presenta en Pío XII a súa gran transformación urbana ao abeiro do Plan Extra

O proxecto, que supera os 2 millóns de euros, permitirá recuperar máis de 4.000 m² para crear un gran espazo público accesible e verde que conectará diversas rúas do casco urbano, con zonas de auga, sombra e xogos cubertos
A Deputación de Pontevedra escolle ao Porriño para presentar os proxectos que se están a executar noutros cinco concellos da comarca a través do Plan Provincia Extraordinaria Plan Extra

O Porriño, 17 de novembro de 2025.- O Porriño converteuse esta tarde no punto de encontro de rexedores, concelleiros e representantes do tecido veciñal de seis concellos que integran a comarca de Vigo —O Porriño, Mos, Pazos de Borbén, Fornelos de Montes, Redondela e Soutomaior— nun acto no que a Deputación de Pontevedra expuxo o carácter estratéxico e transformador dos proxectos que se están a executar ao abeiro do Plan Extra.

O alcalde do Porriño, Alejandro Lorenzo, deu a benvida a tódolos presentes e falou do Porriño como claro exemplo de transformación, futuro, colaboración, progreso e espazos que unen ás persoas. “É para min unha enorme satisfacción darvos a benvida hoxe aquí, na rúa Pío XII, un espazo que está a vivir unha transformación histórica para O Porriño e que simboliza perfectamente o que hoxe queremos compartir: proxectos que melloran a vida das persoas e fan das nosas localidades lugares máis humanos, sostibles e modernos”. Pola súa parte, o presidente da Deputación, Luis López, salientou o compromiso do ente provincial coa financiación das actuacións en todos estes concellos e destacou o papel decisivo que teñen estes á hora de definir as obras que mellor responden ás necesidades da súa veciñanza.

No marco deste acto, o Concello do Porriño presentou o proxecto do “Novo espazo público no entorno de Pío XII”, unha intervención chamada a transformar o centro urbano do municipio e que supón unha das actuacións máis relevantes dos últimos anos. Cun orzamento total de 2.076.926,24 euros, a obra estrutúrase en 1.740.703,82 euros destinados á execución dos traballos, actualmente en fase de licitación, e 336.222,42 euros dirixidos á adquisición das parcelas que permitirán ampliar a superficie pública. A Deputación financia o proxecto con 1,1 millóns de euros a través do Plan Provincia Extraordinaria – Plan Extra, facendo posible a recuperación e apertura dunha gran praza interior ata agora fragmentada e de uso limitado.

O alcalde do Porriño, Alejandro Lorenzo, subliñou no acto que este proxecto marcará un antes e un despois no deseño urbano da vila. “Estamos diante dunha intervención que cambia realmente o Porriño. Recuperamos máis de 4.000 metros cadrados que durante anos foron parcelas privadas ou espazos residuais, para convertelos nun gran parque urbano, accesible, cheo de vida e pensado para todas as xeracións. É unha aposta pola calidade de vida e polo futuro do noso municipio”, afirmou. Lorenzo agradeceu tamén o respaldo da Deputación, destacando que “a colaboración institucional permite que proxectos que levaban décadas agardando se convertan hoxe en realidade”.

O novo espazo público completará a rehabilitación do Parque de Fontevella, actualmente en execución, e conectará coa rúa Antonio Palacios e tamén coa avenida Domingo Bueno, configurando un eixo urbano continuo, verde e peonil. O proxecto integra ademais o Centro Social, abrindo o equipamento ao novo ámbito e facilitando un acceso máis amable ás persoas maiores, principais usuarias do edificio.

A proposta introduce elementos pensados para o uso ao longo de todo o ano, como un parque infantil cuberto situado en dúas cotas, unha zona de sombra e descanso aproveitando o arborado existente, un anfiteatro exterior integrado na topografía para actividades culturais, e varias zonas de auga con chorros e pequenos canais destinadas ao xogo e refresco sobre todo dos máis pequenos.

O alcalde porriñés foi máis alá e fixo mención de proxectos futuros para os cales se solicitará a axuda de Deputación da Pontevedra. “A rexeneración urbana de Torneiros, a renovación do velódromo municipal, único en Galicia, sen esquecernos dunha gran prioridade para nós, como son as parroquias, mellorando os servizos básicos como son o saneamento e o acondicionamento de viais”. Neste sentido, tamén se expresou o presidente provincial, “escoller O Porriño para organizar este encontro é moi pertinente”, declarou para contextualizar a celebración deste encontro nun concello do interior que é un dos motores económicos da provincia e que será tamén un dos beneficiados do esforzo investidor que deixará o vindeiro ano 128 millóns de euros nos concellos pequenos e medianos da provincia a través dos plans de cooperación +Provincia, Plan Extraordinario de Infraestruturas Deportivas e Plan Extra.

17/11/2025 in Infraestruturas