Novas

O Concello do Porriño incorpora tres novas técnicas de orientación profesional a través dun programa de emprego

O proxecto facilita a inserción laboral de persoas recentemente tituladas ao abeiro do programa Máis Emprega e conta cun cofinanciamento entre a Deputación de Pontevera e o Concello do Porriño que supera os 67.650 euros

O Porriño, 28 de xaneiro de 2026.- O Concello do Porriño reforza os seus servizos de orientación e inserción laboral coa incorporación de tres novas técnicas ao seu equipo municipal no marco dun programa de formación e emprego dirixido a persoas recentemente tituladas.

Desde este mes de xaneiro, Lucía Novoa, Iria González e Ximena Correa xa están a desenvolver o seu labor como técnicas de orientación profesional mediante un contrato de formación. Dúas delas son graduadas en Traballo Social e unha en Educación Social, e participan neste proxecto co obxectivo de adquirir experiencia práctica e competencias profesionais que faciliten a súa incorporación ao mercado laboral.

Esta iniciativa forma parte do programa Máis Emprega e ten como finalidade principal ofrecer unha primeira oportunidade laboral a persoas mozas recentemente graduadas, axudándoas a superar a falta de experiencia profesional, un dos principais obstáculos no acceso ao emprego.

Durante un ano, as tres técnicas realizarán tarefas de acompañamento, asesoramento e orientación ás persoas usuarias dos servizos municipais de emprego, combinando formación teórica e práctica e adquirindo habilidades sociais, comunicativas e profesionais fundamentais para o seu futuro.

O proxecto conta cun cofinanciamento de 67.657,32 euros por parte da Deputación de Pontevedra e do Concello do Porriño, permitindo impulsar unha iniciativa que aposta polo talento novo e polo fortalecemento dos servizos públicos locais en materia de emprego.

O alcalde do Porriño, Alejandro Lorenzo, destacou a importancia deste tipo de programas para favorecer a inserción laboral da mocidade. “Apostar pola formación e pola primeira oportunidade profesional é apostar polo futuro do noso concello. Con iniciativas como esta conseguimos que persoas novas poidan desenvolver o seu talento aquí, ao tempo que reforzamos a atención á cidadanía”, sinalou.

Lorenzo subliñou tamén que “detrás de cada contrato hai un proxecto persoal e profesional, e desde o Concello traballamos para acompañar ese camiño con recursos, apoio e confianza”.

Desde o Concello do Porriño reafírmase o compromiso de seguir impulsando políticas activas de emprego que favorezan a formación, a inserción laboral e a creación de oportunidades reais para a veciñanza, especialmente entre a mocidade recentemente titulada.

29/01/2026 in Emprego e formación

Publicadas as bases do desfile de comparsas do Entroido 2026 do Porriño

O Porriño, 27 de xaneiro de 2026.- Co gallo da celebración do Entroido na nosa vila, o Concello do Porriño publica as bases que rexerán os tradicionais desfiles de comparsas do Entroido 2026, incluídos no programa oficial destas festas, co obxectivo de fomentar a participación, a creatividade e o espírito festivo da veciñanza.

As comparsas interesadas en participar poderán inscribirse desde o día seguinte á publicación das bases no taboleiro municipal ata o 3 de febreiro de 2026, ambos incluídos, a través da sede electrónica do Concello, empregando o impreso normalizado e achegando a documentación requirida.

Poderán participar comparsas constituídas legalmente como asociacións, ANPA ou clubs sen ánimo de lucro, cun mínimo de 20 compoñentes, establecéndose dúas modalidades: infantil, ata 12 anos, e adultos/as, a partir dos 13 anos. A categoría asignarase en función da maioría de idades do grupo.

O Concello destina a esta convocatoria un importe máximo de 29.500 euros en premios á participación, que se repartirán segundo o número de integrantes de cada comparsa. Así, establécense contías de 605 euros para grupos de 20 a 39 persoas; 970 euros para os de 40 a 55; 1.210 euros para os de 56 a 85; 1.450 euros para os de 85 a 109; e 1.600 euros para comparsas de 110 compoñentes en adiante. Os premios repartiranse por orde de inscrición ata acadar o límite orzamentario, tendo prioridade as formacións do propio municipio.

Os desfiles celebraranse nas datas previstas no programa do Entroido: o sábado 14 de febreiro, o martes 17 de febreiro e o mércores 18 de febreiro, coincidindo co Enterro da Sardiña, no que as comparsas deberán participar cun mínimo do 20 % dos seus integrantes. Ademais, para optar aos premios será obrigatorio desfilar tanto o sábado como o martes.

As bases recollen tamén as obrigas das comparsas, entre elas levar un cartel identificativo, respectar as normas de seguridade e evitar o uso de animais, sprays ou petardos, co fin de garantir o bo desenvolvemento dos desfiles.

Así mesmo, establécese a creación dun comité de observación encargado de supervisar o cumprimento das bases, valorar a documentación presentada e propoñer a concesión dos premios, que serán finalmente resoltos por decreto da Alcaldía.

Desde o Concello do Porriño anímase ás asociacións e colectivos a participar activamente nesta cita festiva, que cada ano converte as rúas da vila nun escaparate de imaxinación, tradición e convivencia, reforzando o carácter popular e participativo do Entroido.

Podes consultar as bases completas no taboleiro de anuncios municipal, na web ecultura.net, nos medios habituais de difusión da Concellería de Festexos do Concello do Porriño ou na seguinte ligazón:

BASES DOS DESFILES DE COMPARSAS CON PREMIOS Á PARTICIPACIÓN_ENTROIDO 2026

27/01/2026 in Cultura e festas

O Concello do Porriño recibe a Toni Fernández tras acadar dúas medallas de ouro en París co seu mel

O apicultor recibe o recoñecemento municipal tras ser premiado no Paris International Honey Awards pola calidade e o deseño do seu produto

O Porriño, 27 de xaneiro de 2026.- O Concello do Porriño recibiu esta mañá a Toni Fernández, creador da marca galega Puramel Sacra, tras acadar recentemente dúas medallas de ouro no prestixioso certame Paris International Honey Awards, celebrado na capital francesa. Os galardóns foron outorgados á calidade da mel e ao deseño e presentación do produto, sumándose á medalla de ouro conseguida na edición anterior do concurso.

Durante o encontro, o alcalde Alejandro Lorenzo felicitou persoalmente a Toni Fernández e destacou que “estes recoñecementos internacionais amosan que a tradición apícola galega, combinada coa innovación e a calidade, pode competir ao máis alto nivel”. Engadiu que “Puramel Sacra é un exemplo de como o traballo do rural galego proxecta Galicia fóra das súas fronteiras”.

Puramel Sacra foi creada hai tres anos, aínda que a familia Fernández acumula catro xeracións dedicadas á apicultura. O proxecto nace en O Saviñao como homenaxe á avoa de Toni, Pura, e céntrase na produción de mel monofloral de castiñeiro da Ribeira Sacra, cun coidado especial tanto no proceso produtivo como no deseño e presentación, aspectos que foron recoñecidos internacionalmente.

Pola súa banda, Toni Fernández agradeceu o recoñecemento do Concello do Porriño e sinalou que “estas medallas supoñen unha enorme satisfacción persoal e profesional, porque detrás hai anos de traballo, formación e tradición familiar”. Engadiu que “intentar distanciarse da imaxe tradicional que temos todos do mel é clave para que o noso chegue un pouco máis alá e sexa máis apetecible á vista. Estes premios axúdanos a poñer en valor o que se produce en Galicia”.

Desde o Concello do Porriño, reiterouse a importancia de apoiar proxectos emprendedores ligados ao rural e á produción artesanal de calidade, que contribúen a proxectar unha imaxe moderna, competitiva e auténtica de Galicia máis alá das súas fronteiras.

27/01/2026 in Alcaldía, Cultura e festas

40 novas vivendas protexidas no Porriño tras aprobarse a cesión dunha parcela municipal

O acordo permitirá sumar estas futuras vivendas protexidas ás 300 promovidas coa Xunta de Galicia ao abeiro do Proxecto de Interese Autonómico (PIA)

O Porriño, 26 de xaneiro de 2026.- O pleno municipal do Porriño vén de dar luz verde á cesión dunha nova parcela municipal na Gulpilleira (no sector SUR-PPR-5) e a formalización dun protocolo de colaboración coa Sociedade Vivenda Pública de Galicia, entidade pública dependente da Xunta de Galicia, co obxectivo de impulsar preto de 40 novas vivendas protexidas de promoción pública no municipio. A proposta saíu adiante cos votos a favor do goberno local, coa abstención do PSOE e o voto en contra do BNG.

Esta actuación permitirá avanzar na oferta de vivenda protexida no Porriño, facilitando o acceso a unha vivenda digna e adecuada, especialmente para persoas e colectivos con maiores dificultades, con atención especial ás necesidades da mocidade. O protocolo contempla a cesión gratuíta do solo, a súa aceptación pola administración autonómica competente e a posterior promoción das vivendas, que se adxudicarán ás persoas inscritas no Rexistro Único de Demandantes de Vivenda da comunidade autónoma de Galicia.

O Concello do Porriño comprométese a realizar as actuacións necesarias para que a parcela adquira condición de solo urbanizable e poida destinarse á edificación. O calendario prevé iniciar as obras de urbanización no segundo semestre de 2026, co obxectivo de rematalas no cuarto trimestre de 2027. Pola súa banda, a administración autonómica tramitará a aceptación do solo e redactará os proxectos técnicos previos ao inicio das obras, licitando a edificación no prazo de tres meses desde a aprobación dos proxectos, sempre que o estado da urbanización o permita.

O protocolo aprobado non contempla contraprestacións económicas entre as partes, asumindo cada administración os compromisos cos seus propios recursos.

O alcalde do Porriño, Alejandro Lorenzo, destacou que esta iniciativa supón un paso importante para responder ás necesidades reais da veciñanza nun momento de crecemento continuado do municipio, que xa supera os 20.000 habitantes. “O Porriño rexistrou nos últimos anos unha evolución poboacional significativa e unha demanda de vivenda cada vez maior, algo que se nota tamén na actividade diaria do concello e en indicadores como o incremento de matrículas no ámbito educativo”, sinalou Lorenzo.

O rexedor destacou que estas actuacións permiten planificar o crecemento do municipio con responsabilidade, garantindo que medre con servizos e oportunidades. “O Porriño segue consolidándose como un lugar atractivo para vivir e traballar, polo que é fundamental acompañar ese dinamismo cunha oferta de vivenda protexida que facilite o acceso especialmente á mocidade e ás familias”, explicou.

Lorenzo subliñou que “esta nova parcela súmase ao proxecto para a construción de 300 novas vivendas en colaboración coa Xunta de Galicia, na contorna da rúa Fernández Areal, que foi concedido ao Porriño como Proxecto de Interese Autonómico (PIA), reforzando a resposta do municipio ás necesidades actuais e futuras de acceso á vivenda e permitindo que o Porriño siga medrando como nunca”.

O protocolo inclúe a creación dunha comisión mixta de seguimento, formada por representantes das administracións implicadas, co fin de garantir o correcto desenvolvemento das actuacións previstas e impulsar o cumprimento dos obxectivos establecidos.

Desde o Concello do Porriño subliñase que esta iniciativa evidencia o compromiso do goberno local coa política de vivenda como eixo estratéxico, apostando pola colaboración entre administracións e pola utilización do solo público ao servizo do interese xeral, garantindo así un crecemento equilibrado, sostible e con oportunidades para todas e todos.

26/01/2026 in Urbanismo, comercio e industria

O rural porriñés dá un paso máis: novo saneamento en Cerquido con máis de 78.000 euros

A actuación permitirá incorporar novas vivendas á rede municipal de saneamento
O proxecto inclúe tamén a reposición e mellora do firme nos puntos afectados polas obras, garantindo un resultado final máis seguro e duradeiro

O Porriño, 24 de xaneiro de 2026.- O Concello do Porriño continúa avanzando no reforzo dos servizos básicos no rural coa ampliación da rede de saneamento en Cerquido, unha actuación que permitirá mellorar a conexión á rede municipal en diferentes puntos do lugar, contribuíndo a unha maior salubridade, confort e benestar no día a día da veciñanza.

A intervención conta cun investimento total de 78.202,17 euros ao abeiro do Plan +Provincia 2025, co que o Concello impulsa novas melloras nas infraestruturas e equipamentos municipais.

Os traballos previstos contemplan a execución da nova rede, así como a reposición do firme demolido pola apertura de zanxas e o reforzo a sección completa dos camiños municipais afectados polo trazado, co obxectivo de deixar os viarios en condicións óptimas unha vez remate a obra.

O alcalde do Porriño, Alejandro Lorenzo, puxo en valor a importancia destas actuacións para garantir servizos esenciais nas parroquias e lembrou que o saneamento é unha prioridade estratéxica do Goberno local: “O saneamento deixou de ser unha actuación puntual para converterse nunha política estruturada, con planificación, recursos e atención directa ás parroquias”.

Lorenzo destacou que a obra de Cerquido se suma ao esforzo municipal realizado nos últimos anos, cun investimento acumulado desde 2022 de case 5 millóns de euros, ao tempo que o Concello deu un paso máis coa creación dunha Concellería específica de Saneamento, para responder con maior eficacia ás necesidades do territorio.

O rexedor explicou ademais que o Concello segue traballando con visión de futuro e obxectivos claros: “O acceso a un saneamento digno é un dereito fundamental, non unha opción. Por iso, investiranse os case 12 millóns de euros que aínda son necesarios para completar a cobertura en todas as parroquias”.

Con esta actuación en Cerquido, o Concello reafirma a súa aposta por seguir ampliando e modernizando a rede de saneamento municipal, impulsando intervencións que melloran a saúde pública, protexen o medio ambiente e contribúen a un Porriño máis sostible e cohesionado.

O Concello do Porriño seguirá traballando para dotar ás parroquias de servizos públicos de calidade, garantindo investimentos útiles, equilibrados e pensados para mellorar o benestar da veciñanza en todo o municipio.

24/01/2026 in Parroquias, Sen categoría, Vías e obras

O Concello do Porriño pon en marcha o Programa Integrado de Emprego 2025-2026

A iniciativa conta cun investimento de 275.000 euros, ten unha duración de 12 meses e forma a 100 persoas desempregadas

O Porriño, 23 de xaneiro de 2026.- O Concello do Porriño celebrou unha xornada de presentación do Programa Integrado de Emprego (PIE), un acto de benvida dirixido ao alumnado que inicia próximamente a súa participación nesta iniciativa, marcando así o comezo oficial da súa formación no municipio.

O encontro que tivo lugar no Multicentro de Torneiros serviu como primeiro contacto entre as persoas participantes, o equipo técnico e as institucións implicadas nunha sesión na que se lles explicou o funcionamento do programa, os recursos dos que disporán e os obxectivos que se perseguen ao longo dos vindeiros nove meses.

O acto contou coa presenza da delegada territorial da Xunta de Galicia en Vigo, Ana Ortiz; do director territorial de Emprego da Xunta de Galicia en Pontevedra, José Antonio Rodríguez Fachado; da concelleira de Emprego e Formación, Teresa Veloso; e do alcalde do Porriño, Alejandro Lorenzo, que acompañaron ao alumnado nesta primeira xornada formativa.

Durante a sesión, abordáronse cuestións como a organización do programa, os itinerarios personalizados, as accións formativas previstas e o papel da orientación laboral no proceso de inserción. Así mesmo, resolvéronse dúbidas e fomentouse un clima de proximidade e confianza entre as persoas participantes e o equipo responsable.

O alcalde, Alejandro Lorenzo, destacou a importancia deste tipo de encontros para achegar os recursos públicos á cidadanía. “É fundamental que as persoas coñezan de primeira man as oportunidades que teñen ao seu alcance. Esta xornada serve para informar e animar ao alumnado nun programa que pode marcar un antes e un despois na vida laboral de moitas persoas”, sinalou.

O rexedor destacou tamén o valor humano destes programas. “Detrás de cada participante hai unha historia, unha familia e un proxecto de vida. Para nós, este programa non é só unha política de emprego, senón un compromiso real coas persoas”, engadiu.

O Programa Integrado de Emprego conta cun investimento total de 275.000 euros, dos cales o 80% son achegados pola Xunta de Galicia a través da Consellería de Emprego, Comercio e Emigración, mentres que o Concello do Porriño financia o 20% restante. A iniciativa estase a desenvolver durante 12 meses, desde outubro de 2025 ata outubro de 2026, e permitirá formar a 100 persoas desempregadas.

O obxectivo de inserción laboral establecido pola Xunta de Galicia sitúase nun mínimo do 42%, o cal ata o de agora sempre se conseguiu, superando incluso esa porcentaxe.

O PIE inclúe accións de orientación individualizada, formación para o emprego, técnicas de coaching e intelixencia emocional, obradoiros de habilidades sociolaborais, preparación de entrevistas, fomento do emprendemento, prospección empresarial, intermediación laboral e prácticas non laborais.

Alejandro Lorenzo puxo tamén en valor o traballo dos técnicos e profesorado do programa e a colaboración institucional. “Este é o terceiro programa consecutivo que desenvolvemos gracias á confianza da Xunta e ao esforzo dos profesionais do programa. Seguiremos apostando por este modelo porque dá resultados reais”, afirmou.

Desde o Concello do Porriño reafírmase o compromiso de seguir impulsando políticas activas de emprego que favorezan a formación, a inserción laboral e a mellora da calidade de vida da veciñanza, facendo do emprego un eixo central do desenvolvemento social e económico do municipio.

23/01/2026 in Emprego e formación

Abre o prazo de inscrición para a XVII edición da Carreira O Porriño 10K

A que é posiblemente a carreira máis rápida de Galicia permitirá a participación de ata 1.500 corredores de tódalas idades
Os participantes terán ata o día 16 de marzo para realizar a inscrición

O Porriño, 22 de xaneiro de 2026. – Esta cita icónica do atletismo galego que ten lugar no Porriño abre o seu prazo de inscrición. A XVII edición da Carreira O Porriño 10K, que terá lugar o domingo 22 de marzo de 2026, xa comeza a rexistrar aos seus primeiros corredores, que terán ata o día 16 de marzo para confirmar a súa participación nesta proba.

O proceso de inscrición realízase exclusivamente a través da plataforma electrónica oficial. A organización establece diferentes tramos para anotarse, cun prezo inicial de 10 euros ata o 22 de febreiro, que se incrementará progresivamente ata o peche definitivo o 16 de marzo de 2026 ou ata acadar o límite máximo de 1.500 participantes, garantindo así unha proba segura e de calidade. A inscrición inclúe dorsal con chip, camiseta conmemorativa, avituallamentos, servizo médico, bolsa do corredor e acceso á zona de recuperación post-meta, entre outros servizos. Para inscribirse, accede á seguinte ligazón:

https://ccnorte.com/evento/inscribirme/id/3178/xvii-carrera-o-porrino-10k#.

Como cada ano, a carreira disputarase no centro urbano do municipio nun circuíto homologado pola RFEA, de 5 quilómetros, no que se celebrarán de forma conxunta a carreira OP10K (10.000 metros) e a OP5K (5.000 metros), convertendo as rúas da vila nun auténtico escenario deportivo aberto tanto a atletas de elite como a corredores afeccionados.

A OP10K é unha proba oficial da Federación Galega de Atletismo e está aberta a todas as persoas, federadas ou non. Ademais, a xornada volverá ter un marcado carácter familiar coa celebración das carreiras para as categorías base: desde chupetes, para nenos e nenas nacidos de 2020 en adiante; pitufos, para nacidos entre 2017 e 2019; e a as categorías benxamín (sub10), alevín (sub12) e infantil (sub14). Isto permite que os máis novos tamén poidan gozar dunha mañá deportiva nas rúas do Porriño. Podes ler o regulamento completo na seguinte ligazón:

https://ccnorte.com/uploads/eventos/reglamento-6944ff9960bba4.42688806.pdf

A saída da carreira de 5K e 10K terá lugar de forma simultánea mediante un sistema de caixóns, permitindo unha saída ordenada segundo os tempos estimados de cada participante. O tempo máximo para completar a proba será de 1 hora e 30 minutos.

No apartado competitivo, a OP10K manterá unha atractiva bolsa de premios en metálico. Os tres primeiros clasificados e clasificadas da xeral masculina e feminina recibirán premios de 500, 350 e 200 euros, respectivamente. Ademais, establécese un premio especial de 500 euros para o atleta masculino e/ou feminino que consiga bater o récord da proba, actualmente en posesión de Serbessa Workneh Fijire, con 29:09 (2025), e Ester Navarrete Santana, con 33:18 (2024).

O alcalde do Porriño, Alejandro Lorenzo, destacou que “a OP10K é xa unha das grandes citas deportivas do calendario galego e unha auténtica festa do atletismo e do deporte, que cada ano reúne no Porriño a milleiros de persoas entre participantes e público”. O rexedor subliñou tamén “o enorme traballo do Club Atletismo Porriño e de todo o voluntariado, que fan posible que esta carreira siga medrando edición tras edición e situando o nome do Porriño como referencia do atletismo de ruta”.

Por outra banda, o presidente do Club de Atletismo Porriño, Miguel Novo Regueira, afirmou que “É un circuíto rápido en 10.000 m homologados, de maneira que pode ser un bo test ao principio da temporada. Ter unha marca homologada nunha carreira 10K facilita medir mellor as túas capacidades de cara ao resto de competicións do calendario”.

Desde o Concello e a organización anímase á veciñanza e aos amantes do running a participar nunha proba consolidada, rápida e atractiva, pensada tanto para competir como para desfrutar do deporte nun ambiente único, convertendo novamente ao Porriño nun punto de encontro para o atletismo galego e estatal.

22/01/2026 in Deportes

Xornada informativa coas asociacións no Porriño para explicar as subvencións do Plan Provincia Comunitaria 2026

As asociacións poderían recibir axudas de ata 10.000 euros para financiar os seus investimentos en infraestrutura, equipamento ou obras

O Porriño, 21 de xaneiro de 2026.- O Concello do Porriño celebrou unha reunión informativa dirixida ás asociacións veciñais e entidades sociais do municipio co obxectivo de dar a coñecer en detalle a convocatoria de subvencións do Plan Provincia Comunitaria 2026, impulsada pola Deputación de Pontevedra. Durante esta xornada expuxéronse os requisitos e o procedemento a seguir para a solicitude destas axudas; lembrouse ademais a documentación necesaria para poder levar a cabo todos os trámites relativos á iniciativa.

Durante o encontro, o alcalde do Porriño, Alejandro Lorenzo, explicou ás entidades asistentes as características da convocatoria, que permite acceder a subvencións de ata 10.000 euros por entidade, cun importe mínimo de 6.000 euros, podendo cubrir ata o 100 % do investimento presentado. Así mesmo, informouse de que o prazo para a presentación de solicitudes xa está aberto e remata o vindeiro 1 de abril de 2026, animando ás asociacións a iniciar canto antes a preparación da documentación necesaria.

Neste encontro detallouse tamén que a convocatoria está dirixida a asociacións de veciños, federacións, confederacións ou unións de asociacións veciñais, así como a asociacións de mulleres rurais, sempre que estean legalmente constituídas e debidamente inscritas no Rexistro de Asociacións da Comunidade Autónoma de Galicia.

As axudas están destinadas exclusivamente a investimentos, incluíndo actuacións como obras de mellora de locais sociais, a mellora ou creación de infraestruturas, equipamentos e espazos destinados á actividade das entidades, así como a adquisición de mobiliario e equipamento informático, audiovisual ou específico para o desenvolvemento das súas actividades. Tamén se aclarou que son subvencionables determinados gastos vinculados á tramitación da subvención, ás taxas e licenzas necesarias e aos traballos previos de desbroce ou limpeza cando formen parte dunha obra.

No acto aclarouse ademais que será requisito indispensable que a entidade solicitante sexa titular ou conte cun dereito de uso mínimo de cinco anos sobre os inmobles ou terreos nos que se vaian executar os investimentos.

O alcalde sinalou a importancia deste tipo de encontros para acompañar e asesorar ás asociacións locais. “As asociacións son unha peza clave da vida social, comunitaria e cultural do Porriño e das súas parroquias. Desde o Concello consideramos fundamental non só informar destas axudas, senón tamén estar ao carón dos colectivos para resolver dúbidas e facilitarlles o acceso a unha oportunidade que pode mellorar notablemente os seus espazos e recursos”, sinalou o rexedor.

Lorenzo subliñou que “estas subvencións permiten acometer investimentos sen necesidade de achega económica propia, o que supón unha oportunidade moi importante para fortalecer o tecido asociativo e repercutir directamente na calidade de vida da veciñanza”.

Cada entidade poderá presentar unha única solicitude, deberá tramitarse exclusivamente por vía electrónica, achegando o acordo do órgano competente da entidade e o resto da documentación esixida nas bases da convocatoria, incluíndo a memoria ou proxecto técnico cando resulte necesario.

Desde o Concello do Porriño reitérase o compromiso de seguir prestando apoio e asesoramento ás asociacións veciñais e entidades sociais do municipio, animándoas a aproveitar esta liña de financiamento que contribúe á mellora das súas infraestruturas, dos seus equipamentos e ao fortalecemento do tecido asociativo local.

21/01/2026 in Infraestruturas, Parroquias

O potencial da madeira no Porriño, protagonista na visita da conselleira de Industria á empresa Surco Interiors

A visita institucional puxo en valor o sector da madeira como motor de innovación, sustentabilidade e desenvolvemento industrial no municipio e en Galicia
A empresa dá emprego directo a máis de 60 persoas e xera arredor de 200 postos de traballo en total

O Porriño, 20 de xaneiro de 2027.- A conselleira de Economía e Industria, María Jesús Lorenzana, acompañada do alcalde do Porriño, Alejandro Lorenzo, e da directora do Instituto Galego de Promoción Económica (Igape), Covadonga Toca, visitou a empresa Surco Interiors, especializada na produción de derivados da madeira como mobles, solos e portas.

Durante a visita, o alcalde destacou que “se ten que haber unha empresa punteira de madeira, ten que ser no Porriño, como non podería ser doutra maneira”, poñendo en valor o peso da industria no municipio e o papel estratéxico que empresas como Surco Interiors desempeñan no desenvolvemento económico local, así como a capacidade da empresa para combinar tradición artesanal, innovación industrial e sustentabilidade ambiental.

Surco Interiors, marca de mobles e madeiras de nova liña, conta cunha traxectoria que se remonta a 1933, cando naceu en Azpeitia (Guipúscoa). Desde os seus inicios, a empresa posicionouse como unha referencia no sector do mobiliario gracias á fabricación de pezas en madeira maciza elaboradas por mestres artesáns. En 1981 consolidou o seu liderado neste campo apostando por unha produción industrial cun deseño innovador e unha elevada calidade nos acabados.

A ampla experiencia acumulada durante máis de 70 anos permitiulle á empresa adentrarse no mundo do parquet coa creación da marca SURCO, consolidándose en 2015 como unha gran empresa cunha elevada sensibilidade pola madeira como materia prima e cun firme compromiso co respecto medioambiental e a sustentabilidade do medio natural.

O alcalde do Porriño, Alejandro Lorenzo, subliñou que “O Porriño conta cun enome potencial tamén no ámbito da madeira, gracias á presenza de empresas que apostan pola calidade, a innovación e o respecto polo medio ambiente, consolidando este sector como unha oportunidade de futuro para a diversificación industrial e a creación de emprego no municipio”.

Ademais, o rexedor puxo o foco no peso industrial do municipio, sinalando que “O Porriño é hoxe un dos principais polos industriais de Galicia, con polígonos empresariais que suman máis de 3,5 millóns de metros cadrados de solo industrial e máis de 2.200 empresas asentadas, o que reflicte a fortaleza do noso tecido produtivo e a capacidade para acoller proxectos industriais innovadores e sostibles como Surco Interiors”.

Pola súa banda, a conselleira María Jesús Lorenzana puxo en valor, en primeiro lugar, a importancia da colaboración entre a empresa e a administración “para garantir que o emprego e o valor engadido desta industria permanezan na comarca”, destacando ademais que “Surco Interiors dá traballo a máis de 60 persoas, sendo máis da metade mulleres”.

Na súa segunda mensaxe, Lorenzana subliñou que “a industria forestal é clave en Galicia, representando máis do 1,7% do PIB da comunidade”, e apostou por seguir avanzando na súa modernización e automatización, así como por traballar o papel do talento e da formación, “para contar con persoal formado que permita ao sector seguir medrando”.

20/01/2026 in Industria

O Concello do Porriño asina un convenio urbanístico que permitirá un novo local municipal de Servizos Sociais na Avenida de Galicia

O acordo desbloquea unha promoción de vivendas en alugueiro e permite ao Concello incorporar en propiedade un baixo municipal valorado en preto de 400.000 euros, destinado a Servizos Sociais, ao Centro de Información á Muller (CIM) e a novos servizos de atención ás familias

O Porriño, 17 de xaneiro de 2026.- O Concello do Porriño vén de asinar un convenio urbanístico que permitirá avanzar na construción dunha nova promoción de vivendas en réxime de alugueiro na contorna da rúa Antonio Palacios – Avenida de Galicia e, ao mesmo tempo, incorporar ao patrimonio municipal un novo local destinado a Servizos Sociais, en plena propiedade e cun elevado valor social e económico.

A actuación desenvólvese sobre unha parcela adquirida pola entidade promotora a unha entidade bancaria, na que existían varias pequenas parcelas de titularidade municipal, cunha superficie aproximada duns 400 metros cadrados, segundo os informes técnicos municipais. Tras a revisión da situación xurídica e logo do correspondente informe do secretario municipal, alcanzouse un acordo de permuta que permitiu desbloquear a actuación urbanística.

O alcalde do Porriño, Alejandro Lorenzo, explicou que “a través desta construción de vivendas en réxime de alugueiro, o Concello vén de asinar un convenio coa entidade promotora para permitir o uso duns terreos municipais que estaban integrados na parcela. Aínda que a valoración destes terreos non é moi elevada, a contraprestación que recibe o Concello é moi importante”.

Como resultado do convenio, o Concello recibirá un baixo de nova construción, completamente equipado e acondicionado para uso público, que se destinará a Servizos Sociais. “Falamos dun local amplo, moderno e en condicións óptimas, cunha valoración técnica próxima aos 400.000 euros, o que supón unha mellora moi relevante para o patrimonio municipal e para a atención á cidadanía”, sinalou o rexedor.

Alejandro Lorenzo destacou tamén que “os Servizos Sociais municipais contan hoxe con instalacións moi compartimentadas e con espazos que era necesario mellorar. Este novo local permitiranos dispoñer dunhas dependencias axeitadas, non só para Servizos Sociais, senón tamén para o Centro de Información á Muller (CIM) e para a posta en marcha de novos servizos. Para nós é unha prioridade dotar cunhas oficinas axeitadas a Servizos Sociais e, especialmente, reforzar a atención á cidadanía e ás mulleres a través do CIM. Este novo espazo nace coa vontade de converterse nun punto de encontro para aquelas familias que atravesan algunha situación de necesidade e que requiren o apoio dos servizos municipais. En definitiva, trátase dunha actuación prioritaria para mellorar a atención e o acompañamento ás persoas.”

Neste senso, o alcalde engadiu que “o obxectivo é crear un espazo no que as unidades familiares poidan ser atendidas en condicións dignas, con zonas de espera e descanso, mellorando a atención presencial e a coordinación entre os distintos servizos municipais”.

O convenio permite compatibilizar a promoción de vivenda en alugueiro —unha actuación subvencionada pola Xunta de Galicia— cunha achega municipal que se traduce nun equipamento público estratéxico, reforzando o interese xeral e a mellora dos servizos públicos no Porriño.

17/01/2026 in Benestar, Servizos sociais