Novas

O Concello organiza o vindeiro luns unha nova viaxe turística á Ribeira Sacra, O Carballiño e Ourense

  • A excursión, de balde, inclúe visitas culturais e un paseo en barco polos Canóns do Sil e está dirixida a persoas maiores de 55 anos que poden inscribirse a partir deste mércores no rexistro do Concello
  • O Concello reforza a súa aposta pola difusión cultural e abre unha nova canle de comunicación directa coa veciñanza para informar sobre actividades e iniciativas de lecer

O Porriño, 13 de outubro de 2025.- O Concello do Porriño, a través da Concellería de Turismo, volve poñer en marcha unha nova viaxe turística dirixida ás persoas maiores de 55 anos. Nesta ocasión, o destino será O Carballiño, Ourense cidade e un paseo en barco polos Canóns do Sil, o vindeiro luns, 20 de outubro, con saída ás 10.15 horas dende o pavillón de Deportes.

A xornada inclúe a visita ao Templo da Vera Cruz, unha das obras máis emblemáticas do arquitecto Antonio Palacios, orgullo e referente do patrimonio galego, así como unha visita guiada pola cidade de Ourense e unha travesía fluvial polo Sil, para gozar da natureza e das vistas espectaculares dos seus canóns.

O alcalde, Alejandro Lorenzo, destacou que “estas viaxes, ademais de promover o turismo de proximidade e o coñecemento da nosa terra, ofrecen ás persoas maiores unha marabillosa oportunidade para convivir, descubrir novos lugares e seguir activos”. Pola súa parte, a concelleira de Turismo, Vanessa Ucha, sinalou que “cada edición destas viaxes ten unha acollida excelente e esta promete ser unha das máis especiais pola beleza do itinerario e o vínculo con Antonio Palacios”.

As inscricións abriranse o mércores, 15 de outubro, e poderán realizarse no Rexistro Xeral do Concello, por orde de inscrición ata completar as 50 prazas dispoñibles. Cada persoa poderá presentar unha única solicitude.

Dende o Concello do Porriño séguese promovendo iniciativas de lecer e carácter cultural como esta. “A aposta por achegar a cultura á veciñanza continuará sendo unha prioridade dentro da programación municipal”, subliña o alcalde incidindo neste sentido en que “dende o Concello, ademais de divulgar todas estas iniciativas a través dos medios de comunicación, webs e redes sociais, tamén llo trasladamos ás diferentes asociacións veciñais para que teñan un coñecemento inmediato e directo e agora ademais abrimos unha nova canle a través da cal todas as persoas que estean interesadas en recibir este tipo de información no lo trasladen, rexistrando esa petición, para a partir de aí recibir persoalmente tódolos avisos respecto da posta en marcha de actividades como estas nas que pode participar”.

 

13/10/2025 in Turismo

Regueifa de voda con Pan do Porriño

  • Combinación de música, baile e gastronomía para abrir a VII Feira do Pan do Porriño, que se celebra ao longo de toda a xornada de hoxe na Praza Arquitecto Antonio Palacios
  • O alcalde Alejandro Lorenzo foi o encargado de inaugurar o evento no que se homenaxea máis de catro séculos de historia e tradición panadeira

O Porriño, 11 de outubro de 2025.-  A VII Feira do Pan do Porriño deu comezo esta mañá cun ambiente cheo de emoción, tradición e orgullo local. A praza Arquitecto Antonio Palacios converteuse no escenario perfecto para acoller unha apertura marcada pola cultura e a memoria colectiva, coa representación da “Regueifa de voda”, unha antiga danza galega que simboliza a unión e a celebración, e na que o Pan do Porriño ocupou un lugar central.

A posta en escena estivo a cargo da Asociación Cultural Sadeo, que fixo un percorrido pola tradición galega recuperando unha das expresións máis simbólicas do noso folclore: unha parella bailando mentres a bailadora porta sobre a cabeza unha bola de Pan do Porriño, nun xesto cargado de simbolismo e identidade. Antano, e na actualidade tamén, se a bola caía ao chan era sinal de agoiro para a parella. A regueifa bailada foi recollida en San Salvador de Pedreiro, Santa Comba, polos artistas Xisco Feijoó e Leni Pérez. A danza, acompañada por dúas pandereteiras, sorprendeu ao público asistente e serviu como inicio perfecto para unha xornada na que o pan é moito máis que alimento: é historia viva.

O alcalde do Porriño, Alejandro Lorenzo, foi o encargado de inaugurar a feira poñendo en valor o significado desta feira e, especialmente, a profunda tradición panadeira do municipio que comezou no século XVII coas fábricas de pan para abastecer ao exército da antiga provincia de Tui. “O Pan do Porriño non é só un produto, é parte da nosa historia e da nosa forma de entender a vida. Temos un pan que conta con máis de catro séculos de historia, documentado desde 1604, e iso é un patrimonio que debemos protexer e dar a coñecer. Gracias aos nosos panadeiros e panadeiras por manter vivo este oficio, por seguir elaborando un produto artesán que nos representa dentro e fóra de Galicia. Eles son os verdadeiros gardiáns desta tradición que hoxe celebramos”. O rexedor destacou que eventos coma este serven para “reforzar a nosa identidade e proxectar O Porriño como un destino que sabe a tradición, hospitalidade e boa mesa” e tamén agradeceu a colaboración da Axencia Galega de Calidade Alimentaria (AGACAL), da Consellería do Medio Rural, representada no acto por Juan José Cerviño, director xeral da PAC e do Control da Cadea Alimentaria.

Acto seguido, o público puido desfrutar dun showcooking con degustacións da man da recoñecida cociñeira Coque Fariña, que elaborou receitas a base de Pan do Porriño, poñendo en valor a súa versatilidade e calidade. Dende ás 13.30 horas estase a celebrar a tradicional feira e xantar popular de polbo e porco ao espeto, amenizada polo DJ Mus e xa pola tarde, a partir das 17.00 horas, chega a quenda dos máis pequenos da casa co obradoiro “Peque Pan”, onde, ataviados para a ocasión con mandil e gorro, aprenderán de forma divertida o proceso de elaboración do pan. Ás 18.30 horas realizarase a degustación “Experiencias de Calidade”, con produtos con Denominación de Orixe de Galicia, da man de Salomé Beiroa, actividade patrocinada por AGACAL. A xornada pecharase ao serán coa música en directo do grupo La Patrulla.

Ademais, ao longo de toda a xornada permanece aberto ao público o posto de venda da Asociación de Panadeiros do Porriño, onde se poden adquirir bolas de Pan do Porriño, exemplo perfecto do saber facer artesán local.

“Queremos que esta feira siga medrando, que cada vez máis xente descubra o Pan do Porriño e todo o que representa. Esta non é só unha festa, é unha homenaxe ao noso pasado e un compromiso co futuro”, concluíu o alcalde.

 

11/10/2025 in Cultura e festas, Turismo

O Porriño énchese de actividades esta fin de semana con deporte, tradición, solidariedade e festa popular

  • Mañá sábado celébrase a VII Feira do Pan, o VIII Trofeo Ciclocrós Avanza, o IV Festival de Outono, o II Bingo solidario a favor de Afaga e a II Festa Furancheira
  • O domingo conmemorarase o Día da Hispanidade e Virxe do Pilar, patroa da Garda Civil, cun acto litúrxico, ofrenda floral e entrega condecoracións

O Porriño, 10 de outubro de 2025.-  O Porriño vivirá unha fin de semana repleta de actividade, cultura, gastronomía e solidariedade cunha axenda chea de eventos que prometen atraer a veciñanza e visitantes. Dende o deporte de alto nivel ata a exaltación do produto local, pasando pola música tradicional, a boa mesa e as iniciativas solidarias, a vila converterase nun punto de encontro para todos os públicos.

O sábado, 11 de outubro, a partir das 11.00 horas, a Praza Arquitecto Antonio Palacios será o escenario da VII Feira do Pan do Porriño, unha celebración do produto estrela da vila que mestura gastronomía, tradición e cultura. A feira contará con showcooking da recoñecida cociñeira Coque Fariña, degustacións, obradoiro infantil “Peque Pan”, feira e xantar popular de polbo e porco ao espeto, actuacións musicais e unha experiencia gourmet con produtos con Denominación de Orixe.

Tamén mañá, O Porriño acollerá a primeira proba da Copa Galicia de Ciclocrós, o VIII Trofeo Ciclocrós Avanza – Concello do Porriño, que reunirá máis de 250 ciclistas das diferentes categorías nas inmediacións da pista de atletismo do Polígono da Granxa. A competición desenvolverase dende as 11.00 horas ao longo dun circuíto de preto de 3 km. Unha cita xa consolidada no calendario deportivo galego, que promove o deporte base e de competición nun entorno privilexiado.

Pola noite, ás 21.00 horas, o Círculo Recreativo Cultural acollerá o II Bingo Solidario en apoio de Afaga Alzheimer, organizado por ACIPOR, CCAMorea e o propio Círculo. A totalidade da recadación destinarase á asociación, que traballa mellorando a calidade de vida das persoas afectadas polo alzhéimer e outras demencias. Unha noite para colaborar cunha boa causa e, ao mesmo tempo, pasalo ben.

Na parroquia de Atios, Os Penediños celebran o seu V Festival de Outono, no centro cultural. Haberá magosto popular durante toda a xornada e a partir das 17.00 horas festival folclórico coas actuacións de Os Moleirinhos do Gandanha, chegados dende Monçao; Do Lado do Sol, de Abegondo e os anfitrións, Os Penediños de Atios. Ás 19.30 horas continuará a festa amenizada pola Charanga Nova Jomada e xa pola noite, a partir das 22:30 horas, actuación de Lina e Lola e Murghinsky.

O ambiente máis enxebre da fin de semana estará no Barrio da Cruz de Budiño, coa II Festa Furancheira, que terá lugar as noites dos venres 10 e 17 e sábados 11 e 18 de outubro. Dende as 19.00 horas haberá viño do país, comida caseira, música tradicional, gaiteiros e a tradicional queimada, á medianoite, con Suso Ferreiro.

Xa o domingo, 12 de outubro, O Porriño conmemora o Día da Hispanidade, unha data que, como cada ano, destaca polo acto celebrado pola Garda Civil con motivo da festividade da súa patroa, a Virxe do Pilar. Será ás 12.45 horas cando se oficie a misa na igrexa parroquial de San Rosendo de Torneiros e posteriormente, no Cuartel terá lugar a xa tradicional ofrenda floral aos Caídos e entrega de condecoracións aos profesionais do Corpo distinguidos na prestación do servizo.

“Esta fin de semana, O Porriño converte en protagonista o seu deporte, a súa gastronomía, a súa música e a súa solidariedade. Un convite aberto para veciños, veciñas e visitantes a desfrutar dunha vila viva, chea de actividade e orgullosa da súa identidade”, conclúe o alcalde Alejandro Lorenzo.

10/10/2025 in Cultura e festas, Deportes, Turismo

O Concello presenta unha ampla oferta de actividades para o curso 2025-2026 enfocada no benestar emocional e prevención

  • As concelleiras de Educación e Sanidade reuníronse cos equipos directivos dos centros educativos do municipio para planificar actividades que fomenten a calma, a educación afectivo-sexual e a prevención de riscos entre o alumnado

O Porriño, 9 de outubro de 2025.- A concelleira de Educación e Igualdade, Carolina González, e a concelleira de Sanidade, Teresa Veloso, mantiveron unha reunión cos equipos directivos dos centros educativos do Porriño para presentar a oferta de actividades para o curso 2025-2026, que teñen como eixe principal o benestar emocional e a prevención de problemáticas sociais e de saúde.

As actividades programadas inclúen a práctica do inglés, talleres para a calma e a relaxación, visitas á Casa Consistorial e ao parque de bombeiros, así como unha exhibición das forzas de seguridade. Neste curso destaca especialmente a incorporación de talleres afectivo-sociais e sexuais, unha demanda expresada polos propios centros.

A concelleira de Educación destacou que “a reunión foi moi positiva e frutífera, pois permitiu afondar nas necesidades reais dos centros e axustar a oferta para garantir o benestar tanto do alumnado como do profesorado, que é o pilar fundamental deste proceso”. Pola súa banda, a edil de Sanidade subliñou que “estes programas son unha prioridade para o Concello porque abordan aspectos fundamentais para a saúde emocional e física da comunidade educativa, dende Sanidade, en colaboración co centro de saúde da vila, continuaremos coa realización de obradoiros divulgativos de nutrición, enfermidades de transmisión sexual e hixiene dental”.

O programa de benestar na comunidade educativa, que se dirixe a docentes e alumnado, ten como obxectivo facilitar ferramentas para o coidado das emocións, a atención e a calma, mellorando o ambiente escolar e fomentando hábitos saudables para afrontar situacións como exames, conflitos ou momentos de estrés.

Ademais, o Concello lanzará unha serie de programas específicos que inclúen educación afectivo-sexual e prevención das agresións sexuais infantís; prevención do consumo de pornografía, da prevención da violencia de xénero, dos trastornos da conduta alimentaria e violencia estética e do acoso escolar.

Estas iniciativas buscan crear un entorno escolar seguro e igualitario, garantindo a participación activa das familias e o profesorado. Desde o Concello do Porriño insístese na aposta por unha educación integral que, ademais de formar, coide e protexa a comunidade educativa.

09/10/2025 in Educación e tecnoloxía, Sanidade

Carla Guisande, recoñecida no Concello tras unha tempada deportiva de éxitos

  • O alcalde Alejandro Lorenzo recibiu á triatleta polos seus logros a nivel nacional e o seu exemplo de superación persoal e académica

O Porriño, 9 de outubro de 2025.- O alcalde do Porriño, Alejandro Lorenzo, recibiu no Concello á triatleta porriñesa Carla Guisande, quen vén de completar unha tempada 2025 excepcional, combinando a súa carreira deportiva de elite cos estudos de Odontoloxía na Universidade de Santiago de Compostela. Durante o acto, o alcalde quixo recoñecer publicamente os méritos deportivos desta moza, que a sitúan como unha das deportistas máis destacadas do municipio e un referente para a mocidade. “Carla é un exemplo de constancia, esforzo e superación. Estamos moi orgullosos de contar cunha deportista que leva o nome do Porriño por todo o país e agora tamén por Europa. Detrás dos éxitos hai moitas horas de adestramento, estudo e sacrificio, e iso merece ser recoñecido por todos e todas”, destacou Alejandro Lorenzo.

Carla Guisande, pola súa parte, agradeceu o apoio recibido e mostrou a súa satisfacción por representar ao Porriño. “É un orgullo levar o nome do meu pobo a cada competición. Esta tempada foi moi esixente, pero estou moi contenta cos resultados. Quero agradecer ao Concello o recoñecemento e o apoio, que sempre é un impulso extra para seguir loitando polos meus obxectivos”.

Carla Guisande dispón dun palmarés en constante crecemento. Na tempada 2025 colleitou importantes éxitos a nivel nacional, entre os que destacan ouro no Campionato de España Supersprint / Relevos por Parellas (Albacete) e no Campionato de España de Duatlón Contrarreloxo por Equipos (Avilés); prata no Campionato de España por Relevos (Roquetas) e no Campionato de España de Duatlón Cros e campioa galega de Tríatlon. A deportista xa ten o foco posto nas próximas citas, entre as que se inclúen a Copa de Europa en Lanzarote, os Campionatos de España 2025-2026, así como as Copas de Europa da nova tempada. No inverno, combinará a preparación con participación en probas de atletismo e duatlón.

Desde o Concello do Porriño, o compromiso co deporte base e coa promoción dos talentos locais segue sendo unha prioridade, e casos como o de Carla Guisande son unha mostra do potencial deportivo que existe no municipio.

 

09/10/2025 in Alcaldía, Deportes

O Concello do Porriño reforzará o seu cadro de persoal coa incorporación de xente moza

  • Solicita unha subvención para a contratación de seis persoas menores de 30 anos que reforzarán durante nove meses diferentes departamentos municipais

O Porriño, 8 de outubro de 2025.- O Concello do Porriño vén de solicitar dous postos de técnico administrativo, un xornalista, un orientador, un técnico de información turística e un enxeñeiro técnico en construción e obra civil, ao abeiro dunha subvención da Xunta de Galicia destinada á contratación de persoas mozas inscritas no Sistema nacional de garantía xuvenil.

O alcalde Alejandro Lorenzo explica que “desde o Concello seguimos apostando polo futuro da nosa mocidade. Esta iniciativa é unha oportunidade para que mozas e mozos do noso municipio teñan a posibilidade de adquirir experiencia laboral real e mellorar a súa empregabilidade. Sabemos que a entrada no mercado laboral é un dos maiores retos para a xente nova e dende a administración local queremos ser parte da solución, ofrecendo oportunidades e acompañamento. Agardamos que a solicitude se vexa apoiada e poidamos contar con estes perfís profesionais no Concello durante os vindeiros meses”.

As persoas que poden optar a estes postos son menores de 30 anos, que figuren como desempregadas na Oficina de Emprego e estean inscritas no Sistema nacional de garantía xuvenil. Con todo, para obter máis información poden achegarse a Porremprego, onde recibirán asesoramento ao respecto.

Esta convocatoria ten por finalidade mellorar a empregabilidade e a inserción profesional das persoas mozas, menores de 30 anos, que non estudan nin traballan, mediante a prestación de servizos que lles posibiliten ás persoas participantes realizar un traballo efectivo, durante un período de nove meses, que lles procure unha práctica profesional necesaria para a súa integración sustentable no mercado de traballo.

En definitiva, esta iniciativa supón un paso importante na loita contra o desemprego xuvenil e na promoción do talento local. A incorporación de persoas mozas aos distintos departamentos do Concello do Porriño non só lles permitirá gañar experiencia e mellorar a súa empregabilidade, senón que tamén contribuirá a dinamizar e reforzar os servizos municipais, beneficiando así ao conxunto da cidadanía.

08/10/2025 in Emprego e formación, Mocidade

O Porriño celebra a VII Feira do Pan poñendo en valor o seu produto estrela e reforzando a súa aposta polo turismo e a gastronomía local

  • Será o vindeiro sábado, 11 de outubro, a partir das 11.00 horas na Praza Arquitecto Antonio Palacios. Haberá un showcooking de Coque Fariña, degustacións, un obradoiro infantil de elaboración de pan e actuacións musicais
  • O alcalde Alejandro Lorenzo destaca o valor do Pan do Porriño como símbolo de identidade e motor económico local

O Porriño, 7 de outubro de 2025.-  A Praza Arquitecto Antonio Palacios acollerá o vindeiro sábado, 11 de outubro, unha nova edición da Feira do Pan do Porriño, unha cita xa consolidada no calendario gastronómico galego que combina tradición, cultura e turismo, e que cada ano enche as rúas da vila de visitantes desexosos de degustar o auténtico Pan do Porriño, un produto con máis de catro séculos de historia.

“O Pan do Porriño non é só un produto, é parte da nosa historia e da nosa forma de entender a vida. Representa o esforzo dos nosos panadeiros, o valor do traballo artesanal e o sabor da tradición. Queremos que esta feira siga medrando e que cada vez máis persoas descubran todo o que O Porriño pode ofrecer”, explicou o alcalde Alejandro Lorenzo, no acto de presentación esta tarde acompañado dunha representación do sector panadeiro da vila.

Organizado polo Concello do Porriño coa colaboración da Axencia Galega de Calidade Alimentaria (AGACAL) e a Asociación de Panadeiros do Porriño, o evento busca poñer en valor os produtos locais e destacar a importancia do turismo gastronómico como motor de promoción e desenvolvemento económico para o municipio. O rexedor destacou “a importancia de seguir apostando pola promoción dos nosos produtos de calidade, que son auténticos embaixadores do Porriño e de Galicia máis alá das nosas fronteiras”.

A feira abrirase ás 11.00 horas e celebrarase ao longo de todo o día, onde estará aberto un posto de venda de Pan do Porriño, no que se poderá adquirir a tradicional bola de Pan do Porriño. A Asociación de Panadeiros, colaboradora esencial da feira, ofrecerá ao público unha ampla mostra do seu traballo artesanal e divulgará o proceso de elaboración dun produto que combina historia, calidade e sabor. A súa presenza reforza a esencia da feira e o compromiso do sector coa promoción gastronómica e turística da vila.

Trala inauguración a cargo do alcalde, a programación abrirase coa actuación de música e baile tradicional, “Regueifa”, da Asociación Cultural Sadeo, e, a continuación showcooking con degustación de receitas elaboradas con Pan do Porriño a cargo da recoñecida cociñeira Coque Fariña (@mi_coquetería).

A partir das 13.30 horas celebrarase a tradicional feira e xantar popular de polbo e porco ao espeto, amenizada polo DJ Mus, e ás 17.00 horas realizarase un obradoiro infantil “Peque Pan”, pensado para que os máis pequenos da casa aprendan de forma divertida o proceso de elaboración do pan.

A partir das 18:30 horas, o público poderá gozar da degustación “Experiencias de Calidade”, con embutidos e queixos con Denominación de Orixe de Galicia, a cargo de Salomé Beiroa, unha actividade patrocinada por AGACAL.

A feira pechará coa actuación musical do grupo La Patrulla, que porá o broche final a unha xornada dedicada á calidade, á tradición e ao orgullo de ser do Porriño.

 “Con eventos como este reforzamos a nosa identidade e proxectamos O Porriño como un destino que sabe a tradición, hospitalidade e boa mesa”, concluíu o alcalde.

 

 

07/10/2025 in Cultura e festas, Turismo

O Concello abre ao público o novo tren de xogo infantil e proxecta ampliar a zona verde con máis servizos

  • A nova atracción infantil, xa operativa, está situada xunto ao Templete de San Luís e os chorros de auga, consolidando esta área como un espazo central de lecer no casco urbano
  • O Concello continuará mellorando a contorna coa adquisición de terreos próximos e a creación de novas pistas deportivas

O Porriño, 7 de outubro de 2025.- O novo tren de xogo infantil instalado no Parque Infantil do Porriño xa está totalmente operativo e aberto ao público. Este multixogo de máis de dez metros de lonxitude simula unha locomotora e foi deseñado para garantir o desfrute e a seguridade da cativada, converténdose nun novo punto de encontro para as familias da vila.

A estrutura, fabricada con materiais duradeiros e seguros como aceiro galvanizado, cordas de polipropileno reforzado e pavimento de caucho, está situada nunha zona verde próxima ao recentemente restaurado Templete de San Luís. A súa instalación supuxo unha inversión total de 75.402 euros financiado con fondos propios do Concello e forma parte dun proxecto máis amplo de mellora do espazo público.

O alcalde Alejandro Lorenzo sinala que “con esta nova instalación damos un paso máis na nosa aposta polo benestar das familias e a creación de espazos seguros, accesibles e atractivos para a cativada”.  

Ademais da instalación do tren, realizáronse actuacións de mellora na contorna como a colocación de bancos de pedra, a instalación de bordos graníticos nas zonas de acceso e a plantación de tres carballos, que mellorarán a sombra e a calidade ambiental do espazo.

Ampliación futura: nova zona verde e pistas deportivas

O Concello xa traballa na seguinte fase deste proxecto, que incluirá a adquisición de terreos próximos co obxectivo de ampliar a zona verde e crear unha gran área de lecer con novas pistas deportivas e espazos de uso compartido para todas as idades.

“O tren é só un paso máis”, subliña o alcalde. “Queremos transformar esta zona nun pulmón verde no corazón do Porriño, un espazo de encontro interxeracional, onde nenos, mozos e maiores poidan desfrutar da natureza, facer deporte e convivir nunha contorna coidada e acolledora”.

Con este tipo de proxectos, o Concello do Porriño reafirma o seu compromiso coa mellora continua dos espazos públicos e a calidade de vida da súa veciñanza, especialmente da poboación infantil, que segue en aumento no municipio.

07/10/2025 in Parques e xardíns

O Concello cubrirá as pistas de pádel e renovará toda a contorna exterior do polideportivo municipal

  • As obras, cun investimento de case 450.000 euros, inclúen zonas axardinadas e melloras na accesibilidade e eficiencia das instalacións, así como o acondicionamento do chan do ximnasio e do teito do pavillón 2
  • O alcalde asegura que se dá resposta a unha demanda da veciñanza que a partir de agora poderá empregalas todo o ano sen depender das condicións meteorolóxicas

O Porriño, 6 de outubro de 2025.- O Concello do Porriño porá en marcha nas vindeiras semanas un proxecto integral de mellora do Complexo Deportivo Municipal, situado na Rúa Doantes de Sangue. A actuación contempla dúas liñas principais, por unha banda, a cubrición das dúas pistas de pádel exteriores, e por outra, o acondicionamento completo da contorna exterior, coa creación de novas zonas verdes e elementos destinados a mellorar a eficiencia enerxética e a estética do espazo.

O investimento total previsto ascende a 448.968,48 euros. Deste importe, 204.404,30 euros serán financiados a través dunha subvención do II Plan Extraordinario de Infraestruturas Deportivas (PEID II), mentres que o Concello asumirá o importe restante, por valor de 244.564,18 euros. O proxecto está en licitación e unha vez adxudicada a obra o prazo de execución será de catro meses.

“Esta actuación responde a unha demanda histórica da veciñanza, que reclamaba poder utilizar as pistas de pádel durante todo o ano. Cubrilas era unha necesidade que agora facemos realidade, sen renunciar ao seu carácter de instalación ao aire libre”, explica o alcalde Alejandro Lorenzo. O rexedor engadiu que “tamén damos un paso importante na mellora do aspecto xeral do complexo deportivo, creando un espazo máis amable, máis verde e máis integrado na contorna. Este tipo de intervencións melloran a calidade de vida da cidadanía e reforzan a nosa aposta polo deporte e a sustentabilidade”.

Un dos elementos máis destacados do proxecto será a cubrición das dúas pistas de pádel exteriores, que permitirá o seu uso durante todo o ano sen depender das condicións meteorolóxicas. A estrutura proxectada será independente e abranguerá non só o espazo de xogo, senón tamén as zonas de circulación adxacentes, garantindo unha mellor protección e confort para os usuarios. A solución adoptada respectará a esencia de espazo aberto e ventilado, mantendo as condicións propias dunha instalación ao aire libre, pero con maior comodidade e funcionalidade.

En paralelo, acometerase unha transformación da contorna do complexo coa renovación das zonas axardinadas existentes, a creación de novas áreas verdes mediante xardineiras, a instalación dun xardín vertical na fachada acristalada da piscina e a incorporación de mobiliario urbano como bancos. Esta intervención contribuirá a mellorar a imaxe urbana do conxunto, ao tempo que permitirá reducir o impacto térmico sobre a piscina grazas ao muro vexetal, aumentando así a súa eficiencia enerxética. Por outra banda, a obra suporá tamén o acondicionamento do chan do ximnasio do polideportivo, así como do teito do pavillón 2.

O Concello do Porriño reafirma con esta actuación o seu compromiso coa mellora das infraestruturas deportivas e co desenvolvemento de espazos públicos que favorezan unha vida activa, saudable e respectuosa co medio ambiente.

06/10/2025 in Deportes

O Porriño vive un domingo de éxito rotundo coa Festa dos Callos

  • Servíronse 9.800 racións nunha xornada festiva que encheu as rúas da vila de veciños e visitantes e puxo o punto final a un mes cheo de celebracións

O Porriño, 5 de outubro de 2025.-  Sabor a éxito este domingo no Porriño. A capital do Val da Louriña viviu unha das xornadas máis multitudinarias do ano coa celebración da XXXII Festa dos Callos, que se consolidou como unha cita imprescindible no calendario gastronómico e festivo da vila. Dende o mediodía, unha multitude de veciños e visitantes degustan este prato tradicional do municipio, que se sirve en 33 establecementos de hostalería, cada un cunha receita única pero todos ao prezo único de 8 euros.

A acollida non puido ser mellor: 9.800 racións foron servidas ao longo da xornada, esgotándose en moitos locais, nun ambiente amenizado por batucadas, charangas e actividades para toda a familia.

O alcalde do Porriño, Alejandro Lorenzo, mostrou a súa satisfacción polo éxito da convocatoria e agradeceu a implicación da hostalaría local e a participación masiva da cidadanía. “O Porriño volveu demostrar que é un lugar onde tradición, innovación e festa camiñan da man. A Festa dos Callos non é só unha cita gastronómica, é un reflexo do mellor que temos como vila: unión, creatividade e hospitalidade. Quero agradecer o esforzo de todos os locais participantes e o entusiasmo da xente que nos está a acompañar”.

A xornada comezou pola mañá co Torneo Individual Patín Porriño no pavillón municipal. Pola tarde, a Praza 8 de Marzo acollou as finais, infantil e de adultos, do certame “Tes Talento?”.  A Banda de Música Cultural de Salceda ofreceu un concerto na Praza Arquitecto Antonio Palacios e para pechar a programación, verbena con El Combo Dominicano, na rúa Antonio Palacios.

“Non se me ocorre mellor forma de despedir as Festas do Cristo 2025 que cun día como este, cheo de vida, cultura e sabor. Xa estamos a pensar na edición do ano que vén, pero antes, toca agradecer a todas as persoas, asociacións e entidades que fixeron posible este mes inesquecible”, concluíu o rexedor.

06/10/2025 in Cultura e festas