Novas

O Pleno Infantil reivindica “para cada infancia os seus dereitos”

A corporación infantil do Concello do Porriño reuniuse esta mañá para celebrar a súa sesión plenaria anual cumprindo co compromiso adquirido da administración local de conmemorar cada ano o Día Internacional dos Dereitos da Infancia.

O alcalde do Porriño, Alejandro Lorenzo, presidiu o pleno acompañado polas concelleiras de Educación e Infancia, Carolina González e Rosa Isabel ALonso. A corporación completábana representantes dos nove centros educativos de primaria e secundaria do municipio e de ACEESCA.

Os portavoces de cada uns dos centros tiveron a oportunidade de transmitirlle de primeira man, tanto ao alcalde coma ao resto de concelleiros e concelleiras, o resultado do traballo feito cos seus compañeiros e compañeiras nas aulas e defender as súas propostas para que O Porriño sexa un concello máis implicado na loita polos dereitos da infancia. Baixo o lema deste ano “Para cada infancia, todos os dereitos!” puxeron o foco na participación dos nenos e nenas na sociedade, na consecución dun planeta habitable e na paz.

No eido más local, propuxéronse cuestións como unha nova piscina pública, a necesidade de habilitar parques libres de fumo, a eliminación de barreiras arquitectónicas ou o transporte público.

Outro dos puntos da orde do día era a convocatoria dunha nova edición da campaña de recollida de alimentos infantís e productos de hixiene A Hora de Dar que axudarán a moitas familias do Porriño que o necesitan. A proposta foi aprobada por unanimade e desenvolverase o vindeiro 28 de novembro nos centros escolares.

29/11/2024 in Alcaldía, Educación e tecnoloxía

Aberto o prazo de solicitude para o Campamento de Nadal 2024

O Concello de Porriño abre este martes 26 de novembro o prazo de inscrición para o seu Campamento de Nadal, un programa de lecer e tempo libre dirixido a nenos e nenas de entre 3 e 12 anos. Esta actividade desenvolverase en varias datas do período vacacional escolar, e está deseñada para fomentar o desenvolvemento integral dos menores a través de xogos, talleres, dinámicas de grupo e actividades deportivas.

O obxectivo principal do campamento é ofrecer un espazo lúdico e educativo que favoreza a conciliación da vida familiar e laboral das familias do municipio, proporcionando aos nenos e nenas unha contorna segura, de diversión e aprendizaxe durante as vacacións.

Ademais, será unha oportunidade para que os nenos e nenas desenvolvan a súa sociabilidade e gocen dun ambiente de encontro e relación cos seus compañeiros.

O campamento desenvolverase os días 23, 26, 27 e 30 de decembro de 2024 e 2, 3 e 7 de xaneiro de 2025.

As actividades levaranse a cabo en horario de mañá, de 9:00 a 14:00 h. Ademais, ofrecerase a opción de aula matinal, con entrada a partir das 8:30 h e recollida ás 14:30 h, para facilitar a conciliación das familias.

A actividade é completamente gratuíta e requírese inscrición previa, tendo preferencia os nenos e nenas do Porriño. O prazo para inscribirse será do 26 de novembro ás 8:59 h ata o 2 de decembro ás 8:59 h. As inscricións poden formalizarse de maneira presencial no rexistro municipal ou a través da sede electrónica do Concello do Porriño.

Folla inscripción Campamento de Nadal 24
26/11/2024 in Alcaldía, Educación e tecnoloxía, Igualdade

Andaina solidaria FORZA VALENCIA, AMUNT!

O Concello de Porriño organiza dunha marcha solidaria baixo o lema “Forza Valencia, amunt”, que terá lugar o vindeiro domingo 17 de novembro. Esta iniciativa ten como obxectivo axudar ás persoas afectadas pola DANA que asolou a rexión de Valencia. A marcha, que é apta para todas as idades, percorrerá 4 km polo centro urbano e o paseo do Louro, con saída desde a praza Arquitecto Antonio Palacios ás 16:30 h. Terá unha duración de aproximadamente unha hora.

Para participar, só é necesario inscribirse e realizar un donativo a partir de 5 euros, que se destinará a través de Som Solidaritat para axudar a quen máis o necesitan nesta difícil situación.

Podes facelo na facendo click na seguinte imaxe: 

08/11/2024 in Alcaldía, Benestar, Deportes

Arrancan as obras de construción dun novo gran parque no corazón do Porriño

O Concello do Porriño inicia hoxe un ambicioso proxecto de transformación urbana co comezo das obras para a creación dun novo espazo público entre as rúas Antonio Palacios e Pío XII. Estes traballos, que inclúen a humanización da Rúa Pío XII, representan a primeira fase da construción dun gran espazo libre de lecer destinado a revitalizar o centro urbano e promover un urbanismo máis amable e accesible.

O obxectivo principal deste proxecto é dar uso á mazá interior delimitada polas rúas Antonio Palacios, Avenida Domingo Bueno e Rúa Pío XII.

O novo deseño prevé a creación dun parque completamente aberto, onde os distintos usos e espazos estean interconectados. Incluiranse áreas de lecer, descanso, reunión e convivencia, con bancadas integradas e bancos, incrementarase a vexetación e crearanse zonas de sombra que fomenten o uso da área.  

Ademais, melloraranse as características de acabado e circulación da Rúa Pío XII utilizando pavimento pétreo que continúe coa estética do parque. A actuación nesta rúa incluirá a renovación de todas as redes de servizo como abastecemento, saneamento, gas ou iluminación pública.

Unha das metas máis relevantes deste proxecto é recuperar a rúa como un lugar de socialización, garantindo a seguridade de peóns e ciclistas. Para iso, a Rúa Pío XII integrarase plenamente no parque, favorecendo a comunicación peonil co centro da vila e mellorando unha área que actualmente presenta malas condicións.

Entre as distintas zonas que se proxectan, destaca un parque infantil, que se redeseñará cunha xeometría circular en diálogo co resto da estética. Incorporaranse elementos de xogo en harmonía coa arboleda existente, creando unha contorna segura e atractiva para os máis pequenos.

“Este proxecto non só transformará a paisaxe urbana, senón que tamén creará un espazo inclusivo e dinámico, onde os cidadáns poidan gozar dunha contorna máis saudable e socialmente activa. Estou seguro que se converterá nun punto de encontro para toda a veciñanza”, explicou o alcalde, Alejandro Lorenzo.

O rexedor explicou que “as obras desenvolveranse buscando o menor perxuízo posible, sobre todo tendo en conta que coincide coas datas de Nadal, polo que estableceremos alternativas de circulación para que o noso comercio non se vexa afectado”.

Lorenzo concluíu explicando que as xestións para a segunda fase o proxecto están moi avanzadas. “Estamos ultimando a adquisición dos terreos necesarios para executar estas obras e aproveito para reiterar o meu agradecemento aos propietarios pola súa disposición á facilitar ao Concello que este gran parque sexa pronto unha realidade”.

28/10/2024 in Alcaldía, Parques e xardíns, Vías e obras

Contos que curan, o programa de biblioterapia infantil da Biblioteca do Porriño

Nun contexto social no que os problemas de saúde mental infantil están en aumento, a Biblioteca do Porriño posiciónase como un punto de apoio para as familias co seu proxecto de biblioterapia “Contos que curan”. Este innovador programa ten como obxectivo axudar a previr, identificar e xestionar diversos trastornos que afectan a nenos e nenas de entre 3 e 12 anos.
 
A Organización Mundial da Saúde (OMS) enfatizou a importancia de actuar desde a infancia para facer frente a estes desafíos, instando a gobernos, institucións e á sociedade en xeral a colaborar na creación dun entorno máis saudable e comprensivo. A Biblioteca do Porriño únese a esta causa creando unha ferramenta que combina a maxia da lectura coa necesidade de apoio emocional da cativada.
 
“Contos que curan” componse dunha serie de boletíns temáticos que ofrecerán unha coidada selección de contos de ficción, clasificados e recomendados para axudar a pais, nais, educadores e profesionais da saúde no seu labor de mediación terapéutica. Cada boletín incluirá información bibliográfica completa dos contos seleccionados, con recensións críticas que destacan a súa relevancia na xestión de temas sensibles como oa xestión da morte e duelo dun ser querido, o bullying ou acoso escolar, a timidez e fobia social, o sono e o medo á escuridade, ou a desestigmatización e normalización da neurodiverxencia (autismo, dislexia, TDAH, síndrome de Down…).
 
O compromiso da Biblioteca de Porriño non pasa desapercibido. O seu proxecto foi seleccionado para participar nas III Xornadas Internacionais sobre compromiso social e biblioteca da Fundación Alonso Quijano, unha iniciativa que busca visibilizar iniciativas de inclusión social en bibliotecas.
 
“A lectura pode ser unha poderosa ferramenta de sanación e `Contos que curan´ será ese espazo no que as familias e os nenos e nenas atopen comprensión e empatía”, explicou o alcalde do Porriño, Alejandro Lorenzo, “Gustaríame convidarvos a todos e todas a participar desta iniciativa coa que non solo queremos desestigmatizar e axudar á cativada, senón crear un futuro máis xusto e alentador para eles”.
 
Primeiro boletín: “Morte e duelo”
 
O primeiro boletín, titulado “Morte e duelo”, lanzarase este mes, coincidindo coa semana de Todos os Santos. Esta publicación non só estará dispoñible de maneira física, senón que tam
én se difundirá dixitalmente, chegando a todo aquel que poida beneficiarse deste recurso.
A morte representa a experiencia máis incomprensible para o ser humano e nesas datas estará moi presente nas vidas dos pequenos e pequenas. Aos nenos e nenas cústalles máis entendela. Moito máis, porque non están aínda preparados para comprender que é algo inevitable, irreversible e permanente.
Lerlles contos axeitados pode facilitar as cousas…Porque os contos non curan por si mesmos, pero poden axudarnos a axudarlles.
 
Por iso neste boletín propoñeranse unha selección de lecturas axeitadas. Historias que abordan a morte e o loito desde distintos putnos de vista para distintos grupos de idade. 
24/10/2024 in Sen categoría

Atención valentes! Chega o Samaín ao Porriño

O Porriño transformarase nun escenario de auténtico terror coa celebración do Samaín, unha noite na que os espíritos vagan e as criaturas da escuridade cobran vida.

A xornada do 31 comezará coa tradicional exposición de calacús, onde os pequenos artistas dos colexios, e tamén os usuarios e usuarias de Aceesca e Afaga, puxeron o seu enxeño e creatividade. O resultado, máis de 500 calacús que adornarán o centro da vila. Desde a Fonte do Cristo ata o final do barrio de San Benito, estas terroríficas obras de arte iluminarán as rúas coa súa sinistra beleza.

Pero iso non é todo. Na véspera do día de Todos os Santos, a Casa do concello converterase nun auténtico castelo do terror. Criaturas horripilantes tomarán o control, desafiando aos máis valentes a entrar e enfrontarse aos seus peores pesadelos.

Desde as 17:00 ata as 19:45 horas, o Concello encherase de risas e berros no túnel do terror infantil, e despois, na praza os nenos e nenas poderán mover os osiños co arrepiante espectáculo “A bailar esqueletes”. Aqueles pequenos que se atrevan a participar recibirán un agasallo como recoñecemento á súa valentía.

A partir das 20:15 horas, o túnel do terror intensificarase para recibir aos maiores, prometendo unha experiencia aínda máis aterradora. Advertimos que será peor! E para aliviar un pouco a tensión, a noite culminará cunha sesión DJ na praza, onde todos poderán deixar atrás o medo e gozar da música.

Desde o Concello do Porriño convidan á veciñanza a defender a súa casa consistorial e disfrutar desta noite de terror e diversión no Porriño!

24/10/2024 in Sen categoría

Arranca o obradoiro “O Noso Encontro co Emprego” no que 16 mozos formaranse mentres traballan

O Porriño acolleu hoxe a presentación do Obradoiro de Emprego “O Noso Encontro co Emprego”, un innovador programa de formación e emprego dirixido a mozos menores de 30 anos. O evento, que tivo lugar nas instalacións de Porremprego, contou coa participación do alcalde de Porriño, Alejandro Lorenzo e a delegada territorial da Xunta en Vigo, Ana Ortiz, que estiveron acompañados polo director territorial de Emprego, José Antonio Rodríguez e a directora do Obradoiro, Begoña Echegaray.

Este novo programa, que require un investimento total de máis de 480.000 euros, financiarase principalmente a través da Consellería de Emprego, Comercio e Emigración da Xunta de Galicia, con 439.000 euros, aos que se suma unha achega municipal de 45.000 euros. Un total de 16 alumnos-traballadores beneficiaranse desta formación, divididos en dúas especialidades: albalenería urbanización e carpintería, con oito participantes en cada unha.

Os alumnos de carpintería poñerán en práctica os seus coñecementos reparando tres pasarelas no Paseo do Louro, mellorando así a accesibilidade na senda peonil que bordea o río. En canto aos futuros albaneis, encargaranse dos labores de urbanización e pintura na rúa Paralela 3 do Polígono Industrial da Granxa, onde se executarán novas beirarrúas.

O programa “O Noso Encontro co Emprego” terá unha duración de doce meses e “representa unha valiosa oportunidade para que os mozos se formen e adquiran experiencia en profesións altamente demandadas no mercado laboral, aumentando así as súas posibilidades de inserción laboral”, tal e como trasmitiu o alcalde Alejandro Lorenzo, quen  instou aos novos traballadores a “aproveitar ao máximo esta experiencia”, subliñando a importancia do servizo público que brindarán a todo o pobo.

Pola súa banda, a delegada Ana Ortiz, incidiu en que están “ante unha ocasión magnífica para abrir unha ventá ao mercado de traballo, xa que tanto a sociedade como as empresas necesitan xente formada, aí é onde tedes a vosa oportunidade”.  

O acto de presentación celebrouse dun xeito especial, xa que os alumnos doutro obradoiro de emprego do Porriño, centrado na especialidade de cociña, ofreceron un almorzo, dando a benvida aos novos compañeiros e demostrando, unha vez máis, a súa preparación e habilidades adquiridas tras un ano de formación.

Con esta iniciativa, desde o Concello do Porriño continúan reafirmando o seu compromiso coa creación de emprego e a formación da súa mocidade, sentando as bases para un futuro laboral máis prometedor para todos eles.

22/10/2024 in Alcaldía, Emprego e formación

A Oficina de Retorno da Xunta de Galicia atendeu na área de Vigo a preto de 5.000 familias retornadas

A Secretaría Xeral da Emigración da Xunta de Galicia continúa achegando os seus servizos de apoio ás persoas retornadas a través da súa Oficina Móbil de Atención ás Persoas Emigrantes Retornadas.  Na oficina da área de Vigo xa recibiron asesoramento 5.000 familias atendidas dende 2020. Estes servizos confírmanse como unha ferramenta esencial para facilitar o retorno e a integración dos galegos que deciden regresar á súa terra.

O secretario xeral da Emigración, Antonio Rodríguez Miranda, e o alcalde de O Porriño, Alejandro Alonso, visitaron esta mañá a oficina móbil no Porriño acompañados pola concelleira de Emigración, Vanessa Ucha, reafirmando o compromiso da Xunta de Galicia con ofrecer un apoio integral e personalizado ás familias retornadas, independentemente da súa localización xeográfica. Esta iniciativa está cofinanciada polo Fondo Social Europeo.

Entre os servizos que se ofrece a través da Oficina Móbil atópanse o asesoramento sobre programas de apoio ao retorno, ofrecendo información actualizada sobre as diferentes axudas económicas e programas dispoñibles para facilitar a integración en Galicia. Tamén se brinda axuda nos trámites administrativos, prestando apoio na realización de xestións relacionadas coa sanidade, educación, Seguridade Social e outras cuestións importantes para a vida cotiá das persoas retornadas. Ademais, incluese orientación laboral, proporcionando asesoramento para a busca de emprego en Galicia e guía sobre a validación de títulos acadados no estranxeiro. Por último, ofrece información sobre vivenda e educación, asistindo ás familias retornadas nas opcións de vivenda dispoñibles e nos recursos educativos para fillos.

Dende o inicio do programa, a oficina móbil percorreu os concellos de Galicia, facilitando o acceso a servizos esenciais para aqueles retornados que residen en zonas rurais ou periurbanas. Esta proximidade asegura que todos os galegos e galegas que volven á súa terra teñan a oportunidade de recibir asesoramento e acompañamento para unha reintegración exitosa.

A visita ao Porriño reforza o compromiso da Xunta de Galicia coa poboación retornada, contribuíndo ao crecemento económico, social e demográfico do país, e fortalecendo os lazos entre Galicia e a súa diáspora.

18/10/2024 in Alcaldía

A Policía Local do Porriño desactiva unha concentración ilegal de vehículos no polígono industrial Oceanis-Cataboi

A Policía Local do Porriño levou a cabo o pasado sábado 12 de outubro a “Operación Caba”, unha intervención destinada a desactivar unha masiva concentración de vehículos e persoas no polígono industrial Oceanis-Cataboi. Este evento, convocado a través de redes sociais, converteuse nun espazo para exhibicións de condución e carreiras ilegais, xerando un grave risco para a seguridade pública.

Desde hai varias semanas, as autoridades detectaron un aumento na concentración de turismos e asistentes no polígono os sábados pola noite. Inicialmente, estas reunións eran simples quedadas, pero co tempo evolucionaron cara a carreiras ilegais e manobras perigosas, como trompos e arranques que comprometían a seguridade de case un milleiro de persoas presentes.

A operación, en honra ao falecido policía local Manuel Cabaleiro Martínez, foi coordinada polo Xulgado de 1ª Instancia e Instrución número 1 do Porriño. Dispúxose un amplo dispositivo policial que incluíu o uso de drons e outros medios técnicos para documentar as infraccións. Ás 00:55 horas do 13 de outubro, a policía pechou sorpresivamente todos os accesos ao polígono, obrigando aos vehículos a saír por un único paso habilitado, onde se realizaron inspeccións exhaustivas.

Como resultado da operación, cinco condutores foron investigados pola presunta comisión dun delito contra a seguridade viaria (condución temeraria). Nove condutores enfrontan denuncias administrativas, con sancións de 500 euros e a perda de 6 puntos da súa licenza. Rexistráronse máis de 20 infraccións ao Regulamento Xeral de Vehículos, así como denuncias por circular sen seguro e sen cinto de seguridade.

As investigacións revelaron que este tipo de concentracións están a levarse a cabo en varios municipios da comarca e no país veciño, con organizadores que implementan medidas de vixilancia para detectar a presenza policial.

Entre os vehículos involucrados nestas carreiras ilegais atopáronse desde automóbiles con máis de 20 anos de antigüidade ata vehículos modernos, sorprendendo a participación mesmo dun vehículo fúnebre.

Os investigados foron citados perante o xulgado de 1ª Instancia e Instrución nº 1 do Porriño, onde catro deles aceptaron a pena de prisión e a retirada do permiso de condución solicitada polo Ministerio Fiscal, quedando un pendente de comparecer co seu avogado designado.

18/10/2024 in Alcaldía, Seguridade