Novas

Actividades formativas gratuitas na Aula CeMIT do Porriño o mes de novembro

A Aula da Rede CeMIT, do concello do Porriño impartirá as seguintes actividades formativas gratuítas no mes de novembro.

Charla: Dálle luz a túa factura. Bono social eléctrico e outras axudas  . 5 de novembro, de 12:00 a 13:30horas

Contidos:

Dálle luz á túa factura pretende facilitar os coñecementos básicos necesarios para comprender a factura eléctrica, para adoitar medidas de aforro no gasto eléctrico e para realizar unha reclamación nos distintos supostos que se poidan presentar en relación á contratación dos servizos prestados polas compañías eléctricas. Centrarémonos ademais, nas tarifas con descontos como son o Bono social (a nivel estatal) e axudas específicas a consumidores vulnerables severos en risco de exclusión social (a nivel autonómico).

Curso: A Administración Electrónica. DNI electrónico. Certificados dixitais. Chave365. Cl@avePIN.

Do 6  ao 9 de novembro. En horario de 09:30 a 12:30horas.

Contidos:

  1. Que é Administración electrónica.
  2. O Certificado dixital e cales son os pasos para obtelo.

III.          Coñecer os trámites electrónicos que ofrecen as Administracións públicas.

  1. Realizar algúns trámites con distintas Administracións.
  2. Chave 365. Cl@lavePIN.

Duración: 12 horas.

Curso: Coñece e disfruta das posibilidades do teu teléfono intelixente.

Os días 19 e 20 de novembro. En horario de 10:00 a 12:00horas.

Contidos

  1. Conceptos básicos
  2. Funcionalidades

III.          Axustes e personalización básica

  1. Aplicacións útiles

Duración: 4  horas.

 

Curso: Sácalle o máximo partido ao teu navegador Google Chrome. Personaliza as súas funcións e a súa configuración

Os días 22 e 23 de novembro. En horario de 10:00 a 12:00horas.

Contidos

  1. Interfaz
  2. Xestión de marcadores

III.          Configuración e personalización

  1. Consellos prácticos.

Duración: 4 horas.

Curso: Sácalle partido á cámara dixital do teu teléfono intelixente.Trucos e consellos.

Os días 26  e 27 de novembro. En horario de 10:00 a 12:00horas.

Contidos

  1. Conceptos básicos
  2. Edita as túas fotos

III.          Crea as túas composiciones

  1. Crea, edita os teus videos.

Duración: 4 horas.

Curso: Seguridade na internet: consellos de prevención e protección

Os días 28 e 29 de novembro. En horario de 10:00 a 12:00horas.

Contidos

  1. Coñecer os riscos que supón a navegación pola Internet.
  2. Tomar as precaucións adecuadas para a navegación. Medidas preventivas.

III.          Coñecer os filtros de control parental e a súa configuración.

  1. Detectar riscos da presenza en redes sociais.

Duración: 4 horas.

As persoas interesadas en realizar algúns dos talleres programados, deberán facer a súa reserva da praza na propia Aula CeMIT, no teléfono 986.338.217 ou ben enviando un correo electrónico a cemit.oporrino@xunta.gal.

30/10/2018 in Alcaldía, Emprego e formación

UNICEF outorga a O Porriño o título de ‘Cidade Amiga da Infancia’

Na reunión celebrada este xoves pasado, 25 de outubro, a Secretaría Permanente do Programa Cidades Amigas da Infancia (CAI), representada por membros pertencentes a UNICEF Comité Español; Ministerio de Sanidade, Consumo e Benestar Social; Federación Española de Municipios e Provincias (FEMP) e o Instituto Universitario de Necesidades de Dereitos da Infancia e a Adolescencia (IUNDIA), acordou galardoar ao Concello de Porriño co Recoñecemento ‘Cidade Amiga da Infancia’ no marco da VIII Convocatoria de Recoñecementos 2018-2022.

UNICEF sinala que “o recoñecemento pon en valor o labor do Concello, en coordinación coas entidades locais e cos nenos e nenas, para liderar o proceso continuo de implementación de políticas e medidas que melloran o benestar da infancia e adolescencia no municipio”.

O do Porriño é xa un dos Gobernos Locales que veñen de situar á Infancia no centro das súas políticas públicas. Na actualidade, o 41% das nenas, nenos e adolescentes que viven en  en España, son veciñas e veciños dunha Ciudade Amiga da Infancia.

O acto formal de entrega deste galardón, terá lugar no Palacio de Exposicións e Congresos de Oviedo, o vindeiro 27 de novembro.

26/10/2018 in Alcaldía

O auditorio do Centro Cultural Municipal do Porriño acolle a proxección do documental “Santa Liberdade” e un coloquio coa súa directora, Margarita Ledo Andión

O vindeiro venres, día 26, ás 7 da tarde, o Auditorio do Centro Cultural do Porriño será o escenario da proxección do documental ‘Santa Liberdade’ e do posterior coloquio coa súa directora, Margarita Ledo Andión.

O documental ten coma argumento o secuestro, o 22 de xaneiro de 1961, por un grupo de antifascistas galegos e portugueses auto-organizados no Directorio Revolucionario Ibérico de Liberación ( DRIL), do transatlántico de bandeira portuguesa “Santa María”, que con centos de pasaxeiros dirixíase ao porto de Vigo.

Baixo as ordes de Humberto Delgado, Enrique Galvao, Xose Veo e Jorge Fernández de Soutomaior, portugueses os dous primeiros, galegos os seguinte, exiliados todos, das ditaduras franquista e salazarista en Venezuela e Brasil.

As 24 persoas que compoñían o grupo protagonizaron o primeiro secuestro político da Historia e o seu obxectivo era chamar a atención de todo o mundo sobre a situación política que atravesaban os estados español e portugués, mediante unha acción propagandística de gran dimensión.

O DRIL conseguiu facer deste asalto un acontecemento mediático: durante 13 días os telexornais e xornais de boa parte do mundo abriron as súas edicións coa noticia do secuestro. O barco conseguiu manterse durante tres días completos sen localizar, mentres que o goberno norteamericano, baixo a presidencia de Kennedy, asumiu a coordinación dunha ampla operación de procura e captura, o que serviu tamén como manobra de contención das peticións de afundir o barco feita polas ditaduras ibéricas, que cualificaban o suceso como mero acto de piratería.

25/10/2018 in Alcaldía, Cultura e festas

A Concellería de Vías e Obras remata os traballos no barrio da Igrexa, en Pontellas, cunha nova estrada máis ancha e segura e a extensión da rede municipal de saneamento ás vivendas da zona

A Concellería de Vías e Obras vén de concluír os traballos de mellora  no barrio da Igrexa, na parroquia de Pontellas que, como sinala Manuel Carrera, abrangueron o pavimentado e sinalización no lugar no que se transformara un camiño nunha nova estrada “moito máis e ancha, segura e transitable por vehículos e peóns”, e a extensión da rede municipal de saneamento ás vivendas da zona.

O tenente de alcalde salienta que esta é “unha das as obras máis importantes executadas neste mandato na parroquia de Pontellas” dado que supón unha notable mellora tanto dos accesos coma da comunicación dentro do barrio da Igrexa , así mesmo, “seguir cumprindo o noso compromiso de levar o abastecemento e saneamento a todos os lugares do Porriño”, un obxectivo no que neste mandato avanzouse máis que en ningún outro.

Os traballos, rematados nun mes e que contaron cun orzamento de 47.633,71€ de fondos propios do Concello, consistiron no pavimentado de preto de 3.000 metros cadrados, cun firme e 5 centímetros de grosor, a ampliación de la rede de saneamento incorporando unha nova tubaxe de 315 milímetros de diámetro, a sinalización de toda a vía e a incorporación dunha varanda de 30 metros na zona.

25/10/2018 in Alcaldía, Vías e obras

A alcaldesa advirte de que os orzamentos da Xunta para 2019 non contemplan “nin un so céntimo de euro de investimentos no Porriño”

A proposta de orzamentos do Goberno de Galicia para o ano 2019 non recolle “nin un so céntimo de euro de investimento no Porriño”, segundo pódese ver no borrador do mesmo que xa chegou ao Parlamento.

Cero euros para o Centro de Saúde

Un exercicio máis, o executivo do Partido Popular rexeita a mellora e ampliación do Centro de Saúde do Porriño, unha obra na que sería precisa unha dotación de 400.000€, tal e como reiterou o Goberno local nos anos, 2016, 2017, 2018 e, de novo, de cara ao 2019.

A alcaldesa, Eva García de la Torre, lembra que  o proxecto do novo centro de saúde xa fora anunciado polo anterior alcalde, que tiña no seu goberno ao actual presidente do Partido Popular do Porriño, Manuel Alejandro Lorenzo. A alcaldesa sinala que “aquel alcalde do PP mesmo fíxose unha fotografía coa conselleira de Sanidade da Xunta, daquela tamén presidida por Núñez Feijóo, asegurando que as melloras do centro de saúde estaban xa en marcha”.

O resultado, catro anos máis tarde é que  o Concello do Porriño está a pagar a limpeza dos terreos que o cedeu á Xunta e, o que é moito máis grave, que “as porriñesas e porriñeses seguen amoreándose nun centro de saúde totalmente desfasado, no que pasan calor no verán e frío no inverno e que non ten os servizos necesarios para atender as súas necesidades, tal e como denuncian, sistematicamente na rúa”.

Cero euros para centros escolares

A alcaldesa tamén denuncia o feito de que sendo O Porriño o concello que máis medra de Galicia, e logo de pedir reiteradamente a construción dunha nova gardería e novo colexio,  á vista do estado do CEIP Fernández López, a Xunta gobernada polo Partido Popular destina ‘cero euros “a estas demandas e, aínda máis, tampouco contempla partida algunha dos 50.000€ demandados polo Goberno do Porriño para os comedores escolares.

A situación é aínda máis “insultante para as porriñesas e porriñeses considerando que a Xunta sí abriu unha gardería en Mos, gobernada por unha alcaldesa do Partido Popular e que ten un 80% de cativas e cativos que van dende O Porriño porque aquí non temos prazas”.

Cero euros para afrontar o problema do lindano

Na mesma liña, o Goberno de Núñez Feijóo non contempla o investimento de un so céntimo para a des-contaminación das zonas do Porriño nas que se atoparon refugallos de lindano, “o cal, ademais de un abandono das súas obriga, dado que é competencia exclusiva do seu goberno, é un exercicio de desprezo  pola saúde dos veciños considerando, en primeiro lugar que había un compromiso neste senso, anunciado pola Xunta e polo voceiro do PP no Concello do Porriño, Manuel Alejandro Lorenzo, que mesmo presumiu no Pleno de manter xuntanzas con responsábeis da Xunta, como publicaron os medios de comunicación, para axilizar esta promesa”.

O que se ve nestes orzamentos é que ao Partido Popular so lle interesan os cidadáns do Porriño  para que lle dean o seu voto cada catro anos, pero que teñan unha asistencia médica digna, a educación e benestar das súas fillas e fillos e o coidado e protección da súa saúde ao Partido Popular tráenlle sen coidado.

A alcaldesa agarda que a estadía do presidente da Xunta e do Partido Popular de Galicia no Porriño estes días sirva, ademais de para defender os seus intereses e os do PP, para comprometerse a facer algo polas porriñesas e porriñeses, empezando por “pedirlles perdón pola marxinación e o esquecemento aos que os ten condenados nestes anos”.

Pola súa banda, Eva García de la Torre agarda que o presidente do PP do Porriño, Manuel Alejandro Lorenzo sexa quen de amosar a súa desconformidade co proceder da Xunta e  demande, en persoa, ao seu presidente que cumpra coa súa obriga que é a de atender á sanidade, á educación e a saúde das veciñas e veciños do Porriño, que son tamén as súas veciñas e veciños.

25/10/2018 in Alcaldía

Inaugurada a exposición ‘Flores para As Meninas’, que estará no Centro Cultural Municipal ata o vindeiro día 31

A Concellería de Ensino e Participación Cidadá do Concello de Ponteareas, que dirixe Cristina Fernández, abre fronteiras para que as trinta ‘Meninas’ realizadas por colectivos e centros de ensino de toda a área metropolitana expoñan a súa beleza e creatividade nos diferentes concellos veciños. Organizadas por quendas, as Meninas visitarán os concellos de Mondariz, Mondariz Balneario, Salceda, Covelo, As Neves, A Cañiza e O Porriño.

A responsable do departamento de Educación do Porriño, Lourdes Moure, abriu esta exposición que estará na nosa vila dende este martes, día 16, ao 31 de outubro, no Centro Cultural municipal para que toda a cidadanía poida desfrutar destas obras de arte realizadas na súa maior parte con materiais de refugallo.

O proxecto “Flores para as Meninas” creado pola profesora Pilar Gallego e dirixido dende a concellería de Ensino de Ponteareas, contou coa colaboración de toda a comunidade educativa e distintos colectivos que agasallaron estas pezas para que logo puideran ser patrocinadas e doados os cartos conseguidos a unha entidade sen ánimo de lucro.

18/10/2018 in Alcaldía, Cultura e festas, Educación e tecnoloxía

A Concellería de Limpeza empeza coa colocación dos primeiros 6 composteiros como parte da posta en marcha do ‘Plan Revitaliza’ da @depo_es

A Concellería de Limpeza do Porriño, que dirixe Orlando Márquez, vén de poñer en marcha a instalación de 6 composteiros no barrio de San Sebastián, coma “primeira medida do Plan Revitaliza da Deputación de Pontevedra, que permitirá a reciclaxe de restos orgánicos das vivendas do concello”.

Para a utilización dos composteiros, que estarán funcionando nun prazo de 10 días, o Concello organizará distintas charlas, que anunciará nos vindeiros días, para explicar o funcionamento dos mesmos.

Orlando Márquez, quen adianta que a instalación dos composteiros seguirá na Urbanización O Pinar, subliña que este sistema para converter os restos de comida e vexetais en fertilizante natural, “non esixe máis que uns 10 ou 15 minutos á semana, non ten custos de mantemento ou funcionamento e pode realizarse, sen molestias e sen cheiros, en calquera zona”.

O lixo diario que xeran os fogares contén contén máis dun 50% de refugallos orgánicos que poden reciclarse e retornar a terra en forma de ‘humus’ para plantas e cultivos, “por cada 100 quilos de lixo orgánico poden lograrse ata 15 quilos de compost”. 

O concelleiro salienta que o uso dos composteiros permite aforrar gastos na recollida do  lixo, “estímase que ao redor de 40€ por familia e ano”; evita o emprego de bolsas de plástico posto que “os refugallos orgánicos vértense directamente no composteiro, sen usar bolsa”, e reduce a contaminación: “en primeiro lugar a que causa o transporte do lixo e, segundo a que se produce ao queimar os refugallos”.

12/10/2018 in Alcaldía, Limpeza

O Concello anchea, ata os 10 metros, a estrada que da entrada al CEIP de Atios, en Catro Camiños, un dos lugares máis transitados da parroquia

A parte do vial do lugar de Catrocamiños que da entrada ao CEIP Plurilingüe de Atios, terá a partir da semana que vén un ancho de 10 metros, “o establecido pola lei”, logo do remate dos traballos que están a realizarse neste lugar.

Os mesmos, sinala o tenente de alcalde, Manuel Carrera, foron posibles logo da cesión desinteresada dos veciños de parte dos seus terreos que, logo da retirada de muros, permitiron, “o ancheado e pavimentado desta estrada, unha das máis transitadas da parroquia”.

Carrera indica que esta obra,que contou cun orzamento superior aos 10.000€ procedentes de fondos municipais, realizouse con persoal contratado con cargo á axuda da Deputación de Pontevedra, e traballadores do Concello e forma parte do Plan de Mellora de Viais, Camiños e Estradas Municipais posto en marcha polo actual Goberno local.

12/10/2018 in Alcaldía, Vías e obras

En funcionamento a nova rotonda de A Costeira e a ordenación da zona entre Cerquido e Budiño, que ten un elevado índice de accidentes de tráfico

A alcaldesa, Eva Garcia de la Torre, xunto con Uxío Benítez, deputado provincial de Mobilidade da Deputación de Pontevedra, e o concelleiro de Vías e Obras, Manuel Carrera, supervisou hoxe as obras realizadas polo organismo provincial para reordenar o tráfico e mellorar a seguranza viaria na estrada provincial EP-2405 entre Cerquido e Budiño, no lugar de A Costeira.

García de la Torre  salientou que a obra supón “unha mellora ostensible” na ordenación da zona e asegurou que “coa construción da rotonda evítase a altísima sinistralidade que había tal e como estaba configurado o espazo. Agora os viandantes e as persoas usuarias adaptáronse perfectamente á existencia da glorieta, o que dá idea da necesidade que había de facela”.

Para o responsable das infraestruturas provinciais a nova glorieta ven a redistribuír a circulación e calmar a velocidade nunha intersección que ata o de agora era moi perigosa e fora escenario de diversos accidentes.

Benitez subliñou que a actuación en A Costeira incluíuse dentro do Plan de Interseccións  da Estratexia de Mobilidade 3.0 da Deputación, que ten como un dos seus obxectivos prioritarios eliminar a violencia viaria e os puntos negros de toda a rede de estradas provincial.

Os traballos de mellora consistiron principalmente na ampliación do radio de curvatura da estrada principal, preto da conexión da EP-2405 da Deputación co parque empresarial das Gándaras, á altura do Centro Tecnolóxico do Automóbil de Galicia.

Doutra banda, urbanizouse a zona con beirarrúas para prestar continuidade ao tránsito peonil, habilitáronse pasos de peóns e baixouse a velocidade máxima de 50 a 30 quilómetros hora. Tamén se solucionaron as drenaxes mediante a remodelación de beiravías e sumidoiros e instaláronse oito luminarias tipo led sobre columnas de nove metros, catro na propia glorieta e outras catro nas inmediacións da intersección.

O orzamento global ascendía inicialmente a 220.336,36€, sendo 21.534€ destinados a expropiacións e o resto á execución da obra. Finalmente a licitación pechouse por un prezo de 132.719,68.

09/10/2018 in Alcaldía, Tráfico, Vías e obras

Axentes da Policía Local interceptan a unha condutora que circulaba cun menor no coche e case multiplicaba por catro a taxa de alcol permitida legalmente

Axentes da Policía Local recibían ás 17:22 horas de este venres, día 5 de outubro, a chamada dun condutor que circulaba pola  N-550, en dirección a O Porriño, informando de que o coche que ía diante do seu estaba a facendo ‘zig-zag’ e,as veces, entrando no carril contrario.

Coa finalidade de  localizar inmediatamente este coche, que estaba a poñer en perigo a seguridade do  resto dos vehículos, os axentes da Policía Local mantiveron a chamada de teléfono en liña para que a persoa que alertara desta situación puidese informar de onde se atopaba en cada momento. Isto facilitou que o coche fose interceptado no quilómetro 154,800 da N-550.

Unha vez que o mesmo estivo parado, os policías comprobaron que no seu interior viaxaba un rapaz de 12 anos, fillo da condutora, unha muller de 52 anos a cal, sinalan os axentes, “amosaba claros síntomas de atoparse baixo a influencia de bebidas alcólicas, tendo que ser agarrada algunhas veces para que non caese”.

Sometida ás probas de alcoholemia, as mesmas deron un resultado que multiplicaba case que por catro a taxa legalmente establecida, polo cal os policías procederon á instrución de dilixencias pola suposta comisión dun delito contra a Seguridade Vial, pasando as mesmas a disposición do Xulgado de Garda.

Á vista do estado de embriaguez da condutora, os axentes realizaron xestións para levar ao rapaz cun familiar e, ao mesmo tempo, procederon a inmobilizar o coche no lugar.

Dende a Policía Local sublíñase o feito de que esta intervención fose realizada grazas á colaboración cidadá que, asegura, “é fundamental en situación coma esta para evitar que condutas semellantes poidan causar un accidente con graves consecuencias”.

06/10/2018 in Alcaldía, Tráfico