Novas

O Porriño celebra este venres e sábado o ‘1º Pinchonen@’, coa participación de Miri, de Masterchef5, a blogueira e cociñeira Inés Carcacía, e Noemí García, finalista de ‘La Voz Kids’

A concelleira de Xuventude, Lourdes Moure, a responsable de Festas, Soledad Girón, e o concelleiro de Limpeza, Orlando Mázquez, inauguraron este venres a 1ª edición do ‘Pinchonen@’, organizado a través da OMIX do Porriño, como parte da iniciativa de participación infantil e adolescente, enmarcada na candidatura do Porriño ao recoñecemento de Cidade Amiga da Infancia de UNICEF.

O Consello Municipal de Infancia do Porriño,  órgano  que  representa a tódolos nenos, nenas e adolescentes da vila, acordara no seu último Pleno, entre outras iniciativas, a  realización do  “Pinchonen@” con produtos saudables e “non tan saudables” durante as datas  14 e 15  do mes de setembro,  coincidindo coa antesala das Festas do Cristo.

Miri, de Masterchef5, a cociñeira Inés Carcacía e Noemí finalista de La Voz Kids

Este 1º ‘Pinchonen@’ empeza a andar cunha completa axenda de actividades que terán coma escenario a   ‘Carpa do Roxy’ que hoxe acolleu a devandita presentación coa presenza de Miri, concursante de ‘Masterchef5’-á que os seus fans poden seguir na súa conta de Instagram @mirimchef5-  e da porriñesa Noemí García, finalista de ‘La Voz Kids’, seguida do concerto infantil ‘Eu cociño, ti cociñas?’, do grupo Mamá Cabral.

Mañá, sábado, día 15, as actividades empezarán ao mediodía cun ‘Obradoiro de chocolates e galletas’, coa famosa cociñeira e blogueira Inés Caracía; ás 6 da tarde un Show Cooking, impartido por Miri e as 9 da noite Photocall, todo coa participación de Noemí Fernández.

As persoas interesadas en seguir case en directo  as actividades e o minuto a minuto deste ‘Pinchonen@’ poden facelo entrando no seu perfil de Facebook, creado para esta ocasión, www.facebook.com/pinchonenao.

14/09/2018 in Alcaldía, Cultura e festas, Educación e tecnoloxía, Emprego e formación

O Goberno local remata os traballos de mellora e reforma da zona do Torreiro da Forna, na parroquia de Budiño

A Concellería de Vías e Obras que dirixe Manuel Carrera, vén de facer realidade o compromiso que o propio concelleiro adquirira coas veciñas e veciños de Budiño, e rematou os traballos de reforma do Torreiro da Forna.

As obras abrangueron o axeitamento do propio torreiro, a pavimentación da zona a colocación de beiravías de formigón, a mellora da zona de aparcamento de vehículos, a situación dun paso peonil, ademáis da recollida de augas pluviais do Centro Cultural e a colocación dunha nova tubaxe de saneamento.

Manuel Carrera subliña o feito de que os traballos fixéronse con cargo ao Plan Concellos da Deputación de Pontevedra 2017 e que os mesmos contaron cun orzamento total de máis de 45.000€, “cos que non so recuperamos un lugar que é o centro das festas de San Blas, senón que melloramos e enriquecemos unha parte da parroquia de Budiño especialmente querida polos seus habitantes”.

11/09/2018 in Alcaldía, Vías e obras

“Comercio electrónico e medios de pagos seguros”, charla na Aula CeMIT do Porriño

A Aula da Rede de Centros para a Modernización e Inclusión Tecnolóxica da Xunta de Galicia, Rede CeMIT, do Concello do Porriño emite a través de videoconferencia a charla “ Comercio electrónico e medios de pagos seguros”, impartida pola “Escola Galega de Consumo.

A temática da mesma será o emprego xeneralizado das TIC fixo que se incrementara o denominado comercio electrónico, é dicir, a posibilidade de facer compras a través de internet, o que presenta moitas vantaxes sempre que se faga de xeito seguro.

Neste charla explícaranse os pasos a seguir para facer compras en internet dun xeito seguro e, especificamente, os aspectos máis importantes para evitar fraudes: identificacións de páxinas seguras, dos distintos medios de pago, posibilidade de abandonar a compra, etc. Así mesmo, analizaranse os dereitos específicos das persoas consumidoras no caso das compras a distancia

A acitvidade será retransmitida  o vindeiro día 17 de setembro en horario de 12:00 horas a 13:00 horas, dende a aula CeMIT do Porriño. As persoas interesadas en asistir deberán facer a súa reserva da praza na propia Aula CeMIT, no teléfono 986.338.217 ou ben enviando un correo electrónico a cemit.oporrino@xunta.gal.

11/09/2018 in Alcaldía, Emprego e formación

A 19ª edición de ‘Merca na rúa’ ofrecerá a fin de semana no Porriño centos de artigos, que van dende óptica a deportes, complementos ou calzado, cunhas rebaixas de entre o 50 e o 70%

O concelleiro de Comercio, Marcelino Coto, xunto coa xerente da Asociación de Comerciantes e Industriais do Porriño (ACIPOR), Noelia Conde, e membros da directiva da asociación presentaron  a 19ª edición de ‘Merca na rúa’, que se celebrará no centro do Porriño a vindeira fin de semana: sábado 8 e domingo 9 de setembro.

Marcelino Coto gabou a excelente saúde que ten esta feira de oportunidades e amosouse encantado de que estea tan preto de chegar ás vinte edicións. O concelleiro asegurou que a fin de semana o tempo acompañará ao evento e non terá que suspenderse coma, por mor da borrasca ‘Félix’ tivo que facerse coa anterior cita, “as previsións apuntan a que o sábado e domingo teremos bo tempo e invito a todas as veciñas e veciños do Porriño e dos concellos do redor que se acheguen ata aquí e, ademais de dar un paseo aproveiten as oportunidades que estarán á venda”.

Coto lembrou que o Concello , en edicións anteriores, o Concello asume os custes de alumeado, limpeza, os inchábeis para os cativos e a vixianza de seguridade dos postos, para que os expositores non teñan que recoller e desmontar os mesmos pola noite, unha labor de garda na que desempeñará un papel esencial a Policía Local.

Noelia Conde, pola súa banda, sinalou que as persoas que se acheguen a ‘Merca na rúa’ terán ofertas de óptica, complementos, zapataría, zapataría de cativos, deportes, mesmo lencería, en 20 postos e con rebaixas de entre o 50 e o 70 por cento.

A xerente de Asociación de Comerciantes salientou que a feira, que ocupará, como xa era tradicional, a rúa peonil do centro do Porriño, estará aberta o sábado de 10 da mañá a 9 e media da noite e o domingo de 11 da mañá a 8 e media da tarde, os dous días de xeito ininterrompido.

06/09/2018 in Alcaldía, Urbanismo, comercio e industria

A alcaldesa amosa a súa “disposición e devezo” de comparecer diante da Corporación, de novo voluntariamente, “como fixen moitas outras veces” para explicar polo miúdo a xestión económica do seu goberno

Tódolos membros do Goberno local do Porriño comparecerán se é preciso, coa alcaldesa á fronte, diante da Corporación e dos veciños para expoñer os gastos de cada unha das concellerías e tratar das facturas das mesmas, tal e como quedou claro este mércores nun Pleno extraordinario no que todos os integrantes do Goberno do Porriño votaron a favor da devandita comparecencia.

A alcaldesa, Eva García de la Torre, que non puido asistir ao Pleno por un problema de saúde, amosou a súa “absoluta disposición e devezo” de comparecer, de xeito voluntario, coma xa fixo o pasado mes de xaneiro, para explicar, de novo, polo miúdo, a xestión económica, os pagos realizados, as facturas rexeitadas e os motivos para cada unha das decisións que o Goberno local tomou nestes eidos.

García de la Torre lembra que “sempre o fixen cando o solicitou un grupo ou, seica, un concelleiro, para iso non é necesario, como vén de facer o Partido Popular, e sabe moi ben o seu presidente local,  pedir un Pleno extraordinario: basta con decímelo”.

A alcaldesa subliña que o responsable do PP do Porriño “fixo unha pantomima esixindo a miña comparecencia en Pleno” pois coñece o regulamento que indica que non é posible pedilo, senón que a rexedora comparece por vontade propia ante a Corporación, “coma xa amosei en reiteradas ocasións, moitas máis que o anterior alcalde, en cuxo equipo estaba  Manuel Alejandro Lorenzo”, actual presidente dos populares do Porriño.

Eva García de la Torre afirma que esta argallada do PP forma parte dun plan que ten coma obxectivo “atacar a miña honorabilidade: dunha banda pola vía xudicial e, agora, na Corporación, coma parte da súa estratexia electoral logo de catro anos nos que o Partido Popular do Porriño non fixo unha soa proposta para resolver os problemas das veciñas e veciños”.

Dentro desta “manobra de confusión eu podería preguntarlle a Manuel Alejandro Lorenzo sobre 1.700.000€ de gastos do goberno local do que el formaba parte, que se fixeron sen contratos e que levamos, hai pouco, a Pleno para o seu recoñecemento extraxudicial de débeda, pero nós non imos a entrar nese lamazal: estamos ocupados en traballar para as porriñesas e porriñeses e centrados nas súas dificultades e preocupacións  e por iso o de emporcallar deixámolo aos representantes do PP que son especialistas niso”.

05/09/2018 in Alcaldía

O Concello organiza, dentro da programación das ‘Festas do Cristo 2018’, o ‘1º Pinchonen@’, aprobado polo Pleno Infantil

A Concellería de Xuventude do Concello do Porriño a través da súa OMIX, impulsa a iniciativa de participación infantil e adolescente, enmarcada na candidatura do Porriño ao recoñecemento de Cidade Amiga da Infancia de UNICEF.
No tempo que se leva traballando conxuntamente con centros escolares no recoñecemento do Porriño de “Cidade Amiga da Infancia”, entre outros resultados acadouse a creación do ‘Consello Municipal de Infancia do Porriño’, órgano que representa a tódolos nenos, nenas e adolescentes deste concello.
Este órgano acordou no último Pleno, entre outras iniciativas, a idea de realización do “Pinchoneno’, con produtos saudables e “non tan saudables” durante as datas 14 e 15 do mes de setembro, coincidindo coa antesala das festas locais. Esta proposta logo de ser traballada nas aulas, e debatida no salón de plenos, foi aprobada por unanimidade no Pleno infantil do pasado mes de abril.
En resposta a esta demanda, dende a Concellería de Xuventude co apoio da Concellería de Festas levarase a cabo, a primeira edición deste ‘1º Pinchonen@’ dacordo co Pleno. Unha actividade especial, cun atractivo formato que, ademais, supón primeiro paso para tratar de consolidalo e acadar en futuras edicións a implicación do sector da hostalería e o comercio local.
Dende a Concellería de Educación sinálase que “agora o mais importante é dar resposta a esta iniciativa de participación infantil, enmarcada na candidatura do Porriño ao recoñecemento de Cidade Amiga da Infancia de UNICEF, tratando de atender as opinións, intereses e necesidades dos veciños e veciñas mais novos”.
O ‘Pinchonen@’ contará cunha completa axenda de actividades, que serán levadas a cabo na “carpa do Roxy”: entre outras, un concerto infantil, un show cooking, un obradoiro de cociña, un photocall ou agasallo.
Así mesmo, estará presente “Miri”, participante do 5º Masterchef-España, nos diversos talleres e actividades programadas para esas datas. Tamén estará Noemí Férnandez, segunda clasificada na final do programa ‘La Voz Kids’, veciña do Porriño, e tamén a famosa cociñeira e blogueira Inés Carcacía.
En relación cos obradoiros, dende a Concellería de Educación subliñase que: as prazas nos mesmos serán cubertas entre os interesados por rigorosa orde de chegada ao recinto no día da súa realización; as idades dos participantes serán desde os 7 ata os 14 anos; o Público que así o desexe poderá asistir ata completar aforo, 200 persoas máximo e o ‘Photocall’ para as dúas datas, non ten límite de aforo.
04/09/2018 in Alcaldía, Educación e tecnoloxía

A Policía Local, en colaboración coa Garda Civil, arresta a un individuo que incumpriu unha orde de afastamento obrigando a súa antiga parellla a esconderse no baño dunha cafetería

Axentes da Policía Local do Porriño, en colaboración con membros da Garda Civil, detiveron este domingo pasado, día 2 de setembro, a C.A.F.C. ,de 29 anos de idade,, polo incumprimento dunha orde de afastamento ditada polo Xulgado do Penal nº 1 de Vigo, segundo sentenza  firme, cometendo este individuo un presunto Delito de  Quebrantamento de Condena.

O detido atopábase preto da súa antiga parella quen tivo que esconderse no baño dunha cafetería do casco urbano do Porriño por medo a sufrir algunha agresión, motivo polo cal presentou a correspondente denuncia contra este suxeito.

O detido foi presentado este luns, día 3 de setembro diante do Xulgado de Primeira Instancia e e Instrución nº 3 do Porriño.

03/09/2018 in Alcaldía

A alcaldesa supervisa o remate dos traballos de recuperación, reforma e mellora da Escola da Galiña Azul, en Torneiros, nos que o Concello investiu máis de 37.000€

A alcaldesa vén de supervisar, persoalmente, o remate dos traballos de reforma e mellora da Escola Infantil A Galiña Azul de Torneiros, que o Concello acometeu cun orzamento de 37.577,53€, con cargo á liquidación do Consorcio Galego de Benestar.

Eva García de la Torre, que estivo acompañada pola concelleira de Educación, Lourdes Moure, comprobou que as obras abrangueron a retirada do perpiaño superior do inmoble, a colocación de novas baixantes, a reparación da caneta posterior e do comedor; a demolición de varios tabiques; a eliminación das filtracións de auga; arranxo oe muro de contención do xardín de xogos; substitución do pavimento; colocación dun novo pechamento metálico na entrada; amaño do xardín e o céspede; substitución dos zócolos; reparación de   xogos, elementos e bambáns; pintado das varandas, selado de fiestras ou a limpeza das fachadas cun tratamento de auga a presión.

A alcaldesa subliñou que a reforma, recuperación e reparación desta gardería era unha demanda “xusta”, longamente solicitada polas veciñas e veciños, país e nais e os responsábeis do centro, “e un compromiso meu, persoal, con eles”, indicou, afirmando que seguirá a demandar ao Goberno de Galicia a creación dunha nova gardería no Porriño, “porque  na Xunta saben perfectamente que somos o concello no que máis nenas e nenos nacen na provincia de Pontevedra e o segundo en crecemento vexetativo de toda Galicia”.

01/09/2018 in Alcaldía, Educación e tecnoloxía