Novas

O Concello colaborará con especialistas do PAC do Porriño para que alumnas e alumnas da vila aprendan a reaccionar ante un paro cardíaco

O Concello colaborará coa celebración do ‘Día Europeo de Concienciación do Paro Cardíaco’, impulsada dende o Punto de Atención Continuada (PAC) do Porriño.

Este xoves a alcaldesa, Eva García de la Torre, e a concelleira de Educación, Lourdes Moure, mantiveron unha xuntanza coas organizadoras deste evento, programado para o vindeiro 16 de outubro, que pretende chegar ás alumnas e alumnos dos centros dos concellos as que presta servizo o PAC: Mos, Salceda e O Porriño.

Unha das impulsoras desta celebración, a doutora do PAC Montserrar Rodríguez Cabaleiro, explicou á alcaldesa e á concelleira de Educación que o acto farase en colaboración grupo musical “As Maimiñas” e consistirá nunha actividade lúdica para concienciar ás rapazas e rapaces da importancia de saber que “so coas túas mans podes salvar vidas”, ‘As túas mans salvan vidas’, e lograr que adquiran os coñecementos básicos de reanimación para poder axudar e reaccionar nun caso de morte súbita.

A doutora Rodríguez salientou a importancia deste aprendizaxe dende os primeiros anos e de levar a mesma aos colexios, “polos que pasa o cen por cen da poboación” e nos que é posible que aprendan a técnica dunha reanimación cardiopulmonar (RCP), cómo actuar diante dun paro cardíaco e a quen chamar para pedir axuda.

A actuación dentro dos primeiros 5 minutos despois dunha parada cardíaca é transcendental e pode marcar a diferencia entre manter a unha persoa con vida ou que morra.

15/09/2017 in Alcaldía, Benestar, Educación e tecnoloxía, Emprego e formación

O vindeiro xoves celébrase o ‘Día Mundial do Alzhéimer’

O vindeiro xoves, día 21 de septiembre é o ‘Día Mundial do Alzhéimer’, que este ano celébrase co lema ‘Lembra quen soi’.

Con esta frase Afaga quere poner o acento tanto nas persoas que sofren alzheimer ou outra enfermidade neurodexenerativa, coma nos seus coidadores e familiares, que teñen que enfrontarse cada día a esta realidade.

Co gallo do ‘Día Mundial do Alzhéimer’ a asociación celebra toda unha serie de actos e actividades que poden consutarse entrando na súa páxina web www.afaga.com

14/09/2017 in Alcaldía, Benestar, Educación e tecnoloxía

A Policía Local está a levar a cabo unha estreita vixilancia do cumprimento da Ordenanza de Convivencia que contempla multas por non recoller os excrementos dos cans ou deixar refugallos fora dos contedores

As concellerías de Seguridade e Limpeza veñen de iniciar unha Campaña de Sensibilización e Concienciación Ambiental que abrangue, ademais, o coidado dos espazos públicos, tanto no casco urbano coma nas parroquias, sublimando a importancia da separación selectiva dos residuos.

O obxectivo é o de promover e potenciar o valor e a necesidade social da reciclaxe, potenciando  o papel activo das veciñas e veciños, facilitándolles, dende o Concello, a súa colaboración coa finalidade de mellorar a separación do lixo, xa na casa, así coma o correcto verquido dos  refugallos orgánicos que será, obrigatoriamente, en bolsas que teñen que deixarse nos colectores que o Concello ten para elo.

Ademais, como xa anunciara o concelleiro de Limpeza, Orlando Márquez, co gallo da colocación de parte das novas papeleiras en diferentes partes do Porriño,  a Policía Local está a realizar xa unha especial vixilancia da recollida por parte dos seus donos dos excrementos que os cans deixen nas rúas.

Neste eido, o novo xefe da Policía Local, Daniel Rodríguez,  subliña que a propia Ordenanza Municipal Reguladora da Convivencia Cidadá, Limpeza de Vías Públicas e Recollida de Residuos “contempla sancións de ata 1.500€ polo seu incumprimento”.

O novo xefe da Policía Local, logo de que se repetisen os casos de aparición fora dos lugares sinalados ou en días e horas que non son os regulamentados de desproveitos voluminosos, lembra que para a súa recollida “é preciso avisar ao Concello, fixando o día e a hora para que se faga a retirada, atopándose o Punto Limpo habilitado no Polígono da Granxa, de luns a venres,en horario de mañá”.

Tamén no caso de que se deixen estes refugallos voluminosos, coma mobles, restos de obras e sobrantes de materiais de construción ou electrodomésticos, fora dos lugares indicados, ou en horarios que non foran pechados co servizo municipal de Limpeza, os axentes da Policía Local procederán a realizar a correspondente denuncia.

14/09/2017 in Alcaldía, Cultura e festas, Limpeza, Parques e xardíns, Turismo

Este venres abre ao público no Centro Cultural Municipal a exposición fotográfica ‘Viaxando’

Dende o venres 15 de setembro, e ata o vindeiro 9 de outubro, como parte das actividades da programación das ‘Festas do Cristo 2017’,poderá visitarse na OMIX do Concello-situada na planta baixa do Centro Cultural Municipal-, a exposición de fotografía “Viaxando” que amosa os traballos presentados ao Premio de fotografía do mesmo nome.

Este Certame, conxuntamente coa exposición itinerante, está organizado por noveno ano consecutivo polas Oficinas de Información Xuvenil (OMIX) dos concellos do O Porriño , O Rosal, Tomiño, A Guarda, Baiona, Salceda de Caselas, Gondomar e o Espazo Xove de Tui dentro do traballo en rede que veñen realizando anos atrás.

Este ano participaron un total de 20 artistas de idades comprendidas entre os  12 a 30  anos e a foto gañadora foi ‘La Frontera entre el cielo y la tierra’, da guardesa Cristina Araujo.

14/09/2017 in Alcaldía, Benestar, Cultura e festas, Turismo

A ‘Carreira Nocturna’ de ciclismo das ‘Festas do Cristo’ será polo centro do Porriño o venes, día 29, dende as 8 da tarde

A ‘Carreira Nocturna’ de ciclismo, que forma parte da programación das Festas do Cristo, disputarase na data anunciada: o venres 29 de setembro, dende as 8 da tarde, pero será polo Centro do Porriño e non nas Pistas de Torneiros, como se anunciara.

As demais probas ciclistas manteñen os lugares, datas e horarios, adiantados na presentación das Festas do Cristo e que figuran nos programas oficiais: o sábado, día 16, ás 4 e media da tarde, nas Pistas de Torneiros, ‘Ciclismo Infantil’ e o domingo 1 de outubro, con saída ás 10 e media da mañá dende a Praza de Antonio Palacios, a ‘Festa da Bicicleta. Marcha popular’.

13/09/2017 in Alcaldía, Benestar, Cultura e festas, Deportes, Tráfico, Turismo

Agradecemento dende a Universidade de Vigo á Concellería de Medio Ambiente do Porriño pola labor contra a Vespa Velutina

A profesora María do Carmen Seijo, profesora titular de Facultade de Ciencias da Universidade de Vigo, responsábel da liña de traballo relacionado co seguimento e control da expansión da Vespa Velutina, vén de agradecer ao Concello do Porriño e, en concreto á Concellería de Medio Ambiente, dirixida por Marcelino Coro, “a súa colaboración no trampeo e mostraxe de primavera desta especie invasora, xa que permite reducir a poboación de raíñas encargadas da creación de novos niños, e polo tanto da expansión da especie”.

A devandita campaña de trampeo, que abrangueu dende o mes de marzo ate mediados de maio, consistiu na colocación de 200 trampas con dous atraentes específicos diferentes, “logo da primeira quincena, na que optouse só polo atraínte que amosara maior eficacia”.

Ao final da campaña, sinala Marcelino Coto, dacordo cos datos de Viveiros Adoa, empresa encargada polo Concello para levar adiante a mesma, o número total de exemplares deste insecto eliminados foi de 3.800, “o 85% deles raíñas fundadoras”, aproximadamente unas 3.300, exemplares que foron enviados, para o seu estudo, á Facultade de Bioloxía da Universidade de Vigo.

O concelleiro de Medio Ambiente lembra que as trampas, que se situaron en todas as parroquias do Porriño, e que se renovaban cada 15 días, tiñan coma primeiro obxectivo, tal e como anunciara ao inicio da campaña, “a captura das raíñas fundadoras dos niños xusto ao inicio da primavera, época na que a Vespa Velutina é máis prolífica” e, neste eido, o resultado é “moi satisfactorio”, o cal non quere dicir que se baixe a garda, senón ao contrario, “seguiremos insistindo e traballando para reducir a influencia e o impacto desta especie invasora”.

13/09/2017 in Alcaldía, Urbanismo, comercio e industria

Preto de 80 actos, actividades, actuacións ou probas deportivas, propostas do programa das ‘Festas do Cristo 2017’

Preto de 80 actos, propostas, actividades, actuacións ou competicións deportivas, están previstas durante a duración das Festas do Cristo deste ano que abrangue máis aló dos días centrais das mesmas chegando ata o vindeiro 1 de outubro, data na que está prevista a celebración do Encontro Internacional de Aeromodelismo, por suposto en Pontellas.

Segundo salientou este martes a alcaldesa, Eva García de la Torre, na presentación do programa, as Festas do Cristo 2017 queren “chegar a todas as veciñas e veciños e atender a a diferentes sensibilidades e os gustos”, co único obxectivo de que os asistentes ás mesmas pasen unhas horas de lecer.

Acompañada por representantes de  ‘Montando O Cristo’, ‘O Cristo do Rap’ e a cantante local Xoana, que terán un importante papel nas propostas desta edición das Festas, a alcaldesa subliñou que nas mesmas haberá exposicións, teatro, concertos- coma os de Antonio Serrano, Argonad Band, Xoana e MQM Band, Uxía & Javier Ruibal ou Camela; pasando por DJ, bandas de música-coma as de Vincios, a Agrupación Musical do Rosal, A Cultural de Arcade ou a Unión Musical de Valladares-, charangas, unha Festa Medieval, , orquestras, espectáculos de humor, coma o que protagonizará Cándido Pazó, espectáculos para cativos, xigantes e cabezudos, o Festival da Cultura Urbana ‘O Cristo do Rap’, o Festival de Rock ‘Montando o Cristo’ e os actos relixiosos dende o día 22, co punto central ca Procesión do Santo Cristo da Agonía o día 24.

García de la Torre salientou a importancia do deporte, “con maiúsculas”, nas Festas do Cristo deste ano, con encontros de Balonmán, feminino e masculino, Patinaxe, Fútbol, co Torneo Festas do Cristo, Tenis, Kung-Fu, Atletismo, Gimnasia Rítmica, Baloncesto, Aeromodelismo ou Ciclismo.

En relación con esta última disciplina, a alcaldesa quixo acabar con todas as dúbidas e comentarios xurdidos nos últimos días e subliñou que “disputaranse todas as probas e concentracións tradicionais”: o sábado, día 16, ás 4 e media da tarde, nas Pistas de Torneiros, ‘Ciclismo Infantil’; o venres día 29, no mesmo lugar, ás 8 da tarde, a ‘Carreira Nocturna Festas do Cristo’ e o domingo 1 de outubro, con saída ás 10 e media dende a Praza de Antonio Palacios, a ‘Festa da Bicicleta. Marcha popular’.

A rexedora, logo de insistir en que as Festas do Cristo “queren integrar a todo o mundo”, repetiu que “son para que todos bailemos, para que esteamos en moitos lugares, para que non paremos, para que nos movamos e para que o pasemos ben”.

12/09/2017 in Alcaldía, Benestar, Cultura e festas, Deportes, Educación e tecnoloxía, Parques e xardíns, Tráfico, Turismo

A alcaldesa aiste no CEIP Fernández López ao primiero día de clase en Infantil e Primaria

A alcaldesa, Eva García de la Torre, xunto coa concelleira e Educación, Lourdes Moure, asistiu este luns no CEIP Fernández López ao inicio das clases en Infantil e Primaria. Acompañadas polo director do centro, Benito Rodríguez, estiveron nunha das clases de Primaria na que aproveitaron para falar coas cativas e cativos que afrontaban hoxe o seu primeiro día da ‘Volta ao colexio’.

A alcaldesa subliñou que nos centros educativos do Porriño cursan os seus estudos uns 520 alumnas e alumnos de Infantil e 1.200 de Primaria e indicou que o número de estudantes medrara neste curso en preto de 180 nos colexios da vila, “un dato que reafirma o feito de que O Porriño é o concello que máis medra de toda Galicia”.

Eva García de la Torre insistiu, unha vez máis, nas necesidades que teñen os centros educativos porriñeses en xeral e, en concreto a esixencia “urxente” de mellorar e ampliar as instalacións do CEIP Fernández López e esixiu, de novo, ao Goberno de Galicia, “que ten as competencias en Educación”, que atenda esta demanda.

A alcaldesa reiterou que “o Goberno local seguirá a facer todo o que estea na súa man” para que as profesoras e profesores dos colexios do Porriño teñan todos os recursos que precisen para que a formación que imparten “siga tendo este altísimo nivel”, e para que as rapazas e rapaces dispoñan de canto sexa preciso para a súa educación.

García de la Torre lembrou con emoción a María Ferreira, a novísima profesora do Colexio Santo Tomás, quen perdeu a vida nun accidente no Angliru, e trasladou a súa familia e aos seus amigos “todo o meu agarimo e o apoio, meu, de toda a Corporación e todas e cada unha das veciñas e dos veciños do Porriño”.

12/09/2017 in Alcaldía, Educación e tecnoloxía, Emprego e formación, Igualdade

O Concello acomete unha nova mellora do saneamento que darña servizo a 20 vivendas de tres barrios da parroquia de Pontellas

A Concellería de Vías e Obras empezou hai tres semanas, con medios propios, os traballos de saneamento que dará servizo a 20 vivendas dos barrios de O Corzón, A Arrotea  e A Lameira, na parroquia de Pontellas, e que conta cun orzamento duns 30.000€

Segundo subliña Manuel Carrera, o prazo de remate das obras, que contarán con operarios da Deputación de Pontevedra, será de 2 meses e, á marxe da labor de saneamento tamén acometerase o ancheamento e asfaltado de estradas e camiños destas bisbarras, parte do cal correrá a carga da Consellería do Medio Rural do Goberno de Galicia.

Antes da realización do asfaltado, sinala o concelleiro de Vías e Obras, realizarase o cambio de mangueiras das traídas veciñais e, logo de que remate do proxecto que está a elaborar a Deputación de Pontevedra, farase a conexión definitiva a Rede Xeral de Saneamento.

07/09/2017 in Alcaldía, Vías e obras

Todo listo para a celebración da XVII edición de ‘Merca na rúa’, este sábado, día 10, e o domingo, 11 de setembro no Porriño

‘Merca na Rúa’ ofrecerá artigos rebaixados “nunha cantidade tal que non sería posible atopalos a este prezo nas tendas”. Isto subliñou este mércores a presidenta da Asociación de Comerciantes e Industriais do Porriño (ACIPOR).

Juana Pérez, xunto co concelleiro de Comercio , Marcelino Coto, e a xerente da asociación, Noelia Conde, presentou este mércores a XVII edición desta cita que, coma subliñou o concelleiro, “é xa un referente dentro e fora da nosa vila”.

Un total de 20 establecementos ofrecerán artigos deportivos, complementos, calzados, produtos de óptica, roupa para cativos ou confección, nos 22 postos que estarán abertos ao público na Praza de Antonio Palacios e na rúa peonil do Porriño, de 10 da mañá a 9 e media da  da noite, ininterrompidamente, o sábado, día 10, e de 11 da mañá a 8 e media da tarde, o domingo, 10 de setembro.

Marcelino Coto salientou o feito de que ‘Merca na rúa’ ocupe, de novo, o seu espazo tradicional e, unha edición máis, “e con esta xa son 17”, reafirmou o apoio do Goberno local a esta “estupenda iniciativa de ACIPOR”.

O concelleiro lembrou que haberá todo un programa de actividades para as nenas e nenos, “para que os seus país e avós poidan comprar con tranquilidade”, entre elas inchábeis, na Praza de Antonio Palacios.

Coto, quen invitou a todo o mundo a achegarse ao Porriño esta fin de semana, comentou que o Concello asume, tamén, os custes de alumeado, megafonía, limpeza, colocación de probadores, as atraccións para os pícaros e a “vixianza de seguridade dos postos, para que os expositores non teñan que recoller e desmontar os mesmos pola noite”, unha labor de garda na que desempeñará un papel esencial a Policía Local.

O concelleiro subliñou o “excelente” momento que vive o comercio local, indicando que “o 90% dos locais e baixos comerciais” do Porriño están xa ocupados e que baixou, de xeito notable, o número de negocios que pechan e que, “aínda neste caso son substituídos por outros do mesmo ou de outro sector”.

O concelleiro puxo coma exemplo da súa afirmación o “éxito” de todo o “que se fai no Porriño funciona, dende o Pinchorriño, pasando por Merca na rúa, que precisa dúas edicións anuais pola súa grande aceptación, e rematando na Festa dos Callos, que este ano establecerá unha nova marca de participación”.

06/09/2017 in Alcaldía, Benestar, Turismo, Urbanismo, comercio e industria