Novas

Porriño adxudica a “Urbaser” o contrato de limpeza viaria e acorda adherirse ao Programa contra Velutina

Por maioría, a Corporacion local do Porriño acordou hoxe volver a adxudicar o contrato de limpeza viaria que agora será unha concesión que desempeñará a empresa “Urbaser S.A”. O acordo adoptouse con 14 votos favorables (PSOE+PP+EuSon+UDDL) e as abstencións dos dous concelleiros do BNG. Tan só faltou ao pleno, o voceiro de EU Son, Pedro Ocampo.

A proposta que se levou ao pleno baseabase na resolución previa da Mesa de Contratación celebrada esta semana e nos informes solicitados ao Tribunal de Contratación Administrativa de Galicia (TACGAL) e á consultora “Lagares e Oca”. En base a eles, decidiuse retirar do concurso a “Ascan” que foi a primeira adxudicataria, así como á firma “Eulen” e polo tanto recalcular e propoñer en favor da segunda clasificada na licitación, a firma “Urbaser”.

Outro dos puntos da orde do día deste pleno extraordinario celebrado hoxe foi acordar por unanimidade a adhesión do Concello do Porriño ao Programa Galego de Vixiancia e Control da Vespa Velutina, suscrito pola Vicepresidencia da Xunta de Galicia e a Federación Galega de Municipios e Provincias (FEGAMP).

O Programa garante a retirada e destrucción dos niños de velutina coa colaboración do Concello. Serán retirados por persoal da empresa pública “SEAGA” sempre que estean a menos de 25 metros do chan en un prazo de 5 días laborais. O Concello de Porriño recibirá e canalizará as chamadas dos veciños que alerten da existencia de niños e comunicará a información á Xunta de Galicia. “Para o Concello supón un aforro de gasto anual importante dado que era a administración municipal ata de agora a que asumía esa tarefa”, manifestou o concelleiro de Medio Ambiente Sergio Casal, na defensa do punto.

Por último, neste pleno ademais realizouse o sorteo mediante ordenador para a designación de membros das mesas electorais para os comicios autonómicos do vindeiro 5 de abril. As concelleiras Blanqui Francés, Cami Moreira e Ana María Martínez Paradela actuaron de testemuñas.

06/03/2020 in Alcaldía, Limpeza, Parques e xardíns, Urbanismo, comercio e industria

Programación do Concello polo 8M: presentase “Sementamos Igualdade”, manual práctico de bos usos contra o machismo

Na programación do Concello do Porriño co gallo do 8M, Día Internacional da Muller, datouse para este venres 6, a partir das 20 horas, a presentación de “Sementamos Igualdade”, un manual práctico de bos usos para detectar o machismo e saber cómo actuar contra él.
Este manual distribuese nos centros educativos e nos comercios da vila, por iniciativa da Concellería de Igualdade que dirixe Cami Moreira.

Tratase dunha publicación coordinada por Llerena Perozo Porteiro, plantexada como unha guía útil para todas as idades. “Con este manual pretendemos facer chegar ao maior número posible de persoas a información básica para empezar a cambiar actitudes e comportamentos, así como o coñecemento preciso para ser quén de recoñecer e distinguir o machismo e saber actuar ante él”, segundo explica a autora.

A guía, de 60 páxinas, está dividida en dous bloques: un primeiro adicado á igualdade como unha tarefa en común; e un segundo sobre a violencia de xénero: como se manifesta, pautas para a súa indetificación e como actuar fronte dela.

Na presentación do manual “Sementamos Igualdade, que se celebrará no Centro Cultural Municipal (20 horas), con entrada libre e de balde ata completar aforo, estarán presentes a Concelleira de Igualdade, Cami Moreira e a autora da guía, Llerena Perozo Porteiro.

05/03/2020 in Igualdade

A XXII edición da feira “Merca na Rúa” que se celebrará na fin de semana, contará con 31 stands

Sergio Casal, concelleiro de Comercio invitou á veciñanza porriñesa e doutros concellos da contorna a acudir á XXII edición da feira de oportunidades “Merca na Rúa” que se vai celebrar na vindeira fin de semana. “Haberá unos prezos tan baratos que case que habería que darlle propina aos comerciantes”, indicou o edil.

Na zona peonil instalaranse 31 stands de 23 establecementos porriñeses que participan neste certame que organiza a Asociación “ACIPOR”. O sábado en horario de 10 da mañán a 9 da noite; e o domingo de 11 da mañaán a 8 da tarde.
“Haberá unha grande oferta de descontos en artículos de confección, calzado, óptica, complementos, regalos e outros que estarán representados” indicou Noelia Conde, xerente de “ACIPOR”. Ademais mentres os maiores realizan as súas compras, haberá unha zona de xogos, ocio e animación infantil.

A directiva da asociación local de comerciantes agradeceu “a implicación, un ano máis, do Concello do Porriño e particularmente a colaboración das Concellerías de Comercio e de Cultura e Festexos, para que este evento sexa posible como ven acontecendo dende 2009”, manifestou Noelia Conde.

05/03/2020 in Alcaldía, Cultura e festas, Urbanismo, comercio e industria

O Porriño celebrará pleno extra o venres 6

O Porriño vai celebrar este venres 6 (ás 13 horas) un pleno extraordinario da corporación local para acordar, entre outros asuntos, a adxudicación do servizo de limpeza viaria, despois dun longo procedemento. Asimesmo nesta sesión, a corporación acordará adheririse ao Programa Galego contra a Velutina e, finalmente, realizará o habitual sorteo para a composición das mesas electorais co gallo dos comicios autonómicos do vindeiro 5 de abril.

En relación co contrato de limpeza viaria, a proposta que vai a pleno da Corporación é a nova adxudicación do mesmo. Previamente unha mesa de contratación celebrada hoxe mércores, unha vez recibidos os informes solicitados ao Tribunal de Contratación Administrativa de Galicia (TACGAL) e á consultora “Lagares e Oca”, decidiu retirar do concurso a “Ascan” que foi a primeira adxudicataria, así como á firma “Eulen” e polo tanto recalcular e propoñer en favor da segunda clasificada na licitación, a firma “Urbaser”.

No que atinxe ao Programa Galego de Vixiancia e Control da Vespa Velutina, o Concello do Porriño plantexa adherirse ao convenio suscrito pola Vicepresidencia da Xunta de Galicia e a Federación Galega de Municipios e Provincias (FEGAMP).
O Programa garante a retirada e destrucción dos niños de velutina coa colaboración do Concello. Serán retirados por persoal da empresa pública “SEAGA” sempre que estean a menos de 25 metros do chan en un prazo de 5 días laborais. O Concello de Porriño recibirá e canalizará as chamadas dos veciños que alerten da existencia de niños e comunicará a información á Xunta de Galicia.

04/03/2020 in Alcaldía, Limpeza

“SOS Porriño” reparte 3.000 kgs de alimentos en axuda para 160 familias

Esta tarde rematará o reparto de 3.000 kilos de alimentos non perecedoiros que realiza “SOS Porriño” no seu almacén, situado no Multiusos de Torneiros. “Esta axuda humanitaria alcanza a 160 familias e polo tanto aproximadamente a máis de 600 persoas que teñen dificultades económicas”, segundo explicou David Alonso, concelleiro responsable de Servizos Sociais.
Este reparto de alimentos é mensual e realizase entre familias cuias necesidades son previamente valoradas e comprobadas polos técnicos do departamento de Servizos Sociais.

A recollida de alimentos para “SOS Porriño” mantense de xeito continuado e conta coa solidariedade de diversos colectivos. David Alonso suliñou “o gran pulo que supon para o Banco SOS Porriño as aportacións dos deportistas”. O concelleiro de Servizos Sociais que tamén é responsable da delegación de Deportes ten establecido que nos diferentes eventos que se organizan, os participantes acheguen un kilo de alimentos non perecedoiros como volverá a acontecer coa carreira “Porriño 10K” que vaise celebrar o domingo 15 de marzo.

Reparto de camas articuladas e guindastres

Por outra banda, o Concello do Porriño adquiriu cunha partida de 15.000 euros, 10 camas articuladas e 5 guindastres para movilización de persoas con movilidade reducida ou nula, que se están a repartir en préstamo a familias que o solicitan. Previamente os técnicos de Servizos Sociais realizan unha valoración de cada caso.
O concelleiro de Servizos Sociais informa que actualmente ainda hai dispoñibles no almacén do Multiusos de Torneiros para quen queira solicitar e reuna as condicións requeridas.

04/03/2020 in Alcaldía, Servizos sociais

Unha decena de deportistas porriñeses galardoados na Gala do Ciclismo Galego polos seus éxitos no 2019

Unha decena de deportistas porriñeses foron protagonistas da Gala do Ciclismo de Galicia celebrada en Pontevedra onde resultaron premíados o que constitue un recoñecemento da Federación Galega e das autoridades da comunidade autónoma ao potencial do ciclismo porriñés.

Foron Ana María Gónzalez, Laura Mira, Jorge Punzón, Marcial Rodríguez, Chus Barros, Santos Lemos e cinco integrantes do equipo porrñés “A.D. Avanza”: Xoel Montes, Senén Bastos, Uxía Soto, André Martínez e Borja Fernández.

Todas elas e eles foron galardoados polos seus títulos autonómicos e nacionais nas súas respectivas categorías e modalidades competitivas que van dende ciclismo en ruta, ciclocross ata bicicleta de montaña.

A homenaxe federativa corrobora o recoñecemento que previamente, ao longo do ano e con diferentes mostras, realizou o propio Concello do Porriño a estes deportistas.

Non podemos esquencer que Jorge Punzón foi pregoeiro das Festas do Cristo, as principais da cidade, ou que Ana María Gónzalez foi a madriña da última edición do Triatlón Concello do Porriño.

Ademais Laura Mira e Marcial Rodríguez, polos seus recentes triunfos nos campeonatos de España e de Galicia de ciclocross (éste último celebrado no Porriño) xa foron obxeto xunto cos integrantes do club A.D. Avanza dunha recepción ofrecida na casa consistorial polo concelleiro de Deportes, David Alonso.

03/03/2020 in Deportes

Por terceiro ano consecutivo realizase o intercambio de escolares franceses e porriñeses, promovido pola Concellería de Educación

Por terceiro ano consecutivo o Concello do Porriño realiza intercambios escolares ó abeiro do irmandamento que hai tres anos suscribiouse coa Municipalidade de Le Fronçac, por iniciativa de Lourdes Moure, concelleira de Educación que se materializou en 2017. A maiores, a partir de este ano, vanse consumar outros dous irmandamentos que canalizarán máis intercambios de escolares porriñeses con Croacia e Italia, segundo a planificación que leva a cabo a concelleira Moure Varela.

Como consecuencia, unha delegación de alumnos de secundaria da municipalidade francesa xa se atopa no Porriño onde permanecerán ata o venres 6 de marzo. Dende a súa chegada o pasado venres 28, xa fixeron un treito do Camiño Portugués a Santiago, entre Tui e Porriño. Hoxe martes realizaron unha visita a Santiago de Compostela e nos vindeiros días teñen programadas diversas actividades culturais e de lecer.
Como é habitual, estes alumnos franceses reciben aloxamento nas casas e coas familias de alumnos porriñeses dos centros de ensino que participan: “IES Ribeira do Louro”, “Santo Tomás” e “Hermanos Quiroga”. Os estudantes porriñeses realizarán a viaxe de devolución de visita a Francia, no vindeiro mes de abril.

A vista do éxito acadado por estes intercambios e de que cada vez son máis os alumnos e familias que queren participar, a concelleira Lourdes Moure avanzou que o Concello “está a darlle unha volta a este programa”.
A concelleira indicou a pais, profesores e alumnos que “haberá que idear unha fórmula de colaboración co Concello que ata de agora corre con todos os gastos o que, lóxicamente, limita o número de participantes que doutro xeito podería ser maior”.

03/03/2020 in Educación e tecnoloxía

Obradoiro para mulleres: “Colga o teu mandil”

Esta tarde, a partir das 18 horas, comeza no Centro Cultural Municipal, a primeira das actividades programadas polo Concello do Porriño para este mes de marzo co gallo da celebración do 8M, Día Internacional da Muller.  Tratase dun obradoiro titulado “Colga o teu mandil”, con entrada libre e de balde ata completar aforo.

Na actividade que durará ata as 20,30 horas, as mulleres participantes axeitarán mandís con frases ou lemas reivindicativos que logo serán colgados na zona peonil. Os lemas deberán encaixar co enfoque reivindicativo deste ano para 8M, a propósito da economía dos coidados, da carga de traballo que soportan as mulleres na atención aos dependentes, crianzas e a necesidade da corresponsabilidade no fogar.

O obradoiro continuará tamén mañá martes no menos horario e lugar.

02/03/2020 in Alcaldía, Igualdade

A “Porriño 10-K” supera os 600 inscritos camiño de acadar os 1500 participantes

Ao longo deste luns xa superouse a barreira dos 600 inscritos “o que supón un bo ritmo”, segundo as previsións da Concellería de Deportes e do Club de Atletismo Porriño que agardan nestas dúas semanas que medre o número de participantes na segunda edición da “Porriño 10k”. Esta carreira pedestre pretende establecer un novo record de inscricións. En 2019 rexistrou 1385 participantes e a pretensión do Concello e do Club de Atletismo é acadar os 1500.

A proba terá lugar o 15 de marzo. A inscrición realizase a través da páxina web de championchipnorte.com.

Nas dúas imaxes adxuntas amosamos a camiseta técnica de asas (de cor laranxa) que recibiran como agasallo todos os inscritos. Que previamente deberán aportar un kilo de alimentos non perecedoiros para “SOS Porriño”. E a sudadeira de cor limón será para os cen voluntarios que colaborarán a manter a orde durante a proba.

David Alonso, concelleiro de Deportes do Porriño manifestou que o traballo de ese cento de voluntarios “temos que agradecelo de xeito moi especial porque son vitais para garantir a seguridade de todos os participantes”.

“Porriño 10K” naceu en 2019 como consecuencia da desaparición da sua predecesora, a “Interrunning”. Este ano vanse mellorar diversos eidos na loxística da proba.
A zona de saída e meta que estará sitúada na praza do Concello tamén acollerá un espazo de avituallamento onde todos os participantes recibirán alimentos diversos elaborados coa colaboración das panaderías porriñesas. Tamén haberá un arco de meta con leds, un camión pódium e unha pantalla xigante para seguir a retransmisión en “streaming” que se realizará da proba con duas cámaras movis e outra fixa na praza.

02/03/2020 in Alcaldía, Deportes

Aprobado o IV Plan Municipal de Igualdade entre Mulleres e Homes do Porriño

O vindeiro mércores 11 de marzo será presentado públicamente o IV Plan de Igualdade entre Mulleres e Homes do Porriño nun acto que se celebrará no Centro Cultural Municipal ás 20 horas,

A Corporación Local aprobou por unanimidade no recente pleno de febreiro, este IV Plan de Igualdade entre Mulleres e Homes do Porriño que estará vixente para o período 2020 / 2024.
Na súa exposición, Cami Moreira, concelleira de Igualdade explicou que “o Concello como administración máis preto da cidadanía ten un papel relevante no fomento de oportunidades entre mulleres e homes como medio para a construción dunha sociedade máis xusta”.

Segundo argumentou”parte da función dende unha administración pública tamén é impulsar políticas activas que garantan a igualdade real e efectiva entre mulleres e homes.”, dixou Cami Moreira.

Este IV Plan Municipal de Igualdade de Oportunidades de Mulleres e Homes aborda 7 eixes de intervención con 54 medidas de acción; como son:
+A Promoción da Igualdade na Política Municipal.
+Emprego e Conciliación da Vida Persoal, Laboral e Profesional.
+Coeducación, deporte e calidade de vida.
+Urbanismo, Mobilidade e Seguridade.
+Atención a situacións de vulnerabilidade.
+Empoderamento e participación.
+A Violencia de Xénero

A responsable da Concellería de Igualdade explicou que “dende este concello, hai unha clara aposta por medidas de carácter estrutural con vocación transformadora e de permanencia que permitirán incorporar a perspectiva de xénero a toda a política municipal”. “Por iso agardamos a implicación de todas e todos, sabendo que esta é a receita para chegar á efectividade dos resultados”, engadiu Cami Moreira na súa exposición ante a Corporación Local.

A concelleira solicitou a todos “fagámonos cómplices e aportemos para que un Porriño igualitario, inclusivo e intolerante coas inxustizas e co machismo, sexa posible” manifestou.

Por último Cami Moreira lembrou e citou a Concepción Arenal: “A sociedade non pode en xustiza prohibir o exercicio honrado das súas facultades á metade do xénero humano”.

01/03/2020 in Alcaldía, Igualdade