Novas

Preto de 350.000€, que son sufragados na súa totalidade polo Concello, son os que se investirán en levar a rede municipal de abastecemento de auga ao barrio do Contrasto, en Torneiros.

As obras, que se axustan exactamente ás instrucións da Dirección Xeral de Saúde Pública, dependente do Goberno de Galicia, comezaron esta mesma semana e, segundo salientou a alcaldesa, Eva García de la Torre, estarán rematadas no prazo de 3 meses o cal suporá que a finais do verán “todas as vivendas desta zona do Porriño terán auga da traída”.

García dela Torre cumpre deste xeito o compromiso, persoal, que asumira coas veciñas e veciños afectados logo da aparición de refugallos de lindano, tal e coma asegurara nas diferentes xuntanzas que mantivo con eles ao longo dos meses pasados.

O Concello, lembra a alcaldesa, asumiu ata hoxe a totalidade dos custos das accións que se levaron a cabo no Contrasto: o subministro de auga para o consumo diario,a colocación nas vivendas afectadas depósitos de 1.000 litros -nalgún caso ata dous-“que se enchen cando o demandan as veciñas e veciños”; a contratación dos servizos dunha empresa especializada en tratamento da terra na que apareceron restos de lindano, “seguindo as indicacións, criterios e normas do Servizo de Xestión de Residuos e da Administración Autonómica”, ou o dobre asfaltado da zona na que se realizaron as obras do saneamento no seu día.

Polo que respecta ao proxecto para levar a rede municipal de saneamento ata O Contrasto, o Consorcio de Augas do Louro, do cal a alcaldesa do Porriño é a presidenta, rematara o mesmo no pasado mes de decembro, apenas un mes despois de que aparecesen os restos do lindano, e  presentouse á Xunta para a súa avaliación e autorización.

A alcaldesa do Porriño, Eva García de la Torre, presentará unha querela por un delito de calumnias contra o diario ‘La Voz de Galicia’ e o xornalista autor da información publicada no mesmo ,este sábado día 9 de xuño, que ten coma titular “El gobierno de O Porriño vuelve a contratar a dedo al asesor que motivó la condena de Francés”.

Garcia de la Torre subliña que “o contido desta publicación é claramente constitutivo dun delito de calumnias dado que imputa ao Goberno local e aos seus membros a comisión dun delito de prevaricación” ao asegurar que fixo unha contratación “a dedo”.

Neste procedemento, enfatiza a alcaldesa, seguiuse exactamente o establecido pola Lei de Contratos do Sector Público: a decisión pasou, primeiro, por unha mesa de contratación integrada polo secretario do Concello do Porriño, unha delegada do interventor do mesmo, a arquitecta municipal, a propia alcaldesa e unha funcionaria municipal que actúa de secretaria da mesa e levanta acta da reunión.

Neste caso, en concreto, houbo catro ofertas iniciais, unha das cales  foi desbotada por non presentarse seguindo o procedemento regulamentado, considerándose as outras tres. Unha vez sometida á mesa de contratación, a proposta da mesma trasladouse á Xunta Local de Goberno, órgano na que a alcaldesa delegou, “dende o comezo do mandato do actual Goberno local”, as competencias para decidir sobre licencias de construción, licencias de actividade, expedientes sancionadores de Urbanismo e Medio Ambiente e contratación,  decisións ás que “invitei a a participar cando cheguei á Alcaldía ao resto dos grupos políticos da Corporación”.

É a Xunta Local de Goberno, na que intervén así mesmo o secretario do Concello dando fe, e da que se levanta acta, coma se fai na Mesa de Contratación, a que toma a decisión final da adxudicación.

Todo o procedemento “é totalmente público” e calquera persoa o pode consultar tanto no propio Concello coma, de xeito inmediato, na plataforma dixital de ‘Contratos Públicos de Galicia, “algo que á posible facer nuns minutos dende calquera lugar cun ordenador, unha tableta ou mesmo un teléfono móbil”.

Á vista disto, a realidade é que o xornalista “podendo ter acceso á totalidade do expediente, preferiu non contrastar a información e imputar ao Goberno local a comisión dun delito doloso, saltándose a verdade e sabendo que o facía”, subliña Eva García de la Torre quen engade, que a intencionalidade desta calumnia é aínda máis evidente considerando que este ‘informador’ decidiu publicar este artigo “a pesares de que posto en contacto telefónico comigo expliqueille polo miúdo, e paso a paso, todo o procedemento”.

A alcaldesa, Eva García de la Torre, xunto coa concelleira de Seguridade, Lourdes Moure, e veciños da ‘Zona Cero’ do Contrasto mantiveron este venres unha xuntanza en Ourense co presidente da Confederación Hidrográfica do Miño-Sil, coa finalidade de tratar, entre outros temas, a situación actual das vivendas deste lugar da parroquia de Torneiros, na que apareceron refugallos de lindano, e entremediar en relación co selado dos pozos das mesmas. 

Francisco Marín escoitou os argumentos das veciñas e veciños e as explicacións da alcaldesa, quen solicitou que a Confederación Hidrográfica non procederá a selar os pozos ata que non se rematasen as obras que van a levar a rede municipal de abastecemento de auga ata todas as casas do Contrasto.

Marín amosou o seu interese polas opinión que se lle expuxeron e expresou a súa conformidade con que aqueles veciños que non teñan problemas coa calidade da auga, poidan legalizar os seus pozos.

Rematada a reunión, a alcaldesa convocou unha xuntanza con todas as veciñas e veciños o vindeiro martes, día 12, ás 8 e media da tarde, na Asociación San Salvador de Torneiros, para “explicarlles polo miúdo o contido da reunión co presidente da Confederación Hidrográfica, escoitar as súas propostas e respostar ás súas preguntas”.

A Dirección Xeral de Calidade Ambiental e Cambio Climático do Goberno de Galicia, xunto co Concello do Porriño presentarán a candidatura ao proxecto ‘LIFE- Phytomanagement of peri-urban soils contaminated by lindane residues’ (‘Fitomanexo de chans periurbanos contaminados con residuos de lindano’), da Unión Europea.

O mesmo, no que participan a Universidade de Santiago de Compostela (USC), o Consello Superior de Investigacións Científicas (CSIC) e a Confederación Hidrográfica do Miño-Sil, ten coma obxectivos conquerir fondos e colaboración da Unión Europea para o tratamento, mediante ‘fitorremedazón’ dos terreos do Porriño contaminados por lindano; redacción dun protocolo de alerta temperá nos casos de detección de refugallos de lindano; xestión integral dos solos contaminados por estes refugallos; elaboración dun mapa preciso de detección de lindano en zonas periurbanas, ademais dunha xestión colaborativa na planificación urbana dos chans remediados.

A alcaldesa, Eva García de la Torre, que dende o primeiro intre asumiu a xestión e dirección das xestións feitas dende o Concello para atender ás veciñas e veciños do Contrasto afectados pola aparición de lindano, vén de asinar “o meu compromiso e o do Goberno local de contribuír, coma ata o dagora, cos medios necesarios para a posta en marcha deste proxecto, facilitar o acceso aos especialistas para que poidan traballar en terreos municipais, axilizar a tramitación de permisos e impulsar o tratamento da terra contaminada”.

Estudo,seguimento e control do chan e da auga

As actuacións contempladas na candidatura deste proxecto LIFE, abranguen a caracterización hidroxeolóxica do terreo, a perforación e instalación de ‘piezómetros’ nas áreas seleccionadas coa finalidade estudar a calidade da auga subterránea, a aplicación de técnicas de fitorremediación e biorremediación, o seguimento da calidade do chan e da auga, con especial atención a os seus servizos eco-sistémicos e o seguimento do control do contaminante e a súa capacidade de biodegradación.

Doutra banda, dentro deste plan haberá unha replanificacion, que será consultada coas partes interesadas, para reorientar o uso dos terreos recuperados, elaborarase unha guía de orientación para veciños e propietarios sobre a contaminación por lindano e os resultados de todos os estudos se presentará, ademais de aos afectados, no Porriño, en seminarios nacionais e internacionais.